المدراس المستقلة .... تدمير قطر .. ام بناء دولة

[Fahad Buhendi]

تخرجت من المدارس الحكومية, تحت راية وزارة التربية والتعليم سابقاً

كان (العيب الوحيد) في المدارس الحكومية انها كانت مدارس (حفظ) وليس (فهم)

كان مطلوب منا ان (نحفظ) و(نحفظ) و(نحفظ) .. والي (يحفظ اكثر) يحصل على (درجات اكبر)

وعندما ابتعثنا الى بريطانيا واجهتنا مشاكل كثيرة لاحصر لها

فالتعليم في بريطانيا كان (فهم) و (تحليل) و (ابحاث) و (بحث) و (مكتبات) و (مختبرات)

وفي قطر كان تلقين ... المعلومة قدامك في الكتاب احفظها بسرعة.. والتحليل موجود في الكتاب احفظه بسرعة .. ماتحتاج تشغل مخك

وبعدها قررت الحكومة انها تلغي المدارس الحكومية وتبدلها بمدارس مستقلة على الطريقة الامريكية

والي مضايقني ان بعض الطلاب الي اعرفهم ضعاف جدا جدا جدا جدا جدا في التعليم

ومع هذا درجاتهم عالية وقوية

هذا غير الواسطة في قبول طلبات التوظيف

وفي قبول الطلاب

وفساد في توزيع الراوتب والمناقصات

وبدأت استغرب من المدار المستقلة

هل هي بناء او تدمير لقطر

انا الصراحة ما اشوف فائدة من المدارس المستقلة

الفائدة الوحيدة هي ان شخص واحد يحصل على اموال اكثر وتجارة اكثر ربح

ورسالتي الى الحكومة :

السيارة في بريطانيا تحتاج الى مضاد للتجمد بسبب وصول درجة الحرارة في الشتاء الى تحت الصفر ... بينما في قطر والسعودية لاتحتاج لمضاد التجمد لاننا لا نعرف الصفر في درجة الحرارة

باختصار

ليس كل ماينجح في امريكا ... يصلح لان ينجح في قطر

[Sh.W]

يعطيك العافية اخوي فهد،، كنت مفكرة أطرح هالموضوع من قبل ،، لأني حابه أعرف رأي الأعضاء،،
أدري الكلام ما منه فايدة،، لكن مجال كالتعليم أكيد يهم الدولة،، ولو ما إهتموا بهالجانب،، راح
يضيعون جيل كامل،، المدارس المستقلة رهيبة واااايد ،، وكتطبيق في الواقع فاشلة،،
والجيل ما ادري شلون راح يواصل في المراحل التعليمية القادمة...
أنا أسمع إنه فيه مدارس مستقلة ممتازة،، لكن المدارس اللي مرت علي،،
كلها سيئة لحد الحيين،، الطالب ينجح بدون أي مجهود...
ولو تسأل طلب المدارس بيقولون لك إحنا مستانسين نلعب طول السنة وفي
الأخير نسلم أبحاثنا المنسوخة من مواقع الإنترنت و ننجح.
.هالكلام اقتباس لردود طلبة في إحدى المنتديات،، الدراسة قبل كانت تلقين،،
والحيين العملية صارت تبادلية بين الإستاذ والطالب،،
لكن إنه ينجح بدون أي مجهود؟؟ الإستاذ ينجح الطلبة عشان إسم المدرسة،،
ما تخسر طلبتها؟؟


الأهم من الموضوع كله،، إلى متى راح تستمر المدارس المستقلة مع العلم
بأنها مدارس غير ناجحة...

نعم،، نحن بحاجة إلى مرحلة جديدة من التعليم،، بحاجة إلى التعليم المتبادل
بأن يكون الطالب متلقي ومرسل في الوقت نفسه...

لكن الإستمرار مع الفشل ،، شعور بالقهر صراحة

[Omar Al Hazaa]

شكراً اخوي فهد..

المدارس المستقله يقولون ان الطالب يبحث فيها بنفسه؟ وانتوا قلتوا ينسخ الابحاث!

البحث الحقيقي يكون بجمع بعض المعلومات من النت أو الكتب.. نفس الشي يعني!! "وعادي يطلعون اساتذه ويبيعون لهم ابحاث!!"
اهم شي الفلوس!

في اول سنه المدارس المستقله نجحوا كل الطلاب عشان ياخذون سمعه..

لاكن ثاني سنه..

ههههه قاموا يدرسونهم ايطالي واسباني! اكيد هالمواد اختياريه..

