خايفه وخايف من كلام الناس

[Omar Al Hazaa]

السلام عليكم ورحمة الله وبركاته.. شخباركم حبايبي.. ان شاء الله مرتاحين..

حبيت اطرح هالموضوع وماكنت اعتقد ان لين الحين في ناس يفكرون بهالتفكير! وبعدين قلت لا يمكن انا الي تفكيري غلط؟؟

واحد من ربعي ايام العداديه حصلته فالجامعه.. قعدنا نسولف وقلت له خلنا نشوفك الظهر فالستي. قال لا انا ماروح الستي لأن سيارتي هوندا والناس شبيقولون عني !!
^
^
^
(وصلت فيه انه يحرم نفسه من الطلعه والترفيه عشان الناس) :39:
===================================

ووحده ثانيه.. تقول: اخطبوا اختي الصغيره وانا الكبيره لين الحين ماتزوجت وشبيقولون عني الناس.. اكيد بيقولون مب حلوه ولا فيني شي غلط واهيه شوي وبتصيح<< خوفاً من كلام الناس
^
^
^
(قامت تشك في نفسها وفي جمالها ومارضت بالقضاء والقدر وكل هذا لانها خايفه من كلام الناس وعشان مايستلمونها الناس.. وقالت ادعولي اني اتزوج قبل اختي.. هالشي قالته جدامنا واخاف انها من ورانا قاعده تدعي على اختها بدعاء ثاني)! :err:
===================================

ووحده من بنات خالي تقول ابي زوجي يكون مب حلو عشان الناس يقولون لي انتي احلى من زوجج هههه واهيه كبيره وقاعده تدرس فالجامعه لاكن اذا السالفه فيها كلام الناس خلاص لازم نحترمه :w5rw:
^
^
^
(مافكرت في صفاته واخلاقه لاكن فكرت في كلام الناس)
===================================

وطبعاً فالأول والاخير اهم شي رضا الناس وراحتهم!! ولا شرايكم؟

والحمدلله قدرت اكسر هالقاعده (اهم شي كلام الناس) وجيت ابي احلق شنبي وكان طوله عادي وحلو

بس حبيت ان كثافته تصير غير طبيعيه وكبيره واايد.. وجا واحد من ربعي وقال لي حاااسب ترا كلام الناس انتبه ترا الناس!!.. قلت له ارتاح انت والناس والله وحلقت الشنب ..وبعد مده صارت كثافته عجيبه مثل ماتمنيته وحققت الي ابيه
"
"
"
"
^

هالأمثله شفتها في حياتي ومادري اذا في امثله ثانيه؟ ..بس شرايكم في هالكلام؟ ولا انتوا بعد ماشيين على هالقواعد.. و هالكلام اهوه الصح ومايصير نخالف راي الناس!
===================================

[Mohammed Al-haddad]

كلمة قيلت بل انها حكمة ارضاء الناس غاية لا تدرك ( يمكن لا توصل) ( نسيت شنو يقولن ) ( بس لا يكمن تقدر ترضي الناس لهم لو تطلع فوق تنزل تحت دفن روحك في الرمل ما في فايدة )

إذا بتلاحق كلام الناس والقيل القال ترى كلامهم ما يخلص لو شنو يصير خله يطنز خله يتكلم خله يسوي يقول الي يقوله شعليه مني انا انسان لي شخصيتي انا مب ناس ( الناس يمشونه يمين و يسار)

هل الي انا سويته حرام ولا غلط بالعكس ما سويت شي و هذا رايي او مرات يكون هذا قدر من رب العالمين ولازم الكل يحترمه لأنه مب غلط ولا حرام ( مب اقصد رايي الي قاعد اكتبه )

ولكن مرات نرغم على هذهي القواعد بسبب ....... ( فشيلة / فضيحة / عيب مرات )

[Latifa.K]

كلمة قيلت بل انها حكمة ارضاء الناس غاية لا ....... ( يمكن لا توصل) ( نسيت شنو يقولن ) ( بس لا يكمن تقدر ترضي الناس لهم لو تطلع فوق تنزل تحت دفن روحك في الرمل ما في فايدة )



غاية لاتدرك :)

[N . A . AL-KORBI]

السلام عليكم ورحمة الله وبركاته

مشكوري اخوي عمر على الموضوع الرائع

اضم صوتي لك وللاخ Mohammed Al-haddad ، المفروض مانهتم بكلام الناس ،

خصوصا إذا كان هالشي مايغضب الرب ، واكون مقتنعه بالي اسويه .

بس في بعض الناس ، يتصرفون بإسلوب غريب ، يعني الحين في ظواهر غريبة الشباب

يتبعونها مثل : قصاتهم للشعر، والاستشوار ،والي يكحل العين ،ويحط بودره بويهه ........... والخ

هاي الظواهر مش مقبوله بمجتمعاتنا و اكيد الناس راح تكون لهم وجهات نظر ،

وراح يتكلمون ، هينا انا لازم اسمع وجهات نظرهم واغير من شكلي ، خصوصا إذا هالشي كان

يفيدني و ما يضرني ، مااعاند واستمر على الغلط ، لأن هالشي مو في صالحي .

بس إذا كنت ماشيه صح ، فلازم اني ما اتأثر بكلامهم ، ولا انحرج ، من شكلي او سيارتي ........الخ

في بعض الناس ينحرجون من الوظيفة الي يشتغلون فيها ، ويتأثرون بكلام الناس ،

هالشي انا ضده ،لأنه لازم يرضى بالي عطاه الرحمن ، وإذا كان في إمكانيه إنه يحسن

من وضعه ، هالشي حلو ، لأن في ناس الله ناعم عليهم من خيره ورزقه ، وتشوفه بشكل يعور القلب

ماقاعد يظهر نعم الله عليه ، يعني الله معطيك ، ليش مضيق على عمرك ،

البس ، واركب احسن السيارت ، لاتبخل على عمرك مدامك في نعمه وخير

اهم شي كل إنسان يقتنع بالي عنده ، ويحمد الله على هالنعم ، مشان ادوم وتستمر ، ويبين نعم الله عليه

[Latifa.K]

كل الشكر لك اخوي عمر على هالمواضيع الشيقه :)

امممممم بخصوص كلام الناس .... يعني في امثله انت ذكرتها المفروض مانسمع فيها كلام الناس ..
وهي السياره والا البنت اللي اختها الصغيره بتزوج قبلها ومثال اللي تبي تكون احلا من ريلها...
^
^
يعني لو الناس في هالشغلات البسيطه تفكر بكلام الناس بتتعب ...

بالنسبه لموديل السياره والا نوعيتها هااي يعتمد على مستوى معيشة كل شخص وشنو السياره اللي يقدر يطلعها ...
يعني بروح اطلعلي سياره اخر موديل واحط على ظهري ديون عشان كلام الناس ...
لا بالله رحنا فيهاا اذا انا ماعندي قيمة هالسياره ...

أنا عن نفسي صح مرات افكر بكلام الناس بس في الشغلات اللي بتعود علي بشكل سيء والا بتشوه سمعتي
امممممممم والله مافي ببالي مثال معين ...

