75% من طلاب المدينة التعليمية ....إناث

[Fahad Al-Jefairi]

السلام عليكم ورحمة الله وبركاته

المتأمل في وضع طلاب المدينة التعليمية للطلاب الجامعيين باستثناء الجسر الأكاديمي

يجد ان هناك كثافة سكانية كثيرة بالنسبة للأخوات ووجود اقلية شبابية في الجامعات :p

بالنسبة لجامعة تكساس ايه اند ام فالمزيج الطلابي يكاد يكون 50% للفتيات و 50% للشباب

على عكس جامعة كورنيل وكارنيجي اللي فيها الشباب يمثلون 25% من طلاب الجامعة والبنات 75%

واذا ماحسبنا جامعة فرجينيا فالبنات في المدينة التعليمية موجودين بنسبة 3- 1 للشباب :eek:

سؤالي ..... وييين الشباب ؟؟؟

ليش الدولة تصرف وتبني في هالجامعات وتوفر هالمستويات الراقية من التعليم والشباب ما يغتنمون الفرصة؟؟؟

وخصوصا شباب قطر .... ما يبينون في المدينة التعليمية كلللش الا في تكساس ....

(في جامعتنا احن 4 شباب قطريين من اصل 42 طالب .... والدفعة الجديدة فيها 3 شباب قطريين من اصل 55 طالب :confused: )

والوضع مش احسن في جامعة كورنيل اللي في كل دفعة شاب او شابين بالكثير قطريين ؟؟

هل العيب في الجامعة ؟؟ .... ام العيب في النظام ؟؟؟

ام العيب في الشباب ؟؟ والله يجزاكم الف خير :) واسمحوا لنا على الاطالة

[Mohammed Al-Mansouri]

يعطييك العاافية فهد...

اولا متطلبات جاامعاااااتكم معقده بالنسبة للمتخرجين من الثااانويه

ثانيا...قلة التخصصات بشكل عام...اتوقع لما تنفتح كليات ثانيه عندكم بيزيد الاقبال على جامعات المدينه التعليميه

وبالنسبه لعدد البنات.... هاي شي طبيعي ومتوقع خاصه فالبدايه
لان الشاب اسهل عليه من اي بنت انه يدرس برع ويختار التخصص الي يحبه... بس البنت احسن لها انها تدرس فالدوحه

ويا فهد ترى شباب قطر موجودين :mad: ...كانا ندرس برع :(

والله يوفق الجميع ان شاء الله

[Mohammed Al-Mannai]

بسم الله الرحمن الرحيم

اخوي فهد شكلك معاني خخخخخخخخخخخخخخ :D

يمدحون مجابل الكمبيوتر في البريكات

طبعا مثل ماقالك اخونا محمد المنصوري الشباب عندهم امكانيه انهم يدرسون برى على عكس البنات

وشي ثاني لاتنسى نسبة الطالبات الى الطلاب في جامعة قطر اكبر بواااايد من 3-1

يعني هذي ظاهره طبيعيه لان عدد الاناث اكبر من عدد الذكور

[Mohammed Al-Mansouri]

وهاي ايجاابيه من ايجابيات التعدد فالزواج<<< لحد يطلع عن الموضوع

[Jassim Al-Naama]

والله فهد

اتفق مع محمد المنصوري ..


الشاب عنده فرصة الدراسة بره وهذا احنا ندرس بره ولو قبلنا في المدينة التعليمية كنا بندرس فيها


انا عن السبب بالضبط .. فمدري والله .. البنات اشطر منا هاي سبب وجيه ينقبلون في جامعات مستواهم عالي :)


واخوي انت شوف فرجينيا للبنات ... كورنيل مافي شباب قطريين يدخلونها لان الواحد بيدرس 8 سنين لين يترخج ويكون له بيت وعايلة .. الشباب يبون الطريق الاسرع والاستقرار السريع بدل الدراسة 8 سنين او الاستمرار بالدراسة طول الحياة



اما عن كارنيجي اسئل ادراة الجامعة ليش ترفض الطلاب القطريين؟؟؟؟؟؟؟؟ :confused:





وتسلم على الموضوع

وهاي ايجاابيه من ايجابيات التعدد فالزواج<<< لحد يطلع عن الموضوع


يابه بالخبرة

:)

[Mohammed Al-Subaey]

السلام عليكم ورحمة الله و بركاته

جزك الله خير اخوي فهد على طرح هذا الموضوع ...

الواضح من وجهة نظري انه في خلل من جانبين ..

