مسلح يقتل 8 ويقتل نفسه في احد مولات نبراسكا

[R. Al-Harami]

السلام عليكم ورحمة الله وبركاته

اليوم جينا بنطلع .. قلنا قبل لا يبتدي الفاينلز الاسبوع الجاي وننكرف صح .. نروح السينما :okkiale:

تونا بنطلع ولا نسمع في الاخبار Breaking News

في منطقة تبعد عنا 10 دقايق فقط بالسيارة وكنا مضطرين نمر عندها


شخص مسلح عمره 19 سنة قتل 8 ونفسه وجرح 4 في احد المولات القريبة
.. من اسبوع بس انفصل من شغله في ماكدونلدز .. واهله طاردينه من البيت من فترة .. وكان يثير المشاكل ..

كتب ورقة يبين فيها نواياه الانتحاريه .. يقول فيها انا اسف على كل شي وماراح اكون عالة على عائلتي خلاص و ان عقب ما يذبح هالناس راح يصير مشهور !!

انا قبل لا اعرف التفاصيل قلت قبل كل شي يا رب ما يطلع مسلم ولا عربي ..

احنا مش ناقصين مشاكل كفايه 11 سبتمبر والويلات اللي صارت للعرب والمسلمين من عقب 11 سبتمبر ..

اللهم لا شماته .. بس زين ان طلع امريكي ..

بس صراحه والله مت من الخوف .. قلت مافي طلعه الا على المطار عقب الفاينلز

لأن وحشتني الوالدة اللي يطول بعمرها وهلي وربعي ووحشتني الدوحة بكبرها:piange: .. وما بقى شي على السفر ..

الله يحفظكم جميعاً .. ويسلمكم من كل شر

ويرجع كل شخص مغترب عن هله وعن بلاده بالسلامة ان شاءالله ..

[Jassim Al-Naama]

عليكم السلام والرحمة والبركة

الحمدلله على السلامة اختي .. وسبحان الله لو كنتوا طالعين قبل لتسمعون الاخبار جان الله يستر شكان بيصير :)

ذكرتيني باحد المشاهد اللي صارت جدام عيني الصيف الماضي بأمريكا في برنامج الميبي :: كان اخر الايام وتواعدنا حول 14 شخص طلعنا بالليل لأحد الاحياء في واشنطن المشهورة بعدم الأمان ..لكن كانت اخر الايام وكنا 14 شخص فماخفنا وكنا نتمشى .. دخلنا ماكدونالدز نتعشى .. الاشكال كانت جدا مريبة وخوفتنا لكن عادي جلسنا .. !! واحنا بالسيد نطلب والا نسمع اصوات سب واثنين امريكان يتهاوشون !! شوي والا الاصوات علت .. وماقمنا نسمع بعض ..شوي والا نشوف كراسي تتحذف فوقنا وحدايد !! صارت هوشة كبيرة وتدخل فيها مجموعة كبيرة من الاشخاص اكثر من 10 يتهاوشون ويتضاربون .. واحنا مب مصدقين نفسنا !! نطالع !! سمعنا صوت طلق ناري !!هناك فعلا خفنا بشكل لايتصور @@ وسمعنا الطلق مرة ثانية وبدأ الصراخ داخل المطعم .. طلع نصنا بره ركيييض والنص الثاني من الخوف طلعوا الله يهداهم فوق بدال ليطلعون بره @@ ومسكين احد الشباب دعم الباب الزجاجي من الخوف نسى يفتحه ودخل بالباب !! .. طلعنا بره وداخل لحين هوشة وضرب ودمان وكل شي ينحذف وولع جرس الانذار ... الشباب كانوا فوق .. واضطرينا 3 منا ندخل داخل ونروح فوق وننزلهم .. بس الله ستر اللي كانوا يتهاوشون ماقربوا صوبنا .. طلعنا على طول من البوابة واشررررد ولين بعدنا شوي من المطعم وعبرنا الشارع قمنا نتناقش في الي صار واللي يضحك على نفسه .. الشرطة جاوا وسكروا المنطقة :)


امريكا بلد الجرايم والمشاكل .. فالله يعينكم اختي على هالبلاوي :)

ترجعون بالسلامة ان شاء الله وبالتوفيق بالامتحانات ..

[R. Al-Harami]

الله يسلمك من كل شر وسو :sorrriso:

ايي والله صدقت اخوي جاسم..صج والله بلد جرايم..

وغير هذا كله من فترة صار اعتداء على احد الطلبه القطريين هنيه..بس الحمدلله الله ستر
والله انا من سمعت هالحادث وانا مرتعبة..
اقول الله يحفظنا ويستر علينا لين مانرجع للدوحه

يالله مابقى شي على الرجعه هالاسبوع الفاينلز

وتكفون ادعولنا الله وفقنا وياكم

[F.Aldosari]

...السلام عليكم والرحمة والبركة...

...خطاكم الشر أختي R. Al-Harami والحمدلله على سلامتكم...

...اليوم شفت هالخبر فالتلفزيون وتم ذكر أن عنف المراهقين وجرايم القتل على ايدهم قامت تزيد بشكل فظيع فالمولات والجامعات والمدارس...

...بس ما أدعي الا الله يحفظكم ويحفظ كل مسلم ...

....وتذكري أختي العزيزة ((احفظ الله يحفظك...احفظ الله تجده أمامك))...

...تحيــــــــــــــــاتي...