المهم وحده نعرفها يدرسونها ماده عن الزواج فالايمان المستقله..

هالشي طيب..

بعد مدرسه من المدارس درسوهم فيها ماده عن الجنس!

وبعد هالشي طيب..

والانقليزي اقوى فالمدارس المستقله..

وهالشي احنا كنا نتمناه في دراستنا..

شنو اقتراحاتكم لتطوير التعليم بما ان المدارس المستقله عيوبها كثيره؟


1- اقترح انها تكون بأدارة الحكومه عشان محد يتلاعب فالفلوس على كيفه..

2-يستمرون في وضع المناهج والمواد الجديده الي تساعد على التفكير..

3-مايفصلون بين العلمي والادبي لأن الكل لازم يفكر ويفهم.. "بما ان الكل لازم يدرس فالمدرسه من الاصل!!"

4-المناهج لازم يحطونها ناس اهل خبره وعندهم كفائه عاليه وتعليم عالي ويخافون ربهم..

^
^

مب كل من هب ودب يحط مناهج حق عيالنا وهذا الي صاير فالمستقله!!

[A.Al-mohammadi]

بسم الله الرحمن الرحيم

موضوع حلوو..بس أنا أشوف انه المدارس المستقله افضل من المدارس الحكوميه بألف مره من حيث المناهج ومن ناحيه ال Workshops اللي تنظمها المدارس للطلبه والطالبات هذا غير الانشطه المتنوعه..ومثل ماذكرت اخوي انه احنا توهقنا لما جينا بريطانيا بسبب الفرق الكبير بين المستوى التعليمي في المدارس الحكوميه..24/7 كله حفظ × حفظ ومافادنا في شي:58:..لكن الحين المدارس المستقله مع انه فيها بعض السلبيات لكن من وجهه نظري ايضاً ايجابياتها عديده..وانشالله في المستقبل يحسنون من مستواهم اكثر واكثر..

والله يوفق الجميع..:)

[Mariam Al-Emadi]

اكثر مايزعجني في المدارس المستقلة اهمالهم للغه العربيه
:(

[Sh.W]

للأسف المدارس المستقلة مب كلها في نفس المستوى...

[Amna M. Murad]

انا عن نفسي..
اشجع نظام مدرسة البيان للبنات..(العلميه)
الطالب من اول ثانوي يعطونه خلفيه عن التخصصات كلها..
لان من ثاني ثنوي بيتخصص..
و التخصصات كانت كالاتي:
هندسه
كمبيوتر ساينس
ادارة اعمال
لغات
طب

و التخصص الي بيختاره الطالب ما يعني انه بتم عليه طول حياته..
ولاكن احدد المواد الي بياخذها..
مثلا في تخصص كمبيوتر ساينس..
الطالبات ما يخذون كيميا ولا احياء..بس فيزيا بشكل مكثف..
و بلنسبة للقروب الهندسه..ما ياخذون احياء..

يعني شي حلوو ان الطالب اركز على المواد الي هو حابها من البدايه..

ثالثا..مادة اللغه العربيه مش مهمله ولا التربيه الاسلاميه..
بالعكس موجوده و تدرس..

و بالنسبة لنظام الـIB الرسمي..الدخول فيه شي اختياري مش اجباري..
يعني بالعربي..
الطالب يدرس شي هو حابه و بختياره..
مب غصب عنه..
:First_smiley_i_ever

[Abrar Al-Janahei]

المدرسة المستقلة تقسيم درجاتهم
A+
A
A-
B+
B
B-
C+
C
C-
D+
D
D-
E+
E
E-

F مافــــــــــــــــي !!!!!!!

وما شاء الله التقسيم فيه E باقسامه .. حتى الكسلان ينجح .. نسبة النجاح 100%

ويقولون انهم يركزون على اللغة الانقليزي .. كل الطلبة ما ضابطين لا عربي ولا انقليزي

على الاقل في الحكومة كان العربي مظبوط

بس التقسيم .. لو يتطبق في جامعتنا .. عجيب :D

[Saleh Alkhulaifi]

السلام عليكم ورحمة الله وبركاته

بما اني خريج العلميه .. مسألة المدارس المستقلة سببت لنا ازمه .. قللت مستوى المناهج والمعايير .. وسالفه مايعلم بها الا الله ..

كنت معارض لمدارس المستقلة ١٠٠٪ .. صباح الهيدوس و عادل السيد لاعت جبدهم مني ..