الأول :
.. بعض الطلبة قد يكون غير مهتم من ناحية انه يحصل على جميع متطلبات الجامعة .. من امتحان

توفل و قبول و مقابلة.. و غيرها من المتطلبات.. فتجد ان الشاب عارف انه لو ما انقبل في هذي

الجامعة ( اخص بالذكر جامعات المدينة التعليمية) بياخذ بعثة للدراسة في الخارج عن طريق QP, الوزارة او الخارجية و غيرها من جهات الإبتعاث في الدولة او بيسجل فى جامعة قطر ...

لكن الأخوات .. في نظري بيكون لهم توجه كبير تجاه الجامعات الي في قطر .. وبيكون هناك جهد مبذول من قبلهم في التسجيل " يعني بيكون فيه حرص على التسجيل" نظراً لأن الدراسة و الحياة في الخارج قد تكون اصعب على الأخوات
** على العلم ان هناك نسبةمن الأخوات يدرسن في الخارج**
بهذا بيكون تفضيلهم للدراسة في قطر اكثر ... نتيجةً للفرص المتاحة في المدينة التعليمية
*هذا ما اشوفه و الله اعلم!!*

ثانياً:

على حد علمي... ان جامعات المدينة التعليمية تطلب من الطلاب متطلبات عالية ..
يعني تطلب درجة عالية في.. التوفل...امتحانات القبول.. المقابلة وغيرها ..

وهذا في حد ذاته يشكل حاجز بالنسبة للطالب..

تلق الطالب يقول:

" ليش اعور راسي... ادرس في جامعة قطر ولا برع ..احسلي!!"... :confused:

" ممكن ادرس نفس التخصص في جامعة قطر او في الخارج... لكن بمتطلبات اقل .. و بنفس المستوى!!" :confused:
بهذا بيكون توجه الطالب لخيار غير المدينة التعليمية.. :(

:) :) هذا رأيي في الموضوع.... و اتمنى منكم التعليق على كلامي:) :)

[Fahad Al-Jefairi]

وعليكم السلام ورحمة الله وبركاته

هلا والله المنصوري ....

شوف ياخوك النقطة الأولى اتفق معاك فيها ان المتطلبات معقدة ....لكن اللي يبي يدخل بيشد حيله وبيدخل .... ولا البنات مب احسن من الشباب ; )

واما النقطة الثانية اتفق معاك فيها لكن ما اشوف انها سبب رئيسي ...لأني اشوف كثير من المغتربين يدرسون تخصصات موجودة هنيه مثل computer science و هندسة كيميائية

المهم يعطيك العافية وبارك الله فيك ومشكور على الرد حبيبنا :)

=======================================

هلا والله المناعي ....(اشعندهم المناكيت مرة وحدة :D )

تشمممت تشممممت يالغالي ...... معليه ما نقدر نقول شي :mad: :p الله لا يبليك يا ريال .....

ولا يجيك بريك 3 ساعات .... لا تقدر ترد البيت ..... ولا تقدر تتم في الجامعة .... صارت كأنها غربة في بلادنا ....

يالله عساه خير ان شاء الله ...على فكرة احصائيات قطر تقول ان الشباب اكثر من البنات :) :)

والله يعطيك العافية

(المنصوري :تعدد الزواج !!! :eek: شششش لحد يسمعك ... انا اللي بانضرب في الجامعة مب انت :p )

اخوي الغالي جاسم النعمة

ما يحتاج نناقش سالفة البنات اشطر من الشباب ....لكن اللي يبي الشي يقدر يوصل له

وبالنسبة للطب ...قد تكون مدة الدراسة طويلة ولكن ما تقدر تسميها ضياع وقت ....بالعكس هالتخصص يمكن يكون اكثر التخصصات اللي تخدم الانسانية والبشرية :) :)

وعن جامعتنا والله ما يندرى .... قد يكون كلامك صحيح بس في مشكلة ثانية عندنا احنا ان في المجتمع ان الولد المتفوق يدخل هندسة والادارة والحاسب للضعاف وطبعا هذا شي غلط .....

يالله يعطيك العافية على الرد وشد حيلك والله يعطيك العافية :) :)

[Fahad Al-Jefairi]

اخوي الغالي السبيعي

شخبارك وعساك بخير .... والجسمي شخباره :) :)

انزين الغالي والله صراحة رايك فيه جزء كبير من الصحة وتلاقي اللي يقدم مب مهتم بحكم انه ما بتفرق وياه انه يدرس في قطاع تعليمي ثاني ....

