معاناة طلاب التأسيسي

[E Almazrooi]

طالبة من طالبات التاسيسي تشكو معاناتها ومن الظلم الذي نلاقيه من نظام التاسيسي فجسدت معاناتها في هذه الابيات

في هذه الجامعه كل شي بال english
حتى ال lecture long وما تصير fenish
ياربي شسوي هذا حال مبتلش
وهكتونا بال foundation وصارت حياتنا rubbish
ياناس الرحمة ترانا والله fresh
سنتين من عمرنا واحنا ندرس ال english
وبعدها New story لازم Tofel ولا fensh
يا جماعة الخير والله أمهاتنا عرب هب british
هذي قوانين university ولا بوش
ننشد عن العدل وينه والله حراااااااااااااااااااام صار حالنا حال ال fish

[Thani Al-malki]

الصراحه صج مشكله

اوكي لو مقرراتنا تغيرت وتعدل فيها الانجليزي وجابوا مدرسين يعرفون يقولون ايام الاسبوع صح (ترى صارت)

بنقول اوكي لازم توفل

وكل الدفعات اللي مالحقت عالمقررات المعدله يسوون لها استثناء

والتوفل الصراحه ماسمعنا عنه الا قبل مانتخرج من الثانويه
ليش ما يهأيون الطلاب على التوفل قبل التخرج بكم سنه (وهاي الشئ اللي تسويه المدرسه العلميه)

(هل صحيح ان حتى اللي بيدخل شريعه الحين لازم يجيب توفل؟) انا اتوقع اشاعه ...!!!!!!

[E Almazrooi]

جامعة قطر الحين كلها تاسيسي ما عدا التاريخ والشريعة حتى القانون صار له تاسيسي
والمشكلة انا احنا ندرس الانجليزي من level1 لين level4 طبعا بعد ما نقدم التوفل وعلى حسب المعدل ندرس الليفل يعني 450 يعادل level3
انزين والي ماجابو 450 وال500 شسوووووووووووووون المسااااااااااااكين ؟
احنا مهب ضد ان احنا ندرس الانجليزي بالعكس احنا مع هالشي بس القهر انهم لازم يبون التوفل والحين ارفعو المعدل وصار 500
دام انهم يبون التوفل ليش يدرسونا الانجليزي ليش ما يدرسونا للتوفل
اشفايدة دراستنا للانجليزي دام انهم مهتمين بالتوفل اكثر ؟
ويااااااااااااااااااااااااااااااااااااااااريت دراستنا بالانجليزي عدله

[Nasser Al-Saadi]

اخوي ثاني ،، اولاً: انا اقدر اقولك الكلام اللي سمعته شبه صحيح :)

قبل كم يوم كنت قاعد مع أحد الدكاتره في كلية الشريعه ،، وكان يقول ان في دراسه لتحويل مناهج الكلية بالانجليزي ،، فما يندرى إلى الآن :)

اما بالنسبه للتاريخ ،، فما أدري غير شي واحد ،، ان مادة تاريخ قطر بيدرسونها لطلاب كلية الادارة بالانجليزي :)

[R.A.A]

صراحة الله يعينكم
التوفل مب سهل والطالب مايقدر يجيب درجة توفل عاليه إلا إذا كان أنجليزيه قوي.
ونصيحة لجميع الطلبه....التوفل أختبار يبغا له تدريب شخصي...يعني ماظن الدورات تفيد فيه لان مافادت معاي...مايفيد غير ان الشخص يشتري له كتاب وسيدي ويتم يتدرب ويروح يقدم والله يوفقه.
بصراحة شي مخزي أن جامعه قطر...إلي هي الجامعه العربيه الوحيده بالدوحه وهي تمثل الدولة تتخلى عن اللغه العربيه وتتبنى اللغه الانجليزيه حتى في مواد الشريعه. هذي لغه القران هذول شنو يبون يوصلون له. صراحة سياسه غريبه ماشوف شنو الفايده منهم غير وضع المزيد من العوائق أمام الطلبه والطالبات وتقليل نسبة الحاصلين على درجة البكلوريس.
ياليتهم لماتبنوا اللغه الانجليزيه تبنوا أفكار اصحابها وسياستهم بالتعليم.
هنا بالجامعات الكل يدرس وتقدم جميع التسهيلات لجميع الاعمار ولكل المستويات عشان بس الشخص يتعلم. وهذول يحطون عوائق وصعوبات مدري شنو الهدف منها؟

