معاناتكم

[R.A.A]

في سطور قليلة أرجو من كل طالب او طالبه مر بمشكله او ازمه اثناء دراسته في الولايات المتحدة الامريكيه أن يشاركنا تفاصيل مشكلته ومعاناته...عل البقيه تتخذ العظه وتحاول تفادي نفس المشكلات و عل هذه المشكله تجد طريقها لأذان الجهات المسؤولة عن الطلبه أمام الله قبل مسؤوليها.

وأيضاء ليكون حل هذه المشكلات أول اهداف اتحاد الطلبه القطرين في امريكا إن شاءالله

لينعم الجيل القادم بغد افضل وينال نصيبه الكامل من حقوقه ويتشجع عدد اكبر للدراسة في امريكا التي يعتبر علمها من أحدث وأقوى و أنفع العلوم في العالم...ويزخر الوطن الحبيب قطر بعقول مشبعه بعلم جديد نافع و يفتخر الاسلام بأبناءه الذين سعوا وراء العلم وطلبه من المهد إلى اللحد ان شاءالله.

أخوتي وأخواتي...هذه السطور القليله قد تكون السبب في رفع معاناة أخ و أخت طالبين للعلم في هذه البلاد الكبيره في اراضيها المعقدة في قوانينها. فالنحب لأخواننا وأخواتنا مانحب لأنفسنا ونساهم في أعطائهم تجربه دراسية أفضل من تجربتنا. ولنغتنم هذا الشهر الفضيل في عمل خير بسيط لأخوتنا وأخواتنا الطالبين للعلم في سبيل الله قبل الوطن.

[Ahmed Al-Salahi]

السلام عليكم

اكبر معاناتي اثناء دراستي في الولايات المتحدة كانت دفع رسوم التسجيل Tuition حيث كنت احاول مليا ان يتم دفعها في الوقت المحدد لكي لايتم تغريمي على التأخير و الذي لاتقوم السفاره بالتكفل به مع ان التأخير بسببهم

كنت ادرس في جامعة واشنطن في سياتل وكانت المسؤوله عن دفع الرسوم الدراسيه للجامعه سيده اسمها "سميه" وكانت دائما تتاخر في سداد الرسوم بحجه عدم وصول الايصالات للملحقيه ... كنت اعمل كمراسل بين الجامعة و الاخت سميه و كان يتم الدفع بعد تنازل الجامعه عن رسوم التاخير و هذا حاصل في كل فصل و كنا 3 طلاب فطريين و الكل عنده نفس المشكله

في مره من المرات لم يتم الدفع و تأخر كثيرا و كنت قد حولت الى جامعه اخرى .. يصلني بالبريد رساله من الجامعه انه اذا لم يتم السداد سوف ينم ارسال النوضوع لشركه لجمع الاموال المستحقه لاصحابها Collection Agency وهنا طفح الكيل فقمت بالاتصال بالاخت سميه و اخبرتها بالموضوع ووعدتني بانها ستهتم بالموضوع ... بعد ايام عدة ايام جائني خطاب من شركه جمع الاموال بالسداد :mad:
قمت بالكتابه بشكوى مغزاها اهمال الملحقيه و ارسلتها للملحق نفسه ... في اليوم الثاني صباحا ... اتصال من الاخت سميه عاتبه على الخطاب :confused: ولم يكن تصرفها لائق حيث اقفلت الخط في وجهي ... يعني سكرت في ويهي :D

قمت بالاتصال بالملحق ولم اجده كالعاده ... الملحق تراه يداوم في الدوحه ... اعتقد انه هو الملحق الثقافي القطري لدوله قطر :confused: ... ما علينا ... نكمل

تحدثت مع السكرتيره و سردت لها ماحصل ( اندريه طيبه بعد) وقالت بانها سوف تخبر الملحق بالموضوع ... قمت بالاتصال ب "مجمود صبري" وشكيت له الحال وكان منصف جدا وواساني في محنتي

قي النهايه و بعد كل هذا ... نسيت الموضوع ودفعت الفلوس من جيبي 170$
ولم تعد السيده سميه تعمل لدى الملحقيه الثقافيه

واصبح التأخير في سداد الرسوم اقل ولاكن احسن على كلام الشباب اللي كملوا في نفس الجامعه

[R.A.A]

أهلا أخي الكريم أحمد
هذي فعلا وحدة من المشاكل إلي لين احين مستمره.
أنا شخصيا أو وحدة من خواتي القطريات الدارسات هنا تواجهنا هالمشكله بين فترة وفترة وتسوي علينا الجامعةHoldونتبهدل بالتسجيل. قول الحمدلله أنا وأنت وغيرنا قادرين على دفع الرسوم و أهلنا ينقذونا مادينا متى ما أحتجنا مساعدة. لكن شنو مصير إلي ظروفهم وظروف أهلهم الماديه ضعيفه ولايقدرون ينقذون الموقف؟؟
باذن الله بشاركم بوحدة من قصص المعاناة لكن خل بالي يفضى شوي من ضغط الدراسة
الله يوفق الجميع يارب

