منع ابتعاث البنات للخارج!!

[Nory.n.n]

السلام عليكم ورحمة الله وبركاته

:58:

سمعت انه المجلس الاعلى واللجنه الاولمبيه واي مكان يمنع ابتعاث البنات للخارج

فقط بعثات داخليه ويوم سألت ليش قالو علشان ماحد يدخل المدينه التعليميه!!!!!!

يبونا ندخل المدينة التعليميه

الحين السؤال دام جابرينا على هالاختيار الامثل

شروطهم غيروها...؟؟

ولا اهم يسهلونها من جانب ويعقدونها من جانب

يوم يقولون نبعث اي نسبه بس يجيبون قبول شي ممتاز حق برا بس طلع بس شباب

زين والبنات مالهم الا المدينه التعليميه ولا تقعد بالبيت...!!!


:13:

:13:

:13:

ياليت الي يعرف شروط المدينة التعليميه نفسها ولا غيروها....؟؟

وشرايكم بالقرار التحفييييييييييييييييييييييييييييييييييييييييييييي زي 100% :D

[Ahmed Alobaidly]

مااظن اللجنة الاولمبية بيقرورون الاتي
لان هم طالبين الجنسين

شلوون يغيرون الحين

[A.Al-mohammadi]

إختي أعتقد الموضوع فيه شيء غلط..لانه هالقرار إذا كان صحيح..بيكون قرار بدون منطق..قرار ماله داعي أبداً..:39:
وبعدين شدخل يمنعون البنات..؟؟ ومن وجهة نظري بيكون قرار ظالم..لذلك إن شاء الله يكون بس كلام..

[Nory.n.n]

انا قدمت اوراقي للجنه الاولمبيه وقالو اهم شي تحت العشرين والنسبه عاليه

انا عمري 19 والنسبه 91% وافقو وجي وتالي اتصلت لي المهندسه تعتذر

تقولي اسفه والله مافي بعثات خارجيه للبنات بس داخلي :( قسم بالله كدرتني


والريال مال اللجنه قالي هالقانون من فوق مب منا حتى المجلس الاعلى موقفينها


شرايكم الجين والي مب مصدق يتصل يسال

[Ahmed Alobaidly]

اذ الكلام صحيح فـ حرام والله في نبتا يستاهلون يدرسون برى
واكثر من الشباب بعد

الله يقدم اللي فيه الخير .. وللحين اتحفظ ع الخبر

[Nory.n.n]

محد جاوبني على سؤالي شروط المدينة نفسها ولاغيروها بناء ع هالقانون الحلووو


قطر ماتعرف تسوي شي حلو وتكمله لازم تخربه :( شي مب جددددددددددددددديددددددددددد


امحق مستقبل ناطرينه عيل دام كل شوي قانون وشروط جي

والله الجيل الجديد يتخرجون بنسب ويشتغلون محد يقدر يلومهم كلشششششششششششششششششششششششششششششششششش


:( :( :(

[Amna M. Murad]

انا سمعت نفس الخبر..
بالنسبه للجنه الاولمبيه..
بس المجلس..توني ادري..!
ولو بوقفون المفروض اوقفون بالنسبه للجنسين..
مب اطبقون لي العنصريه في عز تطورنا وتقدمنا الاكاديمي..
::
بالنسبة لشروط المدينه التعليميه..
ترى اختي كل الجامعات طاف الـ Deadline..مالها..
يعني يا ادشين الجسر..او جامعة قطر..سنه و عقب اتحولين اذا حابه..
و كل جامعه ولها معايير تختلف عن الجامعه الثانيه..
و طبعا بتحتاجين السات و التوفل او الاي سي تي و الايلز..
وانتي قولي لنا تخصصج الي تبينه او حددي الجامعه..
واحنا نعطيج المطلوب..بس بالنسبه لدرجات الامتحانات الي ذكرتها..
فما نقدر نعطيج بالضبط شيبون..نقدر نقولج هاي متوسط الدرجات..
و العمليه تنافسيه..يعني بتيبين اعلى من غيرج بياخذونج..
و الاولويه للقطريات والقطريين..

