شنهو العيب في اسمـ اخـتـك ؟ [الأرشيف] - منتدى شبكة الطلبة القطريين

مشاهدة النسخة كاملة : شنهو العيب في اسمـ اخـتـك ؟

Abrar Al-Janahei

12-04-2008, 11:37 PM

بسم الله الرحمن الرحيم

السلام عليكم ورحمة الله وبركاته

تم نقاش هذا الموضوع في احد المقررات قي الجامعه

وهو سؤال للشباب والبنات ايضا ..

شنو العيب في اسامي اهلك البنات

ليش الشاب يتجنب ذكر اسم اخته امه زوجته .. إلخ اما مجموعه من الشباب او في مكان عام

او بالأحرى ليش عيب انه يذكر ؟!

ورسولنا الكرين عندنا سؤال من احب الناس إليك أجاب : عائشه

لم يقل زوجتي ولم يقل أهلي ولم يقل ام المؤمنين

بل

عائشه

للعلم انه في مجلس رجال .. وتقريبا اغلب رجال المدينه

نحتاج توضيح

ونفتح الساحه :)

Omar Al Hazaa

13-04-2008, 12:52 AM

بسم الله الرحمن الرحيم .. موضوع حلو.. وانا بقولج ليش عيب .. وبعطيج مثال انشاءالله يوضح الي ابي اقوله

انا عادي ممكن اقول اسم اختي جدام مجموعه من الشباب فالميلس وماراح ينقص مني شي

لاكن المشكله! الشباب الي قلت جدامهم(ماراح يكونون كلهم محترمين) يمكن يطلع منهم واحد نذل ولا رزيل ويعيد اسم اختي ويمكن يقوله بدلع>>

بقولكم شلون بدلع هههه >> يعني مثل لو اختي اسمها ريم ..يمكن يقول رييوم ويدلعها ويقول كيفي انا حر

ولايمكن يطلع يكلم بنات ويقول الي اكلمها اسمها ريم!! هني انا بغتاض ولا لا ..

والي يكلمها يمكن مايكون اسمها ريم لاكن قال ان اسمها ريم عشان يخليني اعصب ((واغلب هالحركات تطلع وقت الهوشات!!))

عشان جي اغلب الشباب يكونون حذرين لأن النذاله اكثروا في هالزمن .. وهالشي كنا نشوفه من يوم وحنا صغر(بفضح اسم امك وبفضح اسم اختك) كأن هالشي فضيحه واهوه شي عادي..

وهالشي يمكن يعتبر من الغيره على الاهل!! وحتى بعض الناس مايكتبون اسم البنت الي بتتزوج على بطاقة عرسها!! ..وفالنهايه ترا مجالس الرسول صلى الله عليه وسلم كانت انضف من مجالسنا هالزمن.. مجالسنا فيها الزين وفيها الشين والواحد صار يزهق اصلا لما يقعد فيها

Abrar Al-Janahei

13-04-2008, 01:02 AM

السلام عليكم

جواب مقنع يا عمر

لكن يبقى هذا سبب واحد بس .. هل في اسباب ثانيه

وهل اسم الام ما ينقال لهلسبب بعد ؟؟

غير ان احنا بيوم القيامه بينادونا باسماء الامهات والجدات

وبعد ياخوي عمر كان يصير سوء ضن في زمن الرسول عليه افضل الصلاة والسلام ومثلا على هالشي حادثة الأفك

A.O.A

13-04-2008, 01:02 AM

اشكرج أختي عالموضوع .....وجواب اخوي عمر مقنع .. شكر مره ثانيه وجزاج الجنه يارب ...

Nawari.Al-Qahtani

13-04-2008, 11:38 AM

Abrar Al-Janahei

13-04-2008, 01:18 PM

ياماا سوالف صآرت وراحت الاخت ظحيه بس مجرد معرفة الشباب لأسم اخت فلان

شلون الاسم يخلي البنت ضحية ؟!!!

