بغيت المساعده من شباب كيرتن

[Ahmad Al-Sheeb]

السلام عليكم .. اشلونكم شباب .. شخباركم ..


شباب بدش في الموضوع على طول ..


انا حاليا قاعد ادرس كورس لغه في كيرتن .. وعلى اساس اني شهر مارس بدخل كيرتن انترناشونال كولج .. سي آي سي ..

بس صار شي ولخبط كل الحسبه ..

الي صار اني العام كنت في الجسر الاكاديمي .. وكنت في اعلى ليفل ..

يعني دارس وايد مواد علميه ..

فوديت الاوت لاين مال الكورس والمواد الي دارسها لهم .. وقالوا انهم احتمال يقطون عني المواد العلميه الجنيرال وعلى طول ادش على مواد الانجنيرنج ..

فالشباب الي اهني انصحوني اني ما اسوي هالشي .. وقالوا لي خذ راحتك وتأسس صح .. خاصة انك على حساب المؤسسه مب على احسابك الشخصي ..
















مادري اذا قدرت اوضح الموضوع عدل وله لا .. بس المهم انتوا اشرايكم ؟؟؟:rolleyes:

[Ali Saifaldeen]

هلا الشيب

بخصوص موضوعك مادري من الشباب الي نصحوك هل هم شباب كيرتن ولا شباب ثانيين

انت احين على حسب علمي نفس باقي الشباب بتدخل الكومن يير الي فيها مواد من كل التخصصات مثل الميكانكس في الميكانيكل والجافا في الكمبيوتر والاي تي وانت تخصصك كيميكال مالك دخل فيهم

وهل مادتين من اصعب مواد الكومن يير خصوصا الجافا يمكن نسبة النجاح فيها اتكون اقل من 30%

واذا بيحذفون عنك مواد الكومن يير ويدخلونك سنه ثانيه تخصص على طول نصيحتي احذف الي تقدر عليه لانك ماراح تستفيد من اغلب المواد في تخصصك

وتقدر تسال الشباب الي دخلوا الكليه مثل محمد النجار ومحمد المصلح وعبدالله حيدر لو تعرفهم وهم بيفيدونك اكثر انا مادخلت هل كليه على طول سنه ثانيه

بس نصيحتي احذف الي تقدر عليه الا اذا انت لك رغبه اتحك وتدرس زياده:)

تحياتي لك

[Dr. Noor Aleasa]

الأخ أحمد الشيب

نصحيتي .. أنك لا تعيد شيء أنت متفوق فيه ..

بمعنى .. لو أن أدائك في الجسر الأكاديمي متفوق .. وأنت متمكن من المادة العلمية .. إذن لماذا تعيدها؟؟

ولكن لدي اقتراح ولا أعرف إذا كان ممكن بالنسبة للجامعة التي تنتمي إليها .. وهو ::

هل يمكن أن تأخذ عدد قليل من مواد التخصص أو الهندسة في البداية .. أي ليس أكثر من 3 مقررات في أول فصل .. تجرب فيهم أدائك .. بحيث تحافظ على مستواك .. وفي الفصل الذي يليه ستكون قد تعرفت على قدراتك في الجامعة وستتمكن من تحديد العبء الذي تستطيع تحمله ..


واسمح لي على ابداء الرأي

د. نور العيسى

[Ali Saifaldeen]

السلام عليكم دكتوره نور

انا معاج في راييج بس لي ملاحظه بخصوص المواد والكورس عندنا

احنا نظام جامعتنا بالنسبه للطلاب الغير استراليين لازم علينا كل فصل ناخذ اقل شي 100 كردت
وموادنا مقسمه قسمين مواد 25 كردت ومواد 12.5 كردت
بمعنى ثاني احنا ملزومين ناخذ 4 مواد اقل شي كل فصل

قبل كنا نقدر ناخذ 75 كردت كحد ادنى بس احين زادوها علينا
لاسباب ومنها اسباب امنيه يبون الطلبه الاجانب مايطولون عندهم الظاهر ويخلصون بسرعه

والمواد في جامعتنا كلها مواد تخصص ماعندنا مواد اختياريه مثل امريكا الشباب يقدرون يختارون الي يبونه الي ماخذ موسيقى الي ماخذ لغات احنا مجبورين بمواد كلها تخصص وتقريبا ماعندنا حرية الاختيار الا في السنه الرابعه وحتى سنه رابعه كلها تخصص بس في اكثر من ماده نختار منها

نظام جامعتنا شوي معقد بعكس بعض جامعات استراليا الي فيها مواد اختياريه

تحياتي

[Dr. Noor Aleasa]

شكرا لك .. Ali Saifaldeen

على التوضيح ..

