اسأله لاخوانه واخواتنا في امريكا ؟

[Ali Ahmad]

بسم الله الرحمن الرحيم


"" الى اخواني واخواتي الي فامريكا ""

فيدونه ولو بكلمه !!!







انا مخلص الثنويه مع نسبه زينه 94% (( ادبي ))

وحالياً انا فالجسر الأكاديمي مع معدل زين 3.4

وناوي انشاء الله اخذ بعثه ال امريكا

وطالب منكم اتفيدوني وتفيدون غيري بأجابتكم على البعض من هذه الأسأله :







1- ايش رايك في (( امريكا )) كبلد للتعلم :rolleyes: ؟

2- ليش فضلت امريكا عن باقي الدول ؟

3- هل انت نادم على قرارك؟ ولماذا؟

4- ما هي الولايات التي تفضلها ؟ ولماذا ؟ :D

5- ما هي الجامعة التي تفضلها ؟ ولماذا ؟ ; )

6- هل تساندك السافاره فالظروف الصعبه ؟ :eek:

7- هل الغربه صعبه ؟ ولماذا ؟ :eek:

8- هل عانيت اي صعوبات او مضايقات من الشعب الأمريكي (( من وصلت المطار لين اليوم )) ؟

9- كيف تمارس حياتك اليوميه ؟ (( ماقصد الخصوصيه :) ,, ))

10- هل تجد في التعلم هناك خبره لك ومتعه ؟ :cool:

11- لو توفرت لك نفس جامعتك في بلدك ماذا تفضل ؟؟؟ :confused:

12- هل تنصحونه بامريكا ؟؟؟؟؟؟؟؟؟؟؟؟؟؟؟؟ (( الزبده :) ))







مشكوووووووووووورين وماقتصرون ادري انكم مابتردولي اي سؤال

"" وعلى فكره هذي الأسأله بتفيد وايد طلاب غيري ""

[Yousif Al-kuwari]

هلا هلا اخوي..


وان شاء الله نقول لك welcome to the club قريب


اخبار التوفل وياك.. :confused:


انجي حق اسألتك



اسأله لاخوانه واخواتنا في امريكا ؟

--------------------------------------------------------------------------------

بسم الله الرحمن الرحيم


"" الى اخواني واخواتي الي فامريكا ""

فيدونه ولو بكلمه !!!








انا مخلص الثنويه مع نسبه زينه 94% (( ادبي ))

وحالياً انا فالجسر الأكاديمي مع معدل زين 3.4

وناوي انشاء الله اخذ بعثه ال امريكا

وطالب منكم اتفيدوني وتفيدون غيري بأجابتكم على البعض من هذه الأسأله :







1- ايش رايك في (( امريكا )) كبلد للتعلم ؟

للامانه افضل نظام دراسي..في امريكا..
لو تقارنه ببريطانيا وكندا..تحصله اريح واكثر مرونه

2- ليش فضلت امريكا عن باقي الدول ؟

والله هي جات..عقب حوسه ولفة .. بين استراليا وكندا وبريطانيا اخر شي قررت اجي امريكا.. والحمدلله على هالقرار..

3- هل انت نادم على قرارك؟ ولماذا؟

لا بالعكس.. الا احمد ربي.. وان شاء الله اكمل على خير

4- ما هي الولايات التي تفضلها ؟ ولماذا ؟

الولايات ..مممم.. من ناحية الجمال يعني..
عندك دي سي حق المجمعات..هيوستن..

طبيعه..يوتا..كولارادو..

اورلاندو .. حلوه حق الوناسه..كاليفورنيا..بعد5- ما هي الجامعة التي تفضلها ؟ ولماذا ؟

والله مادري , ماقدر اجاوبك لأن انا ما مرت علي الا جامعه وحده

6- هل تساندك السافاره فالظروف الصعبه ؟

انا عن طريق qp والسفاره.. معطتنا السيييييين..
وكيو بي ينزلون لنا معاش..بس :D

7- هل الغربه صعبه ؟ ولماذا ؟

والله صعبه..خاصه البدايه..
بس اذا كنت مع كمن واحد..
بتهون عليك..شوي8- هل عانيت اي صعوبات او مضايقات من الشعب الأمريكي (( من وصلت المطار لين اليوم )) ؟

لا والله بالعكس..

