مشكلتي ومشكلة شباب وايد نفسي

[Omar Al Hazaa]

السلام عليكم ورحمة الله وبركاته.. انا خلصت الثنويه السنه الي طافت ورحت المجلس الاعلى عشان اخذ بعثه: قالوا بندخلك الجسر الاكاديمي وبنهيئك وهذا مستقبل وتفوق لازم تدرس برا ..اوكي .. لاكن! قالوا لازم تجيب 450 فالتوفل والحين ارفعوها وصارت 470 !!! (انا طالب توني طالع من الثنويه وجبت لهم النسبه الي يبونها(85%) ليش يحطون شروط حق دراسة الانقليزي؟؟؟!!) قلت اوكي هاي قوانين جديده مع التطور!! لازم نحترمها ورحت خذت دورتين فالانقليزي على حسابي وماجبت النتيجه !! وضاعت على نص سنه(كورس) انزين والحين شسوي!! يعني بنوا الجامعات فالمدينه التعليميه عشان نتفرج عليها؟ انا بروح اكلم المديره فالمجلس الاعلى للتعليم والله يستر من ردها.. وقلت يمكن ابيع سيارتي واروح ادرس في بريطانيا لغه ..اسمحولي اذا طولت.. حاولت اختصر قد ماقدر.. بس بغيتكم تفيدوني بحل ..وقبل كم سنه ماكان في جسر اكاديمي..كان الطالب يخلص الثنويه وياخذ سنه كامله لفه برا وبعدين يدرس فالجامعه الي اختارها (وهالطريقه احسن من الجسر لأن الطالب لو ياخذ اللغه برا 1- بيقدر يتكلم مع الناس 2- بيسمع منهم ) لاكن الدراسه فالجسر اشوفها مثل الثنويه (كنا ندرس الانقليزي ونخزنه ويطير بعد الامتحان!) لأن ماكان في((( تطبيق))).. مابي اطول عليكم اكثر..لاكن هالكلام مابخليه في قلبي بقوله حق مديرة المجلس الاعلى وبقول لكم بعدين شنو ردت علي..

[J.H.Al-Qahtani]

اخوي....اول شي قواك الله

الله يعينك......

وماشاء الله نسبتك طيبة وادخلك اي جامعة ...يعني لا تنحبط...علشان اللغة...

إذا تبي ادش الجسر...وطبعا بشروط التوفل...تقدر تاخذ دورة بال ELS عندهم دورة تاسيسي توفل ب 2000 ودورة توفل....2500 ريال...

وماشاء الله الُELS قوي....ويدرسون بذمة.....جرب عنده قبل ماتروح لبريطانيا ....

وترا الهدف من رفع التوفل بالجسر انه من قبل كانوا يجوون ناااس يحتاجون مو بس سنه إلا سنتين وزيادة ....يعني لو تميت سنه او سنتين لغة هاي شي مافيه اشكاليه....اهم شي انك تجد فيها لين تجيب المتطلبات :) وطبعا هالمشكلة راح تتقلص في السنوات الجاية لانه المدارس صاروا يكثفون اللغة الأنجليزيه وعندهم ارشاد اكاديمي طبعا انا اتكلم عن المستقلة ....

[Omar Al Hazaa]

تسلم يالقحطاني أو تسلمين ..والله يقويك .. كلامك حلو ..انا درست في معهدels والدراسه عندهم حلوه لاكن مثل ماقلت انا ابي ادرس برا عشان اطبق اللغه وبحاول اسكن مع عائله وابي اتكلم مع الناس.. انا خذت دورتين في els وفي نيوهورايزن وماتحسنت عندي اللغه وايد.. وبالنسبه حق الجسر الحمدلله انا اصلا مابي ادرس عندهم ومب من حقهم يحطون شروط عشان يدرسون الطلاب اللغه.. وهذي اصلا مسؤولية المجلس الاعلى للتعليم ! انا طالب خلصت الثنويه وجبت النسبه وهذا مستواي في الانقليزي ..مب يحكرون حق الطالب ويقولون جيب 470 فالتوفل..مابقى شي على ال500 وهذي النتيجه الي تبيها اغلب الجامعات! ..والله ترى هالغلطه كبيره من المجلس الاعلى للتعليم ولازم يشوفون لها حل بسرعه

[Abrar Al-Janahei]

السلام عليكم اخوي عمر ..

ليش ما تدخل جامعة قطر ؟

انا اعرف ان سمعتها في المحيط الخارجي وايد سيئة .. لكنها وايــــــــد حلوه من داخل .. وما عندهم هالشروط

تقدر تدخلها حتى لو التوفل عندك 1

وشوي شوي تتحسن وتييب 450 .. وتبدأتخصص بإذن الله

ترى الجامعة طيبة وحلوة .. لا تمسع من اللي يقول كلام غلط عنها

جرب تقدم على جامعة قطر الكورس الجاي .. وما شاءا الله نسبتك وايد حلوه ادخلك هندسة بعد

واذا تبي تتعلم انقليزي كلاميا .. فلمدرسين في جامعتنا ما يتكلمون غير انقليزي مع الطلبة .. حتى الطبة بينهم وبين بعض احيانا يتكلمون انقليزي

اذا ما فهمت شي لازم تقوله بالانقليزي وتسأل وتجاوب وتحل وتتكلم كله بالانقليزي

فكر واسأل وصلي استخاره وان شاء الله خير :)

[Jaber Al-Musallam]

السلام عليكم اخوي عمر
ترى هونها انشالله وشد حيلك, انا قاعد اطالع ردودك واشوفك ناوي تدرس لغه برى.
بس حبيت اقولك لانه اذا انت رايح على حسابك ترى نفس الشي هني وهناك
ترى مشالله العرب , واهل قطر و اهل الخليج في كل مدينه , بتتعرف عليهم , وبتقعد وياهم وبتتكلم عربي , انا ماقول هذا الكلام من عندي بس هذا شي صاير قدامي يمكن 10 مرات
الشباب الي يدرسون لغه عاده مايمارسونها هناك , يمكن شوي .

انا ماقول انك بتسوي مثل الناس الي مرو علي بس يعني حبيت انبهك عشان تحط النقطه في بالك, انك رايح تمارس لغه. و اذا انت عزيمتك قويه ترى مابتفرق وايد اذا انت في الدوحه او امريكا وبريطانيا.

يعني في شباب يقولون لي اذا درسنا لغه برى غير , اذا سألت ليش يقولون لي لانه في انجليز نمارس اللغه معاهم..... عمر ترى مكثر الانجليز في الدوحه يعني فرقت رافجتلك واحد في قطر ول في بريطانيا لهذا الحد؟ , وترى الانجليز الي في اعمارنا ماعندهم شغل خلنا نكرفهم شوي بس ماخذين مساحه في البلاد :linguino:

ماودي اكسر مجاديفك بس هذا الاشياء اتناقش فيها مع الشباب,
والله يوفقك انشالله.

*اضافه: ترى سالفت التوفل الي حاطينها مب عشان يمنعون خلق الله انهم يدخلون الجامعات او ياخذون بعثه
بس مثل ما انت تدري انه الجامعات تدرس بالانجليزي , و اذا ماعندك لغه مابتفهم الدكتور شيقول
ولا بتستفيد من وقتك بالجامعه........ في شباب مشالله يجيبون في ال 600 توفل ويعانون مايفهمون حزات.
سالفت التوفل لمصلحت الطالب مب عشان يعطلونه.

[F.R]

وعليكم السلام ورحمه الله وبركاته
***********************
الله يعينك ..ويسهل عليك..^^

اللي فهمته منك انك مقرر تدرس برا..وع شان جذيه ..بتبيع سيارتك !!!!!

تبي نصيحتي اول شي اتسويه..

اتقدم اوراقك ع المؤسسات (البترول,الغاز,حمد الطبيه,الحديد والصلب,البنوك والخ)..

وماظن يرفضونك ..نسبتك قويه والحمدلله..وتقدر تطلب منهم بعثه للخارج ع حسابهم..!!

قدم وبشرنا ^^

[Essa Al-Mansouri]

لاكن! قالوا لازم تجيب 450 فالتوفل والحين ارفعوها وصارت 470 !!! (انا طالب توني طالع من الثنويه وجبت لهم النسبه الي يبونها(85%) ليش يحطون شروط حق دراسة الانقليزي؟؟؟!!)

