دعما للانشطة الطلابية ... شباب استراليا حياكم معانا

[Mohammed Al-Najjar]

بسم الله الرحمن الرحيم

والصلاة والسلام على اشرف الانياء سيدنا محمد وعلى آله وصحبه وسلم ...

اخواني الطلاب الدراسين في القارة الاستراليه حياااكم الله وبياكم ...

ما شاء الله تابعنا وما زلنا نتابع انشطة سمرنا والتي يقوم ويشرف عليها اخواننا واخواتنا الطلاب بارك الله فيهم ،،، واستطاعت هذ البرامج انها تجمع عدد كبير من الطلاب الدارسيين في النصف الاعلى من الكرة الارضية اضافة الى اخواننا واخواتنا اللي يدرسون في الجامعات الموجوده في قطر ...

ولكن سوءا للتوزيع الوقتي والمناخي والتعارض مع مواعد الدوام الدراسي للطلاب في استراليا ،،،فقد حرم الكثير منا (طلبة استراليا) من الحضور والمشاركة في الانشطة مع اخواننه والاستفاده منها :(

وبما ان اجازتنا القادمة ستكون طويلة نوعا ما ... لانها بتكون الاجازة الصيفيه لنا ،،، وبيكون معظمنا فاضي وبيكون عنده وقت فراغ طويل نوعا ما ..... ومن باب التواصل مع اهداف الشبكة الطلابيه وسيايتها ،، واستكمالنا للانشطه الترفيهيه والرياضية والمفيده والتي تهدف الى خدمة الطالب ....

نقدر نقول حق اخوانا جزاكم الله خير في الفترة السابقه ..... واحنا بأذن الله (بحكم التفرغ) ممكن نكمل عنكم هذي المسيرة الطلابية وبدعم منكم ومن خبرتكم ،، ونسوي برامج فترة الربيع القادمه (اللي هي فترة الصيف عندنا ) ومنها نتعرف ونتواصل احنا الشباب المنتشريين في ربوع استراليا على بعض بشكل خاص ونتعرف على غيرنا بشكل عام ....ونساهم مع اخواننا في نشاط هذي الشبكة المباركه ..

اذا .... هذي المساحة من الان راح تكون لاستقبال مشاركتكم وافكاركم اللي تبغونها واللي تبون تسونها ،، ونوعية البرامج اللي ممكن نسقها وننخطط لها مع بعض....
سواء كانت برامج اجتماعية ،، رياضية ،، جماهريه ،، علميه ،،،،،،
وهذي راح تكون المرحلة الاولى من العمل (( مرحلة جمع الافكار))


نرجو من جميع الاخوان المشاركة والتفاعل بأفكاهم سواء كانوا طلاب استراليا او غيرهم ،، لان هذي البرامج بتكون لنا ،، واحنا اللي بنستفيد منها ،، وحلو ان احنا كلنا نتشارك فيها ونكون يد وحده :)


ننتظركم ونتظر مشاركاتكم

ونرجو من اخواننا اللي مشاركيين في الموقع يعرفوون اخوانهم الطلبة بالموضوع وبالمنتدى عشان يشاركون معانا :)

اخواننا اداريين الشبكة ما نسيناكم ... ولكن ننتظر ترتيب الموضوع .. وبنزودكم بالبرنامج كامل في حال الانتهاء منه ; )

والسلام عليكم ورحمة الله وبركاته

اخوكم محمد النجار
بيرث

[Jassim Al Obaidly]

السلام عليكم ورحمة الله وبركاته

يعطيك العافيه اخوي محمد النجار على هذه الفكره الرائعه بصراحه ....

انا واحد من اشد المؤدين لفكرتك وبالفعل بتكون هناك اجازه طويله جداً

لي عوده اخي بعد ان نجمع اكبر قدر من الطلاب القطريين اللي يدرسون باستراليا والليد الوحده ماتصفق

وانا انشالله راح ابلغ اكبر قدر من الطلاب ...

