من لديه استفسارات شخصيه يتفضل

[Ahmed Al-Salahi]

بسم الله الرحمن الرحيم

افتح المجال هنا لكم لطرح اسئلتكم الشخصيه في قالب اكاديمي بحت اي ان الاسئله لن تخرج عن النطاق الدراسي

مثال:

ماهو رأيكم في الدراسه في الولايات المتحده من ناحيه المعيشه و الراحه النفسيه خصوصا بعد احداث الحادي عشر من سبتمبر ؟

ما هي اهم الامور التي يجب عملها فور وصولي الي مقر بعثتي؟

وما شابه ذلك ...

سأحاول الاجابه على الاستفسارات على مدى علمي وقدرتي الشخصيه

واعذرونا اذا قصرنا

ملاحظه:
اذا كان السؤال اكاديمي فهناك موضوع للاسئله الاكاديميه

[Ayman Erbad]

what is the state with the best weather in the US? :p

[Ahmed Al-Salahi]

لهذا السؤال عده اجوبه وهذا حسب رغبه الشخص وتعريفه لافضل جو

بالنسبه لي افضل ولايه من ناحيه الجو هي كاليفورنيا والجزء الجنوبي منها حيث لاترتفع درحه الحراره كثيرا في الصيف ولاتنخفض كثيرا في الشتاء ولكي اكون دقيق في الاحابه اعتقد ان سان دييغو هي افضل منطقه من ناحيه الطقس

واتمنى ان اكون اجبت على استفسارك اخوي ايمن ; )

وشكرا

[Ahmed Al-Salahi]

اسئله من طالب ارجو تستفيدو منها

اضغط هنا (http://www.qataries.net/vb/showthread.php?t=2727)

شكرا

[Saad S Al-Mohannadi]

السلام عليكم

جزاك الله خير اخوي محمد , بس حبيت استفسر عن الطلاب الي يسافرون على حسابهم هل المتطلبات تكون غير , و شنهي الصعوبات الي ممكن يواجهونها واي جامعة او كلية تنصحني فيها لدراسة العلوم السياسية او الطيران في امريكا او كندا .

تقبل تحيات اخوك :-

سـعـد المهندي

[Mohammed Al-Mousawi]

يا هلا فيك اخوي سعد...

بالنسبة للدراسة على الحساب الخاص فموضوعك له جوابين لحالتك

اذا كان للعلوم السياسية لازم تتأكد ان الجامعة موجودة فاللستة...

وعن الجامعات اللي اقترحها عليك..والله ماقدر اعطيك جامعة معينة..بس اللي اعرفه ان العلوم السياسية تخصص سهل في university of utah...وفحالتك وايد بتنفعك فسالفة المصاريف لأنك راح تدرس على حسابك الخاص وهالجامعة تعتبر من ارخص الجامعات الكبيرة فالرسوم السنوية..بس تأكد قبل ماتروح انها تكون للحين موجودة فاللستة

وتقريباً التخصص موجود فاكثر من 80% من الجامعات اللي فاللستة


اما فحالة انك قررت تدرس طيران...انا انصحك فكلية الطيران اللي فالدوحة..ترى كليتنا معروفة ولها سمعة عالمية ومنهجها جداً قوي...والدراسة وايد مريحة...وتتخرج فسنتين اذا ماخذت كورسات لغة

اما اذا انت مصمم على امريكا...فمالك الا فلوريدا...فيها اكثر من جامعة تدرس الطيران..والولاية مرحة...بعض مدنها غالية..لكن فيها جامعة و مدينة ممتازة..شخصياً قعدت فيها 5 سنين مع الوالد ايام ما كان هو يدرس فيها..Embry-Riddle University at Daytona Beach

دش الموقع وشوفها...واذا نويت خلاص عالروحة وتبي تكلم حد متخرج منها اعرف اكثر من شخص يقعد معاك ويتكلم معاك فالموضوع..


هذا ردي لك من ناحية امريكا..

انشالله حد من الشباب يقدر يرد عليك فموضوع كندا


واي شي ثاني حاضرين

الموسوي

[Dana Al-Kuwari]

والله اذا عزمت عالعلوم السياسيه.. انصحك بــ :

California State University
--- Dominguez HiLL

والله تتخرج وانت تضحك :)

[Mohammed Al-Mousawi]

والله اذا عزمت عالعلوم السياسيه.. انصحك بــ :

California State University
--- Dominguez HiLL

والله تتخرج وانت تضحك :)

بس للأسف مب موجودة فاللستة...

[Dana Al-Kuwari]

^
^

انا معاك وصحيح يابوجاسم..

بس لاحظ.. هو قال الي على حسابهم..
يعني له حربة الخيار لاي جامعه يبيها وبتتصدق وهم يضحكون
وهالكلام أكدته الاستاذه الفاضله جيهان..
( اول مره توضح شي مثل العالم :) )

فا علشان جي انا اخترت له هالجامعه.. في بحر 3 سنين ونص الباجلر في مخباه ومتخرج بلا مشاكل تذكر وشغله فالسليم..

وموفق في خياراتك يا اخينا ..

[Mohammed Al-Mousawi]

اي طبعاً..مثل ماتقول الاخت دانة اذا بتكمل على حسابك الافضل تروح هالجامعه

بس اذا ناوي تدرس سنة على حسابك وبعدين تحول بعثتك..لازم تختار شي من اللستة

[Saad S Al-Mohannadi]

تسلمون اخواني , بس انتو جاوبتوني على جزء من السؤال الا وهو الجامعه الي تنصحوني فيها , بس حبيت اعرف بعد المشاكل الي ممكن تواجهني وثانياً اخ محمد شلون احول البعثة وانا ماراح اجيب النسبة الي يبونها " بس اذا ناوي تدرس سنة على حسابك وبعدين تحول بعثتك..لازم تختار شي من اللستة "

[J.H.Al-Qahtani]

بس حبيت اعرف بعد المشاكل الي ممكن تواجهني

السلام عليكم...

