" المجلس الأعلى للتعليم ... والقرار المفاجئ "

[Nasser Alemadi]

السلام عليكم ورحمة الله وبركاته

مادري شاقولكم ومادري من وين ابتدي .. :14:

اليوم وبعد الانتهاء من الاجتماع الي تم في المجلس الاعلى للتعليم .. والي ظم الطلاب الي راح يدرسون في بريطانيا ..

الهدف من الاجتماع : هو تعريف الطلاب بالجامعات البريطانيه وبنظام الدراسه البريطاني وبال culture shockes والخ..

وتواجدت في الاجتماع ,, طالبه من The university of kent وعطتنا نبذه عن خبرتها بالدراسه في بريطانيا .. بالاضافه إلى مسؤوله من the university of kent ,, وبعد التحفيز الي جانا من قبلهم ..

تم اتخاذ قرار ,, الا وهو منع ابتعاث الطلاب للبرنامج التأسيسي في الجامعات البريطانيه ..

وقبول فقط الطلاب المبتعثين لل first year ..

مع العلم بوجود عدد كبير من الطلاب الي عندهم قبول الفاونديشن في بريطانيا ..

والحل الوحيد الي قدموه لنا بإن ندور على جامعات امريكيه ..

شعقبه ؟؟؟؟؟

القرار هذا ظالم بشكل كبير .. وراح يأخر الكثير من الطلبه .. ويحطم معنوياتهم ..

والمشكله ان القرار مانزل إلا بوقت متأخخخخخر ,, شذنبنا احنا يالطلاب ؟؟؟

وبعدين ماتوقع في جامعه امريكيه لحد الحين الديد لاين مالها مانتهى ..

.
.

والله امرهم عجيب .. بدال مايشجعون الطالب القطري على انه يدرس برع ويشرف نفسه ويخدم فيها بلاده ,, يصعبون علينا الامور ؟؟



بليز ياريت الي عنده اي معلومات عن جامعات امريكيه للحين فاتحه باب التسجيل ,, يعرضها لنا بالموقع .. ونكون لكم من الشاكرين ..

مع تحيات (( طلاب وطالبات متحطمييين )) :1639_11196799410:

[Mohammed Al-haddad]

أخوي هل أنت متأكد ان ما يطرشون حق السنة التأسيسية ( Foundation year) ؟

[Nasser Alemadi]

اخوي لو مو مصدق اتصل بالمجلس الاعلى واسمع الكلام منهم

ويريت الي حضروا الاجتماع يعطونا ارائهم بهذا القرار الظالم الي صار !

[Essa Al-Mansouri]

السلام عليكم ورحمة الله وبركاته


درسنا مع الطلاب من الكويت وهم يتم ابتعاثهم للتأسيسي
الطلاب من السعودية بعد تبعثهم الحكومة والشركات للتأسيسي
الطلاب من الامارات وعمان والبحرين يبعثونهم للتأسيسي
طلاب أوروبا اللي ما أنهوا 13 سنة في نظامهم التعليمي مجبورين يدخلون تأسيسي (ودرسنا معهم)
طلاب من أمريكا وكندا بعد انجبروا يدخلون التأسيسي توافقاً مع النظام البريطاني.
من الصين واليابان وكل العالم الطلاب اللي ما أنهوا الدراسة بالنظام المطلوب ما بيدخلون إلا التأسيسي
وفي بعض الجامعات مثل مانشستر مثلاً حتى الانجليز نفسهم اللي ما خذوا مواد معينة في الثانوية اضطروا يدخلون التأسيسي.

انت صادق, لكن اسمحلي بصراحة باحتاج اتأكد بنفسي من التفاصيل علشان أعرف أكمل جلسة التحلطم هذي :)

ولكل طالب ما أقول لكم إلا كملوا مشوار الحصول على قبول للجامعة والإجراءات المطلوبة وان شاء الله يكون الموضوع سوء تفاهم بسيط, لأني للحين مب مستوعب ان طلاب قطر العزيزة مستواهم التعليمي فوق ان يدخلون تأسيسي.

[Ali Al-Hothi]

السلام عليكم

للأسف اخواني عيسى و محمد ..... كلام اخوي ناصر صحيح 100%

وانا كنت بعد بالاجتماع اليوم وسمعت هالقرار بنفسي:13: ..:13:

وفي بعض الطلاب طلعوا قبل ما يذاع الخبر....(طالعين وبالهم مرتاح على اساس انهم رايحين )..


بس الحين........ Let's think forward

والله المستعان

[J.H.Al-Qahtani]

اخواني تقدرون تراسلون الادمشنز بالجامعات الأمريكيه وتخبرونهم عن وضعكم وانه مضطرين تحولون عليهم وانه فاتكم الديدلاين وجي...وهم بيساعدونكم ...وقبولهم سهل مو صعب :)

راسلوهم ولو مارحتوا شهر 9- فعندكم شهر 1...يعني ماراح تفرق كورس...وتعوضون الوقت بالصيفي

بس اتوقع الديلاين للتسجيل لشهر 1 بيسكر على شهر 8 او 9...يعني لحقوا اموركم


اشلون انقدم على الجامعات

تسوي سيرج على القوقل بالتخصص اللي تبيه وتشوف الجامعة ومتطلباتها ...او

انك تختار المنطقة وتشوف الجامعات اللي فيها الموجود باللسته...وتقدمون...

وفي حل انكم تقدمون على community college وبعدين تحولون على جامعات لو كنتوا مستعجلين على الدراسة هالخريف

او انكم تكملون لغة لمدة 3 شهور وخاصة انه امريكا يطلبون توفل ويبون 550 لطلاب الهندسة والبزنس...يعني اشتغلوا على هالموضوع بعد

الله يوفقكم

وحاضرين لكم

[Saleh Alkhulaifi]

النقطة هي .. ان المجلس مايوفر بديل للفاونديشن !!! يعني لاالثنويات توفر .. ولا البرج يوفر .. !!

[Nasser AL-Muftah]

السلام عليكم


طافني النصري ونزل الموضوع من القهر اللي فيه


المشكله في نفس اليوم قبل لا يطلع القرار يايبين جامعه تتكلم عن الفاونديشن
وبعدين القرار الحلووو والمميز الي بتخلي قطر في الطليعه ومن احسن الدول المتقدمه


يقولك لدرجه الطلاب من بعد القرار زادو من زود حبهم للقرار<<<<<مجرد قهر وتحلطم

والجسر هو البديل اذا يتخرج نقول حول 10 الف شخص و2000 يروحون بعثات

والجس يقبلون 250 والباقي شي سوون يتمنظرون



راجع من التحلطم توضيح جمال القرار :SnipeR(14):

[Mohammed Al-haddad]

أنا أبي أفهم شنو سالفتهم على أي أساس

على أي أساس

لا يكون بسبت القانون الجديد اللي طلع أن الطالب بس يجيب قبول إذا على هذا القانون فحنا ما نبي هذا القانون رجعونا على القانون القديم

ولا هم قاعدين يدفعون من عندهم اللي يدفع هي الدولة على أي أساس يصعبون و يسون مشكلة للطلاب و لا في مثل هذا الوقت على الأقل تكلموا قبلها بفترة بلغونا

جاين على نهاية السنة و طلعوا قرار

الواحد صج في حره من قلب عليهم حتى لو المشكلة ما صادتني فهي حق أخواني و خواتي

الوضع ما ينسكت عليه

و اختي ترى ما يطرشون على commuinty college الحين

ما في غير ان الطالب يطق راسه في الطوفة وينطر كورس ولا سنة كاملة علشان يدش الجامعة الله يعين الجميع

ولكن للحديث بقية أن شاء الله

[Ali Alkuwari]

حتى انا واحد من ربعي حظر الاجتماع وهو كان طالع من جامعة قطر

وعنده قبول سنه ثانيه .. قالوا له انت خذت فرصتك والدوله صرفت عليك

شدخل اذا جامعة قطر بلاش اصلا .. مادري احسهم يستهبلون

او انهم ما يبون يطرشون وايد ناس .. يعني تقليل العدد قد ما يقدرون

[Saif-Alnaimi]

الله يعينكم ..

انا عن نفسي مابغي منهم شي ..