لكن اليوم جلست مع أخت فالمجلس الأعلى .. وفهمت منها شالي صاير ..



قطر جايه تغير منهج تعليمي كامل .. فلازم ننتظر لين مايكتمل عشان نقدر نحكم ..

معاكم على الأخطاء الكثيره ومنها سمعت المدارس ... عندنا فقطر الواحد تاخذة العزة بالإثم .. حتى لو كان مخطئ يبي يرقع شغله بأي حل ... يمكن يكون ضعف ضمير ..



كنت مقتنع معاكم ان الطالب ليش ينجحونه الخ الخ ...

حطو هالنموذج ... طالب بيسقط فأول ثنوي بيعيده .. المره الثانيه بينجح .. الأخ تأخر سنه ..

اللي تنجحه المستقله بيدخل الجامعه .. اول سنه بيمشي ثاني سنه بيعيدها .. وبيكمل .. الأخ تأخر سنه .... ماشوف اي فرق... !!


نقطه المستقله ان توحد التعليم للجميع !! الكل في قطر يمشي تحت معايير المجلس الأعلى ... مافي علميه ولا بيان ولا الخ ..

الطالب من حقة ان الدوله توفر له تعليم مجاني .. ولازم الكل ياخذ نفس الحقوق ..



وكأي مشروع لازم يتم كم سنه لين اول شي يغطي خسايرة ... حتى قبل لايربح ...

ماصارلها ٣ سنين المستقله ..

[F AL-Jaidah]

جزاك الله خير اخوي على طرح الموضوع

المدارس المستقلة صارت واقع مضطرين انا نتقبله

ولكل مشروع جديد ايجابياته وعيوبه...

ما شاء الله التحسن واضح... وهناك عيوب ليست بخافية عن اغلب الشعب

لكن العيب الاكبر بنظري عندما يولى منصب مدير المدرسة انسان غير مهيء للمنصب

عين لقربه من مالك التصريح... المشكلة عندما تكون افكاره خاطئة ويدير بها ابنائنا

عندما يركز على ظهور المدرسة في المناسبات والانشطة ... ولللاسف تغيب التربية :(

لا اعمم بكلامي على المدراء ولكني رأيت من هو بهذه المواصفات

وللأسف لايوجد مأخذ على من بهذه المواصفات :(


تحياتي :)

[A.M.I]

أشكرك أخوي عالموضوع

المدراس المستقلة تجربة بأدت من خمس سنوات
أنا بصراحة رأيي أنه من الصعب نقييم المدارس المستقلة كلها
لكل مدرسة مناهجها ونظامها الخاص
وأنا عشت هالتجربة في المرحلة الثانوية
صراحة المنهج كان فعلاً على مستوى عالي
حتى ان المدرسات مايكتفون بالمعايير ويتعمقون أكثر
وبعدين تعودنا ندرس من كذا مصدر غير كتبنا
وامتحاناتنا دائما تعتمد على التحليل والاستنتاج
حتى في المواد الادبية اللي كنا نعتمد فيها عالحفظ
يعني حتى اللغة العربية ماتجينا نفس النصوص في الامتحان
و الشرعية يجينا نص مختلف عن اللي درسناه واحنا نربط
فعلاً في مدارس كثيير لغت شي إسمه لدى للطالب
واما المدارس اللي تلغي مواد للطالب حسب تخصصه
من رأيي ان هذا ليس في مصلحة الطالب اذا فكر يغير تخصصه
فعلا بيحس ان في فجوه عنده في مواد معينة

وطبعا مثل مافي ايجابيات في سلبيات أهمها القرارات الادارية السريعة
اللي حتى مايفكرون بتأثيرها على الطلاب لا ويصرون عليها أشد إصرار
وبعد من المساوئ ان غالباً تخصص الموظفات ماله علاقة بشغلهم
وحتى المجلس الأعلى اللي حطو معايير المواد في اجتماعاتهم مع الطلاب نحس انهم مب فاهميين شي
المشكلة التقييم يكون بعد 3 سنوات تكملها المدرسة المستقلة يعني 3 أفواج فاشلة قراابة 300 طالب من كل مدرسة .

وقريباً انشالله راح تطلع نتايج الثانوية المستقلة
دعواااتكم

[M.Y.S-J]

آناآآ بتكلم عن المدرسة اللي آدرس فيهاآ ..

"البيان الثانوية " ..

آناآ الصراحة آشووف ان نظاآم مدرستناآ كمدرسة مستقله ناآآآجح ..