فمان الله

[Jassim Al-Mulla]

حيا الله بو خالد
نور المنتدى زيادة بوجودك :D

الصراحة فكرة تمام التمام
وأنا أؤيد هالفكرة بشدة

ليتم التعارف بين الشباب من أنحاء قارة استراليا

الحين ما عندي أي أفكار
بس ان شاء الله بيجيك الخير في المستقبل القريب :cool:

[Mohammed Al-Mansouri]

جزاك الله خير اخوي محمد... الصراحه فكره روعه وانا من اول المشاركين بأذن الله ... ونقدر نستفيد من اخوانا الي شتغلو على برنامج سمرنا جزاهم الله خير ... وبالنسبه للافكار لي عودة ان شاء الله

[Jassim Al-Naama]

بسم الله الرحمن الرحيم

السلام عليكم ورحمة الله وبركاته

هلا والله منور المنتدى بوخالد

يعطيك العافية على الفكرة العجيبة .. حتى مايضيع صيفنا عالفاضي ونتملل فيه مثل الصيف اللي فات

فكرة حلوة وبتجمعنا كشباب ندرس في القارة الاسترالية

باذن الله بحاول اوصل الخبر لل 11 طالب القطريين في مدينتنا

وان شاء الله برجع مع لستة الافكار :)

تحياتي

[Mubarak Al-Sowaidi]

هلا والله اخوي محمد النجار ..........

انا من أول المؤيدين لك لأن بالفعل اجازتنا بتكون طويلة والله يعطيك العاااافية على فكرتك

[Mohammed Al-Subaey]

:) السلام عليكم

جزاك الله خير اخوي محمد ...

ان شاء الله ... انا معاكم بإذن الله

و بساعدكم بالي اقدر عليه ...

جزاكم الله خير :) :)

مراسلكم من استراليا

محمد السبيعي :cool:

[Mansour Al-Mahmoud]

السلام عليكم ورحمة الله وبركاته


مشكووور اخوي محمد النجار على هالمبادرة الطيبه وان شاء الله يكون صيفنا (للاستراليين) احلا :p من صيفهم (باقي دول العالم خخخخخ)


وان شاء الله بكون من المشاركين معاكم


اخوكم

منصور آل محمود

[Jassim Al-Naama]

بسم لله الرحمن الرحيم

السلام عليكم ورحمة الله وبركاته


في البداية بما ان المرحلة الجاية تجميع افكار

فانا عندي كم فكرة وكم ملاحظة وكل مايطرى ببالي شي بكتبه ان شاء الله

اول شي ..


الافكار لازم تكون شوي مختلفة عن الافكار المتبعة حاليا الافكار الحالية تنحصر في المحاضرات والجمعة للعب الكورة . وبعض السفرات القصيرة .. الخ

انا ببالي نسوي شي مثل برنامج صناع الحياة في مركز شباب الدوحة الصيف اللي فات .. وهو محاضرات اسبوعية او كل اسبوعين وفرق عمل ولازم كل فريق يقدم مشروع ينجز خلال الاسبوع ويقدم في عروض نهاية الاسبوع في يوم يتفق عليه الجميع ( فكرة كنوع من التغيير )

الحملات .. وياكثرها هالايام على الشبكة العنكبوتية .. حملات ضد اشياء كثيرة .. ونسوي لها دعايات في الانترنت والمراكز الشبابية ونكون كطلبة ندرس باستراليا السباقين لهالشي ( اقصد السباقين لحملات جديدة في مضمونها ونوعها ومشكلتها )


طبعا رحلات المبيت .. لعب الكورة الاسبوعي ( نشاطات مانقدر نغيرها لانها شي اساسي )


مؤتمرات نجمع فيها الشباب وندشن فيها اول مجلس طلابي للطلبة القطريين في مختلف الجامعات الاسترالية
( حلم ياريت يتحقق ) حتى نقدر في المستقبل نسوي رحلات ومؤتمرات وتجمعات بيننا في استراليا

هذا اللي ببالي اللحين

[Mohammed Al-Najjar]

بسم الله الرحمن الرحيم


اخوي جاسم العبيدلي ....