Mohammed Al-Qahtani

13-04-2008, 01:35 PM

جزاج الله خير أختي أبرار على الموضوع

المشكلة هالأيام .. صارت المسألة مسألة عرف ..

وبعدين بعض الناس ما يصدق على الله يعرف اسم أخت الواحد ..

جنه صاد عليه شي كبير ..

بس الصراحة .. إذا في ثقة بينك وبين الواحد .. أنا أشوف أن السالفة ما فيها شي ..

لأن هالزمن زمن الفتن .. والناس تسوي من الحبة قبة ..

وجزاكم الله خير على الموضوع النقاشي الناجح ..

Abrar Al-Janahei

13-04-2008, 02:27 PM

بس الصراحة .. إذا في ثقة بينك وبين الواحد .. أنا أشوف أن السالفة ما فيها شي ..

الموضوع يعتمد على الشخص اللي بتقول جدامه الاسم

N . A . AL-KORBI

13-04-2008, 04:49 PM

السلام عليكم ورحمة الله وبركاته

هلا والله فيج اختي أبرار ، مشكور على الموضوع ، ماقصرتي ، لأني نفسج مو عارفه ليش الشباب مايبون أحد يعرف إسم اختهم ؟

ردودكم مو مقنعه بشكل تام ، أنا نفس الشي أتسائل ليش الشباب مايبون أحد يعرف إسم اختهم ؟ على عكس الآباء !!!

طيب لو البنت كانت البجر وماعندها اخ يعني خلاص راحت فيها ، شي غريب ، والأغرب من هالشي كله ، هالشيء عيب بس عند الشباب على عكس الأب .

أنا البكر وتقريبا تموا العالم كله ينادون الوالد بأسمي كوني البكر ومافيه ولد ، تقريبا 15 سنة ، ما أكذب عليكم ، للحين في ناس ينادون الوالد بإسمي ، بذات ربع الوالد ، يقولون مو قادرين ، بس بعدين تأقلموا على الإسم اليديد ، أبو عبدالرحمن والنعم ، بس إلى الحين كل ربع الوالد يعرفون أسمي ، شسوي ، ما باليد حيله ، الغريب ، الوالد عادي عنده ، بس حمني هالنمله ، لا ، عكس أبوي تماما ، مايبي أحد يعرف اسم خواته ، طيب ليش ؟ يقول شذيه ، وما يعطيني رد مقنع .

اسم اختك الواحد ممكن ياخذه بأي طريقه ، من الجرايد ، خصوصا في الثانوية العامة ، الأسامي تظهر بالجرايد ، هينا الفضيحة ، الأسم والنتيجة . :D :D :D رحنا فيها .

في سالفه كل ماتذكرتها ضحكت ، حمني اخوي صغير ،
ففي مره رفيجه إتصل علينا ، وديت على التلفون ،
يعنيا تقريبا كان عمرهم 6 سنوات ، بس حركاتهم تموت ضحك ، " ألوا" ،رديت " ألوا" ، سألني " أنت أخت عبدالرحمن " ،
" أيوه " " أنت منو " ، رد علي " أنارفيج حمني " ،
عقب سألني : " أنتِ منو من خواته ، الكبيره أو الصغيره " ،
رديت عليه " الكبيره " ، عاد هو تم يتذكر أسمي " شسمج شسمج نسيت ، قولي أول حرف " ،
قلت له أول حرف " ن " ، كل لستت الأسامي قالهم بس للأسف ، ماعرف ،
عور قلبي فعطيته أسمي ، فقالي " بسرعه روح نادي حمني ، كان صوته واايد مستانس " ، وخبر حمني إنه عرف إسمي ، وهنا أنقلب ويه حمني ، علامات الغضب بدأت عل ويهه ، وداخله حره علي ،
ماصدق حمني إنه يسد التلفون ، شرشحني ، على الرغم من فارق السن الي بيني وبينه ، يقول " انت ليش تقولين إسمج " ،
سألته " هو خبرك إسم خواته " يقول " إيوه ، بس هو غبي "
وسوا سالفه ، وتم يصيح ، فديته حمني ، سبحان الله فعلا الأطفال يقدرون يوصلون حق الي يبونه ، طبعا أنا مو غبيه أخبر الكل عن أسمي بس لأنه صغير ، ومن حنته خبرته ، بس لو إنه كبير ، أكيد أسد التلفون بويهه حتى لو كان رفيج حمني ، بنقول على طول " شيبي في إسمي " هاي إذا مازفيناه عدل .

