افكارنا وا عتقادتنا يوم كنا صغار [الأرشيف] - منتدى شبكة الطلبة القطريين

Mohammed Al-haddad

12-04-2008, 10:10 PM

بسم الله الرحمن الرحيم

السلام عليكم ورحمة الله وبركاته

حبيت أطرح موضوع رائع وجميل ومسلي ومضحك في نفس الوقت :)

كل واحد فينا يوم كان صغير كان عنده إعتقادات و افكار معينة ؟؟

المشكلة أني طارح الموضوع وانا لازم ابدأ

يوم كنت صغير كنت افكر ان الجبن يبونه من الأحجار الكبيرة او الحصى :SnipeR(14):

صراحة هاي الي اتذكره بس خلني اقولكم عن ربعي

واحد من ربعي كان يظن ان التلفزيون فيه ناس صغار داخل التلفزيون هم الي يمثلون بس هم منخشيتن ما تقدر تشوفهم من ورا
و الشي الأكبر :58: انه كان عباله ان المكيف داخله ناس صغار يهفون و ينفخون وهم الي يطلعون لينا الهواء البارد :D :D

فأنا بأنظار ردودكم و افاركم العجيبة يوم كنتوا صغار

ولحد يكذب :54y45: ويقول ما كنت افكر بمثل هذي الأشياء كلنا فكرنا فيها

Abrar Al-Janahei

12-04-2008, 11:23 PM

مشكور اخوي محمد ...

افكار تظحك

انا كان في بالي ان

الشمس قطعة ذهب كبيرة .. وف يالليل حرام يبوقها ويصيدون الشطره ويرجعها الصبح .. كنت استانس كل صبح :)

كان في بالي ان منارة المسجد تنزل وترتفع .. لما يأذن ترتفع والمؤذن فوقها يأذن

كان عبالي ان النمل مسويين خطه ضد البشر .. بس قاعدين يجهزون روحهم عشان يصيرون اكثر ويصير حرب .. فكنت اخاف ادوس عليهم :)

نفس سالفه التلفزيون .. كانت اطل في زاوية التلفزيون لما الممثل يمشي .. يعني بجوف وين راح
وبعد كنت اقول حق ابوي ان مال الاخبار يطالعني وين ما اوقف في بيتنا .. كنت اقوله انا ماحب الاخبار ليش بس يقولي

وانا صغيره كنت كلا ادعي الله اني اقدر اخذ نجمتين من السما البسهم في اذني

كان عبالي ان الحرامي ياكل الناس

كنت اخاف اطلع الظهر .. بسبب وجود ام حمار

اخاف انام وانا اطالع الجامه .. يمكن يمر حد ( لدرجة ان مره صارت صج .. وكان حرامي ) :|

كان عبالي ان القوس قزح .. يطلع بس من وراى بيت جيرانا :)

كنت لما يكون الجو مغيم .. اركب فوق السطح عل وعسى احصل غيميه ( يازعم بقدر امسكها )

وخرابيط واييد بعد :)

مب متذكرتها الحين .. كنت اتخيل واييد

مشكور على هالموضوع المظحك :) ماتقصر

R.A.M

13-04-2008, 12:59 PM

نفس سالفه التلفزيون .. كانت اطل في زاوية التلفزيون لما الممثل يمشي .. يعني بجوف وين راح
وبعد كنت اقول حق ابوي ان مال الاخبار يطالعني وين ما اوقف في بيتنا ..

نفسي :)

والله اشكثر اشيا اتضحك يوم كنا يهال..

Jassim Al-Naama

13-04-2008, 05:02 PM

عليكم السلام ورحمة الله وبركاته

يعطيك العافية محمد :)

مممم ضحكتني سوالفكم والله ^^

ممم عني !

ممم

اتذكر اني كنت اخاف ارقد على جنب الفراش الأيسر لأن كان مايجابل الطوووفة !

كنت اتابع فولترووون فترة الظهر وكم مرة كنت ارقد بالغلط وانا اشوف واقوم اصيح اقول ليش سووا كذا وماخبروني وخل يعيدونه وابيهم يعلموني شلون تتطير الاسوود ! وكنت أسال ابوي وين هاي بأي بلد ابي ارووحلهم !! ( وايد مـتأثر )

كنت عبالي ان القطاوة حيوانات متوحشة ولازم مهمتهم بهالدنيا يذبحونا ! ( له ماضي أسود وتاريخ معاااهم )

ولي عودة اذا تذكرت شيء ^^

يعطيك العافية

Abrar Al-Janahei

13-04-2008, 05:19 PM

كنت قبل اول يوم مدرسه اقعد مع امي واخواني نجلد الدفاتر

ويكوون يوم حلو مل المقصات والزقات

كنت وانا اشتغل ارقد وانا مامخلصه دفاتري

فاقوم الصبح اجوفهم مجلدين ومرتبين محطوطين عندي

كان عبالي ان في عمال صغغغاارر جلدوا دفاتري ..

فكنت كل يوم انثر خبز جدام باب بيتنا ^__^

هههههههههههههه

وتمييت على هالحاله سنتين
السنه الثالثه قبل ما تبدا المدرسه قمت في نص الليل اجوف امي تجلد الدفاتر

قلت لها ليشش الحين العمال يزعلون

وقلت لها السالفه ظحك وقالت هاي انا اجلد دفاترج من هالعمال

وبعد

كان عندي صديق خيالي .. اسمه خليل .. كان عباره عن هيكل عظمي عيونه تلمع لابس T-shirt احمر وشورت ازرق

هههههههههههههههههههههههههه يحميني من الاشرار لما ارقد ^__^

Mohammed Al-haddad

13-04-2008, 05:38 PM

اشكركم اخواني واخواتي على ردودكم الطيبة والجميلة

كل واحد يتذكر شي جميل فيطفولته وللأسف لما نفكر فيه الحين نحس انا احنا كنا خبلان او اغبياء

N . A . AL-KORBI

13-04-2008, 07:58 PM

السلام عليكم ورحمة الله وبركاته

مشكور اخوي على موضوعك الرائع ، مواقفكم تموت من الضحك ،

أنا عن نفسي كنت اخاف من شعري ، وكنت دايم اصيح لي نزلت الخصل ،
كنت اتخيلها قرون الزهيوي ، واقول حق امي ، شيلو الزهيوي ،
واتم ادور في البيت مشان يطير ، والأهل يضحكون علي .

