الدراسة بعد التخرج

[Maryam Abdulla]

السلام عليكم

بداية احي ادارة المنتدى على هذه الاقسام المنظمة .. جهد فعلاً تشكرون عليه

وعندي سؤال لطلاب كلية شمال الاطلنطي

وهو :

كم سنة دراسية تلزم الطالب ليكمل البكالوريس بعد التخرج من

الكلية .. ولنقل على وجه التحديد بتخصص المحاسبة ؟

وهل تم تأكيد الاتفاقية مع جامعة قطر في امكانية

اكمال الدراسة لديهم ؟!

والله يعطيكم العافية .

[Fahad Al-Jefairi]

وعليكم السلام ورحمة الله وبركاته

جزااج الله خير اختي على الاثراء والمجاملات :) :)

بالنسبة لسؤالج ...انا بصراحة ما راح اقدر افيدج واايد في السؤال

الا ان لفت نظري ...لأن في طالب دخل عندنا في جامعة كارنيجي ميلون في تخصص البزنس وهو خريج من الشمال الاطلنطي محاسبة ... فتقريبا شلو عنه 6 او 7 مواد ....وراح يكمل دراسة بشكل طبيعي ( بالنسبة له هو اذا شد حيله راح يتخرج بعد 3 سنوات من الحين :) )

:rolleyes: اتمنى اني اكون أفدتج اختي ...

وجزااكم الله خير

[Maryam Abdulla]

مرحبا اخوي ..

الصراحه يخوف الكلام اللي تقوله !

يكمل في ثلاث سنين بالاضافة إلى ثلاث سنين الكلية

يعني صاروا ست سنين .. على كل حال الله يوفقه

وياليت حد يفيدنا إذا حابين نكمل في جامعات ثانية ..

ومشكور اخوي عالمشاركة الطيبة :)

[Saif Al-Kuwari]

a student with a Diploma will be elligable for a direct-second -year entry as for the UK universities

the majority of the undergraduate degrees in the British universities are of 3-years length. so if a student get a direct second year entry, there will be two more years left for graduation

some universities also require a score of 580 in TOEFL or 6.5 in IELTS beside holding the diploma degree

it's also possible to have a direct-third year entry in some of the universities here, but those universities are definitely not included in the HEI list as they are of a lower quality level and generally addmiting to them is not advisable

transferring to the UK after having a diploma may seem attractive because of the short qualification period, but there is one disadvantage, that is the educational system, which is very different from the 'hours-based' american one that you probably have been getting used of while doing your diploma

I hope you consider Qatar university at the first place beforing attempting the other alternatives for the many advantages it offers both from the education side and the convenience one

[Mohamed Al-Sayegh]

أختي اقدر افيدج في تخصص ادارة الأعمال أما التخصصات الثانية ما عندي خلفية.. بالنسبة لتخصص ادارة الأعمال, سمعنا إن قريب جامعة قطر راح أتوقع اتفاقية مع كلية شمال الأطلنطي بس إلى الآن ما في شي .. طلاب كلية شمال الأطلنطي تخصص إدارة أعمال عندهم اختيارين إنهم يدرسون سنتين ويحصلون على دبلوم أو ثلاث سنوات وايحصلون على دبلوم عالي.. بالنسبة للطلاب إلي يتخرجون من كلية شمال الأطلنطي تخصص إدارة أعمال دبلوم عالي يقدرون ايكملون في كندا الجامعات التالية منها:
Lakehead University
Memorial University of Newfoundland
Northwood University, Michigan
Royal Roads University, British Columbia
University of Lethbridge
University College of Cape Breton
بالنسبة للفترة إلي تحتاجينها أختي علشان أتحصلين على البكالوريوس بعد التخرج من كلية شمال الأطلنطي تخصص ادارة أعمال دبلوم عالي تقريباً سنه ونصف أو سنتين مب أقل..بس في نفس الوقت تحتاجين إن ايكون عندج TOFEL

أختي بس لازم تتأكدين مع المجلس الاعلى للتعليم واتشوفين هل هاذي الجامعات مدرجة في القائمه او لا

محمد الصايغ

[Maryam Abdulla]

بسمه تعالى ..

الاخ الكريم سيف الكواري

اشكر لك ردك .. ويتضح من كلامك انه فعلاً الانضمام لجامعة

بريطانية بعد التخرج من النورث صعب من الناحية الدراسية

ومن ناحية عدد السنوات !