بصراحة سؤال كبير
والنسبة اللي طالبينها تحمل في طياتها سيلاً من الاستعباط

أعرف ناس في سنتنا في الجسر تخرجوا من الجسر ولا قربوا من ال470 هذي (وهذاهم يدرسون في بريطانيا ولا عليهم خوف :) )

التعليم قوي في الجسر ما قلنا شي. لكن أكثر من يستحق هذا التعليم هو الطالب ذو اللغة المتوسطة والمنخفضة.

الطالب إذا قرب من ال470 بيقدر يجيب حتى ال500 وبيقدر يروح على هالدرجة ويدخل الجامعة مباشرة ولا بيحتاج منة حد.

يعني بيقولون ان هدف الجسر هو تاهيل الطالب للجامعة أكثر من تقوية لغته؟ ترى الهدف الثاني أهم من الأول ولا يتحقق الهدف الأول إلا بتحقيق الهدف الثاني.

الموضوع يحتاج إلى حل بطريقة أو بأخرى.

(وهالطريقه احسن من الجسر لأن الطالب لو ياخذ اللغه برا 1- بيقدر يتكلم مع الناس 2- بيسمع منهم ) لاكن الدراسه فالجسر اشوفها مثل الثنويه (كنا ندرس الانقليزي ونخزنه ويطير بعد الامتحان!) لأن ماكان في((( تطبيق)))..

ما الومك على عاطفتك الهائجة, لكن وجهة نظرك (كما هي لدى الأغلبية ممن لم يجربوا الخيارين) تفتقر إلى التجربة الواقعية في خلاصاتها

ردك يحمل في طياته نقطتين

الأولى ان الدراسة في بريطانيا أفضل:
وهالنقطة رد عليك بخصوصها اخونا من بريطانيا جبر المسلم من واقع تفاعله مع الطلاب اللي يدرسون لغة برع سواء على حسابهم أو لا.

وانا بالمثل حبيت أأكد على التجارب اللي حصلت أمامه واللي صارت امامي بنفس الطريقة (الشباب يرجعون من بريطانيا مثل ما راحوا حتى لو قلنا انهم احتكوا مع الانجليز وحتى الشباب اللي ساكنين مع عوايل)

وثاني نقطة ذكرتها أن الجسر مثل الثانوية:

وبغيت أضيف نقطه مهمة تخفى عن الكثيرين. الطالب بعد ما يخلص الثانوية يحتاج قبل دخوله للجامعة إلى لغة أكاديمية Academic وهي لغة تتسم بالرسمية والقدرة على التعامل مع الكم الهائل من المعلومات. السكن مع عايلة برع أو مجرد السفر للخارج من أجل الاحتكاك مع الانجليز قد يطور اللغة لمن لا يملكها مطلقاً لكنه لا يساهم في تنمية اللغة الأكاديمية. لا ننسى بأن هالانجليز تعاملهم يكون بلغة عامية وبالأخذ والعطى في الكلام لا أكثر: أكثر اللي بيستفيده الطالب Street Language وهذي ما تقرب في الجودة والمهارة المطلوبة من اللغة الأكاديمية. فوق هذا نجد بأن عدد من الانجليز اللي يدرسون معنا في الجامعة لا يجيدون هذه اللغة الأكاديمية ونجد لديهم كم هائل من الأخطاء اللغوية على الرغم من كونهم "انجليز". مثل البلاغة والفصاحة في العربية عندنا فهي ليست بالسهلة مب شرط ان العرب يتقنونها.

في الجانب المقابل نجد بأن مهمة الجسر الأكاديمي هي تأهيل الطالب بلغة أكاديمية سليمة تشد أزره في مراحل الجامعة المتطورة. في الجسر ما يدرسون الطلاب شلون يحسبون من 1 إلى 10. هناك يدرسونهم شلون يكتبون Research بكل ما تحمله الكلمة من معاني:okkiale: وبعد ما يدرسونا اياه يبقى الجهد على الطالب في لهمه أو أستصعابه. ترى مب كل معاهد اللغة في بريطانيا تعلم لغة أكاديمية. الأغلبية العظمى من المعاهد تعلم لغة عامة للتعامل اليومي وتكاد تكون اللغة الأكاديمية الممتازة محصورة على السنة التأسيسية التي تسبق دخول الجامعة. ولهذا السبب ينبغي على الطالب التركيز على الفرق بين الأثنين.

كان لي لقاء مع أحد الأشخاص اللي حصل لهم الشرف وقضوا عدة أشهر في معهد في بريطانيا من اللي تدرس اللغة الأكاديمية (كما يزعمون على الأقل). طبعاً بعد ما فرغت من شكاوي الغربة اللي يشعر بها سالته: في هذا الوقت من السنة ما الذي تستطيع ان تقرأه أو تكتبه؟ استنتجت بأنا في الجسر كنا نكتب ونقرأ أضعاف ما يقرأ ويكتب في نفس الوقت من السنة. فسألته (باحثاً عن سبب هذا الفرق) كم ساعة تداوم في الأسبوع؟ أجابني بأنها بحدود ال15 ساعة وفي بعض أيام الأسبوع لا تزيد مدة الدوام عن الساعتين. تذكرت وقتها بأنا كنا ندرس في الجسر أكثر من 30 ساعة في الأسبوع وفي اليوم الطبيعي يكون دوامنا 6 ساعات :)

مفاد هذا الكلام هو صعوبة ايجاد مقدار الكثافة الدراسية المطلوبة في معاهد اللغة في بريطانيا فساعات الدراسة قد لا تكون بالكثافة المرجوة خاصة إذا قورنت بالساعات المدرسة في الجسر الاكاديمي.

مابي اطول عليكم اكثر..لاكن هالكلام مابخليه في قلبي بقوله حق مديرة المجلس الاعلى وبقول لكم بعدين شنو ردت علي..

تقصد مدير أو رئيس؟
عموما السموحة عالقصور وفي انتظار آخر أخبارك :)

ليش ما تدخل جامعة قطر ؟

عاشت الدعايات ^^

[Omar Al Hazaa]

عليكم السلام ورحمة الله وبركاته اختي ابرار .. انا سئلت عن جامعة قطر ودخلت منتدياتها وقريت مشاكل الطلاب .. واغلبهم ينجحون في امتحان التوفل بالحظ.. طبعا بعد مايضيعون سنتين في التأسيسي.. ويشتكون على الدكاتره يقولون اغبلهم من شرق اسيا والهند ..لاكن زين انتي تمدحينها..انا اهم شي ابي اتعلم اللغه عدل ..في طلاب يضيعون سنتين في جامعة قطر فالتأسيسي ومايستفيدون وايد ..وفي طلاب يقعدون سنه برا ويتعلمون اللغه عدل.. والحمدلله صليت الاستخاره مرتين وقدمت اوراقي حق الكورس الجاي احتياط.. ومشكوره على نصيحتج والله يوفقج وبفكر فالكلام الي قلتيه انشاءالله

[Omar Al Hazaa]

وعليكم السلام ورحمة الله وبركاته اخوي جابر .. مشكور على نصيحتك وكلامك صح..وبعد في ناس يروحون قروبات من قطر(يعني جاهز ورايح مع ربعه) ويسكنون مع بعض ويسولفون مع بعض وهذولا مايستفيدون الا شوي .. انا انشاءالله مابكون نفسهم ناوي اسكن مع عائله وناوي اطبق الكلام الي ادرسه معاهم وانشاءالله مب رايح مدينة لندن الي العرب اكثر شي فيها ..وانا خذت دورتين فالدوحه وماعندي مشاكل والله اقوم من الصبح احفض الكلمااات لاكن ابي اتكلم وابي اسمع من الناس مب بس من اساتذة المعهد ولا الجامعه .. وحلوه هذي نكرف الانقليز في قطر ههههه اذا انت رافجت واحد قول لي برافجه معاك هههه .. بس بعد بفكر في كلامك والله يعين .. وبالنسبه حق سالفت التوفل انا معاك الطالب لازم ياخذ لغه ويتعلمها صح .. لاكن بعد مايحطون شروط .. هذا مب عذر اذا الجامعه تبي 600 انا لازم اجيب 470 عشان اتعلم اللغه!! وماشوف فيها مصلحه! المجلس الاعلى للتعليم لازم يعلم الطالب اللغه مهما كان مستواه ومابي اعيد كلامي الي فوق

