يا أعضاء أبي من وقتكم شوية

[A. M. JOHAR]

السلام عليكم ورحمة الله وبركاته

شلونكم أعضاء قطريز

ترددت وايد علشان أطرح عليكم مشكلتي

و بما أن أكثركم ما شاء الله أصحاب خبرة قررت أني أكتب مشكلتي لعلني أحصل الحل عندكم و أخترت هذا القسم لأنه يتعلق بالدراسة في الخارج

مشكلتي من البداية

تخرجت سنة 2000 من الثانوية بنسبة 70 أدري أنها نسبة متوسطة و أصلا ما كنت متوقعة أجيب نسبة قليلة المهم دخلت جامعة قطر تخصص إحصاء >>> أخترت التخصص لأني أحب الرياضيات والحاسب و هذا التخصص يجمع بينهم

مع أني تميت خمس سنوات إلا إني ما قدرت أكمل لأني من أول ما دخلت كله أرسب في المواد المادة الوحدة أعيدها يمكن ثلاث مرات >>>>أدري ممكن البعض يقول أكيد ما كنت تدرسين أو ما تنتبهين في المحاضرات

بس أحلفلكم أني عمري مادرست كثر دراستي للمواد في الجامعة أدرس قبل الأمتحان بمدة طويلة أحل تمرين إضافية و بعدين وقت الامتحان ما أعرف أحل أحس أني في وادي والامتحان في وادي ثاني حتى آلتي الحاسبة في الأمتحان ما أعرف أستعملها مع إنها عندي من الثانوية بس شنو يصير لي وقت الامتحان ما أدري

المهم مو هذي مشكلتي مع أن ممكن البعض يتسأل ليش ما طلعت من الجامعة من أول سنة لما حسيت أنج ما قدرتي تكملين... صج أن الجامعة حطمتني و خلتني أحس أني غبية و خلت نفسيتي تعبانة كلش خصوصا أني عمري في المدرسة ما رسبت و كنت أجيب دراجات زينة ما أقول متفوقة بس كان مستواي فوق المتوسط

ما طلعت من الجامعة لأني ما أحب أنهزم كأني داخلة معركة و أبي أنتصر فيها بس للأسف ما قدرت كنت كل سنة أقول هذي السنة بقدم أحس ما عندي وفي نهاية الفصل انصدم برسوب

وبعد الخمس السنوات حسيت وصلت معاي ما أقدر أكمل و خصوصا عندي انذارين شفت إعلان قطر للبترول في الجريدة عن فتح باب لطلبة الثانوية أنهم يقدمون قلت ليش ما أجرب و الحمدلله قبلوني و أبعثوني كلية شمال الأطلنطي تخصص إدارة مكاتب >>>> أدري انه تخصص مو لين هناك بس وقتها مو فارقة معاي

و الحمدلله أنا الحين تخرجت بمعدل 3,8 شهادة دبلوم و قطر للبترو ل سامحة لي أكمل دراستي للخارج بس هذي هي مشكلتي الحين أشلون أدرس برا بروحي أدري أنها مو صعبة لأن في بنات وايد راحوا كملوا دراستهم وردوا بس ما أدري يمكن بس متخوفة من الموضوع لأني ما جربت و يمكن لأني ما تعودت أهد هلي و أعيش بروحي برا و أدري أني مب صغيرة علشان أقول لا أبي أقعد مع هلي مثل الأطفال و أني لازم أفكر بشكل منطقي أكثر لأنه هذا مستقبلي

آسفة على الإطالة أدري مللتكم >>>> أدري أنه بعضكم بيقول حشى كأنها قصة حياة مب مشكلة بس حبيت أذكر المشكلة من البداية حتى إذا في أحد ممكن يعطني حل يكون عارف الموضوع كله