جزاك الله خير على التفاعل .... ومثل ما قلت اليد الوحدة ما تصفق ،،، نحتاج للكل ونحتاج حق افكار من الكل :)

ننتظر عودتك للموضوع ... وافكارك الزينه ; )


ـــــــــــــــــــــــــــــــــــــــــــــــــ

هلا والله بالغالي الجسمي ..
المنتدى منور بزمان ... بوجود ناس مثلك وشرواك :D

لا تطول علينا ... ترى افكارك .. ويدك معانا وايد مهمه ..

بنتظارك ....

ــــــــــــــــــــــــــــــــــــــــــــــــــ ـــــــــــــــــ

حياك الله وبياك اخوي المنصوري ....

وطبعا اخوننا لهم الاسبقيه وعندهم الخبرات ،،، واحنا كلنا نشتغل من اجل هدف واحد
(وقوم تعاونوا ما ذلوا )

بانتظارك ... وانتظار افكارك النيرة .. :)

ــــــــــــــــــــــــــــــــــــــــــــــــــ ــــــــــــــــــــ

يا حيالله بولد النعمه :)
هلا بالشاب الزييين

حبيبي المنتدى منور بوجودك وبهمتك اخي الحبيب .. لي عودة حق افكارك ; )

_____________________________

اخوي مبارك ... جزاك الله خير على المروور والتفاعل الطيب ...
اللع يعافييك حبيبي :)

با نتظارك افكارك اخي العزيز :cool:

______________________________________


هلا بمراسلنا الليييييييث : محمد السبيعي ..

حياك الله حبيبي معانا ... واقووول من الحييين جهز نفسك بنوهقكك بوايد اشياء .. بس انت بتكووون قدها ان شاء الله :)

ننتظر مساهماتك ...

__________________________________________


اخوي منصوووور .. جزاك الله خير على المرووور والمشاركه ...

لا وانت الصاج ... شتانا احلى :cool:

بانتظار مشاركاتك وافكارك ..

_________________________________________________

يجزاكم الله الف خيير اخواني على المروور ولتابعه ... ووننتظر مشاركه باقي الاعضاء الموجوديين معانا بالمنتدى والاعضاااء الثانيين

ونبغي افكاركم بسرعه قبل ما ننضغط بالامتحانات ،، ; ) والدراسه ..

همتكم معانا ... وخلكم ايجابييين

طلب الى الادارة :: لو سمحتوا ممكن تساعدونا وطرشوون ايميلات حق الاخوان اللي مسجليين معانا بالمنتدى (الدارسيين في استراليا) ،، وتخبرونهم بالمشرروع .. عشان الكل يتفاعل معانا ; )
وجزاكم لله خير مرة ثانيه

ننتظركم .... ووننتظر افكاركم

[Jassim Al-Naama]

السلام عليكم

مجموعة جديدة من الافكار ببالي وحبيت اطرحها

1- لقاء مع احد الدعاة او المشايخ وفيه نسال الشيخ في امور عدة ويكون اللقاء مفتوح للأسئلة من قبل الحضور

وممكن يكون اللقاء مع مهندس او عالم او ...... الخ

طبعا المقصود لقاء للاسئلة والحوار في قضية هامة ومب ان الشيخ او العالم يشرح وبس واحنا نسمع
'
2- انشاء جمعية قطرية للطلبة في استراليا او المجلس الطللابي اللي ذكرته في الرد السابق واللي يكون مسؤوول عن تنظيم تظاهرات وانشطة سنوية للطلبة الدراسين في استراليا

3- مسابقات دينية وثقافية ورياضية وتكون التغطية في احد الجرائد او تقرير قصير يعرض في التلفزيون كل اسبوع عن الانشطة ( من الناحية الاعلامية بس ) :)



هذول اللي ببالي اللحين

[Mubarak Al-Sowaidi]

السلام عليكم
والله جات في بالي فكرة تنظيم دوري بلاي ستيشن حق شباب استراليا وممكن منها مجموعة كبيرة تشارك معانا سواء من الطلبة الدراسين في قطر او خارجها المهم انهم يشاركون معانا......