ويظل هالسؤال يدور في ذهني ، ليش ماتحبون أحد يعرف إسم اختكم ؟

في منكم من يقول ، إن كل شي تغير ، والدنيا ماعاد فيها أمان ، شنو قصدكم ، وهل أي واحد يدق ويطلب اسم اختك ، بتصدقه على طول ؟

لأن ممكن إنه يستعير بعض الأسامي !!! وهو أصلا مايعرف إسم أختك .

الله يحفظنا ويحفظ خواتنا المسلمات من كل شر ومن كل سوء.

بل بالعه راديوا ، بس الحمد لله فضفضت .

Jassim Al-Naama

13-04-2008, 05:07 PM

عليكم السلام والرحمة والبركة

يعطيج العافية أبرار على فكرة الموضوع .. ^^

اتفق مع اغلب الأخوة اللي تكلموا قبلي

لكن في نقطة حاب أطرحها :: ليش نخاف من كلام الشخص ؟ يعني حتى لو الشخص عرف اسم اختي او امي او زوجتي ... شبيصير ؟ هل هي اخر الدنيا ؟ .. انا استغرب الصراحة لأن ماشوف عيب ولاهو حرام ..

لو جاك يافلان بكرة رفيجك وقاللك : اشتغل مع اختك فلانة بالشغل .. ! .. هي في شيء غلط او حرام صار ؟ هل هو عيب وهل هالشيء يحرج ؟

:)

Abrar Al-Janahei

13-04-2008, 05:27 PM

ذكر الله سبحانه وتعالى في القران ( فلما قضى موسى الأجل وسار بأهله .. )

رغم انه فقط كان معاه زوجته الا ان الله سبحانه وتعالى وهوه اعلم بها احترم مشاعر الرسول الكريم موسى عليه السلام وقال أهله
لا بسبب انه عيب ولا حرام فقط لمراعات مشاعر سيدنا موسى

وذكر في القرآن اسامي كثير من النساء
والرسول عليه الصلاة والسلام كل احد كان يعرف اسامي زوجاته و بناته حتى بنات الصحابه وخواتهم

الحين القضيه قضيه ..تصرف الشخص المقابل .. في استخدام الاسم

مثل ما ذكرت اختي الكربي .. يقدرون يطلعون اسامهم من وايد اماكن

بس الشي الغريب من هالموضوع ان الاسم يعد جزء من الشرف !!!!! ؟؟؟

Jassim Al-Naama

13-04-2008, 05:39 PM

السؤال اختي ابرار مثل ماقلتي .. ليش الاسم يعد جزء من الشرف ! .؟؟؟

هل معرفة الشخص الآخر بالاسم يضر بشرفي أو بشرف اختي مثلا ؟ .. هل يؤثر على مستقبلنا ؟ هل يؤدي إلى اضرار سمعة العيلة ! أو الشخص نفسه ؟ اسئلة كثيرة وما ادري ايش السبب اللي يؤدي إلى خوف بعض الاخوان من ردودهم بالردود من هالمسألة :)

Mohammed Al-haddad

13-04-2008, 05:49 PM

انا صراحة مع اخوي عمر 100% في الي يقوله ونفس الشي كلام أخوي جاسم صحيح 100% ما يقدر اساساً يسوي شي وبالعكس ما في أي احراج لكن ضعف قلوب البعض ممكن ان تخليك ما تقول او تتحسف انك قلت !!! بس هذا ما يعني اني مو معتز و مفتخر بأختي بالعكس

Omar Al Hazaa

13-04-2008, 10:34 PM

بكتب هالرد وانشاءالله يكون فيه جواب للأسئله السابقه...