وااااااااااااااااااااااايد طيبين..

وانا صار لي سنه ونص..ما شفنا الا كل خير9- كيف تمارس حياتك اليوميه ؟ (( ماقصد الخصوصيه ,, ))

والله دوام--مطاعم--في الشقه ويا الشباب

الويك ايند طلعات..

10- هل تجد في التعلم هناك خبره لك ومتعه ؟

والله..مادري :rolleyes: متعه..ماظن

11- لو توفرت لك نفس جامعتك في بلدك ماذا تفضل ؟؟؟

بلادي اكيد..
اذا كنت تقصد تكسس..
اسأل الشباب الي فيها..اذا كانو مرتاحين.
اذا مرتاحين..بلادك افضل.

12- هل تنصحونه بامريكا ؟؟؟؟؟؟؟؟؟؟؟؟؟؟؟؟ (( الزبده ))

هي افضل بلد تروح له..
وعندك 50 ولايه تكتشفهم في الاجازات..

بالنسبه لعيب امريكا الي هي الرحله..

ان شاء الله بتهون لما تفتح القطريه خط دوحه-- نيو يورك



تحياتي لك.. والله يوفقك وين ما تروح

[R.A.A]

السلام عليكم اخوي علي أحمد
المشكله أني من أسمع ان طالب او طالبه جاي يدرس في أمريكا أستليم والله لو ما الحياء والمستحاء كان جيت خذيتك من المطار وقمت بالواجب..مب عشان شي بس عشان أحس أن الطلبه والطالبات الجدد مثل أخواني وخواتي الصغار وأبي اجنبهم الحوسه إلي مريت فيها.

نجي لأسألتك...
1. أمريكا بلد أكثر من رائع للتعلم. فعلا تكتسب فيه خبرات عمليه ودراسيه وتدرس شي جديد فرش..تخيل بعض الكتب إلي ندرسها نسخة 2005....ونراسل الكاتب لوماعجبنا شي بالكتاب ونقترح عليه التعديلات ولابعد ناخذ على هالشي اكسترا كريدت.

2. بالنسبة لأختياري للدراسة في أمريكا فهو جاء بعد طول تفكير مع الأهل إلي عدد كبير منهم درس في بريطانا وماكان عاجبهم لاحياة ولانظام دراسة بريطانيا وبالعكس شجعوني على امريكا وخططوا كل شي وفصلوه وأنا لبست ومرتاحه الحمدلله. العيب في بريطانيا بالنسبة لهم كأبتها وجوها وناسها و جفاوة ناسها.

3.أبــــــــــــــــــــــدا ماني نادمة على الدراسة في أمريكا لأنها متعة فكريه و علميه. وأحس أن عندي الكثير افيد فيه بلدي ان شاءالله.

4. الولايات..كلهم زينه لو تروح ولايه فيها حد تعرفه احسن أكيد. اتفق مع اخوي يوسف الكواري في رايه بالولايات.

5. بالنسبة للسفارة لووووووووول ترا بينك وبينها الف ميل وميل وفرق توقيت وحالة ومستحالة..هم مايقصرون لو دروا بيتعاطفون وياك ههههههه بس تعود تدبر حالك بحالك.

6.الغربه كربه...بس إذا معاك شله حلوه مثل إلي عندي..صحبة صالحة وممتعة بنفس الوقت ماراح تحس بالغربه إلا بتحبها عشانهم. وفي مقولة أخذها مني "الفلوس بالغربه وطن" حاول دوم تخلي جيبك عامر ومهما تبذرت خل عندك لان ماتدري شنو جايك وشنو مستخبي لك. ياما وقفت سيارتي حصلت عليها تاااو لو مادفعت مباشره مبلغ وقدرة كان سحبوها عني ورحت البيت زحفاااا ههههههههه لان صراحة مافيني حيل مشي.