مادري عن نظاآم المدارس المستقله الثانية ..

بس اعتقد تقريباآ متشاآبه ..

مدرستناآ تعتمد على اختيار الطالب للتخصص اللي اهو يبيه ..

وفيه ثلاث تخصصات ..

طب ..

هندسة ..

بزنس ..

وفيه مجموعه البكالوريا الدولية (IB).. عشرين طالب كحد آقصى ..

طبعاآ الطالب له حرية الاختيار في اي قائمة يدخل ..

ومافي عدد معين من الطلبة في كل قائمة(باستثناء البكالوريا الدولية ) .. يعني مافي شي اسمه الحق ما تلحق ..

المدرسة طبعاآ تساعد الطلبة على اختيار تخصصاتهم .. بناء على شيئين ..

الآول ميولهم .. والثاني درجاتهم ..

يعني مثلاآ اللي درجاته اوكي في البايولوجي ممكن يدش طب ..

واللي اوكي في الفزكس ممكن يدش هندسة ..

واللي اوكي في البزنس يدش بزنس ..

طبعاآ هالسياسة مب غصب ..

يعني مثلاآ اللي اوكيه في البيولوجي ويبي يدش هندسة اهو حر ..

لان في النهاية هاي مستقبله ..

والمدرسة توجه الطالب بس .. مب تحدد له طريجه ..

..

وغير جي .. نظاآم توزيع الدرجات عندناآ فيه رسوب ..

يعني مثلناآ مثل اي مدرسة ثاآنية ..

وهاآي توزيع الدرجاآت ..:

A - 100% ->90%

B - 89.9% ->80%

C - 79.9% ->65%

D - 64.9% ->50%

I - less than 50%


ومعروف آن (I) رسووب ..

وماآفي شي عندناآ آسمه E .. !

..

وغلط اللي يعتقده البعض ان المدارس المستقله تهمل اللغه العربية ..

بالعكس .. حصص العربي مثلها مثل اي حصص ثانية ..

بس يمكن اللي تقصدونه ان الماآث والمواد العلمية باللغه الانجليزية ..

فقلل من استخداآمنا للعربية في الحصص ..

....


آناآآ راايي يساند المدارس المستقله .. لاني للحين ماآ شفت الا الجاآنب الايجاآبي منهاآآ ...

وآتمنى من الكل انه يحاآول يساند هالتجربة .. لانها في بدايتهاآ .. ومب عيب لو طفت بعض الاخطاآء ع السطح ..

بس اهم شي ان هالاخطاآء تتصحح مع تقدم السنوات ..



وثاآنكس ع طرح آلموضوع ..

:D

[Mona Al-Emadi]

انتوا يالبيان حاله منفرده متميزة بين مدارس قطر

جان زين حال باقي المدارس مثل حالكم

[Saleh Alkhulaifi]

عمر بن الخطاب :)

[A . Al-zaman]

المشكله الحين ان احنا مانقدر نحكم حكم عام على المدارس المستقله

لأن في منها الناجح اللي فعلاً الكل يشهد لنجاحها كتعليم وادارة ونظام

متمثلة في المجمعات التربوية مجمع البيان والفاروق عشان ما يزعلون اخوانا في عمر :16:

وفي منها اللي للأسف سمعتها متلطخه تلطخ..


بس شوي شوي المدارس كلها قاعده تمشي على مناهج ومعايير موحده لأن امتحانات الشهاده الثانويه توحدت مؤخراً لكن الاختلاف في تفوق مجموعه عن أخرى و
أنا اتوقع بإنه يعود للإدارة نفسها والنظام الداخلي اللي ماشيه عليه المدرسه نفسها والمجمعات التربوية معروفة بصرامة ادارتها وتميز معلميها ..


أما بخصوص منو احسن طالب الحكومه ام طالب المستقله

يا جماعه منو يمشي اكثر في الجامعه طالب الحكومه والا المستقله ؟؟

ياجماعه احنا ناس مجربة وانا شخصياً كنت طالبة حكومه ثم مستقله وبعدها انتقلت للبيان

انا من دخلت النظام المستقل انتقلت لمرحلة كبيييرة وفعلاً تعلمت مهارات عده والمسؤولية وتعلمت افهم قبل لا احفظ نظام المدارس المستقله مايسوى شيء عند نظام الحكومه لأنه مايمشي ولا ينفع !!