اخوي ياريت لو تحدد نوعية المشاكل اللي تسأل عنها..يعني اكاديميا...او دراسيا...او اثناء معيشتك "ان شاء الله" بامريكا..ياريت لو توضح...وان شاء الله من خلال توضيحك...راح نعرف نرد عليك...

مشكور...

[Saad S Al-Mohannadi]

اكاديميا...و دراسيا و اثناء المعيشة الثلاثة معاً

والسموحة

[Saad S Al-Mohannadi]

وينكم ياجماعة الخير ؟؟؟

يومين لاحس ولا خبر :(

[J.H.Al-Qahtani]

اخوي اسمح لي..اسفين...بس والله انشغلت بالإمتحانات...ان شاء الله...على الجمعة بيكون الرد..موجود...اسمح لي...

[Mohammed Al-Mousawi]

اسمحلنا اخوي سعد...ضغط الامتحانات الفترة الاخيرة مايسمحلي ادخل المنتدى من البيت....وكمبيوترات الجامعة مافيها عربي..

المهم..

دراسياً...يعتمد عليك...اذا خذت كورسات لغة وشديت حيلك وابتعدت عن اللعب...بتمشي "بالراحة"

مابتجيك مشاكل الا اذا ماتدرس.....النظام مافي خلل...لو في شي يكون تقصير من الطالب...واذا في خلل فالنظام كل الطلاب ينزلون...ولما ينزلون كل الطلاب..يضطر المدرس ان يرفع درجات الصف كله...يعني ماقدر ارد عليك الا بهالطريقة لسؤالك عن المشاكل الاكاديمية او الدراسية



اما عن المعيشة...اول شي يعتمد على المدينة...وحتى المدن اللي تعتبر خطرة مثل نيو يورك او فيلادالفيا او لوس انجلس...خطرة فاماكن محددة وفليل

الحمدلله مافي ماشكل واجهتنا لحد الحين ...(اتكلم عن دفعتي)..يمكن المشاكل كانت بس من المجلس الاعلى ...مرتين مانزلوا رواتبنا على طول وطولوا وايد

والحمدلله..الشعب الامريكي بشهادة الكثير من الطلبة..من اطيب شعوب العالم..."كل واحد فحاله" ..محد له شغل فاحد

"لاتتحرش فيهم ما بيتحرشون فيك"

هذا اللي قدرت اتكلم عنه فموضوع الماشكل

اذا عندك موقف معين خايف منه..قوله وانشالله نقدر نجاوبك


تحياتي

[Saad S Al-Mohannadi]

يعطيكم الف عافية والسموحة اذا ازعجتكم ماكنت ادري

والله يوفقكم ان شاءالله :)

[Mohammed Al-Mousawi]

لله يعافيك اخوي سعد...لا ازعجتنا ولا شي ....

احنا حاضرين وفالخدمة في اي وقت...لاتستحي ولا تترد فاسألتك

[J.H.Al-Qahtani]

السلام عليكم..ورحمة الله وبركاته
اخوي..اسفة مرة ثانيه على تأخري بالرد

انزين..اخوي الموسوي (الله يجزاه الخير) رد عليك...وتقريبا ردي راح يكون تقريبا نفس رده...

اخوي...إذا انت كنت من النوع الطموح ومايرضى إلا بال A فمعناها لازم تجيب توفل حلو...وسات احلى..علشان يكون اساسك قوي..وتكون جايب درجة حلوة بالثانويه..لانه السنة الأولى والثانيه من الجامعة بالعادة تكون نفس موااد الثانويه بس بتعمق..(اتكلم عن المواد العلميه)...فكل ماكان اساسك قوي..كل ماتسهلت الأمور (بتوفيق من رب العالمين)...

اخوي...اما مشاكل الدراسة..فإن شاء الله...امورك بتتيسر..هاي يعتمد من تخصص لتخصص ومن مادة لمادة..يعني دراسة الهندسة اصعب بووايد من دراسة البزنس..وكل وااحد وجهده....مثل ماقال اخوي الموسوي..إذا انت جاي تدرس..راح تفلح..اما اذا انت جاي وناااسة ..فعليكك السلام...لانه فعلا..هنا اماكن الوناسة والترفيه.واااااااااااااااااااايد...بس الشاطر اللي يعرف يرتب طلعاته واماكن روحاته...


المعيشة: مافي مشاكل في المعيشة ولله الحمد...يعني..براتب الهيئة او اي مؤسسة..فراح تعيش بإذنه تعالى..بس يمكن تفلس وانت على اخر الشهر...النااااس هنا حلوة..ومن خلال تعاملي معاهم كبنت من الشرق الأوسط "على قولتهم" فهم شعب معظمه جاهل ..ومصدر علمهم او ثقافتهم هو التلفاز..اللي طبعا..كله كذب وشلخ..واشياء تسد النفس...فالناس تبي تعرف...او تتظاهر بانها ماتبي تعرف....بس يجون يسالون...ويستفسرون...وهاي شي طيب...فلا تعتقد انهم ملاقيف (يمكن 5% بس هم اللي ملاقيف)....اما التحرشات اللي تصير بالمسلميين او المسلمات...فهاي موجو بكل مكان..حتى عندنا بالخليج..(تحرش بالملتزمين..والخ )...بس هنا على اكبر..واعظم...اذا خذيتهم باللين..فراح يسمعون..ويمكن لا..بس الواحد يكون هادي.." غصبا عنه" علشان مانروح غوانتانموا خخخخخخ"....

ايه..شي بعد...هنا امورك وغربتك بتتيسر إذا كنت مع صحبة صالحة..وعدله....لانه الشخص على دين خليله....لان هنا الواحد يضيع بسهولة....وفي اشياء ماقد فكرت فيها من قبل..فراح تفكر فيها..ويمكن يصير تضارب في الأفكار....بس إذا كنت ماسك دينك بقوة..فإن شاء الله بتروح غانم وترجع سالم..

