المساعد الشخصي الرقمي

مشاهدة النسخة كاملة : ماأعجبني ومالم يعجبني في حفل الإفتتاح(CNAQ)

Mohammed Aldelaimi
02-12-2005, 01:01 AM
بسم الله الرحمن الرحيم
-----------

سلالالالالالالالالالام عليكم

فاتكم يالربع الحفل ... وايد وايد حلو

تسلم اليد اللي عطتنا التذاكر

من عنوان الموضوع , كني جاي أبي أتهاوش

بس بالعكس , أنا أمدح قبل لا أنتقد

وهذا الإنتقاد لازم نذكره, علشان نرفع من مستوى التنظيم والإخراج عندنا

--------------------

من طق طق ... لين سلام عليكم

التقينا بالشباب جدام الكلية علشان نروح مع بعض

أيمن إربد
ماجد الحمر
إبراهيم ... (للآسف ماعرفت أسمه الكامل)
ومحاتـشيــــــــكم
المفروض أحمد الصلاحي يجي ويانا(بس راح الغارية)

كانت في بوابة وحده للدخول, فالزحمة واصلة للخور عند البوابة الرئيسية (المقابلة لإتحاد الرماية)

البنات اللي كانوا يتشيكون التذاكر لبسهم حلو(كنه مال القرنقعوه) , بس تنظيمهم المفروض يكون افضل بكثير, خاصة في توزيع الناس في القاعة

الظاهر ماخذين بالقاعده ( من سبق لبق)( ومن قام عن خبزه أحترق)

احنا ولله الحمد, فينا ناس محافظين ما يحبون يقعدون بين الشباب
وفي شباب (مثل حلاتي :D ) مايحبون يقعدون بين البنات
(أشغلتنا هالبنت مع شعرها اللي قاعده جدامنا, زينب العسكري على غفلة)

فالمفروض يسير على الأقل تخصيص جانب خاص للبنات

أما البنات الصايعــ :cool: ــات, دشوا على طول بين الشباب(لا إحم, ولا دستور)

والشباب الصايــ :cool: ـــع خلى الحفل , ودربل بدربيله على اللي حوله

بدا الحفل بالنسبة لنا يالطلاب بعرض مقطع فيديو عن الجامعة , شئ طيب بس المقطع اللي عقبه زهّق أبوي
مجرد صور شلون يبنون الكلية

وقعدنا فترة طويلة مشاهدين الطوفة ننطر الحفل الرئيسي يبدأ
(المفروض يشغلون لنا مقطع من مسرحية,فلم,أخبار على الأقل نتسلى)

جات سمو الأميرة موزة بنت ناصر (حرم الأمير) ورفعت الستار عن حجر تأسيس الكلية (وكانت طريقته وايد حلوه)
وبعدين خذوا جولة حول مجسم مباني الجامعة

بعدين توجهوا للخيمة الرئيسية,

قولوا وش صار بعدها

وااا فشلاه

قاموا بتشغيل النشيد الوطني لقطر

وربعك ... ومنهم أنا للأسف

واقفين كأن على رؤوسهم الطير

ولا قالوا قسما ولا هم يحزنون

اللهم بعض البنات اللي ورا (اللي لابسين مال القرقيعان)
كانوا يبون يحمسونا بس ما في فايدة

انا تحسفت اني ما قلت ... لما شغّلوا النشيد الوطني حق كندا

قاموا الكنديين وبصوت يسمعه كل اللي في القاعة ينشدوون نشيدهم الوطني

أخخخ ... أغلبونا هالمرة

وقولوا بعد وش صار بعدها مرة ثانية

لما بدا مدير الكلية يلقي كلمته

(تراني ما أكذب عليكم) تقريبا قاموا نص طلاب القاعة, وغادروها بكل برود

وللأسف , الحفل للحين ما بدا , رحتوا

المشكلة ما عندنا إلتزام بالشئ, ولا على الأقل إحترام للمنظمين اللي اطلعوا من جدامهم

بعدها , القت لطيفة الحوثي والقوا السادة مدير كلية شمال الإطلنطي بكندا ومدير إدارة كيوتل(أعتقد عبدالله بن ثاني) والسيناتور لمدينة (فنل لاند-والله مدري وش اسمها بالضبط) كلماتهم الرائعة.