7.بالنسبة للشعب الأمريكي وايد حبوب وطيوب ومتعاطف اكثر من شعب قطر مرات والاغلبيه يتقبلونك بأختلافك. أنا كبنت محجبه شوي واجهتني بعض الحركات المزعجه بس تغلبت عليها الحمدلله بس انت اظن مب مواجهك إلا كل خير بأذن الله. ماقصد ان لعوزوني بس خبرك البنات..يطالعون بنظرة غير يعني.نادر مايعلقون.

8. الحياة اليوميه...ستار بكس...جامعة...مطعم للغداء..ستاربكس..جامعه +مكتبه للدراسة..عشاء..البيت وانت مار باستاربكس بعد. وبين البينين لقاءات مع الصديقات العزيزات للسوالف.

9.بالنسبة للتعليم...مثل ماقلت لك انت تتعامل وتتعلم أخر ماتوصل له العلم في اي مجال سواء بزنس ولاهندسة ولا ولا...نظام جامعاتهم متطور جدا..تقدر تشوف كل إلي لك وإلي عليك بطقه زر بالبيت على الكمبيوتر.

10. طبعا لوفرت نفس الجامعه ببلدي افضل وافضل بس بتعلم شي حلو وكيه بس ماراح امر بنفس التجربه الحياتيه الحلوه إلي بتعلمها لودرست برا. الدراسة برا ترا تجربة +خبرة+تعليم...مو بس شهادة.

11. هههههههه الزبدة على قولتك...حياك امريكا وحط في قلبك بطيخة صيفي وأمشي عدل وعلى القوانين يحتار عدوك فيك.
وترا انا اساسا بجامعه من جامعات للسته من قبل ماتطلع هاللسته والموضوع مب بهذيك الصعوبه.

[Mohamed Al-Naimi]

.. ما شاء الله عليكم شباب امريكا ..

.. والله انا تحمست شكلي بانقل عندكم ..

.. المهم ..

.. سوري على اللقافه .. :rolleyes:

.. بس حبيت اضيف كم معلومه ..

.. من وجهة نظري امريكا وايد حلوه للداسه والحياة ..

.. ودايما اسمع ربعي الي يدرسون هناك يمدحون فيها ..

.. اللهم عيبها الرحلة ولكن ان شاء الله بيسيرون رحلة دوحة نيويورك عن قريب ..

.. وصراحة نحسدكم على الاسعار والمعيشة ..

.. احنا في بريطانيا ساكنين بقرقور والايجار يسكنكم في احسنها بيت .. :(

.. والله اكسروا ظهورنا هنيه ..

.. المهم مااطول عليكم ..

.. اسمع اخوي ..

.. يقول لك اسأل مجرب ولا تسأل طبيب ..

.. لو انا في مكانك ..

.. بروح ولا حتى بفكر بشي ..

.. بس الله الله بالدراسة وارفع راس اهلك هناك ..

.. وبالتوفيق ..


<<<<<<<<<<<< لقمان الحكيم :D

[Dana Al-Kuwari]

ياسلااام اتشقق لما اشوف امريكا ترجع لعصرها الذهبي.. عصر البوعراب والزحمه والفله :D

========================
R.A.A
لاتصيرين مثلي كله باساعد وباركض وباشل فلان وعلان ومطار وشقق.. اخرتها يقولون لي هلا ب شوفير السفاره.. :confused:

========================
بالنسبة لاسالتك.. بسم الله ..

1- ايش رايك في (( امريكا )) كبلد للتعلم ؟

اكثر من ممتاز والدراسه عامة معروفه بامريكا انها سهله..واذا بتتخصص تخصص نظري لاااااه عيل ارقد وامن وانا اضمن لك.. قراطيس على قولتهم وحلهم وانت من المتفوقين :D
تخضض عملي يبيله شوي كرف وشغل وبروجكتات.. :(

2- ليش فضلت امريكا عن باقي الدول ؟

والله فالسؤال ذي ماقدر انفعك لاني جيت قلص.. يعني ماكان باختياري لان الكل كان بامريكا وكان علي اتبعهم بحكم ان لازم حد يكون مسؤول عني.. وفي نفس الوقت احمد ربي اني اهني..