في فوضى وفي لعب وفي .. ولازم ينحط حد .. وكل مدرسة تعطي كمية من المنهج على هواها
وسمعنا في بعض المدارس ثلاث دروس لامتحان الفاينل !! وطبعا هذا كله يعلم الطالب على الاستهتار والتهاون .. المجلس الاعلى لازم يحط حد للمدارس عشان النظام يصير من اروع مايكون


منهج العربي والشرعيه غير موحد لكل المدارس لكن منهج الحكومه أقوى بكثيييييييير

باختصار النظام الى الآن فيه ثغرات ولازم تنسد


واتمنى الاقتداء بالمجمعات التربوية :D

[Amer Al-Hemaidi]

السلام عليكم
المدارس الحكومية مب كلها حفظ
أذا كنت أدبي.....نعم الأدبي حفظ
أذا كنت علمي...لا العلمي فهم
و أذا أنت تقول عن المدارس المستقلة زينة فأنا أقولك لأ
كل من دخل المدرسة المستقلة يبي النجاح فقط فالمدارس المستقلة كانت توفر النجاح لطالب عشان يزيد الأقبال عليها و هاي الشي صاير هاي الأيام
و مافي فرق بالنظام الأمريكي أو القطري
الشي يعتمد على الطالب و المدرس
أذا الطالب كان شاطر و المدرس يشد علية فبجيب علامات عالية
و أذا كان المدرس غير مهتم أذا نجح ولا لأ فالطالب بيرسب

بس أحب أقول أن المدارس الحكومية من ناحية التدريس أحسن من المستقلة
و المستقلة في التنضيم أحسن من الحكومية

[Amna M. Murad]

نقطه المستقله ان توحد التعليم للجميع !! الكل في قطر يمشي تحت معايير المجلس الأعلى ... مافي علميه ولا بيان ولا الخ ..


و الله يا اخوي..بضل فيه علميه و بيان..الخ..
الى ان يتم توحيد الانظمه المتبعه بالمدارس..
ولا مصطلح "مستقله"..
ما وحد "النظام" وكيفية التدريس..
بل وحد "التقييم" و كيفية التصنيف..


عمر بن الخطاب :)

شي حلو..و معلومه جديده..
توني اعرف ان عمر بن الخطاب
تعتمد نظام التخصصات من ثاني ثانوي
و تحتظن نظام الـIB..

:)

[Mohammed Al-haddad]

العلمية ( عمر بن الخطاب ) أختي ما تعتمد ولا موجود هذا النظام" تعتمد نظام التخصصات من ثاني ثانوي
و تحتظن نظام الـIB.."

[Amna M. Murad]

اها..الظاهر فهمت اخوي صالح غلط..
بس اسمحوا لي ترتيب الردود..
ممكن اتوه القرئ..
يعطيك العافيه اخوي محمد..
على التصحيح..

:)

[Faisal Altamimi]

الســـــلام عليكم

اشكرك اخوي فهد على هالموضوع, وصراحه كان على بالي اطرحه ولقيته في المنتدى
وكثرة المشاهدات والمشاركات يدل على ان هالموضوع اثار ناس وايد

انا عندي فكره وحده بالتعليم مهمى تغير ومهمى صار

( السر بالطالب مو بالمنهج والشاطر شاطر وين ما انحط)
( مشكلتنا ان معظم طلابنا فيهم لا مبالاه وعدم اهتمام)

وفكرة المدارس المستقله اشووفهم تسرعو فيها وايد, ابتكروها وطبقوها بشكل واسع بدون مايتأكدون من نتايجها و في عيوب ماتظهر الا بالتجربه واللي ذكروها الاخوان قبلي, وكون المدارس العلميه نجحت فهي تحتلف وبشكل كبير في الميزانيه وقدرات الطلاب بما انها خذت صفوة الطلاب والطالبات فأكيد راح تنجح.

والشي الغريب اللي لاحظته في المدارس المستقله, ان طالب يطلع من اول ثانوي بأربع مواد دور ثاني , ولما يدخل المستقله ينجح بمعدل 84% في ثالث ثانوي, حتى لو قلنا فهم او قلنا نظام غير فهو شي مايدخل العقل و هالوضع تكرر مع اكثر من طالب.

احنا الحمدلله الميزانيه موجوده والمنشئات ممتازه وبأعلى المقاييس, والعزم موجود من المسؤولين لكن الخطأ كان في التخطيط والتنفيذ فياليت يعيدون النظر في النظام بالكامل.