[Omar Al Hazaa]

اخوي أو اختي f.r مشكور(ه) على نصيحتك .. انا قدمت على البترول وكان اول مكان اقدم عليه .. عطوني امتحان قبول وقالوا مانجحت فيه!! وانا نسبتي 85% وقلت في قلبي اذا هذي شروطهم زين يوم انهم ماقبلوني! وقدمت على قطر غاز ماردوا علي خبر وقدمت بعد في هيئة التطوير العمراني..وبسئل عن شركة الحديد والصلب ..والبنوك استبعدتها لأنها اغلبها فيها ربا (قدمت اليوم على شركة الحديد والصلب وطلع عندهم بعثات واذا اقبلوني بيكون في ميزان حسناتج انشاءالله)

[Omar Al Hazaa]

اخوي عيسى مشكور على نصايحك .. 1- صح كلامك الهدف الثاني اهم من الاول .. واللغه اصلا اهيه الأساس 2- انا تكلمت بدون عاطفه هههه انت يمكن عصبت لأنك فالجسر ومن حقك ..وتجربتي ترا واقعيه.. وشوف بالنسبه حق الدراسه برا ترى هذا الخيار الوحيد الي تم لي يعني مابيدي شي .. درست في قطر ومافادني وبروح ادرس برا وبتركيز وراح ابتعد عن العرب (نصايحكم هذي بسجلها ومابنساها) وبخصوص الشباب الي اسكنوا مع عوايل وماستفادوا ممكن اتقول لي الاسباب ؟ يعني الواحد يدرس لغه وعنده ناس يتكلم معاهم مايستفيد ليش؟ الدراسه مب مكثفه؟ اذا على الدراسه المكثفه راح اتكون مكثفه يعني 6 ساعات فاليوم من 3 لين 9 ..ترا دراسة اللغه انت تختارها على كيفك في دراسه عاديه 3 ساعات فاليوم وفي مكثفه ..وبالنسبه حق اللغه الاكاديميه انا اول مره اسمع عنها وبسئل عنها .. انا يوم رحت المعهد البريطاني بخصوص البعثات اسئلوني كم سؤال ومن ضمن الاسئله قالوا تبي دراسه مكثفه ولا عاديه.. يعني في دراسه مكثفه عندهم مب بس فالجسر (اذا في سبب ثاني قوله لأني ابي اتجنب كل الأخطاء الي غيري وقعوا فيها) .. اخوي عيسى بالعقل انت لما تحفض اللغه فالجسر الاكاديمي وتقعد سنه كامله تحفظ الكلمات والقواعد وتروح الجامعه تحسب انك بتتذكر بسهوله.. انا سمعت عن وحده درست فالجسر وسافرت برا معصبه وتقول في كلمات وايد مافهمتها ..وانت اذا درست فالجامعه بتلاحض هالشي لأن مافي فايده حفض وحفض بدون( تطبيق) ..ومافي فرق بين المدير والرئيس وانا اصلا مادري

[Abrar Al-Janahei]

اخوي عمر

نصيحة أخوية .. لاتقرى الردود اللي في منتدى جامعة قطر

الناس فيها وايد سلبيين ... الجامعة فيه فيها وايــــــــــــــــــــــــــد حسنات اهمه بس يذذكرون السلبيت واهيه شوي والله

مثال على اللي اقوله كأنه مثل ما الله حرم الخمر وكل العصاير اللي في الدنيا حلال .. عصير برتقال منقى قصب سكر .. بس الناس يركزن على الخمر

اللي يقعدون في التأسيسي سنتيين اغلبهم ما يداووومون او يلعبون في الحصص

لا تاخذ بلام الناس .. الله يسهل عليك ان شاء الله

تفائل بالخير اتحصله بإذن الله

:) الله يفتح عليك

[R.A.A]

السلام عليكم ورحمه الله وبركاته

والله الجسر الاكاديمي ممتاز لكن حرام عليهم وياعله في ذمتهم وحسبي الله عليهم ألف مره هالي مايفكرون ولا يخافون الله ويحسبون كل الناس مولودين و الانجليزي بلبل عندهم ولا صار لهم 12 سنه يدرسون في المعهد البريطاني ويقدرون يجيبون 470 بالتوفل عشان عقبها يدرسون لغه لمدة سنه.

صراحة إلي بيجيب 470 بالتوفل....يتوكل على الله ويدخل جامعه أحسن له . وجامعات كثيره تقبل هالنسبه. مب جامعات العباقره إلي جايبينها بس جامعات والنعم فيها بعد.

المهم أخوي....نصيحتي لك حاول تدخل دورات لغه انجليزيه مكثفه في معهد الجامعه الهولنديه لان يمدحونه.
- عيش نفسك في جو لغة انجليزيه. أسمع اغاني انجليزيه...شوف افلام واجد وركز في كلامهم.
- حاول تقراء مقالات وشغلات انجليزيه حتى لو من النت.
- وحاول تصادق ناس يتكلمون انجليزي عدل...خريجين مدارس اجنبيه ولا خريجين برا. وتكلم معاهم انجليزي.
-كلش كلش روح اي محل احين ماشاءالله الفللبن في كل مكان ويتكملون انجليزي حصل لك فلبيني واجلس سولف معاه.

وثاني شغله:
طريق النجاح عمره مايكون مفروش بالورود. والوصول للقمة شي صعب ويتطلب مجهود كبير. ولازم تواجه هالعقبات بتفاؤول وقوة. وماشاءالله انت همتك عاليه. ياليتك تدخل جامعه قطر وتكثف اللغه الانجليزيه عشان تجيب التوفل المطلوب. وبعدها يا انك تدخل الجسر الاكاديمي ولا تحصل لك قبول باي جامعه امريكيه بتوفلك وتتجنب الجسر.

وفي الجامعه الأمريكيه....أمش على خطه التخصص ..يعني خص 1st year english لان بيعلمونك فيه شلون تكتب بيبير وشلون تطور لغتك. يعني لاتحاول تجازف و تاخذ كلاسات سنه ثالثه وانت في سنه اولى.

والأفضل طبعا تدخل الجسر لان فعلا بيطور لغتك وبيعلمك شلون تكون طالب متميز. وعقب ادخل جامعه امريكيه و تاخذ صيفي وتضغط على نفسك وبيكونون بالجسر دربوك على كل هذا تقدر تخلص في 3 سنوات لو جديت واجتهدت + تنقل ساعات جامعه قطر وهذا بيختصر لك وقت.


الله يوفقك اخوي ويسهل عليك أمورك.

[Essa Al-Mansouri]

مبين عليك انك من الناس اللي يحبون يجربون بنفسهم علشان يقتنعون. جيد أنك واثق بقدراتك.

وبخصوص الشباب الي اسكنوا مع عوايل وماستفادوا ممكن اتقول لي الاسباب ؟ يعني الواحد يدرس لغه وعنده ناس يتكلم معاهم مايستفيد ليش؟

السبب مثل ما قلت سابقاً ان اللغة اللي تطلبها الجامعة هي اللغة الأكاديمية.
أنا فاهم اللي تبي تقوله عن التطبيق العملي للغة وأنه هو اللي بيطور اللغة. لكن ترى اللغة مستويات واللغة الأكاديمية هي الكثر ميلاناً للصعوبة والاقتراب للمستوى العالي الدقة. الجلوس مع عيلة من أسباب تأسيس اللغة لمن لا يمتلكها, لكن إذا كنت تطمح لما هو أعلى بكثير مما يوفره السكن مع العائلة (وهذا الأصل) لن يزيد جلوسك مع العائلة من مستوى لغتك بالشكل الذي يوصله للمستوى الأكاديمي.

أنا مب متأكد إذا كنت انت الحين حاس بالفرق بين اللغة الأكاديمية ولغة الحديث العادية (لأني أنا ما فهمت الفرق إلا بعد الحصول على كم هائل من اللغة). لكني بحاول أقرب لك الموضوع بمثال.