ولي الفخر أقولها وبصوت عالي
قامت سمو الأميرة لإلقاء كلمتها
ولكن
إعتذرت للحضور ... بإنها سوف تلقي كلمتها بالعربية
ثم قالت:
بسم الله الرحمن الرحيم
سعادة الحضور الكرام
السلام عليكم ورحمة الله وبركاته

اهنيه نفتخر بلغتنا العربية

كانت كلمة مؤثرة بالنسبة لي

بعدها ... كان في عرض مسرحي

الممثلين بصوب, والموسيقى بصوب, وحركاتهم في صوب ثاني

أعتقد المخرج الحين في قلعة وادرين

ولا ... بنّدت عليهم الليتات ... ووقفوا ربع ساعة بعدين كملوا

وانتهت الفقرة الأخيرة للحفل

بعدين قلطونا للعشى

وعينك ما تشوف إلا النور

الحابل بالنابل ... عبّاس على دبّاس

البنات والشباب متغلغصين في مكان ضيق (أضيق من شارع النصر)

يعني لو ماتفتح للبنت الطريق و تكتم الهوا اللي في صدرك بعد .... ولا ما تمر

المفروض مرة ثانية ... يخلون البنات بصوب ...والشباب في صوب ثاني

ياجماعة الخير ... الإختلاط ما فيه خير

أعطي الحفل في النهاية : 80%
بس ضاق صدري من بعض الأشياء اللي صارت

وانتهت النشرة التفصيلية لأخبار اليوم
نراكم عما قريب إن شاء الله , وتتمسون على خير

شششششششششششششششششششششششششششششششششششش

تعال لحظة ... نسينا المراسل

يارجال ... ألا الدليمي

مادام جذيه ... رجّع لنا الشششششششششششششششششششششششششششششششششششششششششششششششش ششششششششششش
F Al-Missned
02-12-2005, 01:32 AM
ولي الفخر أقولها وبصوت عالي
قامت سمو الأميرة لإلقاء كلمتها
ولكن
إعتذرت للحضور ... بإنها سوف تلقي كلمتها بالعربية
ثم قالت:
بسم الله الرحمن الرحيم
سعادة الحضور الكرام
السلام عليكم ورحمة الله وبركاته

اهنيه نفتخر بلغتنا العربية

كانت كلمة مؤثرة بالنسبة لي


بأمانه كان ودي اوقف واصفق من كثر ما فرحت بذي الشي

الي محد سواه الكل قام يرطن انجليزي وذي مب لغتنا اصلاً

وفي مترجميين عشان بعض الناس لا يقولون لا ما دري وشو

أفتخر بشخصيه مثل الشيخه موزه تهتم بنا كشباب وتبارك بجهودنا ..

البنات والشباب متغلغصين في مكان ضيق

والله يا اخوي ما كان جي بالخيمه كانت اريح بالنسبه لي

اما الي بالمسرح مادري شصار عليهم ..!

شكراً
Ali Al-Rumaihi
02-12-2005, 06:13 AM
الله يهدينا ويهديهم للصراط المستقيم..

وللأسف الهويه القطريه العربيه الإسلاميه ضعيفه عند وايد ناس..

يالدليمي تصدق عاد أنا أفكر أسوي مشروع تخرجي بالعربي وأجيب لكل واحد من الحضور مترجم لووول عشان مايعيدوني السنه إلا يعيدوني الباكلوريوس كله هههه
Dana Al-Kuwari
02-12-2005, 07:07 AM
وصلنا 2005 ولين الحين نعاني من:
بنات صيع وشباب صيع ..نقعد وسط بنات ولا وسط شباب..
دشوا وسط شباب.. دربل بدربيله ..شعرها مادري عيونها.. طالع طالع ذاك الصوب شلة البنات.. طالعي ذي الي واقف هناك

بااااااال :) ..

مشكلتنا ناخذ من الغرب الي نبيه والشي الحلو ماناخذه.. ماناخذ منهم ان الواحد لو تقعد وحده حذاه مايدريبها.. عنها قامت ولا اقعدت..هذا اذا فكر يتكرم ويقط عليها نظره معني ماعتقد..
ماناخذ منهم احترام البني ادم الي واقف على البوديوم ويرطن .. حتى السلام الاميري ماصار له مثل الي صار ويا الكنديين :) ..