3- هل انت نادم على قرارك؟ ولماذا؟
بالعكس راضيه كل الرضى.. ماعتقد قرار الواحد يدرس برى ويتعلم بيكون فيه ندم الا اذا صارت له مصيبه بعيد عنكم هذا غير طبعا..

4- ما هي الولايات التي تفضلها ؟ ولماذا ؟

اهني صج اقدر افيدك ( دليل متنقل معاك :D )
بالنسبه للمعيشه ماحب الايست كوست بتاااااااتا.. ولا اقدر اتخيل نفسي اني اعيش يومياتي فيها :(
زحمه وكلها مقيمين.. الواحد اذا بيسكن يسكن في مكان نظيف والجو حلو وممتع وفيه Fun

بالنسبه للوناسه واللعب عندك لاس فيغاس..ميامي بيج.. لوس انجليس حلوه بعد ..

بالنسبه للجامعات عندك واشنطن ديسي عندك سياتل..

والولايات بشكل عام عندك هيوستن حلوه.. لويزيانا احلى مافيها المطاعم الفرنسيه ( بس راحت في خبر كان من الاعصار :( ) ..
انت الحين ارسى على ولايه تدرس فيها وتتثبت امورك وعقب فالك طيب باعطيك اماكن تثلج الصدر من قلب :D

5- ما هي الجامعة التي تفضلها ؟ ولماذا ؟

والله حالياً مافي بامكانك تقول اذا في جامعات نفضلها ولا لا .. لان المجلس الاعلى مسوي عليكم حكر بلست..ولازم تختار جامعه من الجامعات الموجوده..

لكن اذا عالجامعات بشكل عام تختلف في المرموقه وفي العاديه وفي الي تتخرج وانت فالبيت تشوف موفي ودرجاتك A ..يعتمد يعني ..

بس خل اعطيك امثله
Colorado School of Mines الي يتخرج منها is WOW هذا المعروف عنها

Unversity of York ( هذي صج اتمنى اداوم فيها لو كورس :confused: )

6- هل تساندك السافاره فالظروف الصعبه ؟
اهني انا اعطيك قصيده فالسفاره :) ..
تعرف المثل تنادي تنادي ولا حياة لمن تنادي.. بس وصلنا خير عيل..

8- هل عانيت اي صعوبات او مضايقات من الشعب الأمريكي (( من وصلت المطار لين اليوم )) ؟

اهني انا اعطيك قصيده فالامريكان.. انشهد انهم نشاما والله..معامله اخلاق ابتسامه الصراحه ماشفت الا كل خير..

7- هل الغربه صعبه ؟ ولماذا ؟
امممم فالبدايه شوي بس اعتقد عقب السنه يصيدنا تبلد :confused: .. يعني عادي اصكها سنتين ثلاث مو مشكله خصوصا اذا لقيت لك جماعه ينحطون عالجرح يبرى .. اهني تحس لما تفكر ترجع الدوحه تحس انك رايح غربه من كثر ماتحسهم مثل اهلك ..

9- كيف تمارس حياتك اليوميه ؟
والله حياتي تفتقر للروتين تماما.. يعني ماعندي جدول امشي عليه .. يعني جامعه.. مطاعم.. شقة الشابات..
سينما..سوق.. نروح شله مدن ثانيه قريبه لنا .. الويكند شي ثاني تقول مساجين وفجأه طلعوهم من حبس :confused:

واكثر شي اسافر اذا سنحت الفرص.. هذا احلى مافي امريكا ولايات مختلفه وجو ثاني .. بتحس بهذا الشي اذا جيت :D

10- هل تجد في التعلم هناك خبره لك ومتعه ؟
شي بديهي نتعلم ونكتسب خبره.. بس اظن المتعه تغلب بامريكا ..

