الطالب القطري الي درجته (مقبول) من الجامعة ... الله يعينه على الوظيفة في قطر [الأرشيف]

Fahad Buhendi

15-05-2008, 05:45 PM

درجتك ممتاز فمبروك عليك .. كل الشركات دون استثناء ستقبل بتوظيفك

درجتك جيد جداً فمبروك عليك .. كل الشركات تقريباً ستقبل بتوظيفك

درجتك جيد .. عدة الشركات ستقبل بتوظيفك (بعضها يشترط 2.5 فما فوق للجيد ليتم توظيفه)

درجتك مقبول ... الله يعينك (ولو كنت متخرج من امريكا او بريطانيا او استراليا)

فعدة اشخاص تم رفض قبولهم بسبب ان درجتهم مقبول ... بل ان هناك شركات (مثل قطر للبترول) تقول للطالب الذي درجته مقبول: لن نقبل طلب وظيفتك ولاتضيع وقتك معنا (يحصل في مكتب التوظيف التابع لقطر للبترول في السد بلازا).

وهناك شركة في راس لفان بحاجة الى قطريين ولكن رفضت كل طلبات التوظيف لان درجاتهم مقبول او اقل من 2.5

نصيحة للطلاب

اجتهدوا في دراستكم

فمن النادر ان توظف شركة في قطر اي شخص درجته مقبول (الوزارات والهيئات ذات الراتب الضعيف تقبل بدرجة مقبول)

والشيء المحزن ان الشركات لاتدقق على شهادة ودرجة (الغير قطري) ... او تدقق على الجامعة التي تخرج منها ..

وبالتوفيق للجميع

Sultan Al-Kuwari

15-05-2008, 06:19 PM

جزاك الله خير اخوي .. صحيح كلامك .. وحتى شركه راس غاز .. لا يوظفون مقبول .. لو من بريطانيا او امريكا او استراليا حتى .. وشركات كثيره مثل ما قلت ..

والله يوفق الجميع .. :)

Fahad Buhendi

15-05-2008, 07:28 PM

جزاك الله خير اخوي .. صحيح كلامك .. وحتى شركه راس غاز .. لا يوظفون مقبول .. لو من بريطانيا او امريكا او استراليا حتى .. وشركات كثيره مثل ما قلت ..

والله يوفق الجميع .. :)

كلام سليم

وراس غاز تشترط 2.5

وجميع شركات راس لفان وام سيعيد ترفض توظيف درجة مقبول حتى لو كانت الشهادة من امريكا او ... في الوقت الحالي

الشركات التي تقبل بدرجة مقبول حسب علمي هي ( أشغال - كهرماء - الشركة القطرية للكهرباء والماء - البلدية - البنوك - البيئة - كيوتل ... الخ)

وهناك فرص وظيفية هائلة في راس لفان في هذه الايام حيث المشاريع تتوسع .. وهناك نقص في الموظفين

نصيحة للجميع بتحصيل اعلى الدرجات

Dana Al-Kuwari

16-05-2008, 07:43 AM

الحمدلله
سفل ومعدل 3.6

يحصللللللللل لهم والله اني اوقع عقد معاهم.

Fahad Buhendi

16-05-2008, 01:12 PM

الحمدلله
سفل ومعدل 3.6

يحصللللللللل لهم والله اني اوقع عقد معاهم.

ماشاء الله

بهذا المعدل القوي

تستطيعين ان تعملي في اقوى ثلاث شركات وهم راس غاز وقطر غاز ودولفين

وانصح براس غاز

اما اذا كنتي ترغبين بالعمل في الدوحة فهناك الشركة المتحدة (مشروع اللؤلؤة)

فراتب المتحدة قريب من راتب راس غاز مع فارق التدريب والتطوير وخدمات اخرى كسلفة سيارة وعلاوة سنوية

اذا معدلك 3.6 فنصيحة تحطين الوظيفة في (مخباك)

فقط ركزي على ترتيب (السيرة الذاتية) بشكل ممتاز

وبالتوفيق

J.H.Al-Qahtani

16-05-2008, 02:01 PM

صحيح وياريت الطلاب ينتبهون لهالموضوع....لانه اشاعة انه طالب الجامعة باي معدل يقدر يتوظف.. باي ومكان وباي راتب....غير صحيحة

الحمد لله معدلي ممتاز..وجاتني عروض ووظايف وفرص كثيرة ...حتى انه تم عرض علي انه اغير تخصصي وهم يستلموني من اول وجديد !!.ويدفعون لي 30 الف تقريبا قابل للزيادة..... بس طبعا عشق المواد العلمية وتعلقي بهاخلاني ارفض هالعروض :)

عندهم المعدل اهم من التخصص....

