نصيحتكم لي ...

[S.J.A]

السلام عليكم ورحمة الله وبركاته


في البدايه أشكر القائمين والمؤوسسين لهذا التجمع الطلابي الأكثر من رائع.. وأقولهم جزاكم الله خير وعساكم على القوه.. لأن بالفعل إستفدت منه الكثير..

بموضوعي هذا أطلب منكم النصيحه والمشوره في كذا شغله لي وللطلاب والطالبات إللي معاي.. وإن شاء الله نلقى عندكم الحل..

أول شي بالنسبه لإمتحان التوفل.. إحنا في الـ ABP في Level 1 ومثل ماانتوا عارفين محتاجين لجهد مضاعف عشان نحصل على سكور عالي فيه.. انا سمعت عن طلاب وايد كانوا بهاللفل وجايبين 400 بالتوفل وعلى نهاية السنه ماشاء الله جابوا سكور عالي ودشوا الجامعات اللي يبونها.. فمادري.. شتنصحونا فيه عشان نطور من نفسنا ونقدر نحصل على سكور عالي..

الشي الثاني الـ SAT .. وهذا بالنسبه لنا مشكله كبيره بالذات لطلاب الادبي.. نبي نصيحتكم ومحتاجين رقم أي مدرس ممكن يدرسنا SAT .. عندنا في الجسر كلاس مره في الاسبوع بس بصراحه مايكفينا لان احنا طلاب ادبي ومحتاجين وقت اكثر فيه..

آخر شغله.. امتحان الـ ACT.. سمعت إن يقدمونه في دبي بس مب عارفه وين بالضبط ياليت أحد يقدر يفيدني.. وهل محتاج دراسه غير دراسة السات؟

وإذا عندكم أي إضافات ثانيه ممكن تفيدنا ياليت تضيفونها

ومشكورين مقدماً

:rolleyes:

[Ali Al-Rumaihi]

السلام عليكم ورحمه الله وبركاته

أسمحيلي أختي برد عليج مع أني مادخلت الجسر الأكاديمي..

بيقتصر ردي على إمتحان التوفل لأن هذا الشي الوحيد اللي نحتاجه أهني في بريطانيا...

بالنسبه لي اللغه الإنجليزيه وكل لغه ماراح تكتسب عن طريق الدراسه فقط!

ليس هناك أسلوب معين للكتابه ولا للقرائه ولا شي.. الدراسه في اللغه تقتصر على القواعد لين فهمتي القواعد وثبتيها في مخج وعرفتي تطبقينها هذا 25% من اللغه.

الكتابه والقراءه ماراح تكتسبين هالمهارتين إلامن خلال القراءه للقصص ولا للكتب أو المقالات الإنجليزيه مثلا أخذي لج قصه هري بوتر وأقريها وركزي على أسلوب الكتابه وعلى تطبيقه للقواعد.

يعني في الريدنج تكتسبين 3 أشياء

1- سرعه القراءه واللي بتفيدج واااايد في الجامعه+ السكاننج والسكيمنج.
2- الرايتنج.
3- تطبيق القواعد.

اللسننج لها حل بالنسبه لي حليت هالمشكله في خطوتين .

الأولى: تميت أطالع أفلام كل يوم وأركز على اللي يقولونه ولو بحط ترجمه أخليها بالإنجليزي.
الثانيه: وهي المرحله الأصعب هههه كنت أسمع أغانيهم اللي ماياخذون فيها نفس كلش يعني الإغنيه 3 دقايق المغني يغنيها كلها بنفس واحد وكله يتكلم.
لين فهمت هالأغنيه خلاص أتقنتي اللغه وبهالصوره أنتي صرتي جاهزه أنج تجيبين التوفل أقل شي 520

والسموحه على الإطاله

[S.J.A]

عليكم السلام ورحمة الله وبركاته

مشكوووور أخوي علي وماقصرت.. جزاك الله خير

بالفعل أنا هذا إللي بديت فيه من كم يوم وإن شاء الله أجيب سكور عالي بالتوفل..