[Nasser Al-Saadi]

ابتسم انت في جامعة قطر :D

[Bothina.Ahmad]

خخخخخخخخخخخخخخ

صدق اخوي ناصر .. ابتسم ( ابكيييي ) في جامعة قطر

يوم الاربعا كان في تقرير عن دكتور الكالكولس .. طلعت حرتي عند البروفيسور ... ويوم الخميس تقرير لدكتور الانجليزي .. بس حرام مدحته ...

عاد ان شالله هالتقارير في منها فايده ... اتمنى ..


وجان على السنه التأسيسيه .. والله مسببه للبنات رعب .. لانه فعلا شي مايسوى وهم النجاح فيه انت وحظك ... يا مماا بنات نقصتهم بسسسس درة للنجاح بس ردوهم وخلوهم يعيدون مادة التأسيسي مره ثانيه ..

بس انا ماقول غير اصبروا واللي عليكم سوووه .. حاولي تجيبين التوفل اللي يبونه .. واذا ماقدرتي على التوفل عندج المعهد البريطاني .. امتحان الايلز واااااااااايد مضمون ... واايد بنات اعرفهم جابوا 550 وهم اصلا خبر خير في الانجليزي :) بس المهم جابوهاا وافتكوا ....

[E Almazrooi]

جامعة قطر الآن ما تقبل بشهادة الآيلس :mad:
لما سألنا عايشة المنصوري ليش قالت لنا بمعنى كلامها
ان البنات عدنا ما يجوبون في التوفل ولما يقدمون الآيلس يجبون 550 علشان جيه ما راح نقبل بشهادة الآيلس




صح منطوق الي قال عن جامعة قطر ( جامعة قهرررررررررررررررررررررررررررررررررررررررررررررررر رررررررررررررررررررررررررر) :(

[Abdulrahman Fakhroo]

اما بالنسبه للتاريخ ،، فما أدري غير شي واحد ،، ان مادة تاريخ قطر بيدرسونها لطلاب كلية الادارة بالانجليزي :)
احسن شي سووووه :D :D :D :D

[Mohammed Al-Mannai]

بسم الله الرحمن الرحيم

بالنسبه لامتحان الايلز واحد من ربعي الاسبوع الي فات قابلينه له ومخلينه يسجل مواد فماعتقد انهم امنعووه

وبالنسبه لان التوفل لازم 500 هي شي طبيعي و موجود في كل الجامعات اما بالنسبه للشريعه فمادري عنه صراحه

والتأسيسي بشكل عام كل ربعي الي دخلوه قالوا لي انهم استفادوا منه

واذا الطالب او الطالبه ماقدر يعدي التأسيس فيتأكد انه ماراح يكمل في مواد التخصص


" خلكم ايجابيين ياجماعه وابتعدوا عن التحلطم السلبي "

[Dana Al-Kuwari]

والله حال مؤسف الصراحه :) ..

دوله عربيه ولغتها عربيه..والتعليم فيها انجليزي ؟؟
اوكي حلو ولغة العالم ماقلنا شي..بس ماشوف دوله اتبعت حذونا الا اذا كانت مستعمره ويعانون من اثار هذا الاستعمار..

مثال: الجزائر.. الاحتلال خلص وراح بس اللغه الفرنسيه في دمهم.. انزرعت زرع..

اعتقد بيجينا يوم ونتكلم 50% عربي و 50% انجليزي :)
الانجليز الي هم انجليز .. مستغربين يقولون What! :)

ماتخيل بريطانيين ويدرسون في جامعاتهم بالسبانش.. ولا امريكان ويدرسون فالجامعات بالعربي.. :)

احس الجيل الحالي مظلوم و راح بين الرجلين .. التطور جا على حسابه وهو ماكان مهيئ اصلا من ايام الاعداديه والثانويه على هذي الانظمه :) ..