واشكرك مره ثانيه اخوي على الموضوع الرائع والطرح الواضح

اخوك
فيصل التميمي

[Dhoha Al Meer]

انا في رأي ان نظام المدارس المستقله نظام فاشل ..
صح احنا كمدارس حكومه التدريس عندنا ضعيف لكن مو المنهج المشكله
المشكله في المدرسين .. مدرس مايشرح بضمير .. مدرس مايفكر يطور نفسه .. مدرس مايغير اسلوبه .. كلاس انقلش 80% من المناقشات فيه بالعربي هاي اذا مو 90
يعني انا بتكلم عن المدرسات مدرسه متخرجه من مدرستي يعني متعلمه انقلش من الصف الرابع مادري سادس المهم وتدرس بجامعه قطر 4 سنوات و صارت تدرس اجيال شلون ادرس لغه هي مو لغتي .. و يوم تستعمل مفردات مايدرسونك اياها يقولون لك اكتب الكلمه ورى و مع المعنى !!! و غير ان النطق غلط و هم نفسهم مايعرفون يكتبون بحوث اصلن حتى مايطلبون بحث مثل الناس .. فبدل ما يغيرون المناهج و المدارس خل يبتدون من المدرسين لان في مدرسين فق قمة الذكاء لكن مافي اهتمام
اذا كانت قطر في مرحله تطور و تبي خبرات و ناس فاهمه خل استثمر الفلوس الي تروح على المدارس المستقله و اقوي التعليم ومثل ماقال اخوي فهمد مو كلشي يصلح بامريكا ينفعنا خل نشوف احنا شنو نحتاج و نكون جيل ناضج وواعي لاحتياجات الدوله ..
شالفايدة الدوله تكون مطوره اقتصاديا و عمرانيا فقط ويكون في فراغ كبير بين التطور الفكري والتطور الاقتصادي.. سوري خرجت عن الموضوع بس خساره المشكله بقطر اذا بدوا بشي وكان غلط راح يخلونه ومستحيل نعترف ان هالنظام فشل

[T.A. Al-Rowily]

السلام عليكم ورحمة الله وبركاته
المدارس المستقله كفكره ناجحه ............. ولكن؟
هناك علامات أستفهام كثيرة على النظام والأسس في هذه المدارس؟
مثلا من يضع المنهج ؟
أين الكتب ؟
كم مره يتغير مدرس المادة في السنة ؟
أين ميزانية الطالب ؟ مثلا في القرطاسية؟
من يحاسب المدير ؟
على أي أساس تفضيل الأجنبي على القطر ي؟ هل بسبس الراتب؟
......................؟؟؟؟؟؟؟؟؟؟؟

[fatma.j]

ليس كل ماينجح في امريكا ... يصلح لان ينجح في قطر

صدقت اخوي .. انا برايي انا المدارس المستقله بتزيد نجاحاتها مع زيادة خبراتها .. بس لو يقر المجلس الاعلى على راي وقرار معين ويحطله خطه يمشي عليها على الاقل لين نهاية السنه الدراسية ..

لان اللي صار معانا في 3 ثانوي كان ينرفز .. الطالبات حسوا انهم يتعاملون مع شخص قاعد على كرسي مرتاح وكل ماطرى في باله امر اصدره !!! يعني مثلا غيروا وقت الفاينل تبع المدرسه قبل باسبوع بقرار من المجلس الاعلى .. تحسون بمشاعر الطلاب والطالبات المساكين !!

ما علينا اللي فااااات مااات .. اتمنى تكون في مراقبه اكبر على المدارس ومناهجها .. جدامي مثال حي وهو اخوي اللي في مدرسة اليرموك الاعدادية ... طول السنه مجابل السوني .. اذا عنده شي للمدرسة فهو نشاط عباره عن لوحه او بوستر او .. او ,, اوو .. وليلة الامتحان الساعة 11 فليل يتصفح الكتاب بعدين يروح يرقد ...

والنتيجه .. يطلع من الاوائل !! يمكن اخوي عبقري ولا مدرستهم رحيمه بزياده !!


والله يعين الاجيال اليايه!!

[O.A.M]

السلام عليكم ورحمة الله و بركاته..

يسلموو على طرح الموضوع..

أنا في رأيي انه كل من المدارس والمستقلة و الحكمومية لهم محاسنهم و عيوبهم..

فالمدارس المستقلة احسن من الحكومية من حيث المنهج و الأنشطة اللي تساعد على تنمية مهارات الطالب.. و ايضاً اعتمادهم على اللغة الانجليزية في التعليم التي هي الآن اللغة الأكثر تعاملا بها في العالم..