اخوي الحداد كلامك حلو لاكن ضحكني يوم قلت هالشي يعتبر ضعف فالقلوب هههه .. هالشي لاتعتبره ضعف قلوب لما انا ماقول اسم اختي جدام مجموعة شباب فالميلس لأن في منهم الزين وفي منهم الشين الغبي!

وطبعا ماراح ينقص مني شي لو قلت اسم اختي ..لاكن انا احب اني اتجنب كلامهم الفاضي لأني ماعندي وقت حق التفاهات وحق الكلام الغبي الي يطلع منهم .. وعمرها السالفه ماكانت سالفة خوف ..

وبعض الشباب صاروا اخس من البنات وشغلتهم بس الحش ويقعدون فالميالس ويقولون فلان صار فيه وفلان الثاني فيه كذا وكذا ..

واحنا الحين في زمن الماسنجر! يعني لو بقول اسم اختي في ميلس من الميالس بيجي واحد وبيقول انا اعرف اربع بنات بهالأسم والثاني بيقول انا اعرف 6 بنات بهالأسم .. لاتستغربون ..وواحد من الشباب يقول لي انا عندي 8 اميلات!!

وفي برنامج اسمه سكاي بي الواحد اذا كان يبي يتعرف على ناس منه يكتب الاسم والدوله ..مثال(قطر+فلانه) ويطلعله اسامي كل البنات الي مشاركين بالأسم الي اهوه اكتبه..

وهالزمن الانسان للأسف مايقدر يوثق بأي احد ويتجنب المشاكل افضل له.. وماعتقد ان السالفه لها دخل بالشرف ..لاكن في ناس عقولها فاضيه غبيه يتكلمون وايد.. والانسان افضل له انه يتجنب كلامهم الغبي..

وماشوف له داعي اني امشي مع واحد من ربعي واقول له اسم اختي! مع ان في اثنين من ربعي اعرف اسامي خواتهم والثالث اعرف اسم خطيبته وماشوف شرفهم نقص في عيني ولا رجولتهم انقصت.. هذا من وجهة نضري لاكن يمكن في شباب ثانين يشوفون هالشي عيب.. والي يشوفه عيب اتمنى انه يقول وجهة نضره

اخوي الحداد ترا اقدر اقول اسم اختي وفي شباب يقدرون يقولون اسامي خواتهم >>لأنهم بايعين الدنيا هههه.. ومستحيل يتحسفون لاكن الي يغلط ولا يقول كلمه اهوه الي بيتحسف هههه ..بس من الاصل هالكلام ماله داعي! وممكن تصير هوشات بعد مالها داعي!! صح ولا لا

وعلى فكره .. اخوي الصغير قال اسم اختي قبل كم سنه جدام ربعي3 ووالله وماشفت منهم كلمه غلط .. وانا انصح الشاب ولا البنت> الي يبي يرتاح في حياته خل يدور له الربع الصالحين الي ينفعونه وقت الشده ..ويبتعد عن الناس الي مايعرفون ربهم لأنهم ممكن يغدرون فيه فأي لحضه.. ومابي اكثر كلام عن الربع لأن هاي بروحه موضوع طويل

والي مايعرف حق ربه ماراح يعرف حق ربعه ولا هله ولا الناس الي معاه؟؟

يعني بختصار المشكله مب فالي يسكت ومايقول اسم اخته لاكن المشكله فالي بيسمعون اسم الأخت أو الأم اذا انت ضامن اخلاقهم وصفاتهم روح وقول لهم اسم اختي الأولى فلانه والثانيه فلانه والثالثه فلانه <<""وتبي تتزوج أي وحده منهم ههههه ""اتغشمر""