أدري بعضكم يقول الحين الزبدة شنو تبين ... بس شرايكم ما أعرف شنو أبي منكم الحين هل أطلب منكم حل؟ أو اقتراح ؟ أو راي؟ بس الشي الوحيد اللي أعرفه أني أبي أستفيد من خبرتكم و من اللي شفتوه و من اللي عايشتوه من أهلكم, أصحابكم يمكن في حد منكم يعطيني حل كان غايب عني أو يقترح اقتراح يريحني شلون أقدر أكمل دراستي

أدري الموضوع متأخر وايد لأن أكثر الجامعات سكرت التسجيل اللحين بس كنت معتمدة أرد الجامعة (جامعة قطر) مع أني كارهتها بس ما كنت أدري ان قيدي سكروه و مب ممكن أدخل مرة ثانية

آسفة على الإطالة مرة ثانية و بكون شاكرة لكل شخص ساعدني و لو بكلمه

[A.A.Almannai]

السلام عليكم ورحمة الله وبركاته

عزيزتي تأكدي انج باذن الله راح تلاقين الحل في هالموقع وخلج متوكله على رب العالمين .. انا قريت قصتج وفيها مب مشكله وحده الا مشاكل وايد .. بـــــس الي مبين و واضح القوه والاصرار .. ماشاء الله عليج كفو ماخليتي اي شي يوقف في طريجج كملتي كملتي ونلتي ولله الحمده :w5rw: ..
صدقيني انتي قويتي العزيمه عند وايد ناس ومن بينهم انا .. اعترف مريت في مشكله وخلاص شوي واقفل الموضوع بس يوم قريت موضوعج عطيتيني داااااافع ودافع قوي .. اسمحي لي اشكرج من كل قلبي :8:

انا بغيتج ولا عليج امر تجاوبيني على هالاساله عشان اقدر افيدج باذن الله .. انتي ماخذه دبلومه وتبين تكملين وتاخذين الاكلوريوس؟؟ او تبين تاخذين تخصص ثاني وتاخذين الباكلوريوس؟؟

اما عن الغربه .. باكون معاج جداااااا صريحه .. انا كنت مثلج ويمكن اكثر .. محد توقع اني اسافر وادرس في الخارج بحكم اني ماقدر اخلي اهلي وربعي وجماعتي واني ماقدر على الغربه و على بريطانيا بحد ذاتها لاني متعوده اروح لها سياحه بس مب دراسه ؟؟ ترى في فرق كبييييييير .. ولكن الحمدلله الله وفقني والامور ماشيه وصدقيني طلابنا مايقصرون ..

خواتنا البنات وجمعتهم و قعدتهم تقصر عليج المده .. يعطونج دافع متى مابغيتي والاهم ان القلوب على بعضها وفي وقت الشده ماااااايقصرون يحسسونج انج اختهم ومنهم وفيهم.. واخوانا الشباب محسسينج ان الامور اييييزي كانهم يقولون لج لاتخافين ترى اخوج او ولد خالج او ولد عمج موجوديييييييين .. وما ابالغ تحسين ساعات ان ابوج الي موجود مايقصرون معانا بشي الله يوفقهم ان شاءالله..
وطبعا في مشاكل و امور تواجهج بس كله يعدي يعني صعوبة الغربه و المكان وحتى الحياه ترى غير بس بتتاقلمين عليها باذن الله

اسفه على التاخير احس اني طولت عليج بس ابي انقل لج الصوره عدل

[A. M. JOHAR]

مشكورة يا أختي على ردج :9:

يمكن هذا الشي اللي أنا محتاجته

حد يشجعني و يقولي تجربته مع الغربة

اتصدقين بردج خليتني أحس براحة شوية في أحد حاس فيني

و ما عليج يا أختي أنت ما طولتي بالعكس أنت شرحتي لي الموضوع عدل

و الله يوفقج يارب في دراستج

أما بالنسبة لأني أكمل دراستي بما إنه تخصصي إدارة مكاتب

أعتقد في إمكانية أني أختار من تخصصات الإدارة

أنا حاطة في بالي تخصصين إدارة عامة أو محاسبة

بس ما تعتقدين أني متأخرة وايد

يعني ما أقدر أسجل الحين لازم أنطر الكورس اللي بعده

ولا ممكن أدخل الحين؟؟؟؟

[A.A.Almannai]