اخذت تقاعد الحمدلله إن شاء الله ادرس على حسابي

موفقين اخواني واخواتي

[Dhoha Al Meer]

طبعا انا اليوم سمعت بهالقرار الحلو طيب هم منعوا هالشي
و ين البديل يعني بيسكتونكم في موضوع النسب ؟؟ و محد بياكلها الا طلاب المدارس المستقله و الحكومه ؟؟ مثل ماقال اخوي عيسى الثانويه في بريطانيا 13 سنه
يعني ليش بيدخلون طلاب "قطر" سنه اولى و اذا الواحد متخرج من جامعه بقطر سواء النورث او قطر قالوا انت خذتك حقك و حرام نظلم الطلاب !! ومايبعثونه
يعني شالحكمه شالهدف ؟؟
طبعا بدوا الطلاب يدورن بديل بدل مايطالبون بالبعثه .. القرار المفروض يطبق ( هو المفروض يتكنسل) السنه الجايه مو احين لان يوكس خلاص مابقى شي و يطوف الديد للين للفرست ير
يعني خريجين طلاب هالسنه وين يرحون ؟؟ وشدعوه المجلس الاعلى مايعرف هالشي و هو احتمال كبير انهم صج مايعرفون هالشي..
احين المفروض احنا نبي نرفع من مستوى التعليم في البلد ؟؟
ويوم نبي طلاب قطر يدرسون بالمدينه التعليميه ماحط لي جامعات عيال البلد مايقدرون عليها و لاتقدر الدوله تجبر الطالب ان يدخلها لان هاي معاير عالميه نفتح جامعات ممكن تقبل طلابنا او على الاقل يقدرون يكملون فيها يوم يدخلون
او يعترفون بالجامعات الي بدول الخليج يعني التعليم بالبحرين اقوى من قطر ليش مانعترف بجامعاتهم؟؟
وهالقرا ماراح يسوي غير انه يزيد الفرق بين طلاب المدارس الاجنبيه على طلاب المستقله و الحكومه .. يعني هاي مو ظلم ؟؟
مشكلتنا مانعرف نشتكي و نطالب بحقنا ويوم نشتكي نشتكي على الي يبي مصلحتنا
والله يعين اخوانه الطلاب
وماقول الا الساكت عن الحق شيطن اخرس
شكــــــــــرا

[Khalid Alhamar]

الله يعييينكم ويستر علييكم !!

لكن اتووقع انهم يبوون هالشي عشاان يقللوون النااس اللي تبتعث برع ,

ويخلوونهم يدخلوون الجامعاات اللي في قطر ,

والله أعلم

[F.H]

(( عسى أن تكرهوا شيئا وهو خير لكم ))

صح إن الواحد ينقهر وينصدم ،، بس حاولوا تحطون ألحين بدائل لكم عندكم جامعات بقطر وعندكم جامعات الأمريكية ..

التذمر ألحين مابفيدكم حاولوا تلقون حل عشان تطلعون بنتيجه تساعدكم ...

وربي يعوضكم خير

[Sultan Al-Kuwari]

ما نعرف تفاصيل القرار .. ولكن اتوقع المجلس اتخذ هالقرار لسبب سهولة قبول سنة التأسيسي في الجامعات البريطانيه واللي اساسا ما تعتبر جزء من شهادة الباكالوريوس .. فهي سنه غير مهمة جدا .. وغير انها يدرس فيها الطالب ما اخذه في الثانويه فهي عباره عن مراجعه لا اكثر .. وللاسف اغلب الجامعات البريطانيه تعطي قبول السنه التاسيسيه بكل سهوله لسبب مادي بحت .. فالقبول الذي يحصل عليه الطالب فقط للسنه التاسيسيه .. ولا يضمن له هذا القبول دخوله السنه الاولى اللي هي بدايه التخصص .. ومتطلبات قبول السنه الاولى صعبه جدا .. ففي جامعتنا مثلا علشان تحصل قبول السنه الاولى بعد الفاونديشن لازم تجيب جيد جدا في كل المواد ويختلف الموضوع من تخصص لين تخصص .. واللي يصير ان مجموعه كبيره من الطلاب يجون السنه التاسيسيه .. وبعدين ما يحصلون قبول .. ؟؟ شيسون فيتم المجلس الاعلى والملحق الثقافي يحاولون مع بعض الجامعات علشان يكملون .. وتصير السالفه صعبه .. وللاسف ان في طلاب كثير يجون السنه التاسيسيه في بريطانيا واهم ما يستحقون الدراسه برع ولا هم قدها .. مثلا عندنا شقد طلاب يجون كل سنه للفاونديشن وبعد ما تخلص السنه ما يدشون الا عدد بسيط .. ولاننسى التكاليف اللي تنصرف على الطلاب المبتعثين للسنه التاسيسيه ..
انا اشوف القرار مناسب لان الجامعات البريطانيه تستغل دولتنا بقبول من هب ودب لجلب الاموال والمبالغ التي تندفع شي مب بسيط .. وبعدين ينكبون عيالنا .. يمكن توقيت القرار خاطى .. واللي اتمنىاه بعد يستوي ان المجلس الاعلى يوفر شي بديل للفاونديشن يساعد على القبول للسنه الاولى في الجامعات البريطاينه .. فاغلب الجامعات هنا اذا الطالب ما عنده الثانويه البريطانيه او ما يسمى A-Level .. ما تقبله الجامعه في اول سنه .. يا ليت مثلا شهاده الجسر تحصل اعتراف وتصير توازي ال A-Level علشان الطالب عقب ما يتخرج من الجس يقدر يحصل قبول من الجامعات البريطانيه ..

واعتقد لو هالشي صار بيحل المشكله مع الابتعاث لبريطانيا .. وبيسهل القبول للطلاب بعد .. لان القبول للسنه الاولى مثل ما قلت صعب ..

هذا والله اعلم .. :)

[Rashid AL-Kuwari]

هم اصلا عندهم خطه من قبل
وقاعدين ينفذونها وهي
ان اصحاب النسب المرتفعه
يكملون دراستهم في الجامعات الي في قطر
اي هم جامعات المدينه التعليميه
وجامعت قطر الخ.......
واصحاب النسب النازله يبونهم
يكملون دراستهم في دول خارج قطر
وفي جامعات معينه بعد عشان جي
قبل فتره سهلو البعثات انهم خلوهم اي نسبه
بس ان الواحد يجيب قبول الجامعه ويحول عليهم
هاي الشي ريحنا وايد عشان ماينظلمون اصحاب
النسب النازله وياخذون فرصتهم في التعليم
ويثبتون نفسهم في مرحله غير عن مرحلة المدارس
معنهم اظلمونا باللسته الي مطلعينها وانه
ماكانت فيها جامعات عربيه اووووووكي
قلنا معليه بندرس اللغه علا حسابنا وبنجيب
قبول الجامعه وبنحول وقنا معليه علا اساس ان
يكونون معظم خريجين وخريجات قطر متخرجين
من جامعات على مستوا ومن دول على مستوا
بس انا الي بط جبدي شهالقرار الي ماله داعي اساساً
يعني مب لي هالدرجه
احنا مب فلاسفه ولا عباقره
يمكن يكون الواحد ماعنده امكانيه
انه يدرس الفاونديشن علا حسابه
يمكن ويمكن ويمكن الخ.....
الصراحه شي يبط الجبد

[Nasser AL-Muftah]

مشكلتهم في اعتقادهم الطالب من ثانويتهم بيتأها حق الفيرست ير هذا شي يحلمون فيه

الفاونديشن مب بس انقلش وين الكالكولاس ووين المواد الثانيه اللي حتا خريج العلميه على قولتهم احسن مدرسه في قطر ما يقدرون عليها واوقات يرسبون

انا طالب عمري ما درسته (الكالكولاس) خريج مستقله من خواني عرفته مشكلتي صح او مشكلتهم طبعا مشكلتهم
هم اللي يحطون الكتب هم اللي يعرفون احتياجات الطالب اللي بلفيت هم مسؤولين عنه هذا شي

بمعنى بسيط<<<<<<<<<<<<<<<<<<<<<<<<<<<<<<<<<<<<<<<<التعليم = تجاره

ولي عوده<<<<<<<<<<قايم من النوم يمكن حرقت او شي :ad8:

[Mohammed Al-haddad]

سؤال محتاج إلى أجابة شنو البديل و وينه ؟ خصوصاً في مثل هذا الوقت !!!!!

----------------

تكلمت مع الأدميشن مال جامعة أريزونا university of Arizona و شرحت لهم الوضع و وافقوا أنهم يساعدونا اللي يبي يطرش أوراقه يكلمني و أن شاء الله أقدر أساعده

[J.H.Al-Qahtani]

الكلام اللي قاله اخوي سلطان صحيح..

وايضا من زيارتي للمجلس الأعلى الآسبوع اللي طاف...قالوا انه صار في تلاعب واااايد من قبل الجامعات لقبول الطلبة ..يعني يكتبون لهم انهم مقبولين لسنه اولى وسنه ثانيه وجي..وهم في الحقيقة مقبولين للغة مو للفاونديشن او للدراسة الجامعية .... طبعا هاي اللي انقال لي من المجلس نفسه

وهم يبون يدزون الطلاب لامريكا وخاصة انه الكل رايح بريطانيا ....

انا لما سالت عن الماستر ببريطانيا .. " يعني ماكنت ناويه بس قلت اتطقس" قالوا لي لا.....روحي امريكا وكملي ...بريطانيا خلاص مانبي ندز احد هناك مشاكلهم اكثر من طلابهم !!!!!


----------------------------------


اخوي الحداد..يعطيك العافيه على المبادرة


وترا مثل ماقلت في ردي السابق...الجامعات الأمريكية قبولها سهل والتعامل معاهم اسهل.....ويعطون كذا اوبشن للواحد...يعني حتى لو ماجبتوا المتطلبات عندهم...[يقولون لكم الحلول الأخري ...

[Nasser Alemadi]

محمد الحداد ..

الله يبشرك بالخير اخوي .. انا راسلت اريزونا لكن للاسف ماوصلني الرد ..