Mohammed Al-haddad

13-04-2008, 10:54 PM

شكراً اخوي عمر على الرد لكن نفس ما قلت في غالبية الحالات انت مب محتاج تقول اسم اختك لكن في حالات بسيطة يمكن يستدعي انك تقوله

Omar Al Hazaa

13-04-2008, 11:24 PM

^
^
عفواً و كلامك صحيح اخوي محمد.. وحط هالمثل جدامك ((الي يستحي مايعيش!!)) بس مب ماتستحي في كل شي ..لاكن في اشياء تعتبر تافهه مثل (اسم الاخت) واشياء ثانيه وايد الأنسان المفروض انه مايستحي منها..

وفي ناس يعارضون هالمثل لاكنه يعجبني!!

N . A . AL-KORBI

13-04-2008, 11:28 PM

عورتوا راسي بهذرتكم اتغشمر ، كلا له وجهة نظر ، طيب انا الي فهمته من الأغلبية ، إن هالشي يعتمد عل حسب الي في الميلس ، إذا كانوا اوكي او لا ، طيب هالشي شيفيد ، نفرض إنهم مو اوكيه ، وناس ما عندهم ذمه وظمير ، شنو راح يسوون بالإسم ؟ في الأول والأخير عباره عن إسم

Abrar Al-Janahei

14-04-2008, 12:41 AM

ممكن يستغلونه بطريقه تظر العائلة ؟؟

Momen W. Anaya

14-04-2008, 01:06 PM

مرحبا .... اهلين اختي ....
بالنسبه لهالموضوع .... انا مو شايف انه عيب ابدا بالعكس شي عادي جدا ....
بس ... المشكلة مش هون شو اليبب الي يحتاج لذكر اسم اختي امي زوجتي الخ
يعني عادتا ما بكون في سبب ومافي داعي
بعدين كمان وضع الناس اليوم مش زي زمان يعني ما بيعرف الشب اسم البنت الا يسرح بافكاره الي ما باذكرها
باختصار ابعد عن الش وغنيلو .......
شكرا مرة تانية عالموضوع

Omar Al Hazaa

14-04-2008, 10:58 PM

^
^
اختي ابرار ممكن يستغلونه بطريقه تضر العائله..شلون؟

مثلاً اذا واحد تهاوش مع مع رفيجه واهوه يعرف اسم اخت رفيجه >>

عادي يطلع اشاعات على اخت رفيجه ويقول اخت فلان فيها وفيها واذا ماتصدقون ترى انا اعرف اسمها ..

ولما يقول اسمها راح يصدقونه <<لأن اهوه وربعه تفكيرهم من نفس الطينه!!

لاكن اعتقد ان هالشي فيه جانب ايجابي !.. مثلاً لو شفت وحده فالمنتدى ولا فأي مكان وعجبني كلامها وكانت كاتبه اسمها الحقيقي

<<اقدر واروح واقول حق امي اسئلي عن فلانه وشوفي صفاتها اوكي ولا لا.. انا حطيت هالشي كا مثال وماحاط فبالي شي والله هههه..

Abrar Al-Janahei

14-04-2008, 11:19 PM

المشكلة اخوي عمر مو مشكلة اسم

المشكلة عند من بتقول الاسم .. يعني الاشخاص مثل ما قلت الاحد اصلا ما يرافجهم .. عشان يقولهم اسم اخته

اما اذا ناس قه ويخافون الله .. مب مشكله كلش ..

قبل ما نقول اقول اسم اختي حق .. لازم نفكر مين انا مرافج .. ذيك الحزة بأمن لهم

القضيه قضية انا من مرافج ..

Abrar Al-Janahei

14-04-2008, 11:21 PM

انزين سؤال ثاني ..

