لو ماكنت مسلم,, بين الحيداية والعنصرية عطنا رايك,,

[Amira.A]

السلام عليكم ورحمة الله وبركاتة,,


اسئلة كثيرة دارت فبالي لما كنت اتصفح مواقع الانترنت الاجنبية واقرا نظرتهم عن المسلمين وعن الحجاب وغيرها من الامور التي تخصنا وتخص دينا,,

ودارت فبالي هالاسئله,, من عادتي احب احط نفسي مكان الاخر عشان اعرف تفكيرة ونظرتة للامور,,

وطلعت مع هالاسئله وحبيتكم تشاركوني اجابتها وبصدق بعيد عن المثالية:

1- لو ماكنت مسلم,, شنو نظرتك عن الاسلام؟؟

2- لو ماكنت مسلم,, شنو اول شي بتقولة لو شفت وحدة منقبة فالسوق مع زوجها او اخوها؟؟!!

3- موقفين تعرضت لهم سابقا,, ممكن ياثرون على نظرتك للاسلام والمسلمين واحد سلبا والثاني ايجابيا؟؟

4- رأيك عن محمد -صلى الله عليه وسلم- ؟؟!!

5- ماهي احتمالية اشهارك للاسلام وهل هي مشروطة بشي؟؟!!

6- شنو العمر اللي تتوقع انك راح تسلم فيه وليش؟؟!!

7- اشخاص من حياتك الشخصية ممكن يكونون السبب في اسلامك,, واشخاص من قطريز وليش؟؟!!

8- بين النقاب وبين الحجاب اللي ينلبس مع السكيني جينز,, شنو ممكن بتعلق عن هذا الموضوع كشخص غير مسلم؟؟!!

9- والحين كمسلم,, هل تجد العذر للغرب بانهم ينظرون لنا هذه النظرة؟؟!!


وبالنهاية وفقكم الله لما يحبة ويرضاه ولا حرمكم من لذة وسماحة الدين الاسلامي,, : )


اختكم,,
أميرة

[Mohammed Al-Mannai]

بسم الله الرحمن الرحيم


اجابة واحده على كل الاسئلة اختي .. لا استطيع ولا اريد ان اتخيل نفسي غير مسلم ..

[Jassim Al-Naama]

السلام عليكم ورحمة الله وبركاته

موضوع مميز جداً اختي أميرة .. وفكرته جديدة ^^

أسجل حضوري ولي عودة أكيدة بالغد ان شاء الله للرد المفصل

[Amira.A]

السلام عليكم ورحمة الله وبركاته


* اخوي محمد المناعي:

احيي فيك اعتزازك بدينا الحنيف,, ولكن,, الهدف ليس التخيل لمجرد التخيل,,

ولكن لو انتبهت للسؤال الاخير,, نبي نعرف اذا لهم الحق او عندهم وجهه نظر بخصوص هالنظرة :)

واشكرك على هالاجابة اللي فيها الاعتزاز بالدين : )


* اخوي جاسم النعمة:

اشكرك اخوي على الرأي اللي اعتز فيه,, : )

وبأنتظار الغد حاملا الرد المفصل : )

[Abrar Al-Janahei]

السلام عليكم يا أميرة :):) .. مشكورة حلوة الأسئلة :)

1- لو ماكنت مسلم,, شنو نظرتك عن الاسلام؟؟

بالنسبة لي .. بنظر له بأنه دين سماوي آخر .. وانه دين يشترك مع ديني يتخالف معاه ..
يمكن اكون متشدده تجاه ديني .. وارفض افكار المسلمين .. لكن بعد ما قريت الأنجيل وفهمت منه .. صرت اجوف المسيحيين غير .. اعتقد اني راح اقرى القرآن علشان افهم واتقبل :)

2- لو ماكنت مسلم,, شنو اول شي بتقولة لو شفت وحدة منقبة فالسوق مع زوجها او اخوها؟؟!!

الصراحة اعتقد اني بخاف .. لان الغرب ما يتغطون .. وبصير أسأل .. يمكن يصير في بالي ان اللي معاها جابرينها تلبس بهالطريقة .. انا ما احب احكم على الناس فأكيد بسأل عن النقاب

3- موقفين تعرضت لهم سابقا,, ممكن ياثرون على نظرتك للاسلام والمسلمين واحد سلبا والثاني ايجابيا؟؟

مره كنت في المسجد في رمضان .. وكان الإمام يدعي على المسيح واليهود وعلى حريمهم واطفالهم .. بطريقة قاسية جـــداً ما كان عاجبني كلش بس لان كنا في الوتر .. احس المسيحيين واليهود يكرهونا زيــاده .. يعني احس بدل ما ندعي عليهم ندعي لهم يصيرون مسلمين ..وفي الأخير نتمنى الخير لكل حد مش تقتيلهم وتدميرهم

الموقف الثاني.. انا تعاملت مع كذا بنت مطوعة وكان تعاملها جدا مزعج مب معاي بسواهيه تتكلم .. كان تلعن وتسب واطلع كل حد غلط .. هالحركة بعد غلط .. محد يعرف مين أحسن من من
لو انا مسيحية كنت بكره المسلمين بهالطريقة لانهم بيكونون يقولون شي ويطبقون العكس تماما

4- رأيك عن محمد -صلى الله عليه وسلم- ؟؟!!

