تعتقدون إن فية أمل ... )-:

[Mohd.M.AL-Marri]

السلام عليكم ورحمة الله وبركاتة ..

أنا سعيد بالمشاركة في هذا المنتدى الراقي .. بخدماتة .. وبأعضائة .. صراحة .. مع إن مشاركتي متأخرة .. ولكن ...... المهم .. أنا قلت بشارك معكم .. لعل وعسى الله ان ينفعنا بكم .. وتنحسب في موازين حسناتكم ..

بغيت أعرفكم على نفسي .. وتشوفون .. الحلم اللي انا عايش فية ولي ألحين ماتحقق .. والله كريم .. بس ياريت تقرون كل شي ..

الإسم : محمد ..

العمر : قريب الـ27 تقريباً ..

الجنسية : قطري ..

الموهل : ثانوية عامة .. سنة 98/99 .. بمجموع 63.6%

الحالة : موظف حكومي ..

الخبرات السابقة :

درست في الكلية التكنولوجية القديمة (مدينة خليفة الشمالية) من 1999 وحتى نهاية الـ2000 .. وقد انهيت 24 ساعة .. وقد عرضت على وظيفة اّنذاك .. وقبلتها .. بعد ماألح علي الوالد .. ولكنها كانت مشروطة .. بترك الدراسة في التكنولوجية.. وتحويلها للموازي بجامعة قطر ..

سجلنا في الموازي بـ2001 .. ولكن الصدمة في إنهم لم يحسبوا الساعات المكتسبة من الكلية والسبب( نظامنا غير ونظامهم غير ) وراحت الساعات .. مع ان أرقام المقررات موحدة .. وكان معدلي فيها من جيد الى جيدجداَ .. وانجبرنا ندخل جامعة قطر من جديد .. تخصص الـIT .. وسنة ونص .. وعقبة طلعت .. بسبب التكرار .. صراحة ماإستحملت .. درسوني تأسيسي من جديد .. وكان كل شي مكرر .. لأني اخذت كل المقررات ونفس الشيء .. قبل .. فما أستحملت وطلعت من جامعة قطر .. بلا اذن ولا اي شي ..

المهم .. انا من طلعت من الجامعة2002 ولي الحين .. وانا أبي ادرس خارج الدولة .. فحاولت بجهدي كله .. وكل ماأفتح باب .. ينسد في وجهي .. ولكن الحمدلله رب العالمين .. مايأست .. والحين أبي اكمل .. إن شاء الله .. وهالسنة قافلة عندي حدها .. بكمل برا يعني بكمل .. غصب ولا طيب .. عندي طموح غير شكل ..

-------------------------------------------------------

والحين أتمنى تساعدوني في هالموضوع .. لاني غشيم كلش .. ماأعرف أي شي عن الدراسة بالخارج .. وياريت تساعدون اخوكم العود الصغير ..

((( انا بادرس على حسابي .. وبحاول أشد حيلي اول سنة واحول على حساب البعثات .. وترا مجموعي في الثانوية كان 63.6% .. وخاطري ادرس .. علوم سياسية أوعلاقات عامة أو ودولية او شؤون دولية .. المهم شيء من هذا القبيل .. وماأدري وين ادرس بريطانيا ولا أمريكا ولا فرنسا .. وحدة من هاذي الدول )))

((( ممكن تفيدوني وتقولون لي .. كم تكلف الدراسة في الخارج بالضبط ( ترا معاشي حوالي الـ7000 والحالة المادية تمشي بإذن الله .. عندي شوي مدخرات ).. ووين احسن دولة للدراسة .. واحسن جامعة في هالتخصصات .. وشنهو المطلوب مني .. ايلز أو توفل .. وهل فية فاونديشن ولا .. لا .. وشكثر ادرس وأتم برا .. ولا كم كورس .. يعني مدة الدراسة للبداية .. ( لأني حاس إن الشغل ماراح يعطيني تفرغ .. فناوي اجمع أجازاتي وأدرس ) .. وشو رايكم في هالموضوع )))

ودمتم .. ودام المنتدى ذخراَ بأعضائة .. وسامحونا على الإطالة ..