اما بالنسبه للتوفل ترى والله تافه وغبي .. ولا يبيله شي ..
شوية اغلاط وتصححها.. كمن قطعة تقراها والاجابات قدام عينك شتبي اسهل من جذي..

بس الكل ماخذه روع من فكرة توفل ؟؟ بوووه توفل صعب صعب..

كنصيحه مني.. والله ان المعهد مافادني الا بنسبة 30%
الباقي كله فالمخالطه مع ال Native speaker

تتعلم القواعد وسرعة السمع والفهم.. وهذا المطلوب اما الدراسه تعطيك وقت تفكر وتترجم في مخك وتخليك بطئ ولسانك مقبوض ..

وموفقين جميعاً .. وتصكون فالتوفل 580 وتخلصون التأسيسي على خير

[Nasser Al-Saadi]

ابتسم انت في جامعة قطر :D

[Ayman Erbad]

والله يا جماعة أنا اتفق مع محمد أنه امتحان التوفل مهم لتقييم قدرة الطالب على فهم مواده بالانجليزي

لان الانجليزي هي لغة العلم حاليا مثل ماكانت لغة العلم العربية في يوم من الايام و كان الاوروبيين يدرسوا العربية و يتفاخرون بمعرفتها و الان جاء دورنا و انشالله بنقدر نستفيد من علومهم و تعود اللغة العربية هي لغة العلم

اما بالنسبة للشريعة و التاريخ و كثير من المواد الاصل فيها هو العربي بس أتوقع شيء ايجابي أنه طلاب هذي التخصصات يكون عندهم المام بالغة الانجليزية

[R. Al-Harami]

والله انا قريت ردود اخواني واخواتي الأعضاء .. وما شاءالله كل رد كان افضل من الثاني ..

الانجليزي مهم والتوفل بعد .. اعتقد لأن درجة الطالب في التوفل بتحدد بعدين مقدرته او عدم مقدرته في فهم واستيعاب المواد اللي ممكن يدرسونها باللغة الانجليزية فيما بعد ...

نوعاً ما لهم الحق انهم يطلبون التوفل وبدرجة عالية .. وعلى سبيل المثال وحده من ربعي كانت تبي تقدم لأحد الجامعات الموجوده في المدينة التعليمية قالولها لازم تجيبين فوق ال550 في التوفل وياليت لو 600 :eek: البنيه انصدمت لكن يوم شافت كتب الجامعه ومدى صعوبتها لطالب مستواه في التوفل والانجليزي مب ذاك الزود فهمت ليش طالبين هالدرجة!! وانا اعتقد لهم الحق الجامعات يطلبون هالدرجة لأن مب حلوة اذا قبلو طالب مستواه متوسط وعقب الطالب مسكين يقعد في الكلاس وما يدري وين الله قاطه وعقب لا سمح الله ممكن يرسب او تدنى علاماته وبعدين هذا اكيد بيأثر سلباً على نفسية الطالب وعلى سمعة الجامعه بعدين..


لكن جامعة قطر .. سالفتهم سالفه ، يعني ما يعرفون منهج الوزارة في الانجليزي وش كثر هي ضعيفة و ما تأهل لانجليزية الجامعه؟!! يعني يفترض يراعون الطلاب شوية ..
واكتساب اللغة يبغيله وقت خصوصاً اذا الطالب ما يختلط في ناس لغتهم الام الانجليزية ولا انه يستخدم اللغة الانجليزية الا فيما ندر! يعني حرام ينهون مستقبل الطلاب بعد سنه او سنتين ضاعت من عمرهم بهذا الشكل .. خصوصاً ما في جامعات كثيرة عشان الواحد يحطله بدائل ..والجامعات الموجوده صح جامهات عريقة ومن افضل الجامعات لكن مش الكل يقدر يدخلها ولأسباب كثيرة ..

