المرآءه والمنصب!!!!

[Nory.n.n]

السلام عليكم ورحمة الله وبركاته

صبحكم الله بالخير

موضوع في بالي لي وجهة نظر فيه حبيت اطرحه هنا ونتبادل الاراء :)

انا اشوف المرآءه لاتصلح لاشغال المناصب

وهالشي اقتبسته من الواقع المر كل مالوحده تمسك منصب في مكان ما هالمكان يعتفس فوق تحت

امثله لتقريب الصوره( احس هالامثله بتوديني ورى الشمس بس احنا في بلد ديمقراطي خخ)

جامعة قطر ( كل يوم قانون ومابين كل قانون وقانون كاتبين نوت بألغائه ) من رئيستها..؟؟
هشش لاحد يتكلم ويقول من

المجلس الاعلى يوم اعتفس فوق تحت وكرهو الناس بالتعليم من كانت المسئوله عنه؟؟؟

المدينة التعليميه وقوانينها الي كرهت العالم تدخلها قوانين متعسفه ( من راعيها واششش لاحد يتكلم )

انا مب ضد المرآءه الطموحه الي ودها تشغل منصب بس لاجات تشغله تراعي ربها باصدار القوانين وتعرف ترى يوم لك ويوم عليك ولازم تيسر على الناس عسى الله ييسر عليها يعني لازم تاخذ بحاجة الناس وضروفها بعين الاعتبار مب تضرب بها عرض الحائط

ومن وجهة نظري

المرآءه الطموحه صج!! الي تطمح في بناء بيت واسره سعيده تهدف الى اخراج جيل ناضج قادر على تحمل المسئوليه وخدمة نفسه ومجتمعه يتحلى بالدين والاخلاق هني لوسوت هالشي بتكون صج امرآءه ناجحه وشاغله اهم منصب خلقت وكرمت من اجله

عسى الله يوفق الجميع لما يحب ويرضى

منتظره ارائكم حول الموضوع

[M. Al-Merekhi]

وعليكم السلام ورحمة الله وبركاته

مرحبا اختي الغاليه ....الصراحه موضوع حلو و حساس شوي ... بس باتكلم بكل موضوعيه ...

انا اتفق معاج ان جامعة قطر حاله سبشل و المجلس الأعلى ... محد يقدر ينكر الاحوال السيئه هناك ... بس في قيادات نسائيه رهيبه الصراحه ... اولهم سمو الشيخه موزه بنت ناصر المسند الله يحفظها رئيس مجلس ادارة مؤسسة قطر (مكان شغلي)...

انتي اكيد تتكلمين من تجربتج اختي الغاليه و انا اتكلم من تجربتي و اطلاعي على مشاريع سمو الشيخه و الخطط الموجوده لخدمة المجتمع ... وانا اشوف ان لولا هالجهود كان احنا بنكون في وضع غير عن اللي احنا فيه ... وضع نوعا مظلم ....

جامعة قطر حاله شاذه و المجلس الأعلى بعد بس ماظن ان هالحالات تكفي ان احنا نعمم ان المرأه ماتنفع في المناصب ..الصراحه انا اشوف ان هالموضوع نسبي و من الصعب جدا التعميم...

باعطيج مثال ... أشغال ... شنو المكان معتفس! و القياده اللي فيه رجاليه ... طبعا في امثله على قيادات رجاليه روعه (95% من البلاد) بس اللي ابي اقوله ان الموضوع ماله علاقه بالمرأه او الرجل كثر ماهو مرتبط بوضع الشخص المناسب في المكان المناسب...
:)
الله يوفق الجميع

[Nory.n.n]

يالغاليه اؤيد هالشي انا انه الحريم لهم جهود ماحد يقدر ينكرها ولامكانو قالو وراء كل رجل عظيم امرأه

بس انا اقول لامسكت المنصب تنسى العالم وتسوي اشيا من غير ماتنظر لحال الي تحتها وقوانين واشيا متعجرفه للغايه

والشيخه موزه ماحد ينكر فضلها وجهودها المبذوله الي خلت قطر من بلد صغيره لبلد كبيره تجمع اكبر الجامعات الاوروبيه بس انا خصيت نقطه معينه بغض النظر عن الجهود المقامه واهي اصدار القوانين والتشريعات

واشكرج على ابداء وجهة نظرج


في انتظار البقيه

[Jaber Al-Musallam]

ابي اقوله ان الموضوع ماله علاقه بالمرأه او الرجل كثر ماهو مرتبط بوضع الشخص المناسب في المكان المناسب...
:)
الله يوفق الجميع

اختي المريخي انا اتفق وياج في اشياء وايد قلتيها في المنتدى ويعجبني الفكر المنطقي ,
بس هل مقوله خاطئه للأسف , مناصب قياديه ليست للمرأه , هذا يخالف الدين :)
والدين صريح عما بحصل

بس كان عندي تعقيب على هذا .
ويعطيكم العافيه على الموضوع

[Hassan Al-Ibrahim]

جبر وش تقصد بالمناصب القيادية؟

[Jaber Al-Musallam]

يأمر وينهي , قياده .
يمكن فهمي غلط للحديث , مب حافظه عدل:
لا بارك الله في قوم تقوده امرأ

[Omar Al Hazaa]

بسم الله الرحمن الرحيم..

والله ماتوقعت هالموضوع يطلع من بنت..

اختي نوري مدام انج اعترفتي بهالشي الخطير..

وانا شفت توقيعج بعد خطير..

والشباب يستحون اقصد يخافون يحطون مثله..

اختي نوري اتوقع لج مستقبل باااااااهر ومنور..

انتي بس استمريتي على الطريق الي انتي فيه..

اما بخصوص موضوع المرأه والمنصب..

جامعة قطر؟ ليش مايخلون طاقم تدريس البنات يتكون من اناث فقط؟

ليش مايخلون طاقم تدريس الشباب يتكون من ذكور فقط؟

ليش؟ ماعرف السبب؟ بس عميدة الجامعه امرأه؟

احنا اصلاً ضد خروج المراه للعمل الا للضروره؟

جامعات المدينه التعليميه والخلط الي فيها؟

هذا يعبر عن نتايج استلام المرأه للمناصب القياديه؟

خلاص مانوثق في استلام المراه للمناصب؟

ونبي المرأه تتنحى عن كل المناصب القياديه الي استلمتها واعفستها؟

\
/
\
/
\
/
\
/
\

قال صلى الله عليه وسلم "لن يفلح قوم ولوا أمرهم امرأة"

يقولون لك لا مساواه ومايصير؟؟

قال تعالى "وَلَيْسَ الذَّكَرُ كَالأُنثَى"

على أي اساس هالمساواه؟

بقولكم الحين على أي اساس؟

\
/
\
/
\
/


على اساس ان البنت تسوق دورية الشرطه واتدور عند الاند مارك والستي في نص الليل؟؟

ليش؟ لازم تسهر وتقوم بأعطاء مخالفات المرور..