والحين اضحك على غبائي ، تخيلوا لدرجه ان الوالده قصت شعري وريحتني منه .

كنت اخاف اتكلم قدام العصافير ، أي شي ابي اقوله حق
اختي بالمساسره ، لأن الوالده كانت دايم تقولنا :
" العصفوره قالت لي ، العصفوره قالت لي " ، من كذا صرنا
مانثق بالعصافير ، ونقول عنهم أكبر فتانيين .

نفس الشي سالفة التلفزيون ، بذات الأخبار مثل ماقالت ابرار ،
تحسهم يطالعونك ، كنت اغير مكاني ، من مكان لي مكان ،
مشان يبطل يطالع ، بس للأسف ، عنيد وراسه يابس ،
تحس بإحراج وهو يطالعك ، اقول للوالد هاي مايستحي ،
والوالد كان ياخذني على قد عقلي ، فيقولي
" خلاص تمي بمكان فريتي راسي ، الحين بدق عليه واقوله لايطالعج "

كنت اتخيل دريولنا مصاص الدماء ، لان البنات وصفولي ،
إن مصاص الدماء اسود ، وشعره منكوش ، وهالمواصفات
تنطبق عليه ، مع إن دريولنا مسالم ، ويخاف من ظله ، مو حق هالسوالفه .

كنا أطفال ، صعب إن الآخرين يقنعونا ، وخيالنا بعيد ، نتأثر بكل شي ، وينقص علينا بسهوله ، الحين أكيد عقلنا ، وصرنا ندرك هالأشياء ، ونضحك على أفكارنا .

أيام صعب إنه ترجع ، بس ممكن نتذكرها ، ومن جيل لجيل كل شي يتغير .

F.H

15-04-2008, 02:57 PM

أنا عن نفسي كنت اخاف من شعري ، وكنت دايم اصيح لي نزلت الخصل ،
كنت اتخيلها قرون الزهيوي ، واقول حق امي ، شيلو الزهيوي ،
واتم ادور في البيت مشان يطير ، والأهل يضحكون علي .

هههههههههههههههههههههههههههههههههههههههههههههههههه ههههههههههه

والله ضحكت من قلبي .. كل الإعتقادات بصوب وهل الإعتقاد بصوب ثاني ..

F.Aldosari

15-04-2008, 03:47 PM

...السلام عليكم والرحمة والبركة...

...قواك الله أخوي الحداد...

...الجانب السلبي بطفولتي...

اتذكر اني كنت اخاف ارقد على جنب الفراش الأيسر لأن كان مايجابل الطوووفة !

...نفس الشي... :9:

...أذكر اني وايد كنت أخاف من الليل والظلام...( لين الحين ماحب الليل)...كنت دايماً أقول: " الوحش بييني"...:9:

...كنت وايد أخاف من Big bird والفيل البني اللي في sesame street ونعمان اللي في افتح يا سمسم...(كنت أخاف من كل شي له عيون كبار :9: )...

...أذكر ستارة غرفتي كان فيها أشكال دوائر وحلقات كنت دايماً أصيح على بالي ضفادع تبي تآكلني ( قلت لكم أخاف من كل شي له عيون)...!

...أذكر الوالدة شرت لي مرة اللعبة فيربي وكنت مستانسة بس جا الليل خفت منها...خاصة انها تتبرمج وتمشي...فرحت أصيح عند أمي وردتها المحل...! ( ترا بعد لها عيون )

...أذكر كنت وايد أخاف من القطاوة لدرجة أتخيل أنهم قاعدين برا غرفتي فالليل ويطالعوني ( وترا صارت مرة ! )...

...الجانب الإيجابي...

..دائمة الخيال...

...كانت عندي لعبة مع أخوي أن ندخل الكبت أو نروح السطح ونتخيل أن أحنا في عالم سنبل ونفقز بالمظلة على قوس قزح ونآكل " بوظة"...وكنا دايماً انحن على الوالدة: " نبي بوظة" تعطينا اسكريم انقولها " نبي بوظة هاي اسكريم..." !!!! :9:

...كنت وايد أحب الـ Barbies ودايماً ألعب وأسوي قبايل وعشائر وفرجان ويتكلمون " لغة عربية فصحى" ...!!! :9:

...كانت عندنا عادة أو بالأحرى أكلة انسوييها أنا وأخوي كل ظهرية قبل صلاة العصر عبارة عن حليب كليم بودر+ سكر مخلوطين مع بعض...ليش مادري...بس أذكر أن كنا انسميها" سر الطاقة" ... :9:

...وكنت وأخوي كل عصرية إيجينا إمام المسجد البيت يحفظنا قرآن...الحمدلله حفظنا لين ماوصلنا عند سورة الفجر وبالضبط الآية (( كلا إذا دكت الأرض دكاً دكا* وجاء ربك والملك صفاً صفا ))...كنا انموت من الضحك...!!! استغفر الله مادري ليش...هل بسبب طريقة الإمام ...مادري...بس من يومها ووقف الإمام معانا عند هذي الآية...ماقدر يكمل ويانا وأحنا من نقراها انموت من الضحك...!!!