محمد المري ..

[Abrar Al-Janahei]

اتمنى يردون عليك بأسرع وقت .. بارك الله في قهمتك ..

وان شاء الله تخلص وترد قطر بالشهادة

الله يوفقك يا محمد

[M.AL-M]

السلام عليكم ورحمه الله وبركاته

اخوي محمد انا طالبه في استراليا ادرس ماجستير وجايه على حسابي

وظروفي المادية مقاربه لظروفك لكن ابغي اعطيك عده نقاط تفكر فيها

1- معاشك ما راح يكفي للدراسه والمعيشه في البلاد المذكوره لغلي المعيشه فيها
2- هل بتدرس ماجستير او بكالوريوس المده الدراسية مختلفه وبالتالي التكاليف
3-هل لغتك الانجليزية كافيه لتجتاز الاليس او تبغي دراسة لغه بالجامعه اللي ناوي عليها؟

نصائحي لك من خلال تجربتي:

لظروفي المادية اخترت بلد قويه بجامعاتها وما تقل عن بريطانيا وامريكا لكن الفرق انها ارخص بالدراسه والمعيشه وبالتالي تناسب دخلي فوقع اختياري على استراليا

دراستي لمده سنة بس زادت سنه ثانية بسبب دراستي للغة فاصبحت سنتين والدراسه هنا سهله نوعا ما

وطبعا خذيت جامعه من الجامعات المعترف بها.

الحقيقة ان سر النجاح دائما اخوي محمد هو العزم والعزيمة بمعنى اخر الارادة القوية تهدم الصعاب والله يوفقك ويكتب لك الصلاح

واي استفسار انا مستعده

اختك أم جابر

[Mohd.M.AL-Marri]

أخت أبرار .. أشكرك على الرد .. ويارك الله في قهمتك تو .. (-:

واخت ام جابر .. الله يوفقك يارب .. وماقصرتي على المعلومات .. انا صراحة ناوي ادرس بكالوريوس .. وبخصوص الاّيلز .. انا مريت عالبرتش كونسول .. وناوي اقدم الدورة في 15/6 والأختبار إن شاء الله عقبها على طول .. انا لغتي ولله الحمد والمنة .. جيد جداّ .. بس أكاديمياً .. نص ونص .. انا سوت لي الاخت اللي في المعهد البريطاني .. تيست سريع .. جس نبض يعني .. للاّيلز .. وخذت فية متوسط .. وهي متفائلة وانا بعد .. وتقولي بتنجح وبتجيب درجة ممتازة إن شاء الله ..

عالعموم .. انا قبل ظروفي المادية مش ولابد .. والوالد والوالدة من الناس( زي مابيقولوا دقة قديمة ) الله يطول فعمارهم .. وكانوا رافضين الفكرة بتاتاً .. بس السنة هاذي شيء غير .. هلي متحمسين شوي .. وانا واجد .. وعندي مدخرات .. إن شاء الله إنها بتكفي سنة ..

وانا في إنتظار الأخوة الباقين .. من غير قصور في أحد .. وياريت يردون علي بسرعة .. علشان ألحق اسوي شي .. تسجيل ولا فيزا ولا قبول .. وعلى الله ..

ودمتم ..

[Khalid Al-Qahtani]

بسم الله الرحمن الرحيم

يا هلا بك اخوي وحياك الله...

طبعا الحين تغيرت شروط البعثات...

يعني اللي عليك انك تجيب قبول غير مشروط من الجامعات الموجوده بالقائمه...

وباذن الله تحصل بعثه على حساب المجلس الاعلى للتعليم...

يعني اللي عليك تشوف الجامعه اللي تبيها...

وتقدم عليها وتشوف شنهي متطلباتها وتوفرها لهم وباذن الله يجيك قبول...

وارفقت لك صوره من خبر جريدة الرايه من موقع المجلس الاعلى للتعليم...

http://www.education.gov.qa/hei/2008-2009/raya05052008.pdf

والملف موجود بالصفحه هاذي من الموقع:

http://www.education.gov.qa/content/resources/detail/23548

والله يوفقك...

