رد على قصيدة هل الخميني

[Tareq Al-Saei]

السلام عليكم ... هذي القصيدة هي رد على قصيدة الأخ العزيز خليفة العطية .. وكلي ثقة انه ما راح يرد طلبي


ارسل كلامي صافي(ن) لك يا غالي
سلامي موصول(ن) من القلب توصيل

وأطياب فل(ن) تكسي كل المقالي
والورد فواح(ن) من الراس للذيـــــــــــل

أبغيها توصل صاحب(ن) ما عدى لي
يا مجمل(ن) فعلك على الحق تجميل

على قصير اليــــــــــــد ماي(ن) زلالي
سيف(ن) على الظالم في يوم النوازيل

هذا خليفة طيبه بين الرجـــــــــــالي
ينفح كما ورد(ن) من الطايف يســــــــيل

أبغيك يا بودعيج تسمع مقــــــــالي
يا نسل حلال العقد والحـــــــــــلاحيل

العمر فاني(ن) يزول بزوالــــــي
تبقى القلوب شاهده بالتفاضيل

والأمة كم عانت سموم(ن) عضالي
كثر الخلاف زاد فيها التناكيل

قحطان وعدنان(ن) مازانوا الخلالي
بعد التقى لا طعنة(ن) في الرجاجيل

والصادق المصدوق قال المقالي
(المنتنه) وصفها ..يا مصدق القيل!!

لو ترفع الأنساب دون الرجالي
ماكان أبولهب في أدنى المنازيل

الفرقة تفني كل طيب الخصالي
نار الخلاف تاكل المد والكيل

أنسى الخلاف وانهي مر الجدالي
تكفا (ترى تكفا تهز الرجاجيل)

تصفي القلوب مثل نسم العلالي
من غيمة(ن) حمالة الخير والسيل

هذا رجاي فيكم يا من صفى لي
فيكم قطر تنال طيب المحاصيل

أنتم نجوم تضوي كل العوالي
في غربة(ن) عفنا دروب المخابيل

ترى الأخوة نور سود الليالي
في ديرة(ن) دستورها كتاب الأنجيل

كونوا لقطر شوامخ(ن) كالجبالي
نزحف على العدا زحوف الجحافيل

يالله ياللي تغفر كل ما بدى لي
احفظ قطر يا ربي شر العواذيل

اللهم آمين

وسلامتكم ...

وسامحونا على القصور..
نتمنى نبتدي صفحة جديدة ... وهذا المنتدى ما صار الإ انه يجمع الطلاب في ديار الغربة ... وكلنا عيال قرية وكل يعرف خيه ... وان شاء الله ما نشوف خلافات بينا وبين بعض ..

تحياتي للجميع

أخوكم :

طارق عبدالله الساعي

تم التعديل و اضافة بعض نون التنوين المنسية وتعديل املائي من الحلاليل الى الحلاحيل ...

[Mohammed Al-Mansouri]

صح الله لساانك شااعرنا وجزاك الله خير.. وصدقت كلنا فالنهايه اخوان

[Khalifa AlAttiyah]

تكفا (ترى تكفا تهز الرجاجيل)

اي والله ..

لا هنت يا طارق وما عليك قصور ..

ومثلك ما ينرد والله ، وابشرك انا ما فيه قلبي شي على حد وهذا الشي وضحته من قبل ، واتشرف بخوة كل رجل شريف نبيل قولاً وفعلاً (فقط لا غير ) ..

وما بيني وبين حد خلاف ، لأن الخلاف يكون بين راسين ..

وهاذي الأمور ما هي جديده علي وانا اخوك ، ولا هي جديده على كل واحد تحقده المحقودين ، وتحسده المحسودين ..

(ذو العقل يشقى في النعيم بعقله .. وأخ الجهالة في الشقاوة ينعم )

لكن المشكله ، ان صار الشعر موضه وفهمه بعد ، والله المستعان ..

وانا والله ما احب افخر بالاصل ، ولا عندي هالعقده ، وفيه بيت لي من قصيده قديمه اقول فيه :

وكم واحد(ن) يالاجودي ما له عقال
يسوى عرب جدانهم سادوا الناس

والكل فيه الزين والشين ، وفي كل بلد مقبره مثل ما يقولون وللأسف ..

وانا والله ما بغيت اطري اسامي حشيمه للشعر ولكم ، اي ان قصيدتي مب عامه ..