...كنت دايماً أقول متى أكبر عشان أسهر ( لو اطلعتم على الغيب لأخترتم الواقع )...

...تحيــــــــــــــــــــــــــــــــاتي...

Mohammed Al-haddad

15-04-2008, 08:08 PM

بو اختي F.Aldosari تخافين من الليل صراحة انتي مشكلة تذكريني بواحد اسمه محمد الحداد ( انا ) نفس الشي يكره الليل وايد يوم كان صغير ولين الحين احس في تأثير شوي لين الحين ما احب الليل بس المفروض يا اختي ما تستحين من هذي الشي كلنا يوم كنا صغار ماكن فاهمين اشياء وايد وكل ما نكبر نفهم اشياء اكثر ما كنا نعرفها

Abrar Al-Janahei

15-04-2008, 11:11 PM

على طاري الليل ..

كنت اذا انام وانا زعلانه .. اخلي الغرفه ظلاااام ..

واقعد افكر ان لما تصير الساعه 3 .. بيب شرشف وبحط فيه ثيابي وأكل وبربط الشرشف في عصا وبشيله وبهاجر عشان لما يقوم ابوي لصلاة الفجر ما يحصلني

على طاري صلاة الفجر

كنت من عمر 7 ابوس يقومني لصلاة الفجر .. فهوه اول ما كان يقعد على السرير افز من النوم واركض على الحمام .. وانا ارقض اقول .. الغزال بياكلني ..
كل يوم .. كل يوم .. لين مره ابوي قالي اي غزال .. طل ان لما ابوي يقعد على السرير يصير ظله ورى على شكل غزال كبيير كنت اخاف منه :)

كنت استانس لما تنطفي الكهربا .. كنا نلعب خشيشه في الظلام ^_^ شلون مادري .. خشيشه وفي الظلام .. كانت تصير دعمات وناس تتعور بس كان حلو

R. Al-Harami

15-04-2008, 11:47 PM

يعطيكم العافية .. رجعتونا 15 سنة ورا :D ( لاحد يحسب :D )

اذكر يوم شفت فيه توم اند جيري ومتأثرة وايد بالحلقة اللي شفتها .. الحلقة اللي كان فيها ساحرة وتركب مخمه وتطير

عاد انا ما كنت ساحرة .. بس قلت بجرب ..رحت ادور مخمة (جديدة) واروح المخزن واحصل المخمة ام عصا .. واركب عليها واطرقع اصابعي مثل ما سوت الساحرة :D واقول يالله الحين بطير .. لاحول ماطرت :39: واجرب مرة ثانية واطق المخمه برجلي وهم ما صار شي !! ياااه اشلون :39:

ومرة ثانية توم اند جيري ..

مرة كنت مع امي في محل الالعاب .. واسويلها مهرجان في نص المحل واحن وارن على راسها ليش؟ ابي فار :D وامي ما تحب هالاشيا من زمان .. الفيران والثعابين البلاستيك والحشرات وهالسوالف ..
واخيراً وعقب ما صدعت راس امي جابتلي الفار ..

وكان عندنا قطوه عووووده بليه ولونها اسود ما تتحرك من مكانها من متنها .. واقرب شوي صوبها واشغل الفار ويتحرك الفار صوبها ..

جان القطوة تشرد :vip7007112:

وكل يوم وانا على هالحالة .. لين ما القطوة ضعفت من كثر ما تشرد مني

Mohammed Al-haddad

16-04-2008, 04:17 PM

اختي ابرار واختي R. Al-Harami صراحة انتوا وايد وايد متأثرين بالكرتونات احس انا احنا كنا متأثرين بالكرتونات وايد وايد

اوه ذكرياتينا يوم كنا صغار وايد وايد حلوه بس المشكل ان احنا نفقد وايد وايد منها منها اجزاء تضحك و اجزاء تحزن مثلاُ حرقاتنا يوم كنا صغار اوه شكثر مثل غواصة = كنت اسميها جوافة و المشكلة لين الحين اهلي حافظينها والمشكلة الأكبر وحدة من رفيجات الوالدة متحلفة في يوم عرسي ألا تقول حق مرتي هذي الشي ( لازم تفضحونا يعني)

Abrar Al-Janahei

16-04-2008, 04:37 PM

غواصة = كنت اسميها جوافة

ههههههههههه

انا بعد كنت اقول للتنكر
( اللي يصب الماي في الدرامات )
زعتر

N . A . AL-KORBI

16-04-2008, 09:28 PM

N . A . AL-KORBI

16-04-2008, 09:38 PM

ابرار على طاري الشرشف ، و لمت الهدوم .

هالحركة وااااااااااااااااايد كنت انا واختي نسويها ، بذات إذا الأهل زعلونا ، نلم أغراضنا

ونروح نندعس داخل تواير السيارة ، ونتم فتره طويله ، مره ، سوينا هالحركه ،

والتواير الوالد يحطهم بغرفة الدريول ، فيومها الدريول كان مسافر ، رحنا وإندعسنا هناك

الأهل قوموا الدنيا وقعدوها ، ماخلوا مكان إلا وفتشوا فيه ، لا والغبيه الخدامه ، تدخل غرفة الدريول

وماحست علينا ، كنا نمسك نفسنا لي دشت ، تمينا على هالحاله ، اتصلوا بالشرطه ، وامي تمت تبجي

والوالد حالته حاله ، عقب طلعنا ، شقد استانسوا الأهل ، في التمثيل مافي أحد أحسن منا

والحمد لله دروس المسرح فادتنا وااااااااااااايد .