عيالها هالبنت وين؟ يتم تربيتهم على يد الأندونيسيه والفلبينيه؟

عشان ينشأون على حب الافلام والمجمعات التجاريه والمسلسلات الخليجيه؟

\
/
\

على اساس ان المرأه حلوه؟ ولازم يصفونها فالوزارات تخلص المعاملات؟

ليش؟ لأن مكياجها جذاب وتعاملها رقيق مع الي جايين يدفعون مخالفات المرور؟

ومع الي يبون يسون تجديد للجواز ولا البطاقه الشخصيه؟

/
\
/

على اساس ان البنت تصير امرأة اعمال؟

زوجتك وين؟ والله عندها صفقة غاز في المانيا؟

\
/
\

على اساس ان البنت تصير محترفه فالرياضه؟

زوجتك وين؟ والله عندها مباراه احترافيه فالارجنتين ههههههههههه..

/
\
/
\
/
\
/

هالبنات من يربي عيالهم؟ من يرضعهم؟

في اجازة امومه ورضاعه فقط للأبناء الجدد..

وماننسا الاجازه السنويه..

وفي حليب صناعي اذا طرأت مباراه ولا صفقه عاجله؟

وطبعاً هذا يساعد للوقايه من "الامراض الي تنشأ عن ترك الرضاعه الطبيعيه!"

ويالله المجتمع محترف ومتطور وحضاري؟

الابناء لازم يرتاحون لأن المرأه تسهر الليالي برا البيت للحرص على سلامتهم؟

وهالشي راح يعطيهم عطف وحنان الام؟

ودائماً نحو التقدم والحريه والمساواه والديموقراطيه؟؟

والبنات لازم يتخصصون تخصصات غريبه عجيبه؟

استمروا على تخصصاتكم لأن هذا تطور وحضاره؟

\
/
\
/
\


مانبي نتكلم عن الايجابيات الثانيه الي تكون في مشاعر ونفسية البنت؟
ويمكن الحالات الي ذكرناها بعد شاذه؟

[Omar Al Hazaa]

وين الانتخابات؟

وين الحريه الي تخلينا نختار من يتحكم في تعليم بناتنا وعيالنا؟

هذا الي يخليني دايماً اوقف على اول باب للأنتخابات واحط صوتي على طول لأني اشوف تأثير الانتخابات العجيب؟

[M. Al-Merekhi]

اختي المريخي انا اتفق وياج في اشياء وايد قلتيها في المنتدى ويعجبني الفكر المنطقي ,
بس هل مقوله خاطئه للأسف , مناصب قياديه ليست للمرأه , هذا يخالف الدين :)
والدين صريح عما بحصل

بس كان عندي تعقيب على هذا .
ويعطيكم العافيه على الموضوع


مرحبا اخوي جبر .... انا اتفق معاك ياخوي على وجهة نظرك ... انت تقصد الحديث "لن يفلح قوم ولوا امرهم لامرأه" يمكن تقصد الامور المصيريه و شؤون الدوله و امور الحياة لكن في بعض المجالات اتوقع لا ضرر انه تمسك المرأه بعض المناصب القياديه ... صح و لا لاء؟

اخوي حسن سأل اي مناصب تقصد؟

وانا اسأل نفس السؤال ... لان منصب عن منصب يفرق ... و طبعا الحديث ثابت و راسخ ومحد يقدر يشكك فيه ... مايمنع ان بعض القيادات النسائيه افضل من الرجاليه في بعض المجالات وليس كلها ....


اخوي باعطيك مثال عن نفسي ... مب القصد التشهير لكن انا حاليا ماسكه اداره استراتيجيه في مؤسسة قطر .. كان مديرنا قبل رجل انجليزي بس تعبان ومامنه فايده فالاداره العليا عينتي مديره عشان ارتب الامور الى اجل غير مسمى ... للحين ما كملت ال 25 من عمري و الحمدلله فضل من رب العالمين اني قادره امسك منصب اداري وليس بالضروره قيادي ... في حالتنا هذي ال Gender
ما يفرق .. بس الكفاءه تفرق ...


ارجع و اقول اني اتفق معاك على حسب الموقع و المنصب نفسه ... في اماكن حساسه ما تقدر تمسكها المرأه مثل قيادة الجيش او الحكم المطلق ... حتى الملكه اليزابيث ماتقدر تحكم بلادها بدون رجال (المجلس) واللي سلطته اكبر منها ...

وشكرا على كلامك الطيب ... من طيب اصلك :)

[Jaber Al-Musallam]

انا ماني مفسر للحديث فماقدر اقول شنو رسولنا محمد صلى الله عليه وسلم كان يقصد ,
و انا ماقدر افسر الحديث على كيفي وقول المقصود به كذا و كذا , و كلامج صحيح اختي ,
وانا ادري بحسن يوم سألني السوأل وهقني هههه الصراحه سوأل ذكي .

فأذا في حد يقدر يوفر تفسير للحديث (مالقصود بالقياده ) اي:
فقط قياده البلد؟ , ام اي منصب قيادي يسن القوانين؟ او ... او....
(انا عن نفسي ماعرف , ما المقصود , وبالنسبه لفكري البسيط الحديث واضح والصراحه مافكرت فيه وايد , يمكن فهمي له غلط , ودليل على فهمي البسيط ماقدرت ارد على حسن)

فالي عنده اي تفسير يفيدنا يزاكم الله خير.

[Omar Al Hazaa]

^
^

اختي M عندي سؤال اذا ممكن..

انتي بصفتج مديره في مؤسسة قطر..

شغلج فيه اختلاط ولا لا؟

وانتي تقولين مديركم كان واحد..
هذا من مظاهر الاختلاط الي ماله داعي..

واذا صارت اجتماعات؟

انا ماأيد ان بنات قطر يجتمعون مع ريايل اجانب مهما كانت الاسباب..

اما اذا شغل فيه تدريس حق البنات ولا وحده تكون دكتوره نساء..

هالشي بيكون طيب..

والتدريس بعد..
امس شفت صورة اجتماع حق المدرسين والمدرسات في جريدة الشرق..

المهم كانوا قاعدين على نفس الطاوله..