ياليت اقدر اتواصل معاك عشان اعرف طريقة التسجيل .. او اني ابعث لك اوراق الشباب احسن ؟؟ ..

بإنتظار ردك

[Hassan Al-Ibrahim]

هناك توجه بتوجيه الطلبة لأمريكا وهذا ليس على مستوى المجلس الأعلى للتعليم فقط ولكن على مستوى جامعة قطر ومؤسسات أخرى أيضا

لا يحق لأي شخص أن يوجه أي طالب أو يجبره بطريقة غير مباشرة على اختيار الجامعات الأمريكية وتحديد خياره بها

لماذا لا تكتب مقالة وتنزل في الجريدة عن هذا الموضوع لأنها قضية رأي عام؟

أنا مستعد أساعد في كتابة المقالة بس محتاج مجموعة من الشباب المتضررين بالموضوع ونروح ننزل مقالة

:)

[Mohammed Al-haddad]

أخوي ناصر كلمني على الخاص (طرش لي رسالة خاصة )

[Mohammed m. Bujassoum]

الصراحه موضوع كبير ومحير,,

اوكي اذا قلنا ان الدولة تبي توقف الاستغلال الي يصير من قبل الجامعات البريطانيه,,

شالحل؟؟؟؟ الكل يعرف ان معظم اذا ماكانت كل جامعات بريطانيا ماتمنح الطلاب قبول الفيرست يير الا بعد مايحتازون الفاونديشن!!

طيب مثل ماقالوا الاخوان الجسر, الجسر مب معترف فيه في جامعات بريطانيا الا جامعه او جامعتين توهم السنه اعترفوا بالجسر ( سوانزي وعلى ما اظن جامعه ثانيه بعد). خل نفترض ان هالشي ممتاز وبداية جيده لتعديل الوضع,,

اوكي لو بنرجع حق كلام اخوي "راشد الكواري" والا انا معاه 100% ان المجلس يبي يبعث الطلاب المتفوقين لجامعات المدينه التعليمية, واصحاب النسب المتدنيه للدراسة خارج قطر,,

انزين الحين اذا واحد جاب نسبه متدنيه ماراح يدخل الجسر, لانه هم بعد لهم شروط ( فوق الـ 80% ) في هالحاله الطالب شيسوي!!!!

هنيه المشكلة, هالفئة من الطلاب اكثر ناس بينظلمون من القرار,

الحل من وجهة نظري,,

اذا المسألة مسألة حصول تلاعب من الجامعات البريطانية, ليش مايكون في حرص ومتابعه من قبل المجلس على الاجراءات المالية الي تصير, يعني هم الحين يدفعون الفلوس بس جي بدون مايتأكدون من السبب لدفع هالمبالغ او يتحققون من مصداقيه هالسبب!!!

شي غريب الصراحه والله يعينكم,, وانا اضم صوتي لصوت اخوي "حسن الابراهيم" واقول نزلوا مقالة فالجرايد عن هالموضوع ولاتسكتون, راجعوا المجلس عشان تشوفون حل حق هالمشكله.

[R. Al-Harami]

[CENTER]هناك توجه بتوجيه الطلبة لأمريكا وهذا ليس على مستوى المجلس الأعلى للتعليم فقط ولكن على مستوى جامعة قطر ومؤسسات أخرى أيضا

لا يحق لأي شخص أن يوجه أي طالب أو يجبره بطريقة غير مباشرة على اختيار الجامعات الأمريكية وتحديد خياره بها

لماذا لا تكتب مقالة وتنزل في الجريدة عن هذا الموضوع لأنها قضية رأي عام؟

أنا مستعد أساعد في كتابة المقالة بس محتاج مجموعة من الشباب المتضررين بالموضوع ونروح ننزل مقالة

:)




بالفعل اخوي حسن صحيح كلامك ،،

الطلاب مش مجبرين انهم يدرسون في دولة معينه ،، والتعليم مكفول للطالب القطري والدولة لازم توفره له وتيسر له السُبل مش تصعب عليه وترغمه على قرارات دون بدائل قد تكون عشوائية ولا تخدم الطالب !!

اذا على المقال مومشكلة انا عن نفسي ممكن ايضاً اساعد بالكتابة وانشرها في جريدة الراية اذا حابين لأن في تجاوزات في المجلس الأعلى ،، خصوصاً ان اكثر من شخص حاصل على قبول من الجامعات ومستواه يأهله لكن الرد يكون : ( انت راح تخسر الدولة ) !!

مثل ما ذكرت اخوي حسن ،، ياليت لو تكتبون مقاله ويرفق معها اسماء الطلاب ،، ليتم نشرها في احد الجرائد القطرية ،،

فيُفترض وضع بدائل اخرى للطلاب القطريين ،، لأن

الجامعه الحكومية الوحيدة في قطر هي جامعة قطر ،، وكثير من الطلاب قد فُصلوا منها او تم طي قيدهم لسبب او لاخر ،،

جامعات المدينة التعليمية مستواها فوق مستوى كثير من طلاب وخريجي المدارس العربية والمستقلة ايضاً ،، فكثيراً من الطلاب المتقديمين لها تم رفضهم خصوصاً وان الطاقة الاستيعابية محدودة جداً لتلك الجامعات والتخصصات ايضاً محدودة !!

جامعات الدول العربية غير معترف فيها

جامعات المجلس الأعلى وان درس الطالب على حسابه الشخصي فالسنة الواحده الدراسية تكلف على الاقل 100 الف ريال غير النفقات الأخرى مثل السكن ، الملبس ،، الخ ...

ولنفترض ان الطالب سوف يدرس على نفقته الخاصه ،، فالمجلس الأعلى لن يدعمه مادياً ،، ولو حتى على الأقل بمصروف شهري ،،

فأين البدائل يا المجلس الأعلى للتعليم ؟؟


الجدير بالذكر ان الباب الثاني من الدستور القطري والذي يختص بالمقومات الأساسية للمجتمع ومن المادة رقم 25 ينص على التالي :

ا لتعليم دعامة أساسية من دعائم تقدم المجتمع، تكفله الدولة وترعاه، وتسعى لنشره وتعميمه.

اعتقد الكل موقع على الدستوربالموافقه ونعم فالأجدى ان يتم العمل به وتطبيقه !!

الله يوفقكم ان شاءالله ،، ويكون بعونكم ،، والله يعينكم على المجلس الأعلى ومن فيه

[Hend.AL.M]

انا من زمان ادري عن هالسالفه :/

ان المجلس مايبعث لفاونديشن !!! واول مره رحت فيها اسأل عن الجامعات

قالولي عن هالشيء ! مانبعث للغه .. ولازم استلم قبول غير مشروط عشان يعطوني بعثه

اخوي علي الكواري .. انا اللي اعرفه ان المجلس مايبعث طلااب ماخذين بعثات من قبل

مثلا من البترول للأطلنطي لكن جامعة قطر جامعه وطنيه وببلاش !!

:/ لازم تتأكد من الموضوع :l

[Nasser Alemadi]

ياجماعه طلاب الثانويه العامه ماعندهم مشكله لان هم شي طبيعي ماراح يقدرون اييبون قبول الفاونديشن من الاساس .. إلا كميه تنعد عالاصابع ..والباقي كلهم راح يدخلون الجسر ..

المشكله هم خريجين الجسر الاكاديمي الي وين بيطقون براسهم ؟؟؟

وبعدين اي جامعات مدينه تعليميه الي راح تقبلنا الحين ؟؟

الديد لاين خلص بشهر 2 و3 ..

.
.

يعني انا مستغرب حتى استخسروا على نفسهم اننهم يعطونا قائمه بلستة الجامعات الامريكيه الي الديد لاين للحين ماخلص فيها ؟؟؟

يعني هذي يمكن تكون مساعده تافهه لكن بتفيدنا وايد ..

احنا الحين ظايعين مب عارفين حتى وين بنقدم ..

ماقصر اخوي الغالي محمد الحداد معانا وراح يساعدنا انشالله مع جامعة اريزونا وانشالله مايصير إلا الخير ..

.
.

واقتراح اخوي حسن الابراهيم وايد حلو وانا انشالله بكلم الشباب كلهم وبنرد عليك ..

.
.

وبخصوص اختي هند انتي فاهمه الموضوع غلط ..الفاونديشن يير مايعتبر كورسات لغه ..

وبعدين قبول الفاونديشن اصلن عباره عن قبول غير مشروط وماتحصلينه إلا ب500 في التوفل والمجلس من يومهم يبعثون له ... لكن القرار توه امس ننازل ..

السموحه يمكن قمت اقط خيط وخيط لكن بالي مشتت ومب قادر اركز ..

.
.