احدا البنات تخرجت تخصص كيميا..ومعدلها مقبول..وطبعا تخصصها مطلوب في شركات البترول اجمع...... ابتدا من قطر للبترول لدولفين لشل ل ميرسك ...الخ..بس لاسف بسبب معدلها ماقدرت تحصل وظيفه ..

فحلولت للتدريس مادة العلوم..بالمدارس..

ومع ذلك فشلت لانه مافي مدرسة يبون يوفظون مربية بمعدل مقبول..

المعدل دليل ...على مدى اجتهاد الطالب واستعابة ..وقدرته على التحليل والتعامل مع الوظيفة ....

اتمنى من الطلاب انهم ينتبهن لهالنقطة

ويشدون حيلهم ..وخاصة انه الأمتحانات قربت .....

وفي النهاية المعدل بفيد للدراسات العليا..للي ناوووين يكملون :)

وفقكم الله

ويعطيك العافيه اخوي على طرحك لمواضيع..مهمة تعنى بمجتمعنا ومنتشرة بين شبابنا ...

ماقصرت وقواك الله .

Fahad Buhendi

16-05-2008, 09:02 PM

الحمد لله معدلي ممتاز..وجاتني عروض ووظايف وفرص كثيرة ...حتى انه تم عرض علي انه اغير تخصصي وهم يستلموني من اول وجديد !!.ويدفعون لي 30 الف تقريبا قابل للزيادة..... بس طبعا عشق المواد العلمية وتعلقي بهاخلاني ارفض هالعروض :)

عندهم المعدل اهم من التخصص....
.

30 الف مبلغ قوي جدا .. حتى مهندس براس لفان لايستلم هذا المبلغ .. عرض اكثر من رائع واتوقع انه عرض من شركة عالمية بقطر

احدا البنات تخرجت تخصص كيميا..ومعدلها مقبول..وطبعا تخصصها مطلوب في شركات البترول اجمع...... ابتدا من قطر للبترول لدولفين لشل ل ميرسك ...الخ..بس لاسف بسبب معدلها ماقدرت تحصل وظيفه ..

فحلولت للتدريس مادة العلوم..بالمدارس..

ومع ذلك فشلت لانه مافي مدرسة يبون يوفظون مربية بمعدل مقبول..

.

شكرا على هذه القصة ... وانا لدي 4 قصص مثل القصة التي ذكرتها بالتمام والكمال .. تخيلي ان شخص كان لديه عرض براتب اعلى من راتبه مرتين (ضعف الراتب) .. ولكن تم رفض توظيفه بسبب انه معدله مقبول.... اهماله في الدراسة سيكون عالة عليه مدى الحياة ...

وآخر انتظر سنة ونصف لتوظيفه لان معدله مقبول براتب غير مجزي

Dana Al-Kuwari

17-05-2008, 01:30 AM

شالفرق بين راس غاز وكيو بي وقطر غاز والشله الفاضله كلها ؟؟

احسهم نفس الشي.
ماعندي فكره عنهم. جايز لما اقرر اني اشتغل واستعد راح اسال الاهل والخوال والعمام
بس طول هالفتره مافكرت اسال قلت يالله تو النااس .

وبعدين انا صايده مسآله قله السوق القطري من مهندسات السفل.
تقدر تقول الديماند لهم عاااااالي. يعني راتب اقل من 30 والله ماوقع.

لما اشوف امريكي ولا هندي يستلم 34 .
وانا في بلادي استلم اقل؟ ليش يبه .