بالنسبة حق اسم الأم

Omar Al Hazaa

15-04-2008, 10:56 PM

مشاءالله عليج اختي ابرار جبتيها بطريقه حلوه وكلامج صحيح (القضيه قضية انا من مرافج)

والي يتجرأ على اسم الاخت بعد راح يتجرأ على اسم الام .. واذا صارت هوشه بيسبه وبيقول امك فلانه ويا ولد فلانه وبيسبه وبيسب امه بكل بساطه ..

اما اذا كان الرفيج انسان محترم وعارف ربه ماراح يغلط على ام رفيجه ..

ومن الاصل ماله داعي اني اقول اسم امي حق أي واحد الا للضروره واذا قلته للضروره هالشي عادي واذا قلته بالغلط جدام واحد من ربعي (المحترمين) مب الصايعين ماعتقد ان هالشي بيضرني ولا بينقص مني شي..

Dana Al-Kuwari

21-04-2008, 08:45 AM

ذكرتوني بالمااااضي

كنا يهال واصغار وكان ولد جيرانا وسيم بشكل اسمه احمد
وقتها كنت صغيره يمكن فالصف الخامس

مره نادوه يركب السوني واحنا مشتطين ياااه سوني سوني
دخلوني داخل الغرفه ويا بنت عمي وقالوا عيب تطلعون واقعدوا يالله لين مايطلع الصبي

اخوي الصغير بالغلط قال الشريط عند دانوا
قام اخوي العود وابسطه بسط طير عينه وياهيس وليش تقول اسمها ولااااااا
للحين اتذكر

ناس تتهاوش وتضارب علشان اسمي
حسيت نفسي خطيئه فالدنيا ولا شسالفه هههه ناقص بس ؤد البنات ويكتمل السيناريو

احس هالشي كان فالطفوله اكثر شي
الحين الناس تفتحت وصار الواحد يروح الجامعه ويا اخته وفي نفس الكلاسات
صار الاخو يشتغل في بنك واخته وياه
صار الاخو يكلم رفيجه ويقوله حاضرين انا اختي تشتغل فالمكان الفلاني وانشالله باخلص موضوعك

النظره بكبرها تغيرت خلاص

B.A.M

21-04-2008, 09:43 AM

بسم الله الرحمن الرحيم

صدقو اللي قالو اذا عرف السبب بطل العجب
ياما سألت نفسي نفس السؤال بس ماجا ببالي سبب مقنع
وان ممكن البنت تكون ضحيه عقول تنك اذا انطرا اسمها قدامهم

اشكر الاخوان على التوضيح وجزاكم الله خير والله يحفظ اعراضكم ويصون بنات المسلمين

Abrar Al-Janahei

21-04-2008, 01:52 PM

اخوي الصغير بالغلط قال الشريط عند دانوا
قام اخوي العود وابسطه بسط طير عينه وياهيس وليش تقول اسمها ولااااااا
للحين اتذكر

ناس تتهاوش وتضارب علشان اسمي
حسيت نفسي خطيئه فالدنيا ولا شسالفه هههه ناقص بس ؤد البنات ويكتمل السيناريو

سبحان الله يا دانه .. :) زين نجيتي

Ali H. Al-Emadi

21-04-2008, 02:27 PM

ذكرتوني بواحد من اليهال يقول لأخوي ،، (( اسكت لا اقول اسم أمك ))

Mohsin Al-shaikh

21-04-2008, 03:37 PM

السلام عليكم ورحمة الله وبركاته

ليش ياخذون الاسم بسخرية لان شخص قاله بطريقة غير متزنة وغير جرئية بشي مع مجموعة من الشباب الغير الواعي. المهم يوم تبي تذكر اسم اهلك عليك تركز مع اي فئة من العمر قاعد تتخاطب معاهم وبعدين تذكر الاسم بقوة وبي وزن دون اعطاء المجال للسخرية.

واحد يبي مساعدة علشان الشغل وانت مع الشباب ورضيعتك شغاله في نفس المكان.
مثال: ترى رضيعتي شغالة في نفس مكان.... بقولك اسم رضعتي علشان تروح الدوام وتعطيها الاوراق بس عاد تمسك اسم الرضيعتي ودور في الشوارع كون عند كلمت رجال. اسمها عائشة على اسم بنت الرسول (ص روح عطها.

