بأعلى صوت طلاب وطالبات ليدز: "الابداع والابهار تخصص قطري "!!

[Abdulla Al-Malki]

بسم الله الرحمن الرحيم

18-4-2007 يوم تاريخي لكل طلاب وطالبات ليدز حيث اقيم المعرض (الاول) عن دولتنا قطر .. والحمد لله انتهى المعرض ولم تبقى الا الذكريات .. فالله لك الحمد والمنه انك اعنتنا على رد جزء بسيط لبلادنا قطر من خلال هالمعرض البسيط اللي حمل في طياته معانا ساميه ..

شكرا لكل المسؤولين ..
شكرا لكل طالب وطالبه في ليدز ..
شكرا لكل الشركات الداعمه لنا ..
شكرا لقطريز على الدعم الامحدود والتشجيع المستمر ..

بالامس كان المعرض حلم يراود مخيلة " طارق الساعي " .. لكن اليوم المعرض حقيقه فنجاح المعرض اهديه لاخوي العزيز طارق الساعي وكان ودنا انشوفك فيه عشان نفرح مع بعض واشوف البسمه على وجهك البشوش يا بوعبدالله .. لكن في السنوات الجايه ان شاء الله ..

واخيرا ..

نستمر ونقول دائما بفخرر واعتزز مع احترامي للجميع :
" الابداع والابهار .. تخصص قطري قطري قطري "

وان شاء الله الشباب راحوا ينزلون تفاصيل المعرض في موضوع اخر .. لكن حبيت من هالموضوع افصاح بعض من مشاعري بنجاح هالحدث ..

تحياتي لكم ::

[Mohammed Al-Mansouri]

كان ودي احضر واشوف المعرض...
بدون مجامله ...من شاف الي شغلين على المعرض فعلا يتوقع منهم شي مبهر...هالشي مب غريب عليكم
وفنتظار التقرير بفارغ الصبر

موفقين ياشباب
والله يعطيكم العافيه :)

[Tareq Al-Saei]

الأخ العزيز على القلب

عبدالله إبراهيم المالكي

لك كل الشكر على الكلمات الرائعة من شخص رائع مثلك... وانت من النوادر في هذي الدنيا

صراحة تعجز كل كلمة تسكن معجم المدح من أن تفي حقكم من المدح والثناء والفخر

بالفعل رفعتوا راسنا وراس هل قطر

وحتى الأندية الثانية انبهرو منكم ... :)

ويعلم الله كم كنت احاتي المعرض مثل ما أي واحد فيكم كان يحاتيه .. واحساسي اني معاكم ما فقدته إلى أن انتهى المعرض



لكم كل الشكر يا شباب ويا بنات على هذا الانجاز وبالفعل يضاف إلى رصيدكم ، وبتمر السنين وبتعرفون انه اللي سويتوه هو بذره راح تشوفون ثمارها بإذن الله ... ولندعها للأقدار


أحب أوصل أعلى مقامات الشكر إلى الأخوة والأخوات في جامعة ليدز... كلهم بلا استثناء

وأخص بالذكر شباب نادي الطلبة القطريين


وأخص منهم هذه الكوكبة :

أخوي ثاني المالكي

أخوي عبدالله الفيحاني

أخوي عبدالعزيز المولوي

أخوي سلطان الكواري

والأخوات كذلك

اللي لو لا الله ثم جهودهم وتعبهم ما صار المعرض

ولا على حد قصور


وكل اللي وقفوا ونسقو و جهزو وشالو وحطو وساعدو ولو بفكرة ولو بكلمة ولو بدعوة صادقة ... كلهم هذا انجازكم كلكم ولكم كل الشكر


تستاهلون من يوقف على ذكركم ويتم التصفيق لكم بكل حرارة الدهر كله

كفيتو وفيتو ..


وننتظر الصور والتقرير الجميل في أقرب وقت ممكن


أخوكم

[Adel Al-Jalham]

طارق ماخليت لنا شي نقوله كفووو يا شباب ليدز وهذي من عوايدكم التخطيط والعمل والاتقان وان شاء الله نكون وياكم في المعرض الجاي ونساعدكم لان الشغل وياكم فخر وشرف :)

[Hamad Al-Ibrahim]

مبروك علينا شباب مثلكم وشرواكم...كفيت ووفيتوا

وكلنا قطر...يز

[Essa Al-Mansouri]

بصراحة ودي اوفر كل الكلام المزدحم في راسي للتقرير الرسمي

لكن كلمة وحدة ابي اذكر فيها في هالمقام لكل اللي اللي يعزون بلادهم
والتذكير يشمل الناس اللي كانوا في بريطانيا وطوفوا المعرض على انفسهم

معرض مثل هذا كان يستحق حتى انكم تتعنون وتسافرون من قطر إلى بريطانيا لحضوره

[Majid Al-Meer]

بيض الله وجوهكم ..... ما قصرتوا ... رفعتوا راسنا فوق

أخوكم /ماجد المير

[G.Rashid]

ماقصرتوا .. . و كفيتوا ووفيتوا ..