[Eid Al-mohannadi]

هناك توجه بتوجيه الطلبة لأمريكا وهذا ليس على مستوى المجلس الأعلى للتعليم فقط ولكن على مستوى جامعة قطر ومؤسسات أخرى أيضا

لا يحق لأي شخص أن يوجه أي طالب أو يجبره بطريقة غير مباشرة على اختيار الجامعات الأمريكية وتحديد خياره بها

لماذا لا تكتب مقالة وتنزل في الجريدة عن هذا الموضوع لأنها قضية رأي عام؟

أنا مستعد أساعد في كتابة المقالة بس محتاج مجموعة من الشباب المتضررين بالموضوع ونروح ننزل مقالة

:)

تسوي خير والله :1639_11196799410:

[Hassan Al-Ibrahim]

:)

أين المنطق في القرار؟

الهيئة تدفع لتعليم الطالب في الجسر الأكاديمي اللي هو مب معترف به في أي جامعة في العالم لمدة سنتين لكن ما يدفعون للسنة التأسيسية في بريطانيا

الدولة ممكن "" تخسر "" على الطالب في المرحلة التأسيسية في جامعة قطر لكن مب ممكن "" تخسر "" عليه في بريطانيا

الهيئة والشركات ممكن تبتعث الطالب لدراسة 4 سنين أو أكثر للدراسة في كلية شمال الأطلنطي للحصول على دبلوم لكن مب
ممكن تبتعثه للدراسة في بريطانيا لمدة تساويها للحصول على بكالريوس

إلى متى التعامل مع الطلبة بدون منطق؟

[Abdulrahman Fakhroo]

هو فعلا قرار ظالم جدا جدا وخاصه بان القرار نزل في وقت متأخر

لكـن حسب الي فهمت من القرار بأن الطالب يذهب اول سنة على حسابه ويأخذ تأسيسي

واذا انقبل في الجامعة يسجل على حساب المجلس لمدة الثلاث سنوات الدراسية في التخصص

لكن سنة التأسيسي لا تعوض من الدولة، وتقريبا راح يكلف الطالب الدراسه على حسابه في بريطانيا للسنة الاول في التأسيسي تقريبا 150 ألف ريال قطري (الدراسه+السكن+الأكل)

ومثل ماقال اخوي سلطان، الاسباب قد تكون بسبب الغلاء المعيشي في بريطانيا، وخاصه في طلاب يدرسون التأسيسي لكن ماينقبلون بالنهايه وهذا يكلف الدولة.

أضع صوتي مع قرار حسن، يجب عرض الموضوع على الجرائد وابلاغ الناس بمشاكل الطلاب

وشكرا

(يبيله مظاهره على الكورنيش مع لوحات مكتوب عليها "كفـــايه" خخخخخخ)

[Abdulla H.Al-Hajri]

السلام عليكم ورحمة الله وبركاته .... بصراحه هاالقرار ظالم وقووووى:1639_11196799410: وعسى ماشر كل يوم يطلعون لنا بقرار جديد ولين متى بتم هالقرارات تخبطيه يعنى ماسووا دراسات ولاشى بس جى حطوا القرار بصراحه أنا اشوفه ظالم والمشكله ان الخاسر الاول والاخير احنا احنا اللى بنأكلها شنسوى وين نروح ؟؟؟؟ يعنى أنا أشوف انهم حطوا القرار بدون مايشوفون بديل وماأحس أن البديل بيكون الجسر لان مب كل الطلاب بينقبلون فى الجسر وثانى شى فى ناس نسبهم نازله شيسوون .... هم يوم قالوا أنهم لغوا االابتعاث للسنه التأسيسه وبس أكتفوا للسنه الاولى هاى معناته ان اكثر الطلاب بييييييييييرسبون ومحد بيعدى الا 4 او5 والبقيه لازم يعيدون.وأنا اضم صوتى معاكم أن المشكله تنعرض فى الجرايد وأنا مستعد أنى احط أسمى... وبصراحه فى كلام وايد ودى أقوله بس أنا حبيت أفضفض فضفضه سريعه من القهر اللى فى قلبى... وللحديث بقيه .... وأترك لكم المجال تعبرون ويعطيك العافيه أخوى ناصر ولايهونون البقيه:clap:

[Essa Al-Mansouri]

الله يعييينكم ويستر علييكم !!

لكن اتووقع انهم يبوون هالشي عشاان يقللوون النااس اللي تبتعث برع ,

ويخلوونهم يدخلوون الجامعاات اللي في قطر ,

والله أعلم

من أفضل التفسيرات بالنسبة لي للحين.

ما نعرف تفاصيل القرار .. ولكن اتوقع المجلس اتخذ هالقرار لسبب سهولة قبول سنة التأسيسي في الجامعات البريطانيه واللي اساسا ما تعتبر جزء من شهادة الباكالوريوس .. فهي سنه غير مهمة جدا .. وغير انها يدرس فيها الطالب ما اخذه في الثانويه فهي عباره عن مراجعه لا اكثر .. وللاسف اغلب الجامعات البريطانيه تعطي قبول السنه التاسيسيه بكل سهوله لسبب مادي بحت .. فالقبول الذي يحصل عليه الطالب فقط للسنه التاسيسيه .. ولا يضمن له هذا القبول دخوله السنه الاولى اللي هي بدايه التخصص .. ومتطلبات قبول السنه الاولى صعبه جدا .. ففي جامعتنا مثلا علشان تحصل قبول السنه الاولى بعد الفاونديشن لازم تجيب جيد جدا في كل المواد ويختلف الموضوع من تخصص لين تخصص .. واللي يصير ان مجموعه كبيره من الطلاب يجون السنه التاسيسيه .. وبعدين ما يحصلون قبول .. ؟؟ شيسون فيتم المجلس الاعلى والملحق الثقافي يحاولون مع بعض الجامعات علشان يكملون .. وتصير السالفه صعبه .. وللاسف ان في طلاب كثير يجون السنه التاسيسيه في بريطانيا واهم ما يستحقون الدراسه برع ولا هم قدها .. مثلا عندنا شقد طلاب يجون كل سنه للفاونديشن وبعد ما تخلص السنه ما يدشون الا عدد بسيط .. ولاننسى التكاليف اللي تنصرف على الطلاب المبتعثين للسنه التاسيسيه ..
انا اشوف القرار مناسب لان الجامعات البريطانيه تستغل دولتنا بقبول من هب ودب لجلب الاموال والمبالغ التي تندفع شي مب بسيط .. وبعدين ينكبون عيالنا .. يمكن توقيت القرار خاطى .. واللي اتمنىاه بعد يستوي ان المجلس الاعلى يوفر شي بديل للفاونديشن يساعد على القبول للسنه الاولى في الجامعات البريطاينه .. فاغلب الجامعات هنا اذا الطالب ما عنده الثانويه البريطانيه او ما يسمى A-Level .. ما تقبله الجامعه في اول سنه .. يا ليت مثلا شهاده الجسر تحصل اعتراف وتصير توازي ال A-Level علشان الطالب عقب ما يتخرج من الجس يقدر يحصل قبول من الجامعات البريطانيه ..

سلطان, محاولتك لإبراز بعض التفسيرات جيدة, لكن اسمحلي أعترض على ما كتبته, لأنه بصراحة ما أقنعني بالمرة.

سهولة السنة التأسيسية؟ من قال هالكلام؟ ما أعتقد بأنها سهلة, ولا أعتقد بأنها أسهل من الثانوية. طبعاً ما أتكلم عن طلاب "العلمية" اللي تعتبر "السنة التأسيسية لديهم مراجعة" ولو أني للحين أسمع شكاويهم بخصوص الMechanical مثلاً. ومب متأكد عن ليدز يمكن التأسيسي سهل وماله داعي, لكن عن مانشستر ما أعتقد بهالشي :)

ما تعتبر جزء من شهادة البكلريوس؟ تقصد انها ما تدخل في المعدل؟ السنة الأولى أيضاً لا تدخل بالمعدل في أغلب جامعات بريطانيا, وكل ما يحتاجه الطالب هو النجاح فيها مثل ما كان يفعل في التأسيسي. السنة الأولى أيضاً مالها داعي؟

قبول التأسيسي سهل؟ هذا الكلام ينطبق على البعض وليس الكل. في جامعات تقبل بال4.5 وفي جامعات ما تقبل إلا بال7.0 . وبعدين حتى لو قبول التأسيسي سهل, المهم عندنا هو تأهيل الطالب للسنة الأولى. الجامعة تقول للطالب قبل دخوله للتأسيسي "انت جيب الدرجات المطلوبة وأضمن مكانك في الجامعة". الجامعة ما بتستمر بقبول طلاب التأسيسي إذا ما كانوا قادرين على السنة الأولى "ومتطلباتها".

حتى لو متطلبات السنة الأولى صعبة والتأسيسي سهل, هدف الطالب هو الحصول على المتطلبات وليس مجرد إنهاء السنة التأسيسية. الطالب اللي ما يحصل قبول السنة الأولى مشكلته, ليش ما شد حيله في السنة التأسيسية؟ تذكروني بسالفة الناس اللي خرجوا من الجسر ويتشكون انهم ما استفادوا. العيب في الطالب وليس في التأسيسي. حتى المجلس الأعلى والملحق مب ملزومين وقتها انهم يراكضون للطالب, إلا إذا تطوعوا لذلك.

