حدود العلاقه بين الطلبه والاساتذه

[Dana Al-Kuwari]

السلام عليكم ورحمة الله وبركاته..

الصراحه عندي موضوع ودي اطرحه من زمان بس خفت انه يكون جرئ نوعاً ما وينلغي كما هي طبيعة الحال :) ..

بس بعد ماشفت موضوع اخوي محمد تشجعت.. خصوصاً وانه موضوع حساس وله صله فينا بما ان الاغلبيه فالموقع طلبه وطالبات..

فالاونه الاخيره ياكثر مانشوف فالمجلات والقنوات الفضائيه وحتى الجرايد المحليه واقربها من تقريبا شهر في جريدة الشرق وتتكلم عن استاذه بريطانيه ..

محاكم وقضايا وعقوبات والسبب؟؟

علاقة الطالب بالبروفيسوره بالجامعه او المدرسه ..
وعلاقة الطالبه بالبروفيسور..

هل تعتقد او تعتقدين ان الغلط ينصب عالطلبه ولا الدكاتره؟؟

باخلي لكم الموضوع مفتوح ونشوف ردوكم ..

[Mohammed S Al-Rumaihi]

مشكوره اختي دانه والله خلج قويه ولاتنزلين موضوع الا بيسوي ضجه وايثاره مثل طبعا.:cool: ...

موضوع عجيب وانا الصراحه اشوف ان لازم تكون العلاقه بين الاثنين (الطالب او الطالبه والمدرس او المدرسه) حلوه يعني لاتخيس النفس ودايمن مكشر في نفس الوقت...انا هذي اكبر مشكله امواجها فالجامه ومن يوم كنت فالمدرسه من فبل اذا ماده الي يدرسني فيها مدرس تلقون درجاتي دايمن نازله من كثر المشاكل مع المدرس والمناحس مع اني ماقول ولا اسوي الا الصح ولكن اذا الماده تدرسها مدرسه تلقون درجاتي فالعلالي والله اعلم وشو السبب:rolleyes:

والله انا اشوف عادي مافيها شي لو واحد حب له مدرسه اتدرسه ( وبعد هي تحبك يا سلاااام )ويكون احسن لان اوقات مايكون في حل ترفع درجاتك الا بهذي الطريقه يعني لو حبتك المدرسه بتعيش في نعيم وبتفتل وعقب ماتخلص الدراسه قولها السلام عليكم وخذ شهادتك وكان الله غفور رحيم:D

هذا رايي الشخصي ومادري عن الغير

[Saif Alkaabi]

والله انا عندي المدرس يدرس عدل احسن من المدرسة
المدرس صج يدخل الملعوومة اما المدرسة كل تعلج وتكحل ومدرساتي كلهم يحبووني حبهم برص التظبط معاهم بالجامعة مب اللغة بضبط عدل معاهم
بووسعد حظك المدرسة ترفع درجاتك لانها معجبه بشخصيتك وهذي الصراحة ومن حقها تنعجب بشخصية الطالب
والله يوفقك انشاء الله

[Saud Aldolaimi]

مشكوره دانه على الموضوع الحلو

لا لا لا صراحه انا ضدك يا سيف والله انا افضل الدكتوره افضل من الدكتور ....الدكتوره مهما علت مرتبتها العلميه بتضل إمراه رحومه عطوفه تعطينا ترجات وتسوي Carve up وهاي اهم شي في الماده صراحه خاصة إذا كانت تخصص ....بس رجوعا للموضوع العلاقه الحلوه بين المعلم والمتعلم تاثر إجابيا على الاثنين على الطالب في نتايجه للماده وعلى المدرس متى ما تنفتحت نفسيته للتدريس وان هناك ناس يهتم فيهم ويبذل كل جهده لتوصيل المعلومه لهم صراحه ....
والدليل الطلاب دائما مع المدرس المتعاون درجاتهم عاليه في مادته وبالعكس لو الود ودهم خذوها مره ومرتين بس عاد ما راح تتسجل لهم .......
المهم الموضوع اعجبني وحلو النقاش فيه

تحياتي لكم

الدليمي

[Mohammed Al-Mannai]

بسم الله الرحمن الرحيم

احسن علاقة بين الدكتور والطلاب انها تكون علاقة ابو وولده
او ام وبنتها

وشكرا

[R.A.A]

:) هلا والله وغلا بأختي الغاليه دانه الكواري.

