كمن سوال عام عن الكليه !!! افكر ادش فيها !

[Naser Mansour]

السلام عليكم

شحالكم جميعا ..

معاكم اخوكم ناصر وراح اجي من امريكا لقطر بعد كمن يوم وعندي كمن سوال

التوفل كم يبونه .. الايلز ..؟ ... الثيا ؟

وهي دبلوم طبعا .. لازم اكمل 66 ساعه لين ماخلص؟

وهل هي معترف بها ومقبوله بالجامعات الامريكيه اذا ابي اكمل الباكلوريوس؟

هل عندهم لسته خاصه للجامعات اللي بتنقبل فيها ؟ .. لاني ودي اكمل الباكلوريوس بامريكا او استراليا

كم التوشن فيها تقريبا بين كم وكم .. وهل الدفع لسنه كامله مره وحده او ع حسب كل سمستر؟


والدراسه شلون فيها ؟ ممتعه وفليكسبل على الطلاب .. اقصد ابيها عكس نظام جامعه قطر حفظ وهالسوالف بس .. يعني هل هي تطلع طلاب في فمخهم معلومات واستفادوا.. طبعا فهمتوا قصدي

وعندي رفيج لي عربي .. وسواله هل في شركات او موسسات تعطي سكولرشيب للعرب او بس لازم للقطرين؟

المدرسين عرب او اجانب .. مع اني اتمنى انهم يكونون اجانب من بلاد غربيه

منتظر مساعدتكم لي وجواباتكم الوافيه ع اسالتي ولاهنتوا حبايبي

[Saleh Alsafran]

امممم حياك الله Naser Mansour

انا تدوني دارس فيها طبعاً عى حسابي وبقول لك الي اعرفة الجامعة من ناحية مستوي اللغة هم يسون لك امتحان اما إذا يقبلون الايلز مادري من ناحية السنة 20000 ريال تقسطها على حسب الكورسات وفيها 3 كورسات المدرسين اجانب ماشفت مدرس عربي صراحة ومن ناحية تكمل البكلريوس مافيه الي كندا او جامعتين في بريطانيا غير معترف فيها في المجلس الاعلي هاي الي عرفة وانشاء الله الاخوان يساعدونك بالتوفيق

[Mona Al-Emadi]

وعليكم السلام ورحمة الله وبركاته


الكلية تمتحن فيها حتى يشوفون مستواك، و اذكر يقبلون توفل و ايلز مادري الحين شالوضع، بس المهم ان امتحانهم مثل التوفل و يمكن أسهل بعد، و بيحتاجون بعد يختبرون الرياضيات

في جامعات الكلية متفقة معاهم حتى يكملون عندها الطلاب بكالوريس، بس تقدر بأي جامعة تكمل حتى لو مو متفقين وياهم، في ناس كملت بكندا و نايس بامريكا و معانا بالمنتدى، و اذكر متفقين مع جامعات بريطانية

الكلية فيها 3 كورسات و كلهم اجباريين،
, full, intersession, winter
بتدفع بالفل 10300 ريال، نفس الشي بالونتر
و الانترسيشن -الي هو صيفي- مجاني
و بكل الكورسات الثلاث بتشتري الكتب، مهب محسوبين من ضمن العشرة الاف

الدراسة ممتعة، و المدرسين و الموظفين وايد متعاونين، و طبعًا في منهم الشين بس الأغلبية مشهود لهم بالاحترام و حسن التعامل

و 95% من المدرسين كنديين، و بتلاقي عرب قليليييين ما يستخدمون عربي حتى برا الكلاس الا نادر

وايد من العرب و الاجانب عندنا يدرسون على حساب مؤسسة حمد، و ما أدري عن باقي المؤسسات بس هذي الي متأكدة منها 100%

[Naser Mansour]

اممم مشكورين والله ماقصرتوا وخصوصا اختي منه ماقصرتي عالرد الوافي

بس شايف في تناقضات بردودكم وشووي جينرال موب سبيسيفك او محدده مثل ما ابي

بس ماقصرتوا والبركه في باقي الاخوان

[Mona Al-Emadi]

www.cna-qatar.com

ان شاء الله فيه كل الاجوبة الي تحتاجها

[Hassan Hejji]

عليكم السلام

يا مرحبا بك اخوي ناصر

انا واحد من خريجي الدفعة الاخيرة 2008 (الدفعة الرابعة) من كلية شمال الاطلنطي، راح اجاوبك على اللي اعرفه ..