هلا عزيزتي
بالنسبه الكورس ذي خلاص راح عليج وماتقرين تسجلين .. بس تقدرين للسنه الجايه باذن الله .. الي راح يبتدي شهر 9
واي مساعده او سؤال انا موجوده

[Omar Al Hazaa]

اختي A مشكلتج بسيطه وااايد..

اول شي ان شاءالله يبتعد عنج الحزن..

اختي في بنات وايد يروحون يدرسون برا ويرجعون سالمين ومعاهم شهاداتهم..

انتي اول شي تشاوري مع هلج اذا كان خاطرج تسافرين برا..

ونصيحتي لج اقعدي وكملي دراستج في قطر ابرك..

اختي A الافضل انج تقعدين في جامعة قطر..
لأن برا جامعاتهم خلط واذا عشتي معاهم كم سنه لازم بتتأثرين منهم ولو بنسبه صغيره!

واسئلي البترول وين بيشغلونج اذا خذتي البكالوريوس من قطر ولا اذا خذتيه من برا
وجوفي شنو الفرق واذا كان هالشي يستاهل انج تتغربين وتتركين هلج وتروحين جامعه اجنبيه فيها خلط.. وعاداتهم وتقاليدهم غلط في غلط..

وانتي تقولين انج توهقتي شوي مع منهج جامعة قطر..
بس لما تقعدين في قطر ربعج وهلج بيساعدونج اكثر..
والدراسه برا تحتاج جهد.. انتي جوفي كم سنه تميتي الحين مع الدراسه..
وهل انتي مستعده انج تقعدين لج 5 سنوات اضافيه برا..

اقعدي وادرسي بين هلج وناسج ابرك.. واذا ياج نصيب بعد تزوجي.. وكملي دراستج في قطر..
ولاتسوين مثل بعض البنات الي ضيعوا عمرهم كله على الدراسه ولين الحين قاعدين بدون زواج..

لأن وظيفة البنت الاساسيه في بيتها والله يوفق البنات كلهم..

واذا كان عندج سؤال ولا استفسار قوليه واحنا حاضرين..

[A. M. JOHAR]

مشكورة أختي Aljazi على ردج و ما تقصرين

و مشكور أخوي Omar على ردك وعلى نصيحتك

ترى أنا ما أتمنى أدرس برا يس شاأسوي جامعة قطر ما تقبلني

و ما عندنا جامعة في قطر أقدر أكمل فيها دراستي

و أصلا قطر للبترول هم اللي يطلبون منا أنا ندرس برا

و كنت أتمنى على الأقل تكون جامعة خليجية بس هم قالوا أختاروا من الجامعات المعترفة من قبل المجلس الأعلى

أدري أني ضيعت من عمري فوق السبع السنين و أنا أدرس يمكن لو كنت دارسة طب جان خذت الشهادة

أما عن النصيب ما أقدر أنتظر و أقول معاش الجنيير يكفي و أعتمد على معاش الزوج محد يدري مين نصيبه ولا متى يجي

بس أشكرج يا أخوي على حرصك و ما تقصر

[M. Al-Merekhi]

اختي الغاليه ....

اول شي ابي اقولج لاتزعلين على اللي صار ... نسبتج زينه و لله الحمد ويمكن اخترتي تخصص مايناسبج وتعبتي بس هذا صار وانتهى والحين ركزي على جدام ...

بخصوص الدراسه برى والعمل اختي الكريمه انا باكون صريحه معاج ...تراها ماتسوى انج تتغربين كم سنه وانتي اصلا دارسه 7 سنوات ... انا اتفق مع اخوي عمر في هالنقطه ...

