إيهما افضل المجلس الأعلى أو اي شركة خاصة

[Mohammed Al-haddad]

بسم الله الرحمن الرحيم

اخواني و اخواتي ايهما افضل في الأبتعاث للخارج او الدراسة في قطر على حساب المجلس الأعلى أو احدى الشركات ( مثل قطر غاز / قطر للبترول / دولفن لطاقة ...... ) ؟

واذا ما عليك امر ممكن توضحون ليش او ميزات كل واحد فيهم لأني سمعت كلام وايد فأبي اعرف ؟؟
وشكراً

[Ahmed Al-Ali]

بسم الله الرحمن الرحيم

السلام عليكم ورحمه الله وبركاته

سؤال حلو منك أخوي محمد.

لاتوجد افضليه بينهم ، ولكن لكل واحده منهم مزايا ، على سبيل المثال ، البعثه الخاصه بهيئه التعليم العالي تتيح لك مجال اختيار الشركه او الهيئه المناسبه للعمل فيها بعد التخرج بشرط انها تكون داخل الدوله وليس بخارجها.

أما الشركات الخاصه ، فتجبرك على العمل معها مده تساوي مده البعثه ، او ضعفها ، ولكن بنفس الوقت يكون الراتب اعلى ، وسنوات الدراسه تُحسب لك كسنوات "خـبـره" وهذا لصالحك.

أطيب تحيه :)
أحمد العلي

[Mohammed Al-haddad]

يالله ما ادري الحين شنو اخذ

هل الخبرة شي ضروري وايد لهذي الدرجة مثلاً لأخذ منصب كمدير IT ( هدف )

وخايف من شي ثاني ان الشركات و رواتبها تختلف من فترة لين فترة مثلاً الحين اعلى شي راس غاز بعد كم سنة شنو الشركة بتكون ما ادري

المشكلة في واحد قبل فترة تخرج يقول انه راح على حساب شركة كانت هي الأعلى في وقته و الحين رواتبها مقارنة بالغير ضعيفة وايد ويات له عروض وايد بس المشكلة ما يقدر يطلع على أساس انهم كانوا سبونسر

فما ادري الحين شنو اسوي ( محتاج إلى نصيحة )

[Ahmed Al-Ali]

أخوي محمد

لاتحتار لهدرجه ، السالفه يبيلها تفكير ومشاوره للأهل وذوي الخبره.

أنا عن نفسي أفضل شركه راس غاز أو شـل ، لان المهندسين اللي يشتغلون بهالشركتين من افضل المهندسين ، وخبرتهم واسعه ، فأحتكاكي فيهم بعد التخرج وشغلي معاهم يكسبني خبره كبيره في مجالي.

وإذا قدر الله ، ما ارتحت بشغلي مع الشركه ، انا مب مجبور اتم معاهم طوال عمري ، بشتغل لهم بقدر الفتره اللي كنت ادرس فيها على حسابهم.

ولو جاني قبول من احدى هالشركتين مابتردد بتاتاً.

ونصيحتي لك انك تشاور الوالد واخوانك ، وتسأل وتشوف آراء ذوي الخبره ، وعقب فكر على راحتك

أطيب تحيه..
أخوك أحمد :)

[Mohammed Al-haddad]

ما شاء الله عليك اخوي شلون قريت افكاري ما ادري لأني صراحة مفكر في كم مكان

- شركة قطر غاز
- شل
- دولفن
- اشتغل في واحة العلوم و التكنولوجيا مع مايكروسوفت او ICT qatar او i Horizone

يعني افكار حلوة بس احس اني ما احب اني اكون محكور في مكان او شي


بس ممكن سؤال هل راتب الي يكون مع سبونسر اقل من راتب الي ما اخذ ( بعد التخرج ليس في وقت الدراسة) ؟؟

اسمحلي على الأزعاج و اشكرك اخوي وايد على المساعدة

[Ahmed Al-Ali]

ماعندي علم بالموضوع ...

بس اذا كان في فرق ماعتقد بيكون كبير ، هذا إذا كان الفرق موجود ، لانك انت والطالب اللي كان مبتعث عن طريق الشركه بتكونون مع بعض في فتره تدريب والأفضليه لمن يثبت جدارته. :)

[Mohammed Al-haddad]

على العموم مشكور اخوي وما قصرت و انا راح استفسر و ادور و اشوف واذا عندي اي استفسار راح اكلمك على الخاص ( بطرش لك رسلة خاصة )

[Mohsin Al-shaikh]

السلام عليكم

تبون الزبدة الشركات الخاص (قطر للبترول) ليش؟ لأن في بريطانيا في مشرف طلبة يزور الطلبة كل شهريين يطمأن عليهم واذا محتاجين مساعدة يساعدهم واذا في ظلم يحل المشكلة اذا عندك مشكلة مع بنك يحلونها لك.