بخصوص اللي يدخلون السنة التأسيسية وهم مب قدها, ترى هالموضوع فكرت فيه من قبل وطلعت بكثير من النتايج أهمها ان ترى "المجلس الأعلى ما بعثوا حد غبي لبريطانيا". وإذا كانوا غير مؤهلين, شلون دخلوا السنة التأسيسية من الأساس, أو شلون الجامعة قبلتهم؟ اسمحوا لي 5.5 ايلز أو 530 في التوفل ما يجيبونها الأغبياء, فما بالكم باللي أعلى منها؟ أنا أتكلم بتركيز على السنين السابقة اللي كانت فيها هذي شروط البعثة. الطالب اللي مستهتر وماله خلق يدرس هذا قصته ثانية, لكنه يضل مب غبي ولو يشد حيله يقدر يدخل المعلومات المستعصية في راسه. وبعدين إذا الطالب مب كفو ليش الجامعة تقبله؟ الجامعة قبولها مب بالبساطة المذكورة, ولو شافت الجامعة تدني نسبة طالب ما بتضطر تقبله, ونسمع من الأدمشن عن ناس تم رفضهم للتأسيسي.

الكلام ما دخل راسي لأنه مب واقعي. وإذا حد يشوف انه واقعي ياريت يعطيني مثال على طالب دخل في بريطانيا السنة الأولى 1st year مباشرة من الثانوية, وياريت لو الثانوية حكومية مب "أجنبية". أنا مامر علي هالشخص للحين فيمكن أنا مب عايش في العالم, فإذا مر عليكم هالشخص خبروني :35ed4ea2fc:


وايضا من زيارتي للمجلس الأعلى الآسبوع اللي طاف...قالوا انه صار في تلاعب واااايد من قبل الجامعات لقبول الطلبة ..يعني يكتبون لهم انهم مقبولين لسنه اولى وسنه ثانيه وجي..وهم في الحقيقة مقبولين للغة مو للفاونديشن او للدراسة الجامعية .... طبعا هاي اللي انقال لي من المجلس نفسه

هذي أتوقع سالفة ثانية ومالها دخل بالسالفة الأولى. المجلس الأعلى عارفين بالضبط وين بيروح الطالب سواء تأسيسي أو سنة أولى, وحتى لو شكوا أو "وصلهم قبول بالفوتوشوب" يقدرون بشكل احترافي انهم يتواصلون مع الجامعة ويتأكدون من التفاصيل. أما مسألة ان المجلس الأعلى مساكين وينقص عليهم ما أعرف أصرفها. هم مرت عليهم خبرات من هالنوع عموما وعالجوها ولهذا السبب أتوقع بأنهم محتاطين بشكل جيد ولا يحتاجون حد يعلمهم شغلهم.



أما بالنسبة لموضوع الجريدة, أنا أشوف الموضوع يحتاج بحث وتجميع ايجابيات وتفسيرات محتملة للقرار.
وشرايكم في مشروع وطني الحبيب؟ أنا شخصياً أحبذ هالمسار وأتوقع له نتائج.
أما إذا بيكون المقال في الجريدة فضروري عدد كبير من الطلاب يساهمون فيه. لازم ينزل الكلام بقوة الطلاب مجتمعين.

ينقل الموضوع لمنتدى الدراسة بالخارج + يثبت لمدة من الزمن..

[Mohammed Al-haddad]

كلامك صح 100% يا أخوي عيسى

الله يعين الكل وأن شاء الله ما تم جريدة ولا برنامج إلا بتكون الشكوى فيه

لازم يطلعون حل للمشكلة اللي مالها أساس من البداية

[Nasser Alemadi]

نقاط حلوه انذكرت بكل رد من ردود الطلبه ..

واعتقد لو بناخذ نقطه او نقطتين من كل رد .. راح نطلع بمقاله ولا اروع ..

الوعد بكرا ياشباب نتجمع عشان نتفق بخصوص المقاله + The University of Arisona

والله يكتب الي فيه الخير انشاءلله ..

[Ali Alkuwari]

ذكروني بنكبة دفعتنا المنحوسه 2003 .. الظاهر بترجع مره ثانيه بس هالمره 2008

[mohammed al-hashimi]

قرارا متأخر,, حطم آمال الكثيرين
الى متى سيفتقد المحلس الاعلى للتعليم جانب حرية رأي الطالب ؟والى متى سيضل يحكم بدكتاتورية متجاهلا رأي الطالب؟
اين رأي وحرية المجالس الطلابية ؟ ام هي مجرد (بربقندا) اعلامية ؟

قرار جديد جاء متأخرا في وقته ووضع الطالب القطري في حيرة من امره امام مفترق من الطرق البديلة والغير مجدية!!
في يوم الـخميس الموافق 12/6/2008 , اصدر المجلس الاعلى للتعليم قرارا مفاجئا ينص على الغاء ابتعات الطلبة للسنه التأسيسية في جميع جامعات المملكة المتحدة. كان لهذا القرار صدى مسموع من الرأي المعارض من عدة جوانب, لاسيم من جانب مئات الطلاب المتظررين الذين ليس لديهم اي خيار آخر سوى الوقوف بحيرة وتمعن دون معرفة مصير مستقبلهم, جاءهذا القرار في وقت حرج ومتأخر محطما آمال العشرات من الطلاب وبدون ان يفكر المجلس الاعلى بمصير هؤلاء الطلاب المتميزين. أهكذا يكافئ المجلس طلابه المتميزين؟ ام هي طريقة فاشلة لمحاولة الوصول الى القمة ؟
هل فكر المجلس الاعلى بمصير الطلاب؟
والاهم من ذلك..
من يحاسب المجلس الاعلى قراراته الظالمة وعلى اهماله للطالب المبتعث؟؟
بالقطري الفصيح..
شباب لين متى المجلس بيتم يعاملنا جي
والله الي يحز في الخاطر ان حتى الموضفين اللي يشتغلون هناك يتعاطفون معانه ويقولون ان هم بنفسهم مب مقتنعين ببعض القرارات

كل اللي ابي اطرحة في هالموضوع
لين متى يا المجلس (واقصد ناس معينين هناك) يتمون تلعبون في حسبة الطلاب بقراراتكم
وليش ما تاخذون راينا احنا كطلاب ؟؟
وين حرية الراي يا المجلس؟؟؟
ومن عطاكم الحق بالتحكم في المكان اللي الطالب يبي يدرس فيه؟؟؟
والاهم من هاي
من عطاكم الحق انكم تقولون "بتخسرون الدولة" دام حتى دستورنا ينص على التعليم ودعمة مثل ما قالت اختي في الرد فوق
اذا على قالتكم بنخسر الدولة .. اشلوون قانونكم الجديد يقوول عادي اي واحد يايب اي نسبة يروح برطانيا ؟؟ لي يعني انتو خايفين ان الي ياب فوق ال90 او بمعنى آخر المتميزين واللي يايبين نسب عالية يفشلون ويخسر الدولة على قالتكم وما حطيتو في بالكم ان اللي يايب شي وخمسين او شي وستين احتماال كبيييييير انه يفشل في برطانيا ؟
لان في جامعات في برطانيا (وبدون ذكر اسامي) تعطي قبول بأي نسبة وحتى بدوون آيلز
ترى يا الربع كل المشكلة ان القرارات اللي تطلع تطلع من ناس ماعندهم خبرة بالدراسة بالخارج مع احترامي للكل
عشان جي لازم المجلس يسأل الطلاب اللي برع عن اهمية السنة التأسيسة ويسألون الطلاب اللي في قطر وياخذون راي الكل قبل قبل ما يحطون هالقانون
المهم ..
انتو ما قصرتو شباب
يعطيكم الف عافية
بس لازم نسوي شي اقوى
والكلام ما يكفي
واسمحو لي على الاطالة ..

تحياتي

[Nasser Alemadi]

مادري شاقولك والله يامحمد ,, كلامك عالعين والراس ..

لكن مثل ماذكرت انت ,, من الي يحاسب المجلس الاعلى ؟؟ محد ..

لو صج في احد يحاسب المجلس الاعلى .. او من الاساس ادارة المجلس الاعلى اداره ممتازه .. جان ماصار التلاعب من قبل جامعة برادفورد ..

التلاعب الي صار منهم .. انهم طرشوا قبول الجامعه لعدد من الطلبه مقابل مبلغ مالي معين ,, حتى لو الطالب ماعنده ايلتس او نسبه ..

يعني القانون انقلب ضدهم لوول خلها على الله بس ..

يبون يسدونها بويوهنا بأي طريقه ولا جنه احن عيال البلد .. واحنا الي راح نخدمها بكرا ..

.
.

[Fatma A.Al-shemary]

والله حيرونا احس اني بستخف الصراحه كل يوم اغير رايي مايصير جي الشكوى لغير الله مذلــه..

الله يكون بعونا ..

فاطمـه الشمـري:-

[Khalid AL-enazi]

يا شباب والله العظيم قهر انا عندي قبول من اربع جامعات وكلهم قبول حق فاونديشن وامس كنت فالمجلس الاعلى واكدوا لي الخبر ,وقال لي واحد هناك ما فيه الا انك تجيب قبول حق الFirst year او تلحق على بعض الجامعات الامريكيه ولا تروح عن طريق شركه .زين انا جايب فالايلتز 6 ونص تعتقدون في جامعات ممكن تعطيني قبول حق الفيرست يير واذا وصلني القبول هل في مشاكل بالدخول باول سنه على طول مع انه انا افضل الفاونديشن بكثير لكن بعد هالقرار مدري شسوي بصراحه .
برايي ما فيه الا سببين لهذا القرار يا اسباب ماديه اول يحاولون يقللون من الطلاب المبتعثين واتمنى انهم يشوفون حل بصراحه .