ان شاء الله اكون افدتك اخوي..واسمح لنا على القصور..وياريت..اخوي..تسال بعد إذا كان عندك اي سؤال عن اي مشكله...وان شاء الله بنرد عليك بسرعة لان الأمتحانت خلصت..ونااااااااااااااااااااااااااااااااااااسة

اختك...

[Fahad A Al-Mahmoud]

دقيقة دقيقة اختي دانة .. ترى جيهان المير ما قالت انه بتتصدق .. هي قالت انك اذا دخلت الجامعه قبل ما تدخل اللسته شهادتك بتتصدق .. لكن الحين اذا قدمت عليها ما راح تتصدق ..

[Mohammed Al-Mousawi]

اخوي فهد...غصباً عن الكل....اذا الجامعة عندها اعتراف دولي...ومعظم الجامعات الامريكية عندها...راح تتصدق شهادتك


الشي الوحيد اللي ماتقدر تحصله...تحويل بعثتك من حسابك الشخصي الى حساب المجلس


الجامعات اللي ماراح تتصدق هي الجامعات العربية

[Dana Al-Kuwari]

فهد يبه..
في اخر مقابله لها قالت "" انا ماعندي مانع اعادلها لك لو كانت على حسابك الخاص""

"" وانا ابعث من عندي وعلى نفقتي.. بس للجامعات الي حطيتها فاللست""

عجبتني هذي"" ما عندي مانع "":) !
و عجبتني بعد "" من عندي ونفقتي "" :) !

بيني وبينكم؟؟
كلامها جداً واضح ترى..


بس ان بغيتوا كلامي؟؟
دخلوا جامعه فاللست حتى لو رايح على حسابك :)
تكون فالسليم.. وترتاااااااااح..

او عندك خيار ثاني..
تسوي مثل ماسووا الشباب عندنا كل واحد مسجل المقابله في ديفيدي وبيرفقونها مع الملف.. لتتم المعادله


LOOOL

والله من المضحك ان التعليم فالدوحه يوصل لهالمرحله..
ترى احنا قاعدين نرجع ورى ونتردى مانتقدم :)

واي استفسارات ثانيه..

حازرين عزيزي .....

[Fahad A Al-Mahmoud]

اذا عن التعليم .. ترى الدوحه والله ابرك من باقي دول الخليج .. في دولة مجاورة ما راح اقول انها الامارات .. واحد قدم على MIT الجامعه الاولي في تخصصات الهندسة و الكمبيوتر .. قالوا له ما نقدر نقبلك عشان MIT مب جامعه .. و صج الMIT هو Institute ..
فإن شاء الله لما يشيلونها و يحطون باللي أخير منها كل شي راح يتغير ..
و يا جماعه اذا انها ما انشالت نصيحتي لكل من بيقدم على الجامعه يروح للبترول او اي هيئه ثانيه الا المجلس الاعلى .. والله نصيحة من واحد مجرب و ذاق المر من عندهم ..
و جزاكم الله كل الخير

[Maha Salem]

السلام عليكم
أنا عندي استفسار عن شيين
أول شي وهو بالنسبه للمعدل الدراسي للطلاب أنا اقصد مقارنه بقطر:confused:
اذا تعرف اي شي عن جامعه فرجينيا كومونويلث اللي في ولايه ريشموند لاني أنا وبنت معاي رايحين شهر واحد " spring simestet" هل الطلاب هناك فطاحل يعني؟ هم أكيد بيكونون أشطر بس وايد ؟
يعني ممكن الواحد يسافر يكمل هناك مع العلم انه مستوى الدراسه في قطر يختلف عن المستوى اللي عندهم؟ في مجال للفشل؟:( او مجال النجاح اكبر؟; )

اما بالنسبه للشي الثاني بخليه لما تجاوبني عن الشي الاول
شكرا:)

[J.H.Al-Qahtani]

ان شاء الله اختي انرد عليج قريب...انا مااعرف شي..عن فرجينيا..بس ان شاء الله نسالج...

[J.H.Al-Qahtani]

احب اني اعتذر انفا على التاخير..بالرد...."امتحانات"

[Maha Salem]

أخذي راحتج أنا مش مستعجله; )

[Mohammed Al-Mousawi]

السلام عليكم
أنا عندي استفسار عن شيين
أول شي وهو بالنسبه للمعدل الدراسي للطلاب أنا اقصد مقارنه بقطر:confused:
اذا تعرف اي شي عن جامعه فرجينيا كومونويلث اللي في ولايه ريشموند لاني أنا وبنت معاي رايحين شهر واحد " spring simestet" هل الطلاب هناك فطاحل يعني؟ هم أكيد بيكونون أشطر بس وايد ؟
يعني ممكن الواحد يسافر يكمل هناك مع العلم انه مستوى الدراسه في قطر يختلف عن المستوى اللي عندهم؟ في مجال للفشل؟:( او مجال النجاح اكبر؟; )

اما بالنسبه للشي الثاني بخليه لما تجاوبني عن الشي الاول
شكرا:)

سوري على التأخر فالرد اختي..

بالنسبة للمستوى الدراسي....الامريكان عامة شعب "غبي"...لا فطاحل ولا شي...ولا اشطر منا...بالعكس المنهج العربي معروف انه اقوى....يمكن اللغة هي العائق الاكبر...والشطار اللي فامريكا هم الهنود والصينيين...بس بعد ماراح يأثر ويمنع ان تكونين فالتوب 10 او الـ 5

ومسألة النجاح والفشل...تعتمد على الشخص..وارادته...اول سمستر راح يكون صعب شوي....بس بعدها كلشي ايزي انشالله



انشالله اكون جاوبت على استفسارج....واعذرينا طولنا ...فترة الامتحانات الجاية..ماخذه وقتنا كله.....


وناطرين الاستفسار الثاني..