تخيل هندي جاي من بلاده يبي يتعلم عربي. هل بيستفيد إذا سكنته مع عيله قطرية؟ الرجال يبغى لغة عربية فصحى ويبي يتعلم شلون يقرا ويكتب الكلام المعقد بحيث يكون استاذ في اللغة العربية. هل بتفيده القعده مع العيلة؟ طبعاً ما بيبخلون عليه بتعليمه لغة "الهندي إذا وصل قطر:)". هذي اللغة تمشيه بالاسواق والشارع, لكنها ما تمشيه في الرسميات والجامعات.

طبعاً الحال مع عوايل الانجليز أفضل من حال العيلة القطرية من حيث ان لغتهم مرتبة وما عندهم "لغة العربي إذا وصل بريطانيا". لكن الكلام والتفاعل اللي بيصير بينك وبين العايلة مب شرط أنه يأهلك أنك تكتب بشكل رسمي أو تفهم مرامي أطراف اللغة. أكثر شيء بيفيدك به هالتفاعل هو التعامل مع الانجليز.

انا يوم رحت المعهد البريطاني بخصوص البعثات اسئلوني كم سؤال ومن ضمن الاسئله قالوا تبي دراسه مكثفه ولا عاديه

الله يطول بعمرك لو تلاحظ ترى في مراكز تقوية للمدارس توفر دراسة لغة انجليزية, ولو تسألهم عندكم مكثف ما عندهم مشاكل يطلعون لك مكثف من تحت الأرض. الحين نقارن مدرس التقوية هذا بمدرس لغته الأم انجليزية (وهذا كفاية) وتخصصه تعليم أو أدب أنجليزي ويمكن مر بتجارب تدريس في أكثر من دولة حول العالم ودرس أكثر من مستوى من الطلاب الأجانب ويكون تابع لهيئة رسمية ذات أهداف واضحة. السؤال هل بيعطي مدرس التقوية نفس المفعول اللي يعطيه المدرس الثاني؟


اخوي عيسى بالعقل انت لما تحفض اللغه فالجسر الاكاديمي وتقعد سنه كامله تحفظ الكلمات والقواعد وتروح الجامعه تحسب انك بتتذكر بسهوله.. انا سمعت عن وحده درست فالجسر وسافرت برا معصبه وتقول في كلمات وايد مافهمتها ..وانت اذا درست فالجامعه بتلاحض هالشي لأن مافي فايده حفض وحفض بدون( تطبيق)

هذا دليل ثاني انك مب مستوعب مفهوم اللغة بالشكل المطلوب, وهذا طبيعي في مرحلتك الدراسية الحالية لأنك للحين ما أتقنت لغة جديدة غير العربية. اللغة قبل كل شي ما تنحفظ. اللي يمكن ينحفظ مفردات اللغة وكلماتها ويمكن قواعدها. اللغة تنفهم وتمارس. الشخص ما يقعد سنة كاملة يحفظ كلمات وقواعد إلا وهو مب مستوعب مفهوم اللغة. ومثل هذا الشخص مافي فايدة انه يحفظ.

أنت تذكرني بايام الثانوية العامة يوم كنا نشوف الطلاب يحفظون اللغة. يعني لو بنقول ان الطالب بيحفظ بعض قائمة الكلمات اللي عطونا اياها طول السنة ما فيها شي. لكن يجي الطالب ويحفظ حتى مواضيع الكتابة Writing وبتوجيه من بعض الاساتذة هذي بصراحة مهزلة. وطبعاً لو نسى الطالب حرف من المواضيع اللي كتبها أو كلمة أو سطر ما عنده مشاكل يكتب الموضوع في الامتحان وينسى سطر كامل لأنه أصلا مب فاهم الموضوع اللي قاعد يكتبه.

أنا مادري إذا في حد وصل لهالمواصيل في الجسر وقدر يعدي الجسر على خير لكني بصراحة ما اتوقع ان اللي يحفظ اللغة بينجح. الجسر غيـــــــر والثانوية غيــــــــــــــر.

انت الحين مستغرب شلون الجسر يأهل الطلاب للخارج مع ان الطلاب ما يطبقون اللغة؟ حفظ حفظ مافي تطبيق!!! الحفظ في الثانوية ما ينجحك شلون بينجحك في الجسر؟ من قال لك ان مافي تطبيق؟ اسمحلي أعطيك موجز بسيط عن التطبيق.

مهارات اللغة اربع: استماع وقرائة وكتابة وتحدث

من ناحية الاستماع: انت إذا كلش ما تسوي شي فاشل بتقعد بتستمع للمدرسين في كل حصة. ومن ناحية التدريس في الجسر تحز في خاطرهم ما يسكتون في الحصة إلا وهم مزهقينك. هذا مب تطبيق على الاستماع؟

من ناحية القرائة: أبسط شيء ان تدخل عليك المدرسة وتقول لك ادرس الفصل الخامس من الكتاب ترى عليه تطبيق الحصة الجاية!! أنت طالب ثانوية وما تعرف تقرأ صفحة من كتاب الثانوية اللي كله صور وهذي تجبرك تقرأ فصل من كتاب خلال كم يوم, بالله عليك ما خلتك تطبق القرائة؟

من ناحية الكتابة: الجسر أعتبره أكبر نقلة نوعية من ناحية تطبيق الكتابة الأكاديمية. في المدرسة يقعدون طول السنة يعلمونك "تحدث عن نفسك" وما تقدر تخرج لهم فقرة مرتبة, وفي الجسر بكل بساطة يقولون لك أكتب لنا حق آخر الأسبوع essay وهو شيء (أعوذ بالله من شروره) يتطلب أضعاف الجهد المبذول في عصر المخ واخراج الأفكار منه مقارنة بموضوع "تحدث عن نفسك". وانت تعصر مخك وتطلع الأفكار لهذا الشيء اللي يسمونه essay ألا يعتبر هذا تطبيق عملي للكتابة؟

الحديث أو المخاطبة هي من أقل المهارات ظرورة في الجامعة ومن أسهل المهارات تعلماً. وتوجد الكثير من التطبيقات الممتازة لهذه المهارة في الجسر على الرغم من كونها غير ضرورية. من أشهر التطبيقات (والعياذ بالله) أن يطلبون منك presentation . طبعأ يعتمد على جوك فإذا كنت تحب الكلام بتطورها وهذي مهارة تواصل مع الناس أكثر مما هي مهارة للتعبير عن فهمك. يعني أبسط شي تسويه هو أنك تمر على المدرس مكتبه تنشده عن أخباره وهذا أكثر شيء كنا نسويه. الجدير بالذكر اني شخصياً بعد ما تركت الجسر وسافرت بريطانيا ومع توفر القطريين قل استخدامي للمهارة لدرجة اني نسيت الكلام تقريبا وبديت أتعلم تدريجيا!! كنت في الجسر أتكلم انجليزي أفضل من كلامي في بريطانيا. ولهذا السبب أذكر بأن هالمهارة لا تعتمد على دولة معينة بل على استخدام الشخص للمهارة.

مرة ثانية أذكر بأن الكلام مهارة من مهارات اللغة فاللي يعرف يتكلم كلمتين انجليزي مب شرط يعرف يكتب رسالة دكتوراة. الكلام من ابسط المهارات فلا تجعلها تغشك. المهارات الباقية أهم من الناحية الأكاديمية وهي اللي تستحق التركيز. المعهد اللي يركز عليها بالشكل المطلوب هو اللي بيأهلك للجامعة.