أولا أشكرج على طرح هالموضوع إلي يناقش نقطه أساسيه ومهمه في مجرى العمليه التعليمه وخصوصا التعليم العالي من بكلوريس فما فوق.

ثانيا...صراحة ما أقرأ الشرق وماسمعت بسوالف الخلافات والقضايا إلي صارت بين طلبه و أساتذتهم في بريطانيا..فياليت ولو مافيها عليج أمر ولاكلافه تذكرين لنا أمثله من هالقضايا أو مختصر مفيد عنها وسببها ووين صارت بالضبط و شنو سبب الخلاف.

وشكرا

[Dana Al-Kuwari]

اول شي يعطيكم العافيه عالردود شباب وشابات..

اختي R.A.A
بخصوص القضيه في جريدة الشرق كانت تتكلم عن مدرسه بريطانية الجنسيه وتحرشها بطلابها المراهقين وحكم عليها اذا ماخانتني ذاكرتي سنتين سجن..

الامثله الاخرى ياعزيزتي كثيره وفي اشيا كثيره ماتطرق لها الطلاب جايز لاني ماوضحت الوضوع بشكل ممتاز من البدايه مثل؟؟

1: لما يكون البروفيسور غير كفوء انه يكون مربي اجيال ويحط دوبه دوب طالبه جايز يكون معجب فيها بس دايما يلاقي صدود منها.. وهات ياتخسيس فالدرجات..
والعكس صحيح مع بروفيسوره وطالب.. وهالحاله اعدها قليله

2: حدود الطلاب من الجنسين مع البروفيسوريه كمثال:

ممكن اني اعزم التوترز ولا الدكتور لعشا ويكون شي جدا عادي واكثر الكلام يكون عن الجامعه والمواد وثاني يوم يقدم الشكر قدام الطلاب بشكل اكثر من عادي..
والعكس صحيح مع بروفيسوره وطالب..

ناحيه ثانيه الا وهي:
اني اوظف الدكتور لصالحي واحاول اني اجيب راسه باي طريقه علشان يتظبط حالي فالماده و دربي يكون خضر..

ناحيه ثالثه الا وهي:
الطالب الانترناشونال.. والاغلبيه ملاحظ الدكاتره يكونون ميالين كثير له بحكم حب الاستطلاع عن بيئة هالطلاب..بالتالي الطالب يستخدم هالشي في صالحه..
(والي يعزمه على مجبوس في بيته ولي يرويه الخيمه والمطايا :) )

الناحيه الرابعه والاهم في وجهة نظري:
الدكاتره العرب.. موضوع يطول النقاش فيه واكثر المشاكل فيه بحكم العادات والبيئه المحافظه وكثير انسمع عن الزواج العرفي كمثال في مصر؟؟ حقيقه لامفر منها :)

وفي وفي وفي اكثر من نوع لعلاقة الطلبه بالدكاتره.. بس ارجع
واقول هل الطلبه هم الي يبادرون بالشغله اول؟؟ ولا الدكاتره؟؟

ويعطيكم العافيه

[Nayef Al-mansouri]

السلام عليكم ورحمة الله
جزاكي الله خير اختي
وباختصار
المعلم يجب ان يعلم الطلبه
وان يكون ابا حنونا ومتفهما وناصحا لهم
ويكون اخ لهم
واهم من هاي كله صديق صالح
فهو يحمل رساله وامانه في عنقه ويجب ان يؤديها بشكل متقن
بارك الله فيكي

اخوكي نايف

[R.A.A]

والله سالفة معقده.

لكن الخطأ وارد في جميع الظروف والمواقع. مرات الطبيب يكون يحترش في مرضاه...ومرات العكس...مرات المدير بالعمل يحترش في إلي تحت أمرته..ومرات العكس...بغض النظر عن المدرس أو الطالب.

أعتقد أن الطالب لازم يعرف أن 95% من تواصل الأنسان غير لفظي...يعني نغمة الصوت..طريقه اللبس ملامح الوجه..كل شي....فلازم الطالب لما يتكلم مع مدرسه يحسسه أنه يحترمه وينظر له كقدوه مب كشي أخر عشان ماينفهم الموضوع غلط من قبل المدرس.