وانا من تجربة شخصية المعاهد ما تفيد هالكثر ولازم الواحد ما يعتمد على المعهد ان يستقي منه اللغة ممكن الاطلاع على الكتب او مثلاأ بعض البرامج المترجمة ممكن الواحد يستفيد منها .. وبالنسبة للتوفل في دورات Prepreation او اعداد للتوفل .. بس للأسف في ناس فاهمين هالدورة غلط ان اذا خذوها بيجيبون درجة عالية في التوفل ، وحقيقة هذي الدورة انها تعلم ال techniques ومهارات انك اشلون تجاوب في امتحان التوفل مع شرح عام لأجزاء الامتحان وشرح للقواعد والاستماع والقراءة .. وهذي الدورة جداً مفيدة..

والله يعينكم يا طالب التأسيسي في جامعة قطر او غيرهم .. والله يوفقكم ان شاءالله لما يحب ويرضى

[A A S]

ماعرف اذا التأسيسي لكل التخصصات واحد،، بس الحمدالله اني ماخذته ،، أوكي انجليزي لكن كان What is your name? شفت كتب البنات،، يعني أبدا ماله خص في تأسيس ولا تأهيل ولا شي،،ومايفيد ،،ضياع وقت على الفاضي،،

وما يصير نخلي التوفل المقياس الوحيد،، في بنات معانا بالقسم شطار وأذكياء والGPA فوق 3,5 لكن الانجليزي لكم عليه ،،وما راح يتخرجون الا بشهادة التوفل وهي مفروض تتخرج السنة الياية..!!!

يعني حتى عندنا بعض الدكاترة من أحسن ما يكون،، بس الانجليزي طالع نازل،، هل كان عائق..؟

يعني لو نركز على تعليم الانجليزي بهدف تحقيق التواصل بشكل أفضل وايد أحسن،،

المهم جامعتنا قاعدة تتخبط،، ومب عارفين شقاعدين يسوون هههه

[Mohamed Al-Sayegh]

الله يعين طلاب التأسيسي, انا من الطلاب الي كنت ادرس في جامعة قطر في البرنامج التأسيسي من فتره 4 سنوات, بس كان برنامج فاشل في اللغة الانجليزية اما بالنسبه للرياضيات والكمبيوتر ( التأسيسي) كان اوكي, وطبعاً في النهاية طلعت من الجامعه بسبب التوفل والانجليزي, استغرب مدرسيين عرب يدرسون انجليزي ويتكلمون في المحاضره عربي!!! اي انجليزي يتكلمون عنه, يمكن الحين تغير الوضع ما ادري, نفس ما قالوا الشباب مستوى الطلاب ما يأهلهم انهم يآخذون التوفل, بس مب يعني انهم ما يقدرون يدرسون باللغة الانجليزية, كثير من الطلاب لغتهم الانجليزيه اوكي, بس ما اقدروا يجيبون التوفل, حتى لو اللغة اوكي بعد يحتاج الواحد تدريب مكثف على امتحانات التوفل,
انا اقترح ان يتم السماح للطلاب الي ينجحون في مواد اللغة الانجليزيه في البرنامج التأسيسي لاكمال دراستهم للحصول على درجة البكالوريس ومن ثم يتم وضع امتحان لتحديد مستوى الطلاب ووضع درجه معينه يجب ان يحصل عليها الطالب للتخرج..
انا حالياً ادرس في كلية شمال الاطلنطي واللحمدلله عديت البرنامج التأسيسي , بس قبل التخرج لازم اقدم امتحان كندي يسمى على ما أظن CAEL وانجح فيه , بس حسب كلام الشباب انه امتحان مناسب لمستوى الطلاب في قطر , كثير من الطلاب ما انجحوا فيه من اول مره بس انجحوا في المره الثانية و الثالثه..والسموحه على الاطاله بس صراحه انا من الطلاب الي كنت اعاني من البرنامج التأسيسي واللغة الانجليزيه, بس الحين اللحمدلله اللغة عندي اوكي . صج اني راح اتخرج من كلية شمال الاطلنطي بدبلوم ادارة أعمال, بس شهادة دبلوم احسن من ولا شي, وشدوا حيلكم يا طلاب التأسيسي.. والله كريم

اخوكم: محمد الصايغ

[E Almazrooi]