اما بخصو السي في.
فا حنا لها الله يسلمك .مب انا الي اقدم سي في حالي حال اي موظف.
الله يسلمك اوراقي من فوق لي فوق ويجيني العقد للبيت اوقعه تحت المكيف
هههههههههههههههههههههههه

Ali Alkuwari

17-05-2008, 01:44 AM

^

30 .. لا البنت ما توصل 30 لان ما عندها علاوة زواج :16:

اللحين اعلى معاش قطر للبترول .. بس بقولكم ترى الدوام شنو يملل

نصيحه اللي يلقى له شغله عير البترول والغاز لا يتردد

Fahad Buhendi

17-05-2008, 01:53 AM

راس غاز هي الافضل في الوقت الحالي لعدة اسباب مثل كثرة التوسعات والبيئة الجيدة حيث ان راس غاز بنيت من رحم اكسون موبيل (شركة امريكية نفطية عملاقة)

قطر غاز مثل براس غاز ولكن يعيب تبعيتها لقطر للبترول كثيرا والعلاقات بين الموظفين شبه متعبة ...

قطر للبترول .. شركة كبيرة ولكن رواتبها اقل والترقية فيها صعب نوعا ما

حصولك على راتب 30 الف أعتقد انه شبه صعب في الشركات اعلاه لعدة اسباب:

1. راتب مهندس جديد براس غاز او قطر غاز يقارب 25 الف ريال قطري .. وهذا الراتب يقل ب 3000 ريال اذا كان العمل بالدوحة وليس براس لفان .. وهذه الشركات لاتغير رواتبها.

2. راتب البنت اقل من راتب الشاب في كل الشركات والوزارات (لا اعرف كم ولكن اذا رغبتي سأسأل).

3. راتب 30 الف في شركات مثل شلمبرجر او شل قطر معقول .. ولكن هذه الشركات متعبة ولاتقدم خدمات مثل قطر غاز وراس غاز

وللعلم الامريكي لايستلم اقل من 60 الف ريال

هذا والله اعلم

Dana Al-Kuwari

17-05-2008, 01:58 AM

ياحبيبي في ظل سمو الاميره موزه
المراءه القطريه ماعليها خوف. في شي اسمه مساواه وليش الريال بس علاوه زوجيه ؟
ليش احنا مب متزوجينكم بعد ؟ لازم لنا علاوات ههههههههههههههههههههه

وازيدك من الشعر البيت. الحين في نظام بيطلع بان القطريه يحق لها تقدم على ارض اذا كانت سنير.
مو بس الرياييل. افرض المراه تطلقت؟؟ شستفادت ؟؟؟

ريلها طلع من ورى عقد زواجها بيت وكاهو عايش فيه وبيجيب المراه الجديده
واحنا نرجع بيت اهالينا ؟؟
<<< تفول على روحها هههههههههههههاااااااي

لا بس جد . المستقبل ذي ماندري شمخبي لنا.
واحنا نبي نكون اندبندنت .

وبعدين ليش دوام البترول والغاز ملل ؟؟؟؟
مافي بشر مافي اوادم يداومون هناك ؟ خلاص عيل بنسولف ونحط لنا جريده و وطني الحبيب صباح الخير.
انشهد ان المعاش مابه حلااااال
كله حرام في حرام اذا بنقعد ونسولف وريل على ريل. عندي امانه والله ياحليلي

Fahad Buhendi

17-05-2008, 02:05 AM

^

30 .. لا البنت ما توصل 30 لان ما عندها علاوة زواج :16:

اللحين اعلى معاش قطر للبترول .. بس بقولكم ترى الدوام شنو يملل

نصيحه اللي يلقى له شغله عير البترول والغاز لا يتردد

اعلى راتب هو لشمبجر ولكن بدون علاوات سنوية او قروض كقرض سيارة او زوراج

واعلى راتب هو لراس غاز ودولفين

وكلامك سليم, لم اسمع ان مهندس حصل على راتب 30 حتى في شلمبجر

والذي متاكد منه ان راتب البنت اقل من راتب الشاب حيث رايت مرة فتاة تشتكي من ان رواتب الفتيات اقل من الشاب في القسم التي تعمل به في شركة نفطية كبرى

Fahad Buhendi

17-05-2008, 02:08 AM

وبعدين ليش دوام البترول والغاز ملل ؟؟؟؟
مافي بشر مافي اوادم يداومون هناك ؟ خلاص عيل بنسولف ونحط لنا جريده و وطني الحبيب صباح الخير.