[Essa Al-Mansouri]

زين انا جايب فالايلتز 6 ونص تعتقدون في جامعات ممكن تعطيني قبول حق الفيرست يير واذا وصلني القبول هل في مشاكل بالدخول باول سنه على طول مع انه انا افضل الفاونديشن بكثير لكن بعد هالقرار مدري شسوي بصراحه .

أنت قلتها بنفسك, الفونديشن ضروري.

اليوم بهالخصوص قالوا لي شباب عن واحد انقبل في سنة أولى بدرجة 4.5 الأيلز في أحد الجامعات.
جوابي كان مباشرة " ترى أنا أقدر أجيب لكم يا شباب قبول في جامعة مانشستر سنة أولى بهالدرجة, لكن هذا وجهي إذا نجحتوا !!"

أنا مب متأكد إذا المجلس الأعلى يقبل انك ترسب سنة على حسابهم مثل باقي الشركات (اللي تقبل إعادة 3 سنين), لكن إذا يجوز أنصح الطلاب ينقبلون سنة أولى ويرسبون ويعيدون السنة جنه العيد كأنهم دخلوا سنة تأسيسي:D

[Mariam Al-Emadi]

معقوله !!
انا ابوي سلمهم اوراق القبول "غير مشروط" وكل شي قالوا يبون بس النسخه الاصليه من الايلز
محد قال الفاونديشن على حسابي ! توه من اسبوع يمكن

[Ahmed Al-Ali]

السلام عليكم ورحمه الله وبركاته

بالأمس اتصلت بهيئه التعليم العالي قسم الإرشارد الأكاديمي وسألتهم سؤالين:

السؤال الأول: ماهي اسباب اتخاذ هذا القرار؟
الجواب: لاتوجد لدينا أي اسباب هيئه التعليم العالي هي هيئه تنفيذيه فقط لاغير ، والاوامر تُصدر من المجلس الأعلى للتعليم.

السؤال الثاني: ما هو البديل للسنه التأسيسيه في بريطانيا وكيف يستطيع الطالب الحصول على قبول السنه الاولى للجامعات البريطانيه؟

الجواب: واحد من الحلول هو الجسر الاكاديمي حيث ان هناك جامعات بريطانيا تعترف بشهادة الجسر الأكاديمي
أو ان الطالب يدرس السنه الـتأسيسيه على نفقته الخاصه ومن ثم يأتي بقبول السنه الاولى ويتم ابتعاثه عن طريقنا
أو ان الطالب يدرس في دول ثانيه مثل استراليا وامريكا وكندا.

الله يعين كل من تضرر بسبب هذا القرار

أطيب تحيه..
أحمد العلي :)

[Mariam Al-Emadi]

عيل السالفه صج :s
ندرس على حسابنا ولا مذلتهم !!!

[Eid Al-mohannadi]

عيل السالفه صج :s
ندرس على حسابنا ولا مذلتهم !!!

اي مذلة واي خرابيط ؟

:58:


هذا حقنا والدولة تحلله لنا احنا كطلاب !
فليش يبخسون بحقنا ؟

[Mariam Al-Emadi]

صح من حقنا بس من صجك في حد يناقشهم !!
من يسمع !
الا لو الكل تكلم واشتكوا بالجرايد
وكل اولياء الامور تكلموا

[Essa Al-Mansouri]

السؤال الأول: ماهي اسباب اتخاذ هذا القرار؟
الجواب: لاتوجد لدينا أي اسباب هيئه التعليم العالي هي هيئه تنفيذيه فقط لاغير ، والاوامر تُصدر من المجلس الأعلى للتعليم.

هههههه خلاص وصل الجواب

أتاري المجلس الأعلى للتعليم هيئة تشريعية وتنفيذية (وقضائية), واللي فيه خير خل يتجرأ يعترض أو يسأل عن تفسيرات زيادة.

الخطوة قد تكون في صالح الوطن والمواطن, لكن العائق أن المواطن لا يملك "الصلاحية" حتى للاستفسار عن الأسباب. حسبه أن الدولة سمحت له بالتفكير وفرض الاحتمالات والاستنتاج, أويطمع بأكثر من ذلك؟

دمتم "مواطنين" أبد الدهر.

[Mona Al-Hammadi]

من قال بعد جامعه قطر ببلاش اصلا بفلوس حتى لنا احنا القطريين كل كتاب له سعره والامتحانات بعد لها اسعارها المشكله انا كنت في المجلس الاعلى من كم يوم واصدموني لاني كنت مقدمه اوراقي على بريطانيا وفرحانه اخر شي قالوا بدون فاونديشن والي عور قلبي واحد كان طالع قبلي وحسيت دموعه شوي وبتنزل من القهر لانه كان توه راد من بريطانيا وجايب القبول اما الجامعات الي في بريطانيا انصدموا من هالقرار وانا بفتح الموضوع مع نيوكاسلت لانها جايه الدوحه بعد كم يوم :steaming:

[Nasser Alemadi]

حتى لو فتحتي الموضوع مع نيوكاسل يا منى ماراح يساعدونج بشي ..

كل الي بيقولونه درسوا الفاونديشن على حسابكم وعقب حولوا عالمجلس بالفيرست يير ..

.
.

[Mona Al-Hammadi]

ممكن صح كلامك انا اقول لو نطلع من ايطار النت وننشره في الجرايد سكوتنا ماراح يسوي شي انا ماعندي غير بريطانيا وهلي ما راضيين امريكا:58: وكندا بارده من قلب :1639_01196243240:

وانا ممكن اجيب الفريست ير بس انا فعلا محتاجه فاونديشن :steaming:

[Hamad Salem]

و مازالت حلقات مسلسل تخبط هيئة التعليم في قطر مستمرة !!
نرجو من الله أن ينتهي هذا المسلسل قريباً ..

[N.A]

حسبي الله ونعم الوكيل

[S.J.A]

أنا أتوقع إنهم يعدلون عن هذا القرار

لأنه مب في مصلحة الطلاب أبد!

[Dhoha Al Meer]

من قال ان الهدف من القرار مايخسرون الدوله ..!!
ولما يبعثون طلاب نسبهم في ال 50 و ال 60 ويتوقعون انهم ينجحون !! و يرسوبون ومايقدرون يبون قبول مايكون فيه خساره للدوله يوم هالقرار طلع محد عارض لان فيه مصلحه الكل
بس نتيجه القرار الي ظل سنه كان في قرار ثاني انهم يغلون بعثات للفانديشن
يردون يرفعون النسب الي 80 و الايلز الي 5 ونص عشان مافي جامعه تلعب عليهم
و لا حد يوصل لين هناك وماينجح اذا كان النجاح يوصل لين 40%
كلشي اتوقع مدروس و مافي شي يطلع مني والدرب

[Mona Al-Hammadi]

اعتقد ان سكوت اغلبيه الطلاب لان محد اصلا بيسمعهم لو تكلموا لان القرار ماعتقد راح يتغير

مب شرط اذا كانت النسب عاليه الطالب راح يفلح والعكس في طلاب هني ماكان لهم تاسيس قوي في الثانويه العامه لانهم مدارس حكوميه والفاونديشن المفروض يكون بديل لهم بقبول نسب معقوله في الايلس ولا التوفل واذا كان ع هالطلاب يجبون النسبه المطلوبه باياخذ من عمر الطالب ما يسوى عليه يخلص بيدرس برع طلعوه من عيونه المجلس الاعلى خيار كثير من الطلاب لان التخصصات ع حسب رغبتهم بدون الزامهم بالعمل عندهم بعد التخرج هالقرار حطم الكثره لان هاي كان حق من حقوقنا والحين بعد حطوا يدهم فيه

[Mona Al-Hammadi]

وبعدين اذا الطالب الي رايح ما يجيب معدل مرتفع مرات الغلط مب عليه انا سمعت اهمال الشديد من قبل المجلس الاعلى حق طلابهم مافي حوافز مافي اهتمام وصج ع الاقل نبي بديل حتى الجسر مب معترف فيه الا في جامعه مادري 2 وفونديشن جامعه قطر هم مب معترف فيه يعني خلاص شل بريطانيا من بالك هاي الا اذا ع نفقتك الخاصه بعدين اتحول وبعد محد ظامن اذا بيتغير شي بعد ولا لا

بس ع قولتهم العيون تشوف وايدينا قصيره :smile:

[H.E.AL-Kuwari]

السلام عليكم ..

الصراحة طلعوا القرار في وقت غلط ...