خواتنا اللي برى ابتدو من الصفر هناك لكن انتي خلاص قطعتي طريق طويل في الدراسه واخاف انج تطولين برى ونفسيتج تتعب بزياده ... فاهمه علي؟

الحين انا باتكلم عن العمل ...اختي صح ان شهادتج دبلوم بس ممكن تكملين عليها دراسات عليا ودورات و تستوين سينير ... بس لاتدرسين من اول وجديد واذا كنتي تبين تكملين لمدة سنه وتاخذين البكالوريوس بيكون حل جميل بس لاتبتدين من الصفر ...

اتمنى لج التوفيق عزيزتي ..

[A. M. JOHAR]

مشكور أخوي Al-Merekhi على ردك

أنا ماأفكر أبتدي من الصفر أنا حابة أكمل على شهادتي الدبلوم

بس على الأقل الدراسة بتاخذ مني من سنتين إلى 3 سنوات

بس شاسوي لما دخلت QP قالوا بنقدر ناخذ بكالوريوس في سنة إذا جبنا GPA عالي طبعا هذا الكلام قبل سنتين

و أنا الحين خلصت الكلية بمعدل عالي بس الدراسة بتاخذمني أكثر من سنة

مشكور أخوي على صراحتك و بالعكس أنا فرحانة لأني أخذ أراءكم علشان أقدر أفكر لمستقبلي عدل و أنا ما كتبت موضوعي لأني وصلت لدرجة مب عارفة شنو أسوي

أتمنى لو يكون في حل ثاني أقدر منه أخذ البكالوريوس بدون ما أتغرب

[M. Al-Merekhi]

حبيبتي الغاليه انا اختج مب اخوج :)

وشوفي ياعزيزتي عندي لج حل وهو انج تدورين على جامعه تكملين فيها الساعات الناقصه بالانتساب و يعادلونها لج... يعني تروحين تمتحنين و ترجعين و هذي شوي يبي لها دوراه بس انا اعرف ان زوج رفيجتي سواها و كمل البكالوريوس ....بس ما ادري اذا في جامعه معترف فيها تسوي هالشي او لاء...

اتمنى ان الباقي يفيدونج اكثر ...

[A. M. JOHAR]

أسفة يا أختي :9: :sorry_2:

و إن شاء الله بدور على جامعة و أعمل با اقتراحج

تحياتي :de51e59f7e:

[Omar Al Hazaa]

عفوا اختي M..
جوفي البترول مؤسسة عمل كبيره..
استشيري و اسئلي الدكاتره الي فيها والمسؤولين..
وقوليلهم ابي اكمل دراستي في قطر وشوفيهم بعد بشنو بينصحونج..

وفكرة اختي M (العمل مع الدراسه بالأنتساب) فكره حلوه والله..
لاكن لو تحصلين على تفرغ من البترول وتركزين على الدراسه بس بيكون هالشي ابرك..
والله يوفقج اختي..

والمفروض ان جامعة قطر مايتفلسفون ولازم يقبلونج اذا ارتفع معدلج..
هالشي ماينسكت عنه..(مايصير يوهقونج ويرفضونج ومايتم عندج غير خيار الدراسه برا) مايصير هالكلام..

جوفي اختي حاولي مع جامعة قطر مره ثانيه واهم فيهم الخير وان شاءالله بيقبلونج..(فهميهم ظروفج) وبنجوفهم بيتفهمون ولا لا!
لايقولون قوانين لأن مصلحة الطالب فوق القوانين كلها!

لاكن لاتضيعين 5 سنوةات اضافيه على التخصص..

لو تشتغلين بالدبلوم بيكون احسن..<<رفيجة اختي عندها دبلوم من نيوهورايزن وعندها بعد كم شهاده..
المهم واثبتت نفسها فالشغل وكانت تشتغل في شركه ورقوها خلال سنه وصار راتبها 14 الف
والحين تشتغل مسؤوله في جامعة قطر<<عمرها ماتعدى ال22..