:)

[B.A.M]

بسم الله الرحمن الرحيم

شهالقانون
ماعتقد عندنا نقص بنات قطريات في المدينة التعليميه
الا في نقص شباب
وماعتقد البنت بتفكر تتغرب الا اذا تم رفض قبولها من جامعات المدينه التعليميه
وبصراحه شروط القبول مادري شلون صايره
حتى لو قررنا نقعد في الدوحة ونحول من جامعه لين جامعه ننذل
يعني لو بنت تبي تطلع من كورنيل تدخل كارنيجي يقولون لها لا مانقبل من كورنيل نبي بس طلاب جدد انزين ليش حرام يضيع مستقبل الطلاب
والمجلس الاعلى الله بالخير اي حد يطلع من كورنيل يقولون له مانعرف شنسوي فيكم ياتدخلون جامعه قطر يا النورث
عسى ماشر عقب كورنيل ادخل النورث

لو يحصل لي اروح جامعه خارجيه احسن لي لان جامعاتنا لين الحين في طور التطور والتجارب حطو تحت تجارب 20 خط
تعبت وانا اقول حق المسؤولين ياجماعه اقعدوا مع طلابكم شوفوا شنو ناقصهم شنو مضايقهم ليش يطلعون
يقولون اي صح صح لازم نقعد معاهم
عقبها .. طاف

حاولوا تعرفون السبب من هالقانون واذا تقدرون روحوا كلموهم في المجلس الاعلى واذا ماصار شي كلش كلش اشتكوا في الجرايد والاذاعه وشوفوا شيصير اكيد ناس وايد ماتعرف بهالقانون التعسفي العنصري

[Nory.n.n]

انا يوم سالت شالسبب نفس ماذكرت يقولون

علشان المدينة التعليميه من بيدخلها.................!!!!!!!


زين تبون ندخلها قوانينها صعبه مووووووووووووووت شنسوي نتم في بيوتنا نقشر بصل


ولو بنتكلم نكلم من ياربييييي الله يسامح من يحط هالقوانين والله احسه راقد مايدري عن شي يقوم يبربر شوي ويرجع ينام وياخذونه قانون


حسبي الله ونعم الوكيل

[Ahmed Alobaidly]

انا اقووول روحي الجرايد اليوم واشتكي والله واخذي معاج كم بنت
حتى لو مالهم خص المهم العدد
وخلهم يتكلمون معاج

وشووفي وش يصصيير
اختي : ترىى عادي القانون حطوه بدون دراسة او علم احد من الكبارية
نصيحه لج اشتكي
وفالج طيب

[Nory.n.n]

جريدة الرايه فاتحه اليوم...........؟؟


بليز علموني وانا عادي بروووح لانه قانون مال امه داعي

[Ahmed Alobaidly]

والله اتصلي لهم واسئلي اختي انا ماعندي اي خلفية بس
مبطلييين لين الليل

:)

[Ali Alkuwari]

بتشتكين على من بالظبط .. انتي تعرفين من ماسك اللجنه الاولمبيه

ومن اللي ماسك المجلس الاعلى

انا الصراحه مع القرار وبقوه

[Ahmed Alobaidly]

اكييد نعرف ولكن
يمكن وشنو
يمكن


الا اكييد ماعندهم علم بالموضوع
وش بيصير لو ماكان عندهم علم بالموضوع !!!!!!!!!!!
خصووصا ان التسجيل في الجسر خلص
فهمت يالغالي

[Nory.n.n]

بتشتكين على من بالظبط .. انتي تعرفين من ماسك اللجنه الاولمبيه

ومن اللي ماسك المجلس الاعلى

انا الصراحه مع القرار وبقوه

انت مع القرار لانه معاكم امكن بس يوم تتعب بالثانويه وتجيب نسبه والجامعات الي في بلادك طلباتهم وايد صعبه ماتقدر تجيبها وتحصل فرصه انك تدرس برا لغه من ضمن سنوات الدراسه يعني بعثه ويجي قرار بمنعك مني صج راح تكون مع القرار!!!!!