بس لازم الانسان يعني بطبيعته يفكر بكلام الناس ... تحت كلمة "فشله" اسوي جي جدام الناس ...
أو أن "عيب" شبيقولون عني الناس.. أو انه هالشي "بيشوه" سمعتي جدام الناس

يعني حلو أن الواحد يفكر بكلام الناس وشنو بتكون ردة فعلهم ..
بس اناا مو مع الشخص اللي يفكر بكلام الناس في شي هو مايقدر عليه والا في شي ماله داعي ..
لو يفكر بالشغلات اللي بترد عليه بشكل سلبي اوكي...


ويعطيك العافيه :)

[Latifa.K]

تذكرت شي شفته من أسبوع بالضبط

يوم الخميس اللي راح
تاريخ: 10-4-2008
المكان : مبنى كلية العلوم في جامعة قطر ...
بالضبط بالضبط في الحمام<< الله يكرمكم ويكرم السامعين..

المهم دخلت اغسل ايدي والبس الاب كوت قبل لا ادخل المعمل ...

الا كانو ثنتين من البنات اللي همهم الكشخه وفل ميك اب و... و ... <<< مابي اوصفهم ..

اليوم خميس يعني عندهم قعده في الجامعه لين المغرب لازم يكشخون..
المهم كل وحده قاعده تعدل شعرها واللي تعدل الميك اب ....

الا وحده فيهم تقول للثانيه.. شفتي فلانه اليوم؟؟
الثانيه : اي شفتها..الميك اللي حاطته كلش يلوع الجبد ومب حلو ومب مرتب..
الاولى : انزين وشعرها شلون مسويته ؟؟
الثانيه: هي مسويته سيده بس مو مرتب من فوق معتفس ومادري شلون.. أنا اقول لو تلبس شيلتها أحسن <<<< والا بتفشلنا اذا تمت جي ... اخاف تسالني شلون شكلي ؟؟ ماعرف شارد عليها ..


أنا شنو انصدمت قلت بل وصلت لهدرجه ...
يعني بدال مايسترون نفسهم ويتحجبون عشان يحتشمون ولان الاسلام وصانا على الاحتشام..
هم يبون يخلونها تلبس شيلتهاا عشان لاتفشلهم جدام الناس لانهاا مب كاشخه

هذا أكبر مثال يدل على أن شلون الناس في هالفتره يهتمون بكلام الناس قبل كل شي ...

[R.A.M]

احيان كلام الناس اهو اللي ايخلي الناس نفسهم يمشون على الصراط المستقيم..

يعني مايبي يغلط على شان كلام الناس.. ماتبي تلبس هالشكل على شان كلام الناس..

للاسف ماعادت عندهم الرقابه الذاتيه وان الله سبحانه ايراقبهم.. بس.. لكل شي سلاح ذو حدين وانا مب ضد كلام الناس.. لان الانسان مب مجبور يلتفت له اذا اهو ماشي صح.. واهم اصلا بيتحاسبون على هالشي..

الانسان مهما ايسوي الناس بتم تتكلم عنه.. ف.. ليش نلتفت لهم اصلا.. واحنا بناخذ من حسناتهم .. يكفي ان احنا بنكون محتاجينها يوم الحساب..

وعلى فكره شي طبيعي ان احنا نلتفت لكلام الناس مب انه شي غلط.. لانها فطره فينا بما ان احنا عايشين بينهم..

يعني ممكن نهتم برايهم فينا وانحاتي اذا بيفهمون غلط.. بس بيي يوم وبيوقف هالاهتمام.. عاجلا ام.. اجلا.. فترقبوه اذا لين الحين ماياكم هاليوم..

وبالتوفيق..

[Omar Al Hazaa]

اشكرك على مشاركتك اخوي محمد وكلامك صحيح.. وقلت فالنهايه احنا نكون مرغومين على هالشي بسبة الفضيحه ولا الفشيله ولا العيب..

لاكن اشوف بخصوص الامثله الي ذكرتها انا فالبدايه.. هالشي ترا مب عيب ومب فشيله ومب فضيحه لاكنه ضعف فالشخصيه والي عنده هالضعف ماراح يحقق الكثير في حياته وراح يكون مهزوز << وهاي كله خوفاً من الناس!!

والبنت الي ماتبي تتزوج زوج حلو شلون بتكون حياتها الزوجيه؟ والي قاعد منخش في بيتهم عشان موتره هوندا شلون بتكون حياته.. هالشي غلط والي يشوف حد قريب منه يسوي هالحركات لازم ينصحه..

[Omar Al Hazaa]

اختي N الكربي. عليكم السلام ورحمة الله وبركاته..


كلامج صحيح في ضواهر مش مقبوله عندنا واغلبها اصلاً حرام(مثل البودره والاستشوار والكحل)<< بس اذا كانت كلها موجوده فالواحد مره وحده لأنها تشبه بالنساء..

لاكن في بعض الشباب الحين يملسون شعرهم بدون بودره وكحل وهالشي عادي.. وفي شباب ملتزمين يحطون كحل قبل النوم اقتداءً بالرسول صلى الله عليه وسلم وهالشي بعد عادي..

وكلامج صحيح كل انسان لازم يقتنع بالي عنده ومايستحي منه والرضا بالقضاء والقدر من اكبر اسباب السعاده..

[Omar Al Hazaa]

عفواً اختي لطيفه..

وبخصوص كلامج الي قلتيه.. ترا في ناس يحطون دين على ظهورهم عشان يشتري له سياره مميزه ورقم حلو .. وهالشي بعد ناتج عن ضعف الشخصيه <<والواحد يحس نفسه ضعيف وماله قيمه الا اذا عمل هالحركات..

واحد قبل كم يوم مابي اقول اسمه خذ له سلفيه 1.000.000 ريال بس عشان يلعب على كيفه وقام حجز له مرقص في سوريا اب 80.000 ريال حق يوم واحد>> هاي حركات انسان سفيه؟ مب طبيي (وبس عشان يبين شخصيه ومحد قده) ومادرا مسكين ان الي ياكل الربا فالقبر بياكل نار في في بطنه..

وبخصوص سالفة البنات الي فالجامعه ههههه تراها تضحك.. وفعلاً هاي مثال ودليل حلو على الاهتمام في كلام الناس.. وماستغرب من عقولهم الفاضيه لاكن استغرب شلون اقدروا يوصلون الجامعه..

[Omar Al Hazaa]

اختي R.A.M احب اشكرج على مشاركتج.. وكلامج صحيح الكل قام يقارن نفسه من وجهة نضر الناس وماقاموا يلتفتون حق الدين وحق اوامر ربهم الا بالعكس..

الي يبي يلتزم يقولون له لاتقصر ثوبك شدعوه ماعندك ريالين اتطوله..وخالي قال لي هالكلام>>ترا ايام الرسول ماكان يكفيهم الخلق حق الثياب؟؟ .. ولاتطول لحيتك>> هالكلام والله واحد قاله لي فالجامعه وكنا نتناقش على اللحيه ويقولي ترا حلال تشيل اللحيه وترتبها.. ان الله جميل يحب الجمال << ههههه مشاءالله خبير ويعرف فالدين.. يعني قام يفتي على كيفه ونسا ان الرسول صلى الله عليه وسلم قال (اعفوا اللحى)

والبنت المتدينه بعد يوصل لها كلام >>لاتشدين على نفسج لاتصيرين جامده واضحكي وعيشي حياتج.. يعني الرسول صلى الله عليه وسلم قال لنا لاتضحكون؟!! بالعكس والله ان الملتزمين اكثر الناس الي يضحكون وقلوبهم يكون فيها فرح دايم وسعاده <<لانهم ارضوا الي خلق القلوب (والسعاده).. لاكنهم مايضحكون على غيرهم! ومايغتابون الناس عشان يتونسون!