دورت الصوره في موقع الشرق وخساره ماحصلتها...

خليت امي تشوف الجريده واهيه مشرفه اجتماعيه؟

قلت لها ليكون انتوا بعد اجتماعاتكم جي؟ قالت لا هاي شي جديد!!

يالله هذي نتايج استلام المرأه للتربيه والتعليم..

شنو سبب تجميع المدرسين على طاوله وحده؟؟ اهاا يمكن الاستفاده من الخبرات؟

محد بيرضا مثل هالاجتماعات حق خواته ولا بناته فالمستقبل!
والله مهما كانت الاسباب..

حديث الرسول صلى الله عليه وسلم بينت نتايجه في كل مكان المرأه استلمت فيه منصب كبير..

[M. Al-Merekhi]

انا ماني مفسر للحديث فماقدر اقول شنو رسولنا محمد صلى الله عليه وسلم كان يقصد ,
و انا ماقدر افسر الحديث على كيفي وقول المقصود به كذا و كذا , و كلامج صحيح اختي ,
وانا ادري بحسن يوم سألني السوأل وهقني هههه الصراحه سوأل ذكي .

فأذا في حد يقدر يوفر تفسير للحديث (مالقصود بالقياده ) اي:
فقط قياده البلد؟ , ام اي منصب قيادي يسن القوانين؟ او ... او....
(انا عن نفسي ماعرف , ما المقصود , وبالنسبه لفكري البسيط الحديث واضح والصراحه مافكرت فيه وايد , يمكن فهمي له غلط , ودليل على فهمي البسيط ماقدرت ارد على حسن)

فالي عنده اي تفسير يفيدنا يزاكم الله خير.


مرحبا اخوي ...

لقيت هالتفسير و الادله المنشوره المتعلقه بهالموضوع و نقلتهم من الانترنت:

دلت الأدلة من الكتاب والسنة على عدم جواز تولي المرأة للولايات العامة ، كالخلافة والوزارة والقضاء وما أشبه ذلك .

1- أدلة القرآن :

قال الله عز وجل : ( الرِّجَالُ قَوَّامُونَ عَلَى النِّسَاءِ بِمَا فَضَّلَ اللَّهُ بَعْضَهُمْ عَلَى بَعْضٍ وَبِمَا أَنْفَقُوا مِنْ أَمْوَالِهِمْ ) النساء / 34 .

قال القرطبي :

قوله تعالى : ( الرِّجَالُ قَوَّامُونَ عَلَى النِّسَاءِ ) أي : يقومون بالنفقة عليهن ، والذب عنهن ، وأيضاً :

فإنَّ فيهم الحكام والأمراء ومن يغزو ، وليس ذلك في النساء اهـ . "تفسير القرطبي" ( 5 / 168 ) .

وقال ابن كثير :

أي : الرجل قيِّم على المرأة ، أي : هو رئيسها وكبيرها والحاكم عليها ومؤدبها إذا اعوجت .

( بما فضَّل الله بعضهم على بعض ) أي : لأن الرجال أفضل من النساء ، والرجل خير من المرأة ،


ولهذا كانت النبوة مختصة بالرجال ، وكذلك المُلك الأعظم ، لقوله صلى الله عليه وسلم : ( لن يفلح قوم

ولَّوا أمرَهم امرأة ) رواه البخاري ، وكذا منصب القضاء اهـ . "تفسير ابن كثير" ( 1 / 492 ) .

2- أدلة السنة :

عن أبي بكرة قال : لما بلغ رسولَ الله صلى الله عليه وسلم أن أهل فارس قد ملَّكوا عليهم بنت كسرى ،

قال : ( لن يُفلح قومٌ ولَّوا أمرَهم امرأة ) . رواه البخاري ( 4163 ) .

قال الشوكاني في "نيل الأوطار" (8/305) :



فيه دليل على أن المرأة ليست من أهل الولايات ، ولا يحل لقوم توليتها ، لأنه يجب عليهم اجتناب ما

يوقعهم في عدم الفلاح اهـ بتصرف .

وقال الماوردي - في معرض كلامه عن الوزارة - :



ولا يجوز أن تقوم بذلك امرأة ، لقول النبي صلى الله عليه وسلم : ( ما أفلح قومٌ أسندوا أمرهم إلى

امرأة ) ؛ ولأن فيها من طلب الرأي وثبات العزم ما تضعف عنه النساء ، ومن الظهور في مباشرة

الأمور ما هو عليهن محظور اهـ "الأحكام السلطانية " ( ص 46 ) .

وقال ابن حزم رحمه الله - في معرض حديثه عن الخلافة - :

ولا خلاف بين أحدٍ في أنها لا تجوز لامرأة اهـ "الفصل في الملل والأهواء والنحل" ( 4 / 129 ) .

وفي "الموسوعة الفقهية" ( 21 / 270 ) :

اتفق الفقهاء على أن من شروط الإمام الأعظم أن يكون ذكرا ، فلا تصح ولاية امرأة ، لقوله صلى الله

عليه وسلم : ( لن يفلح قوم ولَّوا أمرهم امرأة ) ، ولكي يتمكن من مخالطة الرجال ، ويتفرغ لتصريف

شئون الحكم ; ولأن هذا المنصب تناط به أعمال خطيرة , وأعباء جسيمة , تلائم الذكورة اهـ .

وسئل الشيخ عبد العزيز بن عبد الله بن باز رحمه الله تعالى السؤال التالي :

ما موقف الشرع الإسلامي الحنيف من ترشيح امرأة نفسها لرئاسة الدولة ، أو رئاسة الحكومة ، أو

الوزارة ؟

فأجاب :

تولية المرأة واختيارها للرئاسة العامة للمسلمين لا يجوز، وقد دل الكتاب والسنة والإجماع على ذلك ،

فمن الكتاب : قوله تعالى : { الرجال قوَّامون على النساء بما فضَّل الله بعضهم على بعض } ، والحكم

في الآية عام شامل لولاية الرجل وقوامته في أسرته ، وكذا في الرئاسة العامة من باب أولى ، ويؤكد

هذا الحكم ورود التعليل في الآية ، وهو أفضلية العقل والرأي وغيرهما من مؤهلات الحكم والرئاسة .

ومن السنَّة : قوله صلى الله عليه وسلم لما ولَّى الفرسُ ابنةَ كسرى : ( لن يفلح قومٌ ولَّوا أمرَهم

امرأة ) ، رواه البخاري .