اما اذا كان عندج رغبه كبيره فالحصول على شهادة البكالوريوس ادرسي(بس في قطر مب تروحين برا) وانا اعرف ناس ادرسوا تخصصين ويبون يدرسون الثالث بعد! الدراسه مفيده وعمرها ماكانت تضر الانسان..
اذا كان عندج رغبه ادرسي وراتبج راح يمشيلج وماراح تخسرين شي..

شدي حيلج اختي وصلي استخاره(ماخاب من استخار)
واذا تم عندج أي استفسار قوليه ولاتستحين..
وبشرينا اذا قررتي تسوين أي شي..

[Mohsin Al-shaikh]

السلام عليكم

صراحه اذا تبين راحة والاهل يطمأنون اختاري جامعة برادفورد اتحسين انيج مش عايشة في غربة.
الحياة في برادفورد سهله وتعامل سهل لان اغلبية سكان من اسيا نسبة قطريات وايد في برادفورد تشوفينهم يتمشون باليل. وعندنا مبنى في منطقة راقية اسمها (littel germany) معضم سكان هل عمارة قطر ومن الخليج.

[A. M. JOHAR]

السلام عليكم

و جمعه باركة إن شاء الله على الجميع

مشكور أخوي عمر عن جد مشكور لاهتمامك و لأرائك

بس لين الحين محتارة و كلامك كله على عيني وراسي

بالنسبة لقطر للبترول هم يقولون ما عندنا اتفاقية بينا وبين جامعة قطر علشان نخليكم تكملون دراستكم هني

والأحسن انج تكملين برا لأنهم يقبلون شهادة CNA-Q و الأحسن أنج تكملين الحين

صحيح أن QP عندها خطة عمل أنهم إذا اشتغلت الحين عندهم يبعثوني للدراسة بعد خمس سنوات شغل لتكون فرصة أني أترقى و أصير سينير بس محد نصحني بهذا الشي لأن قرارتهم اتغيير وممكن مديري في ذاك الوقت ما يسمح لي

ترى قطر للبترول كانوا معتمدين على الإشاعة اللي تقول أنه في جامعة من كندا بتعاقد مع قطر أنها تبني فرع حق جامعتها هني و تسمح للعندهم شهادة من CNA-Q أنهم ياخذون بكالوريوس يعني مثل الحين اللي يدرس تمريض في الكلية يقدر ياخذ شهادة بكالوريوس من جامعة كالجاري

بالنسبة للاستخارة أنا استخرت كم مرة قبل لا أقدم على جامعة قطر وكنت أحس بضيقة كبيرة وبعد قدمت على الجامعة وطلع الرفض من عندهم

أدري أحس أني جننتكم لأني لين الحين ما اتخذت قرار حاسم في موضوعي

بس بالنسبة لفكرتك أني أدرس أكثر من تخصص شلون ؟؟؟؟ قصدك أخذ شهادات من المراكز المختلفة اللي عندنا مثل نيوهورايزن وغيره؟؟؟؟




مشكور أخوي محسن على ردك

وبحط جامعة برادفورد في بالي إذا قررت أني أكمل دراستي برا

تحياتي

[Omar Al Hazaa]

عليكم السلام ورحمة الله وبركاته..

عفواً اختي M هذا واجبنا..

اول شي اختي انتي استشيري الدكاتره والناس الي عندهم خبره وعلم..

اما بخصوص بعثات البترول.. الحين عادي يبعثونج حق أي جامعه برا!
والجامعات شكثرها في قطر ويقولون ماعندنا اتفاقيه!
هل اهم عندهم اتفاقيات مع الجامعات الي برا؟
وليش مايسوون اتفاقيات مع الجامعات الي في قطر!
هذي اسئله تحير..

اختي انتي ترا اسئلتج بسيطه وبالعكس ماجننتينا..
اسئلي ولا تخلين شي في قلبج..