هذا اللي عندي :) حاليا

[Mohammed Al-Najjar]

بسم الله الرحمن الرحيم

اول شي احب اعتذر لكم .. بسبة التاخير اللي صار .. وذلك لعدة اسباب منها انشغالنا شوي مع الجامعه وايضا ((اخوكم كان مريض شوي بعيد الشر عنكم ))

نرجع حق الافكار :)

اول شي بالنسبة حق اخونا جاسم النعمه :
الصراحه افكارك عجيبه وخاصتا فكرة المشاريع هذي وايد طيبه

بس تحتاج حق ترتييب اكثر ،، ونحتاج نعرف شنو المشاريع اللي نقدر نطرحها حق الفكرة ،، وايضا الحملات ..

بس لا تنسى انه احنا نبي نجمع اكثر عدد من الشباب معانا ،، يعني لازم نشووف المواضيع اللي تهمنا احنا الشباب اكثر والمطروحه في المجتمع ... وحتى انه احنا ممكن نتعاون فيها مع الجهات المسؤووله كلٍ في مجاله وتخصصه ...

الفكرة ممتازة جدا .. بس تحتاج مثل ما قلنا تحديد المشاريع والحملات ..


بالنسبة حق الطلعات والدوري ..
ان شاء الله نحاول نخلي البرنامج مثل ما كانوا معديين له شباب سمرنا وهو نتجمع كل اسبوعيين مرة ونسوي لنا برنامج ..

ولعب الكورة يكوون اسبوعي بأذن الله


بالنسبة حق برامج اللقاءات مع الشخصيات وايد مهم ومفيد لنا ،،

يعني ممكن نرتب مع المشايخ الموجودين عندنا بقطر او اللي يزورون قطر خلال فترة تواجدنا وهذا بأذن الله ممكن يترتب لان عندنا اخوان في استراليا لهم اتصالات مباشرة مع المشايخ وممكن يسوون لنا هالشي




بالنسبة حق باقي افكاك جاسم بتحصل الرد مالها في ردي الثاني ان شاء الله


اخوي مبارك حياك الله ويانا .. والصراحه فكرتك ممتازه وبأذن الله راح نحطها في الجدول <<< (واشرايك انت اللي اترتب لها ; ) )


وما زلنا بانتظار باقي الافكار ،، ويا ريت الشباب اللي معانا بعد يعقلوون على الافكار المطروحه ...

بانتظاركم :)

[Mohammed Al-Najjar]

بالنسبة حق افكاري ::


1) اول شي ان شاء الله راح نحاول نرتب له هو الملتقى الطلابي للطلبه الدرسين باستراليا ... طبعا هالفكرة ان شاء الله اذا تحققت ممكن تسهل علينا وايد اشياء في المستقبل ومنها ممكن انرتب حق مشروع الجمعيه القطريه في استراليا وهذ فكرة اخونا جاسم النعمه

طبعا الملتقى :: يشمل حفل تعارف للجميع ... وايضا بيكون شبه مؤتمر لناقشة هذي الافكار والبرامج اللي احنا اللحيين نطرحها ونعد لها .. وبيكون فيه عشاء ان شاء الله

طبعا الفكرة كبيرة وطموحه .. وتحتاج حق شويه شغل .. وان شاء الله نكون قدها بأذن الله ..