تحياتي

[Maha Salem]

الاستفسار الثاني هو مشكله السكن:confused:
انا مش حابه اقعد في السكن لانه أكيد مش نظيف والحمام الواحد لما سالت يستخدمونه ست بنات:rolleyes: الشي الثاني احنا كنا ندور شقه قريبه وماحصلنا بس المسؤولين بالجامعه لقو بين عشر الاف واثناعشر الف دولار بالشهر :eek:
لما كلمنا الهيئه ايش نعمل قالو لنا هاي مشكلتكم احنا مالنا دخل قعدو بالسكن
ياجماعه السكن مصيبه لانه مختلط وماراح ناخذ راحتنا
ايش الحل؟ ايش نقدر نسوي؟ يصير نقعد بفندق؟
احنا حصلنا شقق من 500 ل 700 دولار وكنا فرحانين بس انصدمنا لما قالو انها
unfurnished:eek:

[J.H.Al-Qahtani]

اختي ...حياج الله
الهيئة مالهم علاقة بالسكن خير شر...

ثانيا..انا معاج سكن الجامعة ماينطاق...مع اني ماعشت فيه ولله الحمد...بس ربعي اللي عاشوا..شردوا..حدى الأمريكيات..ماقدروا يستحملونه...يالله يخلص العقد..وعلى طول..

اختي..إذا انتي بتمين تدرسين...هنا اربع سنين وشي...او اطول..اشترى اثاث.....وهنا في بعض الأحيان...تحصلين عروض حلوة...واي شي يمشى الحال...
اما اذا كنتي...بتمين فترة قصيرة سنه او سنتين..فماانصحج...

هو شوفي...هذا اجارهم...سواء مفروشة وإلا مو مفروشة ..وإذا مفروشة تكون نص مفروشة يعني مو كاملة...مثل اغراض المطبخ لازم تشترينها كلها...وغرفة النوم..السرير بيكون يمكن موجود وطاوله وكبت...بس المستلزمات الثانيه مو موجودة لاتلفزيون و ابجورات و لا اغراض الطاوله ولا ستاير ولا هم يحزنون...هاي اللي صار معاي..فاضريت اني اشترى مع ان الشقة اللي طلبتها مفروشة..

فااختي ..إذا اتعرفين احد في هاي الولايه...كلميه انه يسالج او ايدور لج...

او اسالي النترناشونال اوفيس اللي دزوا لج الI-20 اذا في عرب او اي حد قطري...ويساعدونج بإذن الله...

تقدرين تقعدين بفندق ..في البداية....ليما اتحصلين لج شقة...بس اعملي احسابج انه حتى فنادق بو 3 نجوم تكون شوي اسعاها غاليه...طبعا يعتمد على الولايه اللي بتروحين لها...

اممممم اتمنى اكون افتدج...حياج الله اختي...ننطر المزيد من استفساراتج...

[Mohammed Al-Mousawi]

السكن...امممم

حالياً احسن موقع تشوفون فيه السكن هو http://www.rent.com

وعن النظافة....يعتمد من شقة لشقة...وتقدرون تشوفون الشقة قبل ماتوقعون


احسن طريقة انكم تروحون تقعدون في فندق لمدة اسبوع او اقل لين ماتلاقون شقة...


انا سمعت ان رتشموند غالية شوي...وسعر الشقة لما يكون بين 1000 و 1400 لشخصين يكون جيد..

و الله يعينكم عالفرش..


بس مثل ماقلتلج شوفي الموقع...وانشالله بتلقين شقة مناسبة


اي استفسار ثاني حاضريين..واسمحيلنا على القصور

[Maha Salem]

مشكوريين و ماقصرتو

; )

[Salman Alansari]

السلام عليكم يا جماعه..

عندي سؤال .. صار لي 4 شهور في فيلادلفيا وطلعت روحي وانا سال اذا في قطريين فيها او لا...

قالوا لي ان كان في 3 ورجعوا قطر .. مع ان هل الخليج والعرب بيض الله وجيهم اخوان وما يقصرون لكن الواحد يحن لريحة البلاد..

عالعموم . . اذا حد احتاج اي مساعده في اي شي سواء معلومات او حتى ترتيب الطلب لقبول الجامعات لايتردد .. ان شاء الله ما راح اقصر..

الجامعات اللي حولي واعرفهم UPENN جامعتي اكيد بعرفها.. DREXEL و TEMPLE واعتقد في غيرهم .. و DREXEL موجودة باللسته لكن مب TEMPLE

[Mohammed Al-Mousawi]

هلا اخوي سلمان...


اعتقد غيرك في واحد وبيرجع هالسمستر


وكان في ثلاثة اثنين رجعوا وواحد حول اريزونا....


واذا كلش حان لبلادك ..مر صوبنا :) ...3 ساعات تقريباً عنكم...ييرانكم يعني..وفي 4 قطريين عندنا..


واذا صارت فرصة احنا هم نقدر نجي عندكم ...منها نمر صوبكم..ومنها نروح king of prussia


وياخي والله تسوي خير لو تقدر ترتب قبول في UPENN لان وايد شباب يتمنون يدرسون فجامعة من اللستة الاميرية


حياك الله اخوي ومشكور

[Salman Alansari]

مرحبا محمد..

والله اتمنى جيتكم وانما شلتكم الديرة تشيلكم عيوني... اما القبول فاعتقد اقدر اضغط على كلية القانون اللي انا ادرس فيها لان في الوقت الحالي قاعدين نرتب تعاون بينهم وبين كليتنا في جامعة قطر..

واكثر شي ممكن اساعد فيه هو ترتيب طلب الالتحاق بالنسبة للجامعه ككل.. واللي وده لا يتردد بنحاول كثر ما نقدر..

واكيد ان شاء الله بمر عليكم واتعرف على الوجيه السمحه..

[Amal.A]

الاخوة الافاضل

حبيت أسألكم عن الاوضاع الامنية في اميركا وخصوصاً الخوف من الاعتقالات او الحبس والاشتباه ببعض الاسماء...

بصراحة هذا اللي مرددني من السفر اليها على الرغم ان التخصص اللي ابغيه مو موجود الا هناك...

فشرايكم في الموضوع وخصوصاً الخوف على المحرم المرافق ؟؟؟

ارجو منكم اجابتي بكل شفافية وهل مخاوفي لها اساس من الصحة اولا ؟؟؟

[J.H.Al-Qahtani]

هلا اختي...