Essa Al-Mansouri

16-04-2008, 09:44 PM

كنت اتابع فولترووون فترة الظهر وكم مرة كنت ارقد بالغلط وانا اشوف واقوم اصيح اقول ليش سووا كذا وماخبروني وخل يعيدونه وابيهم يعلموني شلون تتطير الاسوود ! وكنت أسال ابوي وين هاي بأي بلد ابي ارووحلهم !! ( وايد مـتأثر )

تذكرني بالسؤال الأزلي: جونقر الحلقة الأخيرة

من قال أن جونقر مات؟ :1639_11196799410: ها من قال؟ :mad:

أحترم كل الكلام الفاضي اللي ينقال وانه ضحى بحياته وأنقذ ناس. لكن بريك. جونقر مات؟؟؟
غش. مايصير. هذا انسان طيب (معنه ترى مب انسان) مايصير يموت.
لاء. جونقر ما يموت. :err:

وتعال صلح

لازم يدخل ولد نشمي بينا ويقول: من كان يعبد جونقراً فإن جونقراً قد ........
(أقول اشرد لا يطبون في بطنك مثل ما طبوا في بطن الفراعنة :D )

(( كلا إذا دكت الأرض دكاً دكا* وجاء ربك والملائكة صفاً صفا ))
بل
قبل لا أكمل قراية السالفة تخرعت من الآية

F.H

16-04-2008, 10:19 PM

لازم يدخل ولد نشمي بينا ويقول: من كان يعبد جونقراً فإن جونقراً قد ........

استغفر الله خليتني أضحك :) ...

أذكر من رسوم الكارتون إلي تأثرت فيهم ... (( السنافر )) الكارتون المفضل ... كنت أعيش الجو أبني بيوت بالرمل

بيت حق بابا سنفور ،، وسنفوره ،،.......... إلخ من الشخصيات ..

والله أيام حلوه وبريئة مافي مثلها ..

Omar Al Hazaa

16-04-2008, 11:01 PM

^
^
افكاركم عجيبه هههههه

مره شفت طرزان فالتلفزون (وجاتني فكره انتحاريه) وقلت بقلده ورحت ادور حبل وماحصل غير حبل الغسيل

مسكت الحبل ورحت الطابق الثاني وربطته فالدريشه وجيت ابي امسك الحبل وانزل

هديت طرف الدريشه وطبيت مره وحده وماجاتني فرصه اني امسك الحبل ..

انكسرت ريلي وذقت طعم العذاب.. وتميت شهرين ماقدر امشي..

وابوي مسكين راح حط حدايد على درايش البيت كلها ههههه

E.E.A

16-04-2008, 11:15 PM

يعطيكم العافية على هالموضوع الحلو

بصراحه انا كانت لي ذكريات وايد حلوه بس ما اتذكر منها الا القليل ،، واكثر شي اتذكره الذكريات التعيسه

كنت اخاااااااااااااااف من شي او انسان اسمه صدام :43:

والسبب : حرب اخليج سنه 90 كان عمري في حدود ال5 سنوات<< لا تحسبون:58:

كلما نسوي شي غلط يخوفونا بصدام ،، صدام بييكم ،، صدام بياكلكم على هالحال :13:

حتى لما اعدموه قلبي عورني وايد وكنت جدا حزينه :1639_11196799410:

وكنت اخاف من اي شي قديم وخصوصا البيبان،، يعني اذا انفتح باب وله صوت يخوف ،، خلاص انا هني حالتي حاله انواع الصياااااح

وفي شي كنت اموت فيه واحبه " السيكل" ،، كان عندي سيكل رقمه 16 لونه ازرق :D وكنت حاطه فيه شرايط ورديه حفاظا على البرستيج :8: ،، احب العب به بالفريج ونتسابق ،، ويبدأ الريس ومنو اللي بيفوز :D

ايام حلوه وذكريات احلى :)

Abrar Al-Janahei

17-04-2008, 01:10 AM

كنا انا والاهل في البحرين .. حزة الرقاد ( وبما ان البت طابق واحد ) كنا مربطين حبل من الطابق الثاني اللي عند السطح .. ومنثرين مخدات تحت في الطابق الاول .. وبالدور واحد ورا الثاني انط من فووق ..

وكان عندنا شي اسمه التزلج على الدري .. بالدواشك :)

كنا في غرفه خالي عنده سرير نطاطي وبالظبط فوق السرير البانكة معلق فيه مال البكس ..

نفت البانكه وانط انط .. ونتعلق فيه ونفتترررر :) .. لين يوم من الايام طاحت علينا البانكه :)

Omar Al Hazaa

17-04-2008, 01:35 AM

^
^
^
"
"
ههههه ماشاءالله ابتكارات عجيبه.. عيل مايحتاج تشترون العاب من السوق

Mohammed Al-haddad

17-04-2008, 04:55 PM

N . A . AL-KORBI

17-04-2008, 05:18 PM

وحده من الأشياء الي كنت افكر فيها يوم كنت صغير هو شكل القلب (قلب الأنسان) في مرة سألتني بنت خالتي الي الكبيرة قالت لي محمد شلون شكل القلب قلت له جذي !!!
http://up.iraqmaster.net/upload/91f29_1325.gif

يعني علينا اعتقادات و افكار اغرب من الغريبة وقد تصل إلى حد الجنون مرات !!!!

كل ولا افكارنا ، افكارنا شزينها تهبل ، خيال واسع ، بذات شكل القلب :vip7007112:

N . A . AL-KORBI

17-04-2008, 05:22 PM

ابرار خفي علينا ، انت بنت ولا صبي ، هاي حركات صبيان ، اعقلي .

مواقفج تموت من الضحك .