[M.Y]

@@
الله يعينكم و يحفظكم انشالله من كل شر
بس دام ان البلد خطر كان غيرتوا !!
يعني انتوا بنات خلكم دوم ويى بعض والله تخرع السالفه
الله يحفظكم انشالله من كل شر وتردون سالمين

[R.A.A]

السلام عليكم ورحمة الله وبركاته

أولا حمدلله على السلامة

وثانيا....الجرائم منتشره بكل دول العالم ومن ضمنها بلدنا الحبيب قطر. ولكن عموما تكثر الجرائم في دول االعالم الغير مسلم مثل أورباء و أمريكا بحكم قل الايمان والوازع الضميري والفقر وشي من تفاهه التفكير.

ولكن عموما من خلال تجربتي الشخصيه لمدة 4 سنوات وبعد احداث 11 سبتمبر...لكم ارى ولم اتعرض إلى اي موقف عنف ولا اي شي إجرامي. وتخرجنا ورجعنا الحمدلله بالسلامة وبالشهادة.

الله الحافظ والانسان بكل مكان يتوكل على الله ويتخذ بالأسباب. فمن يذهب لأماكن مشبوهه في أوقات خطره لايتوقع ان لايتعرض او حتى لايرى الجرائم. الداون تاون في الويك اند خطر
الخروج بعد غياب الشمس وحيدا ..خطر
التمشي في شوارع و مناطق فقيره و تكثر فيها الجاليات الافريقيه ...خطر
الخروج من المنزل بأبهى حله و أغلى ملبس و أكشخ سياره والتجول في مناطق ذات أمن ضعيف...خطر.
وأتخذوووووووووا بالأسباب. ولا ترموا بأنفسكم إلى التهلكه.

وبالنهايه إنما الأعمال بالنيات....فالذي يسافر لطلب العلم لوجه الله ..رب العالمين متكفل بحفظه....و الذي يريد شيئا أخر او ينسى او يلهى عن هدفه و يتساهل بدينه وباذكاره وبصلاته وصيامه والتزامه ويعرض نفسه للشبهات و لمغريات الشياطين ووسوساتهم...فسوف يتعرض لهكذا شي.

توكلوا على الله أخواني و أخواتي إينما كنتم تطلبون العلم لوجه الله في مختلف دول العالم ومن أجل رفع اسم بلدنا قطر...فالله حافظكم باذنه وعونه.

وخصوصا أمريكا...سوق العلم في أشد الحاجه لخريجين امريكا و شهاداتها لانها دولة يكثر التعامله معاها على جميع الاصعدة ونحتاج خريجون متعلمون متثفقون ويعرفون كيف التعامل بذكاء مع أهلها وفهمهم جيدا.

حفظكم الله ووفقكم لما يحبه ويرضاه.

[Dana Al-Kuwari]

@@
بس دام ان البلد خطر كان غيرتوا !!
يعني انتوا بنات خلكم دوم ويى بعض والله تخرع السالفه


هههههههههههههههههههههههههههههههههههههه

والله مت من الضحك
حلوه ذي بنات وخلكم دوم ويا بعض

وين رايحين الجيزه ولا المقطم احنا؟؟

يبه امريكا هذي
يعني بدال ماتقول اطلعوا ويا شباب تقول خلكم ويا بعض؟؟
بالعكس اصلاً الشباب هم الامان والحمايه وعيالنا والعرب بشكل عام شيوخ فيهم نخوه وغيره علينا
كم مره صارلي موقف وامريكي سكران يبي يمد يده صوبي ويقوم له واحد من الشباب ويلعن قفده
بالله عليك لو بنت وياي شبتسوي؟؟

بتوقف على جنب و تتفرج


ولله الحمد كاليفورنيا انا اعتبرها امان
يمكن لان الاماكن الي اتوافد فيها امان

بس بخصوص نبراسكا
احسها ولايه تعبانه حد يدرس فيها؟؟؟

في اماكن و اوبشن اكثر.. بس نرجع ونقول لكل طالب ظروفه

[R. Al-Harami]

ايي صدقتي يا دانة ترى اخواننا هناك صج ما قصروا .. والنعم فيهم ..


اذا على الولاية مبدائياً ان هناك بس ان شاءالله ماراح اقعد هناك بحول على دي سي ولا بيتسبيرغ ولا اي مكان ثاني .. الله كريم :sorrriso:

تسلمين دانه .. وعسى الله يوفقج ان شاءالله حبوبة :)

[Dana Al-Kuwari]

يقولج المثل خلج علر مينونج لا يجيج اين منه

كنت في فلوريدا قبل لا ادش كاليفورنيا
واموري كانت سهالات دف دف الايام كانت تمشي واموري ماشيه سليم
من يوم ماغيرت الجامعه تحسفت قد شعر راسي

ماقدر ارجع لها مره ثانيه
لان الدنيا تغيرت وصارت جامعه معترف فيها وجامعه غير معترف فيها
لو كنت تامه فيها كنت بالراااااحه بيعطوني استثاء بما اني من طلاب الجيل الذهبي" التربيه والتعليم"
وجامعه زينه وسهله ومن شله اعزمي البروفيسور على مطعم وينجحج

مالومهم لي حطوا قائمه بالجامعات المعترف فيها

لان صج كانت في جامعات لا تعليق
مالت شاي كرك ههههههههههههههههههههههههههههههههههه

تحياتي لج وتمنياتنا بالامان لكل ولايه فيها طالب او طالبه من طلابنا الامورين