ارد عليج ان شاء الله بالتفصيل الممل...

بس بعد ساعتين ان شاء الله >> دوام :(

[J.H.Al-Qahtani]

ورجعنا من الدوام...
++++++++++++++++++++++++++++++
انزين اختي...

اول شي..اختي...معاج حق في المخاوف...وخاصة من اللي نشوفة في الأعلام..ومن السوالف...بس هاي مبالغ فيه نوعا ما.....
انا صابتني هاذي المخاوف قبل مااعزم على السفر....بس هذا احنا...in one piece ولله الحمد :)

بس من يتوكل عى الله...يجعل له مخرجا..

الأمان يعتمد على كل ولايه...وكل مدينه...

يعني الwest coast والمنطقة الوسطى معروف بانه امن وافضل من الeast coast...

يعني مدينه منهاتن ونيويورك...عليج فيها شوي...,وشيكاغوا...يعني مافيها تذبح...
بس في بعض المناطق من هالمدن..الأمريكان حتى يتجنبونها...


وبعض المدن...متحفظين..شوي...على ديناتهم...بس كتعامل..ابد ماعليهم غبرة..


والشعب طيب...ولا عليهم خلاف....ويحبون المساعدة والتعلم....
....ومادام المحرم معاج...فلله الحمد والشكر...يعني شي حلو..يكون وياج..وماعليه خوف هو بعد...ان شاء الله

يمكن يستنكرون...شوي من الحجاب....او من العباية.....لانه مو متعودين يشوفونه...وهاي شي طبيعي...
ويمكن يتعجبون من بعض الأمور...

لانهم جاهلين .....وهنا يجي دورج..في ترك انطباع ..عنج وعن الأسلام.....لانه في ناس اترد بفضاضة..وناس اترد باسلوب..محترم..وتحبب الناس فيها...

بس الحيطة واااجبه...
يعني طلعات الليل...ماافضلها للبنات خير شر...(والشباب بعد)
والأنخراط..في المجتمع الأمريكي..مااحبذه بعد..للبنت او للولد...
الألتزام...وتوثيق العلاقة مع الله....لانه بصراحة...في ناااس يات هنا وايش زينهم......وراحت في خرايطها..
والأيمان ياما يزداد او يقل في الغربة...

وحددي هدفج اختي من الجيه...وتيقني منه لانه هاي راح يساعدج في حياتج..

في ناااس جاية للحفلات والمسخرة
وناس جاية لطلب العلم..

وشتان بين هاتين الفئتين...تشوفين الفئة الأولى..كله مشاكل....وتجارب ماتشرف...
والفئة الثانيه...تطلع من امريكا...وتقول الله يسعدها من ايام..

اذا عندج اسئلة شخصية..لي او للشباب..ترانا كلنا حاضرين..

وايميلي دزيته لج..في حلاة لو تبين تسالين اسئلة شخصية بحته..:)

والله يوفقج....

[fatma.j]

السلام عليكم ورحمة الله وبركاته
حبيت اسأل عن الجامعات الامريكيه واللي هي:
Rice University

Emory University, Georgia (GA)

Tufts University(MA)

Brandeis University(MA)

George Washington University(DC)

University of Miami

Boston University , Massachusetts

Clark University

American University (DC)

University of the Pacific(CA)

University of San Diego

من حيث الافضل في :
التعليم اللي تقدمه>> يعني مب بعد يومين يحذفها المجلس الاعلى!
المنطقه الافضل من ناحية الجو >> ماستحمل البرد والصقيع
تكون المنطقه هادية وفيها عرب وقطريين بالتحديد
(( وانا ابي اتخصص اعلام ))
ونورنا من خبرتكم الله يرضا عليكم
مابي اتلته في الغربه
أختكم: فاطمه

[J.H.Al-Qahtani]

salam sister fatam

first let me welcome you in QATARIES.net and enshallah you will benefit from the fourm ..
sorry for writing in english..i am in school now..:)

but let me give you a quick reply..and then i will elaborate later (when i get home and use arabic keyboard) :)

first: are those universities in the HEI list?

regarding the weather..most of these univeristies are either in the far east coast or the west..which are known for being humid and kind of hot. and rainy...also..they are quite cold in winter....with a little snow.not ..

for qataries..ummm i know that they are in DC in mairland and there are some in LA in california..and there are alot in fortcollins in colorado state...

the guys will answer better regarding the guys location...!!!

and for schools...enshalla the guys or I will answer you soon...

and..feel free if you have more questions..
if you want i can send you email (if you want to talk in person)

regards,,

and welcome again with us

[J.H.Al-Qahtani]

regarding CA and san diago..
this is a reply from brother Ahmed in the first page..i hope it helps regarding the weather.. :)

لهذا السؤال عده اجوبه وهذا حسب رغبه الشخص وتعريفه لافضل جو

بالنسبه لي افضل ولايه من ناحيه الجو هي كاليفورنيا والجزء الجنوبي منها حيث لاترتفع درحه الحراره كثيرا في الصيف ولاتنخفض كثيرا في الشتاء ولكي اكون دقيق في الاحابه اعتقد ان سان دييغو هي افضل منطقه من ناحيه الطقس

واتمنى ان اكون اجبت على استفسارك اخوي ايمن ; )

وشكرا

[fatma.j]

الصراحه انا ماحصلت افضل من هالمنتدى من خلال اللي شفته من ردود الاعضاء الطيبه وقلت اكيد بيساعدوني !; )
مشكوره اختيJ.H.Al-Qahtani على مساعدتج وانا بصراحه ودي اتواصل معاج عن طريق الايميل علشان يكون الموضوع اسهل واسرع لاني بصراحه عندي اسأله كثيره عن البعثات والدراسه في امريكا وماحس ان الموقع الرسمي للجامعه يعطيني الصوره الحقيقيه عن الجامعه .. وبالنسبه للقائمه انا اخترت الجامعات اللي موجوده فيها بس قريت في كتيب ان الحكومه الامريكية ماتقيم الجامعات ولا تحط احسن الجامعات في لسته معينه ويعني مش دايما تكون صحيحه 100%

ومشكوره على ترحيبج الحلو :)

[J.H.Al-Qahtani]

hala e5ti fatma...
i am glad that you found what you need in qataries...and that is why we are here

ان الموقع الرسمي للجامعه يعطيني الصوره الحقيقيه عن الجامعه ..

excatly...they give fancy info..but not real experiences from different international students..they usuallly focus on japanise and chinese..