عاد انا خيالي شوي واسع ، قاعده اتخيل اشكالكم ، اشكالكم كيووووووووووووت

Sharifa Al-Nisf

18-04-2008, 12:17 AM

... الحمدلله أن أختي وبنات خالاتي يشاركوني نفس أفكاري يوم كنت صغيرة : ) ...

... و ياكثر شخصياتنا الخيالية أنا وأختي :$...

... من أشهر شخصياتنا على الإطلاق: سلطان بن سليط :D ...

... وهذا بتاني لحيته حمرا، وعايش فالإمارات :$ (بتاني اسمه سلطان :9: ) ...

...والمشكلة الكبيرة أن أنا وأختي متأكدين ان كنا نشوفه كل مرة نروح هناك،، لووول...
.
.
.

... وبعد كنت أكره أروح بيت وحدة من أهلنا،، لأن بيتها فيه زرع أول ماندخل البيت،، وكل مرة نروح في الليل...

... فكنت أنا وبنات خالاتي إذا دشينا الحوش نررركض لأن نخاف يطلع لنا أسد من الزرع :9: ...

.
.
.

"...وكنا دايماً انحن على الوالدة: " نبي بوظة" تعطينا اسكريم انقولها " نبي بوظة هاي اسكريم..." !!!!

... ذكرتيني بحنتنا على الشومن اللي ياكله كبامارو :$ ...

Abrar Al-Janahei

18-04-2008, 01:03 AM

كنت اذا اخاف انخش تحت السرير او الكرسي .. والمكان الأأمن .. في الكبت ورى الملابس .. او في سلة الغسيل

----

مره ضعت في مكة .. ايام كانوا الناس اللي من افريقيا أكثر كنت 5 سنيين

المهم ضايعه وادور في الحرم .. فقت الامل اني احصل أهلي .. صرت افكر شلون بعيش في مكة ..
شلون بستحمل ان يقطعون يدي ..
شلون يطروون .. لازم اخلي حد يعلمني شلون اطر

لين ما خطط شلون حياتي بتكون في مكة :)

اخرتها حصلت ابوي يدورني :) .. لما جفته صحت .. حسيت كأنه انقذني من اني اعيش في مكة

N S

18-04-2008, 05:34 AM

وحده من الأشياء الي كنت افكر فيها يوم كنت صغير هو شكل القلب (قلب الأنسان) في مرة سألتني بنت خالتي الي الكبيرة قالت لي محمد شلون شكل القلب قلت له جذي !!!
http://up.iraqmaster.net/upload/91f29_1325.gif

يعني علينا اعتقادات و افكار اغرب من الغريبة وقد تصل إلى حد الجنون مرات !!!!

نفس الحالة :D وكانت الصدمة في ايام الدراسة مادة العلوم :( المدرسة تشرح شكل القلب وانا موب مقتنعة:D
-------------------

موضوع ظريف :8888:

Mohammed Al-haddad

18-04-2008, 08:46 AM

مره ضعت في مكة .. ايام كانوا الناس اللي من افريقيا أكثر كنت 5 سنيين

المهم ضايعه وادور في الحرم .. فقت الامل اني احصل أهلي .. صرت افكر شلون بعيش في مكة ..
شلون بستحمل ان يقطعون يدي ..
شلون يطروون .. لازم اخلي حد يعلمني شلون اطر

لين ما خطط شلون حياتي بتكون في مكة :)

اخرتها حصلت ابوي يدورني :) .. لما جفته صحت .. حسيت كأنه انقذني من اني اعيش في مكة

هههههههههههههههههههههههه يسلام على التخطيط المستقبلي والرؤية البعيدة لج يا ابرار
ما شاء الله عليج :) :) :) :vip7007112: :vip7007112:

N . A . AL-KORBI

19-04-2008, 01:01 PM

السلام عليكم ورحمة الله وبركاته

خلونا نشوف اعتقادات N :281f94c89b:

مغامراتي

في مرحلة الابتدائية ، كان صف اول و ثالث في مبنى منعزل عن الإدارة أما بالنسبه

لرابع وسادس فكان في نفس مبنى الإدارة ، - شكل المديره تبي تفتك من الإزعاج-

كنت انا بالصف الثالث ، وكان صفي في هذا المبنى المنعزل في الطابق

العلوي -يدلعونا شوي- جلسنا في ذلك المنى لمدة اسبوعين ، وبعدها تم غلق المبنى ،

بدأ الكل يتسائل عن السبب :28: ، ومن هنا بدأت الرحلة , اصبحت جميع الطالبات تتسائل عن سبب غلق هذا المبنى ،

ما هو السبب؟ اخبرتنا مدرسة اللغة العربية عن السبب ، وانه سيتم تجديد المبنى لقدمه ، لكن هذه الإجابه ،

لم تكن كافيه :39: ، وبدأت الإشاعت تظهر من كل مكان ، فقد وصلنا خبر سبب غلق هذا المبنى من إحدى الطالبات

وكانت اكبر منا سنا ، اخبرتنا في إجتماع طارئ ، " ان هذا المبنى تم غلقه ، لانه يوجد شبح في ذلك المبنى

، وقد توفي عدد كبير من المدرسات " ، علامات التعجب بدأت تظهر على وجوهنا :surprised1: ، وكان هذا الجواب مقنع

– نتأثر وايد بافلام الكرتون - بدأنا نتساءل كيف يمكننا التخلص من ذلك الشبح :thinking: ، ويعم الأمن من جديد في هذه

المدرسة ، بدأ الجميع في تدبير الخطط ، وبدأنا نجهز ونعد جيشا للقضاء على ذلك الشبح :157cc809a4: ،

