قهر والله يالربع << فضفضه

[Nasser Al-Saadi]

قصة تتكرر معاي كل كورس ،،
لكن في احد الكورسات ،، نزل المعدل بشكل جامد وصل الـ 1.50

شنو السبب ؟؟!!

الماده الاولى والثانية ،، عند نفس الدكتور
الدكتور ماليزي "مسلم" ،، ما يعرف عربي " زين لأن خطتنا بالانجليزي"
المواد تحتاج فهم ،، لانها في الاقتصاد ،،

ماليزي ويتكلم انجليزي ؟؟!! "يعني اذا خذ سنته ما تفهم شي"
امتحاناته ملتبل شويز " أخس شي ،، صج شي يوهق"

ماليزي ،، وامتحانات ملتبل شويز ،، وفي الاقتصاد ،، واحنا مب فاهمين شي ،، والامتحان اكيد بيكون صعب ،،

في وقت الامتحان الـ first ،، الشباب ما عرفوا يحلون ،، الامتحان صعب ،،

شوي ولا واحد من الربع طلع البراشيم :confused:
شوي ولا الشباب يطرشون الإجابات بالبلوتوث :confused:
الدكتور يسوي نفسه ما يشوف :eek: ،، قاعد يمسح اللوح :confused:
طبعاً الكل جاب معدلات إلا أنا :mad:

امتحان الـ Second ،، الامتحان اصعب من الأول ،، وتكرر نفس السيناريو ،، لكن هالمره أقوى شوي ،،"طريقه جديده للغش"

الشباب يسئلون الدكتور عن السؤال ،، ويسئلونه إجابته B ؟؟"هذا مثال"
"انا كنت على ويهي" احسب صج يسئلون ،، اطلعوا يغششون بعض :eek:

والنتيجه الطبيعية ،، كلهم جابوا معدلات إلا انا :mad:


امتحان الـ Finall ،، الشباب ما عرفوا يحلون شي ،، لانهم استانسوا على الغش ،، والامتحان كان صعب للبعض"طبعاً صعب للي ما يغشون"

شوي ولا واحد من الربع ،، يا فلان "بصوت عادي وبالعربي ، لان الدكتور ما يفهم عربي" ،، شنو إجابة السؤال 15 :confused:

والنتيجه المتوقعه ،، كلهم جابوا معدلات B وفوق ،، إلا أنا D :mad:
بعد ظهور النتائج ،، واحد من الربع يقولي "شنو انت ..ـمار (تكرمون) ، ليش ما تغش :confused: "

وقس على ذلك الكثير من المواد ،، في جامعتنا الحبيبه


آآآخ يالقهر :( ،، كل كورس على هالحاله ،، الشباب اللي يغشون يجيبون معدلات

الواحد شيسوي في حاله :(

[Ahmed Al-Salahi]

بارك الله فيك اخوي واحييك على موقفك من الغش
اخوي النجاح الحقيقي لايقاس بالامتحانات والدرحات ولكن بالالمام بالتخصص و انا في نظري ان اللي درس هو اللي نجح في الماده حتى ولو انه ما حصل تقدير جيد وبتعرف نتيجه هذا الموقف اللي اتخذته في المستفبل القريب لان كل اللي غشوا وبرشموا ما بيفلحون او بيحصلون صعوبه في المواد الثانيه

الله يوفقك اخوي واحييك على موقفك
وشد حيلك

[Mishal Al-Mahmoud]

احييك اخوي ناصر على موقفك .. :)

واخوي احمد كفى ووفى .. بس حبيت اضيف ..

صحيح انك جبت D في الماده وفي اختباار دنيوي .. بس عند رب العالمين انت جايب A+ انشالله .. لانك رفضت انك تغش و تقص على نفسك .. :)

والي غشوا محد بينفعهم في المستقبل خااصه اذا تخرجوا وهم ما يدروون شالطبخه .. وانت خل نظرتك للمستقبل انك بتتخرج انشالله وانت عارف وملم بتخصصك عكس الي غشوا ..

واحب اضيف موقف صار لي هالتيرم ويا الغش ..

كان عندنا مدتريم في مادة الميكانكس .. وطبعا الكلاس ماشالله يتشكى من كثرة البوعرااب والخليجيين .. ففي 2 قعدوا عندي وانا قاعد في وسطهم .. المهم بدينا الامتحاان .. وانا قاعد احل ولا ادري باللي حولي .. بعد ما خلصت الامتحاان .. اشوف الي كانوا قاعدين عندي .. يقولون لي انهم غشوا مني اغلب الاسئله .. وكانت عيونهم طول الامتحان على ورقتي ..

المهم بعد ما طلعت الدرجاات .. طلعت انا جاايب B ولله الحمد .. والشبااب الي كانوا طول الامتحاان قز في ورقتي .. وينسخون منها .. جاااااابوا F .. :D .. لييش هالفرق في الدرجاات مع انهم ناسخيين .. الله اعلللم .. ( الظاهر ما عرفوا ينسخون عدل :D )

وهم كانوا لازقين فيني على فكره .. يعني ما في كرسي فاضي بيني وبينهم ..