انت جذي حكمت على شخص. اهم شي القيادة.

مع السلامة

اشكرك على الموضوع

Abrar Al-Janahei

21-04-2008, 07:14 PM

المهم يوم تبي تذكر اسم اهلك عليك تركز مع اي فئة من العمر قاعد تتخاطب معاهم وبعدين تذكر الاسم بقوة وبي وزن دون اعطاء المجال للسخرية.

جزاك الله خير يا محسن .. هاي اللي كنت بوصله :)

Omar Al Hazaa

21-04-2008, 11:22 PM

^
^
غلط .. لاتحطون العمر معيار حق قول اسم الام ولا الاخت..

لأن في ناس اعمارهم كبيره لاكن ممكن يطلعون كلام على الاسم..

>>قوله حق الانسان الي انت واثق منه ومن حركاته مهما كان عمره..

والي يبي يسخر بيسخر حتى لو قلنا الاسم بقوه ولا بأي طريقه..

Mona Al-Hammadi

21-06-2008, 09:33 PM

انا اقول عن عدم ذكر اسم الاخت من التربيه ومن الي يشوفونه الشباب مثل ما ذكرتوا مثلا انا مرت خالي تعلم ولدها الصغير من الحين عيب هذي اختك عيب لا تسوي جي عيب ترى هاي بضرها بعدين صار الولد يخاف عليها من الحين صار اوتماتك يعرف ويتشدد عليها خبركم شبابنا شوي يمصخونها ههههه<<<<لحد يزعل
بس من طفولتهم والبنات كله عيب وخاصه هالزمن

Abdulla AL-Marri

21-07-2008, 01:28 PM

الناس مهب سوى ، على حسب البيئة اللي عايش فيها الواحد ، اعرف لي ناس يصبح ويمسي ، وأسم أمه وأسم خواته على لسانه << هذا طبعا دلخ وأهبل ولاعنده غيره..
المقصود يعني : الواحد ماله حاجه يذكر أسم أمه أو أسم زوجته أو اخته الا ف الضرورة ، مثلا في المطار أو في المستشفى

Ahmed Alobaidly

22-07-2008, 02:59 AM

رايي وجاي متاخر كالعاده
مافيها شي ابدا ..

وتصير بين الربع
بس ربع عن ربع يختلف الموضوع

يعني شوف وش بيصير لو احد من ضغفاء القلوب والدين
سمع عن هالاسم

شوف وش راح يسووي
وشنو راح يطلع من الفضايحح !

وزمانا غير ورجالنا ومجالسنا ووووين
ومجلس واصصحاب الرسول وووووين !

هذا رايي باختصار
:9:

وطبعا قبل قراة الردود

Kholoud Al-khuzaei

06-09-2008, 11:09 AM

اختي ابرار
السموحه كتبت لج هني بس مضطره
محتاجتج في خدمه ضروريه
وحاولت اراسلج عن طريق الرسايل الخاصه بس انتي مختاره عدم تلقي رسايل من الاعضاء
اذا ممكن اتواصل معاج باي طريقه تحبينها لانه موضوع ضروري
واذا ماتقدرين مب مشكله اختي
والسموحه

Abrar Al-Janahei

07-09-2008, 01:19 AM

لا اختي .. ماحاطه هالخدمة هالشي في الرسايل مادري ليش يصير هللون

فالج طييب ولا يهمج ..
انا برسل لج ايميلي بالرسايل الخاصة :)

Abdulla Muhairi

10-09-2008, 12:09 AM

ووش الداعي اللي يخليني اذكر اسم ختيه ولا امايه بين مجموعه من الشباب ^^!

Abrar Al-Janahei

10-09-2008, 06:39 PM

صاج با عبدالله .. صاج :)