"بانتظار التقرير"..

[Abdulla Al-Malki]

وشكر خاص لاخواني حسن الابراهيم والسمي عبدالله المالكي على تشريفهم لنا وحضورهم وكان وجودكم يعني الكثيييييييير لنا !!

[Ahmed Al-Nameh]

الله يعطيكم الف عافية ..

صراحة شوقتونا :rolleyes: .. نبي نشوف التقرير


سلطان وينك :D

[Abdulla Al-Fayhani]

يعطيك العافيه اخوي عبدالله على الموضوع ..
والصراحة بوعبدالله كان مكانه كان مبين .. وهو كان بيجي يحضر المعرض .. بس الله يجازي اللي كان السبب !! لووووول

والشكر موصول لاخوي حسن الابراهيم .. والاخ العزيز عبدالله المالكي على حضورهم وتشريفهم لنا ..

وكذلك .. احب اشكر كل من رد على هذا الموضوع ..

وحق اللي يسالون عن التقرير .. نحتاج كم يوم نعد لكم تقرير متكامل .. فاصبروا علينا شوي !! لووول

وتحياتي للجميع :)

[Abdulaziz Al-Mawlawi]

والله اني افتخر وارفع راسي بطلاب و طالبات ليدز ..

جهد جبااااار .. واكثر من جبار .. كان على مدار يومين ...

والله ان اليوم الاول (( يوم ترتيب المعرض )) من 8 بالجامعه لين 12 بالليل .. بديتها بدعايه ونهيتها بأبداع الشباب والبنات اللي تجسد بالمعرض ..

الترتيب صار في زمن قيااااسي .. كانو الكل قايمين فيه من بنات وشباب .. تعب في تعب في تعب .. بس كان الناتج فرحه وشعور ماينوصف ..

المكان كان فااااضي ومافيه ولا شي ... بعد ساعه كان مليان كراتين وعفسه ... بعد 5 ساعات صار من اجمل مايمكن .. و اردد واقول كل هاي بصناعة قطريه متميزه بيد عيال قطر اللي في ليدز ...

جا وقت المعرض و كنت حاط يدي على قلبي في اول ساعه ... ماشفت الا خليجيين وكمن انجليزي .. قلت حراااام تعب البنات والشباب يروووح .. بس مامرت ساعه الا شفنا المكان مليان عالاخر .. ومايمديك تسوي شي من الزحمه .. والشي اللي صج جا في وقته و اثر تأثير مب طبيعي علي مسج اخوي الغالي و شيخ ليدز طارق الساعي (( اللي وقتها ماكنت عارف من اللي مطرش المسج )) .. وقال بالحرف الواحد (( قطر وأهلها يفخرون فيكم .. بيض الله ويوهكم .. ويعطيكم العافيه )) .. ماتتصورون هالكلمات البسيطه اشسوت و اشلون أثرت فيني ... مااعرف شااقولك يا طارق .. بس اللي اقدر اقوله ان كل اللي صار الحين انت اللي زرعته .. وانت اللي بديته .. و الحين تقدر تفخر باللي سويته وزرعته .. ومكانك صج كان مبين .. وتمنينا ان نشوفك مع عبدالله المالكي و حسن الابراهيم اللي جيتهم اثلجت صدورنا والله وصج وسام على صدورنا .. (( ماااقصرتوا يالشيووخ )) ..

خلص المعرض اللي امتلا بالاشاده ومن كل الجنسيات .. الكل كانو مستغربين ان هالشي صناعة طلاب .. ومب في بلادهم .. في الغربه و سوا هالشي من الالف لين الياء .. بجهدهم وتعبهم .. النوادي اللي قبلنا امثال النادي العماني و النادي السعودي (( اللي تأسس قبل 15 سنه )) مااوصلوا للي سويناه .. و خذوا افكار كثيره من معرضنا و اولها الخيمه اللي طلبوها منا ..

خلص المعرض وبدينا انشل اللي سويناه .. و صج تحز في النفس انك تشل الدبابيس اللي علقت فيها الصور .. يحز في النفس السدو اللي فرشته انك تشله .. تحز بالنفس الطاولات و البوردات اللي عرضت قطر للاجانب بأحلى صورها واحنا نشلها ..

انطوت صفحه ما نقدر ان ننساها .. يومين مروا سنه .. مليانه بالاحداث .. ومليانه بالتعب وقلة النوم .. شباب مانامو الا ساعه وقامو للمعرض .. شباب يكملون ريبورتاتهم في نص المعرض على لاب توباتهم (( يعطيكم مليون عافيه وانتو عارفين نفسكم ,, والله انكم كبااار )) .. ردت القاعه مثل ماكانت قبل المعرض .. وصكيت قاعه كانت عررررس قطري بأحلى صوره .. صكيته بيدي و لين الحين في بالي الزحمه والاغراض ..