والله يسمع منك ، ويحفظ قطر واللي فيها من الأحرار الأخيار من شر العذال والصغار ويخزيهم اكثر واكثر ، ولا هنت ..

[Tareq Al-Saei]

محمد المنصوري ... صح بدنك ... واياك ان شاء الله ... ما قصرت يالغالي ...

اخوي خليفة .. من قال لا هان ...

وانا كنت متأكد انك ما راح تردني لانك تقدر الكلمة ومعانيها ...
وانا ادري عنك انك ما تحب تفاخر بالنسب والحسب وهذا خبري فيك ... لكن الذكرى تنفع المؤمنين

الله يعز مقدارك ... ومحشوم عن قول الحساد يا خوي ...وادري ان قصيدتك كانت عامة لكن انا رديت عشان تبرد النفوس ونفك سيرة الحساد ...
والشعر مب بس رد على الحساد وصغار النفوس وانت ابخس ... نبي نستمتع بقصيد منك يشرح النفس والخاطر :)

وانا اتشرف بأخوتك ولك مكانه ومعزة في القلب ...

وان شاء الله نتلاقى على خير قريب ...

في حفظ الله

[Abdulla Al_Marri]

السلام عليكم ..

صح الله السانك يا طارق والله لايهينك وماقصرت ون اشاء الله ابو عبدالعزيز ماراح يردك..

أنسى الخلاف وانهي مر الجدالي
تكفا (ترى تكفا تهز الرجاجيل)

وشكوووور على القصيده..

تحياتي

[Mohammed S Al-Rumaihi]

السلام عليكم

صح لسانك و بيض الله وجهك يا طارق وماقصرت..

الله يكثر من امثالك وتم الاخوه بينا وحنا والله مانسمع عنك الا كل خير..وفالنهايه كلنا تحت رايه وحده ووطن واحد..الله يديم المعزه بين الجميع ويحفظ قطر من العذال

لاتحرمنا من جديدك يالشاعر

[Ali Al-Rumaihi]

السلام عليكم ورحمه الله وبركاته،

الأخ خليفة توه مكلمني وقال خلاص إن شاء الله كل شي إنتهى وماعاد في مشاكل ولا يبغي يعرف منهم اللي أشتكوا... وذلك لردك ياطارق.

وجزاه الله خير وجزاك الله خير ياطارق.

[Hamad Al-Ibrahim]

صح لسانك يا بوعبدالله , كلمات صادقه من قلب صادق

[Tareq Al-Saei]

مشكورين كل اللي مر وشكر على الموضوع ...

أخوي عبدالله المري ... صح بدنك ومن قال ما هان ...
أكيد ما راح يردني هذا العشم فيه وسواها ... مشكور على مرورك وتعليقك

أخوي بوسعد ... صح بدنك وويهك ابيض يالغالي ...
والله لا يحرمنا من امثالك ... عزيز وغالي والله ونتشرف بمعرفتك يا خوي ... آمين ويحفظ بلاد المسلمين

بومايد ... وعليكم السلام ورحمة الله وبركاته ... بوعبدالعزيز رايته بيضه وهذا مب غريب عليه ...وجزاك انت بعد كل خير

بومريم .. صح بدنك ... تواجدك دايما رائع ... نبي دعواتك الصادقة :)

[Adel Al-Jalham]

لا هنت ياطارق على هالقصيده الحلوه في معانيها وكلنا اخوان واخوات وتحت رايه بلد واحد والي هو قطر والله يوفقنا لما هو خير في خدمه اسلامنا وبلدنا والله يجمع بالمحبه قلوبنا اللهم امين

اخوكم
عادل الجلهم

[Khalifa AlAttiyah]

بوعبدالله مشكور على كلامك الطيب ، والله لا يهينك ، فعن طريقك سترت على هالناس وكفيتهم الشر ، فهم مدينين لك بالكثير لأنك والله ما خليت لي منفذ كلش ..

وكله في صوب و(( تكفى ترى تكفى تهز الرجاجيل)) في صوووووب ، خزمتني مثل ما ينخزم البعير والله .. هههههه ..

وانا تفاهمت مع الشباب في الاداره كما ذكر بو ماجد وكنسلنا الموضوع كله ، والله ياجرك خير فيهم وفينا ..