واخووي نااصر شد حيلك .. والله يثبتك انشالله .. وما عليك من الي يغشون .. :)

والله يوفقك انشالله .. وييسر لك امورك .. :)

يعطيكم العافيه .. :rolleyes:

[Khalid Al-Mulla]

هلا والله النصري

يا اخي موقفك إيجابي و اقول لك خلك ثابت ولا تتزعزع
:cool:

وبالنسبة لموضوع القهر
!!!!

إيه يا النصري يا اخي اتصور إن العقليات اللي عندنا كلها يبيلها فورمات من الإداريين والمدرسيين إلى اغلب الطلبة

وعقب انزل عليهم الوندوز نظيف وجديد أو حتى انكنسل الوندوز بكبرة وانركب لينكس ولا ماك او اس
:D

وبالنسبة لمواقف الغش

اخبر في مادة يدرسها دكتور عربي عندنا الله يهدينا ويهديه

هو ما يعرف يشرح ولكن إذا تبي جريد بيعطيك ولعبته إذا ناقصتك درجة وترتفع جريد ما يعطيك هالدرجة عشان اتجيه ويعطيك اياها واتقول عنه طيب !

اخبر مادة ما ابي اخوض في تفاصيلها ولكن بعد كانت النتيجة نفس اللي صار معاك !

ولكن سبحان الله يقول الرحمن فيك تابه العزيز: " إن الله لا يصيع أجر من أحسن عملا "
:)

ففعلاً سبحان الله طول ما ناك ماشي سيده وتدري إن رب العرش يشوفك فابشر باسعدك عاجلاً ام آجلاً
:)

اخوك بوجسوم

[J Alkuwari]

اخي العزيز .. ناصر
لن أطيل عليك فالحديث .. فالاخوان ماشالله كفوا ووفوا
ولكن بقيت نقطة واحده يا اخي
إلى متى وطلاب وطالبات جامعة قطر مايقدرون ياخذون حقهم!
انت تشتكي من اسلوب الدكتور.. وتشتكي من زملائك
وهالشكوى متكرره في كل الجامعه ... سواء طلبه أم طالبات
إذاً لماذا لا تعاونون وتطالبون بحقوقكم وتعبرون عن آرائكم

أنا حبيت اقول هالنقطه لأنها فعلا متكررة في جامعتنا
ياما دكاترة يظلمونا .. ولكن مانقول ولا كلمة نخاف احد يحطنا في باله وينزل الgpa
المطلوب منا يا أخواني وأخواتي أن نطالب بحقوقنا
ويكون لنا رأي على الأقل
أنا اشوف خضوعنا وسكوتنا أهو اللي يسبب صدمات لطلاب الجامعه من القوانين والدكاتره والأمور اللي تصير
لو كان لنا رأي قوي ومؤثر .. ما كانت علاقتنا بالإدارة والدكاترة تكون جافه بهالطريقه ومهمشين آرائنا
راجع نفسك وزملائك اخي ..
وحاول تستحث الطلبة أنهم يبدون آرائهم ..
صحيح كثير بيأيدونك فالبداية .. وبيخذلونكم مرات عديدة عند الجد ..
لكن أنت واللي معاك لازم تثابرون..


ادري أن طولت عليك..

وشكرا لوقتكم الثمين
تحياتي

[Saud Aldolaimi]

اقول ناصر ...عندي اقتراح لك ....ياخي انت غش الحين وانجح وجيب معدلات زينه و بعدين استغفر و توب.... ما يبيلها سؤال السالفه ولا نقاش

الله يعيني على النصائح.

سعوووووود
لندن

[Nasser Al-Saadi]

/\ Ahmed Al-Salahi /\
جزاك الله خير على ردك اللي الصراحه اثلج صدري :)
بس ياخوي انا احاتي المعدل ،، انا ابغي اوصل قريب الـ 3
خبرك سوالف التوظيف هالأيام :)

وتسلم يا ولد العم ; )



/\ Mishal Al-Mahmoud /\
هلا شيخ مشعل ،، الله يعينهم الصراحه :D
بس الحمدلله إن البيئة اللي تربيت فيها ما تساعد على هالسوالف :)
الحمدلله ..


/\ Khalid Al-Mulla /\
هلا والله بوجسوم شيخ الإيجابيين :D ،،
لا تحاتي ان شاء الله ثابت ،، حتى اني صرت مشهور في الكلية ،، يدرون اني لاأغش ولا أغشش :cool:
والله يوفقك ياخوي ،، ويردك سالم :)



/\ J Alkuwari /\
مشكلتنا ان احنا ناس مسالمين ،،
وعلى قولة الدكتور ،، اذا تبون تغيرون من سياسات الجامعه ،، الله مكثر الحصى في الجامعه روحوا كسروا الدرايش :D

والله انا حاولت ،، ووصلت لين باب العميد ،، لكن في واحد "معيد في الكلية" الله يسامحه حطمني ،، قالي شبيسوون لك يعني :confused:

الله كريم ان شاء الله ،، والأجر ان شاء الله ما يضيع :)




/\ Saud Aldolaimi /\
والله ياخوك الواحد الزم ما عليه يتحرى اللقمه الحلال اللي بيحصلها عقب ،، :)
وانا عندي قاعده وربعي يعرفونها ،، انا لا أغش ولا أغشش ،، :D

الله يعين ان شاء الله ،،
وتسلم على النصايح << اللي تودي في داهيه :D

ناصر
قطررررر :p