ان الحكومه الامريكية ماتقيم الجامعات ولا تحط احسن الجامعات في لسته معينه ويعني مش دايما تكون صحيحه 100%


i might disagree with that...because they do rank the best colleges..in different majors..that is how they send most financial support to them..based on the best...and the need and the popularity...

ensahllah.. mn 3yooni..i will send you now ..my email..

and for the list about colleges...i hope the guys will answer it..because they are more expert than i am...but i will try my best.:)

al qahtani :)

[fatma.j]

مشكوره اختي وايد على اهتمامج اتمنى نتواصل على طول وان شاء الله اكمل معاكم ((ادعيلي ما انقطع عن هالمنتدى المحترم)) .. انا بسرعه اتملل من المنتديات بس هالمنتدى غير !:cool:

في حفظ الله:)

[J.H.Al-Qahtani]

مشكوره اختي وايد على اهتمامج اتمنى نتواصل على طول وان شاء الله اكمل معاكم ((ادعيلي ما انقطع عن هالمنتدى المحترم)) .. انا بسرعه اتملل من المنتديات بس هالمنتدى غير !:cool:

في حفظ الله:)


السلام عليكم

هلا والله باختي فاطمة...

لالالا ان شاء الله ماتنقطعين عنا..وانا مسرورة انه المنتدى عاجبج...ومدام عاجبج..اكيد بتكونين معانا....كلنا نغيب فترة ونرجع بس مانقطع...

وحياج معانا..
وان شاء الله الأخوان بيساعدونا في مساله الجامعات>> مااعرف لهم خير شر ..لووووول.

[Ahmad Al-Saygh]

السلام عليكم ورحمة الله وبركاته

أنا طالب ببتدي الدراسة في أمريكا في فصل الخريف 2007 ...

واجهتني بعض المشاكل مع لائحة الجامعات ومع تخصص الهندسة المعمارية ... يعني كان عدد الجامعات قليل جداً والتي تحمل هذا التخصص ...

الجامعة إلي كنت حاب أسجل فيها في البداية هي CU-Boulder بس نسبة التوفل للتخصص هو 560 ... وأنا جبت 533 ...

وفي الأخير سجلت في جامعتين جامعة أريزونا في Tucson وجامعة أيوا في Ames ...

فممكن تعطوني معلومات عن الولايتين ... وخصوصـًا عن درجة الحرارة في أريزونا ... بما إني أسمع وايد شباب يمدحون ولاية أريزونا ...

[J.H.Al-Qahtani]

الجامعة إلي كنت حاب أسجل فيها في البداية هي CU-Boulder بس نسبة التوفل للتخصص هو 560 ... وأنا جبت 533 ...


السلام عليكم...

اخوي...اممم بولدر...جرب اتقدم لها...لانه يسووون اكسبشنز..في بعض الأوقات...ويخلون ياما تمتحن عندهم توفل..او تاخذ كورس انجليزي وااحد وإذا جبت معدل...يعدونها لك. ( تبي اي احد يدش CU-boulder)...ترا جامعتنا قويه ..في الهندسة المعمارية >> تسوي دعاية لها..:D

بخصوص اريزونا...

جوها تقريبا يشبة تقريبا جو تكساس...حر ورطوبة متوسطة في الصيف ...مع شمس قويه تصلخ الجلد...
يعني النااس تحترق حدها...وتسمر...بس في نسمة هوا....يعني تحس بشويه براد....
في الشتا...جوها حلو..برد وامطار..وثلج..في بعض الأوقات..
...

[Ahmad Al-Saygh]

بس ياريت توصلين الكلام للمجلس الأعلى ... مب راضين ... يقولون جيب نسبة التوفل المطلوبة للتخصص ...

إنزين ممكن معولمات أكثر عن أيوا وأريزونا بعد ...

[J.H.Al-Qahtani]

ايه عليهم.....الهيئة..ماساه...

اخوي...ترا تقدر اتجيب...قبول من الجامعة...وتشد حيلك في الصيف...او الحين...لين اتجيب الدرجة...وتعطيهم اياه...وتقول شوفوا..جبتها علشان يعطونك بعثة...بس اضمن قبول جزئي...

اخوي..ياريت اتحدد اسألتك بالضبط...يعني تبي معلومات زيادة عن الطقس وإلا المنظقة...والخ...يعني ساعدنا ...شوي :)

[Ahmad Al-Saygh]

بالنسبة حق بولدر كنت مخطط جذي ... إن أخذ قبول مبدئي ... وبعدها أخذ كورس لغة وجذي وجذي نفس ما شرحتي ... وقلت حق المجلس الأعلى قالوا لي ما نعطيك بعثة على اللغة ... ولازم يكون قبولك كامل قبل انعقاد لجنة البعثات بشهر ستة ... مأساة مثل ما قلتي ...

بس خلاص إن شاء الله سنة سنتين وأحول ع بولدر ...

وبالنسبة إن انتي طلبتي أحدد السؤال أكثر ... بالنسبة لولاية أيوا هي من الولايات إلي تصير فيها أعاصير التورنيدو ... وقالوا خبراء الطقس إن هاي الشهرين بزيدون الأعاصير أكثر من قبل ... فهل هي آمنة ... أم بتكون صعبة بما إني جديد كليـًا على أمريكا ...

وأريزونا ... مدينة Tuscon ... قريبة من الحدود المكسيكية بحوالي ساعتين بالسيارة ... فهل هناك مشاكل أو غيرها لأن عدد سكانها حوالي عدد سكان الدوحة ...

