!! رايكم شباب ، الدخول عام !!

[N . A . AL-KORBI]

السلام عليكم ورحمة الله وبركاته

آخوني و أخواتي في الله

هذا خبر من جريدة الراية الشبابية

أحببت أن أضع هذا الخبر بين أيديكم، ونرى آرائكم حول هذه الظاهرة

لا أكذب عليكم، وأنا أقرأ هذا الخبر ، ذهلت بما سمعته ، وظهرت علامات التعجب على وجهي :surprised1:

إليكم هذا الخبر

كتب : عبدا لحميد غانم

"مظاهر جديدة وسلوكيات غير مألوفة على المجتمع القطري ، بدأت تطفو على السطح هذه الأيام ."

من هذه الظاهرات

:21_2:


"1 . العبث بالسيارات أثناء السير وحتى الواقفة على جانبي الشوارع ،
حيث يقوم بعض الشباب بالسير بسرعة جنونية من ناحية اليمين
والتضييق أو التجنيح باتجاه السيارة الأخرى التي تسير
بجواره على الطريق ، بهدف بث الرعب والخوف في نفس قائد السيارة الأخرى ،
ولا يراعي هؤلاء الشباب ما إذا كانت هناك أسرة وأطفال بالسيارة ،
فقد تختل عجلة القيادة من يد قائد السيارة الأخرى من هول الموقف وبسبب
رعونة الشباب ، والنتيجة وقوع كارثة بكل المقاييس ." :dont_know:

خلكم معاي للحين ما شفتوا شي . :h49:

"2 . الاستعراضات التي تتم في الشوارع ، فضلا عن الدخان الذي يخرج من السيارات ،
ويلوث البيئة ويضايق قائدي السيارات الأخرى خاصة التي تسير في الخلف ،
بالإضافة للتضييق على الآخرين وهذا بالطبع يؤدي إلى وقوع حوادث ."
هالظاهره الكل شايفه بالذات ، في المسيرة ، عاد اليوم مباره بين السد والغرافة .
إن شاء الله تكون النتيجة تعادل ، مشان ماتكون فيه مسيرة :laught2:
:shh: لايسمعني حمني ، طبعا اخوي سداوي .

أما الموقف الثالث والأخير ، عجيب ، صدمه من قلب .

"3 .قيام الشباب بقذف المارة أو الذين يسيرون على الأقدام بالشوارع ، "
بشنوا تتوقعون ؟ بالورد ، بالفل ، بالياسمين ؟ للأسف لا ، بشي أحلى من كذا !!!
" بالليمون " هاي تنبلع ، واما " بالبيض " يسلام عليكم ،
"وتسمع ضحكاتهم ونشوة الفرحة ، وكأنهم يتعمدون اهانة الناس والتضييق عليهم ،
رغم ان البيض والليمون أسعارها غالية هذه الأيام ."

وينكم ياجماعة الخير ابي رايكم :3leahm:

هاي الخبر بتاريخ 16\4\2008

انتظر ردودكم على احر من الجمر

ودمتم في حفظ الله ورعايته

اختكم في الله

[Mohsin Al-shaikh]

السلام عليكم

ان مستوى الوعي بنسبه لبعض شباب في قطر ضعيف ومايعرفون عواقبها.
في ظل القوانين الاجتماعية والسلوكيات الاخلاقية يقوم بعض بالعبث بالسيارات ،والاستعراضات ،قيام الشباب بقذف المارة.
واعتقد الاسباب هي كالتالي:

1- قلة استخدامات التكنولوجيا لكشف عنهم ويرجع ذالك لإدارة المرور وشؤن الاجتماعية
2- ضغوط النفسية لدى الشباب وقلة اماكن الترفيفة
3- سؤ الرفاق
4-قلة افراد الشرطة في اماكن العامة.

التوضيح:

1- يجب على ادارة المرور او اي جهة مختصة ان تقوم بوضع شبكة كاميرات في ضواحي الدوحة لكشف عن المجرمين والحوادث وهذا لا يكلف المرور سوى بضعة من ملايين لكن يستفيد منه ألاف المواطنين والمقيمين.
وانا افضل ان شبكة كاميرات تتبع جهتين رقابيتين للدولة وزارة الداخلية و شؤن اجتماعية.
كل واحد يقدر اذا كان سلوك اجتماعي يخص شؤن او حادث يخص الداخلية.