وهالشي كان موجود ..... حتى اني كنت اسولف مع جماعة الادمشن عندنا فيقولي الريال ...يقول بعض الشباب يجيبون جزء من الابليكيشن بس ... ما يكمل المتطلبات ..... ويكون فيه اهمال من طرفهم في تقديم متطلبات الجامعة فه>ا اصلا ما ينظر لموضوعهم

اما النقطة الثانية اللي هي المتطلبات الصعبة ....اتفق معاك اخوي لكن هالنقطة سلبية ومب ايجابية

ان الواحد يفكر في ان الشغل ما يفرقون بين الجامعات ومستوى الخريجين ... ولكن لازم الواحد يطمح للأفضل .... ويكون طموحه دايما عالي .... ولا ليش يتعب روحه بعد يقدر ياخذ له كم من دورة من نيوهورايزن ويحصل له شغلة تمشيي له راتب معقول وبدون تعب ولا شي .... وفي الاخير جزااك الله خير على الرد الايجابي ...:) والله يعطيك العافية :)

[Ali Ahmed]

السلام عليكم

انا اعتقد ان السبب الرئيسي يجي من قسم القبول في الجامعات. احس انهم عنصرين تجاه القطرين في البدايه ثم عنصرين تجاه الشباب القطرين ولاتغترون فتكساس وايد فلولا ان في ناس يرصون على الادارة انها تقبل القطرين من الجنسين لكان الحال واحد وهذولا الافاضل مثل الاستاذ سامي حجيج من الجسر الاكاديمي والفاضله مريم المناعي من قسم القبول فالجامعه الي الله يشهد انهم ما قصروا ويانا

واخوي فهد اذا جاك بريك بو ثلاث ساعات حياك عندنا واذا كنا مب موجودين انزل المواقف وشغل الثلاث مكيفات الي فالمصلى ونوم العوافي ; )

[Hassan Al-Ibrahim]

بالنسبة لسؤالك :: وين الشباب ؟


أولاً: هناك مسألة يجب أن نركز عليها و هي أن عدد البنات في القطاعات التعليمية غالباً يكون أكبر من عدد الشباب فيما عدا "بعض" الدول في القطاع الخارجي.

ثانياً: في القطاع التعليمي الخارجي و خاصة الدول الغربية تجد وجود الشباب القطري أكثر من الفتيات و هذا الشيء طبيعي إذا ما أخذنا في الحسبان طبيعة المجتمع القطري. لذلك إذا ما اتيحت للطالبة أن تدرس في الداخل و في جامعة مرموقة أم تدرس في الخارج و في جامعة مرموقة أيضاً ستفضل الجامعة الداخلية "طوعاً أو كرهاً". بينما الشاب عنده عدة إعتبارات أخرى بجانب مكان الدراسة.

ثالثاً: اعتدنا في الماضي أن يكون عدد الطلبة الذكور المبتعثين للخارج لدراسة الهندسة أكبر من عدد الطلبة المبتعثين لدراسة المواد الأخرى سواءاً كانت أدبية كالإدارة و القانون و غيره أو علمية كالطب و الفيزياء و غيرها من العلوم لذلك تجد هذا الشيء منعكس على توجه الشباب القطري في المدينة التعليمية بخلاف الطالبات.


ليش الدولة تصرف وتبني في هالجامعات وتوفر هالمستويات الراقية من التعليم والشباب ما يغتنمون الفرصة؟؟؟


أنا لو اتيحت لي الفرصة ولو كانت المدينة التعليمية موجودة لفضلت أن أدرس فيها على الدراسة في الخارج و ذلك لجودة المستويات التعليمية التي تقدمها المدينة التعليمية. لكن هذا لا يمنع أن الدراسة في الخارج في وجهة نظري أفضل من نواحي أخرى غير أكاديمية. "دون ذكر لهذه النواحي"

و على فكرة المدينة التعليمية لم توجد في قطر للقطريين فقط و إنما وجدت لتكون محطة تعليمية دولية لمنطقة الشرق الأوسط و الأقصى. و في المستقبل إذا ما نجح هذا المشروع سترى المقصد من كلامي.


= = = = = = = = = = = = = = = = =


الشاهد من كلامي السابق و جوابي على السؤالين يا أخي فهد هو عدم وجود عيب بل هي مسألة تفضيل و مسألة ظروف تحيط بالطالب تؤثر على اختياراته..


