سؤال لطلبة الجسر [الأرشيف] - منتدى شبكة الطلبة القطريين

M.k Al-thani

12-06-2006, 04:40 PM

السلام عليكم ..

حبيت اسألكم .. :confused:

لو في صف للبنات بس .. :rolleyes:

في الجسر ؟؟

وهل تنصحوني ادخل الجسر أو لا .. بس اتمنى انكم ما تجاملوني قولوا لي بصراحه .. يعني انا خايفه شوي من مسألة الاختلاط موترتني يعني احس اني ماراح اقدر اتكلم يعني بيفكروني طرمه:p بليز قولوا لي لاني فعلا محتاجه نصيحتكم لأني قريت في موضوع هل استفدتوا من الجسر .. في عضو مدح الجسر وايد .. وفيه اعضاء انتقدوه .. انا محتاره شاسوي بعمري

Abdulrahman Fakhroo

12-06-2006, 05:08 PM

السلام عليكم

ترى مافي صف بس بنات.. لازم مكس

وراح يغصبونج انج تسوين Projects مع الشباب

اظن هذا الموضوع تحدثنا عن الجسر واعطيناه حقه.. ويمكن أكثر
تفضلي اللنك
http://www.qataries.net/vb/showthread.php?t=4928

M.k Al-thani

12-06-2006, 05:12 PM

مشكور اخوي بس انا قريت الموضوع .. بس حبيت اعرف شنهي نصيحتك لي ..
هل من الافضل اني ادخله او لاء ..

يعني هل بيفيدني وايد .. والا مثل ماقالوا بعض الاعضاء انه سنه عالفاضي !!:(

Sharifa Al-Nisf

12-06-2006, 09:29 PM

السلام عليكم ورحمة الله وبركاته

مرحبتين اختي..

الموضوع السابق فيه معلومات وايد عن الجسر من حيث ايجابياته وسلبياته

بالنسبة لكلاس البنات: لا مافي كلاس ،، والبروجكت مرات يكون مختلط على حسب المدرس والمدرسة يعني انا السمستر الاول اشتغلت في بروجكت بروحي،، السمستر الثاني اشتركت مع صديقتي.. يعني كل شي حسب طريقة المدرس او المدرسة.. وانا ذكرت في الموضوع السابق انج مب مضطرة تكلمين شباب..

وبالنسبة لسنه عالفاضي.. انا ماشوف انها عالفاضي.. انتي لازم تتعبين ولازم تحاولين تطورين نفسج.. لاتكتفين بالهوم وورك ولا الكوز والكتاب.. حاولي تطورين لغتج وراح تستفيدين .. الجو هناك وايد مشجع على تعلم اللغة.. وراح تتعلمين اشياء وايد بتفيدج للجامعة..
اذا ماعجبج الجو تقدرين تاخذين بس سمستر واحد.. وتطلعين السمستر الثاني وماراح تدفعين شي.. بس مادري اذا الهيئة بيعطونج بعثة بعدين ولالا..

واذا ماتبين الجسر خذي ايلتس من الحين لان هالسنة فيه استثناء يبون 5.5 بس السنة الياية يبون 6

بس بسألج اختي تبين تدرسين في المدينة التعليمية؟

S.J.A

12-06-2006, 09:32 PM

السلام عليكم ورحمة الله وبركاته

أختي M.k Al-thani

أنا بسألج سؤال .. إنتي وين حاطه ببالج تدرسين !

إذا بتدرسين برى قطر .. أنا أقولج روحي إخذي الفاونديشن برى ولاتضيعين سنه في الجسر

إذا بتدرسين في المدينه التعليميه .. أتوقع فرصة القبول الحين راحت عليج حاليا وماعندج مجال إلا السنه الجايه .. فدشي الجسر

ولكن!! شدي حيلج فيه وحاولي تييبين في المعدل فوق 3,5 وإشتغلي على التوفل والسات بنفسج ولاتعتمدين على الجسر فيهم

إذا تبين جامعة قطر .. بالأول لازم تتأكدين من شغله .. هم العام قالوا لنا إن الدفعه الجديده إللي هي دفعتكم في قانون جددي بيتطبق عليهم

وهو في حالة إن الطالب يبي يدرس بجامعة قطر عقب الجسر مايخلونه يدش الجسر لان جامعة قطر لها برنامج تأسيسي خاص فيها

عشان جذيه يبون يعطون الأولويه للطلاب إللي بيدشون المدينه التعليميه .. أنا مب متأكده من الموضوع ولكن سألي هيئة التعليم العالي

في حالة إنه عادي ويصير .. دشي الجسر وعقب حولي على جامعة قطر

موفقه إن شاء الله

:)

Sharifa Al-Nisf

12-06-2006, 10:17 PM

Ahmad Telfat

13-06-2006, 04:26 AM

يااختي خلج من الجسر واهواله وتوكلي على الله وادخلي جامعة قطر ..

للأسف من الصعب أن يتواجد الرجال والنساء في مكان واحد ، والله يستر علينا وعلى جميع المسلمين ..