اشكر الجميع على الردود
نحن ايجابيين ومع الايجابية بس ما يمنعنا هذا الشيء من ابداء راينا لقانون يسوده الظلم والقهر
اولا دراسة اللغة الانجليزية لمدة سنتين( انا معاكم لازم ندرس اللعة الانجليزية لكتساب اللغة وخدمة ديننا بنشر الاسلام )، وبعد السنتين يقولون لنا يلا مع السلامة جيبولنا في التوفل 500 وبعدين كملو دراستكم وخاصة ان التوفل هب مقياس لمستوى اللغة الانجليزية للطالب اعرف واااايد بنات ما يفرقون بين الhis و her جابو في التوفل 500!
ياريت لو جامعة قطر همها ان نحنا ندرس اللغة الانجليزية هم ما يمهم غير التوفل والدليل كلام احد المسؤلين لنظام التاسيسي ( مهب لازم تدرسون اللغة الانجليزية ركزو على التوفل اكثر )

[Mohammed Ghulam]

السلام عليكم

بس حبيت أعلق على كلامكم اذا تسمحولي...

أي شخص يتخرج من أي جامعه في العالم لازم تكون عنده خلفيه عن كل شي تقريبا... عشان لو تكلم او دخل في نقاش ما يكون فاهم ويقدر يرد... ليش انا ... مهندس كيمياء ... أدرس لغه عربيه وتاريخ..؟؟
اشلون تبون الجامعه اتخرج ناس مايعرفون يتكلمون أكثر لغه انتشارا في العالم..؟؟؟

وبالنسبه للردود السابقه... أحس ان فيها مبالغه شوي... انا مريت بالتأسيسي وماشفت شي يستاهل كل هالكلام... واللي مايقدر يعدي التأسيسي شلون بيعدي في مواد التخصص...؟؟

هذا مجرد رأي... يعطيكم العافيه!

محمد غلام

[Mohamed Al-Sayegh]

انا اتفق مع اخوي محمد غلام ان اللغة الانجليزية صارت ضروره, ونفس ما قال اذا الواحد اللغة عنده مب اوكي كيف راح يتعامل مع الآخريين في بيئة العمل, خاصه اذا كان تخصصه هندسه او طب او يشتغل في قطاع البترول والصناعه. ولكن السؤال: هل التوفل مقياس لتحديد مستوى الطالب في اللغه الانجليزية؟ وهل مستوى تدريس اللغة الانجليزية في مدارس قطر ي يؤهل جميع الطلاب للحصول على التوفل؟ ( شنهو ذنب الطلاب)!!!!!

اخوكم: محمد الصايغ

[E Almazrooi]

انا معاكم نحن لابد ان تعلم اللغة الانجليزية
ولكن لابد ان تكون مناهجنا قوية

[W Almarri]

الله يعينكم والله مشكلة مادري ليش مصعبين التأسيسي لهذي الدرجة :confused:

[M.AL-obaidli]

جامعة قطر الآن ما تقبل بشهادة الآيلس :mad:
لما سألنا عايشة المنصوري ليش قالت لنا بمعنى كلامها
ان البنات عدنا ما يجوبون في التوفل ولما يقدمون الآيلس يجبون 550 علشان جيه ما راح نقبل بشهادة الآيلس




صح منطوق الي قال عن جامعة قطر ( جامعة قهرررررررررررررررررررررررررررررررررررررررررررررررر رررررررررررررررررررررررررر) :(

من قااااااااااااااااااااااااااااااااااااااااااااااااا ااااااااااااااااااااااااااال ...... :13:

مستحيــــــــــــــــــــــــــــــل ماتقبل الايلس ... اذا جي عيـــــــــــــل محد بيتخصص .. كل الطلاب بيكوونووون بتأسيسي ...