لكن اللغة العربية في المدارس المستقلة ضعيفة جداُ.. حيث ان المعايير المعطاة للمدارس تركز على الاساسيات في القواعد.. و تعتمد على مهارة الكتابة بكل كبير.. فهناك تركيز على المقالات و مواضيع التعبير و تحليل النصوص بينما القواعد نرى ان اساسيات بسيطة جدا تعطى للطلبة .. في الثانوية من الممكن ان اخذت في الابتدائية و تكررت مرة اخرى حيث ان في الامتحانات لا يعتمد على الاعراب بشكل كبير.. بل ارى الامتحان كأنه استفتاء للآراء.. في كل صفحة سؤال اكتبي رأيك و حللي القصيدة..

وليست جميع المدارس المستقلة سيئة فهناك مدارس ممتازة و تخرج افضل الطلب كل عام.. ولكن هناك ايضاً.. مدارس تبيع العلامات بيع.. الطالب ياذ الدرجة ببلاش .. وما في استفاده من الدوام.. طول السنة.. كله يعتمد على الاساتذة و الهيئة الادارية المختارة للمدرسة..

المدارس الحكومية لم اجربها الا لسنة واحده ورأيتها انها .. تعتمد على الحفظ بشكل كبير.. و لا يحتاج الطالب للدراسة أول بأول.. اما المدرسة اللي فيها انا الحين اذا ما فهمت بالحصة أو ما درست اول بأول ادخل الامتحان وانا واثقة اني ما بنجح..

مافي شي كامل بهالدنيا كل شيء له مميزاته و عيوبه,,

و يسلموو على طرح الموضوع مرة أخرى..

[Ahmed Alobaidly]

المدارس المستقله اعملت قفزة كبيرة في التعليم في قطر
ومثل هلقفزة محتاحينها احنا كطلاب قطريين اللي لحد الحين
مب عارفين شلون نتكلم انجليزي صح ولا ناخذ ايلس ولا توفل
تعتقدون ان مناهج التربية تقدر تاهلنا لهالشي ولا مناهج الماث
اللي قمنا ناخذها في اول ثانوي مستقلة ! .نفسها اللي يدرسونها
في تاسيسي جامعه قطر هالشي ايجابي اكييد ! . وقرار المجلس
ان يتم تططوير مناهج المستقلة في الماث والساينس لمعيار دولي
والصراحه انا واحد استفدت كثير من اول ثانوي في الصناعه ! . وحتى
في مجال الحاسب الي اخبر ربعي يحفظون شلون يحلون امتحان الكمبيوتر
اللي في الحكومية !!! .. ليش .؟! ..

المستقلة بوجهة نظري افادت كثير ومحتاجه وقت اكثر ودراسات ادق لتكون الافضل
ارجع مرة ثانية واقول .: منهج الحكومية ياهلك تاخذ توفل ؟ طبعا لا . < اهم شي حاليا
التوفل والايلس علشان تقبلك اي جامعه لازم يكون عندك توفل وحتى جامعة قطر اللي كلن
يقلل من قدرها صارت تطلب توفل . المستقلة على الاقل عندها خطه انها تاهلك من ليفل الى
ليفل في مستوى الانجلش .!

اهم نقطة تكلمت عنها الانجلش ومع احترامي للغه العربية في شنو راح نستفيد منها !
ابي اعرف . او في شنو فادتنا . اذ جامعاتنا العربية ماتطلب شهادة لغه عربية من بيطلب !

من وجهة نظري المدراس المستقلة ناجحه بنسبة كبيرة طبعا ومع تحفظي على بعض المدارس
القليلة واعتقد ان المجلس اتخذ اجرائاته وياهم بسحب الترخيص وتغير اداري ومنهجي .

وفي السنوات القادمه نحتاح ان نوحد المعاير في كل مرحلة علشان لو انا تخرجت من اعدادي
اقدر واكيد اني اكمل اللي خذته في اعدادي و اواصل عليه في ثانوي ويكون نتيجة كل هالدراسة
شي ملموس ومعترف فيه ويفييدني في الجامعات العالمية حتىى .