11- لو توفرت لك نفس جامعتك في بلدك ماذا تفضل ؟؟؟
والله شاقولك ساعات لما يجيني هومسك اقول ليتني في جامعه فالدوحه ومرتاحه .. وساعات العكس ..

بس الاغلب الدراسه برى احسن واريح وامتع

12- هل تنصحونه بامريكا ؟؟؟؟؟؟؟؟؟؟؟؟؟؟؟؟
مب انصحك الا اقولك دربك خضر انشالله وتوكل على الله ..

====================
لحظه لما نزلت الموضوع شفت رد اخي الفاضل الي من لندن :D ..

شوف بعد من ميزة امريكا انها بعيده.. يعني محد يفكر يزورك ويستثقل الطريج.. وتفتك من الملاغه وخصوصا فالصيف كلن شايل شنطته وطاب عليك ولا في خصوصيه وفضايح :D ..

اما لندن فالصيف عادي اشوف دريولنا بالغلط :confused:
امة لا اله الا الله وهل قطر وفريجنا وهل الخليج كلهم اهناك.. وعاد لو بس تسوي شي جكوك وعلمك وصل الدوحه :D

[Mohamed Al-Naimi]

هههههههههههههههههههههههههههههههههههههههههههههههههه هه

.. صاجه والله اختي دانه ..

.. والله امس اقول حق الشباب شكلي بحول امريكا ..

.. خصوصا اني غيرت التخصص Civil Eng. ..

.. الله لا يهينج خشي اوراقج ..

.. لوووول ..

[Ahmed Al-Salahi]

السلام عليكم اخوي علي

هذي اجوبتي باختصار وبكل صراحه وهذا رايي الشخصي فقط


1- ايش رايك في (( امريكا )) كبلد للتعلم ؟

امريكا بلد ممتاز للتعلم .. انت ما بتتعلم بس في مجالك انت بتتعلم امور ثانيه بتفيدك في حياتك العمليه

2- ليش فضلت امريكا عن باقي الدول ؟
في 1998 لما رحت امريكا ما كان التخصص اللي ابغيه واللي هو هندسه الكمبيوتر متوفر الا في امريكا .. لا وبعد بس مطرشين اربعه ..

3- هل انت نادم على قرارك؟ ولماذا؟

لا .. لاني تعلمت امور ما كنت باتعلمها ولا كنت عرفت ناس من العالم كله و مثل ما قلت لو كان في خيارات متوفره اكثر كان من الممكن اني فكرت تفكير ثاني

نعم .. فتره 6 سنوات تغيروا الناس .. يعني اللي كان من ربعك صار مب فاضي لك .. ناس كنت تعرفهم صاروا غرب .. يعني تغير اجتماعي لا اكثر ولا اقل ..

4- ما هي الولايات التي تفضلها ؟ ولماذا ؟

الولايات الغربيه ..
Washington .. Origon .. California
لان الناس فيها متفتحين ومتقبلين فكره وجودنا في جامعاتهم و كثير طيبين ..

5- ما هي الجامعة التي تفضلها ؟ ولماذا ؟

جامعات كثيره .. بس شوف لك جامعه معترف فيها و ايضا مب وايد صعبه وهذي تحتاج الي بحث جيد

لو تقول شنو التخصص اللي تبغيه ممكن اساعدك واعطيك معلومات اكثر

في جامعات في لسته المجلس الاعلى للتعليم قويه في مجالات معينه و لاكن في مجالات ثانيه ما تكون وايد صعبه

بس قول شنو التخصص وان شاء الله يكون في كلام ثاني عن الجامعات

6- هل تساندك السافاره فالظروف الصعبه ؟

لا .. السفاره مايدرون عنك وللاسف ساعات يحطون عقبات قدامك بعد .. و المجلس الاعلى للتعليم بيلغي مسؤوليه الملحقيه الثقافيه يعني تعاملكم مباشر مع المجلس في حل مشاكلكم .. بس لين الحين مافي قرار