2- قلة اماكن الترفهية لدى الشباب من الجنسين وهو يسبب ضغوط نفسية لدى الشباب والعزلة من المجتمع مما يؤدي إلى تهميش الانسانية والرحمة لديه، فتراه عدواني.

يرجع سبب إلى البنية التحتية للبلد ولكن لا يمنع ان دولة توفر فرص استثمارية موقتة للمستثمريين في اماكن خارج الدوحه. يقوم المستثمر ببناء شاليهات مؤقته بسعار مناسبة في ظل الغلاء وبعض اماكن الترفيهة مثل لعبة بينت بول المشهور في بريطانيا ولعبة تلي ماج او العاب مشابة (ألعاب اجتماعية وليس احتكارية).

من طبيعة شباب قطر يحب الاماكن المفتوحه العامة او المختلطه مثل اسواق والمجمعات وهو لايحب نفسه فقط يحب ان مجتمع كله يشارك في المسابقات واللعاب. وشاب قطري يكره شي اسمه فقط للعائلات او للنساء.
شاب قطري حركي يحب التغيير ويحب الترفيه يحب الجمعات. القلة منهم يحب الاستقلالية يكون خاص او عائلي.
لووفرنا لشباب اماكن بعيدة ترفيهة بتلاحظون التغيير على ارض الواقع.

3- ومن اسباب سؤ الرفاق البعض يحب ان يكون غير او يكون شخص مميز بسلوك الرعونة. يرجع إلى التربية والخلاق الفاسده التي تقوده إلى هذا منهم الصدقاء الذين يحرضونه على فعل شي او يكون لديه مرض نفسي من مشاهدة شي لا يعجبه.

4- قلة عدد افراد الشرطة في شوارع وهذا سبب رئيسي يجعل شخص في تهور.



أشكرك على الموضوع

[N . A . AL-KORBI]

السلام عليكم ورحمة الله وبركاته

كلامك عين العقـل يعطيك العافيـه اخوي Mohsin Al-shaikh .

والله يحفظ شبابنا من كل شر ومن كل مكروه ، ويبعد الحوادث عنهم .

[Latifa.K]

السلام عليكم ورحمة الله وبركاته

كل الشكر لج اختي الكربي عالموضوع ويعطيج العافيه ...
امممممممم ماعندي أي تعليق على الموضوع اخوي محسن ماقصر ..

بس حبيت اعلق على نقطه قالها ..


4- قلة عدد افراد الشرطة في شوارع وهذا سبب رئيسي يجعل شخص في تهور.

انا ما اشوف ان شوارع قطر مافيهااا شرطه ...
عند كل دوار بنلقا سيارة لخويا صافه ... وفيها 2 ... الا يمكن في أوقات معينه مايكون فيه حد.. (وتكون هالفتره قصيره)
يعني من ناحية أفراد الشرطه موجودين ومو مقصرين
بس التهور مزروع في نفووس في شبابنا ...

[N . A . AL-KORBI]

السلام عليكم ورحمة الله وبركاته

صح كلامج اختي Latifa.K ، بس هالشي يصير من بعد الساعة 12 بالليل

تبدأ الإستعراضات ، والشرطه مايكونون متواجدين بهالفترة ، الله يعين بس .

من بعد الساعه 12 تشوف الشباب صافين على الطريق ، مره سألت الوالد

شسالفه ؟ شعندهم الشباب صافين ؟ فيقولي الوالد ، اهم صافين لأن من بعد الساعه12

تبدأ الإستعراضات .

ويزعجون خلق الله ، ترى الحين بمنطقتنا بدأت الإستعراضات ، اليوم مفتوح

لأن فيه مسيرة ، فاز السد .

إن شاء الله ، راح ارجع واعقب على الموضوع .