وذاك اليوم شافوا واحد لحيته طويله وكاشخ.. استغربوا وقالوا مطوع وكاشخ! هههه.. ماخذين فكره ان الملتزم خلاص مايكشخ ولازم ثيابه تكون وصخه ومايفهم شي فالدنيا..

هاي الناس اذا الواحد بيمشي على كلامهم بيضيع دينه ودنياه.. وبذكر لكم حديث (خطير) عشان محد يهتم في كلام الناس من ناحية الدين وعشان محد يخجل من التزامه نهائياً انشاءالله..

قال رسول الله صلى الله عليه وسلم ((من اسخط الله فى رضى الناس سخط الله عليه واسخط عليه من ارضاه فى سخطه ،من ارضى الله فى سخط الناس رضى الله عنه وارضا عنه من اسخطه فى رضاه، حتى يزينه ويزين قوله وعمله فى عينه))

اعتقد الحديث واضح.. يعني اذا ارضيت ربك, ربك راح يحبك وبخلي الناس كلهم راضين عنك.. لاكن الي يغضب ربه (مايلتزم بالسنه ولا يقصر فأي امر من اوامر الدين "عشان" الناس) الله سبحانه راح يسخط عليه وراح يخلي الناس بعد يسخطون عليه.. <<هاي الي بيستفيده فالنهايه اذا قدم امر الناس على امر الله فاي مجال من المجالات!

لاتنسون هالحديث وحاولوا تتذكرونه دايما.. والله يهدينا اجمعين

[Omar Al Hazaa]

هذي وحده امس تشتكي فالتلفزون وتقول الله يجزيكم خير عندي مشكله وابيكم تساعدوني فيها

تقول اختي عمرها 38 ولين الحين ماتزوجت وصابره لاكنها هالايام قامت تسمع كلام يجرح من الناس وصارت انطوائيه اكثر وتقعد فالبيت وحيده تحبس نفسها عشان تتلاشى كلام الناس.. وقالت ساعدوني الله يجزيكم خير.

مسكينه هالبنت عمرها 38 عايشه وحيده ونفسيتها تعبانه يكفيها الي فيها لاكن بعد تكلموا عنها واجرحوها زياده.. (يحسبون الكلام سهل لاكن الحقوق عند الله سبحانه وتعالى ماتضيع)

هالكلام يجرح لاكن الواحد شيقول.. وشلون بنقدر نساعد اختها هذي الي اشتكت؟ بنقول لها لاتهتمون في كلام الناس.. مسكينه البنت اتعبت والله يعينها ويصبرها ويقوي ايمانها..

[Dana Al-Kuwari]

تصدق عاد

كنت اعرف زميل لي اكبر مني فالماستر بس يحبني مسكين حب نوعيته حلوه مثل الاخو واخته الصغيره الي مسندرته
فا كنت اتغشمر وياه اقوله لي تخرجت ورجعت ابوظبي تعال الدوحه تغيرت ترى بافرفرك فيها والمكان مكانك ومن هالكلام

قالي لا شو ها عاد انا الي اسوق .. ما احب بنت تسوق فيني والناس بتطالع وبتقول وهذا مو ريال وخديه و و والخ

قلت بوووه خريج امريكا وماستر وفاهم وواعي .. للحين تحمل الافكار المتخلفه هذي :)

[Omar Al Hazaa]

^
^
^
هههههه اصلاً فكرتكم كلها غلط اختي دانه ومشكوره على مشاركتج.. والله يهديج.. شلون تبين تطلعين مع واحد مايحل لج انج تطلعين معاه..

ترا اذا انتي استمريتي على هالكلام فالنهايه بتتزوجين واحد حركاته نفس حركاتج.. وانتي ترضين ان زوجج يكون راعي بنات وطلعات وقلبه خلاص منتهي؟ لاكن كان يطلع بنية الصداقه والاخوه <<واذا كان راعي بنات وماتاب والله ماراح يوقف بعد الزواج..

والصداقه والاخوه على قولتج ترا مايصير تتوقف بعد الزواج هههه.. ولا شرايج؟

انتي جيبي اصدقائج وزوجج يجيب صديقاته وتجمعنا الاخوه والمحبه والحياه حلوه ههههه.

[Ali H. Al-Emadi]

كلام الناس لا يودي ولا يجيب ،
ورضا الناس غايه لا تدرك ،
واللي يضغط على نفسه علشان يطلع له موتر بربع مليون ،
وإلا البنت اللي تتشرط بالرجال علشان الناس ما يتكلمون باجر ،
واللي واللي واللي ،،
ما نخلص منهم ،،

الصراحه الناس يبون الكل يكونون مستوى واحد مثلاً ،،

ذكرتني برفيجي اكلمه امس واقوله بآخذ (هوندا صالون) يقولي شنو هوندا خذ سيارة مثل مواتر أهل قطر علشان ما يعيبون عليك ،،
يعني الحين حتى بالمواتر فيه مواتر اهل قطر ومواتر هنود ومواتر مصريين مثلاً ،،

وإلا واحد يبي يبيع موتره علشان شاف فلسطيني راكب مثل موتره ، ورفيجه بدى يعيب على موتره بسبب السالفه نفسها ،،
ليش ، الفلسطيني مب بني آدم وإلا حرام عليه يركب موتر كشخه بعد ؟؟
وإلا كلام الناس يسكته وما عنده لسان يرد عليهم مثلاً ،،


الصراحه النظره السطحيه للناس اهيه اللي وصلتنا للحاله هذي ،،

بذمتك أمس قاعد اسوق بالشارع وماشي صح (ماسك أقصى اليمين وراح الف يمين) ، يجي واحد من بعيد وهو غلطان ويهرن لي ويهاوش (جاي من اليسار ويبي يلف يمين) علشاني ماشي صح والدرب راح يتسكر عليه ، ليش علشان راكب (هوندا) واهوه (تويوتا) ،،
وفي الكفه المقابله لما اكون راكب الـ (كروزر) محد يتجرأ ويلف علي وإلا يهرن ،،



وخلاصه الكلام كله ،،

النظره السطحيه اللي عايشينها حالياً راح تضيعنا ،،

[Mohammed Al-haddad]

كلامك اخوي علي صحيح 100 % يعني الي ما عنده كروزر ماله رب ( استغفر الله )

[Latifa.K]

،،

وإلا واحد يبي يبيع موتره علشان شاف فلسطيني راكب مثل موتره ، ورفيجه بدى يعيب على موتره بسبب السالفه نفسها ،،
ليش ، الفلسطيني مب بني آدم وإلا حرام عليه يركب موتر كشخه بعد ؟؟
وإلا كلام الناس يسكته وما عنده لسان يرد عليهم مثلاً ،،



باااااااال عيل هذووول لو راحوو دبي وشافوو الهنود راكبين مرسيدسات وبي اماات ...
والفلسطيني راكب رينج روفر ... شبيسوون مابيشترون لهم ولا سياره ...
يمكن يدورون ختراع يديد عشان مايركبون السياره اللي راكبها هندي والا فلسطيني والا والا..
مع احترامي لجميع الجنسيات :)

ماقول الا الله يهديهم ان شاء الله ويخليهم مايفكرون بكلام الناس..
بس هالنوعيه من الناس وايد بتتعب في حياتهاا اذا بتسمع كلام كل شخص...