وأنا أحاول أروح مدينة ليست بالكبيرة وآمنة وفيها مطاعم بوريتو ههههه ...

[J.H.Al-Qahtani]

فهل هي آمنة ... أم بتكون صعبة بما إني جديد كليـًا على أمريكا ...


اخوي...الجو متقلب هنا...بصورة غير طبيعية

يعني الحين شهر اربعة...والدينا كانت حر وشمس وربيع....واليوم...برد الجو..والثلج نزل..

بخصوص الأعاصير...هي بالعادة تضرب المناطق الشرقية الجنوبيه ..لانها على المحيط
ونفس الحال على الجهة الغربية لانه على المحيط بعد

الأحسن اتشوف اريزونا...لانها في النص...ومالها طلة على البحر..

وبخصوص الأكل المكسيكي..تراه موجود بكل مكان.... :D

ومااعتقد انه اريزونا فيهامشاكل...مااقدر احكم لانه مااعرف المنطقة عدل...

نشوف الأخوان..وانا باطقس لك على الوضع...:)

[Ahmad Al-Saygh]

يسلمو خيتو ع المعلومات ...

وما تقصرين ...

ونفس ما يقولون في الأفلام America Here I come ... هههه

[mohamed alotbi]

والله انا عندي سؤال عن الدراسة في امريكا حبيت

اعرف اشلون تخصصات هندسة البترول والهندسة

الكيميائية واحسن المدن والجامعات الي تدرسها

وهل هي الدراسة هناك صعبة مع اني انا ممتاز في

المدرسة بس الانجليزي مالي مب لين اهناك لاكن

اعرف امشي حالي بس قاعد اخذ دورات فيه ودورات

في التوفل وهل دورات التوفل صعبة

[J.H.Al-Qahtani]

اخوي دورات التوفل مو صعبة ابد..وبتشوف التطور بعيونك لما ادش اي دورة..اهم شي التركيز والأنتباه والأجتهاد....

بخصوص سؤالك..انا ماعندي خبرة ....فان شاء الله الشباب ومهندسينا يردون عليك :)


بس اللي اعرفة..انه تخصص البترول بجامعة تكساس ممتاز وايضا بجامعتي سابقا (كولورادوا)..وجامعة بلوس انجلس بس مااذكرها...

دمت بود

[mohamed alotbi]

مشكورة اختي القحطاني وعساك على القوة

[Nasser Hamad]

السلام عليكم ورحمة الله وبركاته .. ,

فـيه .. حد موجود .. نسألهـ ., :>

امممم .. اذا فيــهـ ., حد .. ,

حبيت استفسر .. :(

فـيه حد هنيه .. يدرس فـ Oklahoma State .. ؟

واذا فيـهـ .,

شرايكمـ ., فـ جامعة University of Tulsa .. ؟

ووو .. حبيت اسال . , بخصوص .. :) الجو هناك .. :)

واسعار المعيشهـ ., :> يعني غاليه مثل كاليفورنيا .. ؟

ولا .. عاديهـ .. ؟

امممم ..

وبـس .. <<< " للحين " .. = ) ,

[Mohammed Al-Mousawi]

اخوي تلسا مدينه هاديه..! اعرف كم واحد يدرس فيها الحين..! حلوه المدينة والجامعه نوعاً ما جيدة..!

لكن ابتعاث المجلس الاعلى لها بس يكون لهندسة البترول.! يعني اي تخصص ثاني مايصير..!

والمعيشة هناك نوعاً ما متوسطة المستوى لا غالية ولا رخيصه! آآفرج.!


واحنا فالخدمة اخوي!! اي سؤال ثاني لا تتردد..!

[SAEED AL-KUWARI]

اخوي ممكن تعطوني موقع جامعه دنفر المعترف فيها في اللسته مالت المجلس الاعلى لتعليم

[Yousuf Al-Shammari]

السلام عليكم.. يعطيكم العافية يا شباب قطريز

استفساري موجه لطلبة مدينة بيرث في أستراليا حيث أنني حصلت مؤخرا offer من جامعة كيرتن في تخصص (occupational Health and Safety) لمدة سنتين وأود أن من طلبة بيرث أن ينصحوني بالتالي:

الأمان في مدينة بيرث
عدد الطلبة القطريين في مدينة بيرث
رأي الطلبة بصراحة في مدينة بيرث وفي جامعة كيرتن خصوصا
هل عدد الطلبة الخليجيين بها كبير

أود أن أسمع آرائكم بصراحة عن المدينة والجامعة ولكم مني جزيل الشكر

أخوكم يوسف الشمري

[Mohammed- AL-Muftah]

انا المفروض اروح اريزونا ستيت في الفل و لكن صادتني مشكله معاهم انهم غيروا التخصص واقبلوني على غير التخصص اللي سجلت فيه !!! من دون علمي !!!!!!!!!

فـ احتمال كبير اروح لغه .. و كهرماء يطرشون لغه و بدرس هندسه ميكانيكيه عن طريقهم
فـ هل عندكم جامعات تقدم كورسات لغه في السمستر الاول ؟ و الطالب العادي يقدر يمشي في الهندسه فيها ؟؟
و شرايكم في هالجامعات ؟
Indiana University Bloomington
University of Indianapolis
University of Massachusetts Boston

????????