[N . A . AL-KORBI]

وينكم يا شباب ، رايكم مهم والكل حاب يسمعه

انطر ردودكم

[Mohammed Al-haddad]

صراحة عن الأستعراض اسمع عنه بس الحمد لله انا و الشباب الي معاي ربعي محترمين ولا شي من هذي بس استغرب من الي يفلعون العالم بالليمون والبيض

يذكروني يوم كنت صغير كنت اعتبر الهنود كائنات مو بشرية ودايما لما عندي اي شي ابي اقطه ما اقطه في الزبالة ( الله يعزكم ) لا كنت انطر هندي اقطه عليه اوه ولا عاد اذا كان على سيكل يكون احلى و احلى خليه ينقلب ههههههه ومرة وصلت فيني قمت يمعت حصى صغار وقعدت افلع الهنود من الباص مال النادي ههههههه

[Latifa.K]

بعد الشباب الله يهديهم تفرغين بأنصاص الليالي يستعرضوون في مناطق سكنيه ..

الحمد الله ان منطقتنا ما فيها هالنوع من الازعاج وماييون الشباب ويستعرضون بنص الليل ..

بس كان ولد جيرانا عنده موتر سبورت صوته مزعج حده لدرجة ان نعرف متى يطلع من البيت ومتى يرد البيت ..

بس الحمد الله الحين تزوج وعقل ما قاااام يزعجناا بموتره لان ماقام يستخدمه ..

[N . A . AL-KORBI]

صراحة عن الأستعراض اسمع عنه بس الحمد لله انا و الشباب الي معاي ربعي محترمين ولا شي من هذي بس استغرب من الي يفلعون العالم بالليمون والبيض



الله يبارك فيك اخوي Mohammed Al-haddad ، و يحفظك ويحفظ شبابنا من كل مكروه .

[N . A . AL-KORBI]

السلام عليكم ورحمة الله وبركاته

اخوتي في الله

اتمنى ان تصل اليكم كلماتي ، وان تقبلوها بسعة صدر ، فارواحكم غالية علينا .

اخوتي في الله

إن الله جلّ جلاله خلق الإنسان، ونفخ فيه من روحه، وأسجد لـه ملائكته، وسخر له ما في الكون جميعًا لماذا ؟ لإسعاده .

فالذي حمل في البر والبحر هو الله، والذي هيأ وسائل السفر والانتقال عن طريق السفن والطائرات والقطارات والسيارات وغيرها هو الله.

قال تعالى : ((وَلَقَدْ كَرَّمْنَا بَنِي آدَمَ وَحَمَلْنَاهُمْ فِي الْبَرِّ وَالْبَحْرِ وَرَزَقْنَاهُم مِّنَ الطَّيِّبَاتِ وَفَضَّلْنَاهُمْ عَلَى كَثِيرٍ مِّمَّنْ خَلَقْنَا تَفْضِيلا)) صدق الله العضيم

فلماذا اخوتي في الله ، نبدل نعمة الله كفرا ؟ ، ونتسبب في إزهاق الأرواح وترويع الآمنين ؟

فهذه النفس ليست ملكا لك ، وليست ملكاً لأحد من الناس ، وإنما هي ملك لله ، لذا حرم الاعتداء عليها

قال تعالى : (( مِنْ أَجْلِ ذٰلِكَ كَتَبْنَا عَلَىٰ بَنِى إِسْرٰءيلَ أَنَّهُ مَن قَتَلَ نَفْساً بِغَيْرِ نَفْسٍ أَوْ فَسَادٍ فِى ٱلأرْضِ فَكَأَنَّمَا قَتَلَ ٱلنَّاسَ جَمِيعاً وَمَنْ أَحْيَـٰهَا فَكَأَنَّمَا أَحْيَا النَّاسَ جَمِيعاً)) صدق الله العضيم

فبسبب التهور ، والتصرف الطائش والعمل الغير مسؤول ؛ ترى أرواحاً تزهق، ونساء تترمل، وأسراُ

تفنى، وأطفالاً تيتم، وأمراضاً مزمنة وإعاقات مستديمة، وخسائر تصل إلى حد الإفلاس.