اختي انا ماكان قصدي انج تدرسين اكثر من تخصص..
بس انتي جوفي شنو ميولج..(هل تحبين انج تكملين الدراسه ولا تشتغلين)


لاكن البنت الي قلت لج قصتها.. اهيه اشتغلت في شركه
(نسيت اسم الشركه واذا تبينه بجيبه لج من عند اختي)

اشتغلت البنت في هالشركه لمدة سنه وطرشوها تاخذ شهادة دبلوم من نيوهورايزن..
اثبتت البنت نفسها فالشغل وقامت تعطيهم افكار واقتراحات وهذا الي خلاهم يرقونها..
يعني هالبنت غيرت اشياء كثيره فالشركه(واهيه ماعندها غير دبلوم)

بعدين جا عرض من الجامعه حق البنت انها تشتغل عندهم..
اقبلت البنت هالعرض واهيه الحين تشتغل في جامعة قطر وراتبها 14 الف..

رئيس الشركه قال لها قبل لاتروح جامعة قطر..
قال لها شركتنا بتكون مفتوحه لج فأي وقت اذا حبيتي ترجعين تشتغلين فيها..

هذي الفكره الي كنت اقصدها..
وتذكري لاتنسين اتصلين الاستخاره قبل لاتسوين أي شي.. وقولي لنا شنو بتسوين؟
والله يوفقج..

[A. M. JOHAR]

هلا أخوي عمر

فيك الخير يا أخوي إنك متابع موضوعي و الله يوفقك دنيا و أخرة

بالنسبة شنو هي ميولي طبعا الدراسة ثم الدراسة ثم الدراسة

بس أعتقد أني في الوقت الحالي بطلب من الشغل تثبيتي

و بما إنه الحين عندي شهادتين و حدة من كلية شمال الأطلنطي (دبلوم إدارة مكاتب)

و وحدة من نيوهورايزن (دبلوم IT) وخاطري أتعلم محاسبة لأني حبيت المادة وايد

و لأني مرتبطة بعقد مع QP أنه لازم أشتغل سنتين على الأقل لأنهم صرفوا علي و أدفعوا عني مصاريف الدراسة

خلال هذا الوقت أدور جامعة تقبل بالانتساب و أحاول أدخلها أو أحاول أدخل أحد الجامعات اللي عندنا موازي

[A.O.A]

هلا اختي, لاتضايقين لان مو انتي الوحيده اللي مريتي بالظروف وايد ناس اعرفهم مروا بالظروف,سبحان الله انا مريت بنفس ظروفج وكنت في جامعه قطر 2003 وعقب طلعت من الجامعه مع ان كانت نسبتي في الثانويه العامه 90% ودشيت كليه شمال الاطلنطي نفس تخصصج اداره مكاتب وان شاء الله باخلص عالكورس الجاي,صج كنت اقول اني ضيعت سنوات بس الخيره فيما اختارها الله والله يكتب اللي فيه الخير, وان شاء الله الامل موجود باذن الله, اختي هالسنه كليه شمال الأطلنطي متعاقده مع جامعات في بريطانيا مثل ليدز وليفربول وتيسايد, كلهم قالوا انهم بيقبلون طلاب الجامعه على حسب المواد اللي ماخذينها, بالنسبه لي تخصصنا صحيح ان مافي تخصص نفس تخصصنا برع بس تقدرين تكملين اداره عامه وهالشيء صراحه بياخذ منج من سنه ونص الى سنتن على حسب المواد اللي يقبلونها الجامعات, انا معاج الانتساب شيء وايد اوكي بالنسبه للي يبي يدرس ويشتغل بس مشكله المجلس الاعلى ماتقبل الانتساب, لو تقبل الانتساب كان الكل ارتاح.. الله يكتب لج اللي فيه الخير واي شيءثاني ان شاء الله اقدر اساعدج ...