في صبيحة اليوم التالي ، كان الجميع مستعد ، وتم الاتفاق على الذهاب لذلك المبنى بعد جرس الفرصة ،

دخل الجميع الى الفصل ، ننتظر جرس الفرصة ، - متى تخلص الحصة الثالثة ؟ - الجميع ينتظر بفارغ الصبر ،

والآن حان الموعد ، جميع الطالبات اتجهنا إلى ذلك المبنى ، كان هناك لوح خشب وضع في بداية السلم المؤدي

إلى الدور الثاني ، بدأ الجميع بالتسلق ، اما انا فلا استطيع ، - بنيه مو صبي ، احب احافظ على برستيجي ، إلا الخوف ، الله وكيلكم –

الحمد لله تمت العملية بنجاح ، الآن نحن في ذلك المبنى ، صعدنا والخوف يملأ قلوبنا ،

- تسمعون نبضات قلبنا دفدف دفدف ، حشى طبول مو قلوب –

وصلنا الى الطابق العلوي ،طلبت منا الزعيمة ، الوضوء ، فتوضأنا ، - عاد انا منيه خفت وتميت اصيح فكرت ان هاي نهايتي – :16308_1189553128:

بدأ الخوف يملأ قلوبنا ، - بنات سادس داهيه ، ولا إحنا شلنا بهالسوالف ، حكم القوي على الضعيف –

فتحنا الباب ، وكان المكان مهجور ، والنوافذ مكسره ، والجدران بها ثقوب ، هنا الكل بدأ بالصراخ :cry1:

آآآآآآآآآآآآآآآآآآآآآآآآآآآآآآآآآه ، يـماااااااااااااااااااااااااااااه ، النجده ، - حمد لله والشكر ، دلع بنات –

بدأت الزعيمة بتهدأتنا ، وطلبت منا ان نردد عبارات غريبة ، لا اتذكرها ، كنا نطلب من ذلك الشبح

الخروج والمواجهة ، ونحن على الرغم من صغرنا ، إلا اننا قادرون .

كان الجو ممطر والأشجار تتمايل من شدة الرياح ، ونحن على معتقادتنا ، ظننا انه الشبح غادر ، وانه قد استسلم ، ولن يعود .

توته توته خلصت الحتوته

شرايكم فينا ، اكيد بارعات ، بس ما اكذب عليكم ، على الرغم من انجازنا ، إلا ان احنا خذينا ضربه محترمه من

المديره ، خصوصا بنات ثالث ، ام الزعيمه ، فيويل الي يعلم المديره عليها ،- قلت لكم حكم القوي على الضعيف - .

Mohammed Al-haddad

19-04-2008, 01:15 PM

هههههههههههههههههههههههههههههه

انتوا صراحة مشكلة كبيرة وايد وايد

ذكرتين بسالفتي يوم كنت في صف اول ابتدائي شنو كنت دلوع ( دلوع إلى اخر الحدود ) كنت كل حصة عربي كل حصة اول ما تدش المدرسة اصيح ليش ؟؟؟ كنت اقول لها اختي الصغيرة في البيت انزين ليش ؟؟ محد قاعد معاها وهو بالعكس امي كانت تقعد ويها على طول بس دلع و تميت جي طول السنة كنت اضيع نص الحصة بس على صياحي بس بعدين الحمد لله تعدلنا بسبب لعب كرة القدم بقواطي البيبسي و نشق الجوتي ( الله يعزكم ) وهواش الأكل في المقصف تحصل لك كم بكس يعدلون ويهك و المسامير الي من اللعب تدش في ريلك اشياء وايد ايد وايد ........................

N . A . AL-KORBI

19-04-2008, 01:18 PM

Jassim Al-Naama

19-04-2008, 01:24 PM

الله يعطيكم العافية :)

ونستونا بسوالفكم ^^

موضوع جدا حلو ويساعد اهدي فيه الأعصاب ^^

Mohammed Al-haddad

19-04-2008, 01:49 PM

N . A . AL-KORBI

20-04-2008, 11:55 PM

اتذكر بعد يوم كنت صغير كنت اعتبر الهنود كائنات مو بشرية ( اعتبرهم اقل منا ( استغفر الله ) ) ودايما لما عندي اي شي ابي اقطه ما اقطه في الزبالة ( الله يعزكم ) لا كنت انطر هندي اقطه عليه اوه ولا عاد اذا كان على سيكل يكون احلى و احلى اخليه ينقلب ههههههه ومرة وصلت فيني قمت يمعت حصى صغار في قوطي بيبسي وقعدت افلع الهنود من الباص مال النادي ههههههه بس كنت اخاف من البتان ما افع عليهم شي اخاف يلحقوني

اخوي Mohammed Al-haddad زين ما سويت فيهم ، انا نفسك ، طبعا الأهل اهم السبب ، كانوا

دايم يخوفونا من الهنود ، بالذات بالاعياد والكرنكعوه ، يقولون " ان الهنود ياخذون البنات

ويقطعون ايدينهم " .................................................. .الخ

فكنت لما اروح ويالوالد سوق السمج ، كان الوالد يصف بparking قريب من السوق ، ويخليني بالسيارة

فمره الوالد ماحصلني داخل السيارة ، وتم يدور علي ماخلا مكان مادور فيه ، والوالد مستغرب

شلون مدى هالحرايم ياخذني ؟

بعد شوي واحد من ربع الوالد طل بالسياره ، من تتوقعون شاف ؟

حصلني داخل ، منخشه تحت الكراسي ، ومقفله البيبان على نفسي

انا ما كنت اعرف إن الوالد قاعد يدور علي ، وحالته حاله . اعجبكم انا

الاحتياط واجب ، ومن بعده عرف الوالد إن بنته ماينخاف عليها .