محد مرتاح في قطر الا الي مشتغل في البترول او الي مشتغل في الجيش

رواتب عالية وتدريب عالي ومميزات قوية

اما الذين يعملون في الوزرارت والهيئات فيلاحظ كثرة شكاويهم من قلة الراتب في وطني الحبيب صباح الخير

J.H.Al-Qahtani

17-05-2008, 02:11 AM

اخوي ال30 اللي انعرضت علي من شركة قطريه هنا...بعد ماقلت لهم عن عرض جاني ب25 الف..من شركة ثانيه ..وكانوا يبوني علشان جي زادوا ...

وفي النهاية صفت كلا العرضين ...

ادري بتقولون لي مثل ماقالوا اهلي لي..بنت فقر...

Fahad Buhendi

17-05-2008, 02:26 AM

ادري بتقولون لي مثل ماقالوا اهلي لي..بنت فقر...

الصراحة قلت نفس الشيء بس بصدري

عرض قوي لا اعرف اي شاب قطري حصل عليه .. باستثناء شخص واحد اعرفه .. حصل عليه من شركة عالمية

وانتِ الشخص الثاني

والله يوفقك بعملك الحالي

Omar Al Hazaa

17-05-2008, 02:28 AM

جزاك الله خير اخوي فهد على مواضيعك الحلوه..

اقول عيل دكاترة الجامعه الاذكياء ليش مخلين درجة قبول فالشهاده؟
ليش مايخلونها ممتاز وجيد جدا وجيد.. وبعدين راسب مقبول وراسب.. هههههه..

اخاف الشركات بعدين تقول خلاص احنا مانقبل الجيد؟؟ ههههه..
ماجنهم قبل كم سنه كانوا يفرحون اذا جاهم واحد معاه شهاده اعداديه؟؟

واجدادنا اصحاب الشهادات الاعداديه هم الي طوروا البلد..
والفضل يرجع لهم بعد الله سبحانه وتعالى..

بس الشركات الحين دلعهم صار مااااصخ..
يالله ان شاءالله الدوله تنتبه للنقطه هذي وتحفض حق الطلاب حقوقهم..
وان شاءالله الطلاب يجتهدون اكثر..

Fahad Buhendi

17-05-2008, 04:39 PM

اخاف الشركات بعدين تقول خلاص احنا مانقبل الجيد؟؟ ههههه..

يجتهدون اكثر..

ياهلا فيك اخوي

في الماضي القريب

شركات راس لفان بالتحديد كانت لاتقبل جيد

والصراحة انا اتفق معاهم

A.Al-mohammadi

17-05-2008, 05:17 PM

Fahad Buhendi

17-05-2008, 05:32 PM

السلام عليكم ورحمة الله وبركاته

يعني الحين احنا في 2008 والشركات ماراح تقبل الا من جيد وطالع..عيل لين وصلنا 2011 بيصير عندهم إكتفاء..!!!:43:
انزين لو فرضنا انه في خريجين تخرجوا ب مقبول ولكن قدرتهم على العمل وخبرتهم افضل من اللي تخرجوا ب إمتياز..بعد ماراح يكون لهم اي فرصه للعمل..:err:

انا اشوف فيها شوي من الظلم..لانه لا ننسى انه انه اصابع اليد ماتتساوى..وكلن له قدرته..

والله يوفق الجميع

اختي او اخي

في (الماضي القريب) بعض الشركات كانت ترفض توظيف المقبول او الجيد

اما الآن وبسبب كثرة المشاريع اصبح يتم توظيف الجميع (الا المقبول)

وخريجي امريكل وبريطانيا واستراليا هم المرشحين الاكثر للتوظيف بسبب عامل اللغة اضف على معدلهم

اذا كان او كانت درجتك مقبول فلن تجدي الا شركات قليلة براتب بسيط تقبل بتوظيفك

اما 2011 فلاتخافي

ولا تخافي من 2015

لان هناك مشاريع في قطر اكثر من عدد القطط

فهناك ادارة صغيرة في شركة نفطية بها 53 موظف ... ليس بينهم الا قطري واحد فقط

وهناك منصة نفطية بحرية (زرتها بنفسي) لايوجد بها قطري واحد

هناك وظائف بالجملة

ولكن تحتاج الى جهد ودراسة وعمل

وبالتوفيق

A.Al-mohammadi

17-05-2008, 05:43 PM

السلام عليكم ورحمة الله وبركاته

شكرا اخوي على التوضيح..:)
المشكله مب مشكله خوف..الحمدلله محد ياخذ إلا رزقه..بس مشكله هالشركات اللي كل يوم طالعين بقانون وياليت بعد امتيازاتهم للقطريين عدله او تشجع الواحد..واذا كانت رواتبهم قويه يحسسون الواحد كأنه ياخذ صدقه من عندهم..واذا على معدلي الحمدلله So far B ..:D ف ماحاتي المقبول الحمدلله
والله يكتب لنا اللي فيه الخير..:5:

إختك A.Al-mohammadi

Fahad Buhendi

17-05-2008, 06:39 PM

A.Al-mohammadi

17-05-2008, 08:28 PM

لااله الا الله..:43:
اذكر الله..:D وبعدين مافي شي اسمه بنت ولا ولد..في شي اسمه
لكل مجتهدٍ نصيب..
والله يوفق الجميع..

Dana Al-Kuwari

17-05-2008, 11:29 PM

اهني المشكله
لما تجي البنت بمعدل عالي وتخصص محترم مايعطونها كرت وفالنهايه معاشها اقل من معاش الشاب !!
وهالشاب دايخ صايع ضايع وينجح عن طريق الاوراق والاولد فايل ويرزونه فوقي !

قالوها لي والله القطريين الي وياي.
احرقوا قلبي ههههههههههههههههه

Ali Alkuwari

18-05-2008, 12:33 AM

وخريجي امريكل وبريطانيا واستراليا هم المرشحين الاكثر للتوظيف بسبب عامل اللغة اضف على معدلهم

الصراحه اشوف انه ظلم .. انا جربت جامعة قطر

الطالب في جامعة قطر والله انه تطلع عيونه علشان الـ B

والطالب يدرس برى يحصل الدرجات بسهوله

ولما نجي وقت التوظيف نحصل اللي دارس برى هو اللي له الاولوية

J.H.Al-Qahtani

18-05-2008, 12:37 AM

والطالب يدرس برى يحصل الدرجات بسهوله

اخوي الفاضل.....اصابع يدك مو سوا.......ولاتنسى فرق نظام التعليم المتبع بالخارج عن نظام جامعة قطر ....واللي ولله الحمد قاعد يتطور ...

Ali Alkuwari

18-05-2008, 12:40 AM

في شي اسمه مساواه وليش الريال بس علاوه زوجيه ؟
ليش احنا مب متزوجينكم بعد ؟ لازم لنا علاوات ههههههههههههههههههههه

الرجال قوامون على النساء بما فضل الله بعضهم على بعض

وازيدك من الشعر البيت. الحين في نظام بيطلع بان القطريه يحق لها تقدم على ارض اذا كانت سنير.

الله لا يقوله .. كفايه اللي نشوفه واللي نسمعه هـ الايام بعد البنت تاخذ بيت بروحها

وبعدين ليش دوام البترول والغاز ملل ؟؟؟؟
مافي بشر مافي اوادم يداومون هناك ؟ خلاص عيل بنسولف ونحط لنا جريده و وطني الحبيب صباح الخير.
انشهد ان المعاش مابه حلااااال
كله حرام في حرام اذا بنقعد ونسولف وريل على ريل. عندي امانه والله ياحليلي

صدقيني لما تداومين بتعرفين اللي اقوله .. او يمكن بالنسبه لي

يمكن لو اقلب السالفه مصخره بيكون الدوام عندي وناسه .. بس اذا اشتغلت من صجي بيكون ملل

عـ العموم البترول من اكثر الاماكن اللي الناس يقدمون فيها استقالاتهم

Ali Alkuwari

18-05-2008, 12:43 AM

اخوي الفاضل.....اصابع يدك مو سوا.......ولاتنسى فرق نظام التعليم المتبع بالخارج عن نظام جامعة قطر ....واللي ولله الحمد قاعد يتطور ...