انا عندي قبول في اكثر من جامعه بريطانيا في الفاونديشن وعاملة حسابي اني بكمل دراستي هناك.. يبت الايلز ويبت نسبة لكن هالقرار مثل العظم في البلعوم .. بيخليني اعيد التفكير في خياراتي :'( :209f: .. ماعندهم سالفة الصراحة

انزين لو بروح مؤسسة خاصة هل ينطبق هذا القرار ولا بيطرشوني ادرس برع ؟؟

[N.A]

هالقرار خاص بس في المجلس الاعلى
لو حولتي على مؤسسة ثانية ان شاءالله بيبعثونج للفاونديشن

- - -

شالسالفه ؟! الدولة قاعدة تشرد الطلاب وقاعدين يدورون لهم مؤسسات تاخذهم

- - -
ع

على الهامش
في كيو بي و اللجنة او دولفين او اي مكان
شرط ان الطلاب يشتغل عندهم عدد سنوات الدراسة صح ؟

[Nasser Alemadi]

في كيو بي و اللجنة او دولفين او اي مكان
شرط ان الطلاب يشتغل عندهم عدد سنوات الدراسة صح ؟


شي طبيعي ..

المؤسسه ماراح تصرف عالطالب وتقوله اشتغل بالمكان لي يعجبك .. ^_^

[Amna M. Murad]

انا اشوف القرار لمصلحة الطالب..
و بخلي الطالب يهتم اكثر بدراسته..
وايد ناس اروحون يلعبون و اضيعون
اموال الدوله على الفاضي..

ولاكن..

القرار كان "مفاجئ"..
من غير سايق انذار..
وهاي ان دل..
فيدل على ضعف في استراتيجية اتخاذ
القرارات لدى المجلس..

وشكرا

[Jassim AL-Jaidah]

حاليا حد عنده فكره عن الجامعات في بريطانيا اللي ممكن تاخذ الطالب فرست يير من غير فاونديشن ؟
ومثل ما قال اخوي عيسى المنصوري, خل الطالب يرسب في سنه اولى :)

[Nasser Alemadi]

والله مافهمت قصدك ياجاسم ,,

هو يعتمد اذا الطالب مخلص جسر ولا لا ,, الطلاب الي مخلصين الجسر عندهم ثلاث جامعات او اربع من بينهم سوانزي وبرونيل ,,

لكن الطالب الي مب دارس جسر وحتى لو عنده ايلتس 6 ماتوقع ينقبل فيرست يير والله اعلم ..

[Jassim AL-Jaidah]

مرحبا اخوي ناصر
الطالب ما دش الجسر ومفكرين نطرشه بريطانيا يدرس
بس انت عارف عشان القرار ان مافي فاونديشن على حساب المجلس الاعلى
حبيت اسئل عن جامعات ممكن تقبل طلاب سنة اولى من غير فاونديشن وايش هي التخصصات المسموح فيها

[Nasser Alemadi]

جاسم ,, احنا خريجين الجسر خايفين ندخل الفرست يير على طول ,,

وانت تبي تبعث طالب ثانويه للفرست يير ؟؟

وبعدين مافي جامعات تقبل لان خريج الثانويه العامه يكون خلص 12 سنه باقي له سنه الي هي ال13 والي هي الفاونديشن يير ,,

ممكن الجسر يغني عن الفاونديشن يير لكن فقط 4 جامعات الي تقبل هالشي ,,

اتمنى قدرت اوصل لك المعلومه ..

[Jassim AL-Jaidah]

الطالب متخرج من الثانويه من 3 سنين وقاعد يدرس في الاطلنطي
درس محاسبة سنتين
والحين حول هندسة بس خلص كورس واحد

وثاني شي اخوي ناصر ترا الدراسة في بريطانيا ما منها خوف, اهم شي تداوم وتركز على ال tetorial وكل شي بيكون تمام ان شاء الله

انا راسلت كم جامعه على اساس هالموضوع وقالوا لازم فاونديشن اذا يبي يدخل هندسة
بس اذا يبي محاسبة او بزنس بيدخلونه عادي من غير فاونديشن بس خبرك الوقت متأخر الحين حق جامعات بريطانيا

[Mohammed m. Bujassoum]

اخ جاسم, جامعة برادفورد تقبل First year بشرط الحصول على IELTS 5.5

هذا موقع الجامعة اذا بغيت معلومات اضافيه

http://www.brad.ac.uk/images/uoblogoempty.gif (http://www.brad.ac.uk)

(^^)

[Jassim AL-Jaidah]

مرحبا اخوي محمد
انا راسلتهم والصراحة ما ردوا علي :(
ومادري من قالي ان برادفورد يبون 6 في IELTS اذا الطالب يبي يدش هندسة
ما تعرف حد قطري هناك ممكن نستفسر منه اكثر؟ او واحد عربي عندهم في القبول والتسجيل ؟

[Mohammed m. Bujassoum]

في مسؤول المبيعات, اسمه عصمت

بس للاسف حاليا ماعندي رقمه بحاول اجيب لك في اقرب فرصه

(^^)

[Khalil Nasser]

حتى انا واحد من ربعي حظر الاجتماع وهو كان طالع من جامعة قطر

وعنده قبول سنه ثانيه .. قالوا له انت خذت فرصتك والدوله صرفت عليك

شدخل اذا جامعة قطر بلاش اصلا .. مادري احسهم يستهبلون

او انهم ما يبون يطرشون وايد ناس .. يعني تقليل العدد قد ما يقدرون

شكراً لك اخي الكريم

مرحبا اخواني و اخواتي

يمكن الموضوع ما بيخصني بس شدتني المشاركات

اول شي الله يعينكم و يكون معكم

بالنسبة للطالب اللي بجامعة قطر .. اخوي علي كلامك 100% صحيح

اذا كان شرط الابتعاث هو القبول بالسنة الاولى مباشرة

ليش التعجيز ؟؟!! ما اخونا انقبل بالسنة الثانية

جمود و ضعف القوانين ترى سبب النا ازمات كتيرة

ما بعرف ليش صدر هالقرار و بهالتوقيت ؟؟!! ما عم شوف فيه تطوير من مستوى الطالب

عالعموم .. للاسف .. و كالعادة

بتطلع القرارات .. بوقت غلط 10000000000%

ما بعرف شو المشكل لو طلع القرار .. بعد شهرين

(مش معناها اني مؤيد- بس افرضوا انو القرار مناسب-)

على اساس يطبق على طلاب السنة الجاية مش عليكم .. و خصوصي بعد ما تم قبولكم

على الاقل بيكون عندكم فرصة ترتبوا اموركم !!

برجع و بقول القرار مش رح يأثر علي .. اخوي طلعلو قبول ببريطانيا

بس طبعا مش على حساب المجلس الاعلى

مع كل هيك

قلبي معكم

و ان شاء الله بتنحل

[Maryam S Al-shraim]

بوجهة نظري كبعد نظر اذا ماصار تعديل راح تتفاقم الامور مع الوقت

وعط طموحك العافيه اضافة الى انك لاتحلم بعيد

حتى يصبح الامر حظوظ بدل انه يكون عطاء وتوفير

بالتوفيق للجميع

[Nasser Alemadi]

مريم كلامج عالعين والراس ,,

لكن بالأول والاخير لازم الشخص يكون عنده طموح ,, ومايحط نفسه ظحية هالقرارات الغريبه او الغير منطقيه ,,

بالعكس مهما الانسان واجه عقبات او مشاكل ,, لازم مانعتبرها مشاكل بالعكس نعتبرها تحديات ونسعى على ان نتخطاها ,,

والي حاط له غايه او طموح صدقيني بيوصل حق هالغايه ,, احنا الحمدلله سوينا الي علينا وكل الي نقدر عليه ,,

طالبنا بتغيير القرار ,, والي فيه الخير راح يصير بإذن الله ,,

وإذا ماتم تغييره خير وبركه ,,

[Jassim AL-Jaidah]

السلام عليكم ورحمة الله وبركاته
كان المفروض من كل الطلاب اللي محصليين قبول الفاونديشن لبريطانيا وتضرروا من القرار يوقفون كلهم عند باب الوزيرة عشان تشوف لهم حل
اما حجي في المنتدى يا جماعه ما بيفيد

[Omar Al Hazaa]

حياكم امريكا.. ترا الجو طيب..

لاتضيعون سنه كامله على التأسيسي..

[Ahmed Alobaidly]

وهذا اللي لازم يصير
:)

[Jassim AL-Jaidah]

حياكم امريكا.. ترا الجو طيب..

لاتضيعون سنه كامله على التأسيسي..

انت في وين تدرس اخوي عمر؟ وايش تخصصك؟

[Omar Al Hazaa]

مرحبا اخوي جاسم..

انا ادرس لغه في مدينة دنفر "كولورادو"

ادرس في معهد اي ال اس..



واذا عندك استفسارات ثانيه احنا حاضرين...

[Jassim AL-Jaidah]

مرحبا اخوي جاسم..

انا ادرس لغه في مدينة دنفر "كولورادو"

ادرس في معهد اي ال اس..



واذا عندك استفسارات ثانيه احنا حاضرين...

مرحبا اخوي عمر
مشكور وما تقصر
رايح على حسابك انت؟

[Omar Al Hazaa]

عفواً اخوي..

ايه انا رايح على حسابي..