[Rowda M Al-Ali]

لا اختي الله يسلمج , هذاك أول

الحين يقبلون الآيلز

وجامعه قطر تطرح وتقدم دورات و امتحانات آيلز و توفل

[Dana Al-Kuwari]

هههه
والله حاله قسم بالله

التوفل ماكان حد يسمع فيه ولا يدري شقصته ..
الا احنا يا طلبه برى وعلى ايام 1999 لو تسال واحد فالمجتمع القطري توفل يقولك ايش؟
هذا متطلب للطلاب الانترناشنال .. شجابه للدوحه ؟ اوكي لنفرض الجامعات الامريكيه الي فالدوحه جابته.. مو مشكله


مررررره وحده العالم كلها صارت تتكلم عنه من غير سابق انذار.
انزين هالشي الي طلع مرررررررره وحده .. ماتبون تهيئون له في مقاعد الدراسه؟؟
انا اشوف بان ال 4 اجيال الاخيره انظلمت ظلم غير طبيعي وحرام والله .
وزين ماصار عندها تشتت عقلي. من ثانويه عربيه وكل المواد بالعربي لي مواد جامعيه وبوووم كل شي انجلش

كلموا العاقل بما يعقل.
حاطينه عظم في بلعوم الناس . من كثر عيالنا علشان يعقدونهم ويقعدونهم فالبيت .. مايتعدون ال 300 الف والله ههه
المشكله مو بس تاسيسي وتوفل. قدرات الناس تتفاوت في الي ياكل المر ويستحمل وفيه الي مايقدر
وهذا الي مايقدر يقعد فالبيت ويصيع ويجيب لنفسه بلاوي .

ولي يجيب لنفسه بلاوي يصيع ويضيع ومافي مستقبل ويالله يدش في خط حشيش وادمان
ترى اتكلم جد لا تاخذون المشكله من راسها وتهدون الباقي ..

كم بنت وشاب قاعدين فالبيت واعيزوا ؟؟ هههههه

[Omar Al Hazaa]

احب اقول حق الطلاب الي تعقدوا من التأسيسي..

اسئلوا الطلاب الي قبلكم شلون انجحوا واستفادوا من برنامج التأسيسي..

المهم ترا اذا جامعة قطر صارت ماتقبل شهادة الايلتس.. بيكونون صج مصخوها..

لأن امتحان الايلتس فيه رايتنق وسبيكنق!(وهالشي يعطي الطالب فرصه اكبر للتعبير)
وهالشي مش موجود في امتحان التوفل الي بس يعتمد على المصطلحات الصعبه..

لاكن جامعتنا لازم بتكيف عليه لأنه صعب!
وفي واحد من الدكاتره قال جاتنا اوامر ان احنا نصعب المناهج على الطلاب..
عشان مب أي واحد يتخرج..

انا احب اقول حق المسؤولين اذا نتوا تخرجتوا وصرتوا دكاتره لاتصعبون على غيركم!!
لأن هاي مب شطاره!!>>ويكون عذرهم نبي الطلاب يكونون اذكياء..

اذا تبونه يصير ذكي جان نسقتوا مع المجلس الاعلى وسويتوا الدراسه فالمدارس بالنقليزي وبعدين الجامعه..
هذي غلطه كبييييره.. والحين اشوف خواني الصغار يدرسون بالنقليزي في مدارسهم..
وبعد هالغلطه يبون يصعبون علينا اكثر!

اذا تبون الطلاب يكونون اذكياء لاتعاملونهم مثل اليهال وتحاسبونهم على الغياب؟؟ هههه
هالشي ماشوفه في جامعات امريكا واوروبا الي جامعة قطر تفتخر انها تاخذ مناهجهم!!
خلاص الطالب بكيفه يبي يداوم ولا يقعد فالبيت محد له خص..
والجامعه كل الي عليها انها تحاسبه على نتايجه فالأمتحانات..

واصلا انا الحمدلله ماراح استمر في جامعة قطر..

واحب اقول حق الطلاب لاتسكتون عن حقكم..

ووالله اثنين من ربعي اتركوا الدراسه فالجامعه بسبة هالقوانين..
يعني هالشي ينفر الطلاب ويبعدهم عن العلم!!!!!