[Ahmed AL-Yaeeshi]

والله انا مع هالشي

ومشكور صاحب القرار

[B.A.M]

بسم الله الرحمن الرحيم

الاخوان اللي مع هالقرار ممكن تطروحون لنا اسباب قبولكم له

خلونا نشوف الموضوع من منظور ثاني يمكن تقل عصبيه الطلاب
وان عرف السبب بطل العجب

[Ali Alkuwari]

بسم الله الرحمن الرحيم
الاخوان اللي مع هالقرار ممكن تطروحون لنا اسباب قبولكم له
خلونا نشوف الموضوع من منظور ثاني يمكن تقل عصبيه الطلاب
وان عرف السبب بطل العجب

انا منظوري منظور الشرع الاسلامي اللي ما يجيز سفر البنت للخارج

انا قلت اني مع القرار .. وكل واحد يسوي اللي يبيه

يبي يسافر يبي يقعد كيفه

[M. Al-Merekhi]

خواتي و اخواني انا اشتغل في قطر فاونديشن و مع البرزيدنت و ماطلع شي بهالخصوص... يمكن هذي سياسه داخليه من قبل الهيئات المبتعثه ما ادري بس احنا من صوب المدينه التعليميه ما جانا شي رسمي او حتى سمعنا بهالموضوع.

انا اتكلم بحكم مكاني في التخطيط الاستراتيجي لان قرار بهالحجم بيطلع من الاداره العليا عندنا او عالاقل بيتعمم علينا...

نصيحه اخويه لاتتسرعون بالاحكام المسبقه ... اول شي خلونا نعرف اذا في قرار رسمي صادر من جهه معينه و بنمشي في القنوات المناسبه حتى نحاول نحط حلول مرضيه للجميع ...

موفقين جميعا ... :)

[S.J.A]

خل نتأكد من الموضوع بكره

أنا ماأتوقع إن الخبر صحيح / بالذات المجلس الأعلى ماتوقع يمنعون البنات من البعثات الخارجيه

[Ahmed AL-Yaeeshi]

انا ضد ان البنت تسافر بدون محرم

وهالايام قامت البنت تسافر بدون محرم بهدف الدراسه

وصارت الدراسه اهم شي عندها وماتخذ برأي اهل العلم

[Nory.n.n]

الاسلام كفل للمرأه حق العلم

ومحد قال بدون محرم امكن مع زوجي ابوي اخوي شعرفكم وكلن ابخص بنفسه


بس من منظور علمي احنا ندور سبب مقنع لهالقرار !!!

[Essa Al-Mansouri]

بصراحة تضايقت عند اللحظات الأولى لقرائتي للخبر, ولو أنه لم يتم تأكيده بالشكل الكافي بعد كما حصل مع سابقه. لكن بناء على الأحداث السابقة لا يوجد مانع من صحته. من منع البعثات لبريطانيا كاملة لن يتردد في منعها عن الفئة القليلة من الطالبات التي قد تختار الدراسة خارجاً في غير بريطانيا.

ماعتقد عندنا نقص بنات قطريات في المدينة التعليميه
الا في نقص شباب

بخصوص الرأي المذكور في الرد ,هذا رد ممتاز عليه.


انا ضد ان البنت تسافر بدون محرم

وهالايام قامت البنت تسافر بدون محرم بهدف الدراسه

وصارت الدراسه اهم شي عندها وماتخذ برأي اهل العلم

أما هذا الرأي فلا يتسع له صدري بالشكل الكافي.

أولاً طبعاً يجب أن يتوفر المحرم وباقي الشروط الدينية, لكن من دون أن تتغلب العادات والتقاليد على الأسس الدينية. وأتوقع بأن البعض المعني من الطالبات ليس مقصراً من هذه الناحية.

ثانياً لاحظنا عملياً بأن السفر للخارج لا يسمن ولا يغني من جوع, بالعكس يعتبر إختبار للنفس والمعدن وتقوية للإيمان. ومن نتائج التجربة أن الطالبة إذا بقت تدرس في الدوحة ممكن انها تخترب أكثر من اللي بتسافر برع تدرس (وعلى فكرة بريطانيا صارت صغيرة مثل الدوحة). بمعنى آخر, بقائها في البلاد أو عدمه لا ينبغي أن يغير فيها شيئاً يذكر.

نأتي للرأي الثالث: إذاً بعد الرد على هذه الآراء ما هي الفائدة من القرار؟

التفسير هنا مشابه لتفسير القرار الأول, وهو المفضل لدي حتى الآن.