لنا عوده لها .. بعد ما نشوف ارائكم :)


2) الفكرة الثانيه ::

بما ان معظم اخوانا الموجوديين في استراليا او حتى المغتربيين في الدول الثانيه عندهم مهارة في فن التصوير الفوتغرافي ،،

فليش احنا ما نسوي معرض نعرض فيه هذي الابداعات الطلابيه ،، وونعرف الناس بالاماكن الحلوة اللي عندنا واللي زرناها في الولايات المختلفه

فهذي ايضا احد الاشياء اللي ممكن احنا انسويها وماتحتاج حق جهد كبير



هذا اللي عندي الحيين وان شاء الله راجع لكم ... بعد ما نشووف افكاركم اللي ممكن نطبقها ونسويها .. وننظر تعليقاتكم على الافكار :)



بانتظار ردوكم وتعليقاتكم اخواني


اخوكم : محمد النجار :)

[Mubarak Al-Sowaidi]

سلامتك يالغالي الف سلامة
وبالنسبة حق ترتيب الدوري ولا يهمك حاضرين

عندي اقتراح ثاني انه نرتب سفرة مشتركه لشباب استراليا
وناااااسة صح؟؟؟

ياريت اسمع ردودكم على هالاقتراح

[Jassim Al-Naama]

هلا مبارك
السفرة شي ضروري وفي الرزنامة اعتقد من اللحين

وان شاء الله بيتم مناقشة موضوع السفرة لما نوصل الدوحة بالسلامة :)

[Jassim Al-Naama]

افكار جديدة


( صندوق تبرعات للجمعيات الخيرية ويكون عن طريق حساب في البنك وكل طالب يطرش شوي من معاشه ولو دولار :) كل شهر للصندوق ونتبرع فيه للجمعيات الخيرية لزيادة الاجر :) )


فكرة تجميع الشباب في استراليا كل سنة في رحلة جماعية اما في اجازة شهر 4 او اجازة شهر 10 ( ممكن نسافر البلدان القريبة منا ) او تجمع ورحلة للصحاري والجبال في وسط استراليا ونكتشف هالمناطق المجهولة ) !!! :D


هاي اللي ببالي اللحين :rolleyes:

[Mubarak Al-Sowaidi]

هلا فيك جاسم والله فكرتك حلوة :) وان شالله نسمع ردود ربعنا قريب.....; )

تحياتي

[Jassim Al-Mulla]

جزاكم الله خير يا شباب على هالأفكار الجميلة

أنا أقول الأفكار بشكل عام جيدة
لكن يجب علينا أن نحدد الأفكار بالتحديد
ولو الشباب الثانيين اللي مب من استراليا يشاركونا في الأفكار لأنهم بيكونون في الدوحة في نفس الفترة اللي بنكون فيها هناك (اجازة الكرسمس)

مثلاً:
بالنسبة للدورات
أنا اشوف لو الشباب يحددون الدورات اللي يحتاجونها
مثلاً دورات دينية عن سوالف الحلال والحرام وبعض الشبهات اللي وايد ننسأل عنها من الاستراليين
أو دورات إدارية أو علمية أو في العمل الطلابي أو غيرها لأن ما في في بالي شي الحين

الصراحة أؤيد فكرة أخوي محمد النجار عن الملتقى
شي حلو أن نتعرف على باقي الشباب من باقي مدن استراليا
وبعدين تكون في زيارات بين الشباب في المدن المختلفة

طبعاً بالإضافة إلى البرامج الاجتماعية المنوعة

وفي فكرة مني ومن أخوي محمد السبيعي أن ننضم رحلة للحج اللي بيكون في بداية شهر 1
بس هالسالفة يبيلها ترتيب وايد فإذا حد يؤيد الفكرة أو ممكن يشارك يخبرنا علشان نشوف الترتيبات بعدين

وأخيرا أحب أكرر مرة ثانية على الشباب اللي من من استراليا أن لا يبخلون علينا بالأفكار والمشاركة فالفكرة (أتوقع) هي تجميع الشباب من مختلف البلدان وليس فقط من استراليا والفكرة خصصت لشباب استراليا لأن هالفترة هي إجازة الصيف لاستراليا

واسمحو لي على الإطالة

[Jassim Al-Naama]