المهم برايكم شلون ممكن نغير هالفكره عند الناس ... ؟؟
شالحلول؟؟

[Abrar Al-Janahei]

انا اظن الحل لمثل هالمشكلة .. اهوه ان الواحد يبدل قناعاته

مثل ما الشخص مؤمن ايمان تام ان كل حد يبي يحسده .. او حتى اذا قال له اليوم طالع حلو.. يقول اذكروا الله ..

اللي يؤمن في الشي .. يصير واقع يطبق جدام عينه .. لو انا مؤمن ان الناس همها تحسدني على كل كلمة يقولونها بنحسد .. او حتى هالفكرة من كثر ما هي قوية في مخي .. بتصير


مثل كلام الناس.. طال ما انا مؤمنه ان كلام الناس علي يأثر في حياتي .. وان مهم اطلع بصورة زينه وراقية .. وكشخه جدام الناي .. بيصير هذا شغلي الشاغل في الحياة .. ما اخطي خطوة الا افكر شبيقولون الناس علي ..

في مثل يقول .. كل اللي يعجبك والبس اللي يعجب الناس هلمثل 100% خطأ .. ومنه طلعت الموضه

ساعة ما تتبدل قناعاتي .. ايمياني في الاشياء اللي حولي .. تتبدل حياتي

ايش افضل .. ان يكون راي واحد بس يهمني .. ولا راي .. 6 بليون شخص

طبعا راي واحد اللي اهوه راي الله سبحانه وتعالى رب العالمين

بتم اعاني طول ما انا افكر شنو يعجب الناس اسويه .. وبيخلصون كل طاقتي طول ما انا افكر شنو يعجبهم واسوية

ومن راقــب الناس .. مات هماً

في غريزة في البني آدم انه يطلع بصورة حلوة جدام الناس .. وغريزة ان محد يذم فيه

لكن هالغريزه ما بتححق الا لما الشخص يجوف شنهو يرضي رب العالمين

وكل ما طالع شيبون الناس .. ذموه اكثر و أكثر





مثل ما نجوف في كل الاعراس ..العرس يكون من قلب ورب متعوب عليه .. ومكلف اصحابه الشي الفلاني ..

لكن اغلب الناس يطلعون .. " جفتوا اشقد صارفين على هالعرس .. صج يحبون التزبي "
او " والله العروسه مو حلوة ليش متعبين روحهم عشانها "

او يتكلمون عن المعرس .. والمشكلة في نص العرس يكون الكلام .. حتى ما ينطرون

الناس بتم ادور العيب في غيرها عشان تكون اهيه بس الكاملة ..
محد يحب يعترف ان غيره احسن منه .. الا العقـّـل

بدلوا قناعاتكم تتغير حياتكم
بدلوا تفكيركم تتغير قناعاتكم
بدلوا نظرتكم لهدنيا بيتغير تفكيركم
جوفوا الدنيا بعين الرضا بعين المحبة بعين الاحسان والطيبة لكل صغيره وكبيرة .. بتتغير نظرتكم لها

واللي يظل يفكر في شي .. حتى لو كان في المجرة التاسعه بيقرب له او يصيره

ومشكور يا عمر على الموضوع :)

[Ali H. Al-Emadi]

باااااااال عيل هذووول لو راحوو دبي وشافوو الهنود راكبين مرسيدسات وبي اماات ...
والفلسطيني راكب رينج روفر ... شبيسوون مابيشترون لهم ولا سياره ...
يمكن يدورون ختراع يديد عشان مايركبون السياره اللي راكبها هندي والا فلسطيني والا والا..
مع احترامي لجميع الجنسيات

المشكله التفكير السطحي اللي عندهم ، مثل ما ذكرت أن فيه مواتر لأهل قطر ومواتر لا ،، مع احترامي للجميع ،،
وإذا كانت الحال كذا ،، باجر راح يركبون طيايير يتنقلون بين برج وبرج علشان التميز ،، على الأقل راح يخففون الزحمه

في غريزة في البني آدم انه يطلع بصورة حلوة جدام الناس .. وغريزة ان محد يذم فيه

لكن هالغريزه ما بتححق الا لما الشخص يجوف شنهو يرضي رب العالمين

وكل ما طالع شيبون الناس .. ذموه اكثر و أكثر


هاي المشكله اللي مخليه ناس ما ينامون ، يفكرون طول الوقت بالشي الفلاني بيكون زين وإلا الناس راح تتكلم عليّ .. الخ



مثل ما نجوف في كل الاعراس ..العرس يكون من قلب ورب متعوب عليه .. ومكلف اصحابه الشي الفلاني ..

لكن اغلب الناس يطلعون .. " جفتوا اشقد صارفين على هالعرس .. صج يحبون التزبي "
او " والله العروسه مو حلوة ليش متعبين روحهم عشانها "

وازيد من الشعر بيت ،، بعض الأوقات يكون العرس متواضع ومعقول ، يعني لا فيه بذخ ولا انه بسيط جداً ،
بعد يتكلمون الناس عليه ،، يعني يتكلمون على اللي صارفين واللي مقتصدين ،

المشكله ان الناس يتكلمون اليوم على عرس فلان وإلا عرس فلانه ، باجر ناس غيرهم يتكلمون على عرسهم ،
مع انهم محاولين قدر الإمكان إنه يخلون العرس كامل (والكمال لله) وإلا مكلفين نفسهم بشكل لا يتم تصوره علشان الناس ما يتكلمون عليه ،،



احنا لازم نغير التفكير السطحي اللي عند الناس ،،
تعريفهم إن مب كل قطري مستواه المعيشي مثل الثاني ،، شخص قادر وشخص ما يقدر ،،
كل انسان وله طباعه وذوقه مهما كان الثمن غالي وإلا رخيص ،،
والمشكله ان الناس دايما يتكلمون على الناس اللي عندهم حجات أقل منهم ،،
والمشكله الكلام يكون طنازه وأوقات جارح ،،


وإن شاء الله تتغير نظرة المجتمع من النواحي ذيه للأفضل ،،

[Abrar Al-Janahei]

احنا لازم نغير التفكير السطحي اللي عند الناس ،،
تعريفهم إن مب كل قطري مستواه المعيشي مثل الثاني ،، شخص قادر وشخص ما يقدر ،،
كل انسان وله طباعه وذوقه مهما كان الثمن غالي وإلا رخيص ،،
والمشكله ان الناس دايما يتكلمون على الناس اللي عندهم حجات أقل منهم ،،
والمشكله الكلام يكون طنازه وأوقات جارح ،،


وإن شاء الله تتغير نظرة المجتمع من النواحي ذيه للأفضل ،،

صح وعدل كلامك يا علي

كل ما زاد الوعي والعلم ( مب علم شهادات اللي اقصدع حكمة ) .. تتغير الاعتقادات والخيارات تتوسع :)

[Omar Al Hazaa]

بسم الله الرحمن الرحيم.. اشكركم حبايبي على توضيحكم الحلو والراقي..