Dana Al-Kuwari

21-04-2008, 08:36 AM

خالي العزيز لما كنت صغيره كان بعافيه شوي
كنت دايماً اقول انت حامل ؟ يبي يفتك مني ويوخرني عن ويهه ويقولي ايه

اجيه يوم الجمعه الثاني عالغدى اقوله خالي متى بتجيب بيبي العب وياه يقولي زين زين قريب ومايعطيني ويه

المهم هالانسان عقدته كل ماشوفه اقوله متى بتجيب بيبي ومتى بتجيب

مره وحده صرخ في ويهي وقالي خلااااااااااااص وصرخ في ويهي طيرني ههههههههههههه
وقتها حرمت وسكت بطبيعه الحال وانا اساله في مخي ..

الموقف الثاني كان:
كنت لما اشوف الكعبه المشرفه عالتلفزيون واسمع الكبار يقولون بيت الله وبيت الله
كان عبالي بان الله سبحانه داخل فالبيت واشوف هالشي يااااه كبير ومن يروح السعوديه؟؟ ويا حيه
طبعاً تفكير غلط جداً

مواقف عديده والله بس ماتحضرني
ياحليلي تذكرت شكلي وانا ياهل :9:

N.A

21-04-2008, 03:53 PM

اتذكر شي واحد بس
كنت احسب ان الجوتي اكرمكم الله مع الوقت يصغر D=

Mohammed Al-haddad

21-04-2008, 10:51 PM

اختي N . A . AL-KORBI شلكلك لين الحين حاقدة على الهنود سامحيهم خلاص

اختي دانة صراحة عقدتي خالك بس صراحة ما تستاهلين انه يصرخ عليج

كنت احسب ان الجوتي اكرمكم الله مع الوقت يصغر

>>>> يا الله صراحة حركات يا اختي يوم كنتي صغيرة

Dana Al-Kuwari

22-04-2008, 06:25 AM

ياحليلي بااااال تذكرت موقف ههههههههههههههههههه

ولد عمي لما كنت صغيره ياهل هو كان كبير في امم قولوا 25 سنه وشاب يعني
وانا توني فالاول ابتدائي بزر.. كان من يشوفني ويقولي مرتي مرتي تعااااالي اموواح ويشلني وانا استاااانس شعرفني

صرت اكشخ لما اروح بيت عمي امحق كشخه فانيله عليها بطات وغنم وحاله والريال كبير فالسن مب قدي هههه
واتمشى صوبه يعني يابالفيت عبرني قولي هلاااااا بالطش داناا
واذا جا البيت يسلم على ابوي بوووه اطير الغرفه رتبوا شعررري لبسوني هههههههههههههههههههههه

ااااح ياربي عيني ادمعت من الضحك

بعد من المواقف.
خالي عبدالعزيز كان فالداخليه ويجي يسلم على امي ساعات لابس دريس
انا من اشوفه داش البيت ويهي ينقلب ابيض من الخوف واصيييح انخش فالكبتات و ورى البيبان مايسوى علي كسرت نفسي
كله عبالي جاي بيشلني يوديني الحبس ههههههههههههههههههههههه

Abrar Al-Janahei

22-04-2008, 01:23 PM

واحنا صغار .. كنا ننام على مطبات الشوارع

حزت القيالة ..

والشمس تضرب .. يعني مع الشمس وظربتها اتيينا النومه ..

كنا اناام على المطابات بس على آخر المطبه

ومره قررنا انام في نص المطبه

وفعلا نمنا ..

واقوم على هوا حاااااااااااااااااااااااار

افتح عيني الا شاحنه بكربها فوق ي واقفه .. اقوم بنت جيرانا .. عاد ما انتبهت الا يظرب راسها في طرف صدام الشاحنه

وتصييييح .. وعلى هالحالة .. يجوفونا وبنت جيرانا تصيح والهندي مسكين ما يعرف شيسوي ..

وآخرتها كالعاده .. ننطق

ههههههههههههههههههههههههههههههههه

بس رقت المطاااببت شيي عجيييب

Omar Al Hazaa

23-04-2008, 05:12 AM

^
^
^
مارتحتوا وماجاكم النوم الا على المطبه فالشارع هههههههههه خوش مكان حق النوم..

Mohammed Al-haddad

24-04-2008, 12:07 AM

بل اختي ابرار تنامون على المطبات !!!!!

سمعت عن هذي الحركات وايد بس ما توقعت ان في ناس يسونها

Dana Al-Kuwari

24-04-2008, 04:51 AM

انا في حياتي كلها ماسمعت عن ناس تنام عالمطبات؟؟
من صجج والله

هههههههههههههههههههههههههههههههههههههههههه

ليش عاد شسالفه؟
انتظروا يا جماعه يمكن المطب كان في مميزات فل اوبشن شي
او مرتبط بذكريات معينه.

بس تنامون نوم عميق راحه؟ ولا بس تسدح يعين ؟
<<< شيسكتها الحين ههه

N . A . AL-KORBI

04-06-2008, 08:50 PM

السلام عليكم ورحمة الله وبركاته

نرجع للموضوع الأكثر من رائع مع معتقداتنا وافكارنا يوم كنا صغار

اليوم امي ذكرتني بشي كنت اسويه وانا صغيره ، شنو ؟

دشت المطبخ امي وشافتين اتغدى على الطاوله ، مو على الكرسي ، على الطاوله

هاي طبعي وما اقدر اغيره ، احب اتربع ، بس مو على الارض على شي مرتفع ، يعني فوق الطاوله

هالشي الحين ، بس يوم كنت صغيره كان العكس ، يعني شنو ؟

كانت حياتي تحت الطاوله وداخل الكبت ، تقول امي : " كنت ميننه مدرساتي ، وكله اقعد تحت

الطاوله ، وإذا المدرسه رفضت ، اتم زعلانه وما اشارك ، فكانوا بعض المدرسات يوافقون ،

كنت احس إني عايشه في بيت صغير ، واغراضي كلها حذاي والمطاره ، حطوا تحتها خط ، كنت

وايد اكل بالصف ، مره من المرات صار شي الكل كان خايف منه ،" التقليد الأعمى عند الأطفال "

كل البنات يبون نفسي ، وتموا يصيحون ، النتيجه " جميع الطالبات تحت الطاولات ، شحلاتهم "

لا ونلقب انفسنا بام فلان وام فلان ، صج ميانيين ، وكنا نشبه المطاره بسلة القهوه والجاي ،

نلعب بيت بيوت ، الله على ذيك الأيام .