[Dana Al-Kuwari]

من وين ابتدي .. ياجرحي الندي .. :)

مازيد على كلامج اختي R.A.A
لي توهقنا تلفون على الاهل وحواله من المفتاح واصله..
لولاهم جان حالنا حال .. هوملس :(


وانا ذكرت هالنقطه قبل .. ان سمعة سفارة قطر .. مب بس فالجامعه .. الا فالسفريات و المعاهد والمستشفيات لا يعلى عليها :)

قلت لكم الحل .. يكون تشطيب فالسفاره .. يحطون هيكل جديد كامل .. وتودع ايام الاستهتار.. :)

وبالنسبه للملحق .. على قولة اخوي احمد
انا كل مابي اكلم حد فالسفاره .. يقولون لي فالبريك ولا فاللنش :)

مطعم مب سفاره ..

[Saad Alkaabi]

تكسروون الخاطر يااا طلاب امريكا

والله يعينكم مع هذه السفاااااره الموقره :D

وشي اخير اذا هذه سوالف السفااره وشلكم بعوار الراس

حياكم عندنا

ترى بوعبسي بيحطكم بعيونه :cool:

[R.A.A]

شكرا على الدعوة أخ سعد بس كندا بااااردة تذبح :confused:
أنا هنيه والجو دافي شوي وفنايلي وياي وجاكيتاتي مقسمة بين الكبت و السياره شلون كندا. :rolleyes: يمكن أمشي ووياي هيتير تشتغل بالبتري.

ووقفـــــــــــــة مع معناة أخرى

مرة شاءات الاقدار وطحت طيحة شينه "عادي كل اطيح" ورحت الطوارىء ودلعوني وعالجوني وخلصنا وشفيت والحمدلله.

لكن

بدأت تتوالى فواتير المستشفى علي...كلمتهم قلت لهم كلموا السفارة هو الانشورنس حقي. قالوا عجزنا نكلمهم وهم مايردون ولا يدفعون. فأضطريت بنفسي أتصل بالسفارة...وبعد حوار حلو ساخن بيني وبين الموظفة إلي ردت علي قالت ارسلي لنا الفواتير وجايز ندفع.

المشكله ظلوا المستشفى يرسلون ويرسلون ليـــــــن وصل الموضوع للين ال collection agency . بالأخر دقيت عليهم قلت لهم انا دفع مب دافعه ولاني مكلفة على هلي كثر ماكلفت..وأعتقد واضح بالبطاقه ان الطوارىء دفعها على طول بدون سين وجيم. والحمدلله ادفعوا ولا كان دفعتها.

ياليتنا مثل الكويتين...مثل ما من حقه مجنانيه العلاج بالكويت من حقه مجانيه العلاج وهو بخارجها بعد. يعني هذا ابسط شي المرض. صرنا نفكر مرة ومرتين وثلاث قبل ما ندخل عيادة ونحسب ميزانيتها ونتصل بأهلنا وشوي ونحب خشم سفارتنا ماصارت.

اييه بعد شي ثاني...ترا يجيبونا هنا ولايقولون لنا وين اقرب مستشفى. يعني لما نمرض أول مرة ولاحد حولنا ولانعرف حد ماندري وين نطق براسنا. تخيلوا ندور بالشوارع ندور لوح عيادات. ولو اتصلنا بالسفارة نقول لهم نبي اقرب عيادة ولامستشفى بليز ماندل قالوا ماندري دبروا عمركم.

[Dana Al-Kuwari]

كطلاب في كاليفورنيا ..
الحمدلله هالشي الوحيد الي مانعاني منه اذا السالفه فيها مستشفيات ولا عيادات ..

وين ماتمشين تلاقين لوحات معلقه وبالعربي عيادة الدكتور فلان الفلاني .. وبما ان احنا عرب.. معامله سبشل وفي امتيازات ونص المبلغ طايح :D

يعني ندفع واحنا مرتاحيين .. ولا بهدلة السفاره :confused:

وعلى طاري الطيحه ..
طحت طيحه خشنه فالبولينغ وتكسرت ريلي.. ورحت الطواري وتموا كالعاده يطرشون في هالفواتير لين ماتعقدت .. كل مافتح الميل الاقيهم في ويهي .. المبلغ ماكان يستاهل ..