ولا شك أن هذا الحديث يدل على تحريم تولية المرأة لإمرة عامة ، وكذا توليتها إمرة إقليم أو بلد ؛ لأن

ذلك كله له صفة العموم ، وقد نفى الرسول صلى الله عليه وسلم الفلاح عمَّن ولاها ، والفلاح هو الظفر

والفوز بالخير .

وقد أجمعت الأمة في عهد الخلفاء الراشدين وأئمَّة القرون الثلاثة المشهود لها بالخير عمليّاً على عدم


إسناد الإمارة والقضاء إلى امرأة ، وقد كان منهن المتفوقات في علوم الدين ، اللاتي يُرجع إليهن في

علوم القرآن والحديث والأحكام ، بل لم تتطلع النساء في تلك القرون إلى تولي الإمارة ، وما يتصل بها

من المناصب ، والزعامات العامة ، ثم إن الأحكام الشرعية العامة تتعارض مع تولية النساء الإمارة ؛

فإن الشأن في الإمارة أن يتفقد متوليها أحوال الرعية ، ويتولى شؤونها العامة اللازمة لإصلاحها ؛

فيضطر إلى الأسفار في الولايات ، والاختلاط بأفراد الأمة ، وجماعاتها ، وإلى قيادة الجيش أحياناً في

الجهاد ، وإلى مواجهة الأعداء في إبرام عقود ومعاهدات ، وإلى عقد بيعات مع أفراد الأمَّة ،

وجماعتها ، رجالاً ونساء في السلم والحرب ونحو ذلك ، مما لا يتناسب مع أحوال المرأة وما يتعلق بها


من أحكام شرعت لحماية عرضها ، والحفاظ عليها من التبذل الممقوت .

وأيضاً : فإن المصلحة المدركة بالعقل تقتضي عدم إسناد الولايات العامة لهن ، فإن المطلوب فيمن

يُختار للرئاسة أن يكون على جانب كبير من كمال العقل ، والحزم ، والدهاء ، وقوة الإرادة ، وحسن

التدبير ، وهذه الصفات تتناقض مع ما جُبلت عليه المرأة من نقص العقل ، وضعف الفكر ، مع قوة

العاطفة ، فاختيارها لهذا المنصب لا يتفق مع النصح للمسلمين ، وطلب العز والتمكين لهم ،

--------------------------------- انتهى النقل ---------------------------------------

ادري رد طويل عريض بس لما قريته الصراحه ارتحت لانه اكد فهمي للموضوع ... القياده تعني امور الشعب ...

[M. Al-Merekhi]

^
^

اختي M عندي سؤال اذا ممكن..

انتي بصفتج مديره في مؤسسة قطر..

شغلج فيه اختلاط ولا لا؟

وانتي تقولين مديركم كان واحد..
هذا من مظاهر الاختلاط الي ماله داعي..

واذا صارت اجتماعات؟

انا ماأيد ان بنات قطر يجتمعون مع ريايل اجانب مهما كانت الاسباب..

..

اخوي حدد مفهوم الاختلاط؟ انا في مكتبي لحالي و عندنا مستشارين اجانب ما بيني و بينهم الا تقارير و ايميلات ... يعني اقل حتى من تعاملي مع دكاترتي بالجامعه ...

وبعدين احنا بيئتنا اكثر بيئه ملائمه للبنات (انا اتكلم عن مكاني بالذات) لان احنا مب مختلطين مع الرجال طول الوقت ... كلن في مكتبه


واذا صار اجتماع ... اعطي الانستركشنز للاخوان المستشارين و خلاص انتهى ...

اخوي لاتخاف ... كلنا هنا بنات عوائل معروفه و اهالينا مايرضون باللاختلاط بس لما شافو البيئه ارتاحو ورضوا ... وانا وحده دخلت اخواني المقابله عشان يتاكدون بنفسهم اني باكون في مكان مستور ... :)

لا تحكم عالامور من صورة بالجريده :)

[Omar Al Hazaa]

^
^
حلو هالشي انج ماتختلطين بالجانب..

هالشي للأسف مش موجود في اماكن كثيره..

مثل البنوك "المرأه تتعامل مع الريايل"

مثل الجوازات "بعد تتعامل مع الريايل"

مثل جامعة قطر..

ومثل ماشفنا الحين بدوا فالتدريس..

للأسف انا ماعرف شي عن الشركات الثانيه..

وماعتقد انها راح تختلف وايد..

لاكن انا تكلمت من الي شفته بنفسي فالاماكن المذكوره..

وغير الاماكن الي ذكرتها في اول رد لي فالموضوع..

وشلون مانحكم من صور الجريده والحريم والريايل قاعدين جنب بعض؟؟

[Omar Al Hazaa]

هذا جزء من جواب الشيخ بن باز الطويل يوم اسئلوه عن تولي المرأه لمنصب الولايه او الوزارات.. وجاوب لايجوز..

وضح الاشياء الي لايجوز للمرأه القيام بها لأنها خاصه للرجل..

"فيضطر إلى الأسفار في الولايات ، والاختلاط بأفراد الأمة ، وجماعاتها"

^
^
^

بنات وايد يسافرون عشان ياخذون اشغال محترمه؟؟ "مايندرى هل سفرهم بمحرم ولا بنفسهم؟"

وبنات وايد يختلطون بأفراد الامه مثل ماذكرنا فالاشغال السابقه؟؟

والحريم نشوفهم اكثروا على راس الوزارات؟

ولا كل وحده تقعد في مكتبها ومالها خص في احد؟

[Nory.n.n]

مافي فرق بين المرااءه والرجال والاسلام ضمن لنا الحق بالعمل

والكفاءه اهي الي تبين هالشي وتثبته يعني نقطة الاختلاف اهي

مب الشغل بشكل عام ولكن المناصب بالتحديد

بتكون لها شخصيه قياديه قادره على السيطره على اجواء العمل والموظفين

بس في حالات ماتقدر تحضر فيها وذلك لظروف اجتماعيه عائليه صحيه حمل رضاعه وماشابه

اما الرجل استاند باي في اي وقت

واهم شي نرجع لدينا الاسلامي ونشوف هل اجاز هذا الشيئ ام لا

بوجه العموم اجاز العمل بوجه الخصوص لم يجيز تولي القياده


اختي المريخي انتي مديره قسم هاي شي عادي مب هاي القياده المقصوده
يعني كلام المدير يمشي على مجموعه بس

القياده المذكوره الي تمشي قرارت ومحد يقدر يغيرها غيرها نفس الوزيره وماشابه

اما لامديره بييجي الاعلى منها يغير عادي

[M. Al-Merekhi]

^
^
حلو هالشي انج ماتختلطين بالجانب..