وفي وين؟؟.. في مكان يعتبر اكاديمي وتعليمي :) ..

هههههههههههههههههههههههههههه
شر البليه مايضحك
W Al-Mohannadi
02-12-2005, 09:08 AM
اول شي اشكرك على تلبيه الدعوه والحضور :)
Fatma R
02-12-2005, 09:09 AM
السـلام عليــكم ...
انا الي عجبنـي بالحفل ... الاضــاءة و العروض الي صــارت
وربي شي ... يمكن محمد ماحسيت بها لااانك تشوفها على
شاشة .. بس لو قدااامك شي .... يعني في تكنلوجيا حلوةةةة ..

كيف جينا للكلية ... انا اعيد و اكرر الكلية عمرها ماتاخذ البطاقات ..
يعني الحين الي VVIP والا مش ... وااااحد ...
تخيل دخلنا مجموعه اللهم ورينــا الي عندنا الباب بطاقة البارنق
عقب نزلنـا ورحنا للخيمة ... القهر الاكبر بالخيمة ....
مممم فوق 8 طاولات جنب بعض وفوقهم لافتات ...

Al A Al S Al M Al D Al X

رحت لهم ابي اعرف وش القصة ....
قالو لي وينهي البطاقات ..
عطيتهم الصغار .. الي اهي الدعوة الشخصية مدري البرتكول
قالو لي لا نبي الاســـامي ؟؟؟
قلت لهم اوكى ... انا بعطيكم اسمي لان الدعوة جت لي من الدوام
بس انــا عندي 3 دعوات بدون اســامي ...
قالو لي زين عطينا الاســامي ... !!؟!؟!؟!؟!؟
قلت له اليوم استلمت البطاقات وماعليها اســامي ...
قال لا مايصير تتدخلين ؟؟؟!؟!؟
قلت مب ذي البطاقات تدخلنــي ؟؟؟
طلعوو هالـ الي على الطاولات ... يعطون بطاقات للعشـا
بطاقة سودا مكتوب عليها : Dinner 3 - Dinner 5
يعني .. قلت له وهالبطاقة الي مكتوب عليه : العشـا
قال لا هذي مانبيهـا ... !؟!؟
المهم خربطة بالنسبة لي ....
والقهر الاكبر ... ان الـ VVIP والمش وااحد
:"(
شفت د. نـاصر معرفية ، المدير التنفيذي لكيــوتل
جا عندنا ... والي على الطاولة يقلون له وش اسمك؟؟
يعني يدور اسمه .. !؟!؟!؟؟
لازم د. ناصر معرفيه يكون بـ VVIP Loung
مم شوية خربطة بالتنظيم ...
الفرقة الوطنية ... لقينــاها تحت ..
ورحنـا فوق للخيــمة ... الخيمة سودة كامل من داخل ومدرجـات
ومسرح ..
والاضـــاءة رهيبـــة .... والله حركات مب طبيعيه ...
اعرضو علينــا فلمين ... فلم: عن قطر والكلية والتخصصات
والفلم الثاني: عن كيف بنو الكلية من الاســـاس لين الحين ...

وبعدها اعرضو علينـا بالشـاشة بث مباشر ..
لوصول الشيخة موزة ... مدري وش هي قصة الساعه
الرملية بس كانت فكرة حلوة ... وبعدها راااحو يشفووون مثل المخطط للكلية ... الصراحة انا التصوير عجبـــني ... :">

بعدها جت لنـا الشيخة للخيمة .. وبدا السلام الوطني ... كلن ســأكت .. وصوتنـا ماينسمع بين هالمئات من النـاس ...
وبعد الكندي .. وبعد صوتهم ماينسمع ......