أما أنا مثل ما تغيرت وجهة نظري بخصوص القرار اللي قبله أتوقع بأن وجهة نظري مع هالقرار ستكون متشابهة.
I am still enjoying watching. ‎
:)

[Nory.n.n]

اخبركم هذي الخطوه كانت تجربه ويوم سمعت القرار تضايقت شوي بس تالي قلت خيره وخلني ع تخطيطي الاولي بس اشوفه قرار مب عدل مولاازم نسكت عليه وقلتو اشتكي بالجريده وابشركم امس كلمتهم واليوم الشكوى انزلت


جريدة الرايه صفحه 15

هالرابط ماعرفت انسخ لكم :( الموضوع

http://www.raya.com/site/topics/article.asp?cu_no=2&item_no=361314&version=1&template_id=20&parent_id=19

بس ماتوقع راح يصير شي :)

[Ahmed Alobaidly]

منع ابتعاث الطالبات للخارج

اتصل بصفحة نبض الشارع عدد من الطالبات يشكين من قرار وقف ابتعاثهن لاستكمال تعليمهن بالخارج من قبل اللجنة الأولمبية هذا العام.
إحدى الطالبات قالت: حصلت على مجموع في الثانوية العامة اكثر من 91 % وسني لم يتجاوز العشرين عاماوهي الشروط التي تطالب بها اللجنة الاولمبية.
وأضافت:ان هناك شروطا تعسفية من جانب المدينة التعليمية لقبولهن وبذلك فان الطالبات لن يتمكنّ من اكمال تعليمهن رغم حصول معظمهن على درجات مرتفعة ومعظمهن من المتفوقات اللاتي يرغبن في اكمال مسيرتهن التعليمية, وان رفض ابتعاثهن للدراسة في الخارج سيؤثرعلى مستقبلهن العلمي ولا يتيح لهن تكافؤ الفرص مع اقرانهن من الشباب, علي الرغم من حرص هؤلاء الفتيات الدائم على التفوق المستمر سواء في الداخل او الخارج.

[Ahmed AL-Yaeeshi]

بأما هذا الرأي فلا يتسع له صدري بالشكل الكافي.

أولاً طبعاً يجب أن يتوفر المحرم وباقي الشروط الدينية, لكن من دون أن تتغلب العادات والتقاليد على الأسس الدينية. وأتوقع بأن البعض المعني من الطالبات ليس مقصراً من هذه الناحية.

ثانياً لاحظنا عملياً بأن السفر للخارج لا يسمن ولا يغني من جوع, بالعكس يعتبر إختبار للنفس والمعدن وتقوية للإيمان. ومن نتائج التجربة أن الطالبة إذا بقت تدرس في الدوحة ممكن انها تخترب أكثر من اللي بتسافر برع تدرس (وعلى فكرة بريطانيا صارت صغيرة مثل الدوحة). بمعنى آخر, بقائها في البلاد أو عدمه لا ينبغي أن يغير فيها شيئاً يذكر.

:)

اخوي اولا محد جاب طاري العادات والتقاليد احنا نتكلم من منظور شرعي


ثانيا كلامك اللي تقول فيه إذا بقت تدرس في الدوحة ممكن انها تخترب أكثر من اللي بتسافر برع تدرس غريب الصراحه

وكأن قطر دوله يعم فيها الفساد وبريطانيا دوله يعم فيها الخير يعني قاعد تناقض نفسك بنفسك

واذا نظرتك انه بقائها في البلاد أو عدمه لا ينبغي أن يغير فيها شيئاً يذكر
انا اقولك بيغير فيها كل شي لانها في غربه وبتخالط ناس يختلفون بالتفكير والمعيشه


عالعموم هذا رايي وهو مب مغير شي

[B.A.M]

بسم الله الرحمن الرحيم

اخوي
تبي تقول لي انها في المدينه التعليميه ما بتختلط مع شباب من بلدان مختلفه وما بتشتغل معاهم؟؟؟؟؟
انا اقول لك لا
الجامعات هناك نفس الجامعات هني
هناك نظامهم اصلا فري يعني يلبسون اللي يبون وغيره
لكن هني احنا نظامنا اسلامي وتعال شوف في هالجامعات العجب العجاب من لبس وغيره
ترى الدراسه هني ما تختلف الا انها اصعب