هالشي للأسف مش موجود في اماكن كثيره..

مثل البنوك "المرأه تتعامل مع الريايل"

مثل الجوازات "بعد تتعامل مع الريايل"

مثل جامعة قطر..

ومثل ماشفنا الحين بدوا فالتدريس..

للأسف انا ماعرف شي عن الشركات الثانيه..

وماعتقد انها راح تختلف وايد..

لاكن انا تكلمت من الي شفته بنفسي فالاماكن المذكوره..

وغير الاماكن الي ذكرتها في اول رد لي فالموضوع..

وشلون مانحكم من صور الجريده والحريم والريايل قاعدين جنب بعض؟؟


اخوي الفاضل عمر ... انا اتفق معاك مليون بالاميه ... في اماكن الصراحه الخلط فيها ماينطاق ... مافي خصوصيه و في وظايف تتطلب مراجعات كثيره وهالشي شخصيا انا اكرهه لان الوحده بتكون معرضه لاي شي ...

التعامل مع الرجال موجود بكل مكان لكن المشكله في نوعية التعامل ومدى تكراره و طبيعة التعامل و المكان ... في بعض المؤسسات اسمح لي على هالكلمه كانهم "شوربه" ... مافي حتى حواجز بين الموظفين و الموظفات ..

انا ما ابي اطلع عن الموضوع وايد بس اذا تبي نصيحة اخت لاخوها ... انت روح وشوف المكان قبل لاتحكم :) حتى في المستقبل اذا اي وحده من اهلك بتتوظف سو نفس اخواني ادخل وشوف المكتب و الاداره و حدود العمل وعقب احكم :)

بالتوفيق اخوي الفاضل :)

[Omar Al Hazaa]

^
^
اشكرج على نصيحتج اختي وانا قريت كلامج عن جامعة قطر في موضوع ثاني وفاهم وجهة نضرج عدل..

بس يوم قلتي مديرنا واحد, خذت فكره ثانيه عن شغلج..

وانتي وضحتي الحين شلون طبيعة شغلج..

الله يوفقج ويسعدج في بيتج وبشوفة عيالج قبل شغلج قولي امين..

اختي اذا امثالج بيكونون مدراء.. هالشي طيب..

بس بعد البنت افضل لها انها تقعد في بيتها مع عيالها..

[Omar Al Hazaa]

انا الحين بروح مستشفى رميله للأسنان..

ودكتورتي بنت قطريه..

اخر مره رحت لها كانت تسولف مع رفيجتها واهيه تعالجني وكانت تتحلطم..

كانت مهمومه ومتضايقه ومب مرتاحه مع شغلها..

تقول حق رفيجتها ابيهم ينقلوني..

انا قاعد اسمعهم, قلت مادري اكلمها وانصحها!!

بس تميت ساكت ابركلي هههههه..

المهم شنو نستنتج؟

وزارة الصحه من ماسكها؟

هذي فايدة اعطاء المرأه للمناصب العاليه...

[Jassim Al-Naama]

السلام عليكم ورحمة الله وبركاته

الاخوة الأفاضل

يرجى عدم التحدث عن مواضيع اخرى لاتتعلق بالموضوع نفسه

الموضوع تحدث عن تسلم المرأة لمناصب قيادية ولم يتحدث عن الاختلاط

وشكراً


لي عودة للرد ان شاء الله

[Omar Al Hazaa]

^
^

عليكم السلام ورحمة الله وبركاته..

اسمحلنا اخوي جاسم اذا طلعنا برا الموضوع شوي..

بس الحين استنتجنا ان الخلط من اكبر عيوب الحريم الي ماخذين مناصب ووزارات!!

وننتظر مشاركتك..

[Hassan Al-Ibrahim]

جبر ارجع وشوف الحديث متى قاله الرسول وفيمن قاله .. وشوف معنى ولوا أمرهم وإمكانية تفسيرها

يعني لو كانت منصب قيادي ويتبعها نساء عادي ولا مب عادي ولو ولو ولو .. يعني المسألة فيها تفسير ومب بالبساطة المذكورة

وبعدين ارجع وشوف الإحصائيات اللي عندنا في قطر وعدد النساء والرجال وشوف عدد الوظائف
الموجودة

[S.A.M]

اذا المقصود بالقياده القياده الكبرى او االامامه: فخليفه الدوله الاسلاميه كان هو اللي يرأس الدوله ويرسل الجيوش ويؤم المسلمين في الصلاه.الخ ...وفي حقبه ما.. كان يفقه

اما اليوم فالدوله تتبع النظام المؤسسي..فالرئيس سواء كان رجل او امرأه مب مضطر يسوي وايد اشيا من الي كان يسويها الخليفه

المناصب القياديه بشكل عام ماشوف ان في شي يمنع الا شخصيه الشخص نفسه سواء كان رجل او امرأه..واذا الصحابيات او نساءنا السابقات ما كان لهم مناصب قياديه...فهالشي ما كان موجود في قريش نفسهم مع جاهليتهم وكفرهم...فالدين ماعتقد انه يمنع...لكن "العرف" و ما "يتعارف" عليه الناس في كثر من الامور هو الحكم والفاصل في هذي الامور

وبلقيس الي حكمت دولتها كانت احكم من كل رجالات مجلس الشورى لما حرضوها على القتال قالت "ان الملوك اذا دخلوا قريه أفسدوها جعلوا اعزه اهلها اذله"

والقرآن ما نقد عليها حكمها عليهم...بل الايه صريحه ان النقد كان في قيادتها لهم الى الضلال بعبادتهم للشمس

اما قياده بنت ملك فارس فكان كل رجالهم ماتوا ولم يبقى الا هي..فكانت البشاره منالرسول صلى الله عليه وسلم بأنهم لن يفلحوا

اما في التفضيل "بما فضل الله بعضهم على بعض" فهي مش تفضيل او خيريه في الرجل على المرأه..بل فضل الرجل في امور وفضلت المرأه في امور...

اشوف المرأه تصلح للمناصب القياديه خاصه ان في ناس -منهم النساء طبعا- مجبولين على فطره القياده وهالفطره مب محكوره على الرجال... + كون المرأه تتعامل مع الاطفال اكثر من الرجل هذا يساعدها ويدعمها اكثر في ان تكون مرنه في تعاملها مع الامور...وانها تكون ملهمه...وحكيمه...يعني بيتها بمثابه كورس تدريبي مجاني لها اذا كانت ناويه في مستقبلها انها تمسك اي منصب اداري

وهذي وجهه نظري:)

[Abrar Al-Janahei]

اما في التفضيل "بما فضل الله بعضهم على بعض" فهي مش تفضيل او خيريه في الرجل على المرأه..بل فضل الرجل في امور وفضلت المرأه في امور...