قلت ادفعه ولا كل يوم فالجامعه تلفونات تجيني من المستشفى وسنداره وتقولي السفاره طرشي الفواتير ولين ماتدفع سنه :confused:
======================
والله ياخوي يا سعد ..
لو ماكان باقيلي شوي واخلص جان حولت على كندا :confused:
لما زرت ربعي في مونتريال بغيت اصيح .. :eek:
خوش بلاد وشعب عجيب .. وجامعات ممتازه
وبعدين خلوني مكاني .. اخاف اجيكم واعفس البطح :D

[W Al-Mohannadi]

طلاب وطالبات القطريين اللي في امريكا

السفاره ماراح تقصر معاكم هذه شغلتهم اذا في اي شكوى
او ملاحظة كلموا المسؤولين هناك
او قابلو السفير واجهوه بالمشاكل اللي تصير لكم وماعتقد بيقصر معاكم

[R.A.A]

شكرا على مرورج أخت W Al-Mohannadi

ياما أتصلنا وياما أشتكينا وياما وياما وياما. حتى أنا بنفسي كلمت مساعدة الاستاذة جهان المير بخصوص هالمشاكل ولكن تنادي أحياء ولكن لاحياة لمن تنادي.

الموضوع محتاج تكاتف الطلاب والطالبات مع بعض مو أتصالات منفردة ولا جهودة وحيدة ضايعه بالهواء. لما يتقدم طالب او طالبين او حتى ثلاثة بنفس الشكوى ماينسمع رايهم ولا يلتفت لامرهم. مثل ماشفتي مع موضوع الطلبة المتضررين من الاعصار. التصريحات تناقض الواقع.

يالله شباب وبنات...شاركونا معاناتكم لعل هذه الصفحة تجد طريقها لايادي المسؤولين الرحيمه و تنحل المشاكل وتخفف المعاناة.

[Ali Al-Rumaihi]

انا خاطري أعرف شالمشاكل اللي صارت لكم غير سالفه الإعصار واللي هي حاله طارئه يعني صارت دربكه وكذا.

تكلمتوا مره عن الأدويه وغيرها الكل يعرف النظام عندنا!!

النظام أنك تشتري الدوى وبعدين تطرش الفاتوره ويعوضونك في حسابك!

التقصيير أكثره من الطلاب اللي مايتصلون ويسجلون ويا السفاره اللي يعطي عنوان غلط واللي يعطي رقم تلفون غلط واللي مايروح ياخذ رقمه الطبي واللي واللي وغيره..
الواحد ممكن لما يحس انه مظلوم يفكر أنه تقصير من غيره وينسى انه تقصيره...

بلادنا وسفاراتنا فيها الخير والحمدلله مادري عنكم في أمريكا لكن السفاره اللي اهني مكفيه وموفيه والملحقيه الثقافيه ماشالله عليها شغاله مب بس على مستوى بريطانيا بل على مستوى أوروبا كامله !

اللي اعرفه أن تلفون الأستاذ محمد الكعبي الملحق الثقافي البريطاني ماكان يسكت مسكين من كثر الطلاب اللي يتصلون وللعلم طلاب بريطانيا الحين صاروا أكثر من طلاب أمريكا :)

فالواحد مايصير يقعد في محله ويقول عطوني حقي.. يالربع لاتظلمون ...

حسوا وأحمدوا ربكم.. حتى لو الفلوس والمعاشات تجيكم متأخره ولا الفيز مالت الجامعه توصلكم متأخره ترى نعمه !!!

غيركم يدور أي حد يكفله ويسفره ويدرسه ويعلمه وانتوا تلقون وتتذمرون !!!

هذي مشكله الإنسان والتي ذكرت في القرآن في سوره العاديات

( إن الإنسان لربه لكنود)

[R.A.A]

شكرا أخي الكريم علي الرميحي على مرورك

"لو قنع الناس لما عمرت الأرض"

الطلاب المبتعثين هم غالبا متفوقين الدولة وهدفهم الاول والاخير التحصيل العلمي الممتاز و تمثيل بلدهم بصورة مشرفة. وهذا يتطلب جو وظروف مريحة نفسيا وماديا للطالب والطالبة. والمسؤول عن توفير هذا الجو بعد الطالب-الطالبه انفسهم الملحقيه الثقافيه خصوصا وسفارة دولتهم عموما.

بالنسبة لنظام العلاج..بصراحة أول مرة ادري منك احين بس وانا يفصلني عن التخرج كم شهر بس ان النظام الطالب يدفع والسفاره تعوض. جايز هذا نظام بريطانيا لكن هنا النظام غير. وبعدين اخوي احنا ما نعني العلاج والادويه بس..الادويه هين امرها لكن اتكلم عن تكلفة العيادة نفسها والمراجعات.

لكن مايحز في نفسك انك تكون طالب مجتهد وتبذل اقصى مافي وسعك و تخاف تمرض بس عشان ماتتبهدل مع السفارة؟؟ ولاتدخل في ضائقة ماليه سبة مصاريف العلاج؟ وفرضا الطالب مايقدر يغطي تكاليف علاجه واهله مايقدرون يدعمونه ماديا..شنو مصيره؟؟ مايمرض ابدا؟؟

في نظام هنا متعارف عليه اسمه Health insurance..ليه يعرضونا ويعرضون نفسهم للاحراج خل يسون لنا هالاهلث انشورنس مع وحدة من الشريكات وتنحل هالمشكله.