وإذا مدرس يتحرش ولا له مأرب أخرى...والله ياحلو الدروب ((الحذف)) يمدحونه ترا. و إذا مافي مجال...يتجنب ولا يقول الطالب أو الطالبه للمعلم أنه يعرف حقوقه ويعرف ان هالشي إلي يلمح له ولا يسويه غلط ويعرف شلون يشتكي عليه وبيتسنع المدرس طبعا.

مافي حد ضعيف في هالدنيا. الأنسان لما يعرف إلي له وإلي عليه وحقوقه وواجباته و يعرف مراكز قوته يعرف شلون مايسمح لأحد يأذيه خصوصا جسديا. مب مثلا البنت تروح للدكتور أخر الدوام والدنيا صخه ولا بعد الدوام ومتعدله وتقول تحرش فيني. حتى لو أنطلب منها تروح له المكتب في هالوقت ماتروح بروحها وتاخذ وياها حد. وطبعا الولد حامي نفسه مايحتاج له توصيه.

[M.A.A.Al-Ansari]

السلام عليكم

والله انا اشوف عادي مافيها شي لو واحد حب له مدرسه اتدرسه ( وبعد هي تحبك يا سلاااام )ويكون احسن لان اوقات مايكون في حل ترفع درجاتك الا بهذي الطريقه يعني لو حبتك المدرسه بتعيش في نعيم وبتفتل وعقب ماتخلص الدراسه قولها السلام عليكم وخذ شهادتك وكان الله غفور رحيم

هذا رايي الشخصي ومادري عن الغير

عجبت من ماقرأت وطال ذهولي أياماً ليس من ماقلت فقط ولكن من صمت الأعضاء أيضاً..!!

ماقلته أخوي محمد لاينم
لا عن أخلاقنا العربيه..
ولا أخلاقنا الخليجيه..
ولا عرفنا ولا تقاليدنا..
ولاينطبق على تعاليم ديننا..
ولا يتفق حتى مع المشاعر الإنسانيه ..!

وكل الكلام كوم و
"كان الله غفوراً رحيماً "
كوم ثاني .!!
ان كنت تحتال على أحد فأنت تحتال على نفسك
مافي أحد اخوي (يخطط) يضرب صديقه
و عقب يقوله ربي كتب...!!!

أتمنى أن نقف ونراجع أنفسنا قبل أن نكتب أي شئ من هذا القبيل
فنحن محاسبون أولاً وأخيراً
حتى لو كانت حريتك الشخصية
فأنا احترمهــــــــــــــــــــــــــا
ولكني استنكرت!!!
لا أدري إن كان المتغربين من شباب وطننا على هذا النمط من التفكير
فعزة الله بنات البلاد ضاعوا ..!!
لا أقصد البلبله والمشاكل بما قلت
لا والله..!
ولكن هو رأي على رأي
لك أخي أن تقبله أو ترفضه

تقبلوا مني جميعاً فائق الاحترام
اختكم في الله
M.A.A.AL-Ansari

[J.Y.J.Al-Darwish]

M.A.A.Al-Ansari

استنكارك في محله..

وأنا اوافقك الرأي !!!

[Hamad Abuqaba]

نصيحة!!

اذا عرفت ان البرفيسور شيبه ولا عيوز , حط ريولك في بطنك وشل عليها. ترى كبار السن في يعلون صحتك عل!!

ومن ناحية العلاقه: انصحج تخلينها علاقة سطحيه في البدايه, خلي اول شي يخليج تبرزين عند البروفيسور هو درجتج, يعني حلاتها لمن يدخل البروفيسور عقب الميد تيرم ويسأل من فلانه ويقول اسمج!! الدرجه العاليه غير المتوقعه من طالب "هادي" لها وقع الصدمة عند البرفيسور, ومن هني تنظمن الاي والا الاي بلس لحد نهاية التيرم.

[R.A.A]

دانه وينج؟؟؟؟

حطيتي الموضوع ونسيتيه الله يهديج وبعدين وعدتينا تبدين برايج فيه. عاد لاتبخلين علينا.