هلا الجسمي


اي والله نحتاج افكار ومساعدات الشباب من خارج استراليا في الاراء والاقتراحات

اما عن الدورات فاشوف لو دورات نقاشية في مواضيع معينة نكوت احتماعية تكون احسن من ان المحاضر يتكلم واحنا نسمع وبس

ولو يكون ديبيت يكون احلى




اما عن رحلة الحج فهي فكرة حلوة .. بس اعتقد انها شوي صعبة لانها يبيلها ترتيب مسبق

وبانتظار الافكار من الشباب

[Jassim Al-Mulla]

جزاك الله خير أخوي جاسم على الرد

بس للتعديل
فكرة الحج كانت فكرة أخونا منصور المحمود
بس أنا كنت احسبها فكرة محمد السبيعي

وجزاكم الله خير

[Ali Al-Rumaihi]

ليش تسوون على مستواكم بس

أعتقد راح نلتقي بكم ياشباب أستراليا في عطله الكرسمس واتوقع الكل بيرجع هالسنه لأنها تصادف العيد

فنقدر نرتب برنامج مع بعض إذا بغيتوا ولا أنتوا عنصريين لأنكم في جنوب الكره الأرضيه !! ولأنكم كم سنه مابتلحقون على الصيف لا أهني ولا في استراليا لوووول

[Jassim Al-Naama]

السلام عليكم

هلا علي


في البداية .. المشروع مب لشباب استراليا بس

لكل الشباب وخاصة انه بيكون في فترة الصيف عندنا اللي مدتها شهرين ونص .. وعندكم فترة اجازة نص السن والاجازة اعتقد عندكم حوالي الشهر


اول شي

شوف ردود اخوي محمد النجار

ومنها نتعرف ونتواصل احنا الشباب المنتشريين في ربوع استراليا على بعض بشكل خاص ونتعرف على غيرنا بشكل عام ....ونساهم مع اخواننا في نشاط هذي الشبكة المباركه ..

نرجو من جميع الاخوان المشاركة والتفاعل بأفكاهم سواء كانوا طلاب استراليا او غيرهم ،، لان هذي البرامج بتكون لنا ،، واحنا اللي بنستفيد منها ،، وحلو ان احنا كلنا نتشارك فيها ونكون يد وحده



رد جاسم الملا



يرا أحب أكرر مرة ثانية على الشباب اللي من من استراليا أن لا يبخلون علينا بالأفكار والمشاركة فالفكرة (أتوقع) هي تجميع الشباب من مختلف البلدان وليس فقط من استراليا والفكرة خصصت لشباب استراليا لأن هالفترة هي إجازة الصيف لاسترال






يعني الموضوع مب بس لنا للكل ان شاء الله

واحنا بنستفيد منكم ومن خبرتكم :)

وبانتظار اقتراحاتك :D

[Hassan Al-Ibrahim]

السلام عليكم يا شباب ..

http://www.qataries.net/vb/showthread.php?t=2168

ارجعوا لهذا الموضوع وبتلقون فيه الجواب الوافي و الكافي ..

ضفنا برنامجكم الصيفي كبرنامج معتمد ضمن الخطة و إن شاء الله بنتحدث عن هذا البرنامج في الاجتماع القادم مع الطلبة ..

منتظرينكم في الدوحة :)

[Mohammed Al-Mansouri]

يعطيكم العافيه اخوي حسن

[Jassim Al-Naama]

وعليكم السلام هلا حسن



يعطيكم العافية


بانتظار نتائج الاجتماع

[Jassim Al-Naama]

بسم الله الرحمن الرحيم

بس تذكير لشباب استراليا

باذن الله بكرة ان شاء الله اول اجتماع لطلبة استراليا

والي وده يحضر ويشاركنا بافكاره ياريت يكلمني على ايميلي
عن طريق مراسلة ادارة المنتدى

وان شاء الله بخبره عن المكان والوقت وكل شي

ونتشرف بوجودكم وشوفتكم