[Nasser Al-Saadi]

باااااااال يا بوعبدالله ،، صح لسانك ياخوي ،،

تدري انا خاطري برد بعد ،، من شنو ما ادري ،،
وبيض الله وجهك يالاجودي :)

وننتظر عودتك الدوحه بفارغ الصبر يالحبيب http://www.frsanq.com/images/smilies/21.gif

[Mohamed Al-Naimi]

صح الله لسانك يا بوعبدالله ,,, ولا هنت يالغالي ..

وهذا العشم في بوعبدالعزيز ..

وان شاء الله طاح الحطب .. وكلنا اخوان ..

[Saud Aldolaimi]

صح الله لسانك يا طارق ما قصرت ...ردك كان في محله والله يدوم المحبه بين الجميع.....
تحياتي
سعود الدليمي
لندن

[Hassan Al-Ibrahim]

صح الله لسانك كفيت ووفيت يا طارق ..

كتبت و صدقت في كل اللي قلته و يستاهل بودعيج اللي ينكتب فيه القصيد وزود :)

الحمدلله اللي أنهى المشكلة و الخلاف وطبت يا بوعبدالله و طاب ما كتبت ..

[Ahmed Janahi]

والله صح السانهم شعراء ليدز

وماهنت يابوعبدالله ودايم كنت مفتاح للخير مغلاق للشر

وكلامك مشهود ومن الله الجزاء الغير محدود

[Nasser A Al-attiyah]

صح الله لسانك يا طارق

بيض الله وجهك قصيدة جزلة و مرادها خير و ما به الا كل الخير ان شا الله

و القصيدة ما دلت الا على طيب أصلك و معدنك يا طارق

جزاك الله خير و الله يكثر من أمثالك

[Tareq Al-Saei]

أشكر مرة ثانية كل من رد على الموضوع بالشكر ....


بو جلهم ... ومن قال ماهان ... الله ويوفقنا جميع ... صدقت في كلامك

بو عبدالعزيز ... العفو يا خوي ... وهذا يدل على طيبك وانك تقدر من تعنى ... ابيض ويه يا بوعبدالعزيز

سعداوي ... صح بدنك ياخوي ... هههههه انت عجيب بس خلك دايم على الخط ... ما عليك زود .. وان شاء الله الجيه قريبة وانا مشتاق اكثر والله

بو عمير ... صح بدنك يا خوي ... والحمدلله بوعبدالعزيز ما شفنا منه الا الخير

سعود الدليمي ... صح بدنك ... امين ويديمها على امة محمد

بوعلي .. صح بدنك يا خوي ... وصدقت في اللي قلته ... طابت لياليك

الجناحي ... المرابط ... :D ... ماشاء الله راد على الموضوع .. والله انا محظوظ ... يجزاك الله خير .. وماعليك زود

ناصر العطية ... صح بدنك يا خوي ... ويهك ابيض ... ما قصرت ياخوي ... وماعليك زود ... واياك ان شاء الله والله يكثر من افعالك

[Saif Al-Mannai]

صح لسان شاعرنا و عميدنا /: و اهديك تحيه خاصه من قطر
مع ان ماعندي اي علم بتفاصيل كتابة قصيدتك لكني استنتجت انها لإصلاح ذات البين كما يقال

جزاك الله خير و بارك الله فيك

بو عبدالعزيز ، هلا بذيب الخريطيات والله، لك وحشه.. و الدوحه مشتاقه لك

امس كنا عند بو عبيد حاط له 7 خيام ماشاءالله من العيد اللي طاف في خور لعديد و مرتب ذاك المكان الزين والشباب مثل ماتعرف كلهم عنده /:

برئاسة بو شبيب /:


شبة ضو و سوالف طيبة

يالله خلنا نشوفك و ياريت تضيفني مسنجر عندك عشان ناخذ علومك اكثر


اخوك / سيف المناعي

[Tareq Al-Saei]

صح بدنك يا سيف ... وسلامي لهل قطر كلهم ... وسلامي على البرتقالي خاصة ...خخخخخخ ..

شاكر مرورك ... ترى الايميلات ما تنحط في المواضيع ... تنحط في مجلس الشباب X-:

[Saif Al-Mannai]

بو عبدالله ترا البرتقالي الحين صار غير البرتقالي اللي كنا نقصده في البدايه =======>> في اشياء جديده و حيه ههههههههههههههههه

عموما مشكور على تنبيهك لي بخصوص الايميل و أهم شئ ما تكون فيها " محاكمه عسكرية " مثل ماتخبر ذاك الموضوع /:

ثانكس