والسموحة عالقصور (مادري شفيني طولت:sorrriso:)

[Omar Al Hazaa]

اختي ابرار .. اول شي الله يشفيج وماتشوفين شر اذا كنتي مريضه.. ويارب انشاءالله تكونين دايما مرتاحه فالدراسه ومتفائله .. انشاءالله انا بحاول اخذ اللغه اول ومب حاط جامعه معينه في بالي .. وانا ناوي اكمل دراستي الجامعيه في قطر لأني ابي اتزوج وانا ادرس.. واذا حصلت تعقيد في جامعات المدينه التعليميه والجامعات الثانيه يمكن ادخل جامعة قطر.. ومشكوره على نصيحتج

[Omar Al Hazaa]

وعليكم السلام ورحمة الله وبركاته اختي R.A.A اول شي هدي اعصابج ولاتدعين عليهم يمكن قصدهم خير! وصح كلامج 470 هالعلامه تخلي الواحد ينقبل في جامعات وايد .. لاكن الجسر كيفهم مع قوانينهم انشاءالله يخلون علامة القبول 500 ولا 700 .. المشكله من المجلس الاعلى للتعليم .. اذا جاهم الواحد جايب نسبه ويبي بعثه يحكرون له ويقولون له لازم تدخل الجسر.. يخلون الطالب يحتار ويفقد الأمل ويشك في نفسه وقدراته بعد ..مشكوره اختي على نصيحتج بخصوص الدوره فالجامعه الهولنديه .. انا هالدوره بحاول اخذها برا احسن .. وانا توني مفكر ارافج اجانب فالدوحه (الله يستر) عشان اتكلم معاهم انقليزي وقاعد اتابع الافلام بس اقرى الترجمه ابي اعرف شيصير فالفلم هههه .. ومره جربت قريت قصه بالنقليزي عورني راسي لأني في كلمات وايد مافهمتها .. وقاعدين نحاول نعيش جو اللغه .. وحلوه هذي ارافج فلبيني من أي محل هههه .. وبخصوص ثاني شغله .. صح كلامج طريق النجاح صعب وايد ويحتاج(اهم شي التوفيق من الله سبحانه) وبعدين يحتاج صبر وطولة بال.. وبخصوص جامعة قطر.. انا مثل ماقلت لج اول خطوه بحاول اسويها اني اخذ دورة لغه برا لأني جربت خذت دورتين في قطر استفدت شوي والحين بحاول اجرب اخذ برا ..بجرب اخذ 6 شهور(انشاءالله تكون الدراسه برا نفس الدراسه فالجسر ) وانشاءالله اجيب التوفل ولا الايلز عشان ابتدي ادخل الجامعه وافتك من التأسيسي .. انا ماعرفت انتي تقصدين أي جامعه امريكيه؟ (جامعات امريكيه في قطر ولا برا؟ لأني ابي دراستي الجامعيه تكون في قطر).. وترا ساعات التأسيسي في جامعة قطر ماتنحسب ..واخاف يضيع علي الوقت اذا خذت تأسيسي في جامعة قطر وبعدين رحت الجسر (بس مشكوره انتي عطيتيني خيارات وايد وبفكر فيها) تسلمين على نصايحج كلها والله يوفقج في دراستج .. والصراحه على كلامكم راسي دار ..بجوف شنو يردون على المجلس الاعلى للتعليم وبعدين يمكن اخذ دورات الانقليزي في قطر

[Omar Al Hazaa]

اخوي عيسى احس تعبتك معاي .. انا برد عليك عقب لأن الحين أذن العصر وبعد الصلاه بروح معهد نيوهورايزن.. بس حبيت اتأسف منك ومن كل طلاب الجسر لأني احس اني ظلمتكم يوم تكلمت عن الجسر .. والشرط الي حاطينه عشان دخول الجسر هذا الي خلاني ماوثق في تدريس الجسر .. بس زين انت وضحت لي الايجابيات(برد عليك بعدين بخصوصها) .. بس بقولك ترى طلاب وايد بيخلصون الثنويه السنوات الجايه وبيقفلون على الجسر نفسي يعني الله يعينكم .. برد عليك بخصوص الرايتنق الحين .. الاستاذ ترا كان يعطينا 5 قطع في قطعه وحده ههههه .. يعني اذا جانا واحد من 5 مواضيع في الامتحان نكتب له قطعه وحده .. هاي ايام الثنويه الحلوه هههه ( مهزله من قلب)

[H.M.A.]

واحد من إخواني قدم على الشرطة، نسبته كانت حول 84% قبلوه و راح يدرس برى لغة لمدة 4 شهور تقريبا,

و ترى كلامك صح عن اللغة برى,

هي غير عن اللغة اللي بتاخذها ف الدوحة, هناك تطبق ع طول و كل اللي حولك بيتكلمون انجليزي بس لازم تختار المدينة عدل مو تروح مكان مليان عرب,


لا تنسى تستخير مرة و مرتين و ثلاثة, و الله الموفق

[Omar Al Hazaa]

اخوي عيسى .. انا استفسرت عن الدراسه برا وقال لي الاستاذ اذا بتروح امريكا بتتعلم لغه حق حياتك اليوميه واذا بتروح بريطانيا,اللغه الانقليزيه اصلها من بريطانيا (ماعتقد التدريس عندهم بيكون تدريس تقوية مدارس ضعيف ).. يعني شدعوه ماعندهم تدريس وتهيئ حق الجامعات ..مثالك واضح وحلو بس لاتنسى انا بسكن عند عائله وبدرس(في نفس الوقت) في معهد .. ماراح يكون اعتمادي بس على العائله.. وانشاءالله نتعلم اللغه على اصولها.. وبخصوص الرايتنق(الكتابه) طبعا لها قواعد ثابته وعلمونا هالقواعد فالمعهد لاكن لاتنسى لازم تكون حافض كم كبير من الكلمات (والتطبيق اهوه الي يخلي الكلمات تثبت) وزين انكم عندكم تطبيق فالجسر ..الدراسه شكلها حلوه ومفيده عندكم ..من كلامك والله الجسر شكله زين لاكن تذكر انا ((ماقدر)) ادخل الجسر(بسبب شروطهم الحلوه) ولازم اشوف لي حل من الحلول البديله..(وكلامك بخصوص مهارات اللغه بعد حلو) مشكور اخوي والله انك ساعدتني وايد وبمشي على كلامك في ثلاث نقاط 1- بقعد اذا سافرت انشاءالله في مكان مافيه عرب 2- بشترط اني ادرس في معهد يدرس اللغه الاكاديميه(حق الجامعه) مب الكلام العادي 3-بشترط ان المعهد يركز على القرائه والكتابه والاستماع (والتحدث بخلي له وقت صغير وبسيط) انا يوم رحت حق المعهد البريطاني ماقلت لهم غير شرط واحد بس حق الدراسه برا (قلت لهم ابي دراسه مكثفه)والحين صاروا اربع شروط ... مشكور اخوي.. الله يوفقك ويوفق الجميع ..والي عنده نصايح زياده يقولها ولايحرمنا...

[Omar Al Hazaa]

اختي H.M.A مشكوره على نصيحتج وانشاءالله ببتعد عن العرب اذا الله سبحانه وفقني وسافرت.. وانشاءالله مابنسى وبستخير ربي ..بس انا ماصلي الاستخاره اكثر من مره بخصوص موضوع واحد معين...

[Essa Al-Mansouri]

اخوي عيسى احس تعبتك معاي
ولا تعبتني ولا شي بالعكس تعطيني سبب اني أدخل المنتدى وأكتب :okkiale:

المشكله من المجلس الاعلى للتعليم .. اذا جاهم الواحد جايب نسبه ويبي بعثه يحكرون له ويقولون له لازم تدخل الجسر..

تصحيح
يقولون له الوسيلة الوحيدة لتعليم الانجليزي هي الجسر
لكن إذا الطالب فاهم انجليزي يقدر يعطيهم الدرجة اللي يطلبونها حق الجامعيين (5.5 في الايلز مثلاً) ويروح الجامعة يدرس.


انا استفسرت عن الدراسه برا وقال لي الاستاذ اذا بتروح امريكا بتتعلم لغه حق حياتك اليوميه واذا بتروح بريطانيا,اللغه الانقليزيه اصلها من بريطاني

الدراسة في بريطانيا وأمريكا هذي سالفة منفصلة وما لها تاثير في اللغة الأكاديمية بشكل مباشر.