اخوي علي: كلامك كله صحيح..

ونصيحتي لك لاتهتم في كلام رفيجك والله يهديه.. قول له شسوي؟ احط على ظهري سلفيات عشان يعجب الناس(الي تفكيرهم تافه)شكل موتري؟

ولا اتم فالبيت اذا شريت الهوندا عشان محد يعيب علي؟

شوف انا احياناً اسوق موتر البيت (كيا صالون) واخر مره سقته كانت الشوارع زحمه وماشي في حالي والله ومحد لف علي.. الا بالعكس كنت اسرع على الخط السريع والله ومحد يقدر يتكلم..

اخوي اذا انت ماشي في طريقك صح ماعليك من الاغبياء الي يضايقون الواحد حتى لو كان ماشي على طريق اليمين..

المهم ويوم كنت اسوق الكيا والله جا واحد ولف علي قلت له تعال لف والله وكملت طريقي وماخليته يلف لأنه طلع فجأه مره وحده وكان شوي وبيدعمني المهم جا وراي ويولع الديم(الليت القوي او الفلاش) المهم والله وكعيت بريييك جامد في ويهه وكان يسوق كروزر والاشاره كانت فاتحه وكنت مع امي.. المهم وقلت في قلبي خل يولع الليت مره ثانيه؟ وامي تصارخ علي تقولي امش.. المهم وبعدين تسنع ومشيت انا..

مابي اخربك انا والي سويته غلط وكنت اقدر امشي بدون مشاكل(وراح احاول اني اطبق هالشي فالمستقبل لاني قريت جمله حق دكتور نفسي قال فيها "كلما ازدت غضباً ازدت غباءً)

وهذا الي خلاني اطول بالي وهالشي ان شاءالله راح تؤجر عليه اخوي والحق ماراح يضيع عند ربك.. ابشر بالخير وتفائل وصل استخاره والله يوفقك.. وبعد لو نحسن للمسيئ هالشي اجره عظيم.. والاحسان اعظم درجه.. قال تعالى(((واحسنوا ان الله يحب المحسنين)).. يكفيك ان ربك يحبك لو احسنت للمسيء.. وتذكر الدنيا صغيره ومجرد طريق..

والهوندا مادري كم سعرها لاكن اخوي الصغير الحين بياخذ له كروزر مديل 94(هدد) وسعره 36 الف.. وهالموتر محترم وحلو والهوندا بعد حلوه.. هذا اذا كان خاطرك تسوق فرويل.. ونصيحتي لك تحمل تاخذ قرض ولا تتسلف وتحط على نفسك ديون..

وبذكرك بكلام امير المؤمنين عمر بن عبدالعزين الله يرحمه.. اول ما تولى الخلافه جابوا له مركب الخلافه(كان كشخه وفيه احسن انواع الخيل) قال لهم عمر عطوني بغلتي الي انا متعود عليها الله يجزيكم خير وترك المركب الفاخر(هالقصه سمعتها امس في شريط صفحات مشرقه للشيخ نبيل العوضي) انصحكم انكم تسمعونه..

عمر بن عبدالعزيز ترك المركب الفاخر واهوه يقدر يحصل عليه! <<وهذي القدوات الي احنا لازم نتبعها.. ومانقول ان الواحد مب لازم يكشخ.. خل يكشخ وياخذ له الموتر الي في خاطره لاكن مايكون فوق طاقته الماديه..

[Omar Al Hazaa]

ولي رجعه للتعقيب بعدين لأني دخت شوي.. واسمحولي حبايبي على القصور..

[Omar Al Hazaa]

اختي لطيفه مشكوره على المثال الحلو الي حطيتيه.. وفعلاً هالناس راح يتعبون وايد في حياتهم..

[Omar Al Hazaa]

عفواً اختي ابرا.. كلامج كله صحيح والحل الي حطيتيه اهوه احسن حل(الانسان لازم يهتم في رضا الله سبحانه وتعالى ومب رضا الناس).. وعندي اضافه صغيره اذا ممكن..

الانسان قبل لا يغتاب غيره ويتكلم على غيره خل يشوف نفسه هل اهوه يرضى هالكلام.. اكيد مايرضاه لاكن شلون يرضاه حق غيره..

لاكن اذا كان انسان اناني وغبي ورضا الكلام يكون على غيره لاكن مايرضاه على نفسه>> قال صلى الله عليه وسلم..(( لا يؤمن أحدكم حتى يحب لأخيه ما يحب لنفسه))>>يُعتبر شخص ماعنده ايمان.. والله يعينه في دنياه واخرته!!

بكل بساطه.. لو الكل مشا على هالحديث جان محد زعل الثاني ومحد بيتكلم من ورا اخوانه ومن ورا الناس.. وبتقل العداوات بشكل عجيب..

والي يتكلم على الناس ترا هالشي راح يرجع عليه وعلى هله وخواته واخوانه ويمكن عياله فالمستقبل.. لايحسب انه بيتكلم واهوه مرتاح..

بس شلون نوصل لهم هالكلام!!

[Ali H. Al-Emadi]

شوف انا احياناً اسوق موتر البيت (كيا صالون) واخر مره سقته كانت الشوارع زحمه وماشي في حالي والله ومحد لف علي.. الا بالعكس كنت اسرع على الخط السريع والله ومحد يقدر يتكلم..

اخوي اذا انت ماشي في طريقك صح ماعليك من الاغبياء الي يضايقون الواحد حتى لو كان ماشي على طريق اليمين..

المهم ويوم كنت اسوق الكيا والله جا واحد ولف علي قلت له تعال لف والله وكملت طريقي وماخليته يلف لأنه طلع فجأه مره وحده وكان شوي وبيدعمني المهم جا وراي ويولع الديم(الليت القوي او الفلاش) المهم والله وكعيت بريييك جامد في ويهه وكان يسوق كروزر والاشاره كانت فاتحه وكنت مع امي.. المهم وقلت في قلبي خل يولع الليت مره ثانيه؟ وامي تصارخ علي تقولي امش.. المهم وبعدين تسنع ومشيت انا..

مابي اخربك انا والي سويته غلط وكنت اقدر امشي بدون مشاكل(وراح احاول اني اطبق هالشي فالمستقبل لاني قريت جمله حق دكتور نفسي قال فيها "كلما ازدت غضباً ازدت غباءً)

وهذا الي خلاني اطول بالي وهالشي ان شاءالله راح تؤجر عليه اخوي والحق ماراح يضيع عند ربك.. ابشر بالخير وتفائل وصل استخاره والله يوفقك.. وبعد لو نحسن للمسيئ هالشي اجره عظيم.. والاحسان اعظم درجه.. قال تعالى(((واحسنوا ان الله يحب المحسنين)).. يكفيك ان ربك يحبك لو احسنت للمسيء.. وتذكر الدنيا صغيره ومجرد طريق..

والهوندا مادري كم سعرها لاكن اخوي الصغير الحين بياخذ له كروزر مديل 94(هدد) وسعره 36 الف.. وهالموتر محترم وحلو والهوندا بعد حلوه.. هذا اذا كان خاطرك تسوق فرويل.. ونصيحتي لك تحمل تاخذ قرض ولا تتسلف وتحط على نفسك ديون..