[Mohd.M.AL-Marri]

مشكور ياأخ خالد .. جعلك ذخر .. صراحة فرحتني بهاذي المعلومة .. بس هل تعتقدون .. إني اذا جبت قبول غير مشروط .. من الجامعة .. وقدمت عالبعثات .. تهقون بيوافقون على إبتعاثي .. على حسابهم .. اتمنى ذلك .. وهل .. إذا الله قسم ووافقوا يبعثوني على حسابهم .. تهقون إنهم بيدبرون لي تفرغ من الشغل ولا .. لا .. هنا السؤال المهم ..

ودمتم .. ولازلت متعطش لدرركم ..

شكراً ..

[Rowda M Al-Ali]

السلام عليكم ورحمة الله وبركاته


أكيد في أمل أخوي شلون مافيه أمل .. اللي ادرسوا وخلصوا مهب أحسن منك في شي طال عمرك :)


مداخله بسيطه بعد أذنكم


قبل فترة , كان من شروط الإبتعاث أن المتقدم حصل على الثانوية العامه خلال الخمس سنوات الماضيه
أما الحين مادري يمكن انلغى هالقانون , تأكدوا


شي ثاني

الجامعات تطلب 5.5 عشان تدخل السنه التأسيسيه

حط في بالك هالشي

أما اذا كنت تبي تجتاز السنه التأسيسه , فشوووف كم الدرجة اللي طالبتها الجامعه ,بعضهم يطلبون 6.5 أو 7

بعد تأكد عشان تكون على بينه


بالتوفيق ان شاءالله

[Mohammed Al-haddad]

قبل فترة , كان من شروط الإبتعاث أن المتقدم حصل على الثانوية العامه خلال الخمس سنوات الماضيه
أما الحين مادري يمكن انلغى هالقانون , تأكدوا




في موقع المجلس والدليل الجديد 2008- 2009

في توضيح لنقطة الي ذكرتها اختي روضة

إذا بتروح كمبتعث جديد ما يصير لأن شرط الخمس سنوات موجود للشهادة الثانوية ( للأسف )

أما إذا بتورح كبعثة موظف ( من عندهم مب من عند المكان الي تشتغل فيه بس بشرط أن المكان الي تشتغل فيه ما يعطي بعثة حق موظفينه ) فممكن بس تحتاج إلى قبول غير مشروط من الجامعة نفس ما قالوا اخواني و اخواتي بس قبول غير مشروط + كتاب ترشيح من مكان العمل ( لانه بعثة موظفين )

و إذا حاب تطلع على الدليل هذا رابط http://www.education.gov.qa/hei/2008-2009/Arabic2008-2009.pdf

[Fahad Buhendi]

في بريطانيا

1. تحتاج لغة (لمدة سنة او تجيب توفل 500 من قطر)

2. تحتاج فاونديشن (سنة)

3. دراسة بكاليريوس (3 سنوات)

التكلفة:

الدراسة قرابة 8000 جنيه استرليني بالسنة

الحياة تكلف 800 الى 1000 جنيه شهريا

التذكرة قرابة 4000 ريال

واذا احتجت سؤال فانا حاضر

والله يوفقك اخوي

[Mohd.M.AL-Marri]

Rowda .. محمد .. فهد .. مشكورين للمرور والرد ..

بس عندي نقطة أخوي محمد ..


أما إذا بتورح كبعثة موظف ( من عندهم مب من عند المكان الي تشتغل فيه بس بشرط أن المكان الي تشتغل فيه ما يعطي بعت حق موظفينه ) فممكن بس تحتاج إلى قبل غير مشروط نفس ما قالا اخواني و اخواتي بس قبول غير مشروط + كتاب ترشيح من مكان العمل ( لانه بعثة موظفين )


ممكن احد يعطيني معلومات وافية عن الموضوع أعلاة ..

وممكن تفيدوني وتقولون لي متى تبدي الدراسة بالضبط .. وكم وقتها ..كورسات ولا .. متواصل ..

وأنا منحرج منكم صراحة .. وتحملونا ..