من ناحية الدراسة في أمريكا بصراحة الأغلبية يفضلونها على بريطانيا لأن اللغة أسهل والناس طيبين والحياة غير :d:

أما من ناحية اللغة الأكاديمية فهذا يعتمد على المعهد أكثر من الدولة. ما أتوقع أن اللغة في أمريكا بتكون أقل في المستوى من بريطانيا خاصة إذا حسبنا جودة التعليم عندهم. وبعدين ترى العالم من حولك يتكلم اللغة الأمريكية. حتى لو تعلمت اللغة البريطانية (اللي على ما يقولون أصل الانجليزي) بتشوف نفسك تلقائياً تميل لأستخدام اللغة الأمريكية لأن الواقع يشير إلى أنها الأكثر شهرة. وترى اللهجة البريطانيا تختلف من منطقة لمنطقة وماهي دائماً مثل لهجة العاصمة لندن. يعني لا تستغرب إذا شفت الناس في أحد المدن البريطانية ينادون الchecken جخن !!

.من كلامك والله الجسر شكله زين لاكن تذكر انا ((ماقدر)) ادخل الجسر(بسبب شروطهم الحلوه) ولازم اشوف لي حل من الحلول البديله.

في هالحالة كان المفروض نمدح لك شي ثاني تقدر تدخله :fs:... معليش غلطنا في النمرة

- بقعد اذا سافرت انشاءالله في مكان مافيه عرب
في واحد الله يستر عليه أصر انه ما يشوف العرب ولا يكلمهم

على أخر الفصل سلمت على الرجال ولا به كاره عيشته من الغربة ووده يرجع الدوحة بطالي ولا يدرس في بريطانيا !!! قعدت أهدي فيه لين يود مينونه.

ترى مب دايما البعد عن العرب ميزة. هالعرب هم اللي بيخلونك تنسى انك برع بلادك. يعني سو موازنة بسيطة.

2- بشترط اني ادرس في معهد يدرس اللغه الاكاديميه(حق الجامعه) مب الكلام العادي 3-بشترط ان المعهد يركز على القرائه والكتابه والاستماع (والتحدث بخلي له وقت صغير وبسيط)

أنك تشترط هالشي موضوع, وانك تحصل هالشي موضوع ثاني.
الاجابة التلقائية من قبلهم بتكون ان اللغة الاكاديمية موجودة في المعهد ولا أروع :angry2:

والباقي يكون عليك في تجربة مدى فعالية المعهد ومقدار التطبيق للمهارات الخاصة للغة ومستوى التعليم في المعهد وعلى حسب يضبط ولا لا.

[Omar Al Hazaa]

بس يكون تحكير اذا الطالب ماجاب النتيجه الي يبونها (نفسي) .. انا خلاص انشاءالله بروح بريطانيا وكلمت شباب ويقولون انهم مرتاحين هناك.. والخيارات وايد لاكن الله يجيب الي فيه الخير .. وصح كلامك جودة التعليم في امريكا الكل يشهد لها .. وحلوه ينادون الدجاج جخن هههه... في واحد اسمه عبدالله عضو معانا فالمنتدى يقول انه ساكن في مدينة ومبلدون ومافيها عرب غير واحد بس ! ويقول مرتاح وينصحني اروح ادرس في ومبلدون .. ترا في ناس عندهم طموح ويستحملون ويحبون الغربه ..هذا الي ماقدر يصبر على الغربه لمدة فصل قول له في ناس يصبرون 4 و5 سنوات فالجامعات .. وبشترط الشروط الي قلتها لك وانشاءالله يتحقق هالشي ..

[Shooq Al-Hamadi]

اصلا المجلس الاعلى مايمشون الا (( بالواسطات )) ..

انا نفسك يبت نسبه 84 وتعبت عليها وكان خاطري اخذ بعثه وادرس برع حتى لو على حسابي بس للاسف الشديد حبطوني مع هالقوانين المعقده ..

فكرت اروح المجلس الاعلى وادش عليهم عرض بس خفت يردون عليي بكلام يفشل ..

خلها عالله ..

وبالتوفيق انشالله ..

[Fahad Al-Obaidly]

أخوي إذا تبي نصيحتي..

أدرس في جامعة قطر أبرك لك.. شتبي في الغربة والتعب؟.. خلك بين هلك وربعك وتدرس على راحتك وان احتجت شي كلن صوبك.. صدقني مافي شي يشجع على الدراسة برع..

الحياة في الدوحة احسن.. الدراسة جامعة قطر مناهجها ما عليها كلام اللهم الادارة هي اللي مطيحة سمعتها.. والمدة اللي بتدرسها برع نفسها في جامعة قطر..

اسال مجرب.. أنا جربت الثنين وحين متحسف اني هديت الدوحة..

اتمنى لك التوفيق..

فهد

[Omar Al Hazaa]

اختي شوق انتا خايفه تتفشلين منهم وهالشي من حقج.. انا رحت لهم اربع مرات وانا الي فشلتهم ههههه ..

قلت حق المسؤوله انا ماجبت نتيجة الجسر ودوني اخذ لغه برا .. قالت لا خذ في قطر ..قلت لها انا خذت دورتين في قطر وما نفع.. قالت خذ دورات زياده وجيب التوفل واحنا بنطرشك بعثه ..قلت لها الدوله عيزانه تخليني اخذ لغه برا.. اسكتت وتفشلت وقامت تفكر.. وبعدين قامت تتفلسف وقالت الكوره في ملعبك شد حيلك وفي معاهد وايد هني .. الصراحه ترتيبهم غلط واهم ملزومين يعلمون الطالب اللغه ..

[Omar Al Hazaa]

اخوي فهد لاتتشائم وشد حيلك.. اذا تبي مستقبل حلو لازم تتعب عدل الحين لاتقول ابي ارتاح اوكي..

وانا الحين تأسيسي في جامعة قطر وانشاءالله بروح بعد شهرين كندا والحمدلله رتبت كل اموري.. والدراسه والله حلوه ومريحه في جامعة قطر .. لاكن انا ابي ادرس برا

جوف انا يوم فكرت ادرؤس برا سألت عدل مب بس قلت خلاص بروح ادرس بدون ماخطط عدل.. سأـلت الدكاتره الي عندنا فالجامعه .. واحد قال لي روح خذ اللغه من كندا وقال لي ليش ماتكمل دراستك كلها برا.. قال لي هالشي بيكون احسن لك ..وواحد ثاني قال لي روح امريكا ..

اخوي هاي كلام الدكاتره الي درسوني ..يدرسون الطلاب في جامعة قطر وكانوا دارسين برا وهذي نصيحتهم .. انا صليت الاستخاره وخلاص ناوي اروح كندا..

اخوي انت خذ بنصيحة الناس الناجحين مثل الدكاتره والي خلصوا الدراسه برا .. وماعليك من الي افشلوا ويصعبون الامور عليك

انا بعطيك امثله بس اخاف اطول.. ولد عمي درس تخصص البزنس بالعربي قال لي انا درسته بالعربي وكان صعب شلون بتدرسه بالنقليزي .. وسئلت واحد ثاني يقربلي فالامارات دارس نفس التخصص بالانقليزي ..قال لي انا هالكورس ماخذ 4 مواد كلهم بالانقليزي وبس وحده بالعربي وقال ال3 مواد الي بالانقليزي كلهم اسهل من الماده الي بالعربي ..(( فكر في هالكلام عدل)) في ناس يصعبون عليك وفي ناس يشجعونك
والي خلصوا وادرسوا برا يعني احسن منك ولا اذكى منك؟؟ جاوب

انا ولد عمي خلص البكالوريوس في كندا وراح يدرس الماجستير في امريكا

انا قلت في قلبي اذا درست تخصص الاداره في قطر و التخصص بالنقليزي وقاعد في بلاد عربيه.. يعني بحفض الكلام وبخزنه في راسي بدون ماتكلم انقليزي .. ماعتقد اني بجيب ممتاز .. وماراح تكون لي فرصه ((كبيره)) عشان اكمل الدراسات العليا.. وطبعا في ناس يرتاحون على هالطريقه لاكن انا الصراحه مارتحت.. وانت سو الي يريحك لأن هذا مستقبلك انت

اسمحلي طولت عليك واذا تبي تتناقش معاي انا حاضر ..قول الي في قلبك ولاتستحي

[Fahad Al-Obaidly]

أخوي اللي في قلبي قلته

أنا جربت الدراسة في جامعة قطر.. وجامعة بورتموث.. وجامعة شيفيلد..

ومحد قال لي شي ولا حد حطمني كل اللي سويته عن قناعة..

ونا اتكلم عن تجربة مب كلام ناس غيري..