يعني الافضل للطلاب يدرس في بريطانيا من البداية

ماذا عن الانضمام لجامعة امريكية !؟

واكيد جامعة قطر حاطينها بعين الاعتبار بس حبيت اعقد مقارنة

ليتضح لي في النهاية الخيار اللي ان شاء الله يكون الأفضل .. :)

- - -

الاخ الكريم محمد الصايغ

مشكور اخوي على اهتمامك ..

وبالنسبة للاتفاقية بين النورث وجامعة قطر ففعلاً راح تيسر اشيه كثيرة

بس لو يتضح لنا عدد السنين او الساعات المتبقية إذا ما تم الانتساب لها

سنتن او سنة ونص بعد مب قليلة إذا حسبناها مع الثلاث سنين

على كل حال مشكور اخوي .. والله يعطيك العافية ..

.. تحياتي ..

[Mohamed Al-Sayegh]

اختي مثل ما اتعرفين كلية شمال الاطلنطي كلية تقنية واكثر التخصصات فيها تعتمد على الجانب العملي بشكل كبير .. بمعنى انها ما اتركز على الجانب النظري وايد .. باستثناء تخصصات الهندسة وادارة الاعمال .. علشان جذي انا دايماً انصح الطلاب الي يبون يدرسون في الكلية بتخصصات الهندسة وادارة الاعمال .. طبعاً ما اقلل من أهمية التخصصات الاخرى .. بس الي ايفكر في المستقبل والحصول على درجة البكالوريس بعد التخرج انصحه بالهندسة وادارة الاعمال .. ..لان المشكلة ان الواحد لما يتخرج ويبي ايحول الساعات الى احد الجامعات , تقوم الجامعة بعدم احتساب بعض المواد لانها مواد عملية من الدرجة الاولى..وطبعاً عدد المواد الي اتركز على الجانب العملي بشكل كبير في ادارة الاعمال في كلية شمال الاطلنطي قليل مب وايد .. واي استفسار انا حاضر با اخواني


اخوكم: محمد الصايغ

[Fatma R]

اهلين اختي مريم ..
الصراحة انا ما ابي احبطج .. انا خريجة من هالكلية .. وتوقعنــا ان الكلية بترتب لنــااا الجامعات او اي فكرة تخلينا انكمل فيها دراستنــاا .. وكل مانروح لمسؤل الي بالكلية بهالخصوص ما يعطينا اي نتيجة .. وحتى في جانب العمل ... توقعنـا بيكون في اهتمـام .. بس للأسف .. في بعض الشركات لين الحين ماثبتوو الطلاب ... لان لين الحين ماينعرف وش مصيرنــا ؟!؟ والله انا نصيحتي الي بيدخل هالكلية ونسبته عالـيه يدرس في جامعة احسن من كلية .. وبعدين بيعرف وش الفرق بين الشهادتين اذا جا العمل ... !! والله في فرق كبيــر ... انـا ارسلت الترانسكربت حق اكثر من جامعة والساعات الي اقبلوها قليلة جداّ .. وفي جامعات ماتحسب ولا ســااعة ...
انتي بتنصدمين في اشياء كثيرة بعد التخرج .. انا درست بالكلية والحمدلله كنت مرتاااحة في الدراسة وعاجبني في كل شي .. واحس استفدت اشياء كثيررررة .. بس نصيحتــي اذا حصلتي اي قبول في اي جامعة روحي وكلمي اهنـاااك ... والله بعد البكالوريس .. تقدرين تقدمين ماجستير ودكتوراه بعد ... اذا تطمحين للدراسات العليا .. ام على الدبلوووم بتتعبين واايد ... والله انا اقول لج هالكلام لانه من الوواقع وهالشي الي احنا عانينا فيه .. اسألي اي خريج وش درجتك والا وش مكانك ... انت مرتاح ولا لا ...؟ الاغلبية بيقلون لج " لا " ... وشفتي الشكاوي الكثيرة الي بالجريدة عن الدرجة ... اوعدونا بدرجة كبار الموظفين ... وعندي نسخة الجريدة ... بس عقب كل شركة تراجعت في كلامهــاا ... بس شوفي الادفايزور حقج واطلبي منه يعطيج خطة مابعد التخرج ... يمكن يقدرون يفيدونج ... واسمح لي على هالكلام .. بس هذا الحقيقـة ..

[Abdulrahman Fakhroo]

والله انا نصيحتي الي بيدخل هالكلية ونسبته عالـيه يدرس في جامعة احسن من كلية .. وبعدين بيعرف وش الفرق بين الشهادتين اذا جا العمل ... !! والله في فرق كبيــر ...
جزاج الله خير اختي فاطمه لانج وضحتي هاذي النقطة.. وانشالله الله يوفقج وتكملين دراستج حتى الدراسات عليا :)

و ياليت اغلب الناس تدري بهالشي... كثير من الناس تقول لي "أنا ادخل النورث ولا ادخل جامعة قطر"!!!
ودرجاتهم بالتسعين في الثانويه العامه..!!!
مدري من قص عليهم وقال "دبلوم النورث أقوى من بكالوريوس جامعة قطر"!!!