البنت تنجبر تشتغل مع الشباب لكن كل وحده عليها انها تكون محترمه نفسها
والبنت اذا تبي تخترب على قولتكم لو تحطونها في غرفتها وتحبسونها في كبتها وهي تبي تخترب بتسوي اي شي عشان توصل للي تبيه

البنت المحترمه وين ماتحطها تحافظ على نفسها وعلى سمعتها وتعرف حدودها وتخلي اللي حولها يعرفون حدودهم عدل

[Ahmed Alobaidly]

^

وكلامج عين العقل اختي
انا من رايي ان مافيها اي شي لو راحت تدرس برى مع محرم ان وجد

ومافيها اي شي

[Mohammed Al-haddad]

اليوم تأكدت من المجلس الأعلى وطلع عادي و يطرشون البنات برع

[Fahad Buhendi]

اتمنى للجميع التوفيق

ولكني انا ايضا ضد ابتعاث البنات للدراسة بالخارج

الي يحب انه يبعث اخته او بنته للدراسة بالخارج فهذا انسان حر

انا درست ببريطانيا ووجهة نظري ان البنت تدرس بقطر احسن

والله يوفقكم

[N kamal]

اتمنى بان يكون هذا القرار خاطئ

وكل انسان حر بما يفعل

سواء من يرضى بان تسافر اخته او بنته

ام لا

هذا القرار تعسفي للغايه
وفيه نظره للجاهليه

اتمنى بان يكون خاطئ
فحق الابتعاث قبل ان يكون حق للشاب او الفتاه

فهو حق للمواطن
ولا اعتقد بان الدوله قد تحرم مواطنيها من حقوقهم ؟!!

[Ahmed Alobaidly]

الخبر خاطئ فـ

قرار مثل هذا اعتقد دولة قطر او المجلس الاعلى العالي
صعب يقرره او تقرره لانها تسعى وتنادي الدمقراطية والحرية

فـ مستحيل في هالوقت او هالعصر !!

[Mohsin Al-shaikh]

السلام عليكم

والله احس فيكم..:sm68:.بس مافي اليد حيله.:_Kaboom__by_Zeraga:..وبعد معاهم حق لو كان استفتاء للبنات الغلبيه بتكون مع دراسة في داخل..صح وانا غلطان..وسبب صعوبة متابعة الاهل والخوف في زمن الغدر في أروبا.

اما في حالة ابتعاث الزوج يكون حق للزوجه اكمال درستها على نفقة مجلس الاعلى لان زوج مسؤال...اما مرافقت الخ للخت او الخت للخت ...والأب والام مرفوض .....ولي اسباب عديدة

[Mona Al-Hammadi]

هالكلام مب صحيح انا بنت خالي الاسبوع الجاي بتسافر عن طريق المجلس الاعلى بس هالقرار نزل على بعض الشركات والمؤسسات لاني قدمت ع اللجنه وبعض الاماكن وكان الجواب نفس الشي البنات لهم بس داخليه بسبب تطبيق هالنظام حديثاٌ وبعد كم سنه بيشوفون حق البنات

[Buthaina.R]

لو تبين الحقيقه

هم بالفعل حطوا الاعلان لتبني الطلبة والطالبات وابتعاثهم للخارج بس هاي مجرد شعار..
الموضوع انه القبول 95% للشباب اما النسبة المتبقية للبنات وبدون نظام ابتعاث خارجي وانما داخلي فقط..

وبعدين محد له الأحقيه بحرمان الطالبات من الدراسه بالخارج اعرف بنات وايد درسوا مع اخوانهم بنفس الجامعات او مع الزوج يعني هاي قرارات شخصيه ومحد له الحق يقرر في هذا الشأن..

وبعدين عني انا لو حصلت مكان في قطر يدرسني ماستر بالتخصص اللي ابيه او حتى مقارب لتخصص دراستي ليش اتغرب واتبهدل.. بس هاي الواقع قطر شبه خاليه من دراسات الماستر بغض النظر عن برنامج ادارة الاعمال اللي في جامعة قطر وانا مب ملزومه ادرس تخصص ماحبه عشانه في بلادي..