بحاول اجيب التوفل في اسرع وقت وبعدين ان اشاءالله باخذ بعثه..

[Jassim AL-Jaidah]

بالتوفيق ان شاء الله وشد حيلك

[Omar Al Hazaa]

وياااااك ان شاءالله

[Mohsin Al-shaikh]

انا مستغرب من قرار مجلس الاعلى للتعليم وقطر للبترول ان تأسيسي يكون على حساب الشخص مب على حسابهم...زين اذا شخص ماعنده سيوله يعني مابروح برع لزم قطر للبترول والمجلس يتخذون قرار ويستشرون بعض الطلبه قبل مايتخذون اي قرار...

في اقتراح حق الشباب هو ان شخص يعرض على المجلس او لقطر للبترول انه يدفع تكليف سنة تأسيسيه بالقساط من راتب والده على شكل كمبيلات لمدة معينه حتى يتم له صرف راتب شهري من المجلس او قطر للبترول ويتم خصم مباشره من راتبه. اما في حال رسوب في تأـسيسي لا سمح الله فل الاب يتحمل الباقي مصاريف حتى يسدد المبلغ...


والله اعتقد فكره حلوه ايش رايكم

[M.AL-M]

لا حول ولا قوه الا بالله كل ما فتحوا باب سكروا ابواب

شفيه المجلس الاعلى؟ نعنبوهم عيال قطر ينعدون على الاصابع والبلد خيرها كثير ليش التضيق على عيالهم وعلى مستقبلهم؟

ما يشوفون عيال دول الخليج المبتعثين للخارج ،واللي تعداد سكانهم اكثرمن سكان قطر والدوله تصرف على تعليمهم بدون شروط او تعقيدات.

استراليا بعد تشترط فاونديشن لانها لاتعترف بثانوية قطر ولا حتى بتاسيسي جامعة قطر الموقره

وعيال اخوي يدرسون الحين لغه على حسابهم بس عندهم فاونديشن السنه القادمه واكيد اللي ينطبق في بريطانيا ينطبق هنا على الرغم من ان استراليا ارخص من بريطانيا.

اللهم لا حول ولا قوة الا بك الا متى الحسد وعدم حسن التقدير موجود في هياكلنا التعليمية؟

قال التوجه لامريكا طيب ليش ما فيه اعدادات مسبقه لهذا التوجه كل يوم قرارات وقرارات ويا ليتها تنصب في صالح الطلبه.

والحين ضيقوا الخناق على الطلبه( الديون وراكم والا امريكا امامكم ..كيفكم يا الطلبه!!!)

وتحسبون القرار هذا راح يمشي بتشوفون بعد فتره قرار جديد ضد طلاب قطر والهدف هو توفير كم ريال لاثبات الوطنيه العالية والاستمرارية في المناصب التعليمية القيادية.

الله في عون العبد ما دام العبدفي عون اخيه يا المجلس الاعلى اتقوا دعاء المقهوريين من عشوائيتكم اللي ما لها نهاية.

[Omar Al Hazaa]

قريت في احد الردود ان الي درس في جامعة قطر مايصير ياخذ بعثه!!

انا درست تأسيسي نص كورس في جامعة قطر..

اتمنى اذا حد يقدر يتأكد لنا من هالقرار..






من الي قاعد على رئاسة المجلس الاعلى؟

بما ان الموظفين متعاطفين مع الطلاب ومابيدهم شي..

[Jassim AL-Jaidah]

انا مستغرب من قرار مجلس الاعلى للتعليم وقطر للبترول ان تأسيسي يكون على حساب الشخص مب على حسابهم...زين اذا شخص ماعنده سيوله يعني مابروح برع لزم قطر للبترول والمجلس يتخذون قرار ويستشرون بعض الطلبه قبل مايتخذون اي قرار...

في اقتراح حق الشباب هو ان شخص يعرض على المجلس او لقطر للبترول انه يدفع تكليف سنة تأسيسيه بالقساط من راتب والده على شكل كمبيلات لمدة معينه حتى يتم له صرف راتب شهري من المجلس او قطر للبترول ويتم خصم مباشره من راتبه. اما في حال رسوب في تأـسيسي لا سمح الله فل الاب يتحمل الباقي مصاريف حتى يسدد المبلغ...


والله اعتقد فكره حلوه ايش رايكم

اخوي محسن
البترول يرسلون طلابهم لدراسة الفاونديشن
واخو واحد من الربع توه موقع العقد معاهم ومعطينه شيك بمبلغ محترم
يكفيه حق سنه بصراحه

[Mohsin Al-shaikh]

اخوي محسن
البترول يرسلون طلابهم لدراسة الفاونديشن
واخو واحد من الربع توه موقع العقد معاهم ومعطينه شيك بمبلغ محترم
يكفيه حق سنه بصراحه

والله اعتقد البتعاث التأسيسي فقط حق القداما الموظفيين يعني لي سارله اكثر من ثلاث سنوات وليس لطلاب الجدد.. انا اقصد الطلاب الجدد يبتعثون على نفقت قطر للبترول اذا درسوا التأسيسي على حسابهم بالإضافة لي شهادة ايلتس 5 اقل شي..

هذا انا متأكد منه لأني وديت اخوي قالو لي تأسيسي على حسابه Bsc Degree على حساب قطر للبترول.

[Jassim AL-Jaidah]

والله اعتقد البتعاث التأسيسي فقط حق القداما الموظفيين يعني لي سارله اكثر من ثلاث سنوات وليس لطلاب الجدد.. انا اقصد الطلاب الجدد يبتعثون على نفقت قطر للبترول اذا درسوا التأسيسي على حسابهم بالإضافة لي شهادة ايلتس 5 اقل شي..

هذا انا متأكد منه لأني وديت اخوي قالو لي تأسيسي على حسابه Bsc Degree على حساب قطر للبترول.

اخوي محسن
قدامى موظفين البترول ما يطرشونهم فاونديشن
يطرشونهم دبلوم وعقب بكالوريوس
واخر دفعه من قدامى موظفين البترول راحوا دبلوم كانت سنة 2004 والحين الدبلوم في شمال الاطلنطي واللي يجيب معدل عالي يطرشونه بكالوريوس برع

طلاب الثانويه اللي نسبهم فوق ال 80% وعندهم ايلز 5.5 او توفل 530
البترول يطرشون الطالب الجامعة والتخصص اللي يبيه
وانت استفسر اذا حاب

[Mohsin Al-shaikh]

السلام عليكم ورحمة الله وبركاته

عيل ايش تقول عني سارلي 10 سنوات في قطر للبترول ما درسة شمال الاطلنطي ولا قربت صوبة كلمت المدير وماقصر الله يعطيه العافية وجات الموافق من قسم التدريب وخاطبة الجامعة برادفورد وطلعت الموافقة وجبت لهم شهادة ايلتس ودرسة 2007/2008 تأسيسي والحمدالله نجحت والحين بواصل BSc . ورفيجي معاي في نفس المكتب بطرشونه تأسيسي بعد سنتين لازم يكمل خمس سنين في قطر للبترول والحين صارله تقريبا ثلاث سنوت. والقداما يحترمونهم ويبعثوهم تأسيسي....اما شمال الاطنطي حق لي ماصارله سنتين في قطر للبترول..او اذا المدير ادارة مهمل مايبيه يواصل تعليمه فيحط عليه حواجز مثل شمال ..والشرق ..وبعدين الغرب..


طلاب الثانويه اللي نسبهم فوق ال 80% وعندهم ايلز 5.5 او توفل 530
البترول يطرشون الطالب الجامعة والتخصص اللي يبيه
وانت استفسر اذا حاب

أما عن الطلاب الجدد انا مودي اخوي ومجموعة 80% قالوا لي التأسيسي + ايلتس على حسابة بكالوريوس الحساب قطرللبترول هل كلام قبل شهر.

[Jassim AL-Jaidah]

كلمت المدير وماقصر الله يعطيه العافية وجات الموافقة من قسم التدريب وخاطبة الجامعة برادفورد وطلعت الموافقة وجبت لهم شهادة ايلتس ودرسة 2007/2008 تأسيسي والحمدالله نجحت والحين بواصل BSc . .

هذا يمكن طلب خاص من مدير ادارتكم اخوي محسن وبالتوفيق في الدراسة
انا عارف قانون البعثات في البترول من الشباب اللي كانوا يدرسون معانا في بريطانيا ذيك الايام
ويمكن تخصصك اخوي مب موجود في الاطلنطي

.او اذا المدير ادارة مهمل مايبيه يواصل تعليمه فيحط عليه حواجز مثل شمال ..والشرق ..وبعدين الغرب...

هذا الشي صاير في اماكن وايده
والله يكفينا شر المدير اللي ما يخاف الله ويجعل كيده في نحره ان شا ءالله



.أما عن الطلاب الجدد انا مودي اخوي ومجموعة 80% قالوا لي التأسيسي + ايلتس على حسابة بكالوريوس الحساب قطرللبترول هل كلام قبل شهر.

انا اخو رفيجي توه موقع العقد معاهم وبيطرشونه بريطانيا 4 سنين
سنة فاونديشن و3 سنين بكالوريوس