هاي كله كان صناعة طلاب ومحد فوقهم .. وفي الغربه .. والناتج شي روووعه .. و هالشي بيتم في تاريخ الطلاب القطريين اللي في بريطانيا كلهم اذا ماكان في كل العالم .. والتاريخ نفسه بيذكر ان البداية بأسم (( طلاب و طالبات ليدز )) ...



ماابي اذكر اسامي لان والله العظيم ان الكل ساهم وبدون استثناء .. من البرزدنت الفيحاني .. و سلطان .. وثاني .. و فيصل و ليييين اخر واحد .. والبنات اللي بدونهم كان المعرض ملخبط وكان لهم تأثير كبير في التنيسق والتنظيم و الاغراض اللي جابوها و اللي جنها طلعت من تحت الارض ولا جنها كانت في الكراتين اللي شلناها بيدنا ..



ابداااع و فوق الابداع يا عيال قطر (( في ليدز )) بيضتوها و رفعتوا روسنا ..

[M.Y]

الكــل يمــدحكــم وتستــاهلون اكثــر والله

الله يعطيــكم العــافيه وبالفعل رفعتوا راس قطر

[Sara Mohammed]

الله يعطيكم الف عافية ... بيض الله وجيهكم

كان بودي احضر المعرض ... ماعندكم صور للمعرض على الاقل انشوف المعرض ولو بالصور ...؟

تسلمون على المجهود الطيب اللي بذلتوه

[Sultan Al-Kuwari]

السلام عليكم ورحمة الله وبركاته ..

الايام تمضي .. ولين ألحين خيال مشاهد المعرض ماتروح عن بالي .. بعد هالانجاز الرائع .. بشهادة الكل .. والحمد لله .. هالنجاح ما كان بيطلع دون شغل الجميع .. فألف شكر لكل من تبنى الفكرة وساهم فيها ..

ألف شكر للأخ طارق الساعي .. صاحب الفكرة ..
وألف مليون مليار .. شكر للقائد عبدالله الفيحاني .. رئيس النادي اللي ما غفل عن اي تفصيل ..
وألف شكر للأخ ثاني المالكي .. اللي الصراحة عاش ضغط مب طبيعي .. بس علشان ما ينقصنا شي ..
والف شكر للاخ عبدالعزيز المولوي اللي ماقصر الصراحة ..
والف شكر للبنات .. اختنا المير واختنا العبيدلي واختنا كانو .. وكل بااااااااااااااااااااااااااااااااااااااااااقي خواتنا .. اللي ما قصروا في اي اي اي شي ..

والف شكر لكل الشباب اللي الصراحتة ما قصروا ..

وشكر للشركات الداعمة .. وشكر خاص لقطريز ..

وشكر خاص للاخ حسن الابراهيم والاخ عبدالله المالكي .. اللي تعنوا من الدوحة بس لاجل حضور المعرض ..

والف شكر لادارة الاندية في الجامعة اللي ما قصروا معانا ..

والف شكر لاخواننا الخليجين .. اللي ما قصروا في تقديم اي مساعدة ..

والف شكر لاخواتنا الخليجات اللي بعد ماقصروا ..


والف شكر لكل الاخوان اللي تعنوا من مدن ثانية وحضروا ..

والف شكر لكل الاجانب ..اللي حضروا .. وسبب نجاح المعرض ..

وألف شكر لكل من دعا لنا بالتوفيق ..

وسامحوني اذا نسيت حد ..

--------------

هاذي البداية .. وان شاء الله الجاي احسن وافضل ..

وكله من أجل حبيبتنا قطر ..


والسلام عليكم ورحمة الله وبركاته

[Ahmad Al-Soqatri]

معرض مثل هذا كان يستحق حتى انكم تتعنون وتسافرون من قطر إلى بريطانيا لحضوره

وانت ما سويتها

[Sultan Al-Kuwari]

lalala.. Isa was one of the first ppl who came..


w el 9rar7a ma ga9er sa3dena ..

w bayyeth waih Qtr.

:)

[Tareq Al-Saei]

كفووووووو والله عليكم

عبدالعزيو المولوي عطيتني اكثر من حقي ... ووالله اكثر لحظة تحسفت عليها هي لحظة اللي كنتو تحطون الكراتين واترتبون كنت اتمنى اكون معاكم

..

الريييييييس عبدالله الفيحاني ،، والمبدع سلطان الكواري ... كلامكم له أثر كبير على نفسي وما قصرتو

بومبارك .. واللي كان السبب .. على حله .. لووووول اخاف قاعد يشيك ههههههههه


تستاهلون كل كلمة انقالت فيكم ... وتستاهلون كل دعوة اندعة لكم ... وتستاهلون وسام الصدارة بالدرجة الأولى من مملكة الأبداع

:)

كل الشكر لكم جميعا ..

[R.A.A]

الف الف الف الف مبروووووووووووووووووك نجاح المعرض

ولو اني ماشفته و أتمنى ان الشباب يسعفواااا بالتقرير بأسرع وقت ممكن.

بارك الله فيك و كثر الله من شباب و شابات يرفعون أسم قطر بكل فخر في جميع المحافر الكريمه و في كل دول العالم.