اشوف المرأه تصلح للمناصب القياديه خاصه ان في ناس -منهم النساء طبعا- مجبولين على فطره القياده وهالفطره مب محكوره على الرجال... + كون المرأه تتعامل مع الاطفال اكثر من الرجل هذا يساعدها ويدعمها اكثر في ان تكون مرنه في تعاملها مع الامور...وانها تكون ملهمه...وحكيمه...يعني بيتها بمثابه كورس تدريبي مجاني لها اذا كانت ناويه في مستقبلها انها تمسك اي منصب اداري

وجهت نظر صائبة من وجهت نظري :) سلمتِ

[Omar Al Hazaa]

^
^

كلامكم حلو والله..

بس للأسف واقع الحريم الي امسكوا مناصب قياديه يثبت العكس..

مثل وزيرة الصحه..

امس واحد متوفي عشان ماحصل له سرير في مستشفى حمد؟؟

شدعوه الحين الخبير الامريكي يقول راتب كل واحد قطري المفروض يكون 50 الف؟

ومافي سرير زايد في مستشفى حمد؟ اقصد مافي مستشفى ثاني زايد فالدوحه؟

حق الاسياد تم بناء مستشفى خاص؟؟ انزين واهل البلاد؟؟

اهل قطر عددهم صغير؟ مافي لهم مستشفى خاص؟

انا مابي اوجه هالاسئله حق وزيرة الصحه..

لأن احنا عارفين ان المرأه ماتستحمل اتدير هالمناصب الحساسه..

وهذا فوق طاقاتها..

المهم.. ونفس الشي بعد وزيرة التربيه والتعليم..

يوم كنت فالثنويه جات شيخه المحمود وزارت مدرستنا؟

لازم فيها اختلاط هالشغله!!

ونفس الشي عميدة جامعة قطر كم مره نشوفها فالنشاط الطلابي..

بعد اختلاط!!

ولا ليكون هالاختلاط صار حلال وانا مادري!!

عيل وين راحت فتوى الشيخ بن باز الي فوق!!


المهم.. هذولا وزيرتين وعميدة جامعه اثبتوا ان الحريم مالهم دخل فالمناصب وشفنا اخطاااااء كثيره تسبب بعضها فالموت.. وشفنا الاختلاط الي حذر منه العلماء..

مثال على الاختلاط الي حاصل تحت ادارة الوزيره؟

المريض في مستشفى حمد يجيبون له سستر فلبينيه ولا من أي جنسيه؟
اوكي خلوها حق البنات..

وجيبوا حق الشباب ريايل من الفلبين مب تخلون بنت تضربهم ابره وتجس النبض الخخ..

المشكله هالشي عادي ولا يخطر على البال هههههههه..
وشكلي قاعد اتكلم ضد التطور والحضاره هههههه..

ونتمنى من الحكومه انهم يدرسون هالتجربه عدل..

وان شاءالله نطلع بنتايج ايجابيه..

انا شفت وحده من الوزيرات؟ شفتها يبين عليها تعبانه نفسياً؟

يبين عليها الهموم والزهق؟

الحين شنو الي خلاج اتدخلين نفسج في هالشغل الي اهوه فوق طاقاتج وقدراتج؟

قبل ماكانوا يعطون المرأه منصب فوق طاقاتها..

لاكن ياخذون مشورتها واهيه قاعده في بيتها..


وين راحت الايه "وقرن في بيوتكن"

ولا ليكون انزلت حق فئه معينه ولا حق زمان معين..

انزلت حق زوجات الرسول صلى الله عليه وسلم!! واهم قدوات النساء كلهم!!

[Abrar Al-Janahei]

انا اجوف كل شي صار فيه اختلاط ... يعني من احنا نخلص ونتوظف .. اغلب الاماكن مختلط ..

اما بالنسبة للمنصب .. راي اختي SAM صائب من جهت ان المرأه مجبولة على التعامل مع الاشخاص

في هالايام انا اجوف ان النساء صاروا يهتمون اكثر في العمل .. وصارت منهم شخصيات قيادة على مستوى كبير

اذكر رجل اعمال من امريكا القى لنا محاضره في التجارة والاعمال الحرة ( المشاريع الصغيرة ) .. ذكر مثال انه لإضطرارة ان يسافر ومن مؤتمر لين شركة .. كان يكفل النائب في انه يهتم بشركته والنائب كان امرأه

يقول ان اهو في السنه يجني ارباح ولما تتسلم الشركة هالمرة تجني الارباح اللي يجنيها اهوه في سنه اهيه تجنيها في شهر .. ذكر لنا كم كان مذهول .. وحتى بين ان النساء مخهم للتجارة نظيف غير انهم يفكرون في اشياء وايد في نفس اللحظه .. لذلك "ممكن" تقل كافئتهم ..

وان طريقة تفكيرهم السريعة بسبب طبيعة عقلهم في التفكير .. ممكن تقود لانجازت عظيمة

عشان هللون الله سبحانه كلفها في مهنة إنماء بشر .. واهوه اودع فيها طريقة التفكير هذي لهلمهمة


فلو المرأه وضعت في مكان إداري بالتالي اكيد 100% تبدع فيه اذا ماكان لها مسؤوليات الا هالهمنة ..

لكنها تبدع بنفس الكم اللي يبدع الرجل واهيه عندها مسؤوليات



مثال جامعة قطر :

جامعتنا ما شاء الله تغيرت 180 درجة .. من بعد ما تسلمتها شيخة بنت جبر
وايد وااايييد اشياء تغيرت


واذا كانت اتيكم النشاط الطلابي .. هاي لانها متواضعة .. وتسمع :)


الله يوفقنا واياكم لما يحبه ويرضاه :)

[Omar Al Hazaa]

اختي ابرار كلامج والله طيب..

احنا وضحنا شروط استلام المرأه للمنصب..

اذا بتكون اداريه وفي مكتبها وماكان عندها في شغلها أي صوره من الاختلاط..

هالشي بيكون طيب..

وخواتنا واهلنا يشتغلون بعض هالاشغال..

اما اذا كان الشغل فيه اختلاط.. حتى لو كان ادارة جامعه ولا وزاره..

ماراح نرحب فيه وراح نكون ضده..

والحرام يتم حرام مهما كان..

ومثل ما سمعنا ان الحرام له اضرار؟

هذا احنا شفنا الاضرار الي ماتخلص يوم الحريم امسكوا الوزارات..