يالله يحفظج أختي ولاتحرمينا من مشاركتج وينا.

[Dana Al-Kuwari]

اييييييييه يا ار اي اي ..
سبحان الله موضوع من زمااااان عنه.

ماتذكرته الا لما حسيت بان قلبي بدى يميل لبروفيسور وقلت اجي افضفض فيه.



<<< الله يعينج يا دانا الحين
الكل بيجي وبيكتب لنا رد ردين حلوين ههههه

[Omar Al Hazaa]

هههههه حاسبي لايسمعج خطيبج..

ليش قلبج بدى يميل للبروفيسور؟

[Dana Al-Kuwari]

اسكت بس ياعمر.
خطيب بداله الف.. يامكثر الرياييل معققين على قوله هل الامارات.

وبخصوص سبب الميلان فا احتفظ بالسبب
خبرك عاد

[Omar Al Hazaa]

ههههه احتفظي ابركلج..

[M. Al-Merekhi]

خير الكلام ما قل ودل ...

طلب العلم أمانه

و تعليم الغير أمانه

و العمل أمانه

كل المطلوب ان احنا نصون الأمانه و نعمل بما يرضي الله ... انا طالبه و معلمه و موظفه و مديره وما اشوف اي دور للعلاقات الشخصيه في هالامور ... كلها علاقات انسانيه و احترافيه بحته ... ماله داعي "نظبط" و لا "نميل" للأشخاص, نسوي اللي علينا و الباقي على رب العالمين ...

[S.S.Ahmed]

:)

أحفــظ الله يحفظك

\\
\\\
\\
\\\
\\


مــن أراد الحماية مــن الله فليحفظ الله أولاً وليجعله نصب عينيه...


صحيح إن المشاعر في كثيراً مــن الأوقات لا سيطرة لا إختيار للإنسان لها,,ولكنه يملك القدرة على السيطرة عليهــا....



وعــزيزتي دانــة


وبعــد هــذا الميل للبروفيسور مــاذا سيحدث؟؟؟ هــل تسائلتي ((إلــى أين سيذهب إعجابي به؟؟))

تذكري بأنه لاذمة له,,وتذكري بأنكِ مسلمه قبل أن تكوني خليجية.....


عزيزتي كمــا أسلفت سابقاً أنتِ ذات روحاً وقلباً صافي,,فــلا تطمسي هذه الصفات الحميدة بأفكار الغرب....


\\
\\\
\\
\\\
\\

إذا الغــرب الآن يشكون مــن تعلمين النساء للرجال,,والعكس كذلك,,ونحنُ نسعــى لهذا الأمـر!!!

عجبــاً لتناقضنــا!!!


فــلا أظن بأن الكثير مــن النــاس خرج مــن بيئة ذات أساس متين....فأنــا واقعيه وأتكلم عن واقع أعيشه وأراه كل يوم,,وأقول بأن أغلب الفتيات (وأتمنى أن لا يأتي أحد ويغالطني ويقول ×حرام وظلم×) أساسهن هش وينجرفن وراء عواطفهن مــن غير حتى الوقوف لثانية والتفكير (هــل ماأقوم به صحيح؟)

\\
\\\
\\
\\\
\\


الله المستعــان عــلى مــايصفون...

[S.S.Ahmed]

:)

كــل شي عــلى رب العالمين (وليس الباقي فقط) نحن نتوكل على الله ونقوم بواجبنــا والتوفيق الكلي من الله...

[M. Al-Merekhi]

:)

كــل شي عــلى رب العالمين (وليس الباقي فقط) نحن نتوكل على الله ونقوم بواجبنــا والتوفيق الكلي من الله...

اكييييييييييييد عزيزتي وشكرا للتنبيه :)

كل شي على رب العالمين و النعم بالله...

لكن القصد ان الانسان بسوي اللي عليه و يخلص النيه ...

:)

[Dana Al-Kuwari]

الميلان مو ضروري يكون حب وحاله ؟؟ شبلاكم ينيتوا؟

لو السالفه سالفه حب .. حبيت لي شاب من سني ووسيم وحليوه وئمر في سمااه..

