أول مشاركاتي

[Abdulla Al-Naimi]

سلام عليكم
هذي أول مشاركاتي وهي إهداء لجميع من شجعني على الكاتبه وحده من قصايدي في الغربه من بعد إتصال لي من رجال عزيز يوادعني بيروح يقنص و إتصال من أخوي يبلغني عن المطر في الدوحه

و أرجو منكم إنتقادي

الله لاحل الوسم على سهيل*غربي الدوحة يجر ونات وشجون
و الله من قلب قد شاف الويل*لولا رحمة الله و هله و العون
الله لا لاح براق نار الليل*فوق دار ناس حن لهم داعون
و الله لاجهزوا موتر كالخيل*بديه محمل و إخواني يطربلون
دعيت الله مجيب بسيل*يسر دروب من الحباري يحدون
و الله لاتل جمس وريح الجير*في مسطاح الطيبين ينزلون
و الله لافرع الشري و هو طير*حر به الأجواد دايم يوصفون
الله لاشفت الحيا مع الخير*وسط ناس حلو القصايد يجرون
الله لاقال أبوي صاد الطير*و لحظت أخواني دوني يضحكون
الله و الله أعلم وش الشيل*بنفس شاعر بعيد عن إلي يهدون
كني صويب المحبه من عين*أشكي للي عادهم لي يداون
دواي مسطاح وريح هيل*من دلال على الجمر يصفون
وطير يعشى صايد بمخلابين*كن صيد عين منها يخافون
و أجر من الغزل بيت واثنين*و أشكي شي منه الناس يبكون
مابكيت المحبه لاني غير*صادق بشعري و واجد يكذبون
ولد بدو عشق شوف عين* وشوف الأجواد لا صاروا يفرحون
و لأقبل القيظ غير الشين*طارد الهاجس مع إلي يغوصون
لكن الغربه لازم تبلي الزين*و واجد على الماضي يصيحون
بحمد الله على الشر و الخير*ونبيه قال بإيمانكم تبتلون
أنا مومن إن الصبح بعد ليل*وإني راجع لناس علي يولهون
ثم باونس النفس بالشيين*وعروس لي هلي يدورون
وبالحمد أختم الشعر و وين*أخير من بذكره الناس يدعون
عدد ما يشكي الغربه سهيل*وعدد ذكر المسلمين له يذكرون

و سلامتكم

سامحونا على الإطاله
القصيده إهداء لجميع المغتربين و خاصة الشباب إلي أذيتهم بالشعر
و أخص بالذكر الشباب إلي شجعوني (طارق الساعي و حسن البراهيم و علي الرميحي)

سلام عليكم

[Ali Almarri]

صح لسانك أخوي عبدالله النعيمي

وعساك على القوه وابشرك المقناص بيقرب وقته

والربيع ان شاء الله....ولا هنت على القصيده

[Hassan Al-Ibrahim]

صح الله لسانك يا النعيمي ..

لكن الغربه لازم تبلي الزين*و واجد على الماضي يصيحون

الغربة يا بوعابد تراها مب دايمة

و ترا لولا الغربة ما عرفنا رجال أمثالك و شرواك ..

:)

[Ali Al-Rumaihi]

لكن الغربه لازم تبلي الزين*و واجد على الماضي يصيحون
بحمد الله على الشر و الخير*ونبيه قال بإيمانكم تبتلون
أنا مومن إن الصبح بعد ليل*وإني راجع لناس علي يولهون
ثم باونس النفس بالشيين*وعروس لي هلي يدورون


و الله لاجهزوا موتر كالخيل*بديه محمل و إخواني يطربلون


بصراحه ماشجعناك على أي شي بل شجعناك لأن عندك الموهبه أو القدره على المحاوله الشعريه.
والواحد لازم يغلط ويتعلم من الناس وإنتقاداتهم يابومحمد!
إبن آدم مانولد يمشي على ريلين صح ولا لأ :).
أما رأيي المتواضع فهو:
الأبيات الأربعه الأولى اللي إقتبستها منك كانت قمه في الروعه.

اما الإنتقادات ففي البيت الأخير أحس أن آخر كلمه -يطربلون- طلعت شوي لأن نطقها شوي غير عن الباقي فلو حطيت مثلا -يركبون- أو شي على وزنها أحس أفضل لأن في كلمه يطربلون عندك الطاء والباء ثقال.

الشي الثاني أنك تحافظ على عدد الكلامات في الشطر طول القصيده

لو كان 4-----5 لازم يكون بهالطريقه
4----5
4-----5

الشي الأخير بس في طريقه الكتابه حاول تحط مسافه بين كل سطر وسطر وحاول أنك تخلي طول الشطور متساويه حتى يكون شكلها منسق.

والسموحه هذا حدي في الشعر وأموره ماعندي خبره فيها.
أتمنى اني فدتك
أخوك
علي الرميحي

[Mohammed Al-Mansouri]

صح لسانك يالنعييمي وتسلم هالانامل ..ووو ان شاء الله نشوفك قريب

[Jassim Al-Naama]

ماشاء اللله

صح لسانك شاعرنا الكبير والقصيدة اقل شي اقدر اقوله عنها انها روووعة

ابدعت والله

[Mohammed Al-Mannai]

اممممممممم اهداء حق المغتربين امممممممممم
والي جابلك في الجسر سنه كامله وتحمل منك الويل ماله اهداء ؟؟؟

ماقول الا : وشلك بالبحر واهواله ... ورزق الله على السيف

خخخخخخخخخخخخخخخخ
ملاحظه: شعرك زين

[Abdulrahman Fakhroo]

انا اقوووووول لييش متصلي ذاك اليوم تقول وين بيت "فلان" ; )

طلعوا عيل هم الرقاااابه :cool:

ههههههههه :D

anyway..... Not Bad :p

[Abdulla Al-Naimi]

و الله يا من أنا بحسبت حـ....... ه على ما تقول
القصايد إلي في الجسر وصلتك و إنت أدرى بها
و بلا فضايح ;)
و ترا أذكر إني عطيت كم واحد قصيده عن فراق شباب الجسر
و الله على ما أقول شهيد

[Tareq Al-Saei]

الله لاحل الوسم على سهيل*غربي الدوحة يجر ونات وشجون


صح لسانك يالشاعر ...

شعرك له طعم مميز وممتع للقراءة المتكررة وانا ما اجاملك ....

لي ملاحظات بسيطة على الوزن (علي المري لا تبتسم) ... لكن حلاوة الفكرة تجمل القصيدة ...

ننتظر جديدك