التوفل كم يبونه .. الايلز ..؟ ... الثيا ؟

ما يبون آيلز و لا توفل .. هناك امتحان قبول خاص بالكلية شبيه بالآيلز ولكن بشكل مصغر ، باللإضافة الى امتحان للياضيات ، والإمتحان مب سهل و لا يستهان به بتاتا .. على اثر نتيجة الإمتحان، راح يحطون في احدى مستويات "السبع تقريبا" لـ اللغة في الكلية و ربما الرياضيات " تاسيسي" و ربما تحصل على درجة ممتازة وتعدي "الفاونديشن" ..

وهي دبلوم طبعا .. لازم اكمل 66 ساعه لين ماخلص؟

نعم دبلوم/
يعتمد على تخصصك .. راجع موقع الكلية - لا هنت -
www.cna-qatar.com

هي معترف بها ومقبوله بالجامعات الامريكيه اذا ابي اكمل الباكلوريوس؟

ما عندي فكرة بالجامعات الأمريكية، لكن البريطانية نعم ، واذكر على سبيل المثال لا الحصر:
جامعة برادفورد
جامعة ليفربول
جامعة اكسفورد بروكس
جامعة تيسايد "ليست على لائحة المجلس الأعلى" و اغلب اللذين يقصدونها هم الموظفون وليسوا الطلاب او المتدربون ..

اذكر انه احد الشباب في المنتدى من خريحي الكلية ويدرس في امريكا الآن ، ابحث عنه في مواضيع هذا القسم وبتلاقيه ان شاء الله ..

هل عندهم لسته خاصه للجامعات اللي بتنقبل فيها ؟ .. لاني ودي اكمل الباكلوريوس بامريكا او استراليا

عندها اتفاقية رسمية مع جامعة تيسايد البريطانية وهناك اكثر من جامعة اقامت ندوات و محاضرات تعريفية مثل جامعتي ليفربول و ليدز الإنجليزيتين ، والبقية في الطريق ان شاء الله .

اتفاقية كلية شمال الاطلنطي مع جامعة تيسايد:
http://www.raya.com/site/topics/article.asp?cu_no=2&item_no=344414&version=1&template_id=20&parent_id=19

كم التوشن فيها تقريبا بين كم وكم .. وهل الدفع لسنه كامله مره وحده او ع حسب كل سمستر؟

مرة قريت في الموقع انه 20 الف ريال في السنة "السنة فيها 3 فصول" ، طبعا للي على حسابهم
اما اللي على حساب راعي او كفيل ، يدفعون عنه 30 الف ريال سنويا .. الاسعار لا تشمل الكتب الدراسية ولا مصاريف امتحان القبول و غيرهم .. طريقة الدفع ما عندي فكرة عنها ..

والدراسه شلون فيها ؟ ممتعه وفليكسبل على الطلاب .. اقصد ابيها عكس نظام جامعه قطر حفظ وهالسوالف بس .. يعني هل هي تطلع طلاب في فمخهم معلومات واستفادوا.. طبعا فهمتوا قصدي

لا تخاف
الدراسة حلوة صراحة ، والمدرسين متعاونين والقاعات الدراسية مرتبة و المبنى رائع .. طبعا الدراسة اهون بوايد و اضغط اخف بكثير من الجامعة و يدلعونك شوي أكثر في الكلية ^_^ .. بس لازم تشد حيلك اذا بغيت تجيب معدل حلو وتكمل دراستك لان الدراسة مهيب سهلة بالشكل اللي ممكن البعض يتصوره ..

وعندي رفيج لي عربي .. وسواله هل في شركات او موسسات تعطي سكولرشيب للعرب او بس لازم للقطرين؟

ما عندي فكرة بصراحة
ما سمعت بس ماعتقد

المدرسين عرب او اجانب .. مع اني اتمنى انهم يكونون اجانب من بلاد غربيه

جميع المدرسين يجب ان يحملوا الجنسية الكندية ..
و ان كان هناك بعض المدرسين من اصول عربية من لبنان و ليبيا و مصر و غيرها وقد يتحدثون باللغة العربية اذا صعب التفاهم معهم خارج الحصص الدراسية .. لكن لغة التدريس الرسمية هي الإنجليزية ..


ترجع بالسلامة ..
ان شاء الله افدتك

أخوك/ حسن حجي