اي .. هذا اللي انا اقوله النظام اللي هناك يساعد ان الطالب يحصل درجات

ترى انا اكره جامعة قطر بس كلمة الحق تنقال ان الطلاب ما عليهم كلام

ويحصلون الدرجات بعرق جبينهم

A.Al-mohammadi

18-05-2008, 12:57 AM

الصراحه اشوف انه ظلم .. انا جربت جامعة قطر

الطالب في جامعة قطر والله انه تطلع عيونه علشان الـ B

والطالب يدرس برى يحصل الدرجات بسهوله

ولما نجي وقت التوظيف نحصل اللي دارس برى هو اللي له الاولوية

السلام عليكم ورحمة الله وبركاته

مرحبا اخوي..اسمحلي بس اوضح لك بعض الامور..:16:
أولا: أنا كنت ادرس في جامعه قطر قبل لا ادرس في بريطانيا وكان تخصصي English معناته انه لازم اخذ مواد كلها تخص تخصصي..بس مع الاسف جامعه قطر خلوني اخذ لغه عربيه وتاريخ..إلخ يعني اشياء مالها علاقه ابدا..:58:وهذا واحدمن عده اسباب اللي خلتني اترك الجامعه واللي تخلي الطلاب مايقدرون يجيبون معدل..
ثانيا: من قال انه بكل سهوله نقدر ناخذ درجات واحنا برى..على إيديك..الله يعلم شقد الضغط علينا امتحانات ورا بعض..ونظام جديد علينا..ولاتنسى اخوي انا احنا في غربه فما عندنا شي انسويه الا انحط راسنا في كتبنا..والله يعلم شكثر نتعب واعتقدالمفروض تكون الاولويه لنا..
وفالنهايه صدقني محد ياخذ الا نصيبه..:)

والله يوفق الجميع انشالله..

Ali Alkuwari

18-05-2008, 01:04 AM

احنا في غربه فما عندنا شي انسويه الا انحط راسنا في كتبنا

هذا اللي في باللي بالظبط .. انت هناك متفرغ للدراسه بس

اما هني انت بتنشغل مع هلك .. وفي النهايه كل واحد وظروفه واجتهاده

بس انا اعرف كذا واحد كانوا معاي في الجامعه قالولي الدراسه هناك (برى)

اسهل من الدراسه في جامعة قطر .. وما فيه مجال للمقارنه

والله يوفق الجميع

A.Al-mohammadi

18-05-2008, 01:23 AM

Dana Al-Kuwari

18-05-2008, 11:08 AM

من قال الي برى ماعنده شي يسويه ويحط راسه فالكتب ؟؟

انا وحده ماحط راسي فالكتب .. ليش جايه اخترع الذره؟

الدراسه بالعقل مب بالخبال .. وان لنفسك عليك حق !!

Fahad Buhendi

18-05-2008, 02:00 PM

مرحبا اخوي..:)

صدقني اخوي الغربه صعبه وايد..ومحد راح يحس بصوعبتها الا اللي يجربها..وانا اشوف انه المفروض اللي فالدوحه هم المفروض اللي يجيبون معدلات اعلى منا لانه لتنسى اخوي العامل النفسي مهم..ودام أهلك حواليك وفي بلادك هذا اكبر دافع يخليك تجيب حتى معدل A ..

وموفق انشالله..:16:
إختك A.Al-mohammadi

لاتنسين ان محد يغسل ثيابنا

محد يطبخ لنا

محد يكنس البيت ويشتري اغراض البيت

ومحد يراكض ورى تصليح البيت (جلست اسبوع في البرد بدون سخان في بريطانيا لين ماتصلح)

محد يراكض ورى البنوك مثلنا (اغلب طلاب الجامعة ماعندهم رصيد بالبنك) وآخر الشهر يخلص الرصيد ... ونآكل تونة وخبز كل يوم (اذكر اني جلست آكل خبز وجبن 7 ايام لان الرصيد كان على الحديدة بسبب السيارة)

طلاب الغربة جربوا نار الألم والخوف ...وجربوا نار الاقرباء الي دوم ينصحون اهالينا بعدم اكمال البعثة والعودة لقطر

بينما طلاب جامعة قطر لم يجربوا هذه الآلام وكان كل شيء متوفر لهم بالبيت ..

وطلاب الغربة لايتوفر لهم شيء

Dana Al-Kuwari

18-05-2008, 02:56 PM

^
^
اي والله
حال الشباب يصعب علي.

والله ساعات اشوف مناظر في شقق اخوانا الخليجيين فيها البلى كله..
غبار واكياس زباله الله يكرمهم عيزانين يحذفونها ومجمعينها فالبلكونه
يهود صرنا زبالتنا في بيتنا.