الله يهديك اخوي عمر وتسوق عدل وما تعصب على الناس ،،

وعن الموتر ما راح اهتم في احد لأن الأهم قناعتي وراحتي مع الموتر ومب كلام الناس ،،
وعلى فكره الهوندا مب رخيصه ،، على 100 الف ،،
وأنا أصلاً قادر على مواتر أغلى بشويه ولكن الموتر عجبني ، ومافيها شي لو خذيت موتر أقل من الميزانية اللي مخصصها للموتر ،،
وعن الهدد ،، أنا حالياً أستعمل فكسار 97 ،، يعني سيم سيم ،،


نرجع للموضوع ،،


اللي خايف وإلا خايفه من الناس ،،
أكيد بيكون مسوي شي غلط علشان يخاف ،،

وإللي ما مسوي شي غلط ،،
هاي يدخل داخل دائرة عدم الثقة بالنفس ،،


وإن شاء الله نكون واثقين من اللي انسويه دام ما فيه أي شي غلط ،،


فيه نقاط ثانيه ممكن أطرحها بس وراي دوام بكره ،،

[Omar Al Hazaa]

^
^
اخوي هالشي يدخل فالمشاكل النفسيه.. لأن الي يقول لازم اخذ موتر كشخه واهوه ماعنده فلوس بس عشان الناس >>هاي فيه نقص كبيييير في الثقه بالنفس وشخصيته ضعيفه ولازم يشوف حل حق نفسه..

اما الي يعيبون على الناس ويتطنزون على اعراسهم.. مادروا انهم ينتظرهم عذاب رهيييب فالقبر(الغيبه لازم يتعذب الانسان عليها فالقبر اذا ماتاب).. كل انسان محاسب على اعماله.. واللسان والفرج من اكبر الاسباب الي اتدخل الناس النار<<لاكن من يفهم؟ ومن يحس؟ وشلون نفهم الناس كلهم!!

اخوي علي خذ راحتك وحط النقاط فالوقت الي يعجبك.. والله يعينا على الدوام..

[Dana Al-Kuwari]

مهما تطورنا ومهما خالطنا ومهما تثقفنا..
الجينات العربيه في مخنا مستحيل تنمسح ههههه

بامريكا اركب بيك اب واستانس عليه واقول ياسلااام لو يحصلي وحده وخشن و ياواد وصوتك يطربني هههه
بس تعال فالدوحه ؟

انا اركب بيك اب؟؟
والله لو تنشق الارض نصين ماركب..

انوثتي تضيع ياناس وماء وجهي يضيع فالشوارع القطريه.
ماركب الا صالون والماني بعد.

مثال اخر:
مره انا وربعي رايحين مكان نوعاً ما خطر ينراح له بمواترنا الخليجيه
كل واحد مرسيدس وبي ام علشان يصفقون الدرايش والبوق والطق من الشعب الافريقي..
مافي الا نطلع بموتر وحده هوندا اكورد وعادي..
بس وحياتكم 9 انفار دشوا فيه .. وانواع الزحمه
يعني لو يصيدنا شرطي عادي يسحب لياسنا ونركب باصات وقطارات مدى الحيااااااه هههه
اي شرطي يمر ندعس راس اي واحد طالع لبرى .. تقدرون تقولون ارهاب مروري فضيع.

بذمتكم فالدوحه اسوي جي انا ؟؟
ولا اركب موتر فيه العدد المهول من البشر بالشكل ذي؟؟؟؟؟؟

والله لا يصورونا بلوتوث وننفضح والعالم كلها تقول بااااال طالع طالع وكااااااك وضحك ويذبحونا ويجينا كبت نفسي

نفس الشي بخصوص الي ذكر ناحيه الاعراس
والله رحت اعراس طلاب ويانا فالجامعه تزوجوا وعزمونا انواع الروقان يا ناس وهادي وفي حديقه
ونضحك ولا في هالطاوله بكم ؟؟ ولا هالصحن من وين

تقدرون تقولون بان هالمشكله فالعرب بس
هم الي يعيبون وهم الي ينقدون ..

وهذا اخ وهذا وععع

[Omar Al Hazaa]

اشكرج على مشاركتج اختي دانه والامثله الي حطيتيها حلوه وكلامج صحيح.. بس عاد مب كل العرب نفس الشي..

مشكلة البيك اب الي فالدوحه محد يركبه غير العماله الوافده(هنود وفلبينيين)واكيد ماراح يخلونه نضيف هههه والحمدلله مب محتاجين ان احنا نركبه..

اما الي برا يكون غير.. حلو ومرتب ونضيف وكل فئات الشعب يركبونه.. وفعلاً برا ماعندهم تكبر لاكن بلادنا فيها..

وانتي اذا سقتي الصالون الالماني عشان الناس عيل انتي بعد فكرتي في كلام الناس! اما اذا سقتيه عادي عشان الكشخه ان شاءالله الله يبارك لج فيه..

وشدعوه 9 ركبتوا مع بعض ههههه.. انزين اختي دانه انتي لاتوقعين فالخطأ الي احنا نحذر منه.. يعني اذا جيتي قطر ماعليج من الناس وخلج طبيعيه مثل ما انتي في امريكا.. جوفي احنا قاعدين نتطنز الي على الناس الي يخافون..

لاكن بدون مانحس قاعدين نعمل عشرين الف حساب حق كلام الناس نفسهم! يعني هالمشكله فينا احنا بعد.. وقلتي انتي يجينا كبت نفسي.. لاكن هذا مش الحل الصحيح ان احنا نخاف
لازم تجينا قوه نفسيه بدال الكبت النفسي ومانفتكر في كلام الناس خير شر.. لازم نشوف الحلول الي تقوي نفسياتنا وماتخلينا نخاف من كلام الناس..

اما مشكلة الأعراس للأسف اسمع التعليقات عليها كل يوم عند الاهل..

وفي قصه احب اذكرها.. وحده حطت لها من زود التطور كوشه اتدور! المهم وتعلق فستانها فالكوشه وانشق ههههه وتفشلت جدام الكل>>هاي نتيجة التفلسف الزايد هههه.. وترا الي يقولون اخ ووع اهم نفسهم يخافون خوف شديد من كلام الناس يعني لحد يغتر فيهم وفي تعليقاتهم..

والامريكان عندهم حركات وايد حلوه ومافي شي يمنع ان احنا نستفيد من حركاتهم الحلوه والمفيده الي ماتخالف الشرع..

[Dana Al-Kuwari]

^
^

شفيه البيك اب؟؟
وامريكي بعد ومظبط وديفيدي وهذا بريموت وهذا مادري بايش ورفيع الي علشان تركبه تشقح..
من يطلعه اهني ؟؟ ولا بكفو ههههههههههههههههههههه

بس فالدوحه والله لو ابلاش ماركبه..
مادري ليش بس مثل ماقلت كلام الناااااااس

وفي نقطه مهمه.. ترى اتكلم جد
لبس الدوحه مايساعد ان الواحد يعيش حياته طبيعي..
دفه طويله تسحب وشيله وغشوه ولي تلبس نقاب ولي تتلثم يعني تقدر تقول صعبه

انا لو فالدوحه بجينز عادي اشقح بيك اب
عادي اذا تعبت فالمول اقعد عالارض واتربع من بيطالع يعني ؟؟ ومايهمني حجي الناس

عادي اضحك واتغشمر واسوي الي ابيه..