محمد عليه السلام نبيي حبيبي :):) ... انا ان كنت مسيحية او يهودية .. بشهد له ان انسان غير في العالم تغير جذري .. وهو اول انسان مؤثر عرفة التاريخ .. دليل الكتب الانقليزية التي تثبت ذلك
مستحيل راح أنكر :)

5- ماهي احتمالية اشهارك للاسلام وهل هي مشروطة بشي؟؟!!

انا كنت بسلم .. احتمالية بسيطه تكون عن طريق الاشخاص .. لكن اعتقد و اغلب الظن ان راح اسلم بعد دراسة الاسلام والسؤال .. لان تغير الدين شي مب سهل .. معناته اغير كل معتقداتي وافكاري واسلوبي وطريقي وهدفي وحياتي

6- شنو العمر اللي تتوقع انك راح تسلم فيه وليش؟؟!!

اتوقع راح اكون في 24 او 25 سنة ... لان بما اني انا في الغرب .. واجوف المسلمين واوظاعهم والمسلمين في الغرب اكثر من المسيحين في الخليج .. فراح يكون فيني حب الاستطلاع
خصوصا بعد ما بكون اسمع الكثير عنهم وعن دينهم

7- اشخاص من حياتك الشخصية ممكن يكونون السبب في اسلامك,, واشخاص من قطريز وليش؟؟!!

ابوي :) .. ادري ما يصير .. وبعد بنت خالتي وزوجها .. اما من قطريز فهي Sara Al-Ali :)

8- بين النقاب وبين الحجاب اللي ينلبس مع السكيني جينز,, شنو ممكن بتعلق عن هذا الموضوع كشخص غير مسلم؟؟!!

اعتقد ما بيكون عندي مشكلة .. لاني بكون متعودة على هذه المناظر في بلدي .. لكن طبعا بستغرب من انواع الحجاب اللي موجود

9- والحين كمسلم,, هل تجد العذر للغرب بانهم ينظرون لنا هذه النظرة؟؟!!

انا وجدت لهم العذر من زمـــان ... وخصوصا ان عندي صديقة مسيحية متشددة :):)
عجبتني كثيرا هذي البنت .. وعطتني ملاحظات عن دينا ما كنت اتوقعها .. تقريبا غيرت طريقة تفكيري لهم .. مثل ما غيرت من تفكيرها لنا :)



جزاج الله خير يا أميــرة :)

[Amira.A]

وعليكم السلام ورحمة الله وبركاته

*الغالية ابرار الجناحي:

اجابات وافية ورائعه,, واكثر ماعجبني فيج حبج بالاطلاع والتعرف على الاديان الاخرى : )

اشكرج الغالية على وقتج واجاباتج الرائعه : )

[Sultan Al-Kuwari]

احب اسجل اعجابي بالفكره والموضوع .. وان شاء الله يكون لي رد .. لان الصراحه المشاركه في هالمواضيع مرعب نوعا ما .. بس بحاول ان شاء وعلى تأني ..

[Amira.A]

السلام عليكم ورحمة الله وبركاته

* اخوي سلطان الكواري:

شهادة اعتز فيها اخوي ..

وفي انتظار ردك اللي متاكدة انه بيثري الموضوع..

[R.A.M]

السلام عليكم ورحمة الله وبركاته

1- لو ماكنت مسلم,, شنو نظرتك عن الاسلام؟؟
مثل ما العالم صوره لنا في السنوات الاخيره .. ارهاب.. خاصه بعد تفجيرات 11-9 لاني وقتها بفكر بالابرياء اللي راحوا.. ومابفكر انها خطط سياسيه..

2- لو ماكنت مسلم,, شنو اول شي بتقولة لو شفت وحدة منقبة فالسوق مع زوجها او اخوها؟؟!!
مب حلوه.. او يمكن انسانه رجعيه.. خاصه ان الاغلبيه فاتحيين ويووهم الملونه.. شي مب منطقي بالنسبه لي كلهم دين واحد.. بس وحده لابسه ووحده كاشفه.. ووحده املونه نفسها بعد "لان اللي اتلون ويهها في الدول الغربيه معروف شتقصد".. غريبه ماتسائلوا البنات. ليش الاجانب مايصبغون ويووهم.. ليش الميك اب الخفيف عندهم.. والعرب صارخ..

