داوود حسين اساء للقطريين

[Mohammed Al-Mannai]

بسم الله الرحمن الرحيم

اساء داوود حسين الذي اصبحت كل برامجه (ابيخ من البياخه )
للقطرين بحركه غير مبرره منه بأستخدام الفلوس القطريه في تمثيله لحلقة تتكلم عن الشعوذه

وكانت اللقطه عباره عن عميله تأتي للمشعوذ وتعطيه الفلوس ( القطريه ) عشان يسحر لها زوجها وطبعا الحلقه كانت تتكلم عن اخوانا المغربيين لكن ايش دخل الفلوس القطريه ؟؟ الله اعلم

هذي صوره من المشهد اخذتها من احد المنتديات :


http://www.djfahad.com/Da01.jpg


وكما جائت الاساءه على الفضائيات جاء الرد على الفضائيات ايضا وعلى الهواء مباشره من المذيع حسن المهندي مقدم برنامج الليوان ... وهذا الرابط فيه ماقاله حسن المهندي

http://www.djfahad.com/al-lewan_-_djfahad.com.rm


وبيض الله ويهك يا بوعلي

[Jassim Al-Naama]

هلا محمد


جزاك الله خير على الموضوع

وبالفعل شفنا الحلقة هنا وما انتبهنا لللقطة !!!

بس لما شفت الصورة في المنتديات طاح من عيني هالفنان ..!!

اول شي .. البرنامج سخيف وفاشل ... ولا جديد فيه ...!!!!

شكله من فشل البرنامج قام يتهجم بغرض اثارة البرنامج

ثاني شي .. شكله ماصدق عطوه الجواز قام يغلط والا من قبل مب كفوا يتكلم !!!

على العموم كلنا عارفين ان هالاشياء بعيدة عنا هل قطر والحمدللله وماعندنا هالخرافات والسحر والشعوذة

والحمدللله والشكر على نعمة العقل

[Hussain Al-Neama]

وهل على الأراقوز حرج؟
مهرج عبارة عن بلونه خذت فترتها في "الانتفاخ" وجيه الوقت اللي "تنفجر" فيه

وصلاحية داوود حسين مابدت حتى تنتهي

فهو مهرج "فيزيائي" (بنظري) يعتمد على الحركات في وجهه وفي جسمه في التقليد.

اعتقد هذا النوع من أهبط انواع الكوميديا ..

واستخدامه للعملة القطرية في الحلقة ان كانت مقصوده فالردود سنعته والحمدلله ان ماعندنا هذا الشيء في بلادنا وعمري ماسمعت فيها..

قواك الله اخوي محمـد على النقل
واخوي Dj Fahad غني عن التعريف .. فمن طلع وخذ مكانه على الانترنت وهو معروف على حرصة في تسجيل هالنوعية من المقاطع وخاصة المقابلات الحصرية.

يعطيك العافيه ..

[A.A.Al-Nasser]

هو ترى من زمان مسيء لجميع الشعوب العربية.. ويحسب إنه ينتقدهم!!!!!!!

ومن كثر بياخته ما قمت أشوفه....... صراحة .... أنا أعتقد إنه برنامج بعيد كل البعد عن الكوميديا... واللي المفروض تكون كوميديا هادفة....!!!

ومشكوريييين على لفت انتباهنا لها اللقطة....

وعسى رمضان يكون شهر خير وبركة علينا وعليكم.....

[A A S]

انسان مثل داوود حسين ما عليه حرج..بكل بساطة كل سنة عن سنة يتحدر مستوى اللي يقدمه بمقاييس عديدة :eek: :eek:




بس عفواً اخواني الأعضاء لا تقولون ما عندنا هالاشياء في قطر.. موجود ومنتشر.. الله يكفينا الشر :( :(

[Ahmad Almansoor]

شفت الحلقة وانتبهت للفلوس ..

انا مازلت اعتقد ان هذي مجرد فلوس ما قصد فيها شي ..وما كشفنا عن قلبه حتى نفسر حركاته .. والله اعلم باللي يقصده

انا ما ادافع عنه .. لأنه مهرج مثل ما قلتوا .. لكن ما يصير نفسر كل شي على انه اساءة ..هي مجرد فلوس وطلعت << في نظري انا

فكرت فيها بطريقة اني ابعد هالكلام عن وجهة نظري ..
لو تلاحظون في قناة الراي ..مسابقة قرقيعان ..ارقامها عن طريق كيوتل ..
يعني كيوتل مساهمة بطريقة ما في البرنامج .. فعادي توصل فلوس قطرية هناك

قد يكون احد الكادر اللي معاه قطري ..وعطاه الخردة اللي بجيبه

وقد وقد .. في وايد احتمالات مب شرط الاحتمال اللي نتوقعه


وان كان فعلا قاصد يسيء للقطريين ..
ليش ما علقنا على وداد الكواري ويعقوب المقلة في مسلسلاتهم؟؟؟؟ ..