هالبروفيسور غريب عجيب. دمه خفيف ضحكته ربانيه. شعره اسود وعيونه سود احس فيه دم عرب هههههههه
يعاملني احسن من الباقي وقلت له باسوي دروب للكلاس ماحس اني باعديه قالي اقعدي

رحت له فالاوفس اور اخذ منه اوراق قبل الامتحان بساعه قالي قعدي في مكتبي وطلع برى يسولف ويا الدكاتره وسكر الباب
ولما طلعت قام لي وقالي ماعندج سؤال ثاني؟ قلت نو ثانكس برفاسر .

الاي كونتاكنت شغاله 24 ساعه لحد ماقمت احط عيني فالطوفه ولا في كتابي

فديت خشمه والله . باجيبه الدوحه باقوله تعال حياك خالي بيتزوج احضر وشوف العادات والتقاليد
والعالم ان سالوا من ذي ؟ هذا دكتور دانا .. ذاك الصوب بيقولون ريلها

مجتمع عربي متسلط :)

جان زين والله يسلم واخذه. دكتور وبروفيسور وتخصص وعلم وجمال وادب..
معاشه فالدوحه بيغطى على معاش 3 قطريين فالشهر الواحد. :D
نحسن النسل بالمره ونجيب عيال دمهم مخلوط عربي على امريكي.
ندخل حضاره جديده عالعيله. اتمشى وياه فالمول يقولي هاني وسويت هارت يااااااااااويلي انصعق جي
القطري راحت عليه خلاص تعبنا من الاغتر والعقل والثوب القرطاس


وبعدين تعالوا شوي
تبون تنكرون بان بنات جامعه خطر مايميلون للبروفيسور ؟؟
بسبب اخلاقه او ادبه او اوا او او ؟؟؟؟؟؟
ياناس احنا بشر ونحس شدعوى عاد

ولا عشان منتدى ومختلط وفيه شباب كل وحده تسوي نفسها البرفكت ؟؟
سوالف جامعه خطر الكل يعرفها وتوصلني بامريكا .. استغرب يعني

[Eman Al-Marri]

وبعدين تعالوا شوي
تبون تنكرون بان بنات جامعه خطر مايميلون للبروفيسور ؟؟
بسبب اخلاقه او ادبه او اوا او او ؟؟؟؟؟؟
ياناس احنا بشر ونحس شدعوى عاد

ولا عشان منتدى ومختلط وفيه شباب كل وحده تسوي نفسها البرفكت ؟؟
سوالف جامعه خطر الكل يعرفها وتوصلني بامريكا .. استغرب يعني


كااااااااااااااااااااااااااااااااك يادانة ... ضحكتيني من قلب .. ولله احسج تتكلمين من خاطرج وودج تبقسين للبنات هني.. وموول مافي كلافه .. الموضوع كاش عندج..!

بس ماعليج مقدره شعورج .. وهالامور تستوي كثير وبشوفة العين .!

[Omar Al Hazaa]

اختي دانه..
في طالب كوري عندنا في جامعة قطر حب الاسلام وقال يبي يسلم..

اقول.. عطي البروفيسور كتيب صغير وحلو عن الاسلام..
وان شاءالله النتيجه تكون طيبه.. وابشري بالخير ههههه..

[Dana Al-Kuwari]

كااااااااااااااااااااااااااااااااك يادانة ... ضحكتيني من قلب .. ولله احسج تتكلمين من خاطرج وودج تبقسين للبنات هني.. وموول مافي كلافه .. الموضوع كاش عندج..!

بس ماعليج مقدره شعورج .. وهالامور تستوي كثير وبشوفة العين .!


مافي كلافه؟؟؟
ليش ليكون قاعده اكلم مجموعه من السفيرات واصحاب السمو ؟؟؟
طالبات حالهم حالي ليكون السالفه فيها حب خشوم بعد علشان اكلمهم؟؟ هههه

بس لاني اعرف تصنع البنات ومار علي وايد :)
سبحان الله يضهرون مالا يبطنون.. وانا كلامي موجه بشكل عام .. الي حاب يخصصه هو حر

[Dana Al-Kuwari]

اختي دانه..
اقول.. عطي البروفيسور كتيب صغير وحلو عن الاسلام..
وان شاءالله النتيجه تكون طيبه.. وابشري بالخير ههههه..