بس تجيك وحده بدفه وشيله ولبس تقليدي ؟؟
هاللبس يفرض علينا حركات معينه ويفرض الثقل والرزانه سبحااان الله

الحين بيقولون دانه تسول لها نفسها بانها تدمر الشعب القطري وتجرده من ملابسه التقليديه
ههههههههههههههههههههههه

لا بس قلت بان في اشيا صغيره بس لها دور في نظره الناس.

في نقطه مهمه ثانيه
الناس فالدوحه تفهم غلط بسرعه يعني شي طبيعي نخاف من كلام الناس
مو نخاف .. بس نبي نكف السو عنا هههه
والشي يقودنا للتصنع للاسف

ونقطه ثالثه
كنت اقول للوالد باجر لي اشتغلت بارز لي 3 مواتر للدوام
كل صبحيه اشوف مزاجي شيختار
صالون ولا جكسار ولا سبورت
من له خص فيني ؟؟
معاشي وغربه سنين ومخي وتعبي.

بتقولون ديون؟
ايه باحط على نفسي ديون .. وانا ماسميها ديون لان شي اشتريت فيه وكاهو فالطبيله عندي
اذا المعاش راح منه 9 الاف سلفيات وين المشكله ان الواحد يعيش بالباقي؟
بيت الوالد مفتوح والخير موجود والاكل موجود هههههه والمعاش باخزنه لي متى ؟؟

ليش اخليه فالحساب وجاي بعد شهر معاش ثاني؟؟

انفق مافي الجيب ياتيك مافي الغيب..
ومجتمعنا زباي ويحب البطره ليش ماتزبى

هما الي اتزبوا احسن مني في حاجه ولا ايه ؟

[Omar Al Hazaa]

اختي دانه كلامج يضحك هههه..
واسلوبج فالكتابه حلو بجرب اكتب نفسه..

بخصوص اللبس..
بنتوهق ترا اذا البنات كلهم البسوا جنز ضيق ههههه..

واذا كنتي لابسه عبايه عادي تقدرين تاخذين راحتج..
اقعدي على الارض اذا تعبتي.. لاكن المشكله محد يقعد على الارض.. في قطر.. وامريكا غير
ويمكن يجيج ولد صغير ويحط ريال في يدج ههههه (اذا كنتي لابسه جنز ولا عبايه كله واحد)
ومجمعاتنا الحمدلله فيها كراسي..

والبيك اب مادري شتقصدين فيه..(البيكم ولا الشاحنه!)
احنا يوم كنا نروح البر بنات خالي وخالاتي كانوا يبسطون فالبيكم ورا بعباياتهم ههههه عادي..
يعني تقدرين تعيشين كل المغامرات بعبايتج ههههه (طاش مطاش)

بالعكس البنت حتى واهيه صغيره تستانس لما تلبس العبايه وهالشي يحسسها انها اكبرت..
ويوم كنا في ماليزيا>>بنات سعوديات بعباياتهم ونقابهم كانوا يركبون اكبر الالعاب
(اتذكر وحده كانت فاللعبه الي تروح فوق وتنزل ومسكينه ماسكه عبايتها لانها كل شوي تطير هههه)
بس زين سوت يوم اركبت اللعبه وماخلتها في خاطرها عشان (كلام الناس)
البنت الي فيها نشاط وحيويه ماراح توقفها عبايتها هههه.. <<والماليزيات كانوا يتفرجون واهم متعجبين!

اما بخصوص الجنز.. في بنات كويتات يلبسون الجنز
لاكن مع تي شيرت طويل ويكون شكلهم حلو ومستور ومافي شي ضيق على جسمهم..

تقدر البنت تلبس ملابسها على الالوان الي تعجبها بس بدون ماتكون ضيقه وكاشفه..
بس اذا رحتي أي مكان فالدوله بهالملابس محد بيحسبج قطريه (بحكم العادات والتقاليد)..
وكلام المجتمع التافه الي مايخلص..
واحسن حل انج تسفهين حق كلام الناس..
وبتحسين بالسعاده والانتعاش هههه..

اما بخصوص الويه (الوجه) عن نفسي بخلي زوجتي تغطي ويها لأني مابي احد يجوفه غيري..
والافضل ان البنت تغطي ويها لأن بعض العلماء قالوا حارم البنت اتطلع ويها..

ونصيحه للكل لحد يتنصع وواجهوا كلام الناس..
لأن بعد المواجهه تزداد ثقة الواحد بنفسه ويحس الواحد بالقوه..
لاكن الي يعمل حق كلام الناس حساب>> بيكون كئيب والله يعينه في حياته

بعطيج مثال يا دانه.. ذاك اليوم كنت دايخ وكان في عرس حق الاهل..
قلت انا مابروح وجات امي وقالت محد بيحضر عرسك.. (كانت تحسبني بتضايق وبروح وبتحسف)
قلت لها عيل مابسوي عرس من الاصل وبتزوج بدون عرس ههههه
قالت مايصير قلت لها عيل اذا انتوا تبون تسون لي عرس عادي مب لازم يحضرون الناس..
مسكينه امي خليتها تحتار ههههه..

وقبل مده زارنا خالي فالبيت(وانا كنت محلق الشنب)
قالي شفيك حلقته صرت جنك بتاني هههه
قلت له مايهمني كلام الناس و خليته يسكت على طول..
لا وبعد قعدت احل له المشكله الي بينه وبين زوجته!!
ترا اغلب الي يتكلمون مايعرفون شلون يتصرفون في حياتهم..

اختي دانه انتي قلتي نكف السوء..
وهالشي حلو ان الواحد يبتعد عن المشاكل..
لاكن انا كنت ومازلت اتقرب من المشاكل واتحدى كلام الناس..
وابي اجوف شنو اكبر سوء الناس يقدرون عليه؟هههه
(واكتشفت ان الناس حيلتهم ضعيفه)

اما بخصوص نقطتج الثالث اختي..(بتحطين لج ثلاث مواتر)
كل هذا عشان تقهرين الناس .. شكلج معصبه عليهم وايد هههه..

شوفي اختي ترا هالشي يعتبر اسراف..
اما اذا خذتي موترين واحد فرويل وواحد سبورت يمكن هالشي عادي..
وتقدرين تستثمرين الفلوس ولا تسوين لج شي مفيد..

وفالنهايه تذكري ان الدنيا صغيره ويوم القيامه بروحه 50 الف سنه(يعني حياه ثانيه)
والأنسان لما يعيش فالجنه مليارات المليارات من السنوات اعتقد انه بينسى الدنيا!
وهالفلوس بدال ماتصرفينها على السيارات..

تقدرين تكفلين فيها ايتام ولا تساعدين فيها الارامل..
والمشكله ان فلوسج ماراح تنقص هههه
قال الرسول صلى الله عليه وسلم (مانقص مالٌ من صدقه)

وتقدرين تبنين مسيد ولا تطبعين لج كم نسخه من القراَن
وكل واحد يصلي فالمسيد الي بنيتيه انتي ولا يقرا القراَن فيه..
حسناته راح تكون في ميزان حسناتج..
وبعد كل واحد يقرا في كتب القراَن الي انتي طبعتيها>>
الحرف من القراَن بعشر حسنات والحسنه بعشرة امثالها..