أخوي إذا انت حاب تدرس برع عشان اللغة.. الله ييسرلك أمورك..

وللعلم جامعة قطر كل موادها بالانجليزي احين.. انا اتكلم عن الادارة والاقتصاد والهندسة..

المنهج والتدريس كله بالانجليزي.. ماقد خذت مادة غير المتطلبات العامة والمواد الاختيارية بالعربي..

عموما دامك استخرت وسالت وحسيت نفسك انك مرتاح للدراسة برع توكل على الله والله يوفقك..

فهد

[Omar Al Hazaa]

اخوي فهد الله يوفقك انت بعد .. واذا انت فشلت ولا حصلت صعوبه ترى الفشل اقصر طريق للنجاح.. وفي ناس وايد

ناجحين لاكنهم افشلوا كم مره قبل لا ينجحون .. وانت سو الي يريحك والدراسه في جامعة قطر بعد حلوه.. وفي كتاب اسمه حتى لا تفشل انصحك تقراه.. يتكلم عن ناس وايد افشلوا وبعدين انجحوا وصاروا شخصيات كبيره..

عندي سؤال لك .. انت شلون تعلمت اللغه؟ لأن انا محد نصحني ببريطانيا .. وواحد معانا في لفل 1 يدرس لغه فجامعه قطر.. خذ له كورس لغه 6 شهور في بريطانيا وماخذ التوفل ورجع يدرس لفل ون؟؟

واعرف واحد والله مادرس غير لفل 3 في جامعة قطر من بعد ماخلص الثنويه وجاب التوفل 520!!

ترى السالفه شكلها سالفة اجتهاد!

[Fahad Al-Obaidly]

أخوي أنا ماقلت لك اني فشلت في الدراسة هني

أنا قلت ان الحياة هني ما تسوى الواحد يتعنى لها لو لدراسة لان الجامعات عندنا مافي مثلها

بالنسبة للانجليزي أنا الحمدلله تخرجت من العلمية واللي التدريس فيها كان كله بالانجليزي

غير هالشي انا عشت فترة لا باس بها في بريطانيا يوم كنت صغير وهالشي ساعدني وايد

إذا تبي نصيحتي اقرا كتب بالانجليزي على حسب مستواك اذا تبي تجتهد وتطور نفسك في الانجليزي

طبعا هذا بجانب الافلام اللي تكون فيها عبرة ولغة سهلة (بس شوف لك افلام عجلة عشان لا تطيع بذمتي :P )

وذا تبي دورات للتوفل انصحك بالELS تدرس ومنهج ماعليه كلام

فهد

[Omar Al Hazaa]

عيل انا فهمتك غلط اخوي فهد .. بس انشاءالله تتوفق في دراستك ..وانا راح اخذ بنصيحتك .. وانشاءالله دورة التوفل ناوي اخذها في كندا.. ووكلامك الي عن الافلام مب واضح اتمنى لو انك توضحه ..

[H.A.A.Al-Ansari]

ღ

.
.
.

{ السـلآم عليـكم ورحمـة اللـه وبركـآتهـ ~

.

[ بسـم اللـه ~

طبعـاً خـوآنـي وخـوآتـي اللـي سبقـوا فـي الـرد { مـآ قصـروا .. وجزآهـم اللـه خيـر ~ :w5rw:

بالـذآت لمـآ تجـي الشهـآدة عـن " تجربـة " تكـون أظمـن ..

:)

...

فأنـآ غيـر مؤهلـة للـرد .. لأنـي مـآزلـت فـي أول خطـوآتـي عالـدرب ..^.^"..

لكنـه رد حبيـت أضيفـة بعـد مـآ قريـت الموضـوع ..

وإن شـآء اللـه يفيدك أخوي عمـر .. :)

{ لأن الإنســـآن يستعيـن بالأشيـــآء لخدمتـه .. مـو الأشيـآء تستخدمـه ~

فحلـو إنك تتعلـم كـل شـي بحيـث إنه يخدمـك .. أو يخـدم هدفـك ..

يعنـي استفـدت مـن الموضـوع وآيد .. مـآ قصـرتـوا ..

وهنـآ إضـآفتـي المتـوآضعـة :) :

.
.

بـــدآيـــةً .. :)

كلنـآ نؤمـن إن ربّ العـآلميـن ييسـر الأمـور لمـآ فيـه { الخيـر ~ للإنسـآن ..

سـوآء الإنسـآن حـب الشـيء .. أو مـآ حبـهـ ..

وذكـر هـذآ فـي القـرآن الكريـم .. فـي قولـه تعـآلـى :

بسـم اللـه الرحمـن الرحيـم ..

{ وَعَسَى أَن تَكْرَهُواْ شَيْئًا وَهُوَ خَيْرٌ لَّكُمْ وَعَسَى أَن تُحِبُّواْ شَيْئًا وَهُوَ شَرٌّ لَّكُمْ وَاللَّهُ يَعْلَمُ وَأَنتُمْ لاَ تَعْلَمُونَ }

.. صـدق اللـه العظيـم

فاللـي تتمنـآه أو تهـدف لهـ .. لو حـآولـت توصلـه بكـل مـآ تملـك .. ( وأعنـي كـللل مآ تملـك )

مـآ بتوصـل وهـو مـآفيـه خيـر لك ..

>> ... كـن علـى يقيـن بهالشـي :)

.
.

لِنَقُـل بـأن ! دروب النجـآح صعبـة ..

إذاً لآبـد بـأن مـن يخـوضهـآ يكـون { إنسـآن مثـآبـر ~

...

قـــدّم الاستخـــآرة ..

ثـم اعمـل ..

ثـم توكـــل علـى اللـه ..

وربـي بيسّـر لك الخيـر .. :)

.
.

{ التوفـــل ! ~

ومـآ أدرآكـم مـآ التوفـل هـذآ .. هههههـ :D

يمكـن مثـل مـآ ذكـرتـوا .. إن هـو مهـم لمصلحـة الطـآلـب ..

لكـن احنـآ جيـل مـآ تهيـــأنـــآ للتوفـل .. فمـب مـن العـدل إن يكـون مصيـر مستقبلنـآ أسيـر التوفـل !!! وإلآ شـرآيكـم ؟؟؟ :9:

بس إن شـآء اللـه بنغلبـهـ .. :16:

.
.

يقـولـون إن الآيلـــز أسهـل / لكـن حسـب الجهــه اللـي أنـت مقـدم لهـآ ( هـل تقبـل الآيلـز وإلآ لآ ؟ )


وفـي كـل الأحـوآل .. لآ يصيبـك الاحبـآط مـن شـي .. !

لأن اللـه " مدبّـــر " لكـل العـآلـــم ..

وأنـت بعديـن عليـك تآخـذ بالأسبـآب وتتوكـل .. :)

.
.

قـد تكـون رغبتـك فـي الوصـول للهـدف { جـآمحـه ~

وقـد تكـون عنـدك قنـآعـة بإن { احتـرآف اللغـة مـآ يكـون إلآ بالممـآرسـة .. وإن الممـآرسـة مـآ تكـون إلآ بـرى البـلآد العربيـة ~


أحتـرم وجهـة نظـرك ..

.
.

{ السفـــر ~

فآيـدتـه مـآ نختلـف فيهـآ ..

فـبـلآ شـك اكتسـآب اللغـة هنـآك بيكـون أسـرع .. في وقـت أقصـر ..

ولكـن سلبيـآته .. مـآ نقـدر نتغـآظـى عنهـآ ..

* غربـة الإنسـآن عـن أهلـه .. يمكـن تأثـر عالـدرآسـة ..

* المجتمـع المختلـف تمـآماً عـن هنـي .. ( بالزين والشين ) بعـد بيأثـر ..

فأقتـرح عليـك / فيمـآ يخـص الأشيـآء اللـي أنت محتآر فيهـآ :

[ إنـك تفنّـد السلبيـآت والإيجـآبيـآت .. عشـآن يكـون قـرآرك علـى ثقـة وقنـآعـة ]

:) ..

.
.

وتـرى بالمقابـل ممكـن تثـري لغتـك بوجـودك هنـي ..