إنا لله وإنا إليه راجعون

ماحال الأطفال ؟ ماحال النساء ؟ ماحال الوالدان ؟

ما مصيرهم ، وإلى أي هاوية ينحدرون ، وقد هانت الأرواح .

اخوتي في الله

هذا الطريق ، ليس مكانا للتهور والدوران والتفحيط وتخويف وترويع الآمنين وإزعاج الآخرين ،

وإنما هو مكان لقضاء الحوائج ، وتحصيل المنافع ، هي منفذ إلى المعاهد والمدارس ودور العلم
والمساجد، وكل أنواع الحركة والتنقلات.

لذا لابد ان نؤدي حق الطريق ، و الالتزام بآدابه من أوضح ما اعتنى به ديننا الحنيف، فأعطوا الطريق
حقه راجلين أو راكبين، فلا بد من الاطمئنان على حسن القيادة، وفق الأنظمة والتعليمات .

قال تعالى : ((وَمَن يَقْتُلْ مُؤْمِناً مُّتَعَمّداً فَجَزَاؤُهُ جَهَنَّمُ خَالِداً فِيهَا وَغَضِبَ ٱللَّهُ عَلَيْهِ وَلَعَنَهُ وَأَعَدَّ لَهُ عَذَاباً عَظِيماً))

فعليك أن تتصف بالرفق والهدوء في قيادتك للسيارة ، فالسرعة لا تحقق لك شيئاً .

بارك الله فيكم ، وحفضكم من كل شر ومكروه ، وابعد عنكم هذه الحوادث .

دمتم في حفظ الله ورعايته

تمهل ، واذكر دموع المحبين

http://www.youtube.com/watch?v=jALlr9Xi0CI

[Omar Al Hazaa]

جزاج الله خير اختي على هالموضوع..وانتوا وضحتوا كل شي.. لاكن انا ماشفت أي حركه من هالحركات فالشوارع

ويوم فاز المنتخب على العراق في تصفيات كاس العالم امنعونا حتى ان احنا نشغل الدنجر؟؟ ليش هالحركات<<على هالحركه لازم الشباب بيشدون الهمه وبيتعبون الشوارع لما تختفي الشرطه..

وهالشي تتحمل مسؤوليته الحكومه ولازم على الاقل يسون نفس الامارات حلبه حق التحفيص..

وانا اشوف ان الي كتب المقاله الصحفيه بالغ شوي..

والي اشوفه انا لما اسوق فالخط السريع يجون جدامي ناس ويسوقون 40 ولا 50>> راقد على الخط السريع ومايبينا نخرعه ههههه

وبعضهم مايوخرون ويعاندون وماينفع معاهم الا التخريع..

بس والله اذا شفت جدامي وحده تسوق اخليها وماطق لها حتى الهرن لأني ادري انها من الخرعه عادي تهد السكان ههههه ووحده مره سوتها فيني وداست بريك جاااامد في ويهي

ومن بعدها قلت اذا مره الي بترقد على الخط السريع بخليها ترتاح وماراح اضايقها(بالعكس راح ابتعد عنها).. لازم الشباب ياخذونهم على قد عقلهم واحساسهم لان المره اذا تروعت وقامت بحركه عكسيه هالشي راح نأثم عليه واخر حادث صار لي والله كنت داعم فيه مره(امرأه)

وفالنهايه ترا اغلب الشباب اتجهوا الحين الي المواتر الكشخه وابتعدوا عن التحفيص.. (والحكومه شددت وحطوا تحريات) ولحقونا 2 صوب الخليج الغربي وقال ليش محفصين قلنا له اخر مره ومن بعدها تركنا هالسوالف..

ومابنوا لنا حتى مدينة العاب عدله مثل الناس(مافي غير علاء الدين المغبر) ونتمنى ان الحكومه تفكر في هالشي فالمستقبل..