تخيلي عدد الحسنات الي توصل حق الانسان وهوه قاعد مرتاح في بيته وحتى لو راح قبره

هالشي يساعد الانسان في حياة البرزخ وفي يوم القيامه..
والانسان لما يموت يقول يارب رجعني ويتمنى انه يقول (سبحان الله ولا الحمدلله) مره وحده بس!!

بعدين يحس الانسان بقيمة الحسنه الوحده
لاكن شالفايده خلاص ماينفع هالأحساس بعد الموت..
والحين لازم نصيد الدنيا ونفرح فيها ومايمنع ان احنا نصيد الاخره!
وبالعكس الي ينسى الاخره ومايعمل لها>>قال تعالى
>>(ومن أعرض عن ذكري فإن له معيشة ضنكا)>> الضنك اهوه الهم والضيقه..

وفالجهه المقابله.. قال تعالى>>
(من عمل صالحا من ذكر أو أنثى وهو مؤمن فلنحيينه حياة طيبة)

محد يقدر يقول ان الدين يضيق على الواحد..
الواحد يقدر يشتري الي في خاطره ويسافر ويلعب على ويفرح..
ويكون مرتاح نفسياً ويسافر مع زوجته وعياله وهاي كله حلال.. وبعد (يستانس)..
لاكن (سبحان الله) لما يدور في قلبه يحس انه (مستانس) اكثر لأنه ما اغضب ربه..
ما أغضب ربه الي خلق السعاده وخلق القلوب..
والسموحه اذا طولت..

[Ali H. Al-Emadi]

ونقطه ثالثه
كنت اقول للوالد باجر لي اشتغلت بارز لي 3 مواتر للدوام
كل صبحيه اشوف مزاجي شيختار
صالون ولا جكسار ولا سبورت
من له خص فيني ؟؟
معاشي وغربه سنين ومخي وتعبي.

بتقولون ديون؟
ايه باحط على نفسي ديون .. وانا ماسميها ديون لان شي اشتريت فيه وكاهو فالطبيله عندي
اذا المعاش راح منه 9 الاف سلفيات وين المشكله ان الواحد يعيش بالباقي؟
بيت الوالد مفتوح والخير موجود والاكل موجود هههههه والمعاش باخزنه لي متى ؟؟

ليش اخليه فالحساب وجاي بعد شهر معاش ثاني؟؟

اممم إن ما كان فيه التزامات وراج ، فعادي تصرفين افلوسج وتبينيين الخير اللي عندج ،،


انفق مافي الجيب ياتيك مافي الغيب..
ومجتمعنا زباي ويحب البطره ليش ماتزبى

لا تعليق ،،



واعتقد اكبر فئة مقصوده اللي يحط على نفسه ديون ووراه التزامات ... الخ
علشان بس يكشخ ،،
ومافي مخباه غير ثلاثين البترول وخمس شاورما مرمرة اسطنبول ،، لوول
ولو كان بيحشم الموتر بيصب له فل تانك ،،



من احد النقاط الثانيه ،،

حب الظهور ،،
الواحد ما يطلع الموتر بو نص مليون وإلا الوحيد في قطر إلا علشان ينشاف على بعد ميل من مروره بالشارع ،،


وأيضاً ،،

((اشوف مصخناها ويا المواتر))


في ناس يتعودون على وضع معين أو شكل معين ،،
ولما يفكرون بالتغيير يخافون أو يستحون من الكلام اللي بيقولونه الناس ،،
أوقات بس في بداية التغيير راح ينقاله وبعدين خلاص ولكنه يخاف إنه يدوم معاه ،،
والمشكله إن التغيير في كثير من الأحيان لمصلحته ولكن الناس تعودوا عليه بطريقة معينه ولا يمكن يستوعبونه بغير الشخصيه اللي اعتادوا عليها ،، فكلام الناس وارد عليه ،،
فلذلك ما يسوي اللي في باله ،،


وشكراً

[Ali H. Al-Emadi]

لفت انتباهي هاي ،،


بعطيج مثال يا دانه.. ذاك اليوم كنت دايخ وكان في عرس حق الاهل..
قلت انا مابروح وجات امي وقالت محد بيحضر عرسك.. (كانت تحسبني بتضايق وبروح وبتحسف)
قلت لها عيل مابسوي عرس من الاصل وبتزوج بدون عرس ههههه
قالت مايصير قلت لها عيل اذا انتوا تبون تسون لي عرس عادي مب لازم يحضرون الناس..
مسكينه امي خليتها تحتار ههههه..


الموضوع هاي يدخل ضمن الوصل بين الأهل ،،
ولما تروح لشخص من أهلك تبارك له في عرسه على الأقل بيستانس إنك رحت له ،،
قبل فترةً رحت لعرس واحد من الأهل وكنت مزكم ، الرجال استانس إني رحت رغم الظروف الصحيه التعيسه ،،
سلمت على الرجال ، وسلمت على كم واحد أعرفه وطلعت ،،

الموضوع هاي ما له علاقه بالموضوع الأساسي ،،

وكان لازم تسمع كلام أمك وما تناحسها ،، لأن الجنه تحت أقدام الأمهات ،،



وفالنهايه تذكري ان الدنيا صغيره ويوم القيامه بروحه 50 الف سنه(يعني حياه ثانيه)
هالفلوس بدال ماتصرفينها على السيارات..
تقدرين تكفلين فيها ايتام ولا تساعدين فيها الارامل..
والمشكله ان فلوسج ماراح تنقص هههه
قال الرسول صلى الله عليه وسلم (مانقص مالٌ من صدقه)

وتقدرين تبنين مسيد ولا تطبعين لج كم نسخه من القراَن
وكل واحد يصلي فالمسيد الي بنيتيه انتي ولا يقرا القراَن فيه..
حسناته راح تكون في ميزان حسناتج..
وبعد كل واحد يقرا في كتب القراَن الي انتي طبعتيها>>الحرف بعشر حسنات والحسنه بعشرة امثالها
تخيلي عدد الحسنات الي توصل حق الانسان وقاعد مرتاح في بيته وحتى لو راح قبره

اهني صادق أخوي وجزاك الله خير

[Omar Al Hazaa]

اخوي علي مشكور على النصيحه الحلوه..
وكلامك صحيح الواحد يحب الظهور والتميز وهالشي مب حرام
(لاكن على حسب قدراته الماديه)

وامي مسكينه ماكنت اناحسها والله..
ودايماً اروح الأعارس وادري ان اجابة الدعوه واجب علي..
لاكن كنت دايخ وامي هددتني بالناس فا قلت لها عادي..
هههه واهيه تدري اني اتغشمر معاها..

بس جزاك الله خير على التوضيح والله يخليلك امك وكل الي تحبهم..

[Dana Al-Kuwari]

كلاااااااام الناس لا بيقدم ولا ياخر..
الله عليك يابو وديع .

شكله قايل هذى المقوله وهو ماكان في قواه العقليه هههه
ناسي انه عايش في لبنان..

واللبناني معروف عنه.
مو لازم ياكل .. اهم شي يكون كاشخ ومزوء

[Omar Al Hazaa]

^
^
لا كلامه صحيح لابيقدم ولا يأخر

لاكن في ناس يتأثرون من كلام الناس وفي ناس مايتأثرون..