انا انسانه احترم الاديان كلها.. هو حر
وفي ظل الاوقات العصيبه نااادر من يتقبل اي حرف عن الاسلام.. للاسف الشديد

قصدك اعطيه كتاب عن قطر يقراه ويشوف ان احنا دوله متقدمه مب مطايا وخيام
وشوي شوي اعزمه الدوحه ويشوف كل شي بام عينه بعدين باصفقه بكتاب فاللوبي عن الاسلام. حزتها بيتقبل.

اما من امريكا اعطيه كتاب وعن الاسلام ؟؟

ياحليله والله منى عيني اشوفه فالدوحه ياسلااام ويستقر فيها ويشتغل وامر عليه عالاقل الاقيلي بني ادم اسولف وياه

[Omar Al Hazaa]

^
^

ههههههههه

تفائلي..

500 الف امريكي ادخلوا الاسلام بعد 11 سبتمبر..

شكلج مبعارفه الاحصائيات في امريكا عدل..
انتي قلتي ياليته يسلم وهذا الي خلاني انصحج انج تفهمينه شنو الاسلام..

عيل مادري شبتقولين اذا قلت لج ان في جنود فالجيش الامريكي اسلمو؟؟؟

[M. Al-Merekhi]

حبيبتي دانه ... انتي سألتي عن راينا بحدود العلاقه بين الطلاب و البرفيسور ... واحنا ابديناه.. اتفق معاج ان في ناس يدعون المثاليه و في الواقع لاء ... لكن مب الكل جذي ... :)

انا اتكلم عن نفسي لما كنت طالبه في الجامعه و لما كنت معيده و الحين انا موظفه ... ترى توني في اول حياتي المهنيه بس اتكلم عن رايي و عن تجربتي بس :)

الله يوفق الجميع :)

[Dana Al-Kuwari]

ياسلاااام معيده ؟؟؟
ياحيج..

اتخيل نفسي بروفيسوره بس اهم شي في قسم الشباب ههههه
والله باصفق الكل AAA يستاهلون عيالنا ايه عليهم .

والله مهنه التعليم شي راقي ..
بس ماحس اني باصلح فيها ..

اخاف احب لي طالب ولا شي .. قلبي رهيف ويهفهف مع الهوى الطاير ورقيق
لازم قبل لا يعينون حد يتمكنون منه ويشوفون شخصيته هههههههه

[Jassim Al-Naama]

السلام عليكم ورحمة الله وبركاته

متابع للحوار بصمت :)

اكتشفت أفكار جديدة ايجابية من خلال هالموضوع

واكتشفت آراء قد تكون صحيحة وقد تكون خاطئة

عموماً راح أكمل قراءة باقي الردود وارجع للتعقيب ان شاء الله

يعطيكم العافية ^^

[M. Al-Merekhi]

ياسلاااام معيده ؟؟؟
ياحيج..

اتخيل نفسي بروفيسوره بس اهم شي في قسم الشباب ههههه
والله باصفق الكل AAA يستاهلون عيالنا ايه عليهم .

والله مهنه التعليم شي راقي ..
بس ماحس اني باصلح فيها ..

اخاف احب لي طالب ولا شي .. قلبي رهيف ويهفهف مع الهوى الطاير ورقيق
لازم قبل لا يعينون حد يتمكنون منه ويشوفون شخصيته هههههههه


والله يادانه ترى انا ما قدرت عليها اول ماتخرجت لاني كنت بنفس عمر الطلاب و الطالبات ... يبي لها شخصيه ناضجه و متعوده عالتعامل مع الاخوان ... الصراحه ماقدرت ... بس اتوقع انج بتكونين بروفيسوره عجيبه الكل بيستغلج :)

والله مب بعيده عن رب العالمين انج تكملين و ترجعين بروفيسوره :) يالله شدي حيلج و فرحينا ...

[S.S.Ahmed]

:)

وأنــا قلت لــج يــادانــة بأن الكثير مــن طالباتنــا يمشون وراء عواطفهم....