[N . A . AL-KORBI]

السلام عليكم ورحمة الله وبركاته

كلامك يضحك ، جن الكلام موجه حقي ، لان انا من الناس الي يمشون على 50 او 60 :laught1: ، والله

حرام عليكم ، ليش هالسرعة ، روقوا بالكم ، اتمنى من الكل يقرأ آخر رد لي ، لأن انا وضحت كل شي ،

ترى هاي ارواح ، ولاتنسون " السواقة فن وذوق واحترام " ماطارت الدنيا ، هدي اعصابك ، اهم شي ماتخسر

ارواح ، ارواح تحاسب عليها ، نفسك غاليه ونفس غيرك ، وفي ظاهره بعد ظهرت ، بعض الشباب الله

يستر عليهم ، لما يمسك الشارع ، مايهده ، ولما تعطيه إشارة ، يويلك منه ، تطلع قرونه ، ويروك الشغل

عدل :h29: ، جنه يقولك " انت قد هالحركه " اي حركه ،" ياخوي ابي اخذ هالمسار ممكن " :happy: ،
تحس يرد عليك ويقولك : " هه نجوم السماء اقرب لك ، لاتحلم " :angry4:

وتضطر بالأخير تاخذ الدوار الثاني وطق مشوار عدل :281f94c89b: ، والله حرام ، يبه الشارع موب شارعك

ولما هو يعطيك إشارة ويبي يتجاوز ، يويلك إذا مابعدت عن طريقه ، ترى احتمال كبير يدعمك :boss:

حرام عليكم ، انا مضطره اسوق ، بس ما اكذب عليكم ، من اطلع الشارع ، اموت رعب ، هاي يهرن

وهاي يسرع ، وهاي يعطي إشارة ، والخ ، كرهوني بالشارع ، بس إن شاء الله من آخذ اليسن ، راح البس

طاقية الإخفاء ، ولا من شاف ولا من درا . :thinking:

هل راح ترتاح لخسرت نفسك او نفس غيرك ؟

هل راح تنام مرتاح البال ، وانت سبب اعاقة شخص ؟

هل راح يهدأ بالك لما تشوف اطفال تيتموا ، وامرأة اصبحت ارملة ؟

منو السبب ؟ هل هالسرعه راح تفيدك ؟

انا عن نفسي اخسر ملايين ، ولا إنه تروح نفس ، ابيع كل مااملك ، ولا اشوف اطفال تيتموا ، او

اهل تحترق قلوبهم على ولدهم ، ولد ماهمه إلا سعادته وبس ، إنسان اناني .

هاي رايي واحترم راي الجميع

الله يهديكم ياهالشباب ، ويبارك فيكم الرحمن .

اختكم في الله

[Omar Al Hazaa]

ههههه اختي N اما مره وحده خليت بنت تتخرع واكسرت خاطري ومن بعدها تبت .. واحذرج انتي بعد وكل الي ينامون على الخط السريع هههه اذا بتمشين 60 ولا 50 لاتقعدين فالخط السريع(طريق اليسار)

اما الطرق الثانيه انا الحمدلله ماسوي لها شي.. ومشكوره على نصايحج كلها والحمدلله انا امشي عليها وماخرع احد..

وانتي ماشاءالله عليج متى جاتج هالخبره وانا اخبر انج لين الحين قاعده تتعلمين السواقه هههه

جوفي ترا هالخوف يكون موجود بس فالبدايه وانا حسيت فيه.. وبعد ماتكملين لج سنه كامله ان شاءالله راح يبتعد هالخوف..

وانا قلت حق اختي(اختي من امي) ترا الي بتزوجها مستحيل اخليها تسوق ..

وبنصحج انتي بعد هالنصيحه.. لاتسوقين اذا في مجال انج ماتسوقين لأن السواقه ترا اتعب البنت وتستنزف مشاعرها.. وتخليها تكون متوتره ومرتبكه.. وترجع البيت مهمومه..(وفي مواقف تحتاج سرعه وقوه واخاف انها تكون صعبه على البنت)

حاولي انج تبتعدين عن هالأشياء كلها.. وعشان ماترجعين البيت تعبانه وزهقانه..

لاكن اذا ماكان في مجال.. ادعي ربج انه يوفقج ويبعد عنج التعب والحوادث.. ولاتخافين الحين الدوحه صارت زحمه ومحد يقدر يسرع فيها..

