الفرق واضح ..

[Talal Al-Khalifa]

السلام عليكم و رحمة الله و بركاته

هذي الابيات جزء من قصيدة وانشالله انها تنال على عجابكم ..
والسموحة على القصور ..

يا مـرحبـا باللي ســوألـه عنــى لــي ..
من غـالـي ٍ قــدره رفـيــع ٍ و محشوم
تـقـول وشـحـالك ؟ و وشلـون حـالـي ؟؟
واقـول يا نـاشـد ترى القلب مـهـمـوم
يـهـنـى سـلـيّ البــال طــول الليـالي ..
ولا انا عـيـنـي حــريـب ٍ لـهـا النــــوم
و العـيــد للي دالـــه القـلـب سـالـي ..
ولا انا عيـدي مع النــاس مـشــــؤوم
امـشـي مع العـالـم و كـنـّي لحـالـي ..
في ديــرة ً قـفـرا من الشوف محروم
عــزاه من هـــم ٍ على الصـدر صالي ..
واحس في قلبي وهج نــار و سموم
مــاطــاب لي وقـــت ٍ ولا زان بــالــي ..
صويب في صدري سكاكين و سهوم
و كــم من رفـيـق ٍ بـالمـودة صفا لـي ..
وليّا الفـخـر لاصـار رفـقـانـي قــــروم
اصـغـرهـم اللي بالمواقف طـرى لي ..
واتـقـاهـم اللي به الطـيـب مـرسوم
لاشـــك في الغـربـة يبين الفضـا لي ..
و الفـرق واضـح بين الاقـمـار و نجوم
احـد ٍ يـجـيـك الغيـث عـقـب المحالي ..
واحـد ٍ لـك الله مـاوقـف لـي ولا يــوم


اخوكم

طلال بن راشد آل خليفة

[Abdulla Al-Naimi]

بسم الله الرحمن الرحيم
السلام عليكم أخوي طلال
ما شاء الله عليك أبدعت صراحة

السلام عليكم
عبدالله بن محمد بن مبارك النعيمي

[Khalifa AlAttiyah]

صح الله السانك يا بوراشد ، ولا هنت على الابيات الطيبه ، والله يعينك وينصرك برفقه صالحه

[Mohammed Marafi]

صح الله لسانك يا بوراشد..

كلمات ولا اروع بصراحه..

وجعل الهم بعيد عنك وعن كل المسلمين..

ولاهنت يالغالي..

:)

[Talal Al-Khalifa]

عبدالله النعيمي

مشكور على الرد و ماقصرت .. :)

خليفة العطية

صح بدنك يا بو عبدالعزيز .. ولا هنت على الرد الطيب :)
و الابيات مانزلتها الا عقب ماسألت عن جديدي ..

محمد معرفي

ردك الاروع و ماقصرت .. اللهم آمين :)

[Mohammed S Al-Rumaihi]

صح لسانك يا بوراشد ولا هنت,,,

والله يصبرنا وياك على هل غربه ويردنا بلادنا سالمين انشاءالله...

و الرفقه الصالحه اهم شي فالغربه ولا في بلادك

[Nasser A Al-attiyah]

صح الله لسانك يا بو راشد كفيت و وفيت

ما عوتنا الا على الجزال .... بيض الله وجهك

و تنتظر جديدك

[Tareq Al-Saei]

صح لسانك ... والله يخفف عليك وعلينا ...

وما يخفف الغربة الا رجال معادنهم طيبة مثلك وشرواك

تحياتي لك ... ولا تبخل علينا بجديدك

[Talal Al-Khalifa]

محمد بن سعد الرميحي

صح بدنك يا بو سعد .. و ماقصرت على الرد .. والله يردنا سالمين انشالله .. :)

ناصر بن عبدالله العطية

و وجهك يا بو عبدالله .. والله لا يهينك على الرد .. وحنا ننتظر جديدك بعد :)

طارق الساعي

صح بدنك و شرواك الطيب .. و الربع اللي عندي كلهم مب مقصرين و بيض الله وجيهم كلهم :)