وفي جامعات كنديه (اذا الطالب خلص فيها كل كورسات اللغه خلاص مب لازم يقدم امتحان التوفل ويدخل التخصص على طول)

واحنا نشوف كندا شلون تطورت..
وهالأسلوب فالتعليم يدل على ان الجامعات الكنديه واثقه وايد في برامج اللغه الي عندها؟

[Dana Al-Kuwari]

^
^

يا عمر افندي
انت وضعك مو مستقر فالدوله عادي يشلونك بطياره على كندا هههه

[Rowda M Al-Ali]

نبي نتطور , نرتنقي بمستوى التعليم

لازم يكون في ضحايا

بالقطري الفصيح , كل تطور له ضحاياه


:)

[Omar Al Hazaa]

^
^
كلامج صحيح اختي روضه..

اختي دانه كلامج يضحك ههههه.
احنا ننصح مسؤولين الجامعه عشان نوجهم نحو الافضل..
ومابي اعلق على كلامج اكثر..
لاكن هذي بلادي قطر وبلاد كل واحد تربا وعاش فيها ومحد يقدر يشيلني على قولتج هههه.
وكل الي سويته اني ابديت رايي في طريقة التعليم!

ووايد كلام في بالي بس الافضل اني اتم ساكت هههه و
الواحد لازم يتكلم بصراحه واخاف ان قلت كلمه زياده تفهمونها بطريقه غلط..
ومن حقنا ان احنا نبدي راينا فالأشياء الي نشوفها جدامنا>>مثل ما تكلمنا عن الكنيسه..
والحين نتكلم عن التعليم.. وهذا شي طبيعي وعادي..

والدول الي امنعت شعوبها من الكلام في هالأشياء البسيطه<<هالشي انقلب ضدها..

وكا مثال دولة خليجيه!<<امنعت حد ينصحها والي يتكلم سوتهم فئه ضاله
ومن جي شفنا التفجيرات فيها!

وهالكلام الي قلتيه يا دانه افندي>> هاي الي تعلمتيه من امريكا ام الحريات والديموقراطيات والخرابيط كلها هههه!
هاي يثبت وجود الحريه في امريكا والعالم كلهم مغترين فيها!
وانا مثلهم فكرت في لحظه اني ادرس فيها هههه.
لاكن خلاص بهون لأن كلامج مايشجع..

[Mohsin Al-shaikh]

السلام عليكم ورحمة الله وبركاتة

ماهو التأسيسي: عبارة عن تعلم اساسيات المواد التخصص مع اللغة. بمعنا اخر تحضيرك لتخصص لي بدخلة .مثال اذا كان تخصصك البيئة بتدرس لغة الانجليزية في نفس نطاق البيئة علشان تقدر تواصل مع القسم انت لي فيه . هذا بتحصله في معضم الجامعات الاجنبية.

واكبر فخ وقعت فيه جامعة قطر توفل و ايلتس جات من الجامعات الاجنبية وهي فكرة تجارية بحتة وجامعة قطر تقليد الاعمى..

والجامعة قطر تعتبر هذا الاختبار كأساس دخول الجامعة. وهذا خطاء في حد ذاتة

اذا جبت ايلتس 6.5 او 500 في توفل وكنت مادوم ومجتهد تضمن الجامعة نك بتنجح.
محد بيضمن انك بتنجح. وفي ناس درجتهم ميتة في توفل لكن خلصو دراستهم الجامعية بمتياز.

انا اقترح على الجامعة قطر يسون نظام جديد اسمه الدراسة المتكاملة المقصود فيه
ان الشخص مايحتاج يقدم اختبار توفل. يداوم كأنه في المدرسة من صبح لين الظهر لمدة 3 اشهر الدكتور او المدرس هو لي يقيم اذا شخص لغة في تطور والكتابة وقراءة والسمع وعلى اساسه يعطيه اختبار اكاديمي (بسيط) وبعد ماينجح. يدخل ثلاثة اشهر تأسيسي في نفس تخصص يعني يعتبر دخل نصف الفصل الاول من تخصصه (يعني يدرس مواد تخصصه بالاضافة إلى لغة) وجذي الشخص ماضيع وقتة في تأسيسي عام كامل. ونفس الوقت يتعلم اللغة. لمدة عام.

:button:

اشكرك على الموضوع