موفقه ان شاء الله

[A. M. JOHAR]

مشكورة أختي A. O. A على ردج

وما شاء الله نسبتج عالية

و الله يوفقج يارب

أما بالنسبة للمجلس الأعلى صج موهقينا وما يريحون كلش

تحياتي

[A.O.A]

العفووو اختي اي وقت ان شاء الله

أختي انا سمعت ان في كليه اسمها كامبردج للدراسات المهنيه شيء جذي, تعطي بكالوريا وماجستير ودكتوراه بعد, يسمون الشهاده, مثلا شهاده بكالوريا مهنيه, هي داستهم انتساب وتقدمين الامتحانات في قطر وافتتحوا فرعهم في قطر بعد ماكان في الامارات والسعوديه والجامعه الام في بريطانيا,وصراحه انا ماعرف شنو بالضبط بكالوريا مهنيه ياريت اذا حد يعرف يساعدنا
بس ماعرف اذا بيعادلون مواداو لا, انا سالتهم معترف فيها ولا, قالي كل الدوائر تعترف فيها بس ماعرف اذا المجلس الاعلى او كيو بي يعترفون فيها, يبيله استفسار اكثر في خصوص الموضوع

اختي اذا تبين رقمهم ممكن اطرش اياه عالخاص, رقم المسؤول مال هالجامعه

وموفقه ان شاء الله

[Omar Al Hazaa]

الله يوفقج اختي A..

تفكيرج حلو انج تكملين دراستج.. وهاي الي بينفعج اكثر ان شاءالله..

ماعندي فكره كبيره عن (( الموازي والانتساب ))..
لاكن اذا اخترتي الموازي بتقدرين تسمعين الشرح من الدكاتره!

اما اذا كانت مدة الدراسه سنه ولا سنتين يمكن ماراح تحتاجين حق شرحهم..
هالشي يعتمد عليج انتي..

انتي جوفي شنو الي يريحج اكثر..
واسئلي البترول شنو الي بيكون مفيد اكثر حق شغلج..

لأن بعض الشركات مايحبون شهادة الانتساب..

والله يسهل عليج امورج فالدنيا والاخره..

والحين معانا شباب يدرسون في جامعة قطر الظهر والصبح يشتغلون فالشرطه..

اسئلي اكثر عن الموازي والانتساب..
والشباب فالمنتدى خبرتهم اكبر وان شاءالله يفيدونج اكثر..
وبالتوفيق ان شاءالله..

والبترول مؤسسه كبيره..
المفروض انهم يعطونكم خيارات ثانيه واضحه غير السفر وجامعات بريطانا وكندا..

[Omar Al Hazaa]

اختي A.m واختي A.O .. عندي اضافه صغيره اذا ممكن..

بخصوص الانتساب..
انتوا تابعين حق مؤسسة البترول ومالكم خص فالمجلس الاعلى للتعليم..

ومؤسسة البترول بعثاتها غير عن بعثات المجلس الاعلى..
وان شاءالله يوافقون لكم على الانتساب.. مراعاتاً لظروف شغلكم..
والله يجيب الي فيه الخير..

[A. M. JOHAR]

مشكورة أختي A. O. A.

على المعلومة ما كنت أدري في جامعة من بريطانيا في قطر تقبل الانتساب

بكرة إن شاء الله بروح أسئل في QP عن هذي الكلية

و بالنسبة للرقم حصلته في النت على موقعهم

ومثل ما قال أخوي عمر

الله يجيب اللي فيه الخير

[A.O.A]

بعثتي المجلس الاعلى اتوقع فيه اختلاف في القوانين بس بتكون نفس لستة الجامعات , بالنسبه لي هم مابيرضون انتساب بس الله يكتب اللي فيه الخير ان شاء الله :) وبالتوفيق يارب ...

[Omar Al Hazaa]

الله يوفقج اختي A.O

بس تذكري ترا الخيارات عندج وايد ولاتستعيلين..

وبالتوفيق ان شاءالله حق بناتنا كلهم..