احنا نشجع النساء ونشجعهم على الابداع والتفكير..

لاكن مايمسكون وزاراة واماكن فوق مسؤولياتهم وطاقاتهم..
وعقب يعفسون فيها كل شي..

خل ياخذون اشغال اداريه على قدهم.. لاكن مانسمح للمرأه انها تتخذ القرار بنفسها..

لأنها اذا اتخذتها بنفسها "قراراتها فيها ايجابيات" لاكن السلبيات اكثر وهذا الي واضح فالوزارات السابقه الي ذكرناها..

وهذا كان سبب تحذر الشيخ بن باز من تولي المرأه للمناصب هذي..

ممكن ان احنا ناخذ توصيات النساء ونفكر فيها.. وناخذ الطيب منها ونمشي عليه..

مثل ما الرسول صلى الله عليه وسلم خذ مشورة احدى زوجاته..

\
/
\
/
\
/
\
/

حبايبي..

الوزارات والمناصب لو كان فيها شرف ورفعه وخير للمرأه!!

قولولي من الاولى فيها؟

نساء الرسول صلى الله عليه وسلم هم سيدات العالمين فالجنه!!

ف هم اولى فالوزارات والاشغال الرجاليه؟ لو كان فيها خير وحريه للمرأه..

بتقولون هم غير وزمن قريش غير؟

بنقولكم الرسول صلى الله عليه وسلم قضى على كل اشكال التخلف فالجاهليه؟؟

وبنقولكم محد نفس الرسول صلى الله عليه وسلم عطى المرأه حقها..

وبنقولكم نساء الرسول صلى الله عليه وسلم هم قدواتكم..

[Abrar Al-Janahei]

انزين وشلون على المناصب الادراية في الشركات

مثلا :

رئيسة قسم العلاقات العامة

رئيسة قسم الحسابات

رئيسة قسم الأمراض الباطنية

ما يصير في هالمنصب .. بس تقعد في المكتب ولا ؟!!

شنو يكون موقفها .. اذا سلمهوا منصب مثل هالمنصب .. واهيه في امس الحاجه له لظروف مالية ؟

[Omar Al Hazaa]

^
^

المناصب الاداريه اهم شي الشغل يكون فيها حلال..

مثلاً بعض الشركات يكون الشغل فيها بالربا..

والشخص الي يكون مسؤول فيها عن الاداره الماليه أو العامه أو المحاسبه؟

اهوه الي يوقع على الاوراق ويرتبها ويكتبها!

وكاتب الربا ملعون؟ ويمكن هالكلام ينطبق على موظفين البنوك!!

اهم شي الشغل يكون مرتب مافيه خلط ولا ربا ولا أي شي حرام..

ولو كان حرام والبنت كانت محتاجه..

الجمعيات الخيريه وايد وماراح تقصر مع الانسان المحتاج..



السالفه بسيطه جداً..

اهم شي مايكون فالشغل أي شي يخالف الشرع..

[Abrar Al-Janahei]

زين يعني
:)

اتفقنا في النهاية ان المرأه ممكن تمسك منصب إداري ..

واللي ما يصير تسويه ما يصير على الرجل انه يسوي .. مثل ما قلت ربا وحرام


المرأه تقدر تمسك منصب إدري .. وفي فروق فردية بين النساء مثل ما في بين الرجال :)

[Omar Al Hazaa]

اختي ابرار..

المرأه مايجوز يحطونها تشتغل مع الزباين أو فالاستقبال أو فالتسويق..

واغلب الشركات يحطون المراه فالتسويق لجمالها ورقتها!!

مثل ماشفنا الحريم في قاعة المعارض؟ كل وحده معلقه بطاقه وكاشخه..

[Nory.n.n]

اخوي عمر مانتكلم عن الاختلاط والله والله والله مانتكلم عنه

ومانتكلم عن المناصب الاداريه


القياده اهي قياده عامه مثل مناصب( الوزرااااااااااااااااااااااااااااااااااااااااااااا اااااااااااء غير جي لا

اما تكون مسئوله عن قسم معين او مديره هاي ماله خص بالقياده المقصوووده


وشكرا لمشاركتكم جميعااا

[Omar Al Hazaa]

^
^
^

اختي نوري اسمحيلي بس كنت اجاوب على اسئلة الاعضاء..


لأني قلت لهم مايجوز المرأه تستلم المناصب العاليه والوزارات..
والعلماء قالوا هالشي حرام..

ف كانوا يبون حل بديل..

عطيناهم حل بديل كان فالوظايف الاداريه والله يوفقهم..

[Omar Al Hazaa]

اختي ابرار.. ان شاءالله بس ماتتضايقين يوم تكلمت عن التسويق..

والله ماكنت ادري ان هذا تخصصج وتوني ملاحظ..

وتكلمت عن جميع الاشغال بصوره عامه وماراح اكون منصف لو ماتكلمت عن التسويق..

وان شاءالله تتقبلون النصيحه بصدر رحب..

لأن العالم صاروا مايتقبلون شي مني...

[Abrar Al-Janahei]

حتى لو مكتوب مب مشكلة :) .. هاي واقع

ولا يا عمر نتقبل منك

الله ينولك مبتغاك

[Omar Al Hazaa]

الله يوفقج اختي ابرار..

وان شاءالله تكونين مرتاحه في دراستج وشغلج..

[A.A.Al-Nasser]

مرحبا.. :)

والله ما شاء الله الموضوع طويل ومايمديني أقراه كله حالياً... لكن أحب أضيف رايي وبعد قراءة الردود الباقية سأعود للمناقشة إن شاء الله... :)

أعتقد يوجد فرق عند البعض بين المناصب القيادية أي الرئاسية التي تتحكم بمصير شعب وأمة بحالها.. أي قيادة ناس إلى طريق معين وهدف ورؤيا غااااالباً ما تكون فكرية أو روحية.. فأنا ما أقدر أجادل إن المرأة لا تنفع لأنه رأي رسولنا الكريم صلى الله عليه وسلم..

لكن بما يتعلق بأمور اقتصادية أو "عملية" بمعنى آخر.. فهنا المناصب "القيادية" أو الإدارية توضع لمن يستحق ويقدر.. سواء أكان الرجل أجدر في ذلك أو المرأة.. (بما أنها تمشي وفقاً لقانون :الواجب على المسلم أنه إذا عمل عملاً أن يتقنه) وأعتقد أن هذه هي نقطة اختي صاحبة الموضوع اللي في اعتقادها تشتكي منها الكثير من النساء.. لأن هالنوعية من المناصب تمشي وفق نظم ومعاملات لا تؤسسها المرأة موجودة أصلاً لكن المفروض إنها تعمل على تحسينها لصالح العاملين والموجهة إليهم هذه الخدمات....!
:
:
:

أنا عن نفسي أفضل العمل تحت قيادة رجل.... وهذا رايي ما غيرته من زمان... لكن في نفس الوقت أسعى لأن أبدأ مجال عمل يخصني لوحدي في المستقبل.. بالطبع مع مراعاة العاملين معاي وظروفهم...