وشكراً ..

[Aljazi Almannai]

السلام عليكم ورحمة الله وبركاته

بسم الله الرحمن الرحيم

اخوي محمد .. اشكرك واحييك على عزيمتك واصرارك .. انا قريت الموضوع كامل مع ردود اخوانا و خواتنا الطلاب .. جزاهم الله الف خير .. كفوا و وفوا .. اخوي لاتنسى ان الدراسه ماتعرف كبير ولا صغير .. وانا اضم صوتي واقولك كمل والله يفرجها عليك .. انا حبيت استفسر اذا الله لايقول وماصارت لك بريطانيا انت حاط بلان ثاني؟ دراسة ثانيه وفي بلاد ثانيه ؟

خلني اختصر اسالتي .. انت مو مفكر تدخل العسكريه؟
انتظر الاجابه

وموفق باذن الله وين مارحت

اختك

[Mohd.M.AL-Marri]

أشكرك .. اختي الجازي .. ردك أنتي والاخوان .. يعطيني دافع قوي .. واصرار على .. تكملة الدراسة .. ويحمسني جداً ..

وبالنسبة للبلد .. والله انا فكرت وفكرت وفكرت .. ورحت للمجلس الأعلى .. ونصحوني هناك بأمريكا .. قالوا بريطانيا .. عندهم عوائق واجد وعقبات صعبة عالطلاب .. بس امريكا أحسن وأسهل .. وأرخص في الدراسة والمعيشة .. وانا نويت بإذن واحد احد .. أكمل في أمريكا ..

وبالنسبة للعسكرية .. أتمنى .. لكن .. هم يقولون أحنا شياب .. ويبيلها واسطة .. وانا واسطتي الله سبحانة وتعالى ..

وبعدين العسكرية .. بتهدم كل شي يتعلق بتكملة دراستي .. لأن الأجازات والتفرغ صعب صعب جداً .. ومادري يخلونك ولا مايخلونك تكمل .. مزاجية ..

مع إحترامي الشديد للعساكر ..

وعلى فكرة أختي تخصصك حلو .. وناوي أدخلة ياهو .. ولا العلوم السياسية .. إذا فية فرق .. وفية بعد العلاقات الدولية أو شؤون دولية مادري والله .. بس كلهم حلوين ..

ودمتم ..

[Aljazi Almannai]

السلام عليكم ورحمة الله وبركاته

موفق اخوي محمد وين مارحت .. والله يكتب لك الخير ويرضيك فيه
فعلا الدراسه في امريكا غير .. من تجارب الاهل :)

وبالتوفيق للجميع
اختكم

[Mohammed Al-shriem]

آخووي محمد ..


الله يووووفقك يآآآرب ..

وآكيييد في أمل ..


بس أنا ماراح ارد على أسئلتك الحين ..!

بسئلك سؤال ..

انت حاط في بآلك تخصص معيين ؟


يعني تبي هندسه .. ولا شتبي تدرس بالضبط ..

لأني مادري انت مخلص أدبي ولا علمي !؟

[Mohd.M.AL-Marri]

هلا اخوي محمد ..

أشكر لك أهتمامكم .. والعذر على التأخير في الرد ..

أولاً: انا تخصصي كان .. أدبي/فرنسي ..

ثانياً: أنا نفسي في تخصص .. ينفعني في المستقبل .. إن شاء الله .. يعني مايكون محدود العمل بة في مجال او شركة واحدة .. المهم .. يقولون في كتاب (المرشد الأكاديمي) في المجلس الأعلى .. يجب ان تتبع ميولك .. وتختار تخصصك حسب عملك وهواياتك في لحياة .. يعني إذا كنت تحب الناس والعلاقات وخدمة اللي حواليك .. تختار العلاقات العامة .. وإذا كنت تحب اتطقطق في مسجل ولا رادو .. تختار مجال الإلكترونيات .. يعني ..