هالسنة مب اول مرة يحطون لنا سوالف سحر و شعوذة على ان اهل قطر تنتشر بينهم هالخرابيط .. يعني هالشي جاي مباشر و مكشوف اكثر من فلوس داوود حسين

صح والا لا ؟

ومثل ما قالت اختي هالشي موجود عندنا ..فمافي داعي نتصرف كأن هو لفق علينا فعل

[A.A.Al-Nasser]

هو صح كلامك أخوي إن السحر وخرابيطة موجودة في الدوحة.. (بس يمكن مب منتشرة)!!!! :rolleyes:

النقطة الثانية... بالنسبة لمسلسلات وداد الكواري.. فهي معروف إن أحداثها تجري في قطر والشي مجهور فيه في المسلسل.. وأحداث المسلسل تعتبر تجسيد واقعي لما يحدث في قطر والذي يعتبر مثالاً لما يحدث في الخليج.. وقضية السحر لما انعرضت في المسلسل.. انعرضت بشكل هادف مع تبيين عاقبة السحر في الدنيا.. (خراب البيوت)!!!!

أنا ما تابعت الحلقة.. بس معروف إن طريقة عرض داود لقضايا المجتمع بشكل هادف غالباً ما تكون آخر اهتماماته(هذا إذا كان في عرض لقضايا مجتمع!!) ... ولو لاحظت.. فإن ديكور وملابس وشخصيات البرنامج غالباً ما تكون خارجة عن الواقع ولا تمت لأي مجتمع بصلة.. فالمفروض إنه مثل ما يخلق شخصية الساحر بشكل خربوطي.. المفروض إنه بعد يجيب أوراق ملونة على أساس إنها بيزات.. :confused: .
المقصد...!!! كان لبس له ثوب وغترة وعقال وقال قطري بدال هالملابس اللي لابسها.. يعني وصل عند العملة ورمز فيها للدولة... بلفيت ما حد بيلاحظ....؟!!!! :confused: :confused:

[R. Al-Harami]

تسلمون اخواني واخواتي على الردود اللي تبرد القلب

بس صراحه

من يكون داوود حسين او معد الحلقة او غيره ممن اقترح عليهم وضع العملة القطرية في السحر والشعوذة ؟؟؟..

وعلى فكرة اعتقد ان في ميزانية مسوينها للبرنامج بامكانهم انهم يطبعون عملات ورقيه مزيفة((يعني مالهم عذر في استخدام الريال القطري))
واحنا في قطر والحمدلله ((على عكس كثير من الدول سواء الخليجية او العربية)) ما عندنا شعوذه او مشعوذيين ولا سحر ولا قد سمعنا ان في مشعوذ او ساحر قطري ..

صراحه هالبرنامج صار ملل ورتيب وبايخ وكله اسفاف واستهزاء ما ادري وش الهدف منه!! واللي بيقول كوميديا في كوميديا ثانية ارقى من هالشكل وهالبرنامج ابعد مما يمكن ان يسمى بالكوميديا...


بس والله والنعم فيه حسن المهندي ما قصر

[Nawaf Al-Nasr]

السلام عليكم ..

داوود حسين ليس له اي حق في استخدام العملة القطرية في اي حلقة من حلقات برنامجه الكوميدي الهزيل .. لان العمله القطريه رمز من رموز الدوله .. ولايحق له التصرف فيها الا بموافقة الجهات المختصة .. لانه اساء استخدامها .. فالحلقة على اساس انها في المغرب .. وشركة الانتاج كويتية .. والبرنامج كويتي .. والممثلين كويتيين .. فما دخل العملة القطرية في الموضوع ؟؟

حسن المهندي ماقصر في برنامجه " الليوان " واتمنى من المسؤولين انهم مايتجاهلون هذا الموضوع .. ويعرفون من الاشقاء الكويتيين سبب استخدام عملتنا القطرية ..

تسلم يالمناعي على الموضوع

[Ali Al-Rumaihi]

ياشباب صلوا على النبي و إن كان قاصدها فهذا اللي كان ينتظره منكم اللي هو إستفزازكم..
الكل يعرف وين مصدر البلاوي والفضايح والسحر والشعوذه والحمدلله أكيد أنها مب قطر.
ودام أن احنا عارفين هالشي خلونا نهمش هالتفاهات..

ولكن هناك نقطه ممكن المعد أو المخرج قطري فطلع فلوسه عشان يخلص البرنامج..

على العموم تيك إت إيزي.. وخلونا نرد الإساءه بالإحسان ونقوله ضحكنا يا أرقوز...

[Mohammed Al-Mannai]

بسم الله الرحمن الرحيم


على العموم تيك إت إيزي.. وخلونا نرد الإساءه بالإحسان ونقوله ضحكنا يا أرقوز...

وين الاحسان فيها ؟؟ خخخخخخخخخخخ

[Ali Al-Rumaihi]

ههه.. هو لابس ثياب الأرقوز ولين قلناها له بيستانس