يعطيك العافيه والله يوفقك

:)

[S.J.A]

بإنتظار باقي النصايح من باقي الأخوان والخوات
^_^

[S.A.M]

السلام عليكم

بالنسبة للتوفل اختي الفاضلة احب اضيف على الكلام اللي قاله الأخ.. حاولي كثر ما تقدرين تتعودين على الـ clues الي هم يستخدمونهم في الليسننج...و امتحني كذا مرة لين ما تجيبن السكور

واذا محتاجة كتاب توفل ولا كاسيت ...ان شاء الله ما بنقصر بس مري علينا فرجينيا

وحياج الله اختي الفاضلة

[Fahad Al-Jefairi]

السلام عليكم ورحمة الله وبركاته :)

اول شي حياكم في الشبكة والمكان مكانكم ... واصلا هدفنا اولا واخير ان نساعد بعض من خلال هالشبكة :)

اول شي بالنسبة للتوفل اخوي علي ماقصر ..

ومثل ما قلتي كان في ناس عندنا جابوا ال400 بداية سنة الجسر وعلى اخرها جابوا ال 550 ....

وطبعا هالشي ما كان بسهولة تحتاج "سعي شخصي" بالاضافة الى الدراسة والمواد اللي في الجسر ... تحتاجين اختي حتى صج تتعلمين اللغة انج تقرين كتب انجليزية ... جرايد انجليزية .... حتى القاموس اذا بتستخدمونه اخذو انجليزي انجليزي لا تاخذون انجليزي عربي :)

وباقي النصايح اللي قالها اخونا علي !!

بالنسبة لامتحان الS.A.T اول شي كون ان انتوا طلاب ادبي فاعرفوا ان هالشي مب سهل انكم تحصلونه ووايد من طلاب العلمي اصلا ما يقدرون يجيبونه ولكن طبعا مع الهمة وشدة الحيل ممكن تجيبونه ... وهذا الكلام مب نظري بس .... لان في ناس من القسم الادبي جابوه فيعني حطوا في بالكم انكم تقدرون :) :)

بصراحة ما اعرف مدرسين يدرسون S.A.T لكن اعرف ان الدكتور سامي حجيج ما بيقصر وياكم ... واذا طلبتوا منه حصة او حصتين زيادة راح يضيفها لكم في الجسر ... وبعد ممكن يضيفكم لنظام الtoturing مال المدينة التعليمية ... فانتوا ان شاء الله كلموا الدكتور سامي وان شاء الله بيساعدكم باللي يقدر عليه !!

بالنسبة لامتحان الACT والله مادري بصراحة وين يقدمونه في الامارات ... تقدرين تسألين الstudent services في الجسر او الاaddmissions في تكساس لان العادة هم اللي ينظمون هالامتحانات :) ....

(بس في شي مهم واللي هو اختيار التخصص وهذا قبل لا تختارون الجامعة ...يعني اول شي اختاروا التخصص بعدين الجامعة ومب العكس :) )

واذا بغيتوا اي أسئلة ان شاء الله نفيدكم باللي نقدر عليه :)

[S.J.A]

أختي S.A.M.. تسلمين وجزاج الله خير يالغاليه ماقصرتي

عساج على القوه

وإن شاء الله أنفذ نصيحتج ^_^

[S.J.A]

هلا أخوي فهد.. مشكوووور وماقصرت والله.. وبالنسبه للسات أنا يأست بصراحه مالقيت مدرسين واليوم أصلا كلمت الدكتور سامي وبروحه قالي مستعد يدرسني على قد مايقدر ومايقصر جزاه الله خير.. والـ ACT انا اللي عرفته ان مافي في قطر بس في بباقي دول الخليج.. لكن إن شاء الله بسأل أكثر..

ومشكور على نصيحتك بخصوص أختيار التخصص قبل الجامعه.. وبالفعل أنا مختاره التخصص أول.. والله يوفقنا إن شاء الله

جزاك الله خير

:)