................ يتبع
Mohamed Al-Sayegh
02-12-2005, 10:58 AM
يعطيك العافية أخوي محمد الدليمي, انا للأسف ما كان عندي بطاقة دعوه , تم اختيار بعض الطلاب على ما أظن عشوائي او عن طريق السبونسر ويوم الاربعاء على الساعه 12 الظهر جاي لي خبر ان في فائض في البطاقات ويتم توزيعها في المنى رقم 3 ولما رحت خلصت البطاقات..!!! والله غريبه.. حركه مب حلوه, كان في خاطري اني احضر..
سالفة انقطاع الكهرباء والله مب شي احراج, بس سالفة النشيد الوطني صراحه شي مب حلو , استغرب من البعض عدم حفظهم حق نشيدهم الوطني, وين الوطنية...
اما لموضوع الخلط للأسف يا أخوي ما شفت شي الي يصير في الكلية عندنا صار لايطاق, لكن السؤال وين اولياء امور الشباب والبنات, شنهو صار في الدنيا, مع ذلك عندنا بعض الاخوات الي يدرسون معانا والله في قمة الاحترام , وفي النهاية ما أقول الا غير الله يهدي الجميع ان شاء , وان شاء ادارة الكلية والقائمين على التنظيم يستفيدون من الاخطاء, والله الامام دائما يا قطر .... والسموحه على الاطاله

اخوكم: محمد الصايغ
W Al-Mohannadi
02-12-2005, 11:21 AM
بصراحه الحفله كانت روعه :)

صح كلامج اختي عن سالفه المتطوعين غير محترمين كبار الشخصيات .. اذا مثلا مديره جامعه قطر كانت تمشي على المدرج .. عشان جدام تجيها وحده تقول لها : انتي وين رايحه ؟؟ :confused:

مافي اسلوب ومافي احترام !! :eek:

بس كان في موضوع مضايقني
في 2 من المتطوعين من الكليه اللي ينظمون الحفل
شفتهم في منظر مخل للاداب
واللي زادني غيظ , ان كنت اطالعها ابيها بس توقف عن حركات اليهال اللي تسويها.. شفتها تزيد :confused:

اتجهت الا المسؤولين ( أمن الدوله) كلمته في الموضوع وجدامهم

قلت له : هالشي تشوفه وانت ساكت
المشكله انهم يزيدون مب خايفين
الرجال انصدم قال : شنو هااااي !! :eek:
قلت له ابيك تتصرف ؟
وتيجني وحده من المتطوعات (رفيجتها) تقول لي : هذا زوجها
قلت لها اقص ايدي اذا زوجها!!
هالحركات ماتمشي علي كل ماشفتوا بنت مع واحد قلتو متزوجين ... حركات التستر مب علي

وبعدين اعتقد احنا في جامعه
لو يبون يسون هالحركات اعتقد عندهم بيت !!!

وانا امس شفتهم عند الباركنغ ماسكين يد بعض ويسون حركات !! لو هم متزوجين جان قعدو في السياره مب جدام خلق الله

اللي ضايقني اكثر ان أمن الدولة والضابظ مايقدر يسوي شي
بحجة ان

" مادام البنت راضيه .. مانقدر نقول شي "

وين المنظر العام !!!! كلن يطالع واحنا ساكتين :eek:

وانا قاعده اتناقش مع امن الدوله في هذا الموضوع
رفيجتها راحت لها وتقول لها !!

احد المتطوعين يقول لي .. الكل يدري عن سوالفها !!!
قلت لهم وليش احنا ساكتين ,, مادام احنا ساكتين يبين انا احنا راضين على الحركات اللي هم يسونها

الظابط بنفسه قال لي : حتى لو تروحين لها بتقول لج مالج خص ولا مالج شغل !! :eek:

بصراحه المشكله اشوفها زادت عن حدها

هالموضوع وايد ضايقني في الحفل .. بس لي تصرف ثاني مع البنت انشالله !!!

لان مارضى على بنت (( قطريه )) تشل اسم قطر وتسوي هالحركات :(
Majed Al Hamar
02-12-2005, 03:58 PM
بصراحـــه الحفل كان جيد

واحلى شي آخـــر شي

بس انا استغربت من شي

فعلاً المنظمين ناس ماعندهم احترام

خلوني اقولكم القصه >>>

الساعه 5 عند دوار الاطلنطي

ايمن والدليمي واقفين وكنا متواعدين معاهم انا ورفيجي ابراهيم الشيب

وصلنا عندهم >> وعطونا بطاقة VVIP عاد استانسنا

المهم

شفنا الزحمه >> وانا في الزحمه طلع في طريق لل VVIP رحنا واحنا متشقيقين :D

طبعاُ ، صفة السياير كلها مرسيدسات ورنجات وطوارق وشغل 180000 الف وفوق الله يزيدهم

وانا راز بزيهي في الماكسيما :cool:

المهم شعلينا عندنا بطاقة

الاخ رقم 1 اللي واقف اشوف يسلم عليهم ولابسأل عن شي وحنا اول ماشافنا قال البطاقه ياشباب

مب مشكله >> من حقه

راوينا البطاقه >> قعد يطالعها ساعه

عقب قالنا روحوا سيدا

وجينا الاخ رقم2 قال لنا روحوا يسار راوينا البطاقه يود راسه وقال روحوا سيدا

واحنا نمشي بالشارع يتلاقنا الاخ رقم 3

ووين ياشباب >> قلنا له بنصف >> اشوف البطاقه (( من غير كلمة لو سمحتوا )) قلنا له تفضل (( انذلينا لوندري شانصفينا برع )) المهم

تونا داشين

وكنت منزل الدريشه

الا الاخ رقم 4

ياشباب روحوا يمين وصفوا آخر شي >>> لو تشوفون المواقف اللي كانوا يبونا نصف فيها >>> أبعد موقف في الكليه

قلنا له شفايدة VVIP قالنا

أهاااااا >>> عيل تفضلوا شي مانقدر

اظن لو ماخذ سيارة واحد من الربع وله مأجر وله صاف برع شان مانسألت هالكثر


أخـــر شي مادخلونا الخيمه >>> يالله اشةه انه احنا كنا شله وكله سوالف
Ayman Erbad
02-12-2005, 05:10 PM
ماشاء الله كانت فرصة طيبة نشوف الشباب

المهم عندي تعليق على سالفة النشيد الوطني:
المشكلة مش الوطنية و لا حفظ النشيد. المشكلة أنهم بدأو من غير تقديم ماحد كان متوقع يبدأ السلام الاميري و أتذكر انه كلنا كنا قاعدين مب عارفين شالسالفة لين ماالبنات اللي لابسين لبس القرنقعوه قالوا باسلوب فج قوموا السلام الاميري و بعدها قعدنا و نتفاجا بان السلام الاميري الكندي بدأ

وأخيرا بدا الحفل و لكن أنا صراحة حسيت أنه صبري نفذ (يمكن لاني كنت جوعان :)) و طلعت من الحفل بسرعة

أتوقع التنظيم في الخيمة كان أفضل و أهم شيء أن المسوؤلين عن الحفلة يتعلموا من أخطاءهم
Mohammed Aldelaimi
03-12-2005, 02:08 PM
قبل أيام زمان ... أيام لا فيها ثقافة ولا حضارة ولا إسلام

كانوا يتكلمون عن الأخلاق

إنما الأمم الأخلاق ما بقيت ... فإن ذهبت أخلاقهم ذهبوا

وعنتر بن شداد يقول

وأغضُ طرفي إن بدت لي جارتي *** حتى يواري جارتي مأواها

والأدباء بعد قالوا:

وأنت إذا أرسلت طرفك رائدا *** لقلبك يومًا أتعبتك المناظر
رأيت الذي لا كله أنت قدار عليه *** ولا عن بعضه أنت صابر


-----------------
الله يوفّقنا للي فيه الخير
اللهم آمين
-------------


اخوووك الصغير اللي وده تسمعين كلامه بقلب مفتوح

بوجاسم
Ali Al-Rumaihi
03-12-2005, 07:05 PM
الدليمي أظن انك فهمت كلام الأخت خطأ..

هي قصدها أن احنا ماخذنا منهم إلا اللي عجبنا.. =ماخذنا الشي الزين وخذنا الشين..


على العموم هذا هو الغزو الثقافي :( الله يستر علينا وعلى أهلنا وعلى المسلمين جميع ويهدينا كلنا للصراط المستقيم
Dana Al-Kuwari
04-12-2005, 03:23 AM
بوجاسم ياريت لو ترجع لموضوعي وتقراه عدل الشيخ :) ..

والي ضحكني اكثر الشباب والشابات الي صفقوه بشكر تحت موضوعه عالعمياني.. ولاحد قال يابوالشباب تراك فاهم غلط :)

مع الخيل ياشقرى..