وتستغرب امي مني ، " يعني مو قادره تقعدين على الكرسي "

Maryam al.sadah

06-10-2008, 03:25 AM

لووولز على سالفة اختي في البيت بروحهـا

ههههه والله اني كنت اسويها ..

واااايد واايد احب اختي الصغيره وعلى ايام ماكانت توها مولوده كان سوقها قايم خخخ
اقعد اصيح في المدرسه اقول حق المدرسه ابله ابي اروح اسوي حليب حق اختي الصغيره

fatma.j

06-10-2008, 01:37 PM

موضوع وايد حلو

يوم كنت صغيره اسمع ان كل شي تبينه بتحصلينه في الجنه

علشان جي كنت مستانسه لان بلاقي كل ابطال الرسوم المتحركه في الجنه والحلم بيصير حقيقه

عبط!!!

fatma.j

06-10-2008, 01:48 PM

وكان عندنا شي اسمه التزلج على الدري .. بالدواشك :)

)

الله هاذي خوش لعبه للحين العبها:D

N . A . AL-KORBI

06-10-2008, 02:45 PM

موضوع وايد حلو

يوم كنت صغيره اسمع ان كل شي تبينه بتحصلينه في الجنه

علشان جي كنت مستانسه لان بلاقي كل ابطال الرسوم المتحركه في الجنه والحلم بيصير حقيقه

عبط!!!

الطيبه فاطمه على طاري الجنه ..

مره اخترب سيكلي " لونه وردي " يهبل كنت واااايد أحبه ، فقلت لولد خالتي عن سيكلي ، قال " ولايهمج راح اوديه عند ريفيجي وراح يصلحه لج ، رفيجي شاطر بتصليح السياكل " يعجبج ;)

تميت انطر انطر انطر انطر ......................الخ :err:

سألت " وين السيكل يامعود " ، قال " فالجنه أحلى وأحلى " فمت من القهر وبجيت عليه :1639_11196799410:

ياشين الصبيان لي تفلسفوا " صج خرطي " :10:

شاطرين بفك السياير والسياكل مفكرين عمرهم مهندسين ، وبالإخير مايعرفون هالمسمار وين مكانه :D

Shaikha Al-Jaber

06-10-2008, 03:42 PM

موضوع جميل جدا أخي محمد

نتذكر فيه ذكريات الطفولة والتفكير البريئ

صراحة أنا يوم كنت صغيرة كان حلمي اني أعيش على السحب

وأيضا عندما كنت أشاهد الكرتون ((صديقنا سنبل ))

مره رحت أنا وأخوي فوق السطح ومسكنا المظله نفس سنبل وكنا نبي ننط لين تحت بس الخدامه شافتنه ومسكتنا ..

بعد ذلك اليوم أمي خلتنا نمارس هواية النط بالمظلة فوق الكبت ونط عالسرير

وبصراحة يوم كنت صغيرة كنت دايم أظن أن الأشخاص اللي في التيلفزيون يشوفونا

N . A . AL-KORBI

06-10-2008, 06:20 PM

الطيبه شيخه الله على أيام سنبل ، أنا وأختي كنت من نشوف "قوس قوزح" نتم نبجي نقول ل مي " يمه يالله نبي نروح عند قوس قوزح " :D ..

ونتم نبجي ليش ماتودينا أمي عشان نلعب مثل سنبل " صج كنا خبال " :58: ..

وهاي إهداء مني لشيخه الجابر ولكل محبي سنبل ..

http://www.youtube.com/watch?v=GFoOZ--PbNU

N . A . AL-KORBI

06-10-2008, 06:48 PM

شرايكم نرد الذاكره ورى من خلال رسوم أول

الفواكه

http://www.youtube.com/watch?v=622GOaH7Rn8

ماوكلي " أمووووووت فيه ، وكنت أحلم إني أعيش حياة ماوكلي "

http://www.youtube.com/watch?v=uT2mbrPHH1c

راويه " تذكرت يوم تهاوشت أنا وبنات عمتي على راويه ، كل وحده تقول أنا راويه ، وبالأخير عيال عمتي رشحوني :15: "

http://www.youtube.com/watch?v=_6MCaehYmOc

نساء صغيرات " الحمدلله هالكترون كانت كل وحده منا لها دور "

http://www.youtube.com/watch?v=_7yfRxsoeYw

بوليانا " شقد بجينا عليها ، كانت تكسر الخاطر "

http://www.youtube.com/watch?v=ZRRA5CHygi8

ليدي " ليدي كانت كل شي بالنسبه لي أموووووت في فساتينها ، والوالده ماقصرت "

http://www.youtube.com/watch?v=AJPe4xjczU8

شنو أحسن كرتون قبل أو الحين ؟ ، على أيامنا كانت هالرسومات تقدم رساله الكل يستفيد منها ..

الله على أيامنا صج أيام حلوه ..