بقولك مثال بسيط...مرة جاتني حساسيه...والعيادة سوا لي تحليل دم..وطبعا الفواير انرسلت للسفاره والسفاره رفضت تدفع...ولما اتصلت وراجعت قالوا لي شنو ضمنا أن تحليلج عشان الحساسيه يمكن عشان تعرفين الاكل إلي يمتنج او يضعفج. "صراحة ردي كان لاتعليق" احين التقرير جايهم من العيادة مب انا كاتبته وهذا ردهم.

وأعتقد ان مناقشة الامور الصحيه استوفت اهميتها وياليت اخواني الطلبه والطالبات يشاركونا بامور ومعاناة اخرى غير الامور الصحية. رغم ان صحة الانسان اهم شي بالوجود واي مشكله تواجهه في حلها تحز في خاطره.

[Dana Al-Kuwari]

والله خلني اكون معاكم صريحه واقول ..

انا وحده كلها كم شهر وماشيه .. ولا يهمني اعدل فالسفاره ولا ابح صوتي على ناس ماتسمع .. طفح الكيل :)

مثل ماحنا تعبنا .. خلوا الجيل الجديد الي بيدرس يتصرف :cool:

لحظه .. خلوني اذكر السبب .. علشان مايجيني هجوم صاعق ..

لان ببساطه اذا تكلمنا الي بيقول نبالغ .. ولي بيقول ليش ماتتحرك وتتكلم وتشوف امورك وتجاهد و و و الخ ..

واذا ماتكلمنا بيقولون ليش انتوا سلبيين .. والمفروض تقولون تجاربكم علشان نغير ونطور ..

اوكي واذا قلنا يا تنشطب مشاركه .. يايقولون اسكت :)

[R.A.A]

إذا فعلا في مشاكل ومعاناة تواجه طلبة امريكا لازم كل الطلبه او اغلبهم يتكلمون عنها وخصوصا هنا بالموقع مو وحدة أو ثنين بس.

أو حتى أي شخص يعرف زميل او قريب او معرفه من بعيد عانت او واجهة مشكلة اثناء الدراسة في الولايات المتحدة.

إذا مقياس المعناة او المشاكل الاشياء إلي واجهت بس 3 او 4 منا وشاركوا في هالمنتدا جايز فعلا تكون مافي معاناة وبس هي مشاكل فرديه ماتحتاج ردة فعل تحسينه من السفارة او المجلس الاعلى للتعليم.

دانه اختي بالعكس انتي في منتهى الايجابيه والتفاعل وياليت الكل يشارك ويدعم الموضوع.

لما طلبة اورباء طالبوا برفع الرواتب...ما ارتفعت رواتبهم هم بس..كل الطلبة المبتعثين ارتفعت رواتبهم وتحسنت ظروفهم. شفتوا كيف الخير يعم لما الكل يتكاتف ويتعاون.

يعني إلي يتصورون أن طلبة امريكا يتوهمون المشاكل وهم عايشين في رغيد العيش ونعيمه ويتبطرون على النعمة بس لازم يكونون في صفنا ويعانون معانا بدال مايوقفون في صف السفارة وهم اساسا ماحاشهم من الماي طشار.

المطلب مو رفع رواتب ولا عائد مادي...المطلب تعاون اكثر و تواصل افضل من السفارة الكريمة.

مثلا..أول ماجيت كنت ماعرف عن القوانين شي..والحمدلله لقيت لي ناس كويتين قاموا فيني قووم وعرفوني على كل شي حتى على قوانين الديره وهم قوانين السفارة وعطوني كتيب لين احين محتفظة فيه وارجع له بين فتره وفتره. يعلم الطالب المغترب كل شي من الالف لين الياء. من شلون يفتح رصيد بالبنك وان رصيد التوفير فيه ربى والشخص المتلزم مفروض يتجنبه.. إلى شلون تعرف نفسك سنير او جونير أو أو أو.

حتى ارقام الطوارىء بالسفارة موجوده في هذا الكتيب...لكن السفارة القطريه ماوصلني منها اي رقم طواري ويوم سوا رقم محد يرد عليه..بالاحرى هو مو رقم طوارىءمجرد بداله.
والله كم تمنيت ولين احين اتمنى ان سفارتنا الموقره تسوي نفس الشي.

صراحة انا حاطه عندي ارقام طوارىء سفارة الكويت لان اضمن يردون وبيقومون فيني ومب مقصرين إذا صار شي ولاشي لاقدر الله.

وللي يعتقدون ان حنا سلبين ولانتواصل مع السفارة والتقصير منا أقول...اني يمكن اكثر وحدة تتصل بالسفارة وياما وياما اقترحت عليهم يسون ويسون مثل السفارات الثانيه لكن دايما يقولون انهم مقيدين بخطط واومر من التربيه والتعليم او المجلس الاعلى للتعليم. يعني الوضع يحتاج له تحسين من الادارة الرئسيه بالدوحه مو فرعهم الممثل لهم في الولايات المتحده.
حتى بالنسبة للفواتير العلاجيه...مساكين المحلق الطبي يقولون حنا نتبع اوامر مستشفى حمد وهذي اوامره لنا وبس.
والغريب اني لما رحت للمستشفى بقطر...قالوا لي مفروض يعالجونكم عن كل شي إلا الشغلات التجميله.