[Faisal Al Qattan]

محمد ما انصحك في بوستن

المدينة غالية من قلب والدراسة صعبة... هاي اللي سمعته


شباب شرايكم في مدينة رينو؟؟؟

او بالاخص university of nevada, reno

انا حاب ادرس ماركتنج هناك... ياليت تفيدوني

[R. Al-Harami]

السلام عليكم ورحمة الله وبركاته

والله بالنسبة لولاية نيفادا ما عمري رحتها ،، هي ولاية صحراوية عموماً ومافي شي مسوي ضجة لهولاية او شهرة الا لاس فيغاس ،،

ان شاءالله حد ثاني عنده خبره يجاوبك بالتفصيل ،،

وبالتوفيق ان شاءالله :)

[Faisal Al Qattan]

انزين شرايكم في اوريجن؟؟؟؟

[Dana.Al-s]

مساكم الله بالخير

اختي القحطاني .. ما شالله عليج صراحه الوحده مثلي ماتقدر تستغني عنج خخخخخ

انا بجد محتاجه مساعدتج ... ابي اعرف شلون املي الطلب اون لاين .. والمشكله ان في اشيا ما افهمها شنو هي بالضبط .. واذا اي حد يقدر يساعدني فيه :( لان هاي بس اللي موهقني

[Ahmad Al-Saygh]

انزين شرايكم في اوريجن؟؟؟؟

أوريجن ولاية خضراء رائعة وفيها عدد من القطريين في بورتلاند ... وجامعاتها معروفة بالطب مع ولاية واشنطن ...

وبالنسبة لرينو في نيفادا فلا أنصحك بالدراسة بها حتى إن كانت جامعتها جيدة ولكن الحياة نوعـًا ما صعبة مع صخب المدينة الذي لا يصمت أبداً !!

[Ahmad Al-Saygh]

مساكم الله بالخير

اختي القحطاني .. ما شالله عليج صراحه الوحده مثلي ماتقدر تستغني عنج خخخخخ

انا بجد محتاجه مساعدتج ... ابي اعرف شلون املي الطلب اون لاين .. والمشكله ان في اشيا ما افهمها شنو هي بالضبط .. واذا اي حد يقدر يساعدني فيه :( لان هاي بس اللي موهقني

أختي اذكري الأسئلة إلي مافهمتيها!

[Dana.Al-s]

أختي اذكري الأسئلة إلي مافهمتيها!

هلا اخوووي بالنسبه للاسئله ... ماعرف شلون اقولها لك .. لانها اون لاين يعني لازم ارد عليه وله ماراح تمشي صفحه الطلب .. :1639_11196799410:

شسوي؟؟؟؟

[Ahmad Al-Saygh]

سوي كوبي بيست

[Dana.Al-s]

سوي كوبي بيست

ذكاء :D

لي رجعه مشكوور

[Faisal Al Qattan]

أوريجن ولاية خضراء رائعة وفيها عدد من القطريين في بورتلاند ... وجامعاتها معروفة بالطب مع ولاية واشنطن ...

وبالنسبة لرينو في نيفادا فلا أنصحك بالدراسة بها حتى إن كانت جامعتها جيدة ولكن الحياة نوعـًا ما صعبة مع صخب المدينة الذي لا يصمت أبداً !!


لااااااا ياخي لاتحطمني بروحي خايف :58:

شسوي انزين... مافي جامعة بمواصفات رينو.. مايبون سات.. ويقبلون توفل 61.. وفيها ماركتنج وموجودة في اللستة.. والمدينة رخصية انا جيكت اجارات الشقق وشفت اسعار رينو مناسبة بالنسبة للمدن والولايات الثانية

انا بس ابي مكان حلو يعني الواحد يستانس فيه.. وفي نفس الوقت رخيص ومافي زحمة واهم شي الجامعة سهلة ومايبون سات ... عندك مكان ثاني غير رينو بهالمواصفات؟؟ لو عندك بكون شاااااااكر لك :D

[Ahmad Al-Saygh]

لااااااا ياخي لاتحطمني بروحي خايف :58:

شسوي انزين... مافي جامعة بمواصفات رينو.. مايبون سات.. ويقبلون توفل 61.. وفيها ماركتنج وموجودة في اللستة.. والمدينة رخصية انا جيكت اجارات الشقق وشفت اسعار رينو مناسبة بالنسبة للمدن والولايات الثانية

انا بس ابي مكان حلو يعني الواحد يستانس فيه.. وفي نفس الوقت رخيص ومافي زحمة واهم شي الجامعة سهلة ومايبون سات ... عندك مكان ثاني غير رينو بهالمواصفات؟؟ لو عندك بكون شاااااااكر لك :D

أنا أعتبر رينو أخت لاس فيجاس بس على حجم أصغر ... وقريت شوي عن جامعة رينو وهي من أولى وأقدم الجامعات في نيفادا ...

وبخصوص نفس المواصفات بتلقى الكثير من الجامعات ما يقبلون سات وعندهم نسبة التوفل بسيطة ...

اللستة تتضمن أكثر من 100 جامعة وأكيد بتلقى الجامعة إلي تناسبك

[Faisal Al Qattan]

مب بس الجامعة

حصلت كذا جامعة ماتبي سات... بس المشكلة ماتحصل في اماكن حلوة ورخيصة

[Ahmad Al-Saygh]

مب بس الجامعة

حصلت كذا جامعة ماتبي سات... بس المشكلة ماتحصل في اماكن حلوة ورخيصة

آسف ع الرد المتأخر

بس بتحصل جامعات في مدن جامعية وحياتهم حلوة ورخيصة

[Dana.Al-s]

سؤااال الله لايهينكم حد يرد علي ..

الضمان المالي هل لازم يكون من حسابي يعني باسمي ؟؟ او عادي من حساب امي او ابوي ؟؟؟

[Khalid Al-Qahtani]

سؤااال الله لايهينكم حد يرد علي ..

الضمان المالي هل لازم يكون من حسابي يعني باسمي ؟؟ او عادي من حساب امي او ابوي ؟؟؟

مش ضروري...

يعني عادي...

سواءا حسابج او حساب احد الوالدين...

[Faisal Al Qattan]

بس اذا باسم ابوج مثلا... في ورقة ثانيه لازم يعبيها تحصلينها في موقع الجامعه

[Ahmad Al-Saygh]

بس اذا باسم ابوج مثلا... في ورقة ثانيه لازم يعبيها تحصلينها في موقع الجامعه

ما يحتاي لأن في كتاب البنك بكون مكتوب بأن والد الطالب الفلاني بيتكفل بدفع مصاريف الدراسة