تحياتي

أحمد تلفت

R.A.A

13-06-2006, 05:41 AM

أختي وين حابه تدرسين؟؟

هذا أهم سؤال وعلى أساسه نقدر نجاوبج ونفيدج إن شاءالله.

وإذا قدمتي توفل ولا أي اختبار لغه كم جبتي فيه؟

S.J.A

13-06-2006, 08:04 AM

السلام عليكم ورحمة الله وبركاته

"إذا بتدرسين برى قطر .. أنا أقولج روحي إخذي الفاونديشن برى ولاتضيعين سنه في الجسر"

الهيئة بيخلونها؟؟

"هم العام قالوا لنا إن الدفعه الجديده إللي هي دفعتكم في قانون جددي بيتطبق عليهم

وهو في حالة إن الطالب يبي يدرس بجامعة قطر عقب الجسر مايخلونه يدش الجسر لان جامعة قطر لها برنامج تأسيسي خاص فيها"

انا اشوف ان محد راح يقول انه بيدش جامعة قطر :) في البداية نكون مشتطين وكلنا نبي المدينة التعليمية ولا برا..

والهيئة اظن مايقدرون يمنعون اي طالب انه يدش الجسر،، لان الواحد يدش وهو مايدري اذا يبقبلونه في الجامعات اللي هو بيقدم عليها ولا لا..

من تجربتي انا تطورت وايد في التوفل في الجسر والحمد لله..

هلا شريفه

أكيد بيخلونها تاخذ الفاونديشن لو عندها قبول من الجامعه

إنتي يمكن تقصدين كورس لغه برى .. في هالحاله مايعوطنها بس الفاونديشن يعطون

وعن جامعة قطر .. أنا إللي سمعته إن الطالب إللي دش الجسر وماإنقبل في المدينه التعليميه مثلا يدبر عمره يطلع برى ويروح أي جامعه بس مب جامعة قطر

لأن مثل ماقلت الحين خلاص سووا لهم نظام تأسيسي خاص فيهم

بس العهده على الراوي وأنا سمعت الخبر من المشرفين اللي في الجسر "وقالوا يمكن هالشي يصير"

وأنا أقول تأكدوا من الهيئه أحسن

:)

Fahad Al-Jefairi

13-06-2006, 08:25 AM

اختي الكريمة ..بصراحة اهم شي مثل ما قالت الاخت S.J.A انتي لازم تختارين او تعرفين وين تبغين تدرسين ..

اذا ودج ان تدرسين في جامعة قطر ما في فايدة من الجسر ...

اذا ودج تدرسين في بريطانيا ... وعندج توفل وحصلتي بعثة ... مافي فايدة من الجسر ...

اما اذا ودج تدرسين في المدينة التعليمية او امريكا وماعندج التوفل والسات ... فالافضل انج تدخلين الجسر ...

وبالنسبة للاختلاط في الجسر فما اقول الا الله يعينكم ... والانسان هو اللي يفرض احترامه على الناس ...

M.k Al-thani

13-06-2006, 10:49 PM

يعطيكم العافيه انا بدخل الجسر عشان ادرس في الكارنجي ميلون وبعدين انا رحت هيئة التعليم العالي و انصحوني ادخل الجسر سواءا بدخل جامعة قطر او من المدينه التعليميه بس متردده ومشكورين على مساعدتكم

R.A.A

14-06-2006, 12:55 AM

الله يوفقج أختي وين مادرستي.

وتبين رأأي توكلي على الله ودرسي فيه. الجسر إذا مارفع من مستوى اللغه عندج مب منزله أكيد.

أتمنى لج التوفيق دنيا و أخره

Mohammed Al-Mannai

14-06-2006, 04:07 AM

بسم الله الرحمن الرحيم

تصحيح : الجسر يفيد الطلاب الي بيدخلون جامعة قطر لانه بيحذف لهم مواد التأسيسي في الجامعة ومستوى التأسيسي في الجسر ارقى من الجامعة

اختي النصيحة بختصار : اذا حصلتي قبول في اي جامعة تبغينها توكلي على الله ودخلي ... واذا ماحصلتي قبول وقالوا لج لازم فاونديشن توكلي على الله ودخلي الجسر وان شاء الله راح تستفيدين

وشكرا

Abdulrahman Fakhroo

14-06-2006, 05:22 AM

تصحيح : الجسر يفيد الطلاب الي بيدخلون جامعة قطر لانه بيحذف لهم مواد التأسيسي في الجامعة ومستوى التأسيسي في الجسر ارقى من الجامعة

تعديل: الجسر يفيد الطلاب الي بيدخلون جامعة قطر وأصلا ماكان عندهم توفل.. فبدال مايدخلون تأسيسي بجامعة قطر يقدرون يدخلون الجسر

لـــكـــن

المواد ماراج تنلغي الا اذا بديتي Intensive 2 أو Academic 1

ولازم تنجحين بالمواد (الرياضيات والانجليزي والكمبيوتر) عن درجة لا تقل عن C