والحقيقه تظل ضائعه وحقنا عايم ناخذ منه شوي ونقول الحمدلله والشكر والباقي يظل ضايع وبعد نقول الحمدلله والشكر.وفي كل الحالات أحنا الملامين في نظر سفارتنا المصونه و المجلس الاعلى للتعليم وبعد زملائنا الطلبه.

[Mohammed Al-Mousawi]

الله يستر....هاي كله وانا للحين ما وصلت

بوصل اخر 12 وببتدي في السبرنج D:

الله يعين

[R.A.A]

حياك الله اخوي محمد
لاتخاف اخوي بالعكس الوضع والجو هنا بأمريكا حلو وعال العال ماشاءالله وحنا بس نطالب بالتطوير.
وأنتوا الطلبه الجدد تبع المجلس الاعلى للتعليم وضعكم واجد احسن منا حنا القدام. حتى وصلني خبر ان حتى رواتبكم أعلى.
نصيحتي لك...حاول يستقبلك حد تعرفه ولا موصينه عليك ولا بتتلته...لان امريكا كبيره وداااهيه وقوانينها ماتخلص.
موفق اخوي

[Dana Al-Kuwari]

جنج عفستي اسم الريال :confused:

وبعدين انا اتفق معاج صحيح وضعهم احسن منا احنا يالقدام من ناحية الاهتمام والماده.. بس احنا كنا احسن في ايام السهالات والفيزا والغياب على بيزا وكنا ندش الجامعات والكليات الي نبيها وربيع ربيع.. لا لسته بالجامعات ولا غيره :D

انا اعد ايامنا اروع ايام ولا اظن تتكرر .. الطلاب الجداد مساكين محكورين بقوانين ومواد ودرجات ولا لهم فرصه يتعلمون اللغه في مكانها.. مالهم الا الجسر الاكاديمي الي ماينفع ابيزه وكل الي يجونا متلتهين ويقولون ماكنا درسنا سنه :confused: ..

وبخصوص انه يتلته ويتبهدل ..
اممممم الحين امريكا صارت جنها لندن .. العرب في كل مكان وين مايروح .. وبعدين في شي اسمه يسكن عند عايله فالبدايه.. في شي اسمه انترنت وكلها سيرج ويلاقي المكان الي يبيه ..


الحياه صارت بسيطه سواء لندن ولا برازيل ولا الهنلولو :D

[R.A.A]

شكرا على التنبيه اختي دانه
ترا كل زمان ووقت وله مزاياه. جايز زمانا كان في ليونه ومرونه اكثر بالقوانين وهالشي عطانا مساحة اكبر للتحرك والتعلم بس هذا الجيل ترا طالع موجه صح وبقوة وعارف شنو بيسوي وشنو بيسوي.
جايز المجلس الاعلى مدلعهم ماديا اكثر من الدفعات القديمه بس صاك عليهم بالقوانين.
لكن هذا الشي في صالحهم. لأن مرات الغربى تلحى بعيونهم ويطولونها وهي قصيره. في طلبه ياااااااااالله على اقل من مهلهم ولما تسألينهم لـــيه خلصوا وردوا يقولون وش لنا بالدوحه. اشدعوه مب الدوحه إلي باعثتكم عشان تردون لها بعقليات متعلمه تفيد وتستفيد.
ماظن الحياة صارت بسيطه..لين احين في قوانين معقده وتتعقد زيادة الشي الوحيد إلي يخلي السهل صعب ال $$$$
بعدين اختي...الجسر واجد مفيد. لان مو بس يأسس الطلبه لغويا ولكن يعلمهم شنو جامعه وشلون يتفوقون فيها. ومسألة اللغه هي مجرد ممارسه. في طلبه لما سافروا وتغربوا قل مستوى لغتهم عن الجسر لان بالجسر كان في تركيز قوي على اللغه ولما سافروا صاروا مع تجمعات الطلبه العرب وخف تعاملهم للغه خصوصا بالكلام.
الله يوفقهم ويوفقنا لما يحبه ويرضاه

[Dana Al-Kuwari]

انتي عنوان موضوعوج معاناتكم ..
وانا باقولج اكبر معاناة للجيل الحالي ..