واذا احتجتي نصايح ترا حاضرين<< داعم 6 مرات وعنده الخبره الكافيه ههههه

[N . A . AL-KORBI]

وانتي ماشاءالله عليج متى جاتج هالخبره وانا اخبر انج لين الحين قاعده تتعلمين السواقه هههه



واذا احتجتي نصايح ترا حاضرين<< داعم 6 مرات وعنده الخبره الكافيه ههههه


مشكور اخوي عمر ، ماتقصر .

انا للحين اتعلم سواقة ، إنشاء الله بتاريخ 30\4\2008 آخذ اليسن ، من وين يات الخبره ؟

حاليا انا اتعلم بالشارع والحمد لله الإل والبارك نجحت فيهم ، ومازال الشارع

طبعا من خلال التدريب شفت كل هالأشياء ، بس ولله الحمد وبفضل من الله ، مافي يوم احد ظايقني

بالعكس شفت ناس محترمين ، الله يكثر من امثالهم .

بالنسبه لترك السواقة انا حابه واتمنى ، بس احيانا تضطر ، ومافيه بديل ، الأهل رافضين - يداتي وخوالي -

خايفين علي ، مايبوني اسوق ، من اروح حصة السواقة يتمون يحاتون ، الله يحفضهم ولا يحرمني
منهم

بس والله انا مضطره ، وما باليد حيله ، ولا من يحب عوار الراس

[Aisha Al-Misned]

لا حول ولا قوه إلا بالله
الله يعيننا على الظاهره الجديده...! والله اكثرت هالحركات
يجب من الآهالي الحرص آكثر على آبنائهم..و بالذات الشباب اللي يتقمصون شخصيات الكبار حتى لو كانوا مخطين
مشكوره اختي على الموضوع و جزاك الله خير

[A.Alhajri]

والله صح كلام الجريده

سالفه التقحيص ف الفريج

والله كل يوم اسمع اصوات المواتر ف الفريج ازعاج

المشكله فليل ولا الفجر يعني بعد الساعه 12 فليل

بس هالايام صايره لشرطه اتدور ف الفريج الحمدلله نتمنى هالحركات القرعه اتخف

اما سالفه البيظ !! هههههههههههه اتخيل شلون اشكالهم

[Omar Al Hazaa]

عفواً اختي N والله يوفقج ويحفض لج هلج كلهم..

[N . A . AL-KORBI]

لا حول ولا قوه إلا بالله
الله يعيننا على الظاهره الجديده...! والله اكثرت هالحركات
يجب من الآهالي الحرص آكثر على آبنائهم..و بالذات الشباب اللي يتقمصون شخصيات الكبار حتى لو كانوا مخطين
مشكوره اختي على الموضوع و جزاك الله خير

العفو اختي ، اهم شي لا تنسوهم من دعواتكم الطيبة

[N . A . AL-KORBI]

والله صح كلام الجريده

سالفه التقحيص ف الفريج

والله كل يوم اسمع اصوات المواتر ف الفريج ازعاج

المشكله فليل ولا الفجر يعني بعد الساعه 12 فليل

بس هالايام صايره لشرطه اتدور ف الفريج الحمدلله نتمنى هالحركات القرعه اتخف

اما سالفه البيظ !! هههههههههههه اتخيل شلون اشكالهم

هالشي كان فعل ماض بفريجنا ، بس الحين تسنعوا ؟ تعرفون ليش ؟

تقريبا كل بيتين مسويين مطب ، لا ومطب على مستوى ، وهم وعليه يون بسرعه ، ومو عارفين

إن فيه مطب ، فيضطرون ياخذون بريك جامد ، بس للأسف فيه حوادث قاعده تصير من هالمطبات ،

يعني المفروض يحطون لوحه تنبه من وجود مطب ، بالأخير احنا مانبي نحسرهم ، وهالشي لصالحهم


ومشكوره اختي على مرورج

[N . A . AL-KORBI]

عفواً اختي N والله يوفقج ويحفض لج هلج كلهم..


مشكور اخوي وجزاك الله الف خير