لأن صـآر عنـدنـآ " عـآلـــم تعليمـي فـي بـلآدنـآ " .. تقـدر تعتمـد عليـــه { لو تبغـــي ~

وهـذي أفكـآر مسـآعـدة :

1- إنك ترآفج أجنبـي > ... حللـوه ^^"

2- الأفـلآم .. بـس تكـون بـدون ترجمـة وأنـت سجّـل الكلمـآت ( في ورقـة ) وترجمهـآ عقـب .. عشـآن مآ تركز عالترجمـة :D

3- تتفـق مـع أهلـك فـي البيـت أو ربعـك إن يتكلمـون معـآك انجليـزي لمـدة معينـة في اليـوم .. :9:

4- سولـــف مـع الدكـآتـرة وآيـد .. واستشيـرهم بالموضـوع ..

> ... هـذي بعـض الأفكـآر .. وغيرهـآ بتسـآعـدك عاللغـة بـدون مـآ تسـآفـر ..

.
.

فـي الحـآلتيـــن ..

{ كثـر الـدق يفـك اللحـآم ~

فـ كثـر المحـآولآت .. بيخليـك فيلسـوف فـي اللغـة ..

ومـآ شـي يجـي بالسهـــل ..

لأن الصعـــب .. نتيجتـــة أثبـت ..

..^.^"..

.
.

احـرص علـى : { الاستخـآرة / والاستشـآرة ~ >> ... لأنهـآ أسـآس اتخـآذ أي قـرآر .. :)

.
.

ختـــآمـاً .. أتمنـــى لـك التوفيـق أخـوي .. وللجميـــع .. :)

.
.

{ أنتـــم الســـآبقـــون ونحـــن اللآحقـــون ~ :9:

.
.

تقبـل ردي المتـوآضـع :) ..

> ... والسموحهـ عالإطـآلـة .. :D

.
.
.

ღ

[Mohd AL-Emadi]

يعطيكم العافيه علي موضوع

انا قبل كم يوم كلمت احد في مجلس الاعلي ومال البعثات
وقالو لي

مو مهم النسبه اهم شي تبي في الايليز 4ونص وفوق لو يبت هاي السكور

تروح موقع الجامعه الي تبيه وتقدم لهم طلب يعني ترسل لهم معلومات وشهاده الايليز عن طريق البريد

وتسوي لهم كوبي بعض من معلوماتك الي يبونه منك الجامعه عن طريق موقع الجامعه الي علي نت

ولازم تشوف قسم جامعات الي معترف فيها في مجلس الاعلي

وعقب ماطرش شهاده الايليز ومعلومات الي يبونه اهم عقب فتره يردون عليك بيميل بيقولون لك انقبلت او لا

واذا نقبلت علي طول تودي مجلس الاعلي ورقه قبول الجامعه بك وعلي طول مجلس الاعلي اطرشك الجامعه الي تبيها بس اهم شي الجامعه الي تبيها قبلوك فيها هاي اهم شي في موضوع

وسالفه نسبه وهاي الاشياء مايبونه الحين كنسلو كل شي بس اهم شي الجامعه تقبلك

والسموحه

[Omar Al Hazaa]

اختيH عليكم السلام ورحمة الله وبركاته.. احب اشكرج على مشاركتج الي فادتني وايد
وانا مستغرب منج ليش قلتي عن نفسج انج مش مؤهله ..لأنج ماشاءالله عليج راسمه حق نفسج طريق واضح واهم شي انج معتمده على ربج.. فا انشاءالله راح تكونين مرتاحه فالمستقبل مهما يصر لج من ابتلائات وراح تتجاوزينها بسهوله لأنج علقتي قلبج بالله سبحانه وتعالى..

وصح كلامج ((دروب النجاح صعبه)) لاكن للأسف اكتشفت اني انسان مش مثابر وماقاعد اعمل بجد واجتهاد.. واليوم غايب عن الجامعه والاسبوع الي طاف غبت ثلاثة ايام..

يعني المشكله مني انا قبل لاتصير مشكلة المكان الي ادرس فيه..وقاعد ادور الحلول حق هالمشكله..

وكلامج صحيح مستقبلنا لازم مايكون اسير التوفل لاكن.. لو تبين تشتغلين في أي مكان الحين لازم يكون عندج لعه عدله ..والتوفل اهوه اشهر اختبار عالمى حق اللغه الانقليزيه ..يعني الانسان لازم يتعلم اللغه عدل بكل بساطه وبعدين يقدم التوفل وبيجيبه انشاءالله ..

انا فعلا كان عندي قناعه ان اللغه مستحيل اتعلمها في قطر .. لاكن هالقناعه تغيرت يوم شفت واحد من الربع جاب التوفل بعد ما داوم فالجامعه كورس واحد بس(( بس خلص لفل 3)) وعمره مادخل معهد في حياته وماعنده ربع اجانب .. سئلته شلون جبت التوفل ..((نتيجته كانت 525))

قلت له اعترف شنو كنت تسوي فالبيت هههه كم ساعه تدرس ..قال والله كنت احفض 7 كلمات فاليوم واحل الواجبات وبس.. بعدين قلت في قلبي السالفه بسيطه لاكن انا الي مب عارف شلون ادرس..

المهم.. اهوه جاب التوفل الكورس الي راح والحين بدا يدرس تخصص الهندسه.. قلت له شلون تدرس حق الهندسه.. قال لما اخلص محاضراتي الظهر أو العصر اروح المكتبه واقعد ادرس لين الساعه 8 فليل..

هاي الي خلص التوفل بسرعه ويبي يخلص التخصص بعد بسرعه.. المهم انا بحاول استفيد من نصايحه وانشاءالله تستفيدون انتوا ..

اما بخصوص السفر فعلا فيه سلبيات وانشاءالله نتغلب عليها.. لاكن انا الحين وانا قاعد في قطر كل يوم لازم يكون عندي 20 شغله اخلصها.. واحس اني لو سافرت بكون فاضي..

واحب اشكرج على نصايحج بخصوص اللغه..انا جربت ارافج اجانب لاكنهم اطلعوا مب صاحيين هههه.. اما بخصوص الافلام انا اختلف معاج في هالنقطه.. لأني اشوف افلام مع ترجمه (اسمع الكلمه واقرى ترجمتها على طول)..وهالشي عطاني كلمات كثيره لما اكتب قطع الرايتنق فالجامعه..

وبخصوص الكلام مع الاهل هاي فكره حلوه.. اما الدكاتره ..واحد منهم عطاني نصيحه عدله وقال لي ياعمر انت قاعد تغيب عن الجامعه يعني لو رحت كندا ولا أي بلاد فالعالم ماراح تنفعك لو ماكان عندك انضباط ..واستشرت بعد اثنين.. واحد قال لي روح كندا والثاني قال لي روح امريكا انا كنت دكتور هناك لمدة 8 سنوات.. عطوني عدة خيارات..وانا اخترت كندا ..

والحمدلله المشكله انحلت عندي وشرحت المشكله حق الوالد وقال لي خلاص بخليك تروح((فالبدايه كان رافض لأنه درس في امريكا عن طريق الدوله وقال لي لازم تحاول عن طريقهم والدوله مش عيزانه توديك تدرس برا؟)) لاكن فهمته شروط المجلس الاعلى للتعليم الي مالها داعي ووافق بعدين..

واتمنى ان المشكله تنحل حق كل الطلاب ؟.. وفعلا في ناس يدرسون فالبلاد ويجيبون نتايج احسن من الي سافروا برا..

احتي H انا بعد اتمنى لج التوفيق والنجاح فالدنيا والاخره ولو عندج أي استفسار ولا سؤال قوليه واحنا حاضرين

[Omar Al Hazaa]

الله يعافيك اخوي العمادي.. واحب اشكرك على على معلوماتك الحلوه.. وبالنسبه حق الايلز ترا فعلا يختلف من جامعه لجامعه ..مثلا جامعة قطر اعتقد تبي 5ونص فالايلتز اما بعض الجامعات الامريكيه تبي 7 ..

فالشخص يسأل على حسب الجامعه الي اهوه رايح لها.. وانا طبقت كلامك اخوي وراسلت بعض الجامعات الكنديه من قائمة المجلس الاعلى.. على الاميل وردت علي لحد الان جامعه وحده.. والله يوفقكم كلكم....