7- هل الغربه صعبه ؟ ولماذا ؟

جدا .. بس حلاوتها في صعوبتها و مثل ما قلت لك ان في امور وايد بتتعلمها في الغربه ما بتتعلمها لو انك في قطر

8- هل عانيت اي صعوبات او مضايقات من الشعب الأمريكي (( من وصلت المطار لين اليوم )) ؟

كلا .. يمكن تستغرب من كلامي .. الشعب الامريكي المثقف و المتعلم .. واللي ما يتابع التلفزيون بيعاملك معامله ما في احسن منها .. و لو تعاملك انت مع الناس ممتاز بيحترمونك ويقدرونك .. ولاتنسى ان في كل مكان في الزين و في الشين


9- كيف تمارس حياتك اليوميه ؟ (( ماقصد الخصوصيه ,, ))

في امريكا كانت الحياه عاديه .. من البيت الى الجامعه و بعدين البيت .. قي البيت حل وظايف وقعده مع الشباب شوي وخلص اليوم .. ترا اليوم وايد قصير و ما فيه بركه يخلص بسرعه عندهم. في الويك اند .. يمكن طلعه مع الشباب للسينما او المول ولا نزور احد الشباب ولا رحلات بحر او زياره اماكن سياحيه او مناظر او festivals . على حسب الشباب اللي معاك
وحط في بالك ان في شهور كثيره الويك اند بيكون في البيت ودراسه لمد تيرم او فاينل ... يعني بعد دراسه

10- هل تجد في التعلم هناك خبره لك ومتعه ؟

نعم .. كثيرا و الاسباب مذكوره في اجوبتي السابقه

11- لو توفرت لك نفس جامعتك في بلدك ماذا تفضل ؟؟؟

صراحه .. اقعد في بلادي .. بس لاتنسى انك ما بتتغرب يعني بين اهلك وربعك وما بتستفيد من الغربه .. حتى الاحتكاك مع العالم الخارجي بيكون اقل ..

انا لو عندي اخو اصغر مني وبيدرس .. باقوله ياخوي ادرس في قطر .. الجامعات قويه ومستواها عالي واصعب من الجامعات في امريكا نفسها .. انت بينك وبين اهلك و ربعك .. يعني تركيزك على الدراسه اكبر .. مشاكل اقل .. يعني سكن و اكل و شرب و غيرها من الامور الي بتكون مسوول عنها بروحك في الغربه.

يعني بتكسب راحتك وتركيز اكثر في الدراسه بس بتخسر كيفيه الاعتماد على النفس ومعرفه الناس الاخرين من جميع الاجناس.

12- هل تنصحونه بامريكا ؟؟؟؟؟؟؟؟؟؟؟؟؟؟؟؟ (( الزبده ))

مثل ماقلت .. ادرس في قطر احسن بتكون مرتاح اكثر وبتركز اكثر ومافي تغيرات جذريه في حياتك .. بس ادرس

في الغربه ساعات مايكون عندك شي تسوييه فبتدرس .. بس هنيه ..
الربع بيروحون المباراه باروح معاهم .. الشباب بيروحون البحر في الويك اند والاحد عندي مد تيرم ياللا عادي بادرس يوم السبت في الليل ..
يعني تعرف السوالف

الله يوفقك اخوي في الاختيار ولاتنسى تصلي صلاة الاستخاره والله هو العالم بالغيب اذا كانت امريكا فيها خير او لا

[Ali Ahmad]

.."" مشــــــــــــــكــو ر يــــن ""..

مشكورين ويعطيكم الف عافيه , ما تتصورون اشكثر فدتوني ورفعتوا معنوياتي


**مشكور اخوي يوسف الكواري ..

وبلنسبه حق التوفل ماقص عليك :( درجتي ضعيفه 460

بس انشاء الله :rolleyes: تتحسن على نهاية السنه ..

واتمنى لك التوفيق ;) ..




**مشكوره اختي R A A الصراحه شجعتيني وايد خليتيني اجهز شنطتي من الحين :D ..

واتمنى لج كل التوفيق :rolleyes: ..