واسمحولي ع الاطالــة
:)

[Ahmed Alobaidly]

اتمنى اشوف ارائكم في هالموضوع
وخصوصا انكم مريتوا بتجربة الوزارة والتغيير الى المجلس الاعلى وكل
هذي الامور
رايكم يهمني

لاهنتــوا :)

[Hemyan Al-Kuwari]

صح كلامك

في وحده من اهلنا بالابتدائي حاطين لها درجه كبيره بالعربي بس للاسف مستواها ضعيف

[A.Q.Alamri]

اذا جيت بتكلم عن نفسي ..
درست اول ابتدائي لين ثالث اعدادي بمدرسه حكوميه ..
ومثل ماذكرتوا كله يعتمد على الحفظ..مافي شي تعتمدين فيه على الفهم
اذا انتي حافظه الدرس وصامته راح يجيج نفس الاسئله ..من غير لا لف ولا دوران..

يوم دخلت الثانويه المستقله..
اول ثانوي كان من اسهل ما يمكن .. الدروس وايد كانت سهله..
والكل ياب درجات ممتازه .. في البدايه صح تعبنا لان اول مره ندرس المواد بالانجليزي
بس يوم صار الاساس عندنا صح .. عرفنا نكمل طريقنا في ثاني وثالث ثانوي..
وكان كل شي يتعلق بالفهم .. يعني في هالـ3 سنوات اللي راحت ما عتمدت على الحفظ
يعني نسبه الفهم 90% والباقي حفظ
انا بالنسبه لي اقول الحمدلله اني تخرجت من مدرسه مستقله
لاني متأكده ان راح تفيدني عشان اكمل دراستي الجامعيه

مب كل المدارس تدرس بنفس نظام مدرستنا ..
يعني كل مدرسه لها نظام مختلف عن الثاني..
ويوم جيت اقارن المدارس الثانيه في مدرستنا .. شفت ان مدرستنا هي الافضل ..<< وجهه نظر
بس الظلم اللي في الموضوع ان محد يرسب في المدارس المستقله
شالفايده اذا الوحده راح تنقل من صف لين ثاني .. من غير ماتنجح
وتتعلم المعايير المطلوبه .. يعني هالشي وايد راح ياثر عليها ..
خصوصا انها راح تواجه متاعب في دراستها .. ماقول غير الله يعيين

وسالفه الشهاده الثانويه سالفه ثانيه ..
يعني معقوله مدرسه مستقله عندها طالبات بيتخرجون
ما فهموهم شلون بيكون توزيع الدرجات.. او شلو يطلعون نسبتهم
لو تشوفونا يوم طلعت النتيجه
طلعوا 3 طرق عشان نحسب النسبه..
وكل طريقه لها نسبه غير عن الثانيه << صج تعقدنا لان في فرق واضح في النسب

على العموم .. المدارس المستقله ليحين تطور في نفسها ..
وعقب كم سنه المدارس الحكوميه راح تغلق.. واكيد راح يحلون هالمشاكل اللي قاعده تصير

ويعطيييك العاافيه اخووي على المووضووع الحلووو

[A.M.I]

الرسوب فالمستقلة فقط لمرحلة الاعدادية والثانوية
أما الابتدائية مافي شي إسمه رسوب

[A.Q.Alamri]

A.M.I هلا اختي ..

والله اول مره اعرف هالشي..

اوكي .. نقول ان كلامج صحيح ومافي رسوب بالمرحله الابتدائيه ..

شالفرق .. ؟؟!!

يعني بتقولين ان الطلاب لازم يتعلمون الاشيا الاساسيه في الابتدائي ..

بعدين ولين دشو الاعدادي والثانوي ..؟؟ شبيكون وضعهم ..؟؟!!

ان الصراحه ماعجبني موضوع اذا كنت طالب اعدادي او ثانوي ماترسب

على العموم مثل ماقلت من قبل .. اكيد المجلس الاعلى راح يدارك هالاخطاء اللي قاعده تصير

ويطورون التعليم في قطر ..

[A.M.I]

للتوضيح فقط

أنا ضد ان مايكون في رسوب فالابتدائية مو مع

وانشالله ينلغي هالنظام


:)

[Ahmed Alobaidly]

انزين ليش مايكون نظام مجمعات تربوية في كل قطر
مثل مجمع البيان وعمر بن الخطاب
خطيط ومناهج متواصلة تفيد المرحلة الثانية

يعني اللي بتاخذه في الابتدائية تكمله في الاعدادي وتواصل عليه في الثانوي
وش رايكمـ ..

وبهالشكل راح يصير تعاون في كل مدارس قطر احسن وافضل من كل النواحي
وعلى الاقل بنضمن ان الولد او البنت لين بتخلص بتكون فاهمه صح وماخذه كل المواد
ودراستها ومتاسسه عليها مضبوط من اول لين ثالث ثانوي


..