الله يسلمج يجيج متخرج من مدرسه حكوميه الانجليزي مخبط شوي وهذا شي اظن الكل يعرفه.. ولا تقولين لي علميه لان حتى العلميه الطلبه الي فيها داخلينها من الاعداديه واساس يعتمد على الحفظ .. صحيح جايب فالشهاده 93% بس تعالي كلميه انجليزي ؟؟ يعرف يكتب الكلمه بس مايعرف يلفظها .. والمشكله لما يحفظ كلمه مايعرف معناها بس يعرف انها للسؤالي الفلاني :)

ترى والله اكلمج من واقع شفته .. وانا ماعم عالكل بس الاغلبيه فيهم هالمشكله ..

زين نجي للكلام ..

شلون تبين طلبه ماعندهم اساس قوي فاللغه ويدخلون جامعات صعبه الي مصنفينها فاللست.. ولازم يخالطون طلاب لغتهم الاساسيه انجلش فالكلاس وقروبات و ريسيرج وبحوث ومحاضرات.. اعتقد صعبه شوي ..

خصوصا الطلاب الي يجونا يقولون الجسر علمنا عالدلع وبعدين ماكنا نمارس ولما جينا امريكا قاعدين نسمع انجليزي غير الي تعلمناه والجامعات تطلب ريسيرج وريسورس ومانعرف نسويهم ؟؟

انا هذا الي اشوفه بأم عيني .. طلاب عرب فاتحيين حلوجهم فالكلاس .. واكبر دليل مايدشون الكلاس الا بالقروب علشان كل واحد يدز الثاني ..

اي تعليم اي علم الي بينفعون بلادهم فيه وهم كله ياخذون اوراق وحد يساعدهم فيها :confused: ..

انا اشوف ان لو المجلس الاعلى ينزل مستوى الجامعات شوي ويدخل الطلاب كوميونيتي كولج بالاول يكون افضل ..

مادري عن الطلاب الي في جامعتج ولا جامعات ثانيه.. بس كاليفورنيا مليانه من هالنوعيه من الطلبه.. وانا نقلت صوره حيه وحيه من قلب بعد :confused:

[R.A.A]

الله يعافيج الغاليه دانه على هالنقاط المهمة إلي طرحتيها

بس صراحة إلي شفته أنا غير إلي شفتيه..الطلبه إلي متأسسين من الجسر جاين بمستوى اقوى من إلي درسوا اللغه في معاهد اللغه الأمريكيه. بالنسبة للنطق او الاكسنت..فهذي ترا قدرة مو اي شخص يقدر يكتسبها وعلى قولة هنيدي في فلم صعيدي في الجامعه الامريكيه"مش الاسبلينج صح؟؟؟ يبأأ خلاااص" يعني دام ان الشخص يقدر يوصل المعلومه خلاص مو مهم ينقطها مثل الامريكان..حتى الامريكان نفسهم اكسنتهم يتفاوت ويتخالف بين مكسيكي وبين زنجي وبين وبين.

أما بالنسبة أن الطلبه مايعرفون يسون ري سيرج. بالعكس الجسر مايقصر في هالناحيه وبعد في سنة اولى جامعه في كلاسات انجليش لطلبه سنة اولى سواء كانوا امريكان او غير امريكان ويعلمونهم فيها شلون يسون ري سيرج. وترا الري سيرج مهارة يبغا لها وقت طويل. وأغلب معاهد اللغه هنا تعطي طلبتها كيفيه كتابة الري سيرج في اخر ليفل. ولاتقدرين تجزمين ان طلبه معاهد أمريكا احسن من طلبة الجسر في سالفة الري سيرج.
بعدين التخبط في اول سمستر شي واااارد جد....انا اول سمستر لوووووووووول عاااااالم أخر مدري وين الله قاطني...مع ان لغتي زينه ولهجتي اوكيه والعالم فاهمه علي..بس للجامعه والغربه راهبتها.
وترا طلبه بوعراب يغلب عليهم الكسل عشان كذا تحصلينهم إذا حصلوا حد يسوي عنهم الشغل بيريحون بالهم.

وبالأخر السالفه تعتمد على أجتهاد الطالب وأصراره على النجاح مهما كانت الظروف.

ولو نفكر بالموضوع في نطاق تفكير اوسع على مستوى الدولة...الدولة ياما بعثت وياما سهلت وعندها كوادر احين اسمها خريجين امريكا وبعضهم مستوى قوي وبعضهم حتى لغه ماعنده. جاء الوقت إلي تبي فيه ناس مستواها قوي. مو مهم عدد الخريجين من الجامعات الامريكيه احين كثر كفاءتهم لأن الدولة عموما عندها خريجين امريكا ومكتفيه منهم واحين تبي الصفوة من الخريجين. وبعدين لاننسى ان طلبه البعثات عدوا الثانويه العامة بكل ماتحمل هذه الاختبارات من صعوبة نفسيه و تحصيليه و استحقوا هالبعثه وباذن الله هم قادرين على هالجامعات القويه إلي بالسته. وبعدين ترا مو كل الجامعات قويه وكل جامعه فيها كومينتي كوليج يقدر الطالب ياخذ كلاسات فيها وتعتبر من كلاسات الجامعه.
وبالنسبة لطلبة العمليه....أسمحي لي اختي هذوووووووووووووول معذبون في الارض. خليهم في صوب. والله انهم يتعبون تعب ويجتهدون اجتهاد غير طبيعي وتعبهم وتحصيلهم العلمي الراقي هذا مفروض يستقبل بكل احترام منا مهما كان مستواه. لان قبولهم في المدرسة العلميه بحد ذاته تفوق فمابالج بتخرجهم من المدرسة العلميه مدرسة العقول النيره بالعلوم الحياتيه الي محتاجهتها امتنا الاسلاميه قبل دولتنا.
وحاليا كل مواد العلوم تدرس باللغه الانجليزيه شرحا ومضمونا بالكتب. و بادين من الطلبه من المرحلة الاعداديه...بالانجليزي وبمستوى علمي قوي. كم اتمنى ان يطلع من هالمدارسه العلميه عالم او عالمه يتوج عطائها باختراع مفيد له ولدولته ولأمة الاسلام بأكملها