وموتشكرين يابوحسن عالتوضيح :D

بوووه توني اشوف كلمة اخوك الصغير :eek: ..
انت متخرج ومخلص وتقولي اخوك الصغير ..
هههههههههههههههههههههههههههههههههه
R.A.A
04-12-2005, 08:09 AM
السلام عليكم

في البدايه...اشكرك اخي الكريم محمد الدليمي على الاقرار بخطئك وسؤ الفهم إلي صار. ياليت كل الناس بالمنتدا تصير كذا وتطيب النفوس. فعلا تصرف في قمة الاخلاق الحسنه والرقي. جزاك الله خير.

بالنسبة للافتتاح....ياليت قدرت احضره شكله حلو....والحلو اكثر الانتقادات البناءه إلي إن شاءالله بتخلي المسؤولين يبذلون مجهود أكبر في الاعداد للحفل و أعداد المنظمين له. لأن حفل ناجح ومنظمين فاشلين ومايعرفون اللباقه وحس التعامل مع الناس يؤدون إلي فشل الحفل بكبره.

وشكرا
Dana Al-Kuwari
04-12-2005, 08:44 AM
افا عليك يابوجاسم..
مسموح يالشيخ وما صار الا الخير.. :)



اختك الصغيره
دانه
ههههههههههههههههههههههههههههه
Ahmed Al-Salahi
04-12-2005, 02:23 PM
ماشالله التقرير عجيب والحين تحسفت اكثر اني مارحت بس زين راح ايمن :D ( ماتقدر على الشباب يا أيمن :D )

بالنسبه للتنظيم فشيله والله .. الله يسامحهم
وياشباب غافلوكم وماقلتوا النشيد الوطني :eek: بس حب الوطن في القلب و باخليكم تسَمعون النشيد الوطني اول ما اشوفكم :rolleyes: بس لحد يشرد

محد قالنا عن العشا؟ ذبايح ولا سندويشات وخفايف وما يشَبع .. يعني لازم تمر معصره عقب الحفل :D

الله يهدي الشباب و البنات و ما اعتقد اني باكون وايد مستغرب من اللي صار ... ترا انتوا في شمال الاطلنطي .. وسمعنا عنها شكثر لين ما شاب شعر راسي ( يعني شعرتين ولا ثلاث ) ; )
مب الكل اكيد في شباب و بنات والنعم فيهم

ياخوي محمد ... متوقع منك هذا الموقف الرائع والاعتذار بالحق فضيله وياريتنا كلنا مثلك ..

اختي دانه بارك الله فيك والله يكثر من امثالك

شني طولت؟
مشكورين على التقرير و الصور لو نازله في التقرير احسن صح؟
Abdulrahman Al-Homaid
04-12-2005, 03:09 PM
العرض مشاء الله كان اسطوري ... ليتات في كل مكان ودزاينات على مستوى عالي

من كثر اهتمامهم في هالاشياء نسوا التنظيم بشكل محرج لهم ... مثلا ... على كل كرسي كان في كيس داخله دي في دي عن الكليه ... ليش ماحطوا جدول الحفل ؟؟؟؟

انا مع كلام اخوي ايمن انه محد يدري متى بيبدأ السلام الاميري ووايد ناس غلطوا فيه ... على الاقل كنا بنوقف له او شي.

بصراحة ... في طلاب من الي ينظمون اشكالهم غلط !!!! ومابي اعلق زياده.

هاي كل الي عند ويعطيكم العافيه.
Mohammed Aldelaimi
06-12-2005, 08:04 AM
بوجاسم ياريت لو ترجع لموضوعي وتقراه عدل الشيخ :) ..

------------------------------------------

انت متخرج ومخلص وتقولي اخوك الصغير ..
هههههههههههههههههههههههههههههههههه


دانة ... أنا آسف على سوء التصرف اللي بدر مني

قريت ردك عالسريع ... ليتني فطنته قبل لا أرد

أتمنى أنك تسامحني

---------------------

هاذي باقة ورد لك هدية ... وعليها بطاقة تقووول:

http://ww1.1800flowers.com/800f_assets/images/flowers/images/shop/catalog/16126.jpg


أعتذر لك





----------------
محمد عبدالعزيز الدليمي
الدوحة