أصلاً التعامل الطيب والعلاقات العامة مع الموظفين وcustomer satisfaction هي أساس نجاح أي مجال عمل.. سواء للرجل أو المرأة.. وأعتقد أن الكل يعرف أن الكثير من الرجال في كثير من المناصب العليا فشـــلوا في مسألة التعامل مع الغير.... !

مثل هذه الأشياء لا خلاف فيها بين رجل أو امرأة دام أنها تراعي مبادئ معينة.. يتفق عليها الطرفين لضمان نجاح العمل..

وفشل امرأة فيها لا يعني فشل النساء جميعاً.... نفس الكلام منطبق على الرجل..

[Mona Al-Hammadi]

مشاءالله عليك يا عمر حسيت انك صج منقهر انا معاك من منا ما تبي ترتاح في البيت بس الزمن تغير الحين انا مجبوره علي وايد اشياء مرات الوم هلي لانهم ماعودوني على اماكن خلط دشيت جامعه فيها خلط توترت ماقدرت اكمل كان جدامي هدف ضيعته بسبت هالخلط معن هلي شجعوني بس انا مب متعوده الحين صار الرجل والمراه يساعدون في البيت لغلاء المعيشه رفيجتي تنهان كل يوم في الشغل بس تقول اطلع اروح وين اغلبيه البنات الي اشتغلوا في الشرطه وهالاماكن ضحايا اهل المفروض كان في مكان حق هالمشاكل الاسريه وبعد من ناحيه المفروض ما يوفرون لهم هالاشغال


البنت صارت في جامعات خلط لان التعليم والمستوى العالي صار فيه
البنت انجبرت انها اتكلم شاب في مجال الدراسه لهدف البحث والبزنتيشن
البنت انجبرت انها تسوق بسبت الاجانب السواقين الي مافيهم خير وانشغال الاخوان والاب في اعمالهم
البنت اختارت تكون في منصب قيادي حتى ما تنذل حق رئيس عمل وتوفر حق نفسها حياه كريمه
ليش البنت ما تتدرس تخصص نسائي <<<مرات يكون صعب ومب ميولها

يعني البنت في هالايام قامت تتطلع بسبب متطلبات الحياه مب شرط ريلها بيجيها وبيغنيها الزمن يدور ما تتدري اذا هو بيكمل معاها العمر ولا لا باجر اذا بدونه شلون بتربي اعيالها لازم تكون قويه وتتقدر على هالشي

انا انقل لكم بعض من صور الواقع وجزاكم الله الخير والعافيه والثبات

[Abdulla Y Al-Mulla]

ما افلح قوم ولو امرهم امرأة

حديث صحيح بس الشيخ بن باز حسب علمي وكثير من المشايخ

تكلمو انه هذي عن الولاية العامة للمسلمين

والولاية العامة لها شروطها مثل

ان يكون ولي الامر من قريش , الذكورة , الإسلام , اي حد يخرج عليه يكون مصيره الاعدام

حتى لو كان فاسق

والولاية العامة تعني ان يكون ولي امر المسلمين كلهم والجزء من الدولة حسب علمي

يجوز هذي وجهة نظر الدين واستغربت لما حدس والسلف في الكويت عارضو تولية نورية

ومعصومة للوزارة في الكويت ووقف بعض النواب الاسلاميين ضدهم ومع الحريم

اما وجهة نظري تقول ان المرأة كل مامسكت منصب تخربه

والامثلة موجودة واحنا في دولة الديمقراطية لازم نتكلم بكل صراحة

الشيخة موزة وشيخة المحمود والقيادات النسائية

محد ينكر جهودهم وطموحاتهم والتاريخ يزخر بهالامثلة

بس في الجانب الآخر الطموح يمكن يسبب ازمة في البلد

مثل قص البيوت حق المدينة التعليمية والمدارس المستقلة

والفشل الاعلامي بس الجرايد تطبل لهم اما برنامج لكم القرار مثلا

حط هالقيادات النسائية في زاوية مثل ماشفنا

وبعدين الاجانب هم المستفيدين من المدينة التعليمية وصلتك وهالمشاريع والقطريين استفادتهم محدودة

والسوالف اللي نسمعها مب اشوي بس هاي اللي في بالي الحين

[Khalid Al-Qahtani]

والولاية العامة لها شروطها مثل

ان يكون ولي الامر من قريش , الذكورة , الإسلام , اي حد يخرج عليه يكون مصيره الاعدام

حتى لو كان فاسق



اخوي صحح معلوماتك...

مش ضروري يكون ولي الامر من قريش...

اما من ناحية فاسق اتذكر درستها في مادة البحوث الاسلاميه...

بالضبط مااتذكر لكن لو كان ولي الامر فاسق ترى فيها رأي ثاني...

ومااقدر اقولك بالضبط لان الدليل ما يحضرني الآن...

للتنويه فقط...

ودمت بود وعبير الورد...

[Abdulla Y Al-Mulla]

^^^

اخوي انا اتكلم عن الولاية العامة للمسلمين

يعني الخلافة مثل الخلافة العباسية والاموية والعثمانية كلهم كانو من قريش

والاحاديث موجودة في صحيح البخاري ومسلم وواضحة

ماقصد الحكم العادي على اقليم معين او دولة

اما بخصوص كلام الشيخ ابن باز فانا نقلته عن احدى المقالات اعتقد انه الاخ

عمر جاب فتوى للشيخ بن باز ان هالشي مايجوز

[Khalid Al-Qahtani]

شاكر لك تجاوبك اخوي...

وادري انك تقصد الولايه العامه للمسلمين...

صحيح ان بعد الخلفاء الراشدين قامت الدوله الامويه والعباسيه...

وهالشي معروف تاريخيا....

لكن انا اقصد كشرع...

مش ضروري ان يكون ولي الامر من قريش...

لا يوجد نص قرآني ولا من السنه ينص على ان يكون ولي الامر من قريش...

ولا نبي نطلع عن موضوع المرأه والمنصب...

وانا قلت هالكلام للتنويه...

ودمت بود وعبير الورد....