** مشكور اخوي محمد النعيمي على ردك والله اتمنى لك كل خير والله يوفق انشاء الله :o ..


** مشكوره اختي دانه الكواري .. كلامكم غير مجرى حياتي ..

واتمنى لج التوفيق :rolleyes: ...


** تسلملي اخوي احمد الصلاحي ,, انا الصراحه ناوي ادرس (( محاسبه ,, او ,, ادارة مالية ))

فعشان جي ياليت اتفيدني واتعلمني عن بعض الجامعات الي توفر هذه التخصصات ...

تحاتي واتمنى لك التوفيق :rolleyes: ...




==========


تحياتي لكم كلكم بس حبيت تعرفون اني ناوي اتخصص (( محاسبة ,, او ,, ادارة مالية ))

ودي تعلموني عن جامعات حلوه في ولايات زينه فيها ناس طيبه مثلكم >>>> :) ويتوفر فيها التخصص الي ابيه ؟؟؟ :confused:

وبعد حبيت اسأل :D <<<< ملغ بالأسأله لووووووووول
هل يتوفر في الجامعات هناك سنة تأسيسيه (( Foundation Year ))

او بصيغه ثانيه سنة اقوي فيها نفسي في اللغه ..

(( 6 اشهووور اووووووووو سنة ))

لأن وايد ناس قالوا لي (((( هذه السنه وايد بتفيدك ,, خاصة في المعدل لأنك باتحسن في اللغة وبتاخذفكره عن نظام الجامعه so معدلك في اول سمستر بيكون احسن من ماتجي وانت ماتدري شالحمص .. وبعد بتاخذ على الغربه اشوي .... الخ ))



فانا مادري ايش رايكم ؟؟ ........ واسف اذا تعبتكم معاي ...


تحياتي Ali Ahmad Al-Boainain

[Ahmed AlMohannadi]

11- لو توفرت لك نفس جامعتك في بلدك ماذا تفضل ؟؟؟

صراحه .. اقعد في بلادي .. بس لاتنسى انك ما بتتغرب يعني بين اهلك وربعك وما بتستفيد من الغربه .. حتى الاحتكاك مع العالم الخارجي بيكون اقل ..

انا لو عندي اخو اصغر مني وبيدرس .. باقوله ياخوي ادرس في قطر .. الجامعات قويه ومستواها عالي واصعب من الجامعات في امريكا نفسها .. انت بينك وبين اهلك و ربعك .. يعني تركيزك على الدراسه اكبر .. مشاكل اقل .. يعني سكن و اكل و شرب و غيرها من الامور الي بتكون مسوول عنها بروحك في الغربه.

يعني بتكسب راحتك وتركيز اكثر في الدراسه بس بتخسر كيفيه الاعتماد على النفس ومعرفه الناس الاخرين من جميع الاجناس.

أنا بس حبيت اعلق على هالنقطة.. ورايي مثل راي أخوي احمد.. وشخصياً قلت حق اخوي.. ارتاح في بلادك.. وخلك عند هلك.. ومرتاح.. ولا لغلغة أمريكا و العفسة اللي صايرة في هالسنوات الأخيرة


وأكرر لك.. لا تنسى صلاة الإستخارة.. والله ييسر لك كل خير!

[Dana Al-Kuwari]

واخيرا شفت مهندسه ولا مهندس مدني فالمنتدى غيري :eek: ..
اين انت منذ زمن يا رجل..
واذا عالاوراق صج عرب قسم بالله ..
لو بامريكا ولا لندن ولا حتى بنجلاديش..الكل يتخرج بال Old floders
تلقى البرزنتيشن ولا البروجكت ينتقل للطلاب بالوراثه
ههههههههههههههههههه
ولكن حاظرين يابوجاسم الاب توب بما فيه فالخدمه :D
==========================
بس عاد بياخذ عنا علي فكره مب شي.. خلوا الطابق مستور :confused:

بس بغيت اقولك شغله يابوحسن.. انت ذكرت ان توفلك 460
والله لين الحين يبيلك شوي.. انا فاهمه انك حاس انك تضيع وقت بالجسر وسنه من عمرك و و و الخ ..