غير غراش الماي الي في كل مكان والزقاير الي دمرت صدورهم وغراش بيبسي وماي بيرير
واكل برى مادري من كم يوم واثياب وجاكيتات محذوفه عالارض وكتب واوراق
لاعت جبدي

والله ماياخذ منكم شي بس انتوا الكسل مدمركم.
كلها ساعتين والمكان يصير ورده .. وبدال ماتقولون كلمه شكرن تقولون لاااااااااااا ليش سويتي جي
مب متعودين عالنظافه ..

مادري شلون هالشقق الوصخه المغبره تطلع شباب مرتبين ومتعطرين ومحلقين وعلى سنقه عشره؟

هذي ظريبه الحياه الصعبه .. انك ترجع الدوحه ويحطونك فوق خريج جامعه خطر
هههههههههههههههههههههههه

A.Al-mohammadi

18-05-2008, 05:06 PM

من قال الي برى ماعنده شي يسويه ويحط راسه فالكتب ؟؟

انا وحده ماحط راسي فالكتب .. ليش جايه اخترع الذره؟

الدراسه بالعقل مب بالخبال .. وان لنفسك عليك حق !!

مرحبا اختي..
أولا انا كنت اتكلم عن اغلب الطلاب اللي معاي واوصف حالهم ولتنسين الفرق بين امريكا وبريطانبا من حيث المستوى التعليمي وفرق الCurrency ..!:16: ومحد قال انه جاي يخترع الذره..من كثر الدراسه الواحد ماعنده وقت حق شي..ومره ثانيه اقول (هذا بالنسبه لنا..)..

اما اخوي فهد..:D الله يعينك صج.. بس ترى في امور وايد الواحد يقدر يخلصها بالنت..مثل امور البنك او دفع الفواتير..والله يعينكم على الخبز والجبن..:Dوالله يخلي الغربه صج تعلمنا الطباخ..:sh18sh:

موفقين..

Ali Alkuwari

18-05-2008, 05:58 PM

مرحبا اخوي..:)
صدقني اخوي الغربه صعبه وايد..ومحد راح يحس بصوعبتها الا اللي يجربها..وانا اشوف انه المفروض اللي فالدوحه هم المفروض اللي يجيبون معدلات اعلى منا لانه لتنسى اخوي العامل النفسي مهم..ودام أهلك حواليك وفي بلادك هذا اكبر دافع يخليك تجيب حتى معدل A ..
وموفق انشالله..:16:
إختك A.Al-mohammadi

بالعكس اخوي .. اللي مايدري او ماله خص بهله انا معاك انه بيكون مرتاح

بس اللي مثل حالتي .. تخيل انت عندك ساعه بريك تحصل ربعك يفكرون يروحون اي مطعم

وانت المفروض ترجع هلك من الجامعه وترجع اخوك من المدرسه وكله في صوب والزحمه

في صوب ولاتنسى سواقة اخوانا الهنود .. وفي الويك اند ما تخلص لازم تجابل هلك وتطلعهم

وغير المشاوير في نص الاسبوع والعزايم والمناسبات واشغال البيت الخ......

Ali Alkuwari

18-05-2008, 06:04 PM

من قال الي برى ماعنده شي يسويه ويحط راسه فالكتب ؟؟
انا وحده ماحط راسي فالكتب .. ليش جايه اخترع الذره؟
الدراسه بالعقل مب بالخبال .. وان لنفسك عليك حق !!

وكم قلتيلي معدلج 3.7 .. شفتي شلون :w5rw:

والله انا بصراحه الشباب اللي اعرفهم برى كلهم مفتلين

وبدون استثناء

Dana Al-Kuwari

19-05-2008, 12:29 PM

لا والله اننا نتعب وندرس
ولكل مجتهد نصيب اكيد

بس لازم على الطالب انه يعرف من اين تآكل الكتف ;)
عاد هذي مهاره مو عند الكل للاسف

Fahad Buhendi

19-05-2008, 05:28 PM

بالعكس اخوي .. اللي مايدري او ماله خص بهله انا معاك انه بيكون مرتاح

بس اللي مثل حالتي .. تخيل انت عندك ساعه بريك تحصل ربعك يفكرون يروحون اي مطعم

وغير المشاوير في نص الاسبوع والعزايم والمناسبات واشغال البيت الخ......

نفس الشيء بالنسبة للطلبة بالخارج