المهم ( عن نفسي ) .. أنا احب اخدم الناس كلهم .. وبطريقة تنافسية .. واللي يكلمني يبي شي .. أبذل قصارى جهدي .. لأرى نظرة الإنبهار على وجهة .... واحب التحليل .. تحليل الشخصيات أو تحليل المشاكل .. وإيجاد حلول لها .. وأحب التخمين وتوقع الزين .. دايماً هالأشياء تصيب معي ولله الحمد .. سبحانة ..

يعني تقدرون تقولون .. علاقات عامة ..

(( بس ممكن حد يقدر يقول لي .. هل فية تخصص يحتوي على العلاقات العامة والشؤون الدولية .. لأن نفسي فية واجد .. صراحة ))

وسامحوني عالإطالة .. ودمتم ..

[Aljazi Almannai]

السلام عليكم اخوي محمد .. واسمح لي على التاخير
اخوي في فرق بين العلاقات العامه و العلاقات الدوليه او الشؤون الدوليه .. لكن الفرق بسيط انت وين تبي تشتغل لما تتخرج في الخارجيه او في احدى السفارات القطريه او الديوان؟؟ او في اييييييييي مكان في قطر؟ وزارة, هيئه, بنك او اييي مكان يخطر في بالك بس في قطر حتى في الديوان؟؟
والتخصصين مطلوبين في الدوله :)

وبالتوفيق .. وفي انتظار الرد

[Mohd.M.AL-Marri]

حياك الله .. أخت الجازي .. ومسموحة ..

انا صراحة شغال .. ألحين .. بس شغلي مايعطيني حقي .. من الإبداع والإبتكار والتفاني في العمل .. شنسوي .. الحمدلله رب العالمين .. المهم .. انا قريت عن تخصص .. الشؤون الدولية .. وحصلتة عام وشامل .. ومثل مايقولون من كل بستان زهرة .. وهذا انا أحبة .. لانة جامع كذا تخصص وشغلة .. أقتصاد وسياسة وأجتماع وانسانيات .. يعني .. عجبني التخصص صراحة .. وبختارة إن شاء الله ..

أبشركم انا الحين .. سجلت في الاّيلز والتوفل .. وببتدي فيهم .. خلال الإسبوعين الجاية .. إن شاء الله .. انا حبيت أخذهم الإثنين مع بعض .. علشان ما أنذل بالقبول في الجامعة .. وعلشان الموافقة تجي اكيد .. بإذن الله .. وبس ..

وحبيت أقولكم نبذة عن تخطيطي .. المستقبلي ..إذا الله أراد .. ناوي أدرس مع الشؤون الدولية .. تخصص ثاني .. ونفسي في العلاقات العامة او التسويق .. محتار فيهم ..

شرايكم .. تعتقدونها صعبة علي ..

ودمتم ..

[Aisha Ali.A]

ادري خبررتي ضعييفه في هالاموور..لكن حبيت اسيير على الموضووع:D

اي حد يقدر يدرس بره..لو عندك العزيمه..وصج تبي الشي بتقدر تسوويه!!!

والله يووفقك اخووي...;)

[Mohd.M.AL-Marri]

أحسنتي أختي عايشة .. الله يكثر ن أمثالك

[S.J.A]

وحبيت أقولكم نبذة عن تخطيطي .. المستقبلي ..إذا الله أراد .. ناوي أدرس مع الشؤون الدولية .. تخصص ثاني .. ونفسي في العلاقات العامة او التسويق .. محتار فيهم ..

شرايكم .. تعتقدونها صعبة علي ..

ودمتم ..


أخوي مافي شي صعب دامك تملك العزيمه والإصرار

بس ممكن توضيح بسيط؟

إنت تقصد إنك تبي تدرس تخصص إسمه ( شؤون دوليه وعلاقات عامه ) أو ( شؤون دوليه وتسويق ) كتخصص واحد .. أو تبي تدرس الشؤون الدوليه قبل ، و بعد ماتتخرج تختار احد التخصصين المذكورين ؟

:)

[F.H]

لو تركز على تخصص واحد أفضل عشان معدلك الدراسي يكون عالي ..

.. والعلاقات العامة والتسويق تقدر بعد ماتتخرج أو وقت الإجازه تدرسهم بأي معهد وتاخذ دورات فيهم .