ماقول الا "حمدالله والشكر والله يعين شبابنا وبناتنا" :(

[Hussain Al-Neama]

كان من المفترض قبل تنفيذ هذا المشروع التعليمي الضخم
التخطيط والاستعداد لمواجهة هذه النقطة ..
الغلطه ان تم الاعتراف بالكلية "محلياً" لمجرد محتاواها .. والاعتراف اقتصر على انها كلية "تقنية" يأخذ الطالب مدته بالدراسة فيها ويتوكل على الله ويرجع مجال عمله "نفس الكلية التقنية اللي سكروها "

(أخبر تناقشت معاك في هذه النقطة يا اخوي محمد الصايغ قبل مدة)

اتمنى ( اتمنى) مايكون مصيرنا في الكلية نفس مصيرنا في ( قطر للبترول أو كيوتل ) اللي هو معتمد على كلام ماله أي صلة بالواقع (الخلاصه اتمنى مايبيعونا الكلام الفاظي).

الميزة في طلاب الكلية ان معضمهم (85%) ينوي تكملة دراسته بعد الدبلوما !!
وياليت يكون هناك سعي من الكلية نفسها حتى ترفع أسماء الجامعات المقترحة للمجلس الأعلى للتعليم ويتم الموافقه عليهم. وياليت ماتقتصر على تخصص واحـد فقط ..
أنا تخصصي IT _ Computer Support ما اتمنى احصل الدبلوما واشتغل على طول !! (ولو اني عارف ان هذا اللي بيصير في النهاية) لكن متفائل خير ...
كان من المفترض ان ادارة الكلية والقائمين عليها ينسقون هذا الموضوع مع المجلس الأعلى للتعليم من البداية .. لأن هذا الشيء يصب في مصالحنا في الأخير..

وفي خاطري امور كثيرة تجاه سياسة الكلية خاصةً بعد الانتقال للمبنى الجديد ودي اناقشها >لكن اخلي الكلام في وقت ثاني.

على كلن آسف للخروج عن محور الحديث والف شكر مني لك يا محمد الصايغ على التوضيح ..

وايضاً احب اشكر اختي مريم عبدالله اللي اثارت هذه التساؤلات واللي خلتنا خلال موضوعها نعبر (شوي) عن وجهة نظرنا تجاه الكلية

الشكر موصول لكل من ساهم في ابداء الرأي

الله يوفق الجميع إن شاءالله

رحم الله والديكم ..


اخوكم: حسين النعمه

[Maryam Abdulla]

بسمه تعالى

الأخ الكريم محمد الصايغ :

فعلاً مثل ما تفضلت .. بالنسبة لتخصص لإدارة .. كلمت حد من إدارة الكلية

وقال انه في جامعة كندية تعتمد كل الساعات .. وتبقى بس سنه ونص للبكالرويس ..

- - -

الأخت الغالية فاطمة :

مشكورة أختي على ردج .. والله يوفقج وتكملين دراستج ..

الحقيقة الموضوع مر عليه أيام كثيره ..

خلالها قمت بمعادلة .. اتضح لي في نهايتها إن جامعة قطر أفضل لي

والحين أختج في جامعة قطر صج ها القرار ما يخوا من المعاناه

ولكن لابد من بعض التضحيات ..

والله يساعدكم .. وينولكم اللي تبونه .. :)

.. Maryam ..

[Maryam Abdulla]

الأخ الكريم Abdulrahman Fakhroo

أشكر لك ردك ..

والحقيقة جامعة قطر لا بأس بها .. وخاصه هذه الآونة نرى الكثير

من التغيرات من نواحي عدة مختلفة .. وتسهيلات لا محدودة ..

- - -

الأخ الفاضل : Hussain Al-Naama

وصلت إلى قناعة مفادها أن لا توجد منظمه تعليمية متكاملة

فلكل سلبيات وإيجابيات .. وفي النهاية لابد للطالب من تحديد هدفه

وحينها يستطيع الاستمتاع بالايجابيات وتحويل السلبيات لتحديات

بوسعه مواجهتها وجعلها دعامة له .. :)

والله يوفق كل اخوانا وخواتنا في الاطلنطي ..

.. أختكم : مريم عبدالله