3- موقفين تعرضت لهم سابقا,, ممكن ياثرون على نظرتك للاسلام والمسلمين واحد سلبا والثاني ايجابيا؟؟
اللاشيا الايجابيه اللي احبها في الاسلام..
احب الكرم في المسلمين..
احبهم يوم يسئلون عن اخبار بعض واذا كان فلان حي او ميت..
احب تقديمهم للمساعده لاي شخص بغض النظر عن شلكه ولونه وجنسيته ودينه بدووون مقابل.. لانه يدري انه يحتسب الاجر من الله سبحانه..
احب العلاقات الاسريه بين الابو والام وعيالهم وبين والاخوان والخوات بينهم وبين بعضهم.. وصله الرحم..
احب في الدين الاسلامي انه تكلم عن كل شي .. ولاي سؤال بلقى جواب وبلقى اللي ايجاوبني.. والاهم مسموح لي اني اسئل.. بعكس الكثير من الديانات واولها المسيحيه ممنوع طرح اسئله في الدين..

هذا جزء من اللي احبه في الدين الاسلامي.. اما المواقف فبصراحه وايد.......

السلبيه...... مب لازم اقول واعور قلبي "اتكلم كمسلمه"..

4- رأيك عن محمد -صلى الله عليه وسلم- ؟؟!!
اذا ماكنت مسلمه.. طبعا مابعرفه..
بس اكيد اذا احد كلمني عنه بخير.. بقرى عن هالشخص اللي هز العالم.. والرأى العام..
خاصه بعد الرسومات اللي ماشفتها ولاابي شوفها ان شااءالله..

5- ماهي احتمالية اشهارك للاسلام وهل هي مشروطة بشي؟؟!!
ممكن اسلم.. اذا لقيت شخص مسلم يعكس لي صوره ايجابيه عن الاسلام.. شي ممكن ايحرك قلبي بحب هالدين اللي خلى هالانسان ايسوي هالشي.. والاهم .. احد ايشجعني.. وخاصه اذا كان شخص قريب.. صديقه او زميله..

6- شنو العمر اللي تتوقع انك راح تسلم فيه وليش؟؟
يمكن بعد ال 25.. لاني بكون وقتها مستقره في دراستي ومهنيا واسريا.. والاستقرار النفسي اكيد بيساعد اني ادخل في دين جديد.. لانه شي مب سهل.. هذا عالم جديد.. وحياه مليئه بالالتزامات الجديده.. واكيد بعد فتره من اقتناعي بالدين السلامي ودراسته..

7 اشخاص من حياتك الشخصية ممكن يكونون السبب في اسلامك,, واشخاص من قطريز وليش؟؟!!
حياتي الشخصيه.. واااايد.. وخاصه الاجنبيات المسيحيات اللي تغزلوا بالاسلام وناويين يسلمون باذن الله.. سبحان الله صج انك لاتهدي من احببت ولكن الله يهدي من يشاء..
وكتريز.. :) كتريز بكبره ممكن ايساعدني.. طبعا مااتكلم عن الشبكه.. اتكلم عن الاشخاص اللي فيها.. لانه كل شي لله وفي الله..

8 - بين النقاب وبين الحجاب اللي ينلبس مع السكيني جينز,, شنو ممكن بتعلق عن هذا الموضوع كشخص غير مسلم؟؟
ان هالانسانه مغصوبه.. وانه مب عاجبها دينها.. بس ماعندها خيار تعتنق دين غيره.. مع انه "لااكراه في الدين".. وخلاص يايبه تحجبي لين تقتنعين .. ولاانهم يبينون لغير المسلمين صوره سيئه عن المرأه الحجاب والاسلام..

9- والحين كمسلم,, هل تجد العذر للغرب بانهم ينظرون لنا هذه النظرة؟؟!!
نعم.. اجد لهم العذر منذ ازمان.. ولكن سأظل مؤمنه بأن كل امورنا هذه خير على امتنا الاسلاميه..
وبنتحمل ومالنا غير الصبر والدعاء.. والعمل على التعريف بديننا والدفاع عنه كلما سنحت لنا الفرصه..

طبعا هذا كله لو ماكنت مسلمله.. بس الحمدلله على نعمه الاسلام ..
ووالله حسيت بتأنيب الضمير على اجاباتي.. بس جاوبت بكل صراحه.. على شان الناس تحط نفسها في هالموقف بعد.. اذا كنا مكانهم.. ليش انلومهم.. اهمه مب مجبورين ايحبونا ويفهمونا اذا احنا ماتكفلنا بالطريقه الصح ان احنا انفهمهم اللي نبيه يوصل لهم ونعكس الصوره الصح..

والله ايوفقكم..

[S.A.M]

امم ممكن اجاوب على سؤوال واحد..شيصير اذا شفت وحدة لابسه حجاب ولا نقاب؟؟

بصراحة..بصراحة...بصورها ..لاني احب اصور اشكال الناس المختلفة..