بالنسبة للمتطلبات ما أعتقد أنها مستحيل الحصول عليها و لكن المشكلة تقع في الطالب نفسه فالطالب إذا ما حدد هدفه و عرف أي الجامعات سيتوجه لها و بدأ بالتجهيز من فترة مبكرة فبالطبع يستطيع أن يتعدى المتطلبات الجامعية الموضوعة ..


أخيراً شباب أم أناث المهم أنهم قطريين :) و الأهم أنهم يبيضون وجوهنا في المدينة التعليمية و ينافسون للوصول لأحسن الدرجات و القوائم الشرفية في هذه الجامعات ..

مثل أحدى الأخوات ما شاء الله عليها ورد أسمها في القوائم التشريفية أكثر من مرة .. الله يحفظها :)

[Ahmed Al-Jefairi]

السلام عليكم ورحمة الله وبركاته..

انا كتبت رد شطول...بس النت علة...شنسوي يلا نكتب مرة ثانية...ورانا شي احنا :p


هلا والله المناعي ....(اشعندهم المناكيت مرة وحدة :D )

تشمممت تشممممت يالغالي ...... معليه ما نقدر نقول شي :mad: :p الله لا يبليك يا ريال .....

ولا يجيك بريك 3 ساعات .... لا تقدر ترد البيت ..... ولا تقدر تتم في الجامعة .... صارت كأنها غربة في بلادنا ....

يالله عساه خير ان شاء الله ...على فكرة احصائيات قطر تقول ان الشباب اكثر من البنات :) :)

والله يعطيك العافية

(المنصوري :تعدد الزواج !!! :eek: شششش لحد يسمعك ... انا اللي بانضرب في الجامعة مب انت :p )



ههههههههههههههههه والله ذبحتني من الضحك يا فهد.. والله لين اتذكر شكلك في الجامعة واقارنها ويا كلامك...صج صج يضحك... بس معليه... على الاقل ويا هالكم الواحد الزيادة.. عندنا حد يلعب ويانا جوكر... ينفع بعد :p

ولا تنسى ان اخيرا بيكتمل عندنا فريق الكورة... عيل حد ياخذ ذيج النتيجة من تكساس ذيج النتيجة اللي الله سترها :p

يا ريال كله خير ان شاء الله.. (هههههه الله يقطع ابليسكم.. تعدد زوجات)

-----------------------
75%؟ صج؟ وانا عبالي اللي جامعتنا بس جذي :eek:

ياخي تكساس اظن فيها شباب اكثر من البنات ولا انا غلطان؟

ما علينا الحين..

المهم ياخوي.. انا عندي كمن نقطة... اتوقع الشباب قالوها... بس مب خسرانين شي لو كررنا :)

1- الشباب لو تبي تسالهم وشو بتتخصصون؟ بيقولون لك هندسة.. (لا ومرات بعد ما يدرون هندسة وشو... المهم هندسة.. يعني اسم مهندس) ... وهاي يدل على كثرة الشباب في تكساس..

2- الشباب بشكل عام..حلمهم الدراسة برع... مب بغرض ان دراسة... لأن الدراسة دراسة لو في قطر ولا برع... والشهادة من مثلا كارنيجي قطر وكارنيجي بيتزبرغ وحدة...
فطبعا الدراسة برع للشباب اسهل.. على عكس البنات

وطبعا انا باهد سالفة ان هاي بنية انقبلت وهاي شاب لاء او العكس..

هاي كمن نقطر قدرت افكر فيها... اسمحولي الساعة ثنتين الا ربع :p .. اسمحولي اذا طولت عليكم

السلام عليكم ورحمة الله..

[Dana Al-Kuwari]

كح مب بس الشباب الي يقدرون يدرسون برى ويختارون التخصص الي يحبونه :D ..

البنات ماكلين الجو سواء برى البلاد ولا داخل.. :D

[Abdulla Al-Nusf]

السلام عليكم ورحمة الله

أنا مع أخونا محمد على أن أحد أسباب زيادة نسبة الأخوات في المدينة التعليمية أن الأخت الأفضل لها أن تدرس في البلاد بين أهلها و أقاربها و أن الشاب عنده المقدرة على الدراسة في الخارج و لأن كثير من الشباب مثل ما قال أحد الأخوة يتخصصون في مجال الهندسة و لذلك تجدهم غالبا في جامعات ذات التخصصات الهندسية

[Abdulrahman Fakhroo]

اخوي فهد تذكر ايام البرج يوم سألنا كارنيجي "ليش البنات انقبلوا اكثر من الشباب؟" ورد علينا واحد من الفاكلتي بان... كذا... كذا... :D

اظن هاذي النقطه تعبر عن رأيي :p