يعنــي مــايخفى عــليج الدكاتــره الأجــانب إللــي عمرهم مــاتجاوز الثلاثينيات,,,,يعنــي تخيلي أشباه ××توم كروز×× , ××بيكهــام×× , ××وهذاك اللي في سبايدر مــان×× ,,وبنــــات خليجيات,,,يعنــي معـــادله نتيجتهــا في أغلب الوقت أكيده وهــي ××الإعجاب××



وأنــا مــاأزكــي نفسي,,,ولأنــي أعرف نفسي عــدل وأعــرف إن القلب متقلب فمــاأسمح لنفسي أتجاوز معاهم خوفني علي من نفسي قبل ليكون منهم....




أنتي في النهاية حــرة,,,,ولكنج محــاسبه....



الله يوفقج أختي

[Eman Al-Marri]

^


^


فديت هالثقل وهالعقل ..

[Eman Al-Marri]

مافي كلافه؟؟؟
ليش ليكون قاعده اكلم مجموعه من السفيرات واصحاب السمو ؟؟؟
طالبات حالهم حالي ليكون السالفه فيها حب خشوم بعد علشان اكلمهم؟؟ هههه

بس لاني اعرف تصنع البنات ومار علي وايد :)
سبحان الله يضهرون مالا يبطنون.. وانا كلامي موجه بشكل عام .. الي حاب يخصصه هو حر


لا وانتي الصاجه تتكلمين مع بنات محترمات وفيهم ثقل خخخخخخخ والكلافه تنوجد حتى مع الاهل وليكون القاعده عنج "الكل مهان حتى تثبت كثرة فلوسه او نفوذه" هههههههههههه

واذا اتكلم مع طالبات يعني اسفل فيهم الارض واستخف .!!

انواع التناقض فيج يادانة:1639_01196243240:..!

[Dana Al-Kuwari]

^
^

بنات الدوحه عمرهم مابيتغيرون سبحان الله
هذا الي باقدر اقوله .. مالوم شبابنا لي عرسوا من برى خخخخخ

عيل الكل بنات محترمات؟ اقول اطلعي الشارع بس واتفرجي
مافي محترم الا القليل والله يثبتهم. اما كل وحده تلبس لي لباس الشرف وتستعبط لي على مخي

والله لو اسوي احصائيه للفساد الي يحصل في جامعه خطر راح نغطي على اسرائيل !!!!!!
الفساااد بعينه وعلمه.
ليش ماتحطون يدكم عالجرح؟
سوالف توصل اليابان وانتوا اهني تنكرون هالشي يعني ؟ تبون تقولون لي ماف يولا بنت انعجبت في بروفيسور ؟؟؟
وحده من البيت للمطبخ ومن البيت للجامعه وبتشوف لي بروفيسور ماراح تتخرع وتصفق ويهها ههههه؟؟
تتكلمون ويا من انتوا ؟؟؟؟؟؟؟
الحمدلله والشكر ياربي

وشدخل الفلوس والاهانه؟
والله يا ايمان ماتدرين وين الله حاطج الله يهديج ههههههههههههههههههه

[S.S.Ahmed]

:)

آخــر رجعه لــي لهذا الموضوع

\\
\\\
\\
\\\
\\


أختي دانـــة

أتــوقع إنج ماقريتي تعليقاتي واللي وضحت فيهــا إن البنات في جامعتنــا مب منزهــات,,والكثير منهن طــاح في مشكلة الإعجاب,,,وهـذا أكيد مشكلة التربية والجامعة بعد تتحمل جزء من المشكلة لأن مــافيه رقابة على تصرفات الطالبات مع الأساتذة...

لكن أنــتي مصرّه إن احنــا قاعدين نتصنع العفه والشرف (والحمدلله رب العالمين على عفتنا وشرفنا)


يعنــي أتمنــى مــاتعممين إذا شفتي مجموعة ماتتعدى المية حكمتي إن الآف مثل المية!!!


وتــرا بنــات قطر فالأول والأخير خواتج,,,وهالكره والسخرية اتجاهم مــاتنفعنــا بشي,,,وإذا تكلمتي عنهم بسوء فهذا يعنــي إنج تتكلمين عن نفسج بسوء لأنج قطريه!!!!

\\
\\\
\\
\\\
\\


سبحانك اللهم وبحمدك,,أشهد أن لاإلــه إلا الله,,أستغفرك من كل خطيئه وأتــوب إليك...