إذن اقترح على الأخ أحمد الشيب ياخذ 4 مواد تخصص ب25 وحدة .. وهذا حافز له أن يتفوق فيهم ..

وأنا أدري أن عدد المقررات أو الوحدات الأدني بالنسبة للطلاب العرب ف ي أمريكا واستراليا وبعض الدول الأخرى محدد لظروف أمنية ..

وهذا يخلي الشباب يحسون إنهم مضغوطين .. ولكن إذا كانت هذه الظروف .. فلا حيلة لنا .. غير اثبات العكس والقدرة على الأداء المتفوق ..

وأنا على ثقة أن الأخ أحمد الشيب في هذا الوضع .. هو أكثر واحد يعرف إمكانياته .. ولذلك أقول له كن واثق من نفسك .. وتوكل على الله وخذ المرحلة التالية .. ولا تعطل نفسك .. فقط تحتاج إلى تنظيم أوقات دراستك

والله المستعان ..

د. نور العيسى

[Jassim Al-Naama]

اخوي احمد

شوف والله اتفق مع علي

الكومون يير بتفيدك وايد وخاصة ان المواد اغلبها صعبة وتحتاج منك تركز وصدقني بتستفيد منها وايد ووهذا اللي خذته من الشباب اللي درسوا هالسنة العام الماضي ان المواد اللي بتدرسها هي اساس الهندسة مثل الثيرموداينمك والميكانيكس الخ .. وانت محظوظ مابتدرس فاونديشن يير وبتدخل الجامعة على طول بعد اللغة

شي ثاني ..: يخوك لاتخاف جاييينك كلها اسبوعين ونكون عندك ببيرث وتقدر تبدأ معانا الكومون يير وهناك بعلمك الحك الصح .. انت خلك وياي بالمحاضرات وفالك طيب

كل التوفيق اخوي وبانتظار اللقاء القريب

اخوك الكيرتني حديثا

[Mohammed Almusleh]

السلام عليكم

اول شي الله يوفقك اخوي في كيرتن

بما اني دخلت الكومن يير ان شالله اقدر افيدك

في الجامعات الإسترالية ،معظم الطلاب الي من خارج استراليا Intrnational student لازم يدرسون فاونديشن

في جامعة كيرتن في نظامين للفاونديشن

الاول ماعندي عنه خلفيه كبيره الي هو نظام الفاونديشن العادي تدرس سنه واذا نجحت تحول الكليه الي تبغيها ، والمسؤول عنك لما تبدا سنة اولى الجامعة نفسها على عكس النظام الثاني.

النظام الثاني الي هو نظام السي اي سي عبارة عن سنة ونص 3 كورسات ، السنه الأولى عبارة عن كورسين فاونديشن
والكورس الثالث تدخل الجامعه لكن يتم ال سي اي سي هو المسؤول عنك ، لكن مافي فرق كبير بينك وبين طلاب الجامعة العاديين ، واذا نجحت في اول كورس لك في الجامعة تنتقل أوراقك إلى الجامعة وتصير هي المسؤولة عنك.

أعتقد مواد الفاونديشن هي الي بتنحذف مب مواد الكومن يير (الأنجينيرنج).

وأنصحك ماتعيد ، لاشك أن في فايدة ، لكن هي كلها عبارة عن أشياء ماخذها في الثانوية و في الجسر ويمكن ماتكون في تخصصك.

وضعي أنا كان شبيه بوضعك نوعا ما ، أنا بديت في مدينة برزبن ودرست الفاونديشن هناك وعقب حولت بيرث ودخلت السي اي سي
ودخلت الكومن يير على طول يعني حذفولي الفاونديشن

وإذا عندك أي سؤال ثاني أنا حاضر

أخوك