[Mohammed Al-Mousawi]

ماشالله اشوف النقاش احتد بينكم...


المهم...رفيجي في امريكا انشالله بيكون في استقبالي ومرتب كل شي لوصولي

وشغلي مع المجلس الاعلى خلصته..طلعت الفيزا...والعقد وقعته وعطوني ورقه علشان اشتري التذكره وشريتها

والحمدلله مب رايح المجلس الاعلى كلش مره ثانيه بس ناطرين مني ايميل لما اوصل امريكا

طبعاً حالياً انا الوحيد اللي مخلص شغله وفي اثنين مخلصين كل المطلوب....بس للأسف مافي الا موظف واحد بس مسؤول عن بعثات امريكا...طلع في اجازه وعلقوا موضوع البعثات لين ما يرجع تاريخ 20/11 ؟؟!!!؟؟!

الله يعينهم الربع..معاناة بصراحه



المهم....بخصوص الجسر الاكاديمي

انا ولله الحمد تخرجت من الجسر...واعتقد ان الجسر يمكن يكون فادني في موضوع الريسرجات والسمريات والابستراكت..يعني من ناحية الانجليزي بس المواد الثانية ما اعتقد استفدت الكثير

مع هاي الجسر ما فادني في التوفل...جبت التوفل بروحي...يمكن لأني كنت في الاكاديمك وهم ماكانوا مركزين على التوفل عندنا....بس شباب الانتنسف صج ارتفعوا ماشالله عليهم,,,واعتقد ان فادهم

موضوع الجسر ممكن يستفاد منه وممكن لا على حسب رغبة الطالب نفسه في الجسر


وانشالله بعطيكم الحكم الكامل على الجسر بعد ما كمل السمستر الاول هناك واشوف شلون وضعي

تحياتي لكم

[R.A.A]

شكرا اخوي محمد على أثرائنا بخصوص مدى الاستفادة من الجسر الاكاديمي.
دانه اختي الغاليه وعادي لما يحتد النقاش وتختلف الاراء تنعطى وجة نظر افضل للقراء. والاستفادة تعم ان شاءالله بتباين وجهات النظر وايضاح السلبيات والايجابيات.
اهم شي انت الله الله في نفسك بالطريق...وخل اوراقك كلها عندك وخصوصا الاي توني خله مطرف. ولما تشوف شرطتهم بالمطار قول في قلبك"اللهم إني اجعلك في نحورهم وأعوذ بك من شرورهم" طبعا قوله بقلبك.
الله يوفقك اخوي ويحفظك وتوصل سالم غانم وترد لهلك رافع راسهم بالشهادة.

[Mohammed Al-Mousawi]

مشكورة اختي...وانشالله بنفذ اللي وصيتيني عليه

[Ali Al Kuwari]

في البدايه احب اشكركم على الموضوع
انا عندي نصيحه لاخواني و اخواتي الي ناوين يدرسون في اميركا

اهم شي الاتصال مع السفاره و اعطائهم العنوان كامل + التلفون و هذا اهم شي

اذكر كتيب في السفاره فيه ارشادات و حقوق الطالب القطري في امريكا
يعني الي لك و الي عليك من الالف الى الياء
ياليت لو تاخذون نسخه منه

فيه شخص اسمه " محمود صبري"
بصراحه و بدون مجامله ... شخص في قمه الاخلاق و المساعده .. متفهم لاعلى درجه و دايما في الخدمه

اتمنى تبنون معاه حسر تواصل و علاقه طيبه

واتمنى التوفيق للجميع

[Mohammed Al-Mousawi]

اذكر كتيب في السفاره فيه ارشادات و حقوق الطالب القطري في امريكا
يعني الي لك و الي عليك من الالف الى الياء
ياليت لو تاخذون نسخه منه




شلون احصله...؟؟


النظام تغير الحين

الطلاب الجدد مايروحون DC اول شي...علطول الجامعه؟؟!! :confused:

[Hamad Mohammad]

الموضوع تشعب كثير وخرج عن عنوانه

بس من الملاحظ هنا ان كل الهجوم والشكاوي على السفارة ولا يخلى موضوع من ذكر اسم السفارة وخاصة الاخت دانة و الاخت RAA!!!!!