انا اشوف النظام القديم تدريس اللغه برى وايد احسن بدال مايقطون عالجسر يقطون عالطالب برى ولو 6 شهور عالاقل.. راح يستفيد اكثر من سنه فالجسر لانه ببساطه مايمارس فالدوحه.. وبيسافر الطالب وهو شاك بنفسه شوي ومتخوف مثل الي صاير حاليا..
غير الطالب الي خلاص تعود يوميا غصبن عنه يتكلم انجليزي ويدش الجامعه ودربه خضر وواثق ..

بس عاد شتسوي هذا نظام بلادك.. :)

وبالنسبه للسؤالك عن الفاونديشن..
مامر علي لان كل المطلوب تدرس لغه تجيب توفل وتدش الجامعه وامورك طيبه ..

والله انتوا فالدوحه معذبينكم متطلبات ACT,SAT
ورياضيات وكمبيوتر ودرجات وجسر وحاله..

وش لك بالمعمعه هذي كلها.. والله الي برى مرتاح اكثر من الي فالبلاد مساكين كل القرارات الجديده يجربونها فيهم ..
هههههههههههههههههههههههههه

[Abdulaziz Ahmed]

السلام عليكم

بالتوفيق اخوي .. بس حبيت اقولك شغله ان اللي الله كاتب له ينجح بينجح سوى في امريكا وله غيرها

بس بجاوب على اسئلتك :)

1- ايش رايك في (( امريكا )) كبلد للتعلم ؟

امريكا جيده اذا انت عرفت شلون تكيف نفسك وتنظم وقتك

2- ليش فضلت امريكا عن باقي الدول ؟

انا ما فظلتها بس كانت my only option

3- هل انت نادم على قرارك؟ ولماذا؟
لا بس ساعات اقول لو اني مكمل في جامعه قطر ابرك لان النتيجه وحده اذا يبت جي بي اي عالي


4- ما هي الولايات التي تفضلها ؟ ولماذا ؟
انا افظل دينفر او تكساس .. مع انك ما بتقدر تدرس من كثر الخليجين لول

5- ما هي الجامعة التي تفضلها ؟ ولماذا ؟
هممم ... اي جامعه متوسطه بتكون زينه

6- هل تساندك السافاره فالظروف الصعبه ؟
انا ما احتك معاهم وايد ... بس يوم بغيت منهم شي سووا لي سالفه


7- هل الغربه صعبه ؟ ولماذا ؟
اي والله ... اول اسبوع يمر جنه سنه

8- هل عانيت اي صعوبات او مضايقات من الشعب الأمريكي (( من وصلت المطار لين اليوم )) ؟

والله ايي ... انا في الجنوب .. وعندنا ناس متخلفين من الدكاتره ليين الناس العاديين


9- كيف تمارس حياتك اليوميه ؟ (( ماقصد الخصوصيه ,, ))
حياتي اليوميه بين الشغل والدراسه والنت والجم .... ما عندي وقت يا ريال

10- هل تجد في التعلم هناك خبره لك ومتعه ؟
اي من ناحيه خبره ... اشوف اني فعلا استفييد واول خبره خذتها اني اعتمد على نفسي 100%
يعني ... تعلمت ان اخر شي افكر فيه اني اطلب من حد يساعدني

11- لو توفرت لك نفس جامعتك في بلدك ماذا تفضل ؟؟؟
اللي هنيه ... ما اييد فروع الجامعات اللي عندنا ... لين صار للفروع نفس سمعه الجامعات الاصليه ... ذيك الساعه يصير خير

12- هل تنصحونه بامريكا ؟؟؟؟؟؟؟؟؟؟؟؟؟؟؟؟ (( الزبده ))
اي ... اذا انت مستعد حق التجربه .. ليش لا


الله يوفق لك كل خير انشالله