فعلاًمستغرب

وبعدينعنوان الموضوع هو طرح المشاكل و المعناة التي مر بها الطالب

ولا حد يزعل

[R.A.A]

شكرا على مروركم الكريم أخ حمد محمد

السالفه مو تحامل على السفاره ولا شي....والسفاره وموظفينها وخصوصا الملحقيه الثقافيه يحاولون يسون إلي يقدرون عليه بحدود شغلهم إلي سياسته عفى عليها الزمان وسلف.

أحنا كطلبه قطرين وطالبات قطريات لما نشوف كيف السفارات الثانيه تعامل طلبتها وتتواصل معها في كل صغيره وكبيره واجتماعات سنويه و موسميه مثل السفاره الكويتيه. والتواصل مع الطلبه في حال وجود ظروف طبيعيه قاهرة كالاعاصير و العواصف..وبالمقابل نشوف شبه تجاهل من قبل السفاره القطريه ترا يحز بالخاطر. مانلوم الموظفين لأنهم عبد مأمور بس نلوم النظام المتبع بالسفاره. يعني حتى امور الصحه (health insurence) مافيها يسر وسهاله مثل مواطنين الدول الخليجيه الثانيه.

جايز الطلبه مبعوثي المجلس الاعلى للتعليم حاليا يجون مع وعي اكبر للامر المقبلين عليه ومهيئين للدراسه في النظام الامريكي اساسا وعندهم فكره عن الحياة المعيشيه بأمريكا فالوضع الحمدلله في تحسن. بس هذا مايغلي أهميه دور السفاره و خصوصا الملحقيه الثقافيه بالتواصل الفعال مع طلبتها وطالباتها وتقديم وتذليل كل الصعاب لخدمتهم.

الموضوع مو تحامل ولاشي...بس الاستفاده من أخطاء الماضي وتصحيحها لبناء مستقبل وواقع أفضل للأجيال القادمه. ولا لو علينا حنا أجيال قديمه...ماكنا بنعور راسنا ولا ننقاش هالامور لان اصلا لو صار تغير للأحسن ماراح نستفيد شخصيا بس بنفرح لما تستفيد الاجيال الجايه و تثلج صدرنا راحتهم لانهم بالنهايه أخوانا وخواتنا.

وشكرا

[Ahmed Al-Salahi]

ترا السفاره جزء من المعاناه فاعتقد ان احنا مازلنا في صلب الموضوع :rolleyes:

صحيح ان سفارتنا وملحقيتنا الثقافيه مقصره بس ترا في جزء كبير عليكم انتو الطلبه وهو المتابعه وتنبيه المسؤلين بالتقصير وترا في الملحقيه اناس فاهمين و متفهمين ويساعدون الطلاب ولا اتحامل على السفاره او الملحقيه لكنهم مقصرين

انتظروا لما يصير تهميش لدور الملحقيه الثقافيه ويصير تعاملكم مباشره مع المجلس ... الله يعينكم

شدوا حيلكم في الدراسه والله يوفقكم جميعا

[N A]

[]

ويتشجع عدد اكبر للدراسة في امريكا التي يعتبر علمها من أحدث وأقوى و أنفع العلوم في العالم...

[/B]


Is It ? من أحدث وأقوى و أنفع
???Is it ALL of This

WOOOW It is AMERICA
LoL

[J.H.Al-Qahtani]

السلام عليكم...

زين والله في قطريين بأمريكا......انا صراحة مااعرف و لا أحد من قطر بأمريكا....معليه ماصار لي 7 شهور......

انا ماصار لي موقف كبير مع السفارة إلآ انهم مادروا عنا إلا بعد مرور 3 اشهر من قدومنا ...وصار بعض التعطيل على الهيلث انشورنس..بس الحمد الله حصلناه بالنهاية بعد فترة طويلة وغرامة التأخير راحت للهيئة ماادري السفارة.....بس وحدة من البنات جربت تستخدمها لانها كانت حدها مريضة ويوم راحت المستشفى قالوا لها الإنشورنس مو معترف فيه...لازم تدفعين....الظاهر تعقدوا من سوالف السفارت والدفع....

إلا ليش السفارة ماتجمعنا يالطلاب كلنا في واشنطن دي سي زإلا احنا انتجمع يالطلاب عندهم ونطلب بأجتماع مع السفير.........ترى يد وحدة ماتصفق......ولازم نتجمع.....ومن هذا التجمع نقدر نوصل اللي نبيه ونعرف السفارة على الأقل نعرف وينها.....او شنو صلاحيتها...بما انه ماصار لها علاقة الحين بالإبتعاث......

.اختكم جوهرة قطر....